མདོ་རྒྱུད་སྡེ་སྣོད་རྣམས་ཇི་ལྟར་བཀའ་སྩལ་ཚུལ། དེ་ནས་རིམ་གྱིས་ལྷ་དང་མིའི་ཡུལ་སྣ་ཚོགས་སུ་ཆོས་ཀྱི་འཁོར་ལོ་མཐའ་ཡས་པ་བསྐོར། དེ་ནས་བྱ་རྒོད་ཕུང་པོའི་རིར་ཕྱོགས་བཅུའི་ཞིང་རབ་འབྱམས་ནས་འདུས་པའི་བྱང་ཆུབ་སེམས་དཔའ་བགྲང་བ་ལས་འདས་པ་དང༌། ཉན་ཐོས་བགྲང་བ་ལས་འདས་པ་དང་ལྷ་དང་ཀླུ་ལ་སོགས་པའི་གདུལ་བྱ་བགྲང་བ་ལས་འདས་པ་ལ་ཤེར་ཕྱིན་གྱི་མདོ་སྡེ་རིན་པོ་ཆེ་བཀའ་བསྩལ་ཏོ། །དེ་ལ་བཀའ་བར་པ་མཚན་ཉིད་མེད་པའི་ཆོས་འཁོར་ཞེས་བརྗོད་དོ། །

              དེ་ནས་ཡུལ་གཞན་དང་གཞན་དུ་ཏིང་ངེ་འཛིན་རྒྱལ་པོའི་མདོ་དང༌། སངས་རྒྱས་ཕལ་པོ་ཆེ་དང༌། འཕགས་པ་དཀོན་མཆོག་བརྩེགས་པ་ཆེན་པོ་སོགས་བཀའ་བར་པའི་སྡེར་གཏོགས་ཀྱི་མདོ་མཐའ་ཡས་པ་གསུངས། དེ་ནས་ཡངས་པ་ཅན་ལ་སོགས་པར་མདོ་སྡེ་དགོངས་འགྲེལ་སོགས་བཀའ་མཐའ་མའི་སྡེར་གཏོགས་ཀྱི་མདོ་རྣམས་གསུངས། གསང་སྔགས་ཀྱི་ཆོས་འཁོར་བསྐོར་ཚུལ། གསང་སྔགས་ཀྱི་ཆོས་འཁོར་བསྐོར་ཚུལ་ནི། བྱ་རྒོད་ཕུང་པོར་ཤེར་ཕྱིན་གྱི་མདོ་གསུངས་པ་དང་དུས་མཉམ་དུ་དཔལ་ལྡན་འབྲས་སྤུངས་ཀྱི་མཆོད་རྟེན་དུ་དཔལ་དུས་ཀྱི་འཁོར་ལོ་སོགས་སྔགས་བླ་མེད་ཀྱི་ཆོས་མཐའ་ཡས་པ་གསུངས། དེ་བཞིན་དུ་རི་རབ་ཀྱི་རྩེ་དང༌། སུམ་ཅུ་རྩ་གསུམ་གྱི་གནས་དང༌། དགའ་ལྡན་གྱི་གནས་དང༌། གནས་གཙང་མ་ལ་སོགས་པའི་ལྷ་གནས་མང་པོ་དང༌། ཀླུའི་གནས་དང༌། གནོད་སྦྱིན་གྱི་གནས་དང༌། ཨཽ་ཌཱི་ཡ་ན་ལ་སོགས་པའི་འཛམ་བུའི་གླིང་གི་གནས་ཁྱད་པར་ཅན་མང་པོར་གསང་སྔགས་རྒྱུད་སྡེ་བཞིའི་ཆོས་མཐའ་ཡས་པ་གསུངས་སོ། །དེ་ལས་བླུན་རྨོངས་འགའ་ཞིག་འདི་སྙམ་དུ་སྟོན་པ་ཐུབ་པའི་དབང་པོས་མདོ་ཕྱོགས་ཀྱི་ཆོས་རྣམས་གསུངས་པ་ཡིན་གྱི་སྔགས་ཀྱི་རྒྱུད་རྣམས་མ་གསུངས་སོ་སྙམ་དུ་སེམས་ཞིང་དེ་སྐད་དུ་སྨྲ་བ་ནི་རྣམ་པར་མི་འཚམ་པའི་བབ་ཅོལ་ཏེ། སྟོན་པས་སུམ་ཅུ་རྩ་གསུམ་དུ་དབྱར་གནས་མཛད་པའི་ཚེ་ཆོས་བཟང་ལྷའི་མདུན་སར་དབུའི་གཙུག་ཏོར་ནས་འཕགས་མ་གདུགས་དཀར་མོ་ཅན་གཞན་གྱིས་མི་ཐུབ་པ་མཆོག་ཏུ་གྲུབ་པའི་གཟུངས་བཀའ་བསྩལ་ཏེ། དེ་ནས་བཟུང་སྟེ་བྱ་རྒྱུད་དེ་བཞིན་གཤེགས་པའི་རིགས་འཕགས་མ་གདུགས་