རྨད་བྱུང་ངོ་མཚར་གནས་གྱུར་མཆོག་གི་སྡེ། རྨད་བྱུང་ངོ་མཚར་གནས་གྱུར་མཆོག་གི་སྡེ། ཞེས་བསྔགས་པ། སློབ་དཔོན་མཆོག་གི་སྡེ་ནི་རྒྱལ་བའི་བསྟན་པ་ལ་རབ་ཏུ་བྱུང་ནས་སྡེ་སྣོད་གསུམ་ལ་མཁས་པར་སྦྱངས།བཙུན་པ་གྲོལ་སྡེ་བསྟེན་ནས་ཐེག་པ་ཆེན་པོའི་མདོ་སྡེ་མཐའ་དག་དང༌། ཁྱད་པར་ཤེར་ཕྱིན་གྱི་མདོ་སྡེ་རིན་པོ་ཆེའི་དོན་མངོན་པར་རྟོགས་པའི་རྒྱན་ལས་འབྱུང་བ་ལྟར་ཐེག་པ་ཆེན་པོའི་ལམ་གྱི་རིམ་པའི་ལུས་ཡོངས་སུ་རྫོགས་པ་གསན་ནས་བསྒྲུབ་པ་ལ་རྩེ་གཅིག་ཏུ་བཞུགས་པས་མྱོང་བ་ཕུལ་དུ་ཕྱིན་པ་ཐོན་ཏེ་སྐལ་པ་དང་ལྡན་པ་མཐའ་ཡས་པ་ལ་ཤེར་ཕྱིན་གྱི་མན་ངག་འདོམས་པར་མཛད་ཅིང་མདོ་རྒྱན་སྦྱར་བའི་མན་ངག་རྒྱ་ཆེར་སྤེལ་ལོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་མཆོག་གི་སྡེ་ལ་གསོལ་བ་འདེབས་ཤིང་སློབ་དཔོན་འདིས་ཇི་ལྟར་བསྟན་པ་ལྟར་མདོ་རྒྱན་སྦྱར་བའི་མན་ངག་ཐོབ་པར་བྱས་ལ་བྱང་ཆུབ་ལམ་གྱི་རིམ་པའི་ཉམས་ལེན་ལ་བརྩོན་པར་བྱའོ།། །།

                                                                                                                         རྩོམ་སྒྲིག་པ། མང་ར་བ།
            གསལ་འདེབས།
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                   དྲ་བའི་སྦྲེལ་ཐགhttp://www.tb1025.cn