དབུ་མའི་ལམ་བརྙེས་འཕགས་པ་རྣམ་གྲོལ་སྡེ། དབུ་མའི་ལམ་བརྙེས་འཕགས་པ་རྣམ་གྲོལ་སྡེ། ཞེས་བསྔགས་པ། ཀུན་མཁྱེན་གཉིས་པ་སློབ་དཔོན་དབྱིག་གཉེན་གྱི་སློབ་མ་མཆོག་བཞིའི་ནང་ཚན། འཕགས་པ་རྣམ་གྲོལ་སྡེ་ནི། ཡུལ་དབུས་དང་ལྷོ་ཕྱོགས་ཀྱི་མཚམས་འབར་བའི་ཕུག་དང་ཉེ་བར་སློབ་དཔོན་སངས་རྒྱས་འབངས་ཀྱི་དབོན་སྲས་སུ་འཁྲུངས། གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང་སྟེ། སྡེ་པ་བཅོ་བརྒྱད་ཀྱི་ནང་ནས་གནས་མ་བུ་པ་ཀུ་རུ་ཀུལླེའི་སྡེ་ལས་རབ་ཏུ་བྱུང་ཞིང་ལོ་ལོན་ནས་བསྙེན་པར་རྫོགས་པའི་སྡོམ་པ་བཞེས། སྡེ་པ་དེ་ལུགས་ཀྱི་འདུལ་བའི་བཅས་མཚམས་ཆེ་ཕྲ་མཐའ་དག་ལ་མཁས་པར་སྦྱངས་ཤིང་ཕྱག་ལེན་ལ་ཐེབས་པར་མཛད། སྔོན་ཡུན་རིང་པོ་ནས་བྱང་ཆུབ་མཆོག་ཏུ་ཐུགས་བསྐྱེད་ཅིང་ཚོགས་གཉིས་རྒྱ་ཆེན་པོ་བསགས། རྒྱལ་བའི་དམ་ཆོས་འཛིན་པའི་སྨོན་ལམ་རླབས་པོ་ཆེའི་མཐུ་གྲུབ་པས་སྡེ་སྣོད་གསུམ་དང་ཁྱད་པར་ཐེག་པ་ཆེན་པོའི་སྡེ་སྣོད། དེའི་ནང་ནས་ཀྱང་ཤེར་ཕྱིན་གྱི་མདོ་སྡེ་རིན་པོ་ཆེའི་མན་ངག་རྣམས་གསན་བཞེད་ནས་སློབ་དཔོན་དབྱིག་གཉེན་གྱི་དྲུང་དུ་ཕེབས་ཏེ་སློབ་དཔོན་དབྱིག་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་སྡེ་སྣོད་གསུམ་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར་ཅིང༌། ཁྱད་པར་ཤེས་ཕྱིན་གྱི་མདོ་སྡེ་རིན་པོ་ཆེ་རྣམས་རྫོགས་པར་གསན་ནས་ཚིག་དོན་གཉིས་ཀ་ཐུགས་སུ་ཆུད་པར་མཛད། ཤེར་ཕྱིན་གྱི་མདོ་སྡེའི་དོན་རྗེ་བཙུན་བྱམས་པ་མགོན་པོས་བྱང་ཆུབ་ལམ་གྱི་རིམ་པའི་མན་ངག་ཏུ་སྦྱར་བ་མངོན་པར་རྟོགས་པའི་རྒྱན་གསན་ཏེ་དེའི་དོན་ཐེག་པཆེན་པོའི་ལམ་གྱི་ལུས་ཡོངས་སུ་རྫོགས་པ་ཐུགས་ཉམས་སུ་བཞེས་པས་ལམ་རིམ་གྱིས་བགྲོད་དེ་ཆོས་ཉིད་མངོན་སུམ་དུ་གཟིགས་པ་འཕགས་པའི་ལམ་ཐོབ། གཟུངས་དང་སྤོབས་པ་དང༌། མངོན་པར་ཤེས་པ་རྒྱ་ཆེན་པོ་དང༌། དཔའ་བར་འགྲོ་བའི་ཏིང་ངེ་འཛིན་དང༌། ནམ་མཁའ་མཛོད་ཀྱི་ཏིང་ངེ་འཛིན་ལ་སོགས་པ་མངོན་དུ་གྱུར། རྗེ་བཙུན་བྱམས་པ་མགོན་པོ་ཞལ་མཐོང་མངོན་པར་རྟོགས་པའི་རྒྱན་གྱི་བརྗོད་བྱ་དང་པོ་སེམས་བསྐྱེད་ནས་བཟུང་ཐ་མ་འཕྲིན་ལས་ཀྱི་བར་དོན་བདུན་ཅུ་པོ་རེ་རེ་ནས་ཤེར་ཕྱིན་གྱི་མདོ་དང་འབྱོར་པ་ཞིག་བྱུང་ན་ཅི་མ་རུང་སྙམ་དུ་སྨོན་ཞིང༌། དེ་ལྟར་དུ་བྱམས་མགོན་ལ་གསོལ་བ་ཤུགས་དྲག་ཏུ་བཏབ་པས། རྗེ་བཙུན་བྱམས་མགོན་གྱིས་ཝཱ་ར་ཎཱ་སིའི་གཙུག་ལག་ཁང་དུ་སོངས་དང་འདོད་པའི་དོན་འགྲུབ་པར་འགྱུར་རོ་ཞེས་ལུང་བསྟན། རྗེ་བཙུན་གྱི་བཀའ་བཞིན་ཝཱ་ར་ཎཱ་སིའི་གཙུག་ལག་ཁང་དུ་བྱོན་པ་ན། དེའི་ཚེ་དགེ་བསྙེན་ཞི་བའི་གོ་ཆ་ཞེས་བྱ་བ་ཞིག་གིས་ཤེར་ཕྱིན་སྟོང་ཕྲག་ཉི་ཤུ་ལྔ་པ་པོ་ཏ་ལ་ནས་སྤྱན་དྲངས་ཏེ་ཝཱ་ར་ཎཱ་སིའི་གཙུག་ལག་ཁང་དུ་ཕེབས་པ་དང་དུས་འགྲིག དེས་ཡང་རྒྱལ་བ་མྱ་ངན་ལས་འདས་ནས་བདུད་སྡིག་ཏོ་ཅན་གྱི་མཐུས་རྒྱལ་བའི་བསྟན་པ་ཉམས་པར་བྱེད་པའི་མུ་སྟེགས་ཅན་གྱི་གནོད་པ་རིམ་པར་བྱུང་བས་འཕགས་པ་ཡུལ་ན་བཞུགས་པའི་རྒྱལ་བའི་བཀའ་གླེགས་བམ་མང་པོ་ཞིག་ནུབ་པར་གྱུར་པ་ལ། བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ཀླུ་ཡུལ་ནས་སྤྱན་དྲངས་ཏེ་རྒྱ་གར་ན་བཞུགས་ཤིང༌། ཤེར་ཕྱིན་སྟོང་ཕྲག་བརྒྱད་པ་སྔར་ནས་བཞུགས་པས་འཕགས་པ་གྲོལ་སྡེས་མངོན་རྟོགས་རྒྱན་ཤེར་ཕྱིན་དེ་གཉིས་དང་སྦྱར་ཡང་འགའ་ཞིག་གི་ཐད་ལ་འབྱོར་དཀའ་བར་བྱུང་བ་ཝཱ་ར་ཎཱ་སིའི་གཙུག་ལག་ཁང་དུ་ཉི་ཁྲི་ལ་གཟིགས་པས་ཐམས་ཅད་འབྱོར་ཏེ། དོན་བདུན་ཅུའི་དང་པོ་སེམས་བསྐྱེད་སྟོན་པ་ལ་ཉི་ཁྲིར། ཤ་ར་དྭ་ཏིའི་བུ། འདི་ལ་བྱང་ཆེན་ཆོས་ཐམས་ཅད་རྣམ་པར་ཐམས་ཅད་མངོན་པར་རྫོགས་པར་འཚང