དེ་ནས་སྟོན་པ་དྲུག་གིས་དེ་བོར་ནས་གངས་རིའི་སུལ་ན་གནས་པའི་དྲང་སྲོང་ལྔ་བརྒྱ་ལ་ཚུལ་དེ་སྨྲས་པ་དང༌། དེ་རྣམས་ཀྱིས་ཁས་བླངས་ཏེ་འོང་རན་པའི་ཚེ་མཚན་མ་སྟོན་ཅིག་ཅེས་སྨྲས་སོ། །དེའི་ཚེ་བློན་པོས་དབྱེན་བྱས་པས་རྒྱལ་པོ་གསལ་རྒྱལ་གྱིས། མས་དབེན་གྱི་གཅུང་ནག་པོའི་ཡན་ལག་བཅད་དེ་སྲང་དུ་དོར་བ། དེའི་གཉེན་བཤེས་རྣམས་ཀྱིས་སྟོན་པ་དྲུག་ལ་འདི་སོས་པའི་བདེན་ཚིག་མཛོད་ཅིག་ཅེས་སྨྲས་པ་དེ་དག་སྤོབས་པ་མེད་ནས་ཅང་མི་ཟེར་རོ། །ཕྱོགས་དེར་ཀུན་དགའ་བོ་འོངས་པ་ལ་དེ་བཞིན་དུ་སྨྲས་པ་དང༌། དེས་བཅོམ་ལྡན་འདས་ལ་ཞུས་པས་བདེན་པའི་ཚིག་འདི་བྱོས་ཤིག་ཅེས་བཀའ་བསྩལ་པ་བཞིན། ཀུན་དགའ་བོས་ཀྱང་དཀོན་མཆོག་གསུམ་མཆོག་ཡིན་པའི་བདེན་པས་འདིའི་ཡན་ལག་སྔར་བཞིན་དུ་གྱུར་ཅིག་ཅེས་སྨྲས་པ་དང༌། ནག་པོའི་ཡན་ལག་ལྔ་ཁོ་བཞིན་དུ་སོས་པས་སྐྱེ་བོའི་ཚོགས་ཀྱིས་ཀུན་དགའ་བོས་མུ་སྟེགས་པ་ཕམ་པར་བྱས་སོ་ཞེས་ཨ་ལ་ལའི་སྒྲ་བོ་ཆེ་བཏོན་ཏོ། །ནག་པོ་ལ་བཅོམ་ལྡན་འདས་ཀྱིས་ཆོས་བསྟན་པས་ཕྱིར་མི་འོང་ཐོབ་ནས་རྒྱལ་པོ་གསལ་རྒྱལ་གྱིས་ཁྱིམ་དུ་བཀུག་ཀྱང་མ་ཉན་པར་དེས་ཀུན་དགའ་ར་བ་དེ་ཉིད་དུ་འཆགས་བྱས་པས་དུམ་བུའི་ཀུན་དགའ་ར་བར་མིང་ཆགས་ཏེ་བཅོམ་ལྡན་འདས་ལ་བསྙེན་བཀུར་ཞིང་རྫུ་འཕྲུལ་ཡང་གྲུབ་བོ། །རྒྱལ་པོ་གསལ་རྒྱལ་གྱིས་མཉན་ཡོད་ནས་རྒྱལ་བྱེད་ཚལ་གྱི་བར་དུ་ཆོ་འཕྲུལ་ཆེན་པོའི་འདུན་ཁང་གོས་བརྒྱ་སྟོང་རི་བས་གཡོགས་པ་ཙན་དན་གྱི་ཆག་ཆག་བཏབ་པ། བ་དན་དང་རྒྱལ་མཚན་བསྒྲེང་བ། དར་གྱི་ཆུན་འཕྱང་དཔྱངས་པ། ལྷ་རྣམས་ཀྱི་དགའ་བའི་ཚལ་བཞིན་དུ་བྱས་ནས། དེར་བཅོམ་ལྡན་འདས་ཀྱི་བཞུགས་གདན་རིན་པོ་ཆེས་སྤྲས་པའི་གསེར་གྱི་སེང་གེའི་ཁྲི་ཡང་བཤམས་སོ། །

              མུ་སྟེགས་ཅན་གྱི་དགེ་བསྙེན་རྣམས་ཀྱིས་ཀྱང་རང་གི་འབྱོར་པ་དང་བསྟུན་པའི་གོས་ཀྱིས་གཡོགས་པའི་འདུན་ཁང་དྲུག་དང་སྟན་དྲུག་ཀྱང་བཤམས་པ་ལ་སྟོན་པ་དྲུག་སྔར་འོངས་ཏེ་འདུག་ནས། ལྷ། བདག་ཅག་ནི་མཆིས་ལགས་ན་དགེ་སྦྱོང་གཽའུ་ཏ་མ་དགུག་ཏུ་གསོལ་ཞེས་ཕོ་ཉ་བཏང་ངོ༌། །རྒྱལ་པོ་འཁོར་དང་བཅས་པས་ཀྱང་དེ་ཐོས་ནས་ཆོ་འཕྲུལ་ཆེན་པོའི་འདུན་ཁང་དུ་སོང་ནས། བཅོམ་ལྡན་འདས་སྤྱན་འདྲེན་པར་བྲམ་ཟེའི་ཁྱེའུ་བླ་མ་བཏང་བས་དགུན་ཟླ་ཐ་ཆུང་གི་ཡར་ངོའི་ཚེས་གཅིག་གི་ཉིན་བཅོམ་ལྡན་འདས་ངང་པའི་རྒྱལ་པོ་ལྟར་ནམ་མཁའ་ལས་ཆོ་འཕྲུལ་ཆེན་པོའི་འདུན་ཁང་དུ་གཤེགས་སོ། །དེ་མཐོང་ནས་རྒྱལ་པོ་གསལ་རྒྱལ་གྱིས་མུ་སྟེགས་ཅན་རྣམས་ལ་སྨྲས་པ། བཅོམ་ལྡན་འདས་ཀྱིས་ཆོ་འཕྲུལ་བསྟན་ཟིན་ན་ད་ནི་ཁྱེད་ཀྱི་རེས་ལ་བབ་ཀྱིས་སྟོན་ཅིག དེ་རྣམས་ཀྱིས་སྨྲས་པ། ལྷ། སྐྱེ་བོའི་ཚོགས་ཆེན་པོ་འདིར་འདུས་ལགས་ན། ཆོ་འཕྲུལ་ཆེན་པོ་འདི་ཅི་དགེ་སྦྱོང་གཽའུ་ཏ་མའམ་བདག་ཅག་གང་གི་ལགས་སུས་འཚལ། དེ་ནས་དུམ་བུའི་ཀུན་དགའ་ར་བ་པའི་རྫུ་འཕྲུལ་གྱིས་རི་སྤོས་ངད་ལྡང་ལས་ཤིང་ཨཱ་མྲ་འདབ་མ་དཀར་པོས་ཀླུབས་པ་བྱའི་ཚོགས་སྐད་འབྱིན་པ་བླངས་ནས་ཆོ་འཕྲུལ་ཆེན་པོའི་འདུན་ཁང་གི་བྱང་ཕྱོགས་སུ་བཞག་ཅིང་ཁྱིམ་བདག་ངན་པ་བཟང་སྦྱིན་གྱི་རྫུ་འཕྲུལ་གྱིས་ལྷའི་དཔག་བསམ་གྱི་ཤིང་བླངས་ནས།ལྷོ་ཕྱོགས་ངོས་སུ་བཞག་པ་དང༌། རྒྱལ་པོས་སྟོན་པ་དྲུག་ལ་སྨྲས་པ། བཅོམ་ལྡན་འདས་ཀྱི་རྫུ་འཕྲུལ་བསྟན་ཟིན་ན་ད་ཁྱེད་ཀྱིས་སྟོན་ཅིག་སྨྲས་པ། ལྷ། ཆོ་འཕྲུལ་འདི་སུའི་ཡིན་པ་སུས་འཚལ། དེའི་ཚེ་ཆོ་འཕྲུལ་ཆེན་པོ་བལྟ་བར་སྤྲོ་བའི་སྲོག་ཆགས་གྲངས་མེད་པ་དང༌། ནམ་མཁའ་ལ་ལྷ་བརྒྱ་སྟོང་དུ་མ་ཡང་འདུས་པ་ན། བཅོམ་ལྡན་འདས་གཙུག་ལག་ཁང་དུ་གཤེགས་ནས་སྒོ་འཕར་གྱི་གསེབ་ནས་འོད་ཟེར་ཕྱུང་བས་ཆོ་འཕྲུལ་ཆེན་པོའི་འདུན་ཁང་ཐམས་ཅད་བསྲེགས་པ་དང༌། སྟོན་པ་དྲུག་གིས་སྨྲས་པ། ལྷ། ད་ནི་དགེ་སྦྱོང་གཽའུ་ཏ་མའི་འདུན་ཁང་ཚིག་ན་གལ་ཏེ་དེས་རྔོ་ཐོག་ན་འདིར་མཆིས་ལ་ཞི་བར་བགྱིད་གྲང༌། དེས་རྒྱལ་པོ་དང་བཙུན་མོ་ཕྲེང་ལྡན་མ་དང༌། དབྱར་ཚུལ་མ་དང༌། བཙུན་མོའི་འཁོར་ཕྱ་མཁན་དྲང་སྲོང་བྱིན་དང༌།སོ་ཕག་མཁན་མནའ་མི་དང༌། མགོན་མེད་ཟས་སྦྱིན་དང༌། ཙམྤ་མོ་སོགས་དད་པ་ཅན་མང་པོ་ཅང་མི་ཟེར་བར་སེམས་ཁོང་དུ་ཆུད་ནས་འདུག་ཅིང༌། སྟོན་པ་དྲུག་དང་དེའི་སློབ་མ་རྣམས་ནི་རབ་ཏུ་དགའ་བར་གྱུར་ཏོ། །སངས་རྒྱས་ཀྱི་མཐུས་མེ་དེས་ཆོ་འཕྲུལ་ཆེན་པོའི་འདུན་ཁང་གི་དྲི་མ་ཐམས་ཅད་བསྲེགས་ནས་རང་ཉིད་ཞི་སྟེ་འདུན་ཁང་མཛེས་པར་གྱུར་པ་དང༌། རྒྱལ་པོ་དགའ་ནས་མུ་སྟེགས་ཅན་རྣམས་ལ་སྨྲས་པ། བཅོམ་ལྡན་འདས་ཀྱི་ཆོ་འཕྲུལ་བསྟན་ཟིན་གྱིས་ད་ནི་ཁྱོད་ཀྱིས་སྟོན་ཅིག དེ་དག་སྤོབས་པ་མད་ནས་ཅང་མི་ཟེར་རོ། །

               དེ་ནས་བཅོམ་ལྡན་འདས་ཆོ་འཕྲུལ་གྱི་འདུན་ཁང་དུ་བྱོན་པ་ལ་རྒྱལ་པོ་གསལ་རྒྱལ་གྱིས་ཐོག་མར་མཆོད་པའི་ཡོ་བྱད་དང་ཞལ་ཟས་བཤམས་ཏེ་བསྙེན་བཀུར་བ་ན། བཅོམ་ལྡན་འདས་ཀྱིས་ཚེམས་ཤིང་ས་ལ་བཙུགས་མ་ཐག་ཏུ་སྐྱེས་ནས་རིན་པོ་ཆེ་སྣ་བདུན་གྱི་ལྗོན་པ་ཆུ་ཞེང་དཔག་ཚད་ལྔ་བརྒྱ་པ། མེ་ཏོག་ཤིང་རྟའི་འཕང་ལོ་ཙམ་པ། འབྲས་བྲེ་ལྔ་ཤོང་བའི་བུམ་པ་ཙམ་གྱི་འབྲས་བུ་ཅན། དྲི་བསུང་དང་ལྡན་པ་ཆོས་ཀྱི་སྒྲ་འབྱུང་བ་ཉི་འོད་ཟིལ་གྱིས་གནོན་པ་ཞིག་སྤྲུལ་ཏོ། །འདི་ནས་བརྩམས་ཏེ་ཟླ་བ་ཕྱེད་ཀྱི་བར་དུ་ཉིན་རེ་བཞིན་ཆོ་འཕྲུལ་རེ་མཐོང་བ་ཙམ་གྱིས་དད་པར་གྱུར་པའི་སྐྱེ་བོའི་ཚོགས་གྲངས་མེད་པ་ལ་ཆོས་བསྟན་པས་ལམ་གསུམ་ལ་སོ་སོར་ངེས་པར་མཛད་དོ། །ཚེས་གཉིས་ལ་རྒྱལ་པོ་ཨུ་ཏྲ་ཡ་ནས་བསྙེན་བཀུར་བ་ན། བཅོམ་ལྡན་འདས་ཀྱི་སྐུའི་གཡས་གཡོན་དུ་རིན་པོ་ཆེའི་རི་གཉིས་ཤིན་ཏུ་མཐོ་བ་མཛེས་པ་ཁ་དོག་ལྔར་འཚེར་བ། མེ་ཏོག་དང༌། འབྲས་བུ་རབ་ཏུ་རྒྱས་པའི་ཤིང་སྣ་ཚོགས་སྐྱེས་པ་གཡས་ཀྱི་རི་ལ་འབྲས་རོ་བརྒྱ་དང་ལྡན་པ།སྐྱེས་པ་ལ་མི་མང་པོ་དག་ཡིད་བཞིན་དུ་ཚིམ་པར་ཟའོ། །གཡོན་གྱི་རི་ལ་རྩྭ་བཟང་བ་སྐྱེས་པ་ལ་དུད་འགྲོའི་ཚོགས་ཟ་ཞིང་ཚིམ་པར་གྱུར་ཏོ། །ཚེས་གསུམ་ལ་རྒྱལ་པོ་ཤུན་ཙི་ད་ལས་བསྙེན་བཀུར་བ་ན། བཅོམ་ལྡན་འདས་ཀྱིས་ཞལ་བསིལ་བའི་ཆུ་ས་ལ་དོར་བ་རིན་པོ་ཆེའི་རྫིང་བུ་དཔག་ཚད་ཉིས་བརྒྱ་པ་རིན་པོ་ཆེ་སྣ་བདུན་གྱིས་སྤྲས་ཤིང་པདྨ་ཁ་དོག་སྣ་ཚོགས་པས་གང་བ། དེ་དག་གི་ཁ་དོག་དང་རྗེས་སུ་མཐུན་པའི་འོད་ཟེར་གྱིས་གནམ་ས་ཀུན་སྣང་བར་བྱས་པས་འཁོར་ཐམས་ཅད་ཀྱིས་རྫིང་དེ་ལ་བལྟ་ཞིང་བསྟོད་དོ། །

                                                                                                                                རྩོམ་སྒྲིག་པ། མང་ར་བ།
             གསལ་འདེབས། 
                           རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                           དྲ་བའི་སྦྲེལ་ཐགhttp://www.tb1025.cn