ཡང་སྔོན་འདས་པའི་བསྐལ་པ་བརྗོད་ཀྱིས་མི་ལང་བའི་སྔོན་རོལ་ཏུ་འཁོར་ལོས་བསྒྱུར་བའི་རྒྱལ་པོ་ཡུལ་འཁོར་སྐྱོང་ཞེས་བྱ་བ་བྱུང་སྟེ།དེ་ལ་བུ་སྟོང་ཡོད་དོ། །དེའི་ཚེ་དེ་བཞིན་གཤེགས་པ་ཡོན་ཏན་མཐའ་ཡས་རིན་པོ་ཆེ་སྣ་ཚོགས་བཀོད་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱོན་ཏེ། དེ་བཞིན་གཤེགས་པ་དེ་ལ་འཁོར་ལོས་བསྒྱུར་བའི་རྒྱལ་པོ་ཡུལ་འཁོར་སྐྱོང་བུ་སྟོང་དང་བཅས་པས་དུས་ཡུན་རིང་པོར་མཆོད་ཅིང་བསྙེན་བཀུར་ནས་དེ་བཞིན་གཤེགས་པ་དེའི་སྤྱན་སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ན་དེ་བཞིན་གཤེགས་པ་དེས་རྒྱལ་བུ་སྟོང་པོ་དེ་རྣམས་ཀྱི་མིང་བུམ་པར་བཅུག་ནས་རིམ་བཞིན་ལུང་བསྟན་པ་ན། རྗེ་བཙུན་བྱམས་མགོན་འདི་ཉིད་འཁོར་ལོས་བསྒྱུར་བའི་རྒྱལ་པོ་དེའི་བུ་སྟོང་གི་ནང་ནས་བཞི་པ་སྐ་རགས་ཅན་ཞེས་བྱ་བ་ཡིན་པས།དེ་བཞིན་གཤེགས་པ་དེས་བུ་སྟོང་པོ་དེ་རིམ་བཞིན་བསྐལ་པ་བཟང་པོ་འདི་ལ་འཚང་རྒྱ་བར་ལུང་བསྟན་ཏེ། དོན་འདི་ལ་དགོངས་ནས། མཐུན་པའི་སྨོན་ལམ་དགེ་ཚོགས་རྨད་བྱུང་ཞིང༌། །སྤྱད་པ་སྤྱོད་ཚེ་ན་ཡང་མཆེད་གྱུར་ལ། །བསྐལ་བཟང་འདི་ལ་མཛད་པ་མཐར་ཕྱིན་པའི། །རྫོགས་པའི་སངས་རྒྱས་སྟོང་ལ་ཕྱག་འཚལ་ལོ། །ཞེས་བསྟོད་པ་མཛད་དོ། །

              གཞན་ཡང་སངས་རྒྱས་མང་པོའི་སྤྱན་སྔར་ཐུགས་བསྐྱེད་པར་མཛད་ཅིང་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་བསྐལ་བཟང་གི་སངས་རྒྱས་གཞན་ཐམས་ཅད་ལས་བསྐལ་པ་བཞི་བཅུ་རྩ་གཉིས་ཀྱིས་ཐུགས་བསྐྱེད་པ་སྔ་བར་གསུངས་སོ། །དེ་ལྟར་རྗེ་བཙུན་བྱམས་པ་མགོན་པོས་ཐུགས་བསྐྱེད་ནས་བསྐལ་པ་བགྲངས་བ་ལས་འདས་པར་ཚོགས་གཉིས་བར་མ་ཆད་དུ་བསགས། བཅོམ་ལྡན་འདས་ཤཱཀྱ་ཐུབ་པས་མི་སྐྱེ་བའི་ཆོས་ལ་བཟོད་ལ་རྙེད་པ་ནས་བཟུང་བཅོམ་ལྡན་འདས་ཤཱཀྱ་ཐུབ་པ་ཉིད་ཡོངས་འཛིན་དུ་བསྟེན་ཏེ་དབུའི་གཙུག་ཏུ་འབྲལ་མེད་དུ་བསྒོམས་པས་གདུལ་བྱ་རྣམས་ཀྱིས་བྱམས་མགོན་གྱི་དབུའི་གཙུག་ན་བྱང་ཆུབ་མཆོད་རྟེན་ཡོད་པར་མཐོང་སྟེ། ད་ལྟ་བྱམས་མགོན་གྱི་སྐུ་ལ་དབུའི་གཙུག་ཏུ་བྱང་ཆུབ་མཆོད་རྟེན་རེ་བྱེད་སྲོལ་ཡོད་པ་འདི་ཡང་དེའི་རྒྱུ་མཚན་གྱིས་ཡིན་པར་གསུངས། དེ་ལྟར་རྗེ་བཙུན་བྱམས་པ་མགོན་པོས་བསྐལ་བ་གྲངས་མེད་མུ་མེད་པར་ཚོགས་གཉིས་བར་མ་ཆད་དུ་བསགས་ནས། དེ་བཞིན་གཤེགས་པ་རིན་ཆེན་གདུགས་ཞེས་བྱ་བ་འཇིག་རྟེན་དུ་བྱོན་པའི་ཚེ། བྱམས་མགོན་འདི་ཉིད་དགེ་སློང་བློ་གྲོས་བརྟན་པ་ཞེས་བྱ་བར་གྱུར་ནས་དེ་བཞིན་གཤེགས་པ་དེ་ཉིད་ལ་བསྙེན་བཀུར་ཞིང་ལོ་བརྒྱད་ཁྲི་བཞི་སྟོང་གི་བར་དུ་ཉིན་རེ་བཞིན་སེམས་ཅན་བརྒྱ་བརྒྱ་ཙམ་བསླབ་པའི་གཞི་ལྔ་ལ་མ་བཀོད་ཀྱི་བར་དུ་ཟས་མི་བཟའ། སྲོག་ཆགས་ཀྱི་དོན་དུ་འགྱུར་བ་མཐོང་ཚེ་ཞག་མང་པོའི་བར་དུ་ཟས་བཅད་ཀྱང་དེས་མི་སྐྱོ་བར་སེམས་ཅན་གྱི་དོན་ལ་བརྩོན་པར་མཛད་དེ་སྲོག་ཆགས་བྱེ་བ་ཁྲག་གིས་འབུམ་ཕྲག་སུམ་ཅུ་རྩ་དྲུག་བསླབ་པའི་གཞི་ལྔ་ལ་བཀོད་དོ། །

