སློབ་དཔོན་བདག་ཉིད་ཆེན་པོ་འདི་ལ་སློབ་མ་བསྟན་པ་འཛིན་ནུས་པ་བསམ་གྱི་མི་ཁྱབ་པ་བྱུང་ཞིང༌། དེ་ཐམས་ཅད་ཀྱི་ནང་ནས་མཆོག་ཏུ་གྱུར་པ་བཞི་སྟེ། འདུལ་བ་ལ་མཁས་པའི་མཆོག་ཏུ་གྱུར་པ་སློབ་དཔོན་ཡོན་ཏན་འོད། མངོན་པ་ལ་མཁས་པའི་མཆོག་ཏུ་གྱུར་པ་སློབ་དཔོན་བློ་གྲོས་བརྟན་པ། ཚད་མ་ལ་མཁས་པའི་མཆོག་ཏུ་གྱུར་པ་སློབ་དཔོན་ཕྱོགས་ཀྱི་གླང་པོ། ཕར་ཕྱིན་ལ་མཁས་པའི་མཆོག་ཏུ་གྱུར་པ་སློབ་དཔོན་འཕགས་པ་རྣམ་གྲོལ་སྡེ་བཞིའོ། །དེ་ལ་འདུལ་བ་ལ་མཁས་པའི་མཆོག་ཏུ་གྱུར་པ་སློབ་དཔོན་ཡོན་ཏན་འོད་ནི་ཡུལ་བཅོམ་བརླག་ཏུ་བྲམ་ཟེའི་རིགས་སུ་འཁྲུངས། ཆུང་ངུའི་དུས་ནས་རིག་གནས་མཐའ་དག་ལ་མཁས་པར་སྦྱངས། དེ་ནས་རྒྱལ་བའི་བསྟན་པ་ལ་རབ་ཏུ་བྱུང་ཞིང་བསྙེན་པར་རྫོགས་ནས་མཁས་མཆོག་དབྱིག་གཉེན་གྱི་དྲུང་དུ་ཕེབས་ཏེ་སྡེ་སྣོད་གསུམ་ལ་སྦྱངས་ཤིང་ཐེག་པ་ཆེན་པོའི་ལམ་གྱི་རིམ་པ་གསན་ནས་ཐེག་ཆེན་གྱི་མདོ་སྡེ་མཐའ་དག་ལ་སྦྱངས། སྡེ་པ་བཅོ་བརྒྱད་པོ་སོ་སོའི་ལུགས་མ་འདྲེས་པར་མཁྱེན་ཅིང་འདུལ་བ་འབུམ་སྡེ་ཐུགས་ལ་བཟུང་སྟེ་རྒྱུན་དུ་ཁ་ཏོན་དུ་མཛད། དེ་ལྟར་ཀློག་པ་ཐོས་བསམ་དང་སྤོང་བ་བསམ་གཏན་ལ་བརྩོན་པར་མཛད་པས་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུ་ཕ་རོལ་ཏུ་སོན་ཞིང་གཟུངས་དང༌། སྤོབས་པ་དང༌། མངོན་པར་ཤེས་པ་དང༌། ཏིང་ངེ་འཛིན་གྱི་སྒོ་བརྒྱ་ཕྲག་མང་པོ་ཐུགས་ལ་འཁྲུངས། ལྷག་པར་སློབ་དཔོན་དབྱིག་གཉེན་གྱི་མན་ངག་ལ་བརྟེན་ནས་ལམ་རིམ་གྱིས་བགྲོད་དེ་འཕགས་པའི་ས་ཐོབ་པས་སློབ་དཔོན་འཕགས་པ་ཡོན་ཏན་འོད་ཅེས་སྙན་པའི་གྲགས་པས་ཕྱོགས་ཀུན་ཁྱབ་པར་གྱུར་ཅིང༌། རྒྱལ་བའི་བསྟན་པ་ལ་བྱ་བ་མཛད་ཕྱིར་འདུལ་བ་ལུང་སྡེ་བཞིའི་གནད་ཐམས་ཅད་བསྡུས་པ་འདུལ་བ་རྒྱ་མཚོའི་སྙིང་པོ་ཞེས་བྱ་བའི་བསྟན་བཅོས་ཆེན་པོ་མཛད་དེ། དེ་ལ་ནི་འདུལ་བའི་མདོ་ཞེས་ཡོངས་སུ་གྲགས་ཤིང་རྒྱལ་བའི་བཀའ་དང་ཁྱད་པར་མེད་པར་རྒྱལ་བའི་བསྟན་པ་ལ་རབ་ཏུ་བྱུང་བས་ཐམས་ཅད་ཀྱིས་ཚད་མར་འཛིན་ཅིང་འདུལ་བ་ལུང་ལ་བལྟ་བའི་མིག་ལྟ་བུ་སངས་རྒྱས་ཀྱི་བསྟན་པའི་སྒྲོན་མེ་སྔོན་བྱོན་པའི་མཁས་གྲུབ་ཐམས་ཅད་ཀྱིས་གཙིས་པོ་ཆེར་མཛད་དོ། །

               གཞན་ཡང་འདུལ་བའི་ལས་བརྒྱ་རྩ་གཅིག་གི་ཆོ་ག་ཀརྨ་ཤ་ཏམ་དུ་གྲགས་པ་ཡང་མཛད་དེ། ད་ལྟ་རྒྱལ་བའི་བསྟན་པ་ལ་ཞུགས་ནས་དགེ་བསྙེན་དང༌། བར་མ་རབ་བྱུང་དང༌། ཚིགས་སྔ་མ་དགེ་ཚུལ་གྱི་སྡོམ་པ་དང༌། བསླབ་གཞི་ཡོངས་སུ་རྫོགས་པ་དགེ་སློང་གི་སྡོམ་པ་ལེན་པའི་ཆོ་ག་དང་གཞི་གསུམ་གྱི་ཆོ་ག་སོགས་འདུལ་བའི་ལས་ཀྱི་ཆོ་ག་རྣམས་བདག་ཉིད་ཆེན་པོ་འདི་ཁོ་ནའི་བཀའ་དྲིན་ལས་བྱུང་བས་བསྟན་པ་འདི་ལ་བཀའ་དྲིན་མཚུངས་པ་མེད་པ་ཞིག་གོ །བདག་ཉིད་ཆེན་པོ་འདི་འཕྲིན་ལས་ཀྱི་ཁྱབ་བདག་ཤིན་ཏུ་ཆེ་བས་ལྷན་ཅིག་གནས་པའི་དགེ་སློང་ཡང་སྟོང་ཕྲག་ལྔ་རེ་ཙམ་ཡོད་པར་བཤད་ཅིང༌། དེ་ཐམས་ཅད་ཀྱང་སྡེ་སྣོད་གསུམ་ལ་མང་དུ་ཐོས་པ་དང་ལྡན་པ། ཉིན་ཞག་ཕྲུགས་རེའི་ནང་དུ་ལྟུང་བ་བཤགས་པར་འོས་པ་རྣམས་བཤགས།བསྡམ་པར་འོས་པ་རྣམས་བསྡམས། བྱིན་གྱི་རླབས་པར་འོས་པ་རྣམས་བྱིན་གྱིས་རླབས་ཏེ་ཚུལ་ཁྲིམས་རྣམ་པར་དག་པ་སྔོན་རྒྱལ་བ་ཞལ་བཞུགས་དུས་དང་བསྟན་པའི་གཏད་རབས་ཀྱི་སྐབས་དགྲ་བཅོམ་པ་རྣམས་ཀྱིས་བསྟན་པ་སྐྱོང་བའི་དུས་བཞིན་ཡོད་ཅེས་སྔོན་གྱི་མཁས་པ་རྣམས་ལ་གཏམ་དུ་གྲགས་སོ། །

                                                                                                          རྩོམ་སྒྲིག་པ། མང་ར་བ།
              གསལ་འདེབས། 
                         རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                        དྲ་བའི་སྦྲེལ་ཐགhttp://www.tb1025.cn