་རྒྱ་བར་འདོད་པས་ཤེར་ཕྱིན་ལ་བརྩོན་པར་བྱའོ། །ཞེས་གསུངས། དེ་བཞིན་དུ་བྱང་ཆུབ་དོན་གཉེར་མདོར་བསྟན་རྒྱས་བཤད། གཞན་དོན་དོན་གཉེར་མདོར་བསྟན་རྒྱས་བཤད། ས་ལྟ་བུའི་སེམས་བསྐྱེད་ནས་ཆོས་ཀྱི་སྤྲིན་ལྟ་བུའི་སེམས་བསྐྱེད་ཀྱི་བར་སེམས་བསྐྱེད་ཉེར་གཉིས་རེ་རེ་ནས་མདོ་དང་འབྱོར་ཞིང༌། དེ་བཞིན་དུ་གདམས་ངག་གི་དང་པོ་སྒྲུབ་པ་ནས་བཟུང་འཕྲིན་ལས་ཉི་ཤུ་རྩ་བདུན་གྱི་བར་རེ་རེ་ནས་རྒྱལ་བས་གསུངས་པའི་མདོ་དང་འབྱོར་པས། རྒྱ་མཚོར་བགྲོད་པའི་དེད་དཔོན་གྱིས་ཡིད་བཞིན་གྱི་ནོར་བུ་རྙེད་པ་ལྟར་ཐུགས་རབ་ཏུ་ཚིམ་པར་གྱུར་ཏོ། །

              དགེ་བསྙེན་ཞི་བའི་གོ་ཆས་ཉི་ཁྲི་གདན་དྲངས་ཚུལ་ནི། དགེ་བསྙེན་དེ་ནགས་ཁྲོད་ཞིག་ན་འཕགས་པ་སྤྱན་རས་གཟིགས་ཀྱི་རྣལ་འབྱོར་ལ་རྩེ་གཅིག་ཏུ་གནས་པའི་ཚེ་ཡུལ་དེའི་རྒྱལ་པོ་ཞིག་གིས་བསྐུལ་ནས་པོ་ཏ་ལར་འགྲོ་བར་ཆས་ནས་འཕགས་པ་སྤྱན་རས་གཟིགས་ལ་གསོལ་བ་རྩེ་གཅིག་ཏུ་བཏབ་སྟེ་སོང་བ་ན་ལྷོ་ཕྱོགས་དཔལ་ལྡན་འབྲས་སྤུངས་ཀྱི་མཆོད་རྟེན་དུ་སླེབས། དེ་ནས་པོ་ཏ་ལར་འགྲོ་བའི་ལམ་ཡིག་ལྟར་འགའ་ཞིག་གི་ཐད་དུ་ས་འོག་ཏུ་བགྲོད་པ་དང༌། རྒྱ་མཚོ་ལ་གཟིངས་བཅས་ཏེ་བགྲོད་པ་སོགས་དཀའ་བ་བརྒྱ་ཕྲག་དུ་མའི་སྒོ་ནས་ཕྱིན་ཏེ་པོ་ཏ་ལའི་རི་བོའི་གཤམ་དུ་སླེབས་པ་ན་གཡང་ས་ཆེན་པོ་སུས་ཀྱང་བགྲོད་མི་ནུས་པ་ཞིག་བྱུང་བས་ལྷ་མོ་རལ་གཅིག་མ་ལ་གསོལ་བ་བཏབ་པས་ལྷ་མོའི་མཐུས་གཡང་ས་ཆེན་པོ་དེ་ལ་ཟམ་པ་ཞིག་བྱུང་ནས་ཐར། དེ་ནས་གཅན་གཟན་གྱི་འཇིགས་པ་ཆེན་པོ་བྱུང་བ་ལ་འཕགས་པ་ཉིད་ལ་གསོལ་བ་བཏབ་པས་འཇིགས་པ་ལས་གྲོལ། དེ་ནས་རི་བོ་ལ་འཛེགས་པ་ན་རི་བོའི་གཤམ་དུ་རྗེ་བཙུན་མ་སྒྲོལ་མའི་གནས་དང་། གཉེར་ཅན་མའི་གནས་དང༌། རིའི་རྩེ་མོ་ན་འཕགས་པའི་གཞལ་མེད་ཁང་ཡོད་པ་རྣམས་སུ་རིམ་གྱིས་ཕྱིན་ཏེ་འཕགས་པའི་ཞལ་དངོས་སུ་མཇལ། ཉི་ཁྲི་ལེ་བརྒྱད་མ་གདན་དྲངས། འཕགས་པ་ཐུགས་རྗེ་ཆེན་པོའི་མཐུས་གེགས་མེད་པར་ཝཱ་ར་ཎཱ་སིར་སླེབས་ནས་དེའི་གཙུག་ལག་ཁང་དུ་ཉི་ཁྲི་བཞུགས་སོ། །

              དེ་ནས་འཕགས་པ་རྣམ་གྲོལ་སྡེས་མངོན་རྟོགས་རྒྱན་དང་ཉི་ཁྲི་སྦྱར་བའི་བསྟན་བཅོས་ཆེན་པོ་ཉི་ཁྲི་སྣང་བར་མཛད། འཛམ་བུའི་གླིང་དུ་མདོ་རྒྱན་སྦྱར་བའི་ཐོག་མ་འདི་ཡིན་ནོ། །སློབ་དཔོན་བདག་ཉིད་ཆེན་པོ་འདིས་བསྟན་པའི་དོན་དུ་མདོ་རྒྱན་སྦྱར་ནས་སྐལ་པ་དང་ལྡན་པ་དག་ལ་རྒྱ་ཆེར་སྤེལ་ཞིང༌། དེའི་ཚེ་ཤེར་ཕྱིན་གྱི་གདམས་ངག་ཉན་པའི་སློབ་མ་སྟོང་ཕྲག་མང་པོ་བྱུང་ཞིང་ཐེག་པ་ཆེན་པོའི་ལམ་གྱི་རིམ་པ་ལ་སློབ་པར་འདོད་པ་མཐའ་དག་བདག་ཉིད་ཆེན་པོ་འདིའི་ཞབས་རྡུལ་བསྟེན་པ་ཞིག་བྱུང་ངོ༌། །སློབ་དཔོན་འདིས་ལོ་སུམ་ཅུ་ཙམ་གྱི་རིང་བསྟན་པའི་བྱ་བ་རྒྱ་ཆེར་མཛད་ནས་དགའ་ལྡན་དུ་རྒྱལ་བ་མ་ཕམ་པའི་ཞབས་དྲུང་དུ་ཕེབས་སོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་འཕགས་པ་གྲོལ་སྡེ་ལ་གསོལ་བ་འདེབས་ཤིང་བདག་ཉིད་ཆེན་པོ་འདིས་མདོ་རྒྱན་སྦྱར་བའི་ཤིང་རྟའི་སྲོལ་ཕྱེ་བ་ལྟར་བྱང་ཆུབ་ལམ་གྱི་རིམ་པའི་གནད་རྣམས་རྒྱལ་བའི་གསུང་རབ་ཉིད་ལས་གསུངས་པའི་ཚུལ་ལ་ངེས་པ་རྙེད་པར་བྱས་ནས་གསུང་རབ་ཐམས་ཅད་ཀྱི་སྙིང་པོའི་དོན་མ་ཚང་བ་མེད་པ་བྱང་ཆུབ་ལམ་གྱི་རིམ་པ་ཉམས་ལེན་པ་བརྩོན་པ་ཆིག་བསྒྲིལ་དུ་བྱའོ།། །།

                                                                                                               རྩོམ་སྒྲིག་པ། མང་ར་བ།
            གསལ་འདེབས།
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                     དྲ་བའི་སྦྲེལ་ཐགhttp://www.tb1025.cn