དེ་ལ་འདི་སྙམ་དུ་བླ་མེད་ཀྱི་རྒྱུད་ཕལ་ཆེར་དུ་རྡོ་རྗེ་འཆང་གིས་གསུངས་ཞེས་འབྱུང་གི བཅོམ་ལྡན་འདས་ཤཱཀྱ་ཐུབ་པས་གསུངས་ཞེས་མི་འབྱུང་བས་བཅོམ་ལྡན་འདས་ཀྱིས་གསུངས་པ་མིན་ནོ་ཞེ་ན། དེ་ནི་རྣམ་པར་མ་བརྟག་པའི་གཏམ་སྟེ། བཅོམ་ལྡན་འདས་ཀྱིས་ལོངས་སྐུའི་ཆ་ལུགས་ཀྱིས་དཀྱིལ་འཁོར་གྱི་གཙོ་བོར་བཞེངས་ནས་རྒྱུད་གསུངས་པ་རྣམས་བཅོམ་ལྡན་འདས་ཀྱིས་གསུངས་པ་མིན་ཞེས་ཇི་ལྟར་སྨྲ། བཅོམ་ལྡན་འདས་ཀྱིས་ཆ་ལུགས་བསྒྱུར་ནས་ཆོས་བསྟན་པ་འདུལ་བ་ལུང་ན་ཡང་སྣང་སྟེ། མཐའ་འཁོབ་ཀྱི་རྒྱལ་པོ་ཀ་པི་ནས་གྲོང་ཁྱེར་ཆེན་པོ་དྲུག་གི་རྒྱལ་པོ་ཐམས་ཅད་དང༌། ཁྱད་པར་རྒྱལ་པོ་གསལ་རྒྱལ་ལ་ཆེད་དུ་དམིགས་པའི་ཕོ་ཉ་བཏང་བ། ཁྱེད་རྣམས་ཞག་བདུན་ན་ང་འཕྲད་པར་ཤོག་ཅིག དེ་ལྟར་མ་འོང་ན་དམག་དྲངས་ཏེ་ཁྱེད་ཀྱི་ཡུལ་མེད་པར་བྱེད་དོ་ཞེས་སྤྲིངས་པ་དང༌། ཕོ་ཉ་དེས་གྲོང་ཁྱེར་ལྔར་ཕྱིན་ཏེ་གཏམ་དེ་སྨྲས་པ་དང༌། དེ་རྣམས་སྐྲག་ནས་མཉན་ཡོད་དུ་ལྷགས་ཏེ་རྒྱལ་པོ་གསལ་རྒྱལ་ལ་དོན་དེ་སྨྲས་པ་དང༌། ཕན་ཚུན་བགྲོས་ཏེ་བཅོམ་ལྡན་འདས་ཀྱི་སྤྱན་སྔར་ཕྱིན་ནས་དོན་དེ་ཞུས་པ་ན་བཅོམ་ལྡན་འདས་ཀྱིས་ཕོ་ཉ་དེ་ངའི་གན་དུ་ཐོངས་ཤིག་ཅེས་གསུངས་པས་རྒྱལ་པོ་གསལ་རྒྱལ་སོགས་ཀྱིས་ཕོ་ཉ་ལ་ངེས་ལས་ལྷག་པའི་འཕྲུལ་གྱི་རྒྱལ་པོ་ཞིག་བཞུགས་པས་དེའི་གན་དུ་སོངས་ཤིག དེས་རྒྱལ་བྱེད་ཚལ་དུ་སོང་བ་དང༌། བཅོམ་ལྡན་འདས་འཁོར་ལོས་སྒྱུར་བའི་ཆ་བྱད་དུ་བཞུགས་པ་ལ་འཕྲིན་ཡིག་དེ་ཕུལ་བ་དང༌། འཕྲུལ་གྱི་རྒྱལ་པོས་ཡི་གེ་དེ་རྡོག་པས་མནན་ནས། ཕོ་ཉ་ལ་འདི་སྐད་ཅེས་བཀའ་བསྩལ་ཏོ། །ང་ནི་རྒྱལ་པོ་ཆེན་པོ་གླིང་བཞི་ལ་དབང་བ་ཡིན་ན་ཁྱོད་ཀྱི་རྒྱལ་པོ་གླེན་པ་དེ་ཅིའི་ཕྱིར་བཀའ་མི་ཉན། ཁྱོད་སོངས་ལ་ངས་འདི་སྐད་ཅེས་བཀའ་བསྩལ་ཏོ། །ཞེས་གྱིས་ཤིག