ཡུམ་རྗེས་སུ་བཟུང་བའི་ཕྱིར་ལྷ་གནས་སུ་གཤེགས་པ། དེ་ནས་བཅོམ་ལྡན་འདས་དགུང་ལོ་བཞི་བཅུ་ཞེ་གཅིག་ཏུ་ཕེབས་པ་ལྕགས་ཕོ་བྱི་བའི་ལོ་སུམ་ཅུ་རྩ་གསུམ་དུ་ཕེབས་ནས་དབྱར་གནས་མཛད་དེ། དེ་ཡང་འདི་ལྟར།བཅོམ་ལྡན་འདས་ཡུམ་སྒྱུ་མ་ལྷ་མཛེས་སུམ་ཅུ་རྩ་གསུམ་དུ་སྐྱེ་བ་བཞེས་པ་དེ་རྗེས་སུ་གཟུང་བར་བཞེད་པ་དང༌། གཞན་ཡང་ལྷ་བགྲང་བ་ལས་འདས་པ་ཞིག་ལ་དགེ་བའི་རྩ་བ་ཡོད་པར་གཟིགས་ནས་སུམ་ཅུ་རྩ་གསུམ་དུ་གཤེགས་ཏེ། ཆོས་བཟང་ལྷའི་མདུན་སར་བཞུགས་ནས། གདུགས་དཀར་མོ་ཅན་གྱི་གཟུངས་དབུའི་གཙུག་ཏོར་ནས་ཕྱུང་ངོ༌། །དེ་ནས་ལྷའི་དགའ་བའི་ཚལ་དུ་གཤེགས་ཏེ་བརྒྱ་བྱིན་དང་ཚངས་པ་སོགས་སྡེ་བརྒྱད་དང༌། བློ་གྲོས་ཆེན་པོ་ལ་སོགས་པ་བྱང་ཆུབ་སེམས་དཔའ་མང་པོ་དང་ལྷན་ཅིག་གོ །

              དེའི་ཚེ་འོད་བཀྱེ་བས་སྟོང་གསུམ་འདིའི་ངན་སོང་ཐམས་ཅད་སྡུག་བསྔལ་ལས་གྲོལ་བ་རྣམས་བཅོམ་ལྡན་འདས་ཀྱི་སྤྱན་སྔར་ནོར་བུའི་སྟེང་དུ་འཁོད་ནས་ཆེད་དུ་བརྗོད་པ་དང༌།བརྒྱ་བྱིན་གྱིས་གསོལ་བ།ལྷའི་རིས་འདི་ནས་ལྷའི་བུ་ནོར་བུ་དྲི་མ་མེད་པའི་འོད་ཤི་འཕོས་ནས་དགུང་བདུན་ལོན་ལགས་ན་གང་དུ་སྐྱེས། བཀའ་བསྩལ་པ། ལྷའི་དབང་པོ། དེ་ནི་མནར་མེད་པའི་དམྱལ་བར་སྐྱེས་སོ། །བརྒྱ་བྱིན་གྱིས་དེ་ལ་བསྐྱབ་པར་ཞུས་པས་ངན་སོང་སྦྱོང་བའི་བརྟག་པ་གསུངས་ཏེ། བརྒྱ་བྱིན་ལ་ངན་སོང་སྦྱོང་བའི་ཆོ་ག་བསྟན། བརྒྱ་བྱིན་གྱིས་དེའི་ལུས་དཀྱིལ་འཁོར་དུ་བཅུག་ནས་དབང་བསྐུར་བས་དེ་སྐད་ཅིག་གིས་དམྱལ་བ་ལས་ཐར་ནས་དགའ་ལྡན་དུ་སྐྱེས་ཏེ་གཙང་མའི་རིས་ཀྱི་ལྷ་རྣམས་དང་ལྷན་ཅིག་དགའ་བའི་ཚལ་དེར་འོངས་ནས་བཅོམ་ལྡན་འདས་དང་བརྒྱ་བྱིན་ལ་ཆེད་དུ་བརྗོད་ཅིང་མཆོད་པའི་སྤྲིན་གྱིས་མཆོད་དོ། །དེ་ནས་བཅོམ་ལྡན་འདས་ལྷའི་ཤིང་ཡོངས་འདུ་ས་བརྟོལ་གྱི་དྲུང་དུ་ཨར་མོ་ནིག་སྟེ་ལ་བ་དཀར་པོ་ལྟ་བུའི་རྡོ་ལེབ་ཀྱི་སྟེང་དུ་བཞུགས་ཏེ། ཤཱ་རིའི་བུ། འོད་སྲུང་ཆེན་པོ། ཀཱ་ཏྱའི་བུ་ཆེན་པོ། གང་པོ། ནམ་གྲུ། རྟ་ཐུལ། ཀ་པི་ན། གསུས་པོ་ཆེ། རབ་འབྱོར་ལ་སོགས་པ་དགྲ་བཅོམ་པ་བརྒྱད་སྟོང་དང༌། ཀུན་དགའ་བོ་དང་ཐབས་ཅིག་ཏུ་དབྱར་གནས་པ་མཛད། དེའི་ཚེ་བྱང་ཆུབ་སེམས་དཔའ་མང་པོ་ཡང་འདུས་ཤིང་ཡུམ་སྒྱུ་འཕྲུལ་ཆེན་མོ་ཡང་མཆོག་ཏུ་དགའ་བར་མཛད་ལ། རྒྱལ་བའི་སྲས་ལེགས་པར་གནས་ལ་དབྱིག་ལྡན་གྱི་གཟུགས་བསྩལ་ཏོ། །

              དེའི་ཚེ་ལྷ་རྣམས་ཐགས་བཟང་རིས་ཀྱི་དཔུང་དང་ཐབས་པས་ཕམ་ནས་བཅོམ་ལྡན་འདས་ཀྱི་དྲུང་དུ་བརྒྱ་བྱིན་སྐྲག་བཞིན་དུ་འོངས་ཏེ་ཞུས་པས་རྒྱལ་མཚན་རྩེ་མོའི་དཔུང་རྒྱན་གྱི་གཟུངས་བསྩལ་ནས་དབུགས་ཕྱུང་ངོ༌། །སྤྱན་རས་གཟིགས་ཀྱིས་ལྷ་རྣམས་མཆོད་རྟེན་བགྱིད་པར་འཚལ་ན། དེའི་བསོད་ནམས་འཕེལ་བའི་ཐབས་ཞུས་པས།རྟེན་འབྲེལ་སྙིང་པོ་གསུངས་སོ། །ལྷའི་བུ་ཤིན་ཏུ་བརྟན་པས་ཞག་བདུན་ནས་ཤི་སྟེ་དམྱལ་བར་སྐྱེའོ་ཞེས་པའི་སྒྲ་ཐོས་པ་བརྒྱ་བྱིན་ལ་སྨྲས་ཏེ། དེས་ཞུས་པས་གཙུག་ཏོར་རྣམ་པར་རྒྱལ་བ་ངན་འགྲོ་རྣམ་སྦྱོང་གསུངས་པས་ལྷའི་བུ་དེའི་སྡིག་པ་དག་ཅིང་ཚེ་བསྲིངས་སོ། །དེའི་ཚེ་ས་བཅུ་པ་འབའ་ཞིག་དང་ཐབས་ཅིག་ཏུ་བཞུགས་ཏེ། བྱམས་པས་འཛམ་བུ་གླིང་པ་རྣམས་ཀྱི་འཚེ་བ་ཞི་བར་གསོལ་བས། བཅོམ་ལྡན་འདས་ཀྱིས་ཞབས་ས་ལ་བརྡབས་ཤིང༌། སྤྲུལ་པའི་ཁྲོ་བོ་སྤྲོས་ཏེ་གདུག་པ་ཅན་རྣམས་བཏུལ་ནས་མི་གཡོ་བའི་རྒྱུད་གསུངས་སོ། །ལྷའི་བུ་ཞིག་ཤི་འཕོས་ནས་ཕག་ཏུ་སྐྱེ་བར་མཐོང་བས་སྐྲག་སྟེ་བྲང་བརྡུངས་པ་དང༌། བཅོམ་ལྡན་འདས་དེར་གཤེགས་ཏེ་དཀོན་མཆོག་གསུམ་ལ་སྐྱབས་སུ་སོངས་ཤིག་གསུངས། དེས་དེ་ལྟར་བྱས་པས་ཡངས་པ་ཅན་དུ་ཚོང་དཔོན་ཞིག་གི་བུར་སྐྱེས་ཏེ་མིང་ཤེས་ལྡན་ཞེས་བཏགས་སོ། །བཅོམ་ལྡན་འདས་སུམ་ཅུ་རྩ་གསུམ་དུ་བཞུགས་པའི་རིང་མོའུ་འགལ་གྱི་བུ་ཆེན་པོ་འཛམ་བུའི་གླིང་དུ་བསྟན་པ་སྐྱོང་ཕྱིར་བཞུགས། སྐྱེ་བོ་ཕལ་པ་སུས་ཀྱང་བཅོམ་ལྡན་འདས་གང་ན་བཞུགས་མ་ཤེས་པ་ན་རྒྱལ་པོ་གཟུས་ཅན་སྙིང་པོ་དང་གསལ་རྒྱལ་དང༌། འཁོར་རྣམ་བཞི་རྣམས་ཀྱི་མོའུ་འགལ་གྱི་བུ་ཆེན་པོ་གཉན་ཡོད་ན་དབྱར་གནས་པ་ལ་དྲིས་པ། བཅོམ་ལྡན་འདས་གང་ན་བཞུགས། ལྷའི་གནས་ལ་བཞུགས་སོ། །དེ་རྣམས་དགའ་སྟེ་དབྱར་ཟླ་བ་གསུམ་རྫོགས་པ་དང་སླར་ཡང་མོའུ་འགལ་གྱི་བུའི་གན་དུ་སོང་ནས། ད་ནི་བཅོམ་ལྡན་འདས་མ་མཐོང་ནས་ཡུན་རིང་ཞིག་ལོན་པས། བདག་ཅག་གི་ཚིག་གིས་བཅོམ་ལྡན་འདས་སྤྱན་འདྲེན་དུ་གསོལ། མོའུ་འགལ་གྱི་བུས་སྐད་ཅིག་ལ་ལྷའི་ཡུལ་དུ་ཕྱིན་ཏེ། བཅོམ་ལྡན་འདས་ལ་འཁོར་བཞི་པོའི་ཚིག་གིས་བསྙུན་གསོལ་ནས། བཅོམ་ལྡན་འདས་འཛམ་བུ་གླིང་པ་རྣམས་ཀྱིས་ལྷའི་གནས་སུ་འཛེག་མི་ནུས་ཤིང་ལྷ་རྣམས་ལ་འཛམ་བུ་གླིང་དུ་འབབ་པའི་མཐུ་མཆིས་པས། ད་ནི་འཛམ་བུ་གླིང་དུ་གཤེགས་སུ་གསོལ་ཞེས་དེ་དག་གི་མཆིད་གསོལ་བ་དང༌། མོའུ་འགལ་གྱི་བུ་ཁྱོད་སོང་ལ་བཅོམ་ལྡན་འདས་དེང་ཞག་བདུན་ན་གྲོང་ཁྱེར་གསལ་ལྡན་གྱི་ཨ་པ་ཛ་རིའི་ནགས་ཤིང་ཨུ་དུམ་ཝ་རའི་དྲུང་དུ་གཤེགས་སོ་ཞེས་བསྒོ་ཤིག དེས་ཀྱང་སྐད་ཅིག་ལ་འཛམ་བུ་གླིང་དུ་ཕྱིན་ནས་མི་རྣམས་ལ་གོ་བར་བྱས་ཏེ་སླར་གཉན་ཡོད་ནས་སུམ་ཅུ་རྩ་གསུམ་དུ་ཕྱིན་ཏོ། །མ་འགགས་པས་རྒྱལ་པོ་ཨུ་ཏྲཱ་ཡཱ་ན་ལ་སྦྲན་པས་དེ་དགའ་སྟེ་གྲོང་ཁྱེར་གསལ་ལྡན་གཙང་མར་བྱས་ནས་མཆོད་པའི་ཡོ་བྱད་དག་བཤམས་ཤིང༌། འཁོར་རྣམ་བཞིས་ཀྱང་ཕྱོགས་དེ་ལྷའི་དགའ་ཚལ་བཞིན་དུ་བྱས་སོ། །

