རིགས་པའི་ཁུ་བྱུག་ཆེ་བ། དེ་སྲས་ཐུ་བོ་རིགས་པའི་ཁུ་བྱུག་ཆེ།ཞེས་བསྔགས་པ་རིགས་པའི་བུ་བྱུག་ཆེ་བ་སྐུ་གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང༌། ལོ་ལོན་ནས་བསྙེན་པར་རྫོགས། བི་ཀ་མ་ལ་ཤཱི་ལར་སྡེ་སྣོད་གསུམ་ལ་སྦྱངས་ཏེ་མཁས་པའི་ཕུལ་དུ་ཕྱིན་པར་གྱུར། སློབ་དཔོན་ཟླ་བ་གྲགས་པ་ལ་འཕགས་པ་ཀླུ་སྒྲུབ་ནས་བརྒྱུད་པའི་མདོ་སྔགས་ཀྱི་མན་ངག་རྣམས་རྫོགས་པར་གསན། ནང་དུ་ཡང་དག་འཇོག་ལ་རྩེ་གཅིག་ཏུ་བཞུགས་ཏེ་ཐེག་པ་ཆེན་པོའི་ལམ་གྱི་རིམ་པ་ལ་ཉམས་རྟོགས་ཕུལ་དུ་ཕྱིན་པ་ཐོབ། ལྟ་བའི་བཀའ་གནད་ཕྲ་མོ་འགའ་ཞིག་ལ་ངེས་པ་དྲང་བའི་ཕྱིར་བླ་མ་དང་ལྷག་པའི་ལྷ་དབྱེར་མེད་པ་ལ་གསོལ་བ་ཤུགས་དྲག་ལ་རྒྱུན་རིང་བ་བཏབ། བསག་སྦྱང་རྒྱ་ཆེན་པོ་ལ་འབད་པས་དཔལ་མགོན་འཕགས་པ་ཀླུ་སྒྲུབ་ཀྱིས་དངོས་སུ་ཞལ་བསྟན་ནས་ལྟ་བའི་དཀའ་གནས་ཕྲ་མོ་རྣམས་ཞིབ་ཏུ་བསྟན་ཏེ་མཚན་འཛིན་གྱི་འཆིང་བ་མ་ལུས་པ་དྲུང་ཕྱུང་བར་མཛད།

              མངའ་རིས་ཆོས་རྒྱལ་བྱང་ཆུབ་འོད་ཀྱིས་ནག་ཚོ་ལོ་ཙཱ་བ་ཇོ་བོ་སྤྱན་འདྲེན་དུ་བཏང་བའི་ཚེ་ནག་ཚོ་ལོ་ཙཱ་བས་བི་ཀ་མ་ལ་ཤཱི་ལར་ཕྱིན་ནས་ཇོ་བོ་གང་དུ་བཞུགས་བཅད་དཔྱད་པའི་ཚེ་བི་ཀ་མ་ལ་ཤཱི་ལའི་ཚོགས་སུ་པཎྜི་ཏ་ཀུན་གྱི་གྲལ་དབུ་ལ་བཞུགས་པ་སྐུ་བགྲེས་ཤིང་བརྗིད་ཆགས་པ་འདི་མགོན་པོ་ཨ་ཏི་ཤ་ཨེ་ཡིན་ཞེས་དྲིས་པས། བོད་ཀྱི་ཚེ་དང་ལྡན་པ་ཅི་ཟེར།འདི་དཔལ་ལྡན་ཟླ་བ་གྲགས་པ་ལ་ཆོས་དངོས་སུ་ཉན་པ་རིགས་པའི་ཁུ་བྱུག་བྱ་བ་ཨ་ཏི་ཤའི་ཡང་བླ་མ་ཡིན་ཟེར། རིགས་པའི་ཁུ་བྱུག་འདི་མགོན་པོ་ཀླུ་སྒྲུབ་ཀྱི་ཡང་དངོས་སློབ་ཡིན་ཏེ།མཁས་གྲུབ་རིན་པོ་ཆེའི་གསང་བའི་རྣམ་ཐར་དུ་ཡང་རིགས་པའི་ཁུ་བྱུག་ཏུ་སྐྱེ་བ་བཞེས་དུས་འཕགས་པ་ཀླུ་སྒྲུབ་བྱོན་ནས་ལྟ་བའི་གནད་ཤིན་ཏུ་ཕྲ་བ་བསྟན་ནས་དངོས་འཛིན་གྱི་འཁྲུལ་པ་རྩ་བ་ནས་དྲུང་ཕྱུང་བར་མཛད་ཅིང༌། ཀླུ་སྒྲུབ་ཀྱི་ཞལ་ནས། ངེད་རྒྱ་གར་གྱི་གྲུབ་ཐོབ་རྣམས་འཇམ་དབྱངས་ལ་བསྟེན་པ་ཡིན།

              དེའི་རྒྱུ་མཚན་ཡང་གསུང་རབ་ཀྱི་དཀའ་བའི་གནད་ཤིན་ཏུ་ཕྲ་བ་བྱུང་ན་རྗེ་བཙུན་འཇམ་དབྱངས་ལ་གསོལ་བ་བཏབ་ནས་ཟབ་མོའི་དོན་ལ་དཔྱོད་པ་ཡིན། ཁྱོད་ཀྱང་རྗེ་བཙུན་འཇམ་འབྱངས་བསྟེན་པར་བྱོས་ཤིག་ཅེས་གསུངས་སོ། །ཞེས་སོགས་དང༌། ཡང་ཀླུ་སྒྲུབ་ཀྱི་ཞལ་ལས་བདག་ཀྱང་མ་འོངས་པའི་དུས་སུ་མཐའ་འཁོབ་ཏུ་འགྲོ་བའི་དོན་བྱེད་པར་སྨོན། ཁྱོད་ཀྱང་དེའི་དུས་སུ་འཁོར་གྱི་ཐོག་མར་གདུལ་བྱ་རྣམས་ཀྱི་མཆོག་ཏུ་འགྱུར་རོ། །ཞེས་མ་འོངས་ལུང་བསྟན་དང་བཅས་གསུངས་སོ། །

              དེ་བཞིན་དུ་སློབ་དཔོན་ཟླ་བ་གྲགས་པས་ཀྱང་རིགས་པའི་ཁུ་བྱུག་ཆེ་བ་འདི་ལ་མ་འོངས་པའི་དུས་སུ་རྗེ་བཙུན་འཇམ་དབྱངས་དགེ་སློང་གི་ཚུལ་དུ་བསམས་བཞིན་དུ་མཐའ་འཁོབ་ཏུ་སྐྱེ་བ་བཞེས་པར་འདུག་པས་ཁྱོད་ཀྱང་དེར་སྐྱེ་བ་ལོངས་ལ་བཀའ་སྒྲུབ་པ་དང་བསྟན་པ་རྒྱས་པར་གྱིས་ཞེས་གསུངས་སོ། །ཚུལ་དེ་དག་ནི་མཁས་གྲུབ་ཐམས་ཅད་མཁྱེན་པའི་གསང་བའི་རྣམ་ཐར་དུ་ཇི་ལྟར་གསུངས་པ་ལྟར་བཀོད་པ་ཡིན་ནོ།། །།

                                                                                                             རྩོམ་སྒྲིག་པ། མང་ར་བ།
             གསལ་འདེབས།
                     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                     དྲ་བའི་སྦྲེལ་ཐགhttp://www.tb1025.cn