ལྔ་སྡེ་ལ་ཆོས་ཀྱི་འཁོར་ལོ་བསྐོར་ཚུལ། དེ་ནས་ཚོང་དཔོན་ག་གོན་དང་བཟང་པོ་གཉིས་ཀྱི་དོན་དུ་བཀྲ་ཤིས་ཀྱི་ཚིགས་བཅད་མཛད་ནས་དེ་གཉིས་བྱང་ཆུབ་ཏུ་ལུང་བསྟན་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་གིས་ཆོས་ཟབ་མོ་ཟབ་པར་སྣང་བ། ཁོང་དུ་ཆུད་པར་དཀའ་བ། རྟོག་གེ་པ་རྣམས་ཀྱིས་རྟོག་གེའི་སྤྱོད་ཡུལ་མ་ཡིན་པ།མཁས་པས་ཤེས་པ་འདི་རྟོགས་ན། གཞན་ལ་སྨྲས་ཀྱང་མི་ཤེས་པས་བདེ་བར་གནས་པའི་རྣལ་འབྱོར་ལ་རྗེས་སུ་བརྩོན་པར་གནས་པར་བྱའོ་ཞེས་དགོངས་ནས། ཟབ་ཞི་རྡུལ་བྲལ་འོད་གསལ་འདུས་མ་བྱས། །བདུད་རྩི་ཆོས་འདི་བདག་གིས་ཐོབ་པར་གྱུར། །བདག་གིས་བསྟན་ཀྱང་གཞན་གྱིས་མི་ཤེས་ཏེ། །མི་སྨྲ་ནགས་འདབ་གནས་པར་བྱ་བ་སྙམ། །ཞེས་བྱ་བ་ལ་སོགས་པ་གསུངས་ཏེ་ཐུགས་ལས་ཆུང་ངུར་བཞུགས་པ་ན། ཕྱོགས་བཅུའི་ཞིང་ནས་ལྷགས་པའི་བྱང་ཆུབ་སེམས་དཔའ་བགྲང་བ་ལས་འདས་པ་དག་དང༌། དཀར་ཕྱོགས་ཀྱི་ལྷ་བགྲང་བ་ལས་འདས་པ་དག་གིས་ཆོས་སྟོན་པར་གསོལ་བ་བཏབ་ཅིང༌། ཁྱད་པར་སྟོང་གསུམ་མི་མཇེད་ཀྱི་བདག་པོ་ཚངས་པ་ཆེན་པོས་བཅོམ་ལྡན་འདས་ལ་ཆོས་གསུང་བར་གསོལ་བ་བཏབ་པས། ཅང་མི་གསུངས་པས་གནང་བར་རིག་སྟེ་ཚངས་པ་རང་གི་གནས་སུ་སོང་ངོ༌། །

              དེ་ནས་བཅོམ་ལྡན་འདས་ཀྱིས་གཞན་དག་ཆོས་ལ་གུས་པ་བསྐྱེད་པར་འགྱུར་བ་དང༌། ཚངས་པས་ཡང་ཡང་བསྐུལ་ན་དགེ་བ་དག་འཕེལ་བར་འགྱུར་བ་དང༌། ཆོས་ཀྱང་ཟབ་པར་བསྟན་པའི་ཕྱིར་ཐུགས་ལས་ཆུང་ངུར་བཞུགས་སོ། །དེ་ཚངས་པས་ཤེས་ནས་བརྒྱ་བྱིན་ལ་བསྐུལ་ཏེ། དབང་ཕྱུག་ཆེན་པོ་སོགས་འདོད་གཟུགས་ཀྱི་ལྷ་མང་པོ་དང་ལྷན་ཅིག་བཅོམ་ལྡན་འདས་ཀྱི་སྤྱན་སྔར་ཕྱིན་ནས་ཆོས་གསུང་བར་བསྐུལ་ལོ། །དེ་ལྟར་ནའང་ཆོས་གསུང་བ་དཀའ་དཀའ་ལྟར་མཛད་ནས་ཆོས་སྟོན་པར་མ་མཛད་པ་ན་ཚངས་པ་གཙུག་ཕུད་ཅན་གྱིས་དེ་ཤེས་ནས་ནམ་སྲོད་ལ་ཚངས་པ་དྲུག་ཁྲི་བརྒྱད་སྟོང་གིས་བསྐོར་ནས།བཅོམ་ལྡན་འདས་ཀྱི་སྤྱན་སྔར་ཕྱིན་ཏེ་ཐལ་མོ་སྦྱར་ནས་གསོལ་བ།མ་ག་དྷར་ནི་སྔོན་ཆད་ཆོས་བྱུང་བ། །དག་པ་མ་ལགས་དྲི་མར་བཅས་པས་རྟོགས། །བདུད་རྩི་ཆོས་ཀྱི་སྒོ་ནི་ཕྱེ་མཛོད་ལ། །དྲི་མ་མེད་པས་རྟོགས་པ་བཤད་པར་མཛོད། །ཐུབ་པ་ཆོས་ཀྱི་སྒྲོན་མས་མུན་པ་སོལ། །དེ་བཞིན་བཤེགས་པའི་རྒྱལ་མཚན་ཁྱོད་ཀྱིས་བསྒྲེང༌། །སྙན་པའི་གསུང་བརྗོད་པ་ཡི་དུས་ལ་བབ། །རྔ་སྒྲ་རི་དྭགས་དབང་ལྟར་བསྒྲག་ཏུ་གསོལ། །བཀའ་བསྩལ་པ།ཚངས་པ་ངས་ནི་ཚེགས་ཆེན་གྱིས། །སྐྱོན་རྣམས་བཅོམ་ནས་རྟོགས་གྱུར་པ། །སྲིད་དང་ཆགས་པས་དཀྲིས་རྣམས་ཀྱིས།།ཆོས་ནི་ལེགས་པར་རྟོགས་མི་འགྱུར། །གསོལ་བ། འཇིག་རྟེན་ན་དབང་བོ་རྣོན་པོ་དང་འབྲིང་དང་རྟུལ་པོ་དང༌། གདུལ་སླ་བའི་སེམས་ཅན་གང་དག་མཆིས་ཏེ། དེ་དག་གིས་ཆོས་མ་ཐོས་ན་ཉམས་པར་འགྱུར་བས་ཆོས་བཤད་དུ་གསོལ། །ཞེས་དང༌། སྔོན་ཆོས་འཚོལ་བའི་ཕྱིར་དབུ་སྟོང་ཙམ་ཡང་བཏང་ངོ་ཞེས་བསྟོད་དོ། །

              དེ་ནས་ཚངས་རིས་ཀྱི་ལྷའི་བུ་དེ་རྣམས་ཀྱིས་ཀྱང་བཅོམ་ལྡན་འདས་སྔོན་ཁ་དོག་དམ་པ་ལ་སོགས་པ་རྒྱལ་པོ་ལྔ་དང༌། དྲང་སྲོང་ཨུཏྤ་ལར་གྱུར་པའི་ཚེ་དམ་པའི་ཆོས་ཀྱི་ཕྱིར་དཀའ་བ་དེ་ལྟ་བུ་སྤྱད་ན། ད་བཅོམ་ལྡན་འདས་ཆོས་ཀྱི་རྒྱ་མཚོ་ནི་རྫོགས། ཆོས་ཀྱི་སྒྲོན་མེ་ཡང་གསལ་བར་མཛད་ན། ཅིའི་སླད་དུ་ཆོས་མ་བསྟན་པར་མྱ་ངན་ལས་འདའ་བར་དགོངས།ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་བསྩལ་པ། །བདུད་རྩིའི་སྒོ་མོ་དག་ནི་དབྱེ་བར་བྱ།།ཉན་པར་སུ་འདོད་སོམ་ཉི་གསོལ་ཅིག་དང༌། །ཚངས་པ་མི་རྣམས་ལ་ནི་གྱ་ནོམ་ཆོས། །ཀླན་ཀ་མི་བཙལ་མདོ་ཙམ་བཤད་པར་བྱ། །ཞེས་གསུངས་ནས་ཆོས་གསུང་བར་ཞལ་གྱིས་བཞེས་སོ། །དེ་ནས་དེ་བཞིན་གཤེགས་པ་ཆོས་འཆད་པར་དགོངས་པ་དང་ལྷའི་བུ་རྣམས་ཀྱིས་དོ་མོད་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་གནང་སྟེ། དེས་ན་ཕན་པ་དང་བདེ་བར་འགྱུར་རོ། །ཞེས་སྒྲ་བསྒྲགས་སོ། །བྱང་ཆུབ་ཀྱི་ཤིང་གི་ལྷ་ཆོས་སྲེད་སོགས་བཞིས་བཅོམ་ལྡན་འདས་ལ་གསོལ་བ། ཆོས་ཀྱི་འཁོར་ལོ་གང་དུ་བསྐོར། ཝཱ་ར་ཎཱ་སིར་རོ། །དེར་ནི་སྐྱེ་བོའི་ཚོགས་ཉུང་བས་གཞན་དུ་བསྐོར་དུ་གསོལ།ཞེས་ཞུས་པ་ན། སྟོན་པས་ཝཱ་ར་ཎཱ་སི་ནི་སྔོན་གྱི་དྲང་སྲོང་རྣམས་ཀྱི་གནས་ཡིན་ཞིང་དེར་མཆོད་སྦྱིན་བྱེ་བ་སྟོང་ཕྲག་དུ་མ་བྱས་པ་ཡིན་པས་དེར་ཆོས་ཀྱི་འཁོར་ལོ་བསྐོར་བར་བྱའོ་སྙམ་དུ་དགོངས་ནས་བྱོན་པ་དང༌། ཀུན་ཏུ་རྒྱུ་ཉེར་འགྲོ་དང་མཇལ་ཏེ། དེས་བཅོམ་ལྡན་འདས་བཞིན་མདོག་ལེགས་པར་མཐོང་ནས། གཽ་ཏ་མ་ཁྱོད་ཀྱི་དབང་པོ་རྣམས་ནིཤིན་ཏུ་གསལ་ན་སུ་ལས་ཚངས་པར་སྤྱད་པ་སྤྱད། བཀའ་བསྩལ་པ། ང་ལ་སློབ་དཔོན་གང་ཡང་མེད། །ང་དང་འདྲ་བ་ཡོད་མ་ཡིན། །ང་ནི་གཅིག་པུ་རྫོགས་སངས་རྒྱས།།བསིལ་གྱུར་ཟག་པ་མེད་པ་ཡིན། །གསོལ་བ། གཽ་ཏ་མ་སངས་རྒྱས་སུ་ཞལ་གྱིས་འཆེས་སམ། དེ་བཞིན་ནོ། །གར་བཞུད། ང་ནི་ཝཱ་ར་ཎཱ་སིར་འགྲོ། །གྲོང་ཁྱེར་གསལ་ལྡན་སོང་ནས་ནི། །ལོང་བ་ལྟ་བུའི་འཇིག་རྟེན་ལ། །མཚུངས་པ་མེད་པའི་འོད་བྱའོ། །ཞེས་གསུངས་སོ། །

               དེ་ནས་བཅོམ་ལྡན་འདས་ཡུལ་ཀཱ་ཤིར་ལྗོངས་རྒྱུ་ཞིང་གྲོང་ཁྱེར་ཝཱ་ར་ཎཱ་སིར་གཤེགས་ནས་བསོད་སྙོམས་བཞེས་ཏེ་དྲང་སྲོང་ལྷུང་བ་རི་དྭགས་ཀྱི་ནགས་སུ་བྱོན་པ་ན་ལྔ་སྡེས་རྒྱང་རིང་པོ་ནས་གཤེགས་པ་མཐོང་སྟེ། དགེ་སྦྱོང་གཽ་ཏ་མ་མང་དུ་ཟ་བ་སྦོང་བ་ལས་ཉམས་པ་འདི་འོངས་ན་བདག་ཅག་རྣམས་ཀྱིས་འདི་ལ་སྨྲ་བར་མི་བྱ། ལྡང་བར་མི་བྱ། ཕྱག་མི་བྱ། སྟན་སྟོབ་པར་མི་བྱ། ཞེས་འོག་ཁྲིམས་བཅས་པ་ལ་ཀཽ་དེ་ནྱས་ནི་སེམས་ཀྱིས་ཁས་མ་བླངས་སོ། །དེ་ནས་བཅོམ་ལྡན་འདས་འབབ་ཆུ་གནོད་པ་ཅན་གྱི་འགྲམ་གྱི་ལྔ་སྡེའི་གནས་སུ་བྱོན་མ་ཐག་བཅོམ་ལྡན་འདས་ཀྱི་དཔལ་དང་གཟི་བརྗིད་མ་བཟོད་ནས་སྟན་གྱི་སྟེང་ན་འདར་ཞིང་ཀུན་གྱིས་འོག་ཁྲིམས་དྲལ་ཏེ་སྟན་ལས་ལངས་ནས་ཀཽ་དི་ནྱས་རིམ་