ཡང་རྒྱལ་པོ་མ་སྐྱེས་དགྲས་ཕ་གཟུགས་ཅན་སྙིང་པོ་བསད།སྟོན་པ་ལ་གླང་ཆེན་རྦད། དགེ་འདུན་ཕོ་མོའི་འཚོ་བ་བཅད། དགྲ་བཅོམ་མ་སེར་སྐྱ་བཟང་མོ་ཆུང་མར་དབང་མེད་དུ་བཀུག་པ་སོགས་ཀྱི་སྡིག་པ་ཆེན་པོ་བྱས་པས། འགྱོད་དེ་སྟོན་པ་ལ་སྡིག་པ་དང་འགྱོད་པ་སེལ་བར་ཞུས་པས། སྟོན་པས་རྗེ་བཙུན་འཇམ་དབྱངས་མ་གཏོགས་གཞན་གྱིས་ཁྱོད་ཀྱི་འགྱོད་པ་དང་ཐེ་ཚོམ་སེལ་བར་མི་ནུས་གསུངས་པས། རྒྱལ་པོས་འཕགས་པ་འཇམ་དཔལ་དང༌། འོད་སྲུང་གཉིས་རྒྱལ་པོའི་ཁབ་ཏུ་གདན་འདྲེན་པར་མཛད་འདོད་ནས་ཤཱ་རིའི་བུ་ལ། འཕགས་པ་འཇམ་དཔལ་ལ་འཁོར་དུ་མཆིས་དྲིས་པས། ལྔ་བརྒྱའོ་ཟེར་བ་ལ། རྒྱལ་པོས་འཇམ་དཔལ་ལ་སང་རྒྱལ་པོའི་ཁབ་ཏུ་གདུགས་ཚོད་ལ་གཤེགས་པར་ཅི་གནང་ཞུས་པས་ཞལ་གྱི་བཞེས་ནས། དེའི་སྲོད་ལ་ཤར་ཕྱོགས་སུ། དེ་བཞིན་གཤེགས་པ་བསྒྲགས་པའི་དཔལ་གྱི་དྲུང་དུ་བྱོན་ཏེ་བྱང་ཆུབ་སེམས་དཔའ་བརྒྱད་ཁྲི་ཉིས་སྟོང་ཁྲིད་ནས་ཞིང་འདིར་བྱོན་ནས་འཁོར་རྣམས་སྲོད་དང༌། གུང་དང༌། ཐོ་རངས་ཆོས་བསྟན་ཏེ་འཇམ་དཔལ་འཁོར་བརྒྱད་ཁྲི་ཉིས་སྟོང་ལྔ་བརྒྱ་དང༌། འོད་སྲུང་འཁོར་ལྔ་བརྒྱ་དང་བཅས་པ་རྒྱལ་པོའི་ཁབ་ཏུ་གཤེགས་པ་ན། རྒྱལ་པོས་སྟོང་གི་བཤོས་གྲབས་ལས་མ་ཆུད་པས་རྒྱལ་པོ་སྤ་འཁུམས་པ་ན་གནོད་སྦྱིན་ཀུ་བེ་རས་ལུས་དངོས་སུ་བསྟན་ནས། རྒྱལ་པོ། འཕགས་པ་འཇམ་དཔལ་ནི་ཐབས་ལ་མཁས་པས་ཟས་གཅིག་གིས་ཀྱང་ཐམས་ཅད་ཁྱབ་པར་བྱེད་པས་མ་འཁུམས་ཤིག་ཅེས་དབུགས་དབྱུང༌། དེ་ནས་གདུངས་ཚོད་ལ་བབ་པ་ན། འཁོར་འདི་དག་ལ་ལྷུང་བཟེད་མི་སྣང་བས་འབྲས་ཆན་གང་དུ་བླུགས་ཟེ་བ་ལ་འཇམ་དཔལ་གྱིས་ངའི་འཁོར་འདི་དག་ནམ་ཟ་བ་ན་རང་རང་གི་ཞིང་ནས་ལྷུང་བཟེད་འདིར་འོང་ངོ་ཞེས་གསུངས་མ་ཐག་འཁོར་དེ་དག་རྣམས་ལ་རང་རང་གི་ལག་ཏུ་ལྷུང་བཟེད་བྱུང་ཞིང་ཟོས་ཟིན་ནས་ལྷུང་བཟེད་རྣམས་མཁའ་ལ་འཕགས་ཏེ་སོང༌། རྒྱལ་པོས་བཤམས་པའི་བཟའ་བཏུང་རྣམས་ཅུང་ཟད་ཀྱང་ཉུང་དུ་མ་སོང་བས་ཐམས་ཅད་ངོ་མཚར་དུ་གྱུར་ཏོ། །

              དེ་ནས་འཕགས་པ་འཇམ་དཔལ་གྱིས་རྒྱལ་པོ་ལ་སྡིག་པ་དང་འགྱོད་པའི་ངོ་བོ་ཇི་ལྟར་འདུག་ལྟོས་ཤིག་ཅེས་སོགས་དོན་དམ་ལ་སྦྱར་བའི་ཆོས་གསུངས་པས་རྒྱལ་པོའི་འགྱོད་པ་དང་ཐེ་ཆོམ་ཐམས་ཅད་བསལ་བས། རྒྱལ་པོས་འཕགས་པ་འཇམ་དཔལ་ལ་ཡོན་དུ་རིང་པོ་ཆེའི་གོས་ཞིག་ཕུལ་བ་ན། འཇམ་དཔལ་མ་མཐོང་ནས་མྱ་ངན་དུ་གྱུར་པ་ལ།སུ་འདུག་འདུག་ལ་ཕུལ་ཅིག་ཟེར་བའི་སྒྲ་ཞིག་བྱུང་ན་འོད་སྲུང་སོགས་ལ་ཕུལ་བས་ཀྱང་སུ་ཡང་མ་མཐོང་ཞིང༌། མཐར་རང་ཡང་མ་མཐོང་བས་བདག་ཏུ་འདུ་ཤེས་པའི་རྣམ་རྟོག་དང་བྲལ་ནས་སྟོང་ཉིད་ཀྱི་ཏིང་ངེ་འཛིན་གྱི་ངང་དུ་སོང༌། ཏིང་ངེ་འཛིན་ལས་ལངས་པ་དང་འཕགས་པ་འཇམ་དཔལ་ལ་སོགས་པ་དངོས་སུ་མཐོང་ངོ༌། །

              ཡང༌། སྔོན་མཚམས་མེད་ཀྱི་ལས་བྱས་པའི་ལས་ཀྱི་ལྷག་མ་ཅུང་ཟད་ཡོད་པ་ལ་སྤྱོད་པའི་བྱང་སེམས་ལྔ་འདུག་པ་དེ་དག་དམིགས་པ་དང་བྲལ་བར་བྱ་བའི་ཕྱིར། འཕགས་པ་འཇམ་དཔལ་གྱིས་ཕྱག་གཡས་ཀྱིས་རལ་གྲི་བླངས་པ་བརྡར་ནས་བཅོམ་ལྡན་འདས་ག་ལ་བདེར་བརྒྱུགས་པ་དང༌། བཅོམ་ལྡན་འདས་ཀྱི་ང་ནི་བསད་ཟིན་གྱིས་ཐོངས་ཤིག་གསུངས་པས། དམིགས་པ་ལ་སྤྱོད་པའི་བྱང་སེམས་ལྔ་པོ་དེས། བདག་ཏུ་དམིགས་པ་བསད་ནས་མེད་པར་གོ །ཆོས་ཐམས་ཅད་སྒྱུ་མ་ལྟ་བུར་རྟོགས་ཏེ། འཕགས་པ་འཇམ་དཔལ་འདི་ནི་ཐམས་མཁས་པའོ་ཞེས་སོགས་ཀྱི་བསྟོད་ནས་ནམ་མཁར་འཕགས་ཏེ།ཆོས་ཀུན་སྒྱུ་མ་ལྟ་བུ་སྟེ། །ཡོངས་སུ་རྟོག་པས་ཀུན་ནས་བསྐྱེད། །འདི་ལ་གྲུབ་པ་མ་མཆིས་ཏེ། །ཆོས་འདི་ཐམས་ཅད་སྟོང་པ་ལགས། །ཞེས་སྨྲས་སོ། །

                                                                                                                                       རྩོམ་སྒྲིག་པ། མང་ར་བ།
             གསལ་འདེབས། 
                     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                      དྲ་བའི་སྦྲེལ་ཐགhttp://www.tb1025.cn