ཇོ་བོ་རྗེ་དཔལ་ལྡན་ཨ་ཏི་ཤས་བྱང་ཆུབ་ལམ་གྱི་རིམ་པ་གསན་པའི་བླ་མ་བརྒྱུད་རིམ། ཇོ་བོ་རྗེ་དཔལ་ལྡན་ཨ་ཏི་ཤས་བྱང་ཆུབ་ལམ་གྱི་རིམ་པ་གསན་པའི་བླ་མ་བརྒྱུད་རིམ་ལ། རྗེ་བཙུན་བྱམས་པ་ནས་ཐོགས་མེད་སྐུ་མཆེད་སོགས་ལ་རིམ་གྱིས་བརྒྱུད་པའི་རྒྱ་ཆེན་སྤྱོད་རྒྱུད་དང༌། རྗེ་བཙུན་འཇམ་དབྱངས་ནས་འཕགས་པ་ཀླུ་སྒྲུབ་ཡབ་སྲས་སོགས་ལ་རིམ་གྱིས་བརྒྱུད་པའི་ཟབ་མོ་ལྟ་རྒྱུད་དང༌། ཡང་རྗེ་བཙུན་འཇམ་དབྱངས་ནས་རྒྱལ་སྲས་ཞི་བ་ལྷ་སོགས་ལ་རིམ་གྱིས་བརྒྱུད་པའི་རླབས་ཆེན་སྤྱོད་རྒྱུད་གསུམ་དུ་ཡོད་དེ་རྒྱུད་པ་འདི་གསུམ་གའི་མན་ངག་ཡོངས་སུ་རྫོགས་པ་ཇོ་བོ་རྗེ་ལ་མངའ་བས་བརྒྱུད་པའི་ཆུ་བོ་གསུམ་འདྲེས་ཞེས་བརྗོད་དོ། །

              རྒྱ་ཆེ་བའི་ལམ་གྱི་རིམ་པའི་བརྒྱུད་རིམ་ལ་གཉིས་སུ་བྱས་པ་ནི་སྐྱེས་བུ་ཆུང་འབྲིང་དང༌། སྤྱོད་པ་སྤྱི་བསླབ་དང༌། ཞི་ལྷག་གི་སྐོར་ལ་ཁྱད་ཆེར་མེད་ཀྱང་བྱང་ཆུབ་ཀྱི་སེམས་རིན་པོ་ཆེ་སྒོམ་པའི་གདམས་ངག་ལ་ལུགས་མི་འདྲ་བ་གཉིས་བྱུང་སྟེ། ལུགས་དང་པོ་ནི་ཤེར་ཕྱིན་གྱི་མདོ་སྡེ་རིན་པོ་ཆེའི་དགོངས་དོན་ལྟར་བྱང་ཆུབ་ཀྱི་སེམས་རིན་པོ་ཆེ་བསྐྱེད་པའི་ཐབས་སུ་ཐོག་མར་སེམས་ཅན་ཐམས་ཅད་ལ་ཉེ་རིང་མེད་པའི་སེམས་སྙོམས་པའི་བཏང་སྙོམས་སྒོམས། དེ་ནས་སེམས་ཅན་ཐམས་ཅད་རང་གི་མ་དྲིན་ཅན་དུ་སྒོམས། དེ་ནས་དྲིན་དྲན་དང་དྲིན་གཟོ་རིམ་གྱིས་བསྒོམས་ཏེ་ཡིད་འོང་གི་བྱམས་པ་བསྐྱེད།དེ་ནས་སྙིང་རྗེ་དང་ལྷག་བསམ་དང་བྱང་ཆུབ་ཀྱི་སེམས་རྣམས་རིམ་གྱིས་སྒོམ་པ་སྟེ་ཚུལ་དེ་ལ་ནི་རྒྱུ་འབྲས་མན་ངག་བདུན་གྱི་སྒོ་ནས་བློ་སྦྱོང་བ་ཞེས་བརྗོད་དོ། །ལུགས་གཉིས་པ་ནི་སྡོང་པོ་བཀོད་པའི་མདོ་སོགས་ཀྱི་དགོངས་དོན་བསླབ་བཏུས་དང་སྤྱོད་འཇུག་གཉིས་ལས་ཇི་ལྟར་གསུངས་པ་ལྟར་བདག་གཅེས་འཛིན་གྱི་སྐྱོན་དང༌། གཞན་གཅེས་འཛིན་གྱི་ཕན་ཡོན་སྒོ་དུ་མ་ནས་བསམས་ཏེ་སེམས་ཅན་ཐམས་ཅད་རང་ལ་རྣམ་པ་ཀུན་ཏུ་ཕན་བདེ་སྟེར་བའི་ཡིད་བཞིན་གྱི་ནོར་བུ་ལྟ་བུར་བསྒོམས་ནས་ཡིད་འོང་གི་བྱམས་པ་བསྐྱེད། དེ་ལ་བརྟེན་ནས་སྙིང་རྗེ་དང་ལྷག་བསམ་དང་བྱང་ཆུབ་ཀྱི་སེམས་རྣམས་རིམ་གྱིས་སྒོམ་པ་སྟེ་ཚུལ་དེ་ལ་ནི་བདག་གཞན་མཉམ་རྗེའི་སྒོ་ནས་བློ་སྦྱོང་བ་ཞེས་བརྗོད་ཅིང༌། དེའི་མན་ངག་ཟུར་དུ་བཀོལ་བ་ལ་བློ་སྦྱོང་དོན་བདུན་མའི་ཁྲིད་ཅེས་ཀྱང་བརྗོད་དོ། །

