དེ་ནས་རྒྱལ་བ་མྱ་ངན་ལས་འདས་ནས་ལོ་བརྒྱ་ལོན་པ་ཙམ་ན་དགེ་སློང་རྩིང་སྤྱོད་ཅན་མང་པོ་ཞིག་གིས་གསེར་དངུལ་གྱི་རུང་བ་ཞེས་པ་ལ་སོགས་པ་འདུལ་བའི་བསླབ་པ་དང་འགལ་བའི་གཞི་བཅུ་དར་བ་ན་དཀར་ཕྱོགས་ཀྱི་ལྷ་རྣམས་ཀྱིས་རྒྱལ་བའི་བསྟན་པ་ལ་རྨ་ཕྱུང་ངོ་ཞེས་མྱ་ངན་ཆེན་པོ་བྱས་ཤིང་སྨྲེ་སྔགས་བཏོན་ཏེ་འཛམ་བུའི་གླིང་དང་རྒྱལ་ཆེན་བཞིའི་ལྷ་གནས་དང་སུམ་ཅུ་རྩ་གསུམ་སོགས་ལྷ་གནས་གོང་མ་རྣམས་སུའང་བསྒྲགས་ཏེ་དཀར་ཕྱོགས་ཀྱི་ལྷ་རྣམས་མྱ་ངན་ཆེན་པོར་གྱུར་ཅིང་བདུད་རིགས་རྣམས་དགའ་བའི་ཅ་ཅོ་སྒྲོག་པ་ཞིག་བྱུང་བ་ན་སྔོན་གྱི་ཐུགས་བསྐྱེད་དང་སྨོན་ལམ་གྱི་མཐུས་ཆོས་རྒྱལ་མྱ་ངན་མེད་ཅེས་བྱ་བ་བྱོན་ཏེ། ཆོས་རྒྱལ་དེས་སྦྱིན་བདག་བྱས།གནས་བརྟན་གྲགས་པ་ལ་སོགས་པ་དགྲ་བཅོམ་པ་བདུན་བརྒྱ་ཚོགས་ཏེ་ལོག་པར་སྨྲ་བ་རྣམས་བསུན་ཕྱུང་སྟོན་པ་ཐུགས་རྗེ་ཅན་དེས་འདུལ་བའི་བསླབ་ཁྲིམས་ཇི་ལྟར་བཅས་པ་དེ་ཁོ་ན་ལྟར་བཅས་པ་དེ་ཁོ་ན་ལྟར་བྱ་བར་བསྒྲུབས་ཏེ་བཀའ་བསྡུད་གཉིས་པ་མཛད།

              དེའི་ཚེ་དཀར་ཕྱོགས་ཀྱི་ལྷ་རྣམས་དགའ་བའི་ཅ་ཅོ་སྒྲོག་ཅིང་ཡིད་ཚིམ་པར་གྱུར། དེ་ནས་དུས་རིམ་གྱིས་སྙིགས་པར་གྱུར་པ་དང་སེམས་ཅན་རྣམས་བསོད་ནམས་དམན་པའི་དབང་གིས་དམ་པའི་ཆོས་འདུལ་བ་ལ་ལོག་པར་སྨྲ་བ་མང་དུ་དར་ཞིང༌། ལྷག་པར་སྡེ་པ་བཅོ་བརྒྱད་དུ་གྱེས་ཏེ་དེ་དག་ཐམས་ཅད་ནང་མི་མཐུན་པར་ཁོ་བོ་ཅག་གི་འདི་ཁོ་ན་བདེན་གྱི་གཞན་ནི་གཏི་མུག་གོ་ཞེས་རྩོད་པས་དུས་འདའ་བར་གྱུར་ཅིང་དམ་པའི་ཆོས་འདུལ་བ་ལ་ཀློག་པ་ཐོས་བསམ་དང༌། སྤོང་བ་བསམ་གཏན་བྱ་བའི་ཚུལ་རྣམས་ཆེས་ཆེར་ཉམས་ཤིང་ཉན་ཐོས་ཀྱི་གྲུབ་མཐའ་སྨྲ་བ་མང་པོ་ཞིག་གིས་ཐེག་ཆེན་གྱི་མདོ་སྡེ་རྣམས་ནི་རྒྱལ་བའི་བཀའ་མིན་ནོ་ཞེས་ལོག་པར་སྨྲ་བའི་གཏམ་རྒྱ་ཆེར་བསྒྲགས་ཏེ་རྒྱལ་བའི་བསྟན་པ་ཆེས་ཆེར་ཉམས་པ་སྟོན་པ་ཐུགས་རྗེ་ཅན་ཉིད་ཀྱི་ཐུགས་བསྐྱེད་དང་སྨོན་ལམ་གྱི་མཐུས་ནམ་ཞིག་ན་རྒྱལ་པོ་ཀྲི་ཀྲིའི་རྨི་ལྟས་ལུང་བསྟན་པའི་མདོ་རྙེད་ནས་བལྟས་པས། རྒྱལ་བ་འོད་སྲུང་གིས་རྒྱལ་པོ་ཀྲི་ཀྲི་ལ་ཁྱོད་ཀྱི་རྨི་ལྟས་དེ་རྣམས་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ལ་འདི་ལྟར་འབྱུང་བའི་སྔ་ལྟས་ཡིན། ཞེས་གསུངས་ཤིང་རྒྱལ་པོ་ཀྲི་ཀྲིའི་རྨི་ལྟས་ཇི་ལྟར་བྱུང་ཚུལ་ནི།

