མ་འོངས་པ་ན་རྗེ་བཙུན་བྱམས་པ་མགོན་པོ་ཞིང་འདིར་བྱོན་ནས་འཚང་རྒྱ་བའི་མཛད་པ་སྟོན་ཚུལ་ནི། ཐུབ་པའི་བསྟན་པ་ལོ་ལྔ་སྟོང་དུ་གནས་པ་རིམ་གྱིས་རྫོགས་ནས་མཐར་རྟགས་ཙམ་འཛིན་པ་ལོ་ལྔ་བརྒྱ་དང༌། དེ་ནས་དེ་ཡང་ནུབ་སྟེ་སེམས་ཅན་རྣམས་རྨོངས་ཤིང་ཉོན་མོངས་པ་ཁོ་ནའི་དབང་དུ་སོང་སྟེ་ཕན་ཚུན་གཅིག་ལ་གཅིག་འཚེ་ཞིང་སྡིག་པ་ཁོ་ན་སྤྱོད་པས་བསོད་ནམས་ཇེ་དམན་ཇེ་དམན་ལ་སོང་སྟེ་ཚེ་ལོ་ཉི་ཤུ་དང༌། དེ་ཡང་ཇེ་ཐུང་ཇེ་ཐུང་ལ་སོང་སྟེ་མཐར་ཚེ་ལོ་བཅུ་ལ་རིང་མཐའ་བྱེད་པའི་དུས་འབྱུང་ཞིང༌། དེ་ནས་མུ་གེའི་བསྐལ་པ་དང༌། ནད་ཀྱི་བསྐལ་པ་དང༌། མཚོན་གྱི་བསྐལ་པ་རྣམས་རིམ་གྱིས་བྱུང་སྟེ་སེམས་ཅན་རྣམས་ཕན་ཚུན་འཐབ་རྩོད་ཀྱིས་སྡུག་བསྔལ་ཞིང་ཉམ་ཐག་པ་དམྱལ་བར་གནས་པ་ལྟ་བུར་འགྱུར་ལ། དེའི་དུས་སུ་རྗེ་བཙུན་བྱམས་པ་མགོན་པོ་སྤྲུལ་པ་ཁྲུ་གང་པ་སྐུ་ལ་ཆོས་གོས་ངུར་སྨྲིག་གསོལ་བ། གཟི་བརྗིད་འབར་ཞིང་འོད་འཕྲོ་བ་ཞིག་བྱོན་པ་སེམས་ཅན་དེ་རྣམས་ཀྱིས་མཐོང་ནས་ངོ་མཚར་ཞིང་དད་པ་སྐྱེས་ཏེ་འདི་ལྟ་བུའི་སྐུ་གཟུགས་མཛེས་པ་ཅི་ལས་བྱུང་ཞེས་གསོལ་བས། སྤྲུལ་པའི་བྱམས་མགོན་དེས་ངས་བཟོད་པ་བསྒོམས་པས་འདི་ལྟར་བྱུང་བ་ཡིན། ཁྱེད་རྣམས་ཀྱང་འཐབ་རྩོད་སྤོངས་ལ་བཟོད་པ་སྒོམས་ཤིག དེ་ལྟར་བྱས་ན་ང་དང་འདྲ་བར་འགྱུར་རོ། །ཞེས་གསུངས་པས། བྱམས་མགོན་གྱི་ཐུགས་བསྐྱེད་ཀྱི་མཐུས་སེམས་ཅན་དེ་དག་གིས་བཟོད་པ་བསྒོམས་པས་རིམ་གྱིས་བསོད་ནམས་རྒྱས་ནས་ཚེ་རིང་དུ་འཕེལ་ཏེ་ཚེ་ལོ་ཉི་ཤུ་པ་དང༌། སུམ་ཅུ་པ་སོགས་ཚེ་ཇེ་རིང་ཇེ་རིང་དུ་གྱུར་ཅིང་བདེ་སྐྱིད་ཀྱང་ཇེ་འཕེལ་དུ་སོང་སྟེ་འཛམ་བུའི་གླིང་གི་ས་ཆེན་པོའི་ཁྱོན་འདི་ཐམས་ཅད་ལག་མཐིལ་ལྟར་མཉམ་ཞིང་ཡངས་པ། ངམ་གྲོག་དང་ཚེར་མ་དང་ལྗན་ལྗིན་དང་གྱོ་མོ་དང་གསེག་མ་ལ་སོགས་པ་མེད་ཅིང༌། ནེའུ་གསིང་མཛེས་པས་ཁྱབ་པ་རྐང་པ་བཏེགས་ན་སོར་བཞི་འཕར་ཞིང་མནན་ན་ནེམ་ཞེས་བྱེད་པ་ཤ་སྟག་སྟེ། ཤིང་བལ་ལྟར་འཇམ་པ། འབྲུ་དང༌། ལོ་ཏོག་དང༌། འཁྲི་ཤིང་གེལ་པ་ལ་སོགས་པས་གང་ཞིང༌། ཧ་ཅང་ཡང་མི་དྲོ་ཧ་ཅང་ཡང་མི་གྲང་བ་རླུང་ཤིན་ཏུ་ཆུང་བ། དུས་དང་ཚད་མཉམ་པར་ལྡང་ཞིང་དྲི་ཕུན་སུམ་ཚོགས་པ། མངར་ཞིང་ཞིམ་པའི་ས་ལུ་མ་རྨོས་པར་སྐྱེ་ཞིང༌། ལྷའི་ཆར་བབས་པས་སའི་བཅུད་འཕེལ་བ། ཚོན་སྣ་ཚོགས་ཀྱིས་སྤྲས་པའི་གོས་ཀྱི་ལྗོན་ཤིང་མེ་ཏོག་དང་འབྲས་བུ་ཕུན་སུམ་ཚོགས་པ་འཕང་དུ་རྒྱང་གྲགས་ཀྱི་ཚད་ཙམ་ཡོད་པས་གང་བ།བར་བར་ན་ལྟེང་ཀ་དང་ཁྲུས་ཀྱི་རྫིང་བུ་དང་ལྡན་པ་སྟེ་ཡོན་ཏན་བརྗོད་ཀྱིས་མི་ལང་བ་ཞིག་འབྱུང་ངོ༌། །

              དེར་སྐྱེས་པའི་མི་རྣམས་ནི། ལུས་ལ་ཧ་རི་ཙན་དན་གྱི་དྲི་བྲོ་བ། ཀུ་ཤའི་གོས་ཁྱད་པར་དུ་འཕགས་པ་གྱོན་པ། ལྷའི་དཔལ་འབྱོར་ལ་ལོངས་སྤྱོད་ཅིང་ཚེ་ལོ་བརྒྱད་ཁྲི་ཐུབ་པ། ལུས་ངག་ཡིད་གསུམ་མི་དགེ་བ་དང་བྲལ་བ། ཁ་དོག་བཟང་ཞིང་ལུས་གཟུགས་ཆེ་བ། དེ་ལ་ད་ལྟའི་ཁྲུ་བརྒྱད་ཅུའམ་བརྒྱད་ཅུ་རྩ་བརྒྱད་པ། འདོམ་ཉི་ཤུ་རྩ་གཉིས་ཙམ་ཡོད་པ། ཀུན་ཀྱང་ཚན་པོ་ཆེའི་སྟོབས་དང་ལྡན་པ། མི་དེ་དག་ལ་འདོད་པ་དང་ཟ་བ་དང་རྒས་པ་སྟེ་དེ་ཙམ་མ་གཏོགས་ནད་ཀྱི་མིང་ཙམ་ཡང་མི་གྲག་པ་ལྷའི་ལུས་དང་ཁྱད་པར་མེད་པར་འགྱུར་རོ། །སྟོན་པའི་བསྟན་པ་རྟགས་ཙམ་འཛིན་པ་འདི་ནུབ་པ་ཡན་ཆད་ཀྱིས་བསྐལ་བ་ཡ་ཐོག་རིང་མོ་རྫོགས་པ། དེ་ནས་རྗེ་བཙུན་བྱམས་པ་མགོན་པོ་མ་བྱོན་གྱི་བར་ལ་རང་སངས་རྒྱས་མང་དུ་འབྱུང་ཞིང༌། བར་གྱི་ཁུག་པ་བཅོ་བརྒྱད་ཀྱི་འགོར་རྗེ་བཙན་བྱམས་པ་མགོན་པོ་འབྱོན་པར་གསུངས་སོ། །

              རྗེ་བཙུན་བྱམས་པ་མགོན་པོ་གང་དུ་འབྱོན་པའི་གནས་ནི་ཐུབ་པའི་དབང་པོ་མྱ་ངན་ལས་འདའ་ཚུལ་བསྟན་པའི་ས་གྲོང་ཁྱེར་རྩྭ་ཅན་དུ་ཏོག་གེ་བློ་གྲོས་ཞེས་བྱ་བའི་རྒྱལ་པོའི་ཕོ་བྲང་འབྱུང་ལ། ཕོ་བྲང་དེའི་ཆུར་དཔག་ཚད་བཅུ་གཉིས། ཞེང་དུ་དཔག་ཚད་བདུན་ཡོད་པ། རིན་པོ་ཆེ་སྣ་བདུན་གྱི་སོ་ཕག་གི་རྩིག་པ་རིམ་པ་བདུན་དང༌། འོབས་རིམ་པ་བདུན་དང༌། རིན་པོ་ཆེ་ལས་གྲུབ་པའི་ཏ་ལའི་ཕྲེང་བ་རིམ་པ་བདུན་གྱིས་བསྐོར་ཞིང་དྲིལ་བུའི་དྲྭ་བས་མཛེས་པ། དེ་དག་རླུང་གིས་བསྐྱོད་པ་ན་སིལ་སྙན་ཡན་ལག་ལྔ་དང་ལྡན་པའི་སྒྲ་འབྱུང་སྟེ། སེམས་ཅན་རྣམས་དགའ་བར་བྱེད་པ། ལྷ་རྫས་ལས་གྲུབ་པའི་མེ་ཏོག་མནྡྷ་ར་དང༌། ཀུ་མུད་ཏ་དང༌། ཨུཏྤ་ལ་དང༌། མི་ཡུལ་ན་ཡོད་པའི་མེ་ཏོག་སྣ་ཚོགས་པའི་རྒྱན་བཀྲམ་པ། ཡན་ལག་བརྒྱད་དང་ལྡན་པའི་ཁྲུས་ཀྱིས་རྫིང་བུ་དང༌། མཚོ་པདྨས་བརྒྱན་པ་རྣམས་ལ་ཆུ་བྱ་མང་པོ་སྒྲ་སྙན་པ་སྣ་ཚོགས་སྒྲོག་པ། སྐྱེད་མོས་ཚལ་ཕུན་སུམ་ཚོགས་པ་མེ་ཏོག་གིས་གང་བ་ཡོད་པ། གྲོང་ཁྱེར་དེའི་ཕྱོགས་བཞི་དང་དབུས་ཀུན་ན་གཞན་ལས་ཁྱད་པར་དུ་འཕགས་པའི་རིན་པོ་ཆེའི་དཔག་བསམ་གྱི་ཤིང་རེ་བ་ཐམས་ཅད་སྐོང་བ་ཡོད་པས།དེས་ལྷའི་འབྱོར་པ་ཡང་ཟིལ་གྱིས་གནོན་པར་བྱེད་དོ། །

             དེར་གླིང་བཞི་ལ་དབང་བའི་འཁོར་ལོས་བསྒྱུར་བའི་རྒྱལ་པོ་དཔུང་ཚོགས་ཡན་ལག་བརྒྱད་དང་ལྡན་པ། རིན་པོ་ཆེ་སྣ་བདུན་དང༌། བུ་སྟོང་དང་ལྡན་པ། བཙུན་མོ་བརྒྱད་ཁྲི་དང༌། ཁམས་ཀྱི་རྒྱལ་ཕྲན་བཞི་སྟོང་བརྒྱད་ཅུ་ལ་དབང་བསྒྱུར་པ་ཆོས་ཀྱི་སྲིད་སྐྱོང་བའི་རྒྱལ་པོ་དུང་ཞེས་བྱ་བ་འབྱུང་ཞིང༌། དེའི་མདུན་ན་འདོན་ཆེན་པོ་བྲམ་ཟེ་ཚངས་རབ་ཅེས་པ་ཐོས་པ་མང་ཞིང་རིག་བྱེད་ཀུན་ལ་མཁས་པ། དེ་ལ་བཙུན་མོ་ཚངས་ལྡན་མ་ཞེས་བྱ་བ་སྒྱུ་རྩལ་གྱི་ཡོན་ཏན་ཡོངས་སུ་རྫོགས་ཤིང་མཛེས་པ་ཞིག་འབྱུང་སྟེ། བྲམ་ཟེ་ཡབ་ཡུམ་དེ་གཉིས་ཀྱི་སྲས་སུ་རྗེ་བཙུན་བྱམས་མགོན་འབྱོན་པར་འགྱུར་རོ། །

                                                                                                               རྩོམ་སྒྲིག་པ། མང་ར་བ།
             གསལ་འདེབས། 
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn