སློབ་དཔོན་མཧཱ་ཤྲཱི་རཏྣ་བོ་དྷི་སཏྭ། བོད་སྐད་དུ་བྱང་ཆུབ་སེམས་དཔའ་ཆེན་པོ་རིན་ཆེན་དཔལ་ཞེས་པ་ནི། སྐྱེས་མཆོག་བྱམས་པའི་རྣལ་འབྱོར་པ་སྟེ་འདིའི་རྣམ་པར་ཐར་པ་སྔར་བརྗོད་ཟིན་པ་ལྟར་རོ། །བླ་མ་གསེར་གླིང་པ་ཆེན་པོའི་རྣམ་ཐར་ཡང་སྔར་བརྗོད་ཟིན་ལ། བླ་མ་གསེར་གླིང་པའི་ཞབས་དྲུང་དུ་ཇོ་བོ་རྗེ་དཔལ་ལྡན་ཨ་ཏི་ཤས་བདག་གཞན་མཉམ་བརྗེའི་བྱང་ཆུབ་ཀྱི་སེམས་སྦྱོང་བའི་གདམས་ངག་ཅེས་པ་བློ་སྦྱོང་དོན་བདུན་མའི་ཁྲིད་ལོ་བཅུ་གཉིས་ཀྱི་བར་དུ་ཕྱི་ནང་གི་གཡེང་བ་གང་གིས་ཀྱང་བར་མ་ཆོད་པར་གསན་པར་མཛད་དེ་ཇོ་བོ་རྗེའི་རྣམ་པར་ཐར་པ་ནི་ད་ལྟ་ཉིད་དུ་འཆད་པར་འགྱུར་རོ། །

              རླབས་ཆེན་སྤྱོད་རྒྱུད་ཀྱི་གདམས་ངག་གི་སྙིང་པོ་བདག་པས་གཞན་གཅེས་པའི་བྱང་ཆུབ་ཀྱི་སེམས་མ་སྐྱེས་པ་བསྐྱེད་པ་དང་སྐྱེས་ཟིན་གོང་འཕེལ་དུ་བྱས་ཏེ་སེམས་རིན་པོ་ཆེ་འདིའི་སྒོ་ནས་ས་ལམ་བགྲོད་ཚུལ་སྟོན་པའི་གཞུང་མཆོག་ཏུ་གྱུར་པ་ནི་མདོ་སྡེ་ཕལ་པོ་ཆེ་དང༌། དེའི་དགོངས་པ་འགྲེལ་པའི་གཞུང་རིན་ཆེན་ཕྲེང་བ་དང༌། རྨི་ལམ་ཡིད་བཞིན་ནོར་བུའི་གཏམ་དང༌། སེམས་ཅན་མགུ་བའི་ཚིགས་བཅད་དང༌། སྤྱོད་འཇུག་དང་བསླབ་བཏུས་རྣམས་དང༌། མདོ་དང་བསྟན་བཅོས་དེ་དག་གི་མན་ངག་རྩ་ཚིག་ཏུ་དྲིལ་བ་བླ་མ་གསེར་གླིང་པ་དང༌། ཇོ་བོ་རྗེ་གཉིས་ཀྱི་མཛད་པའི་བློ་སྦྱོང་རྩ་ཚིག་དང༌། དྷརྨ་རཀྵི་ཏས་མཛད་པའི་བློ་སྦྱོང་མཚོན་ཆ་འཁོར་ལོ་དང༌། བྱམས་པའི་རྣལ་འབྱོར་པས་མཛད་པའི་གྱེར་སྒོམ་རྡོ་རྗེའི་གླུ་དང༌། བླ་མ་གོང་མ་གཅིག་ནས་གཅིག་ཏུ་བརྒྱུད་པའི་བློ་སྦྱོང་གི་ཁྲིད་དམིགས་མདོར་བསྡུས་སུ་བཀོད་པ་རྒྱལ་སྲས་ཐོགས་མེད་བཟང་པོས་མཛད་པའི་བློ་སྦྱོང་དོན་བདུན་མ་དང༌། རྗེ་རིན་པོ་ཆེས་བློ་སྦྱོང་གི་ཁྲིད་རྒྱས་པ་གནང་དུས་སེམས་དཔའ་ཆེན་པོ་ཧོར་སྟོན་པས་ཟིན་བྲིས་སུ་བཏབ་པའི་བློ་སྦྱོང་གི་ཁྲིད་ཡིག་ཆེན་མོ་དང༌། རྗེ་དགེ་འདུན་གྲུབ་ཀྱིས་མཛད་པའི་ཐེག་ཆེན་བློ་སྦྱོང་དང༌། པཎ་ཆེན་བློ་བཟང་ཆོས་ཀྱི་རྒྱལ་མཚན་ཡབ་སྲས་ཀྱིས་མཛད་པའི་བློ་སྦྱོང་ཆེ་ཆུང་དུ་མ་ཡོད་ཅིང༌། རྒྱ་བོད་དུ་སྔོན་བྱུང་བའི་བློ་སྦྱོང་གི་ཡིག་ཆ་ཕལ་མོ་ཆེའི་ལེགས་ཆ་བསྡུས་ཤིང༌། རྗེ་བདག་ཉིད་ཆེན་པོའི་སྙན་བརྒྱུད་ཀྱི་མན་ངག་གིས་བརྒྱན་ནས་བདག་གཞན་མཉམ་བརྗེའི་བྱང་ཆུབ་ཀྱི་སེམས་སྒོམ་ཚུལ་རྩལ་དུ་བཏོན་པ་བདག་གིས་སྦྱར་བའི་བློ་སྦྱོང་གི་ཁྲིད་ཡིག་ཆེན་མོ་བློ་བཟང་དགོངས་རྒྱན་ཞེས་བྱ་བ་ཞིག་ཀྱང་ཡོད་དོ། །དེས་ན་བྱང་ཆུབ་ལམ་རིམ་ལ་ཉམས་ལེན་སྙིང་པོར་བྱ་འདོད་པ་རྣམས་ཀྱིས་བྱང་ཆུབ་ཀྱི་སེམས་སྒོམ་ཚུལ་ལ་ཤིང་རྟ་ཆེན་པོའི་མན་ངག་ཁྱད་པར་ཅན་གཉིས་ཡོད་པ་སོ་སོའི་མན་ངག་ལེགས་པར་མཉན་ལ་གོ་བ་ཕུ་ཐག་ཆོད་པ་བཙལ་ནས་མན་ངག་གཉིས་པོ་གཅིག་ཏུ་བསྲེས་ནས་ཉམས་སུ་ལེན་ཚུལ་ཤེས་པར་བྱ་ལ་བྱང་ཆུབ་ཀྱི་སེམས་རིན་པོ་ཆེ་ལ་བག་ཆགས་ཅི་ཐེབས་བྱའོ།། །།

                                                                                                                           རྩོམ་སྒྲིག་པ། མང་ར་བ།
           གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                  དྲ་བའི་སྦྲེལ་ཐགhttp://www.tb1025.cn