              འདིའི་བརྒྱུད་རིམ་ནི་བཀའ་གདམས་གླེགས་བམ་ལས། འཇམ་པའི་དབྱངས་དང་བློ་གྲོས་མི་ཟད་པ། །ཨེ་ལ་དྷ་རི་དཔའ་བོ་རྡོ་རྗེ་དང༌། །བྱང་ཆུབ་སེམས་དཔའ་ཆེན་པོ་རིན་ཆེན་དཔལ། །རྩ་བའི་བླ་མ་མགོན་པོ་གསེར་གླིང་པ། །བདག་ལ་རྒྱ་ཆེན་སྤྱོད་པ་སྦྱིན་མཛད་པའི། །དྲིན་ཅན་བླ་མ་དྲུག་ལ་ཕྱག་འཚལ་ལོ། །ཞེས་གསུངས་པ་ལྟར་ཏེ། མགོན་པོ་འཇམ་པའི་དབྱངས་ཀྱིས་རྒྱལ་སྲས་ཞི་བ་ལྷ་ལ་གནང༌། དེས་སློབ་དཔོན་ཨེ་ལ་དྷ་རི་ལ་གནང༌། དེས་སློབ་དཔོན་དཔའ་བོ་རྡོ་རྗེ་ལ་གནང༌། དེས་སློབ་དཔོན་མཧཱ་ཤྲཱི་རཏྣ་བོ་དྷི་སཏྭ་ཞེས་པ་བོད་སྐད་དུ་བྱང་ཆུབ་སེམས་དཔའ་ཆེན་པོ་རིན་ཆེན་དཔལ་ལ་གནང༌། དེས་མགོན་པོ་གསེར་གླིང་པ་ལ་གནང༌།དེས་ཇོ་བོ་རྗེ་ལ་གནང་ངོ༌། །འདིའི་བློ་གྲོས་མི་ཟད་པ་ཞེས་པ་རྒྱལ་སྲས་ཞི་བ་ལྷའི་མཚན་གྱི་རྣམ་གྲངས་ཡིན་ནོ། བརྒྱུད་རིམ་འདིའི་བླ་མ་རྣམས་ཀྱི་རྣམ་པར་ཐར་པ་ནི་སྟོན་པ་ཐུབ་པའི་དབང་པོ་དང་རྗེ་བཙུན་འཇམ་པའི་དབྱངས་གཉིས་ཀྱི་རྣམ་ཐར་སྔར་བརྗོད་ཟིན་པ་ལྟར་ཡིན་ལ།། །།

                                                                                                                                      རྩོམ་སྒྲིག་པ། མང་ར་བ།
             གསལ་འདེབས། 
                     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                     དྲ་བའི་སྦྲེལ་ཐགhttp://www.tb1025.cn