ཇོ་བོ་རྗེའི་རྣམ་ཐར་བརྒྱད་པ།
འབྲོམ་རིན་པོ་ཆེས་ཐབས་མཁས་ཀྱིས་ཇོ་བོའི་སྙན་དུ་བོད་ན་སྐུ་གསུང་ཐུགས་རྟེན་མཐའ་ཡས་པ་ཡོད་ཚུལ་དང་དགེ་འདུན་གྱི་སྡེ་མང་པོ་ཆགས་ཏེ་དགེ་འདུན་སྟོང་ཕྲག་མང་པོ་ཡོད་ཚུལ་སོགས་ཞུས་པ་ན་ཇོ་བོ་དགྱེས་ནས་བོད་ལ་ཞལ་གཟིགས་ཏེ་ཕྱག་ཐལ་མོ་སྦྱར་དགེ་འདུན་དེ་སྙེད་བཞུགས་ན་དགྲ་བཅོམ་པ་ཡང་ཡོད་ངེས། བྱང་ཆུབ་སེམས་དཔའ་ཡང་མང་པོ་ཡོད་དུ་ངེས་གསུངས་ནས་མཉེས་མཉེས་མཛད།
བོད་དུ་འབྱོན་པར་བཞེད་པ་ན་འབྲོམ་རིན་པོ་ཆེས་དབུས་ཕྱོགས་ཀྱི་དགེ་འདུན་གྱི་སྡེ་རྣམས་སུ་འཕྲིན་ཡིག་བརྫངས་ཏེ། དེའི་ཚེ་དབུས་ན་བསྟན་པའི་ཁུར་བཞེས་པའི་བཤེས་གཉེན་ཆེ་བ་རྔོག་ལེགས་པའི་ཤེས་རབ་དང༌། ཁུ་སྟོན་བརྩོན་འགྲུས་གཡུང་དྲུང་སོགས་མང་དུ་བཞུགས་ཡོད་ཀྱང་ཞུ་ཡིག་གི་གཉེར་ཁ་ཀ་བ་ཤཱཀྱ་དབང་ཕྱུག་ལ་གཏད་དེ་བོད་ཀྱི་བླ་ཆེན་མི་ཆེན་རྣམས་ཀྱི་ཇོ་བོ་ཨ་ཏི་ཤ་གདན་འདྲེན་པར་སྟོན་དུས་ཚུན་ལ་འབྱོར་པ་ཅིས་ཀྱང་མཛོད་ཅེས་ཞུ་འཕྲིན་ཕུལ་བ་དགེ་བཤེས་ཀ་བས་བོད་ཀྱི་བླ་ཆེན་རྣམས་ལ་བརྡ་བྱས་ཏེ་ཐམས་ཅད་བློ་མཐུན་པར་མང་ཡུལ་སྐྱིད་གྲོང་ཕྱོགས་སུ་ཇོ་བོ་གདན་འདྲེན་དུ་འབྱོན་པའི་གྲབས་བྱས་པ་ན། ཁུ་སྟོན་གྱིས་སོགས་ཁོངས་སུ་འཇོག་པའི་མི་དེ་ང་མིན་ངས་སྔོན་ལ་ཕྱིན་ནས་ཇོ་བོ་གདན་འདྲེན་ཐུབ་པ་ཞིག་བྱེད་གསུངས་ནས་སྔོན་ལ་ཕེབས་པ་ན་གཞན་ཐམས་ཅད་ལ་ལྕག་བཏབ་པ་ལྟར་ཐམས་ཅད་འུར་ལངས་ཀྱིས་འཕྲལ་དུ་ཐོན་ཏེ་ཕེབས་བསུ་ལ་འཛོམ། ཇོ་བོ་རྗེས་སྐྱིད་གྲོང་དུ་ལོ་གཅིག་བཞུགས་རིང་དེ་ལ་གཙོ་བོར་རང་བྱུང་འཕགས་པའི་ལྷ་ཁང་དུ་སྐལ་བ་དང་ལྡན་པ་མང་པོ་ལ་ཆོས་ཀྱི་འཁོར་ལོ་བསྐོར།
རང་བྱུང་འཕགས་པའི་བྱང་རི་ནགས་ཁྲོད་ཕུན་སུམ་ཚོགས་པ་ཞིག་ཡོད་པའི་ངོས་ལ་ཕེབས་ཏེ་གནས་དེར་སངས་རྒྱས་ཀྱི་བསྟན་པ་དར་བའི་རྟེན་འབྲེལ་བསྒྲིགས། ཇོ་བོས་གནས་དེར་བྱོན་ནས་བྱིན་གྱིས་བརླབས་སོ་ཞེས་ཕྱི་མའི་སྐྱེ་བོ་རྣམས་ལ་སྣང་བ་བྱ་བའི་ཕྱིར་རྡོ་ལ་ཕྱག་མཛུབ་ཀྱིས་མ་ཎི་བྲིས་ཏེ་བཞག་པས་གནས་དེ་ལ་མ་ཎི་ལ་ཁ་ཞེས་མིང་ཆགས། གནས་དེ་ནི་དེང་སང་བཀྲ་ཤིས་བསམ་གཏན་གླིང་གི་སྒྲུབ་སྡེ་ཆགས་པའི་གནས་འདི་ཡིན་ཏེ། མ་ཎི་ཇོ་བོའི་ཕྱག་བྲིས་མ་དེ་ནི་དེང་སང་ཡང་བལྟར་ཡོད་དོ། །དེ་ལོ་ཇོ་བོས་དབྱར་གནས་མཛད་པའི་ས་དེ་ལ་གནས་ཞེས་མིང་དུ་ཆགས། དེར་ཇོ་བོས་སྐལ་བ་དང་ལྡན་པ་མང་པོ་ལ་ཆོས་སྟོན་པར་མཛད། ཡང་ཇོ་བོས་སྐལ་ལྡན་མང་པོ་ལ་ཆོས་འཁོར་རྒྱ་ཆེར་བསྐོར་བའི་གནས་ལ་ཆོས་འཁོར་ཞེས་མིང་ཆགས་ཏེ། དེང་སང་ཡང་གྲྭ་ཆོས་འཁོར་དང་ལ་ལྡབས་ཆོས་འཁོར་ཞེས་མིང་དུ་ཆགས་ཤིང་ཡུལ་དེ་དང་དེ་དག་ན་གནས་པའི་སྐྱེ་བོ་རྣམས་ཇོ་བོ་རྗེ་ལ་གསོལ་བ་འདེབས་པ་ལྷུར་བྱེད་དོ། །དེའི་ཚེ་ནག་ཚོ་ལོ་ཙཱ་བ་ཇོ་བོ་རྒྱ་གར་ལ་འཕྲལ་དུ་སྤྱན་འདྲེན་ནི་མ་ཐུབ། བི་ཀ་མ་ལ་ཤཱི་ལའི་གནས་བརྟན་གྱིས་དམ་ཚིག་ལ་བཀར་བ་དྲན་ནས་ཡིད་སློང་སློང་པོར་གྱུར་པ་ན་ཇོ་བོ་རྗེས་མཁྱེན་ནས། ལོ་ཙཱ་བ་དེ་ཙམ་གྱི་སེམས་ངལ་བྱ་མི་དགོས་བསྒྲུབ་པར་མ་ནུས་པ་ལ་ཉེས་པ་མེད་གསུངས་པ་ན། ལོ་ཙཱ་བ་གཏིང་ཐག་པ་ནས་དགའ་ཞིང་མགུ་སྟེ་དེ་ལྟར་ན་ཇོ་བོ་བོད་ལ་འབྱོན་པར་ཞུ་ཞེས་གསོལ་བ་བཏབ།
དེ་ནས་དབུས་གཙང་གི་བླ་ཆེན་མི་ཆེན་རྣམས་ཀྱི་བསུ་བ་སླེབས། དེའི་ཚེ་བོད་ཀྱི་བླ་མ་ཆེན་པོ་རྣམས་ཀྱིས་བོད་ཀྱི་གཟབ་འཕྱོར་གྱི་ཆས་བསེ་ཐེབ་དང་ཆུ་ཕྱིང་གྱོན་རྟ་བཟང་པོ་ལ་ཆིབས་ནས་འོངས་པ་ན་ཇོ་བོས་རྒྱང་རིང་པོ་ནས་གཟིགས་མ་ཐག