རྒྱ་ཆེན་སྤྱོད་རྒྱུད་ཀྱི་བླ་བརྒྱུད། རྗེ་བཙུན་བྱམས་པ་མགོན་པོ། ཇོ་བོ་རྗེ་དཔལ་ལྡན་ཨ་ཏི་ཤས་བྱང་ཆུབ་ལམ་གྱི་རིམ་པ་སྟོན་པའི་བླ་མ་བརྒྱུད་པ་ལ་རྒྱ་ཆེན་སྤྱོད་རྒྱུད་དང༌། ཟབ་མོ་ལྟ་རྒྱུད་གཉིས་སུ་མཛད་པའི་རྒྱ་ཆེན་སྤྱོད་རྒྱུད་ཀྱི་བླ་མ་རྣམས་ཀྱི་རྣམ་པར་ཐར་པ་སྟོན་པ་ལ་ཐོག་མར་རྗེ་བཙུན་བྱམས་པ་མགོན་པོའི་རྣམ་ཐར་ནི། འདྲེན་པ་མཉམ་མེད་སྟོན་པ་བཅོམ་ལྡན་འདས། །རྒྱལ་ཚབ་དམ་པ་རྗེ་བཙུན་མི་ཕམ་མགོན། །ཞེས་བསྔགས་པ། འདྲེན་པ་མཉམ་མེད་སྟོན་པ་ཐུབ་པའི་དབང་པོ་དགའ་ལྡན་དུ་སྐྱེ་བ་སྤྲུལ་སྐུའི་ཚུལ་བཟུང་སྟེ་རྒྱལ་བ་འོད་སྲུང་གི་དུས་ནས་ཞིང་འདིར་འབྱོན་པ་ལ་ཉེ་བའི་བར་དགའ་ལྡན་གྱི་ལྷ་རྣམས་ལ་ཆོས་བསྟན་ནས་འཛམ་བུའི་གླིང་དུ་འབྱོན་པ་ལ་ཉེ་བར་ཕྱོགས་པའི་ཚེ། རྗེ་བཙུན་བྱམས་པ་མགོན་པོ་ལ་པྲོག་ཞུ་བསྐོན་ནས་རྒྱལ་ཚབ་ཏུ་དབང་བསྐུར་བས། དེ་ནས་བཟུང་རྒྱལ་ཚབ་བྱམས་པ་མགོན་པོ་ཞེས་གྲགས་པ་རྗེ་བཙུན་བྱམས་མགོན་འདི་ཉིད་སྔོན་ཐུགས་ཇི་ལྟར་བསྐྱེད་པའི་ཚུལ་ནི། མདོ་སྡེ་བསྐལ་བཟང་ལས། བྱང་ཆུབ་སེམས་དཔའ་བྱམས་པ་འཁོར་ལོས་སྒྱུར་བ་ཡི། །རྒྱལ་པོ་རྣམ་པར་སྣང་བྱེད་ཅེས་བྱར་གྱུར་པ་ན། །བདེ་གཤེགས་མཐུ་ཆེན་གདུགས་ཚོད་དག་ལ་སྤྱན་དྲངས་ནས། །དང་པོ་བླ་མེད་བྱང་ཆུབ་ཏུ་ནི་སེམས་བསྐྱེད་དོ།  །ཞེས་གསུངས་པ་ལྟར་རྗེ་བཙུན་བྱམས་པ་མགོན་པོ་འདི་ཉིད་སྔོན་བསྐལ་བ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་སྔོན་རོལ་ཏུ་འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བྱེད་ཅེས་བྱ་བར་གྱུར་པའི་ཚེ་དེ་བཞིན་གཤེགས་པ་ཐུབ་པ་ཆེན་པོ་ཞེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ། དེ་བཞིན་གཤེགས་པ་དེ་ལ་གདུགས་ཚོད་ཕུལ་ནས་མཁའ་ཁྱབ་ཀྱི་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་ཆེན་པོས་གཟིགས་ནས་སེམས་ཅན་ཐམས་ཅད་འཁོར་བ་ལས་སྒྲོལ་བའི་ཕྱིར་དུ་བྱང་ཆུབ་མཆོག་ཏུ་ཐུགས་བསྐྱེད་པར་མཛད་དོ། །

              ཡང་བསྐལ་བ་གྲངས་མེད་པ་བས་ཀྱང་ཆེས་གྲངས་མེད་པ་ཡུན་རིང་ཞིང་ཚད་མེད་བསམ་གྱིས་མི་ཁྱབ་པའི་སྔ་རོལ་ཏུ། རྗེ་བཙུན་བྱམས་པ་གླིང་བཞི་ལ་དབང་བའི་འཁོར་ལོས་བསྒྱུར་བའི་རྒྱལ་པོ་གསེར་མདོག་ཅན་ཞེས་བྱ་བར་གྱུར་པའི་དུས་རྫོགས་པའི་སངས་རྒྱས་གསེར་ཟངས་འོད་བྱང་ཆུབ་སེམས་དཔའི་འཁོར་དཔག་ཏུ་མེད་པ་ཉན་ཐོས་ཀྱི་དགེ་འདུན་དང་བཅས་པ་ལ། རྒྱལ་པོའི་འབྱོར་པ་ཆེན་པོ་དང་བསོད་ནམས་ཀྱི་མཐུ་ཆེན་པོས་སུམ་ཅུ་རྩ་གསུམ་གྱིས་ལྷ་རྣམས་ཀྱི་འབྱོར་པས་ཀྱང་བསྒྲུན་དུ་མེད་པའི་བཀོད་པ་དང༌། མཆོད་པ་དང༌། བསྙེན་བཀུར་བ་ཐམས་ཅད་ཀྱིས་ལོ་བྱེ་བ་ཕྲག་བརྒྱད་ཅུ་རྩ་བཞིར་བཀུར་སྟིར་བྱས་ཏེ་བླ་ན་མེད་པའི་བྱང་ཆུབ་ཏུ་ཐུགས་བསྐྱེད་པར་མཛད།

               ཡང་སྔོན་མི་མཇེད་འཇིག་རྟེན་གྱི་ཁམས་འདིའི་ཐད་དུ་བསྐལ་བ་འཛིན་པ་ཞེས་བྱ་བ་བྱུང་བ་ལ།བསྐལ་བ་ཆེན་པོ་དེ་ལ་གླིང་བཞིའི་སངས་རྒྱས་ཀྱི་ཞིང་འདིར་གླིང་བཞིར་འཁོར་ལོས་བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་ཞིག་བྱུང་ངོ༌། །རྒྱལ་པོ་རྩིབས་ཀྱི་མུ་ཁྱུད་དེ་ལ་མདུན་ན་འདོན་བྲམ་ཟེ་རྒྱ་མཚོའི་རྡུལ་ཞེས་བྱ་བ་ཞིག་ཡོད་དོ། །དེ་ལ་བུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་ཅུས་ལུས་རྣམ་པར་མཛེས་ལ་བསོད་ནམས་བརྒྱའི་མཚན་དང་ལྡན་ཞིང་འོད་འདོམ་གང་པ་ཡོད་ལ་ཤིང་ནྱ་གྲོ་དྷ་ལྟར་ཆུ་ཞེང་གབ་ཅིང་བལྟ་བས་ཆོག་མི་ཤེས་པ་ཞིག་བཙས་སོ། །དེ་བཙས་མ་ཐག་ཏུ་ལྷ་འབུམ་གྱིས་མཆོད་པ་བྱས་ནས་རྒྱ་མཚོའི་སྙིང་པོ་ཞེས་བྱ་བར་མིང་བཏགས་སོ། །དེ་དུས་གཞན་ཞིག་ན་ངེས་པར་བྱུང་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་རིན་པོ་ཆེའི་སྙིང་པོ་ཞེས་བྱ་བར་གྱུར་ནས་བཅོམ་ལྡན་འདས་དེས་ཆོས་ཀྱི་འཁོར་ལོ་བསྐོར་ཏེ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་མཐོ་རིས་དང་ཐར་པའི་འབྲས་བུ་ལ་རབ་ཏུ་བཀོད་པར་གྱུར་ཏོ། །

              དེ་ནས་བྲམ་ཟེར་རྒྱ་མཚོའི་རྡུལ་གྱིས་འཁོར་ལོས་བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་དང་རང་གི་སློབ་མ་བྲམ་ཟེ་རིག་བྱེད་ཀློག་པ་སྟོང་ལ་སོགས་པ་ལ་ཡང་དང་ཡང་དུ་བསྐུལ་ཏེ། དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་སེམས་བསྐྱེད་དུ་བཅུག་གོ །དེའི་ཚེ་རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་སེམས་བསྐྱེད་དེ། བདེ་བ་ཅན་གྱི་ཞིང་གི་བཀོད་པ་བློ་ཡུལ་དུ་བཟུང་ནས་ཞིང་དེ་འགྲུབ་པའི་ཕྱིར་དུ་བསྐལ་བ་གྲངས་མེད་པར་རྫོགས་སྨིན་སྦྱང་གསུམ་གྱི་སྤྱོད་པ་སྤྱད་པ་མཐར་ཕྱིན་པར་མཛད་ནས་བདེ་བ་ཅན་གྱི་ཞིང་གྲུབ་སྟེ་ཞིང་དེར་མངོན་པར་རྫོགས་པར་སངས་རྒྱས་སོ། །བྲམ་ཟེ་རྒྱ་མཚོའི་རྡུལ་གྱི་སློབ་མ་བྲམ་ཟེ་རིག་བྱེད་ཀློག་པ་སྟོང་པོ་དེས་ཀྱང་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་སེམས་བསྐྱེད་ཅིང༌། དེ་བཞིན་གཤེགས་པ་རིན་ཆེན་སྙིང་པོས་དེ་དག་བསྐལ་བ་བཟང་པོ་འདི་ལ་འཚང་རྒྱ་བར་ལུང་བསྟན་ནས་དེ་དག་གིས་རང་རང་གི་ཞིང་བཟུང་བ་ན། དང་པོ་འཁོར་བ་འཇིག་ནས་མཐའ་མ་མོས་པ་སྣང་མཛད་ཀྱི་བར་ཐམས་ཅད་ཀྱི་རང་རང་གི་སངས་རྒྱས་ཀྱི་ཞིང་གདུལ་སླ་བ་དང་ཞིང་དག་པ་ཤ་སྟག་བཟུང་ནས། རྩོད་ལྡན་ཚེ་ལོ་བརྒྱ་པའི་དུས་འདི་དང༌། མ་འོངས་པའི་ཚེ་ལོ་བརྒྱད་ཁྲི་པའི་དུས་གཉིས་པོ་འདི་ལུས་ཏེ། དེ་ཡང་རྩོད་ལྡན་ཚེ་ལོ་བརྒྱ་པའི་དུས་འདི་ནི་དུས་ཀྱི་སྙིགས་མར་གྱུར་པས་སེམས་ཅན་རྣམས་ཚེ་ཐུང་ཞིང་ལོངས་སྤྱོད་དབུལ་ལ་ནད་མང་ཞིང་ཕལ་ཆེར་དུས་མ་ཡིན་པའི་འཆི་རྐྱེན་གྱིས་འཆི་བར་འགྱུར་བ་མ་རུང་པ་དམུ་རྒོད་པ། དྲིན་ལན་ལོག་པར་འཇལ་བས་གང་བ་འདི་ནི་རྒྱལ་བ་དེ་དག་ཐམས་ཅད་སྐྲག་ནས་འདི་ལྟ་བུའི་དུས་ངན་པ་མ་རུང་པ་འདི་དག་གི་ཁྲོད་དུ་སུ་ཞིག་འཇུག་ཅེས་ཡལ་བར་བོར་བ་ན་བྲམ་ཟེ་རྒྱ་མཚོའི་རྡུལ་གྱིས་ཐུགས་རྗེས་མ་བཟོད་པར་དུས་འདིར་འབྱོན་པའི་ཐུགས་བསྐྱེད། མ་འོངས་པའི་ཚེ་ལོ་བརྒྱད་ཁྲི་པའི་དུས་དེ་ནི་སྣོད་བཅུད་ཐམས་ཅད་ཕུན་སུམ་ཚོགས་པས་གང་བ། སྣོད་རྣམས་ལྷའི་ཡུལ་དང་མཚུངས་པ། མི་རྣམས་ཚེ་རིང་ཞིང་གཟུགས་བཟང་བ་ལོངས་སྤྱོད་ཆེ་བ་ཕན་ཚུན་འཚེ་བ་གང་ཡང་མེད་ཅིང་རང་བཞིན་གྱིས་དགེ་བའི་ལམ་ལ་གནས་པ་ཤ་སྟག་འབྱུང་བས་འདི་དག་ནི་ཤིན་ཏུ་བཟང་ངོ་ཞེས་ཐམས་ཅད་ཀྱིས་བཏང་སྙོམས་སུ་བཞག་སྟེ་ལུས་པ་ན།

               རྗེ་བཙུན་བྱམས་མགོན་འདི་ཉིད་དེའི་ཚེ་རིག་བྱེད་ཀློག་པ་སྟོང་གི་ལྔ་པ་དྲི་མེད་འོད་ཅེས་བྱ་བར་གྱུར་པ་དེས་ཐུགས་རྗེས་མ་བཟོད་ནས་ཚེ་ལོ་བརྒྱད་ཁྲི་བའི་དུས་ཀྱི་འགྲོ་བ་འདི་རྣམས་དེ་བཞིན་གཤེགས་པ་ཐམས་ཅད་ཀྱིས་བཏང་སྙོམས་སུ་བཞག་པས། འདི་དག་ལ་ཆོས་སྟོན་པ་པོ་མེད་པས། འདི་དག་ལ་གནས་སྐབས་སུ་འཁོར་བའི་བདེ་འབྱོར་ཅུང་ཟད་ཡོད་ཀྱང་ལས་ཉོན་གྱིས་བཅིངས་པས་འཁོར་བ་ལས་མ་འདས་ཤིང༌། སླར་ཡང་འཁོར་བ་མཐའ་མེད་དུ་འཁྱམས་ནས་སྡུག་བསྔལ་བརྒྱུད་མར་མྱོང་བར་འགྱུར་བ་འདི་རྣམས་སྙིང་རེ་རྗེ། འདི་རྣམས་ཀྱི་མགོན་དུ་ང་ཉིད་ཞིང་དེར་འཚང་རྒྱ་བར་བྱའོ་སྙམ་དུ་ཐུགས་བསྐྱེད་པ་ན། དེ་བཞིན་གཤེགས་པ་རིན་ཆེན་སྙིང་པོས་ཀྱང༌། དེ་ལྟར་དུ་བསྐལ་བཟང་གི་སངས་རྒྱས་ལྔ་པར་འགྱུར་བར་ལུང་བསྟན་ནོ། །དོན་གྱི་དབང་འདི་གཟིགས་ནས་རྗེ་བདག་ཉིད་ཆེན་པོས་བྱམས་མགོན་ལ་བསྟོད་པ་མཛད་པ་ན། བདེ་གཤེགས་སྔ་མས་བཏང་སྙོམས་མཛད་པ་ཡི། །གྲངས་མེད་འགྲོ་ལ་བརྩེ་བས་མ་བཟོད་ནས། །ཞིང་འདིར་བྱང་ཆུབ་སྙིང་པོར་གཤེགས་འགྱུར་བ། །མི་ཕམ་ཆོས་རྗེའི་ཞབས་ལ་གསོལ་བ་འདེབས། །ཞེས་བསྔགས་པ་མཛད་དོ། །                                                                                                                                 རྩོམ་སྒྲིག་པ། མང་ར་བ།
              གསལ་འདེབས། 
                        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                        དྲ་བའི་སྦྲེལ་ཐགhttp://www.tb1025.cn