འོ་ན། འཇིག་རྟེན་གྱི་ཁམས་བདེ་བ་ཅན་དང༌། ཀུན་གཟིགས་ཀྱི་ཞིང་གཉིས་གང་ཁྱད་པར་འཕགས་ན། བདེ་བ་ཅན་གྱི་ཡོན་ཏན་ནི་རྒྱ་མཚོ་ཆེན་པོ་ནས་སྐྲའི་རྩེ་མོས་བླངས་པའི་ཆུ་ཐིགས་གཅིག་ཙམ། ཀུན་ཏུ་གཟིགས་ཀྱི་ཞིང་གི་ཡོན་ཏན་ནི་རྒྱ་མཚོ་ཆེན་པོའི་ཆུའི་མང་ཉུང་ལྟ་བུ་ཡིན་ནོ། །འོ་ན། རྒྱལ་བ་ཀུན་གཟིགས་པའི་ཞིང་ཁམས་ལྟ་བུ་གཞན་ཡོད་དམ་མེད་སྙམ་ན་ཡོད་དེ། དེ་བཞིན་གཤེགས་པ་ཀུན་གཟིགས་ཀྱི་ཞིང་དང༌། དེ་བཞིན་གཤེགས་པ་ཀུན་ནས་འོད་ཟེར་ཡོན་ཏན་རྟག་ཏུ་མངའ་བ་རྒྱ་མཚོའི་རྒྱལ་པོའི་ཞིང་སྨོན་ལམ་ལ་རབ་ཏུ་གནས་པ་མངོན་པར་འཕགས་པ་གཉིས་ལ་ཡོན་ཏན་ལྷག་ཆད་མེད། གཞན་ཡང་རྒྱལ་བ་ཀུན་ཏུ་གཟིགས་པའི་ཞིང་ཁམས་ལྟ་བུ་ཡོད་དེ། བྱང་ཆུབ་སེམས་དཔའ་འོད་ཀྱི་ཏོག་དང༌། བྱང་ཆུབ་སེམས་དཔའ་ཡེ་ཤེས་བླ་མ་དང༌། བྱང་ཆུབ་སེམས་དཔའ་དབང་པོ་ཞི་བ་དང༌། བྱང་ཆུབ་སེམས་དཔའ་སྨོན་ལམ་བློ་གྲོས་རྣམས་སངས་རྒྱས་པའི་སངས་རྒྱས་ཀྱི་ཞིང་ཡང་དེ་དང་འདྲ་བར་འབྱུང་བར་གསུངས་པས་བྱང་ཆུབ་སེམས་དཔའ་བརྒྱད་ཁྲི་བཞི་སྟོང་གིས་ཀྱང༌། འཕགས་པ་འཇམ་དཔལ་གྱི་ཞིང་ལྟར་བསྒྲུབ་པའི་སྨོན་ལམ་བཏབ་པས། དེ་དག་གི་ནང་ནས་བྱང་ཆུབ་སེམས་དཔའ་བཅུ་དྲུག་གིས་འཕགས་པ་འཇམ་དཔལ་གྱི་ཞིང་ལྟར་འགྲུབ་ཅིང༌། ལྷག་མ་རྣམས་ཀྱིས་དེ་ལྟར་མི་འགྲུབ་ཀྱང༌། བདེ་བ་ཅན་ལྟར་འགྲུབ་པར་གསུངས་སོ། །