ཨུ་པ་སི་ཀ་འདྲེ་མང་པོ་སླེབས་བྱུང་ཅི་ཡིན་ཞེས་དབུ་ན་བཟས་གཏུམས་ནས་བཞུགས།དེ་ནས་འབྲོམ་རིན་པོ་ཆེས་བོད་ཀྱི་བླ་ཆེན་རྣམས་ལ་རབ་བྱུང་གི་ཆས་རྣམ་དག་མཛད་ནས་བྱོན་ཞེས་ཞུས་ནས་ཐམས་ཅད་ཀྱིས་ཆོས་གོས་རྣམ་པ་གསུམ་ལེགས་པར་བགོས་ཏེ་ཕེབས་པ་ན་ཇོ་བོ་མཉེས་ནས་བཞེངས་ཏེ་ཕྱག་ལན་མཛད། དེ་ནས་རིམ་གྱིས་གཙང་ཕྱོགས་ལ་ཕེབས་ཏེ་དཔལ་ཁུད་ཐང་དུ་མར་པ་ལོ་ཙཱ་རྒྱ་གར་རྟིང་མ་ཕེབས་པ་དང་མཇལ། མར་པས་ཇོ་བོའི་ཞབས་སྤྱི་བོར་བླངས་ཏེ་ཆོས་ཞུས། ཇོ་བོས་ངའི་ལོ་ཙཱ་ལ་འགྲོ་གསུངས་པས།ད་རེས་ཅིས་ཀྱང་རྒྱ་གར་དུ་ཕྱིན་ཆོག་པ་དགོས་སླར་མཇལ་ཆོག་པ་ཞུ་ཞེས་ཞུས། དེ་ནས་རིམ་གྱིས་ཕེབས་ཏེ་ས་སྐྱའི་ཐད་དུ་ཕེབས་པ་ན། ས་སྐྱ་ལ་ཕྱག་མཛུབ་གཏད་དེ་གནས་འདིར་འཇམ་དབྱངས་ཀྱི་སྤྲུལ་པ་བདུན་འབྱུང་ཞེས་ལུང་བསྟན། དེ་ནས་རྒྱང་དུ་ཕེབས་གནས་དེའི་དགེ་འདུན་རྣམས་ལ་ཆོས་མང་དུ་གནང༌། དེར་འབྲོག་མི་ལོ་ཙཱ་བས་ཇོ་བོའི་ཞབས་ལ་གཏུགས། བསྙེན་བཀུར་ཕུན་སུམ་ཚོགས་པ་མཛད།
དེ་ནས་རིམ་གྱིས་ཕེབས་ཏེ་སྣར་ཐང་གི་ཐད་དུ་ཕེབས་པ་ན་གནས་འདིར་འཕགས་པའི་གནས་བརྟན་གྱི་སྤྲུལ་པ་འབྱུང་ཞེས་ལུང་བསྟན། དེ་ནས་ཚོང་དུས་སུ་ཕེབས་ཏེ་ཞ་ལུ་མཐིལ་གྱི་ལྷ་ཁང་དང༌། ཁྱད་པར་རི་སྦུག་ཏུ་བཞུགས་ནས་ཆོས་མང་དུ་གསུངས་ཤིང་བྱིན་གྱིས་བརླབས། དེ་ནས་མྱང་སྟོད་ཉན་ཚོར་བྱོན་ནས་དབྱར་གནས་མཛད། དབྱར་ཟླ་བ་གསུམ་གྱི་རིང་ལ་ཕྱོགས་ཕྱོགས་ནས་འདུས་པའི་དད་ལྡན་མང་པོ་ལ་ཆོས་རྒྱ་ཆེར་སྩལ། ཡོལ་ཆོས་དབང༌། ཡོལ་དྲང་སྲོང༌། ཡོལ་ཐོག་འབེབས་གསུམ་དང༌། རྗེ་འགོས་ལོས་ཀྱང་གནས་དེར་ཕེབས་ནས་ཇོ་བོའི་ཞབས་ལ་གཏུགས། དགེ་བའི་གཤེས་གཉེན་དགོན་པ་བས་ཀྱང་གནས་དེར་ཕེབས་ནས་ཇོ་བོའི་ཞབས་ལ་གཏུགས་ཏེ་ཇོ་བོའི་མཆོད་གནས་མཛད།
རྩོམ་སྒྲིག་པ། མང་ར་བ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn
