དེ་ནས་བཅོམ་ལྡན་འདས་ཀྱིས་དྲང་སྲོང་ལྷུང་བ་འདི་ཉིད་ཀྱི་སའི་ཕྱོགས་གང་དུ་ཆོས་ཀྱི་འཁོར་ལོ་བསྐོར་མཉམ་དུ་དགོངས་པ་ན། གང་དུ་སྔོན་གྱི་རྒྱལ་བ་རྣམས་ཀྱིས་ཆོས་ཀྱི་འཁོར་ལོ་བསྐོར་བའི་ས་ཕྱོགས་དེར་ནི་རིན་པོ་ཆེ་སྣ་བདུན་གྱི་ཁྲི་སྟོང་བྱུང་ཞིང། ཚངས་པས་ཀྱང་སེངྒེའི་ཁྲི་འཕང་དུ་དཔག་ཚད་བཞི་ཁྲི་ཉིས་སྟོང་ཡོད་པ་བཤམས་སོ། །དེ་བཞིན་དུ་ཚངས་པ་གཞན་དང༌། བརྒྱ་བྱིན་དང་བྱང་ཆུབ་སེམས་དཔའ་བྱེ་བ་ཕྲག་བཅུ་བཅུས་ཀྱང་སེངྒེའི་ཁྲི་དེ་ལྟ་བུ་དག་བཤམས། ས་བླའི་ལྷ་རྣམས་ཀྱིས་ཆོས་ཀྱི་འཁོར་ལོ་བསྐོར་བའི་འཁོར་གྱི་ཁྱམས་ཆེན་པོ་བཀྲ་བ་བལྟ་ན་སྡུག་པ། རྒྱ་ཆེ་བ་ཆུ་ཞེང་དུ་དཔག་ཚད་བདུན་བརྒྱ་ཡོད་པ་སྤྲུལ་ཏེ། སྟེང་གི་ནམ་མཁའ་ལ་གདུགས་དང་བླ་བྲེ་ལ་སོགས་པས་བརྒྱན་ཅིང་འདོད་ལྷའི་བུ་རྣམས་ཀྱི་སེངྒེའི་ཁྲི་བརྒྱད་སྟོང་ཕུལ་ནས་འདི་ལ་བཞུགས་ནས་འཁོར་ལོ་བསྐོར་དུ་གསོལ་ཞེས་གསོལ་ཏོ། །

              དེ་ནས་བཅོམ་ལྡན་འདས་ཀྱིས་སྔོན་གྱི་རྒྱལ་བ་རྣམས་ལ་གུས་པར་མཛད་པའི་ཕྱིར་ཁྲི་གསུམ་ལ་བསྐོར་བ་མཛད་ནས་སེངྒེ་ལྟར་བག་ཚ་བ་མི་མངའ་བར་ཁྲི་བཞི་པ་ལ་སྐྱིལ་མོ་ཀྲུང་བཅས་ཏེ་བཞུགས་ཤིང༌། ཚངས་པ་དང༌། བརྒྱ་བྱིན་དང༌།བྱང་ཆུབ་སེམས་དཔའ་རྣམས་ཀྱི་སེངྒེའི་ཁྲི་ལ་ཡང་བཞུགས་པར་ཀུན་ཏུ་བསྟན་ཏོ། །དགེ་སློང་ལྔ་པོས་ཀྱང་དེ་བཞིན་གཤེགས་པ་ལ་ཕྱག་བཙལ་ནས་དུལ་བའི་ཚུལ་གྱིས་འདུག་གོ །དེའི་ཚེ་བཅོམ་ལྡན་འདས་ཀྱི་སྐུ་ལས་འོད་ཟེར་བཀྱེ་བས་རིགས་དྲུག་གི་སྡུག་བསྔལ་རྒྱུན་བཅད། ལྟས་ཆེན་པོ་བཅོ་བརྒྱད་བྱུང༌། མི་མཇེད་ཀྱི་ཞིང་མཉམ་ཞིང་སེམས་ཅན་ཀུན་བྱམས་པ་དང་ལྡན་པར་གྱུར་ཏོ། །འོད་དེ་ལས། རྒྱལ་བས་བསྐལ་བ་ཁྲག་ཁྲིག་བསྒྲུབས། །ཆོས་དེ་ཉན་པར་གང་འདོད་པ། །དེ་ནི་རིངས་པར་ལ་གོར་དུ། །ཆོས་མཉན་པ་ཕྱིར་ཤོག་ཅིག །ཅེས་བསྐུལ་བའི་ཚེ། ལྷ། ཀླུ། གནོད་སྦྱིན། དྲི་ཟ། ལྷ་མ་ཡིན།ནམ་མཁའ་ལྡིང༌། མིའམ་ཅི། ལྟོ་འཕྱེ་ཆེན་པོ་སྟེ། སྡེ་བརྒྱད་པོ་དག་གིས་ཀྱང་ཤེས་ཏེ་སྤྱན་སྔར་དོང་ངོ༌། །ཕྱོགས་བཅུའི་བྱང་ཆུབ་སེམས་དཔའ་གྲངས་མེད་པ་དག་ཀྱང་ལྷགས་ཏེ་མདོར་ན་སྟོང་ཆེན་འདི་སྐྲའི་རྩེ་མོའི་ཆ་ཤས་ཙམ་ཡང་མ་ཁྱབ་པ་མེད་དོ། །

               དེ་ནས་བྱང་ཆུབ་སེམས་དཔའ་ཕྱོགས་བཅུ་ནས་ལྷགས་པ་དག་དང༌། མི་མཇེད་འདིའི་ཚངས་པ་དང་བརྒྱ་བྱིན་ལ་སོགས་པ་དབང་ཆེ་བར་གྲགས་པ་རྣམས་ཀྱིས་བཅོམ་ལྡན་འདས་ཀྱི་ཞབས་ལ་གཏུགས་ཏེ་སྐྱེ་བོ་མང་པོ་ལ་སྨན་པའི་སླད་དུ་ཆོས་ཀྱི་འཁོར་ལོ་བསྐོར་དུ་གསོལ། ཞེས་དང༌། ཚངས་པས།ཉོན་མོངས་ཚོགས་ཀྱི་ནད་བརྒྱས་གཙེས་པའི་སྐྱེ་བོ་འདི་དག་ལ། །རྒྱལ་བ་སྨན་པ་འཁོར་ལོ་དམ་པ་བསྐོར་ཏེ་ཐར་མཛད་གསོལ། །ནོར་བདུན་བགོ་བཤའ་མཛོད་ཅིག་འདྲེན་པ་འཁོར་ལོ་བསྐོར་བར་གསོལ། །དགོངས་པ་ཡོངས་རྫོགས་རིམས་ནད་མ་མཆིས་འཁོར་ལོ་མཆོག་བསྐོར་གསོལ། །ཞེས་ལྷའི་འཛམ་བུ་ཆུ་བོའི་གསེར་ལས་བྱས་པའི་འཁོར་ལོ་རྩིབས་སྟོང་པ། འོད་ཟེར་སྟོང་དང་ལྡན་པ་སྔོན་གྱི་རྒྱལ་བ་རྣམས་ཀྱིས་བཞེས་པ་དེ། བཅོམ་ལྡན་འདས་ཀྱི་དྲུང་དུ་ཕུལ་ཏེ་ཆོས་ཀྱི་འཁོར་ལོ་བསྐོར་བ་གསོལ་བ་བཏབ་བོ། །དེ་ནས་ནམ་མཁའི་དབྱིངས་ཐམས་ཅད་ཡོངས་སུ་ཁྱབ་པའི་བྱང་ཆུབ་སེམས་དཔའ་རྣམས་དང༌། ལྷའི་སྲས་པོ་བརྒྱད་ཁྲིས་གཙོ་བྱས་པའི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་གྲུལ་བུམ་དང་མིའམ་ཅི་དང་ལྟོ་འཕྱེ་ཆེན་པོ་དང༌། ཀཽ་དི་ནྱ་ལ་སོགས་པའི་ལྔ་སྡེ་དང༌། གཞན་ཡང་ཆོས་ཉན་པར་འདུས་པའི་འཁོར་དེ་དག་ཐ་ན་ལུད་པའི་སྒྲ་ཙམ་ཡང་མེད་པར་རྒྱལ་བའི་ཞལ་འབའ་ཞིག་ལ་བལྟའོ། །དེ་ནས་བཅོམ་ལྡན་འདས་ཀྱིས་ནམ་གྱི་ཆ་སྨད་ཀྱི་ཐུན་ལ་ལྔ་སྡེ་བཟང་པོ་ལ་བོས་ཏེ། བདེན་པ་བཞི་པོ་དག་གི་མིང་དང་སྤང་བླང་དང༌། དེ་དག་ཡོངས་སུ་ཤེས་སྤངས་པ་མངོན་དུ་བྱས་བསྒོམས་པའི་གཤེགས་ཤུལ་ཡན་ལག་བརྒྱད་མཐའ་གཉིས་སྤངས་པའི་དབུ་མའི་ལམ་རྣམ་པ་བཅུ་གཉིས་སུ་བཟླས་ཏེ་ཆོས་ཀྱི་འཁོར་ལོ་བསྐོར། གསུང་གི་སྒྲ་དབྱངས་དེ་ལས་གང་དང་གང་གིས་འདུལ་བའི་སྒྲ་དེ་དང་དེ་ལ་འཚམ་པའི་གཏམ་སྣ་ཚོགས་པ་ཐེག་པ་གསུམ་པོ་སོ་སོ་དང་མཐུན་པའི་ཆོས་ཐོས་ཏེ་སྟོང་ཆེན་འདི་ན་བདེན་བཞིའི་མིང་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་བཞི་ཡོད་པ་ཐམས་ཅད་སོ་སོར་གོ་སྟེ་ཐམས་ཅད་ཀྱང་ཇི་ལྟ་བ་བཞིན་གྱི་བདེན་པར་འདུ་བའི་དགོངས་པས་ཆོས་བསྟན་པ་དེས་ཚེ་དང་ལྡན་པ་ཀཽ་དི་ནྱ་དང༌། འབར་བའི་གཟི་བརྗིད་ལ་སོགས་པའི་ལྷ་བརྒྱད་ཁྲི་པོ་རྣམས་ལ་ཆོས་ཀྱི་མིག་དྲི་མ་དང་བྲལ་བ་སྐྱེས་སོ། །དེ་ནས་བཅོམ་ལྡན་འདས་ཀྱི་ཀཽ་དི་ནྱ་ལ་བཀའ་བསྩལ་པ། ཁྱོད་ཀྱིས་ཆོས་ཀུན་ཤེས་སམ། །གསོལ་བ།བཅོམ་ལྡན་འདས་ཀུན་འཚལ་ལགས་སོ། །དེ་ནས་ཚེ་དང་ལྡན་པ་ཀཽ་དི་ནྱ་ལ་ཀུན་ཤེས་ཀཽ་དི་ནྱ་ཞེས་བྱ་བའི་མིང་ཆགས་པས། འཇིག་རྟེན་དུ་དཀོན་མཆོག་གསུམ་པོ་དག་ཀྱང་གྲུབ་ཅིང་ལྷ་རྣམས་ཀྱིས་ཀྱང༌། གྲོགས་པོ་དག་བཅོམ་ལྡན་འདས་ཀྱིས་ཝཱ་ར་ཎཱ་སིར་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་ཀྱི་འཁོར་ལོ་ཆོས་དང་ལྡན་པ་སུས་ཀྱང་འཇིག་རྟེན་དུ་ཆོས་དང་མཐུན་པར་འགའ་ཡང་མ་བསྐོར་བ་ཞིག་བསྐོར་བས། ལྷའི་རིས་འཕེལ་ཞིང་ལྷ་མ་ཡིན་གྱིས་རིས་ནི་ཡོངས་སུ་ཉམས་སོ། །ཞེས་བསྒྲགས་སོ། །དེ་ནས་བཅོམ་ལྡན་འདས་ཀྱིས་ལན་གཉིས་སུ་ཡང་ལྔ་སྡེ་རྣམས་ལ་བདེན་པ་བཞི་བསྟན་པས། ཀུན་ཤེས་ཀཽ་དི་ནྱ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ཏེ་དགྲ་བཅོམ་པར་གྱུར་ཏོ། །དེའི་ཚེ་འཇིག་རྟེན་ན་དགྲ་བཅོམ་པ་གཅིག་དང༌། གཉིས་པ་ནི་བཅོམ་ལྡན་འདས་ཉིད་ཡིན་ནོ། །དགེ་སློང་ལྷག་མ་བཞི་པོ་རྟ་ཐུལ་དང༌། རླངས་པ་དང༌། མིང་ཆེན་དང༌།བཟང་ལྡན་རྣམས་ཀྱིས་བདེན་པ་མཐོང་ངོ༌། །དེ་ལྟར་ལྔ་སྡེས་ཡེ་ཤེས་ཁོང་དུ་ཆུད་མ་ཐག །མུ་སྟེགས་ཀྱི་རྟགས་དང་རྒྱལ་མཚན་ཅི་ཡོད་པ་སྐད་ཅིག་ལ་ནུབ་ནས། སྐྲ་བྲེགས་ཆོས་གོས་གསུམ་དང༌། ལྷུང་བཟེད་དང་ལྡན་ལ། བསྙེན་པར་རྫོགས་པ་དགེ་སློང་གི་དངོས་པོར་གྱུར་ཏེ། བཅོམ་ལྡན་འདས་ཀྱིས་ཀྱང་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ནི་ཀུན་ཤེས་ཀཽ་ཌི་ནྱ་འདི་ཡིན་ནོ་ཞེས་བསྔགས་སོ། །