ཁྱོད་ཞག་བདུན་ན་ངའི་གན་དུ་ཤོག་ཅིག དེ་མ་འོང་ན་ཁྲིམས་ལ་སྦྱར་རོ། །ཞེས་གྱིས་ཤིག ཅེས་བསྒོ་ནས་བཏང་བ་ན། རྒྱལ་པོ་ཀ་པི་ན་མཉན་ཡོད་དུ་ལྷགས་པ་ཉི་འོག་གི་རྒྱལ་པོ་རྣམས་ཀྱིས་ཀ་པི་ན་བསུས་ཏེ་རྒྱལ་བྱེད་ཚལ་དུ་ཕྱིན་པ་ན། དེའི་ཚེ་རྒྱལ་བྱེད་ཚལ་ལྷའི་གྲོང་ཁྱེར་ལྟ་ན་སྡུག་འདྲ་བར་སྤྲུལ་ཞིང་བཅོམ་ལྡན་འདས་ཀྱང་འཁོར་ལོས་སྒྱུར་བའི་ཆ་ལུགས་སུ་བཞུགས། མཽའུ་འགལ་གྱི་བུ་ཆེན་པོ་ནི་བློན་པོ་རིན་པོ་ཆེར་སྤྲུལ་ཏོ། །དེ་རྒྱལ་པོ་ཀ་པི་ན་ཆེན་པོས་མཐོང་བ་དང༌། འདི་བདག་ལས་བྱད་གཟུགས་ནི་ལྷག་ན་སྟོབས་ནི་ཇི་འདྲ་བ་ཞིག་སྙམ་པ་དང༌། བརྒྱ་བྱིན་གྱིས་དབང་པོའི་གཞུ་ཁྱེར་ཏེ་ཁ་ལོ་བའི་ཆས་སུ་བྱས་ནས་བློན་པོ་ཆེན་པོ་ལ་ཕུལ་ལོ། །བློན་པོས་ཀྱང་རྒྱལ་པོའི་བཀས་གསེར་སའི་རྒྱལ་པོ་ལ་བྱིན་པ་དང་དེས་བླངས་ཀྱང་མ་ཐེག་གོ །

              དེ་ནས་འཕྲུལ་གྱི་རྒྱལ་པོས་གཞུ་དེ་བླངས་ཏེ་མཐེ་ཆུང་གིས་བདུངས་ནས་ཀ་པི་ན་ལ་འགེངས་སུ་བཅུག་པ་དང༌། དེས་བསྒུལ་བར་ཡང་མ་ནུས་ནས་འཕྲུལ་གྱི་རྒྱལ་པོ་བཅོམ་ལྡན་འདས་ཀྱིས་གནམ་རུ་དེའི་གཞུ་རྒྱུད་སྦྲེངས་པ་ཙམ་གྱིས་ས་གཡོས་མདའ་གཅིག་འཕངས་པས་ལྕགས་ཀྱི་རྔ་བོ་ཆེ་བདུན་ཐལ་ཕྱུང་དུ་སོང་ནས་མདའ་ལྔར་གྱུར་ཏེ། དེ་དག་གི་རྩེ་མོ་ལས་འོད་ཟེར་གྲངས་མེད་པ་བྱུང་ནས་འོད་ཟེར་རེའི་རྩེ་ལ་འཁོར་ལོས་སྒྱུར་བའི་རྒྱལ་པོ་རེ་རེ་བྱུང་ངོ༌། །འོད་ཟེར་དེ་དག་གིས་སེམས་ཅན་སོ་སོའི་དོན་བྱས་ཤིང་ཆེད་དུ་བརྗོད་པ་དང་ཆོས་སྟོན་པའི་སྒྲ་དག་ཀྱང་གྲག་གོ །དེ་ནས་རྒྱལ་པོ་ཀ་པི་ན་སྟོབས་ཀྱི་དྲེགས་པ་ཞི་ནས་ཨེ་མ་འདི་ཅི་ཞིག་སྙམ་པ་དང༌། བཅོམ་ལྡན་འདས་ཀྱིས་དེ་དང་མཐུན་པའི་ཆོས་བསྟན་པས་བདེན་པ་མཐོང་ངོ༌། །དེ་ནས་བཅོམ་ལྡན་འདས་རང་བཞིན་གྱི་སྐུར་མཛད་པ་དང༌། རྒྱལ་པོ་ཀ་པི་ན་བློན་པོ་ཁྲི་བརྒྱད་སྟོང་དང་ལྷན་ཅིག་རབ་ཏུ་བྱུང་ནས་དགྲ་བཅོམ་པར་གྱུར་ཏེ། །ཚེ་དང་ལྡན་པ་ཀ་པི་ན་ཆེན་པོར་གྲགས་སོ། །དེ་ལ་རྒྱལ་པོ་ཀ་པི་ན་འཁོར་ལོས་བསྒྱུར་བའི་རྒྱལ་པོས་བཏུལ་བ་ཡིན་གྱི། བཅོམ་ལྡན་འདས་ཀྱིས་བཏུལ་བ་མིན་ཞེས་ཤེས་ལྡན་སུ་ཞིག་སྨྲ། བཅོམ་ལྡན་འདས་ཤཱཀྱ་ཐུབ་པས་གསུངས་ཞེས་པའང་བླ་མེད་ཀྱི་རྒྱུད་ལ་མང་དུ་སྣང་སྟེ།དུས་ཀྱི་འཁོར་ལོའི་རྒྱུད། བཅོམ་ལྡན་འདས་ཤཱཀྱ་ཐུབ་པས་གསུངས་པ་ནི་ཡོངས་སུ་གྲགས་པ་ལྟར་དང༌། དུས་འཁོར་གྱི་རྒྱུད་ལ་སོགས་པ་བླ་མེད་ཀྱི་རྒྱུད་མང་པོ་ཞིག་གི་རྩ་བ་ནི་འཇམ་དཔལ་མཚན་བརྗོད་ཡིན་པར་གྲགས་ལ།

               མཚན་བརྗོད་ལས། ནས་བཅོམ་ལྡན་ཤཱཀྱ་ཐུབ། །གསང་སྔགས་རིགས་ཆེན་ཐམས་ཅད་དང༌། །གསང་སྔགས་རིག་སྔགས་འཆང་བའི་རིགས། །རིགས་གསུམ་ལ་ནི་རྣམ་པར་གཟིགས། །འཇིག་རྟེན་འཇིག་རྟེན་འདས་པའི་རིགས། །འཇིག་རྟེན་སྣང་བྱེད་རིགས་ཆེན་དང༌། །ཕྱག་རྒྱ་ཆེན་པོའི་རིགས་མཆོག་དང༌། །རིགས་ཆེན་གཙུག་ཏོར་ཆེར་གཟིགས་ནས། །ཚིག་གི་བདག་པོས་ཚིགས་སུ་བཅད། །གསང་སྔགས་རྒྱལ་པོ་དྲུག་ལྡན་ཞིང༌། །གཉིས་སུ་མེད་པར་འབྱུང་བ་དང༌། །མི་སྐྱེ་ཆོས་ཅན་འདིས་གསུངས་པ། །ཞེས་དང༌། འཕགས་པ་འཇམ་དཔལ་གྱི་དོན་དམ་པའི་མཚན་ཡང་དག་པར་བརྗོད་པ། བཅོམ་ལྡན་འདས་ཤཱཀྱ་ཐུབ་པས་གསུངས་པ་རྫོགས་སོ། །ཞེས་འབྱུང་བ་ལྟར་རོ། །ཡང་བདེ་མཆོག་གི་རྒྱུད་ཀྱང་བཅོམ་ལྡན་འདས་ཤཱཀྱ་ཐུབ་པས་གསུངས་པ་ནི། བདེ་མཆོག་གི་བཤད་རྒྱུད་མཁའ་འགྲོ་རྒྱ་མཚོ་ལས། རྩོད་པའི་དུས་སུ་ཤཱཀྱ་སེང་གེས་གསུངས་པ་ཞེས་གསལ་བར་གསུངས་པ་ལྟར་རོ། །དེས་ན་བྱང་ཆུབ་ལམ་གྱི་རིམ་པ་ལ་སྙིང་ནས་ཉམས་ལེན་བྱ་བར་འདོད་པ་དག་གིས་བླུན་པོའི་འཆལ་གཏམ་ལ་ཡིད་གཏད་པར་མི་བྱ་བར་ལམ་གྱི་རྩ་བ་བཤེས་གཉེན་བསྟེན་ཚུལ་ནས་བཟུང༌། མཐར་སྔགས་ལམ་གྱི་འབྲས་བུ་མཐར་ཐུག་ཟུང་འཇུག་གྲུབ་པའི་བར་ཐམས་ཅད་སྟོན་པ་ཐུགས་རྗེ་ཅན་ཤཱཀྱའི་རྒྱལ་པོ་ཉིད་ཀྱིས་བསྟན་པ་ཡིན་པར་ངེས་པ་གཏིང་ནས་འདྲོངས་པར་བྱས་ལ། རྒྱལ་བའི་བཀའ་ལས་ལྷག་པའི་གདམས་ངག་མེད་པར་ཤེས་པར་བྱས་ལ་རྒྱལ་བའི་བཀའ་ཉིད་གདམས་པའི་མཆོག་ཏུ་ཡིད་ཆེས་པར་བྱའོ། །དེ་ལྟར་སྟོན་པ་ཐུགས་རྗེ་ཅན་ཤཱཀྱའི་རྒྱལ་པོས་སྡེ་སྣོད་གསུམ་དང༌། རྒྱུད་སྡེ་བཞིའི་ཆོས་མཐའ་ཡས་མུ་མེད་པ་ཞིག་བཀའ་བསྩལ་པ་དེ་དག་ཀྱང༌། ཇི་སྐད་དུ། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང༌། །འགྲོ་བ་ཀུན་གྱི་སྒྲ་རྣམས་ཇི་ཙམ་པ། །ཐམས་ཅད་སྐད་དུ་བདག་གིས་ཆོས་བསྟན་ཏོ། །ཞེས་གང་གསུངས་པ་ལྟར། ལྷ་དང་ཀླུ་ལ་སོགས་པ་འགྲོ་བ་རང་རང་གི་སྐད་དང་མཐུན་པར་སྟོན་པར་མཛད་ཅིང་གསུང་གཅིག་ཉིད་འགྲོ་བ་རང་རང་གི་སྐད་དང་མཐུན་པར་གོ་བ་དང༌། རང་རང་གི་དབང་པོ་དང་བསམ་པ་དང་འཚམ་པའི་ཆོས་མཐའ་ཡས་པ་འབྱུང་བ་དང༌། སྐུའི་བ་སྤུའི་ཁུང་བུ་རེ་རེ་ནས་ཀྱང་ཆོས་ཀྱི་རྣམ་གྲངས་མཐའ་ཡས་མུ་མེད་པ་རྒྱུན་དུ་འབྱུང་བས་རྒྱལ་བས་གསུངས་པའི་ཆོས་ཐམས་ཅད་ནི་རྒྱལ་བ་རང་ཉིད་མ་གཏོགས་སུས་ཀྱང་བརྗོད་པར་མི་ནུས་ལ། འོན་ཀྱང་གདུལ་བྱའི་ཉོན་མོངས་པའི་གཉེན་པོ་དང་མཐུན་པར་སྡོམ་གྱིས་བསྡུས་པ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བཀའ་བསྩལ་ཞེས་འབྱུང་ངོ༌། །

                                                                                                                              རྩོམ་སྒྲིག་པ། མང་ར་བ།
             གསལ་འདེབས། 
                     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                     དྲ་བའི་སྦྲེལ་ཐགhttp://www.tb1025.cn