             འོ་ན། བདེ་བ་ཅན་གྱི་གདུལ་བྱ་དང༌། རྒྱལ་བ་ཀུན་ཏུ་གཟིགས་པའི་གདུལ་བྱ་ལ་མང་ཉུང་གི་ཁྱད་པར་ཇི་ལྟར་ཡོད་ན་ཁྱད་པར་ཡོད་དེ། བདེ་བ་ཅན་ན་ཉན་ཐོས་ཡོད་ཅིང༌། རྒྱལ་བ་ཀུན་ཏུ་གཟིགས་པའི་ཞིང་ཁམས་རྡུལ་མེད་ཡང་དག་བསགས་ན། འཁོར་བྱང་ཆུབ་སེམས་དཔའ་ཤ་སྟག་ལས་ཉན་རང་མེད། བདེ་བ་ཅན་གྱི་ཞིང་གི་གདུལ་བྱ་ནི་རྒྱལ་བ་ཀུན་ཏུ་གཟིགས་ཀྱི་ཞིང་གི་གདུལ་བྱ་ལ་ལྟོས་ན་ཏིལ་གྱི་རྗང་བ་ཞིག་གི་ཏིལ་འབྲུ་གཅིག་ལྟ་བུ། རྒྱལ་བ་ཀུན་ཏུ་གཟིགས་པའི་ཞིང་གི་གདུལ་བྱའི་གྲངས་རྗང་ནང་གི་ཏིལ་བྱིངས་པོ་ཙམ་གྱི་ཚོད་ཡིན་པར་གསུངས།གཞན་ཡང་རྒྱལ་བ་ཀུན་ཏུ་གཟིགས་པའི་ཞིང་ཁམས་སུ་སྐྱེ་བར་སྨོན་ལམ་བཏབ་པས། ལོངས་སྐུ་དང་སྤྲུལ་སྐུའི་ཞིང་ཐམས་ཅད་དུ་སྐྱེ་བའི་སྨོན་ལམ་བཏབ་པར་འགྲོ་ཞིང༌། འཇམ་དཔལ་དང༌། རྒྱལ་བ་ཀུན་ཏུ་གཟིགས་ལ་ཡི་དམ་བྱས་པས་མདོ་སྔགས་ཀྱི་ལྷ་ཚོགས་ཐམས་ཅད་ལ་ཡི་དམ་བྱས་པར་འགྲོ་བར་གསུངས་སོ། །དེས་ན་ཞིང་དེར་སྐྱེ་བའི་རྒྱུའི་གཙོ་བོ་ནི།ཞིང་དེའི་ཡོན་ཏན་ཡིད་ལ་ཡང་ཡང་སེམས་པ། བྱང་ཆུབ་ཏུ་སེམས་བསྐྱེད་པ།སྤྱོད་པ་ཕྱིན་དྲུག་གི་གསལ་བའི་དབྱེ་བ་མཐའ་དག་ལ་སློབ་པ། འཕགས་པ་འཇམ་དཔལ་དང༌། རྒྱལ་བ་ཀུན་ཏུ་གཟིགས་ཀྱི་མཚན་ནས་བརྗོད་པ། སྔགས་བཟླ་བ། དེ་གཉིས་ཀྱི་སྐུ་བཞེངས་པ། དེའི་གསུང་རབ་འདྲི་ཀློག་སོགས་བྱ་བ་ཡིན་ནོ། །

              དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་རྗེ་བཙུན་འཇམ་པའི་དབྱངས་ཀྱི་སྐུ་གསུང་ཐུགས་ཀྱི་ཡོན་ཏན་རྣམས་གསན་ནས་དད་གུས་ཆེན་པོས་གསོལ་བ་འདེབས་པ་ཤིན་ཏུ་གལ་ཆེ་སྟེ། སྤྱིར་བྱང་ཆུབ་ལམ་རིམ་ལ་གོ་བ་ཆགས་པ་དང༌། ངེས་ཤེས་ཁྱད་པར་ཅན་བསྐྱེད་ལ་ཆོས་རབ་ཏུ་རྣམ་འབྱེད་ཀྱི་ཤེས་རབ་རྒྱས་དགོས་ལ། ལྷག་པར་ཟབ་མོ་དབུ་མའི་ལྟ་བ་ཕུ་ཐག་ཆོད་པ་ཞིག་རྙེད་པ་ལ་སོ་སོར་རྟོག་པའི་ཤེས་རབ་ཤིན་ཏུ་གསལ་ཞིང་རྣོ་བ་ཞིག་དགོས། ཤེས་རབ་དེ་ལྟ་བུ་ཞིག་སྐྱེ་བ་བླ་མ་དང་རྗེ་བཙུན་འཇམ་པའི་དབྱངས་དབྱེར་མ་མཆིས་པ་ལ་གསོལ་བ་ཤུགས་དྲག་ལ་རྒྱུན་རིང་བ་བཏབ་སྟེ་སེམས་རྒྱུད་ལ་བྱིན་རླབས་ཞུགས་པ་ཞིག་དགོས་ཞེས་མགོན་པོ་འཇམ་པའི་དབྱངས་ཀྱིས་རྗེ་བདག་ཉིད་ཆེན་པོ་ལ་དངོས་སུ་གདམས་པ་ལྟར་ཡིན་པས་ན་རྗེ་བཙུན་འཇམ་པའི་དབྱངས་ལ་གསོལ་བ་ཤུགས་དྲག་འདེབས་ཤིང་བྱང་ཆུབ་ལམ་གྱི་རིམ་པའི་ཉམས་ལེན་ལ་འབད་པར་བྱའོ།། །།

                                                                                                                                    རྩོམ་སྒྲིག་པ། མང་ར་བ།
            གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                      དྲ་བའི་སྦྲེལ་ཐགhttp://www.tb1025.cn