              དེ་ནས་སྟོན་ཟླ་འབྲིང་པོའི་ཚེས་ཉི་ཤུ་གཉིས་ལ་བཅོམ་ལྡན་འདས་འཛམ་བུའི་གླིང་དུ་ཞབས་ཀྱིས་གཤེགས་པར་བཞེད་པ་ན། བརྒྱ་བྱིན་གྱིས་བི་ཤྭ་ཀརྨ་ལ་བསྒོས་པས་དེས་ཐེམ་སྐས་གསུམ་སྤྲུལ་ཏེ། དབུས་མ་བཻཌཱུརྱའི་ཐེམ་སྐས་ལ་བཅོམ་ལྡན་འདས་འཁོར་དང་བཅས་པ་གཤེགས་སོ། །གཡས་པ་གསེར་གྱི་ཐེམ་སྐས་ལ་ཚངས་པ་གཟུགས་ཀྱི་ལྷས་བསྐོར་ཏེ་ནོར་བུའི་རྔ་ཡབ་ཀྱིས་བཅོམ་ལྡན་འདས་ལ་གཡོབ་ཅིང་སོང་ངོ༌། །གཡོན་པ་ཤེལ་གྱི་སྐས་ལ་བརྒྱ་བྱིན་འདོད་པའི་ལྷ་རྣམས་ཀྱིས་བསྐོར་ཏེ་གདུགས་ཐོགས་ནས་སོང་ངོ༌། །བཅོམ་ལྡན་འདས་ཀྱིས་བི་ཤྭ་ཀརྨའི་ཆེད་དུ་ཕྱེད་ནི་ཞབས་ཀྱིས་བྱོན་ལ། མ་དད་པ་བཟློག་པའི་ཆེད་དུ་ཕྱེད་ནི་རྫུ་འཕྲུལ་གྱིས་བྱོན་ཏེ། དཔག་ཚད་བཅུ་གཉིས་མན་ཆད་མིའི་དྲི་མནམ་པས་ལྷ་རྣམས་འོད་མི་བཟོད་པ་ལ་ཙན་དན་གྱི་དྲིས་ཁྱབ་པར་མཛད་ཅིང༌། སྐྱེས་པས་ལྷའི་བུ་མོ་དང་བུད་མེད་ཀྱི་ལྷའི་བུ་མཐོང་ན་འཆི་བར་འགྱུར་པས་སྐྱེས་པ་རྣམས་ཀྱིས་ལྷའི་བུ་མཐོང་ཞིང་བུད་མེད་རྣམས་ཀྱིས་ལྷའི་བུ་མོ་མཐོང་བར་མཛད་དེ་གྲོང་ཁྱེར་གསལ་ལྡན་དུ་གཤེགས་ནས་བརྒྱ་བྱིན་གྱིས་བཤམས་པའི་སེང་གེའི་ཁྲི་ལ་བཞུགས་སོ། །དེའི་ཚེ་རྒྱལ་པོ་ཨུ་ཏྲཱ་ཡ་ན་དང་འཁོར་རྣམ་བཞིས་བསུས་ཤིང་དྲི་ཟ་ཆོས་ཀྱི་ཕྲེང་བས་པི་ཝང་བརྡུངས་པས་ཉན་ཐོས་ཆེན་པོ་རྣམས་ཀྱིས་ལུས་ཀྱང་གཡོས་སོ། །གནས་དེར་ལྷ་དང་མི་དད་པ་ཅན་གྱིས་ལྷ་ལས་བབས་པའི་མཆོད་རྟེན་བང་རིམ་བཞི་པའམ་བརྒྱད་པ་ངོས་རེར་གློ་འབུར་དང་བཅས་པའི་གློ་འབུར་གྱི་དབུས་ན་ཐེམ་སྐས་ཡོད་པ་བརྩིགས་སོ། །                                                                                                                              རྩོམ་སྒྲིག་པ། མང་ར་བ།
              གསལ་འདེབས། 
                        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                         དྲ་བའི་སྦྲེལ་ཐགhttp://www.tb1025.cn