གྲོ་བྱེད། རྟ་ཐུལ་གྱིས་ནི་བསུས་ཏེ་ཆོས་གོས་དང་ལྷུང་བཟེད་བླངས། རླངས་པས་ནི་གདན་བཤམས།མིང་ཆེན་གྱིས་ནི་ཞབས་རྟེན་སྟོབ། བཟང་ལྡན་གྱིས་ནི་ཞབས་བསིལ་ཕུལ་ཏེ་ཚེ་དང་ལྡན་པ་གཽ་ཏ་མ་ཁྱོད་བྱོན་པ་ལེགས་སོ། །གདན་བཤམས་པ་ལ་བཞུགས་ཤིག་ཅེས་གསོལ་ཏོ། །དེ་ནས་བཅོམ་ལྡན་འདས་གདན་བཤམས་པ་ལ་བཞུགས་པ་ན་ལྔ་སྡེ་རྣམས་ཀྱིས་ལྷག་པར་ཡང་བཅོམ་ལྡན་འདས་ལ་མཚན་དང་གདུང་དང་ཚེ་དང་ལྡན་པས་བརྗོད་པ་ཀུན་ཏུ་བརྗོད་དོ། །བཀའ་བསྩལ་པ། ཁྱེད་རྣམས་དེ་བཞིན་གཤེགས་པ་ལ་དེ་ལྟ་བུའི་ཚུལ་གྱིས་ཀུན་ཏུ་བརྗོད་པར་མ་བྱེད་ཅིག ཁྱེད་ལ་ཡུན་རིང་པོར་གནོད་པ་དང་སྡུག་བསྔལ་བར་འགྱུར་རོ། །གཽ་ཏ་མ།ཁྱོད་ཀྱིས་སྔོན་གྱི་ཚུལ་དང་དཀའ་བ་སྤྱད་པ་དེས་མིའི་ཆོས་བླ་མ་འཕགས་པའི་ཆོས་མ་ཐོབ་ན་ད་སྤྱོད་ཡུལ་འདིས་མི་ཆོས་བླ་མ་འཕགས་པའི་ཆོས་ཐོབ་པར་ནུས་སམ་ཞེས་མ་རངས་པར་གསོལ་བས། བཀའ་བསྩལ་པ། རབ་ཏུ་བྱུང་བས་མཐའ་འདི་གཉིས་ལ་བརྟེན་པར་མི་བྱ་སྟེ། གཉིས་གང་ཞེ་ན། འདོད་པ་རྣམས་ལ་འདོད་པའི་བསོད་ནམས་ཀྱི་རྗེས་སུ་བརྩོན་པ་དམན་པ་ངན་པ་ཐ་ཆད་མ་རབས་གང་ཡིན་པ་དང༌། བདག་ཉིད་དུབ་པ་ལ་རྗེས་སུ་བརྩོན་པའི་འཕགས་པའི་ལམ་ལ་གནོད་པ་དང་ལྡན་པ་གང་ཡིན་པའོ། ཁྱེད་ཀྱིས་མཐའ་འདི་གཉིས་ལ་མི་བརྟེན་པར་དབུ་མའི་ལམ་མིག་དང་ཡེ་ཤེས་ཕྱེད་པ་ཉེ་བར་ཞི་བ་དང༌།མངོན་པར་ཤེས་པ་དང༌། རྫོགས་པར་བྱང་ཆུབ་པ་དང༌། མྱ་ངན་ལས་འདའ་བར་འགྱུར་བ་ཡོད་དེ། དབུ་མའི་ལམ་གང་ཞེ་ན་འཕགས་པའི་ལམ་ཡན་ལག་བརྒྱད་པའོ། །ཞེས་གསུངས་སོ། །

                                                                                                                           རྩོམ་སྒྲིག་པ། མང་ར་བ།
            གསལ་འདེབས། 
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                   དྲ་བའི་སྦྲེལ་ཐགhttp://www.tb1025.cn