               དེ་ནས་བཅོམ་ལྡན་འདས་ཀྱི་དགེ་སློང་ལྷག་མ་བཞི་པོ་ལ་གཟུགས་བདག་མ་ཡིན་པ་དང༌། སྡུག་བསྔལ་བ་དང༌། རྟག་པ་ཡིན་པར་རྒྱ་ཆེར་བཀའ་བསྩལ་པས་ལྷག་མ་བཞི་པོས་ཀྱང་དགྲ་བཅོམ་པ་མངོན་དུ་བྱས་ཏེ། འཇིག་རྟེན་ན་དགྲ་བཅོམ་པ་ལྔ་དང་དྲུག་པ་ནི་བཅོམ་ལྡན་འདས་ཉིད་དོ། །དེ་ལྟར་བསྟན་པ་ལས་ལྷ་བྱེ་བ་ཕྲག་བརྒྱ་བཞི་བཅུ་དང༌།མི་བརྒྱད་ཁྲི་བཞི་སྟོང་གིས་བདེན་པ་མཐོང་ངོ༌། །དེ་ལྟར་བཅོམ་ལྡན་འདས་ཀྱི་ཚངས་པའི་དབྱངས་སྙན་པ་དེ་ཕྱོགས་བཅུའི་ཞིང་དག་ཏུ་གྲགས་པས། ཕྱོགས་བཅུའི་སངས་རྒྱས་བཅོམ་ལྡན་འདས་དེ་དག་ཅང་མི་གསུང་བར་བཞུགས་པ་ན། སོ་སོའི་རིམ་གྲོ་པ་རྣམས་ཀྱིས་ཅིའི་ཕྱིར་བཀའ་མཆིད་བཀུམ་ཞེས་ཞུས་པ་དང༌། བཀའ་བསྩལ་པ། བཅོམ་ལྡན་འདས་ཤཱཀྱ་ཐུབ་པ་བྱང་ཆུབ་བརྙེས་ཏེ་འཁོར་ལོ་བསྐོར་བར་མཛད་པས་དེའི་ཕྱིར་མི་སྨྲའོ། །ཞེས་གསུངས་པས་སེམས་ཅན་བྱེ་བ་ཕྲག་བརྒྱ་བྱང་ཆུབ་ཏུ་སེམས་བསྐྱེད་དོ། །སྟོན་པ་མངོན་པར་རྫོགས་པར་སངས་རྒྱས་ནས་ཆོས་གསུངས་པ་དཀའ་དཀའ་ལྟར་མཛད་ནས་ཡང་དང་ཡང་དུ་གསོལ་བ་གདབ་དགོས་བྱུང་བ་དང༌། ཆོས་སྟོན་པ་ལ་འཇུག་པའི་ཚེ་ཐོག་མ་ནས་ཟབ་མོ་སྟོང་པ་ཉིད་ལ་སོགས་པ་མ་བསྟན་པར་ཆོས་གོས་ཟླུམ་པོར་བགོ་བ་དང༌། ཕྱི་དྲོའི་ཁ་ཟས་སྤོང་བ་དང༌། ཟས་གོས་མཐའ་གཉིས་སུ་མ་ལྷུང་བར་བྱ་དགོས་པ་སོགས་འདུལ་བའི་བསླབ་བྱ་བསྟན་ནས་བདེན་པ་བཞི་སྟོན་པར་མཛད་ཅིང་བདེན་པ་བཞི་པོ་དེ་ལས་ཀྱང་ཐོག་མར་སྡུག་བསྔལ་བདེན་པ་སྟོན་པར་མཛད། སྡུག་བསྔལ་ལ་ཡང་རྣམ་པ་བཞི་ཡོད་པ་ལས།ཐོག་མར་མི་རྟག་པ་སྟོན་པར་མཛད་པའི་ཚུལ་འདི་དག་ལ་རྣམ་དཔྱོད་ཅན་གྱིས་ལེགས་པར་དཔྱོད་ཤེས་ན་བྱང་ཆུབ་ལམ་གྱི་རིམ་པའི་ཉམས་ལེན་ལ་ངེས་པ་བརྟན་པོ་རྙེད་པར་འགྱུར་ཏེ། ཐོག་མར་ལེགས་ཚོགས་ཐམས་ཅད་ཀྱི་རྩ་བ་དགེ་བའི་བཤེས་གཉེན་ཞིག་ལ་བརྟེན་དགོས་ཤིང༌། དེ་ཡང་གང་བྱུང་གིས་མི་ཆོག་པར་སློབ་མས་ཀྱང་བླ་མ་མཚན་ཉིད་དང་ལྡན་མི་ལྡན་ལེགས་པར་བརྟགས་ནས་མཚན་ཉིད་དང་ལྡན་པ་ཞིག་ལ་བརྟེན་དགོས་པ་དང༌། བླ་མས་ཀྱང་སློབ་མ་མ་བརྟགས་པར་སུ་རུང་རུང་ལ་ཆོས་བསྟན་མི་རུང་བས་སློབ་མ་སྣོད་དང་ལྡན་མི་ལྡན་ལེགས་པར་བརྟགས་ནས་བྱ་དགོས་པ་དང༌། སློབ་མ་ལ་ཆོས་སྟོན་པའི་ཚེ་ནའང་མ་མཛངས་མས་བུ་ཆུང་གསོ་བ་དང༌། སྨན་པ་མཁས་པས་ནད་པ་ལ་སྨན་སྟེར་བ་དང་འདྲ་བ་གདུལ་བྱའི་ཁམས་ལ་བརྟགས་ནས་རིམ་གྱིས་རྒྱུད་སྦྱོང་བར་བྱ་དགོས་པ་དང༌། དཀར་ཆོས་ཐམས་ཅད་ཀྱི་གཞི་ཚུལ་ཁྲིམས་རྣམ་པར་དག་པ་ཞིག་ལ་ཐོག་མར་སྦྱར་དགོས་པ་དང༌། དེ་ནས་ཀྱང་ཐོག་མར་ཚེ་འདི་ལས་བློ་ལོག་པ་ཞིག་དང༌། འཁོར་བ་སྤྱི་ལས་བློ་ལོག་པ་ཞིག་གིས་ཐབས་སུ་སྤྱིར་འདུས་བྱས་ཐམས་ཅད་མི་རྟག་པ་དང༌། ཁྱད་པར་ཟག་བཅས་ཀྱི་ལུས་འདི་མི་རྟག་པར་བསྟན་ནས་ཚེ་འདི་ལ་མ་ཆགས་པར་འཇིག་རྟེན་ཕྱི་མ་དོན་གཉེར་གྱི་བསམ་པ་བསྐྱེད་པ་དང༌། འཁོར་བ་མཐའ་དག་ལ་མ་ཆགས་པར་ཐར་པ་དོན་གཉེར་གྱི་བསམ་པ་བརྟན་པོ་བསྐྱེད་པ་དང༌། བསམ་པ་དེ་ལྟ་བུ་ཞིག་སྐྱེས་པ་ན་འཁོར་བའི་རྩ་བ་ཀུན་འབྱུང་བདེན་པ་ངོ་སྤྲད་དེ་རིམ་གྱིས་ལམ་གོང་མ་ལ་ཁྲིད་དགོས་པའི་ཚུལ་རྣམས་ཤེས་ནས་སྟོན་པའི་རྣམ་ཐར་ཉམས་ལེན་དུ་འཁྱེར་ཤེས་པ་ཞིག་འོང་ངོ༌། །

                སྟོན་པས་ཆོས་ཀྱི་འཁོར་ལོ་བསྐོར་བའི་ས་ཝཱ་ར་ཎཱ་སི་དྲང་སྲོང་ལྷུང་བ་རི་དྭགས་ཀྱི་ནགས་སུ་ལྷ་དང༌། ལྔ་སྡེ་བཟང་པོ་སོགས་མི་དད་པ་ཅན་དག་གིས་ཆོས་ཀྱི་འཁོར་ལོ་བསྐོར་བའི་མཆོད་རྟེན། དབྱིབས་གྲུ་བཞི་པ་བང་རིམ་བཞི་པ། བང་རིམ་རེ་རེ་ལ་ཕྱོགས་བཞིར་གློ་འབུར་དང་བཅས་པ་ལ་སྒོ་བཞིའམ་བརྒྱད་དམ་བཅུ་གཉིས་སམ་བཅུ་དྲུག་ཡོད་པ་བརྩིགས་སོ། །དེ་ལ་ནི་ཀ་ཤིའི་ཡུལ་དུ་ཆོས་ཀྱི་འཁོར་ལོ་བསྐོར་བའི་མཆོད་རྟེན་ཞེས་སྔོན་གྱི་མཁས་པ་རྣམས་ལ་གཏམ་དུ་གྲགས་སོ། །

                                                                                                         རྩོམ་སྒྲིག་པ། མང་ར་བ།
                གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                       དྲ་བའི་སྦྲེལ་ཐགhttp://www.tb1025.cn