དཀར་ཅན་གྱི་དབང་དང་གདམས་ངག་ད་ལྟའི་བར་དུ་རྒྱུན་མ་ཆད་པར་ཡོད་དོ། །ཡང་བཅོམ་ལྡན་འདས་རི་བོ་པོ་ཏ་ལར་ཕེབས་པའི་ཚེ་ཐུགས་རྗེ་ཆེན་པོ་སེང་གེ་སྒྲའི་གཟུངས་གསུངས་ཤིང་གཞན་ཡང་ཐུགས་རྗེ་ཆེན་པོ་དོན་ཡོད་ཞགས་པའི་གཟུངས་དང༌། ཐུགས་རྗེ་ཆེན་པོ་ཕྱག་སྟོང་སྤྱན་སྟོང་གི་གཟུངས་སོགས་བྱ་བའི་རྒྱུད་མང་དུ་གསུངས་ཤིང༌། བྱ་རྒྱུད་པདྨའི་རིགས་ཀྱི་དབང་དང་གདམས་ངག་ཀྱང་ད་ལྟའི་བར་དུ་རྒྱུན་མ་ཆད་པར་ཡོད་དོ། །ཡང་སྟོན་པས་རྒྱལ་པོ་མ་སྐྱེས་དགྲའི་སྡིག་སྒྲིབ་སྦྱོང་བའི་ཆེད་དུ་བྱ་རྒྱུད་རྡོ་རྗེའི་རིགས་རྣམ་འཇོམས་ཀྱི་རྒྱུད་གསུངས་ཤིང་དེའི་གདམས་ངག་ཀྱང་རྒྱུན་མ་ཆད་པར་ཡོད་དོ། །

              གཞན་ཡང་དམ་ཚིག་གསུམ་བཀོད་སོགས་བྱ་བའི་རྒྱུད་མཐའ་ཡས་པ་གསུངས་པ་ཡོངས་སུ་གྲགས་པ་ལྟར་དང༌། སྤྱོད་རྒྱུད་རྣམ་སྣང་མངོན་བྱང་དང་ལག་ན་རྡོ་རྗེ་དབང་བསྐུར་བའི་རྒྱུད་སོགས་གསུངས་པ་དང༌། རྣལ་འབྱོར་གྱི་རྒྱུད་རྡོ་རྗེ་དབྱིངས་ཀྱི་དཀྱིལ་འཁོར་དང༌། དེ་ཉིད་བསྡུས་པ་སོགས་མངོན་པར་བྱང་ཆུབ་པའི་དུས་སུ་འོག་མིན་དུ་གསུངས་པ་དང༌། སུམ་ཅུ་རྩ་གསུམ་དུ་དབྱར་གནས་མཛད་པའི་ཚེ་ལྷའི་བུ་ནོར་བུ་དྲི་མ་མེད་པ་ཤི་ནས་དམྱལ་བར་སྐྱེས་པ་བརྒྱ་བྱིན་གྱིས་མཐོང་ནས་བཅོམ་ལྡན་འདས་ལ་དེ་ངན་སོང་ལས་ཐར་བའི་ཐབས་ཞུས་པས། བཅོམ་ལྡན་འདས་ཀྱིས་ངན་སོང་ཡོངས་སུ་སྦྱོང་བའི་རྒྱུད་གསུངས་ནས་བརྒྱ་བྱིན་ལ་དེའི་གདམས་ངག་གནང་ནས་བརྒྱ་བྱིན་གྱིས་ངན་སོང་སྦྱོང་བའི་ཆོ་ག་བྱས་པས་ལྷའི་བུ་དེ་མ་ཐག་དམྱལ་བ་ནས་ཐར་ཏེ་ལྷ་གནས་གོང་མར་སྐྱེས་ནས་སྟོན་པ་ལ་བཀའ་དྲིན་དྲན་པའི་དད་གུས་ཆེན་པོས་ཕྱག་དང་མཆོད་པ་བྱས་ཏེ། ཨེ་མ་སངས་རྒྱས་རྣམས་ཀྱི་ནི། །སྔགས་ཀྱི་བྱིན་རླབས་ཡ་མཚན་ཆེ། །གང་ཕྱིར་མཚམས་མེད་ལྷུང་བ་ཡི། །སེམས་ཅན་ལྷ་གནས་མྱུར་དུ་སྐྱེས། །ཞེས་ཆེད་དུ་བརྗོད་པ་ཡོངས་སུ་གྲགས་པ་ལྟར་དང༌། རྣལ་འབྱོར་བླ་ན་མེད་པའི་རྒྱུད་སྟོན་པས་གསུངས་པ་ནི། བཅོམ་ལྡན་འདས་ཀྱིས་ནག་པའི་ཉ་ལ་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོར་ཤམ་བྷ་ལའི་རྒྱལ་པོ་ཟླ་བ་བཟང་པོས་གསོལ་བ་བཏབ་ནས་འཁོར་བྱེ་བ་ཕྲག་དུ་མ་ལ་དུས་འཁོར་གྱི་རྒྱུད་སྟོན་པས་གསུངས་ཤིང་རྡོ་རྗེ་འཇིགས་བྱེད་ཆེན་པོའི་རྩ་བའི་རྒྱུད་ལ་སོགས་པ་བླ་མེད་ཀྱི་རྒྱུད་ཕལ་མོ་ཆེ་གསུངས་ནས་གསང་བའི་བདག་པོ་ཕྱག་ན་རྡོ་རྗེ་ལ་རྒྱུད་གཏད་པར་མཛད་པ་དང༌། གཞན་ཡང་བླ་མེད་ཀྱི་རྒྱུད་ཐམས་ཅད་ཀྱི་རབ་དང་ཕུལ་དང་རྩེ་མོར་གྱུར་པ་ནི་དཔལ་གསང་བ་འདུས་པའི་རྒྱུད་ཡིན་པར་གྲུབ་ཆེན་ཐམས་ཅད་མཐུན་པར་གསུངས་ལ། གསང་བ་འདུས་པའི་རྒྱུད་བཅོམ་ལྡན་འདས་ཀྱིས་གསུངས་པ་ནི་འདུས་པའི་གླེང་གཞིར། བཅོམ་ལྡན་འདས་རྡོ་རྗེ་བཙུན་མོའི་བྷ་གའི་དབྱིབས་ཅན་གྱི་ཆོས་འབྱུང་གི་ནང་གི་གཞལ་ཡས་ཁང་གི་དབུས་སུ་བཞུགས་ནས་ནམ་མཁའི་དབྱིངས་ཐམས་ཅད་ཡོངས་སུ་གང་བའི་འཁོར་གྱི་ཚོགས་ལ་འདུས་པའི་རྒྱུད་གསུངས་པར་བཤད་ཅིང༌། རྩ་རྒྱུད་ལེའུ་བཅུ་བདུན་པར་རྗེ་བཙུན་བྱམས་པ་མགོན་པོ་དང་ཕྱག་ན་རྡོ་རྗེ་ལ་སོགས་པའི་འཁོར་རྣམས་ཀྱིས་བཅོམ་ལྡན་འདས་ལ་འདི་སྐད་གསོལ་ཏེ། བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བ་བསྐལ་བ་གྲངས་མེད་པ་འདས་པའི་སྔོན་རོལ་ཏུ་དེ་བཞིན་གཤེགས་པ་མར་མེ་མཛད་འདས་པ་ནས་བཟུང་འོད་སྲུང་གི་བར་དུ་སངས་རྒྱས་རྣམས་ཀྱིས་བླ་མེད་ཀྱི་རྒྱུད་མ་གསུངས་པ་ལ་བཅོམ་ལྡན་འདས་ཉིད་ཀྱིས་གསུངས་པ་ལ་ངོ་མཚར་ཆེ་བའི་བསྔགས་པ་རྒྱ་ཆེར་བརྗོད་པ་ལྟར་དང༌། བཅོམ་ལྡན་འདས་ཀྱིས་ཨོ་ཌཱི་ཡ་ནའི་ཡུལ་དུརྒྱལ་པོ་ཨིནྡྲ་བྷཱུ་ཏི་རྗེས་སུ་བཟུང་བའི་ཕྱིར་དུ་གསང་བ་འདུས་པའི་རྒྱུད་གསུངས་ཤིང་ཕྱག་རྡོར་ལ་རྒྱུད་གཏད་པར་མཛད། དེར་རྒྱལ་པོ་ཨིནྡྲ་བྷཱུ་ཏིས་ཀྱང་བསྒོམས་ནས་ཚེ་གཅིག་ཉིད་ལ་ཟུང་འཇུག་གྲུབ་པར་གྲུབ་ཆེན་ཐམས་ཅད་མཐུན་པར་གསུངས་པ་ལྟར་རོ། །

                                                                                                                               རྩོམ་སྒྲིག་པ། མང་ར་བ།
             གསལ་འདེབས། 
                      རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                      དྲ་བའི་སྦྲེལ་ཐགhttp://www.tb1025.cn