              མ་ག་དྷ་བཟང་མོའི་རྟོགས་པ་བརྗོད་པ་ལས། སངས་རྒྱས་འོད་སྲུང་གི་དུས་སུ་དེའི་སྦྱིན་བདག་རྒྱལ་པོ་ཀྲི་ཀྲི་ཞེས་བྱ་བ་བྱུང་བ་དེའི་རྨི་ལམ་དུ། གླང་པོའི་རྒྱལ་པོ་སྐར་ཁུང་ནས་བྱུང་བ་ལ་དེའི་མཇུག་མ་ཐོགས་པ་དང༌། སྐོམ་པས་ཕྱི་ནས་ཁྲོན་པ་བསྙེགས་པ་དང༌། ཕྱེ་བྲེ་གང་དང་མུ་ཏིག་བྲེ་གང་འཚོང་བྱེད་པ་དང༌། ཙན་དན་དང་ཤིང་ཕལ་པ་རིན་མཉམ་པར་བྱེད་པ་དང༌། ཀུན་དགའ་ར་བའི་མེ་ཏོག་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པས་ཕྲོགས་པ་དང༌། གླང་པོའི་ཕྲུག་གུས་སྤོས་ཀྱི་གླང་པོ་འཇིགས་པར་བྱེད་པ་དང༌། སྤྲེའུ་མི་གཙང་བས་གོས་པས་གཞན་ལ་སྐུད་པ་དང༌། སྤྲེའུ་རྒྱལ་པོར་དབང་བསྐུར་བ་མཐོང་བ་དང༌། རས་ཡུག་གཅིག་མི་བཅོ་བརྒྱད་ཀྱིས་བགོས་པ་ལས་རེ་རེའི་ལག་ཏུ་ཡང་རས་ཡུག་ཚང་བ་རེ་རེ་བྱུང་བ་དང༌། སྐྱེ་བོའི་ཚོགས་ཆེན་པོ་འདུས་ནས་འཐབ་རྩོད་བྱེད་པ་མཐོང་སྟེ། རྨི་ལམ་བཅུ་རྨིས་པས་བདག་ཉེས་སུ་དོགས་པས་འཇིགས་ཏེ།བཅོམ་ལྡན་འདས་འོད་སྲུང་ལ་ཞུས་སོ། །བཅོམ་ལྡན་འདས་ཀྱིས་དེ་དག་རྒྱལ་པོ་ཁྱོད་ལ་ཉེས་དམིགས་སུ་འགྱུར་བ་མ་ཡིན་གྱི།མ་འོངས་པ་ན་ཚེ་ལོ་བརྒྱ་པའི་ཚེ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་ལ་མ་སྦྱངས་པའི་དགེ་སློང་རྣམས་ཁྱིམ་ནས་བྱུང་ཡང་གཙུག་ལག་ཁང་དང་རྙེད་པ་ལ་ཆགས་པ་འབྱུང་བས། གླང་པོ་ལུས་ཐོན་ནས་མཇུག་མ་ཐོགས་པ་དེ་ནི་དེའི་ལྟས་སོ། །སྐོམ་པས་ཕྱི་ནས་ཁྲོན་པ་བསྙེགས་པ་ནི། གཙུག་ལག་ཁང་ན་གནས་པ་ལ་གཞན་གྱིས་ཆོས་བཤད་པ་ན་ཉན་པར་མི་བྱེད་པའི་ལྟས་སོ། །ཕྱེ་དང་མུ་ཏིག་བརྗེ་བ་ནི་དེའི་ཚེ་ཉན་ཐོས་རྣམས་བཟའ་བའི་ཆེད་དུ་ཆོས་སྟོན་པ་འབྱུང་བས་དེའི་ལྟས་སོ། །ཙན་དན་དང་ཤིང་གཞན་མཉམ་པར་མཐོང་བ་དེ་ནི། དེའི་ཚེ་ཉན་ཐོས་རྣམས་མུ་སྟེགས་ཀྱི་གཞུང་དང༌།སངས་རྒྱས་ཀྱི་བཀའ་མཉམ་པར་འཛིན་པ་འབྱུང་བས་དེའི་ལྟས་སོ། །ཀུན་དགའ་ར་བའི་མེ་ཏོག་ལ་སོགས་པ་ཕུན་སུམ་ཚོགས་པ་ཆོམ་པོས་ཕྲོགས་པ་ནི། དེའི་ཚེ་ཉན་ཐོས་མ་བསྡམས་པ་རྣམས་དགེ་འདུན་གྱི་ལོངས་སྤྱོད་ཀྱིས་ཁྱིམ་པའི་ངོ་བསྲུང་བ་འབྱུང་བས་དེའི་ལྟས་སོ། །གླང་པོའི་ཕྲུག་གུས་སྤོས་ཀྱི་གླང་པོ་འཇིགས་པར་བྱེད་པ་ནི། དགེ་སློང་སྡིག་ཅན་གྱིས་ཚུལ་ཁྲིམས་དང་ལྡན་པའི་དགེ་སློང་ཟིལ་གྱིས་གནོན་པ་འབྱུང་བས་དེའི་ལྟས་སོ། །མི་གཙང་བས་གོས་པའི་སྤྲེའུས་གཞན་ལ་སྐུད་པ་ནི། ཚུལ་ཁྲིམས་ཉམས་པས་ཚུལ་ཁྲིམས་དང་ལྡན་པ་ལ་བསྐུར་བ་འདེབས་པར་འགྱུར་བས་དེའི་ལྟས་སོ། །སྤྲེའུ་རྒྱལ་པོར་དབང་བསྐུར་བ་ནི། དེའི་དུས་སུ་རྨོངས་པ་རྣམས་རྒྱལ་པོར་དབང་སྐུར་བ་འབྱུང་བས་དེའི་ལྟས་སོ། །མི་བཅོ་བརྒྱད་ཀྱིས་རས་ཡུག་གཅིག་བགོས་པས་སོ་སོའི་ལག་ཏུ་མ་ཉམས་པར་བྱུང་བ་ནི། ཤཱཀྱ་ཐུབ་པའི་བསྟན་པ་ལ་སྡེ་པ་བཅོ་བརྒྱད་དུ་གྱེས་ཀྱང་ཐམས་ཅད་རྣམ་པར་གྲོལ་བའི་སྐལ་བ་ཅན་ཡིན་པས་དེའི་ལྟས་སོ། །སྐྱེ་བོའི་ཚོགས་འདུས་ནས་འཐབ་རྩོད་བྱེད་པ་དེ་ནི་ཤཱཀྱ་ཐུབ་པའི་བསྟན་པ་རྩོད་པའི་ཆོས་ཀྱིས་ནུབ་པར་འགྱུར་བས་དེའི་ལྟས་སོ། །ཞེས་འབྱུང་ངོ༌། །

               མདོ་དེ་མཐོང་ནས་སྡེ་པ་བཅོ་བརྒྱད་པོ་ཐམས་ཅད་བློ་མཐུན་པར་གྱུར་ཏེ་གནས་བརྟན་སོ་སོའི་སྐད་མི་འདྲ་བ་དང༌། ཆ་ལུགས་ཅུང་ཟད་ཀྱི་ཁྱད་པར་ལས།དོན་དུ་རྒྱལ་བའི་བཀའ་ཉིད་ལ་མཐུན་ཞིང་ཐམས་ཅད་ལམ་བསླབ་པ་གསུམ་ཉམས་སུ་བླངས་ཏེ་རྣམ་གྲོལ་ཐར་པ་སྒྲུབ་པའི་འབྲས་བུ་ཅན་དུ་མཚུངས་པར་མཐོང་ནས་ཀློག་པ་ཐོས་བསམ་དང་སྤོང་བ་བསམ་གཏན་གཉིས་ཀྱི་སྒོ་ནས་རྒྱལ་བསྟན་འཕེལ་བར་གྱུར་ཏེ།དེ་ལ་ནི་བསྡུ་བ་གསུམ་པ་ཞེས་གྲགས་སོ། །དེ་ནས་ཡང་རྒྱལ་བསྟན་རིམ་གྱིས་ཉམས་དམས་ཤིང་ལྷག་པར་ཐེག་པ་ཆེན་པོའི་བསྟན་པ་མིང་ཙམ་ཡང་ནུབ་པ་ལ་ཕྱོགས་པ། རྒྱལ་བ་མྱ་ངན་ལས་འདས་ནས་ལོ་བཞི་བརྒྱ་ཙམ་ལོན་པ་ན་བདག་ཉིད་ཆེན་པོ་དཔལ་མགོན་འཕགས་པ་ཀླུ་སྒྲུབ་ཞིང་འདིར་བྱོན་ནོ། །

                                                                                                                                རྩོམ་སྒྲིག་པ། མང་ར་བ།
              གསལ་འདེབས། 
                        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                        དྲ་བའི་སྦྲེལ་ཐགhttp://www.tb1025.cn