དད་པའི་སར་གནས་བཙུན་པ་རྣམ་གྲོལ་སྡེ། དད་པའི་སར་གནས་བཙུན་པ་རྣམ་གྲོལ་སྡེ། ཞེས་བསྔགས་པ། བཙུན་པ་རྣམ་གྲོལ་སྡེ་ནི། གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང་སྟེ།སྡེ་སྣོད་གསུམ་ལ་མཁས་པར་སྦྱངས། འཕགས་པ་རྣམ་གྲོལ་སྡེ་བསམ་སྦྱོར་གཉིས་ཀྱི་ཚུལ་བཞིན་དུ་བསྟེན་ནས་ཤེར་ཕྱིན་གྱི་མདོ་སྡེ་རིན་པོ་ཆེའི་མན་ངག་མངོན་པར་རྟོགས་པའི་རྒྱན་ཉི་ཁྲི་དང་སྦྱར་བ་གསན་ཏེ། དེའི་དོན་སྐྱེས་བུ་གསུམ་གྱི་ལམ་ལ་རིམ་གྱིས་སྦྱངས་པས་སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་དང༌། བདག་ལས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་བཅོས་མ་མ་ཡིན་པ་ཐུགས་རྒྱུད་ལ་འཁྲུངས་ཏེ་ཐེག་པ་ཆེན་པོའི་ཚོགས་ལམ་དུ་ཞུགས་ཏེ་ཐེག་པ་ཆེན་པོའི་ལམ་རིམ་གྱིས་བགྲོད་ཕྱིར་ལོ་བཅུའི་རིང་ལ་རྗེ་བཙུན་བྱམས་མགོན་བསྒྲུབས་ཏེ་ཐེག་པ་ཆེན་པོའི་ལམ་གྱི་ལུས་ཡོངས་སུ་རྫོགས་པ་ལ་སྦྱངས་ཤིང༌། རྗེ་བཙུན་བྱམས་པ་མགོན་པོའི་ཞལ་མངོན་སུམ་དུ་མཐོང་བ་དང༌། དེའི་མཐུས་ཐེག་པ་ཆེན་པོའི་ལམ་རྣམས་མྱུར་དུ་བགྲོད་ནུས་པ་ཞིག་བྱུང་ན་ཅི་མ་རུང་སྙམ་དུ་འབད་ཀྱང་བྱམས་མགོན་གྱི་ཞལ་མ་མཐོང་བ་ན། བྱམས་མགོན་གྱི་ཞལ་མྱུར་དུ་མཐོང་བའི་ཐབས་གཞན་ལ་དྲིས་པས་སྡིག་སྒྲིབ་སྦྱོང་བའི་དོན་དུ་སྦྱིན་སྲེག་བྱས་ན་ལེགས་ཞེས་ཟེར་བ་ལྟར་ཞི་བའི་ཐབ་ཁུང་དུ་བྱམས་མགོན་སྤྱན་དྲངས་ནས་སྲེགས་བླུགས་འབུམ་ཕྲག་བཅུ་གཉིས་ཕུལ་བས་བྱམས་མགོན་གྱི་ཞལ་གཟིགས།དེ་ནས་ལུང་དང་རྟོགས་པའི་ཡོན་ཏན་ཐམས་ཅད་ཆེས་ཆེར་རྒྱས་ཏེ་འཕགས་པ་གྲོལ་སྡེའི་མན་ངག་ལ་བརྟེན་ནས་བྱང་ཆུབ་ལམ་གྱི་རིམ་པའི་གནད་རྣམས་རྒྱས་པར་སྟོན་པ་ཉི་ཁྲི་རྣམ་འགྲེལ་མཛད་དོ། །སློབ་དཔོན་འདི་རྗེ་བདག་ཉིད་ཆེན་པོས་དད་བའི་སར་གནས་ཞེས་ཚོགས་ལམ་པ་ཡིན་པར་བཤད་དོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་སློབ་དཔོན་བཙུན་པ་རྣམ་གྲོལ་སྡེ་ལ་གསོལ་བ་འདེབས་ཤིང་བཤེས་གཉེན་བསྟེན་ཚུལ་ནས་ཞི་ལྷག་གི་བར་བྱང་ཆུབ་ལམ་གྱི་རིམ་པའི་ཉམས་ལེན་གྱི་གནད་ཐམས་ཅད་རྒྱལ་བའི་ཡུམ་ཉིད་ལས་གསུངས་པའི་ཚུལ་ལ་ངེས་པ་རྙེད་པར་བྱས་ལ་ཡིད་ཆེས་ཀྱི་དད་པ་བརྟན་པོ་བསྐྱེད་ནས་བྱང་ཆུབ་ལམ་གྱི་རིམ་པ་སྒོམ་པར་བརྩོན་པ་ཆིག་བསྒྲིལ་དུ་བྱའོ།། །།

                                                                                                                  རྩོམ་སྒྲིག་པ། མང་ར་བ།
            གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                 དྲ་བའི་སྦྲེལ་ཐགhttp://www.tb1025.cn