              དེ་ལྟར་ལོ་བརྒྱད་ཁྲི་བཞི་སྟོང་གི་བར་དུ་སེམས་ཅན་གྱི་དོན་མཛད་ནས་སྲོག་ཆགས་བྱེ་བ་ཕྲག་གསུམ་ཐེག་པ་ཆེན་པོའི་ལམ་ལ་བཀོད། སྲོག་ཆགས་བགྲང་བ་ལས་འདས་པ་ཞིག་ཐེག་པ་དམན་པའི་ལམ་ལ་བཀོད། སྲོག་ཆགས་གྲངས་མེད་མུ་མེད་པ་ཞིག་ལ་བྱམས་པའི་ཏིང་ངེ་འཛིན་བསྐྱེད་པར་མཛད།ཐ་ན་གྲོང་དང་གྲོང་ཁྱེར་དང་ཚོང་དུས་དང་ཡུལ་འཁོར་ལ་སོགས་པ་གང་དང་གང་དུ་བྱོན་པའི་སེམས་ཅན་དེ་དང་དེ་དག་གིས་ཞལ་མཐོང་བ་དང༌། གསུང་ཐོས་པ་དང་ཕྱག་གིས་རེག་པ་དང་གང་དུ་ཞབས་བཞག་པའི་ས་དེ་དང་དེ་དག་ན་གནས་པའི་སེམས་ཅན་དེ་དག་ཐམས་ཅད་ཀྱང་བྱམས་པའི་ཏིང་ངེ་འཛིན་ལ་བཀོད་པས་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་ལེགས་སོའི་བསྔགས་པ་བརྗོད་ཅིང༌། དཀར་ཕྱོགས་ཀྱི་ལྷ་ཐམས་ཅད་ཀྱིས་འདི་ལྟ་བུ་སེམས་ཅན་ཐམས་ཅད་བྱམས་པ་ལ་འགོད་པ་ངོ་མཚར་རོ། །ཞེས་རྒྱ་ཆེར་བསྔགས་པས་ཕྱོགས་བཅུའི་ཞིང་ཐམས་ཅད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་མཚན་གྲགས་ཤིང༌། དེའི་ཚེ་དེ་བཞིན་གཤེགས་པ་རིན་ཆེན་གདུགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ད་ནས་བཟུང་སྟེ་སྐྱེ་བ་ཐམས་ཅད་དུ་བྱམས་པའི་མཚན་དང་ལྡན་པར་འགྱུར་ཞིང༌། མངོན་པར་རྫོགས་པར་སངས་རྒྱས་པའི་ཚེ་ཡང་དེ་བཞིན་གཤེགས་པ་བྱམས་པ་ཞེས་བྱ་བར་འཚང་རྒྱ་བར་འགྱུར་རོ། །ཞེས་ལུང་བསྟན་ཏོ། །

                                                                                                                རྩོམ་སྒྲིག་པ། མང་ར་བ།
            གསལ་འདེབས། 
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn