འཇམ་དབྱངས་དགྱེས་མཛད་བཞད་པའི་རྡོ་རྗེ་ཡི།།

རིང་ལུགས་གཡས་འཁྱིལ་དུང་གི་སྒྲ་སྙན་པོས།།

ཇི་སྙེད་འཇིག་རྟེན་ཤིས་པར་སྒྲུབ་མཁས་པའི།།

 རྣམ་མང་གདུལ་བྱ་རྒྱ་མཚོའི་མགོན་དེས་སྐྱོངས།།

དེ་ཡང་མདོ་སྨད་བསྟན་པའི་འབྱུང་གནས་བླ་བྲང་བཀྲ་ཤིས་འཁྱིལ་གྱི་ཡོངས་ཀྱི་དགེ་བའི་བཤེས་གཉེན་ཆེན་པོ།བསྟན་པ་ཐམས་ཅད་གྲུ་བཞི་ལམ་གྱིས་འཁྱེར་མཁས་པའི་དཔལ་ལྡན་བླ་མ་དམ་པ་ ༧ རྗེ་བཙུན་འཇམ་དབྱངས་རྒྱ་མཚོ་དཔལ་བཟང་བོ་མཆོག་ནི་མདོ་སྨད་ཀན་ལྷོ་ཁུལ་བསང་ཆུ་རྫོང་ཁོངས་ཀྱི་ཁོ་ཚེ་ལྷ་སྡེ་ཞེས་གྲགས་པའི་རུ་མང་ཚོ་བར།ས་ལ་དགེ་བཅུའི་དཔལ་ཡོན་རྫོགས་པ་ཁུ་འདུས་གསེར་གཞུང་ཞེས་གྲགས་པའི་སའི་ཆར་རིགས་རུས་ཆོ་འབྲང་ཕུན་སུམ་ཚོགས་པའི་ཡབ་ཚེ་རིང་དོན་འགྲུབ་དང༌།ཡུམ་སྒྲོལ་མ་སྐྱིད་གཉིས་ཀྱི་སྲས་སུ་བོད་རབ་བྱུང་བཅུ་དྲུག་པའི་ཆུ་བྱ་(ཕྱི་ལོ་༡༩༣༣)ལོའི་ཧོར་ཟླ་བརྒྱད་པའི་ཚེས་བརྒྱད་ཉིན་སྐུ་འཁྲུངས།ཡབ་ཡུམ་གཉིས་ལ་སྲས་མིང་སྲིང་དགུ་ཡོད་པ་ལས་ཁོང་ནི་ཆེ་བ་ཡིན། དགུང་ལོ་བརྒྱད་པ་སྟེ་ལྕགས་འབྲུག་(ཕྱི་ལོ་༡༩ ༤༠)ལོར་བླ་བྲང་བཀྲ་ཤིས་འཁྱིལ་དུ་ཕེབས་ནས་ཁོང་གི་ཁུ་བོ་ཆེ་བ་བརྟན་མཁས་ཀྱི་ཡོན་ཏན་གཉིས་དང་ལྡན་ཞིང་སྐྱེས་སྦྱངས་ཡོན་ཏན་གྱི་རྟོགས་པ་ཀློང་དུ་བརྡོལ་པའི་རྗེ་བཙུན་འཇིགས་མེད་རྒྱ་མཚོའི་དྲུང་དུ་རབ་ཏུ་བྱུང་ཞིང་མཚན་ལ་འཇམ་དབྱངས་རྒྱ་མཚོ་ཞེས་གསོལ།ལོ་དེའི་དཔྱིད་ཆོས་ཆེན་མོར་ཚོགས་ཞུགས་གནང་སྟེ་དགེ་བའི་བཤེས་གཉེན་ཆེན་པོ་རྗེ་འཇམ་དབྱངས་བརྩོན་འགྲུས་མཆོག་དགེ་རྒན་དུ་བསྟེན།སྔ་གཞུག་ཏུ་ཁོང་གི་ཁུ་བོ་རྗེ་བཙུན་འཇིགས་མེད་རྒྱ་མཚོ་དང༌། རྗེ་སྐལ་བཟང་རྒྱ་མཚོ་རྣམ་གཉིས་གཙོས་རྗེ་བཙུན་བསྟན་འཛིན་རྒྱ་མཚོ་དང༌།རྗེ་སྦྱིན་པ་རྒྱ་མཚོ་ལ་སོགས་པའི་བཤེས་གཉེན་དམ་པ་མང་བོ་བསྟེན་ནས་མདོ་ཕྱོགས་བཀའ་པོད་ཆེན་པོ་ལྔ་དང༌།སྔགས་ཕྱོགས་རྒྱུད་སྡེ་བཞི་དང་བཅས་པའི་རྒྱ་བོད་ཀྱི་གཞུང་ཆེན་མང་བོར་དཔེ་གཟིགས་དོགས་གཅོད་རྒྱ་ཆེར་མཛད་ཅིང་དགོངས་དོན་བྱང་ཆུབ་པར་གནང་བས་གཞན་དྲིང་མི་འཇོག་པའི་མཁས་པ་ཆེན་པོའི་གོ་འཕང་བརྙེས།ཐུན་མོང་བའི་རིག་གནས་སུམ་རྟགས་དག་གསུམ་དང༌། སྒྲ།སྙན་ངག སྡེབ་སྦྱོར། སྨན། སྐར་རྩིས་དང་ནག་རྩིས།ས་དཔྱད་སོགས་ཀྱང་དཔྱིས་ཕྱིན་པར་སྦྱངས། དེ་ལྟར་མདོ་སྔགས་རིག་གནས་མཐའ་དག་ལ་སློབ་གཉེར་གནང་སྐབས་སྔ་གཞུག་ཏུ་སྐྱབས་འགྲོ་ཆོས་སྤྱོད་ལ་སོགས་པའི་སྐོར་གང་མང་དང༌།བསྟོད་ཆེན་བཞི། བསྡུས་གྲྭའི་རྩ་ཚིག བསྡུས་གྲྭའི་མཐའ་དཔྱོད།བློ་རྟགས་གཉིས་ཀའི་མཐའ་དཔྱོད། རྟགས་རིགས་རང་ལུགས། གྲུབ་མཐའ་རྩ་བ། གྲུབ་མཐའ་རིན་ཆེན་ཕྲེང་བ།ས་ལམ་རྣམ་བཞག་ཐེག་གསུམ་མཛེས་རྒྱན། དོན་བདུན་ཅུའི་མཐའ་དཔྱོད་མི་ཕམ་བླ་མའི་ཞལ་ལུང༌། རྣམ་འགྲེལ་རྩ་བ།འགྲེལ་བ་དོན་གསལ། རྒྱན་འཇུག་གཉིས། རྒྱུད་བླ་མ། སྤྱོད་འཇུག་ཆེན་མོ། ཀུན་གཞིའི་རྩ་བ།ཕར་ཕྱིན་མཐའ་དཔྱོད་ཀྱི་སྟོད་ཆ་ཡོངས་རྫོགས། སྐབས་བཞི་བའི་མཐའ་དཔྱོད་སྡོམ་དང་བཅས་པ།དྲང་ངེས་ལེགས་བཤད་སྙིང་བོ། གསེར་ཕྲེང་སྐབས་དང་བོ་ལས་ཤོག་ལྡེབས་བརྒྱ་ཕྲག་ལྷགགསེར་ཕྲེང་སྐབས་གསུམ་པ། རྟེན་འབྲེལ་ལུང་རིགས་བང་མཛོད། བསམ་གཟུགས་ལེགས་བཤད་བུམ་བཟང༌།དབུ་མ་ལུང་རིགས་སྒྲོན་མེའི་སེམས་བསྐྱེད་ལྔ་བ་ཡན། འཇུག་ཊཱིཀ་གསལ་བའི་མེ་ལོང༌། མཛོད་རྩ་སྡོམ་གཉིས།འདུལ་སྡོམ། དབྱངས་ཅན་སྒྲ་མདོ། སྨན་གྱི་རྒྱུད་ཆུང་གསུམ་ལས་ཉེར་མཁོའི་སྐོར་ཤོག་ལྡེབས་བཞི་བཅུ་ལྷག་སོགས་གཞུང་ལུགས་མང་བོ་ཐུགས་འཛིན་བྱང་ཆུབ་པ་གནངས།
དགུང་ལོ་ཉེར་གསུམ་པ་སྟེ་ཤིང་ལུག་(ཕྱི་ལོ་༡༩༥༥)ལོར་མཁས་མང་འདུས་པ་འབུམ་སྡེའི་དབུས་སུ་ཕར་ཕྱིན་སྟོན་མོའི་དམ་བཅའ་ཕུལ་བས་མཁས་གྲགས་ཀྱིས་ས་སྟེང་ཁྱབ།
དགུང་ལོ་ཉེར་དྲུག་པ་སྟེ་ས་ཁྱི་(ཕྱི་ལོ་༡༩༥༨)ལོར་དུས་ཟིང་གི་དབང་གིས་དགོན་པར་བཞུགས་མ་ཐུབ་པར་ཕྱི་ལོགས་སུ་བཞུགས་དགོས་བྱུང༌།
དགུང་ལོ་སུམ་ཅུ་བ་སྟེ་ཆུ་སྟག་(ཕྱི་ལོ་༡༩༦༢)ལོར་ཕྱིར་དགོན་པར་ཕེབས་ནས་ཡོངས་ཀྱི་དགེ་བའི་བཤེས་གཉེན་ཆེན་པོ་རྗེ་བཙུན་བསྟན་འཛིན་རྒྱ་མཚོའི་དྲུང་དུ་བསྙེན་རྫོགས་ཀྱི་སྡོམ་པ་བཞེས།
དགུང་ལོ་སོ་གཅིག་པ་སྟེ་ཆུ་ཡོས་(ཕྱི་ལོ་༡༩༦༣)ལོར་སྨོན་ལམ་རབ་འབྱམས་པའི་མཚན་བཏགས་བཞེས།དེ་ནས་རིམ་གྱིས་ལོ་བཅུའི་གོད་ཆག་གི་འགོ་བརྩམས་པས་དགོན་པའི་ནང་རྒྱུན་བཞུགས་གནང་མ་ཐུབ་པར་ལྷ་སྡེ་ཕྱོགས་ཡས་མས་སུ་བཞུགས་དགོས་བྱུང་ནའང་ཉེས་ལྟུང་ཕྲ་མོས་ཀྱང་མ་གོས་པར་དམ་སྡོམ་སྤྱན་འབྲས་ལྟར་བསྲུང་ངོས་ནས་ཐོས་བསམ་གྱི་རྒྱུན་སྐྱོང་མུས་སུ་བཞུགས།
དགུང་ལོ་ཞེ་གཉིས་པ་སྟེ་ཤིང་སྟག་(ཕྱི་ལོ་༡༩༧༤)ལོར་ཕྱག་ཡུལ་ཁོ་ཚེ་རུ་ཕེབས་ནས་ལྷ་རྗེའི་བརྟུལ་ཞུགས་བཞེས་ཏེ་ཕྱོགས་ཀྱི་ནད་པ་མང་པོ་ན་བའི་སྡུག་བསྔལ་ལས་བསྒྲལ།
དགུང་ལོ་ཞེ་དྲུག་པ་སྟེ་ས་རྟ་(ཕྱི་ལོ་༡༩༧༨)ལོར་སྲིད་ཇུས་ཇེ་བཟང་དུ་སོང་བ་དང་བསྟུན་ནས་ཕྱིར་བླ་བྲང་དུ་ཕེབས་ནས་ལྷ་སྡེ་གོང་འགབ་སོགས་སུ་སྔར་འཕྲོའི་དཔེ་ཁྲིད་ཀྱི་རྒྱུན་བསྐྱངས།སྔ་གཞུག་ཏུ་རྡོ་རྗེ་འཆང་རྗེ་བཙུན་འཇིགས་མེད་འཕྲིན་ལས་རྒྱ་མཚོ་དང༌། པཎ་ཆེན་ཡོངས་འཛིན་རྗེ་བསང་ཁོག་འཇིགས་མེད་ཚང་དང༌།རྗེ་ལྷ་མོ་ཚུལ་ཁྲིམས་རྒྱ་མཚོ། འཇམ་དབྱངས་བླ་མ་རྗེ་བཙུན་འཇིགས་མེད་བསྟན་པའི་དབང་ཕྱུག རྗེ་ལ་མོ་ཡོངས་འཛིན་རིན་པོ་ཆེ། རྗེ་དམེ་ཤུལ་འཇིགས་མེད་རྒྱ་མཚོ།རྗེ་བཙུན་བསམ་གཏན་རྒྱ་མཚོ། རྡོ་རྗེ་འཆང་དཀོན་མཆོག་མཁྱེན་རབ་རྒྱ་མཚོ་སོགས་རྡོ་རྗེ་འཆང་དངོས་དུ་མའི་ཞབས་དྲུང་དུ།དུས་འཁོར་དབང་ཆེན། མི་ཏྲ་བརྒྱ་རྩ་དང་རྡོ་རྗེ་འཕྲེང་བ། བདེ་མཆོག་རབ་འབྱམས། རྔོག་དཀྱིལ་བདུན།བདེ་གསང་འཇིགས་གསུམ། སྒྲུབ་ཐབས་རིན་འབྱུང༌། སྒྲུབ་ཐབས་རྒྱ་མཚོ། བ་རི་བརྒྱ་རྩ། སྣར་ཐང་བརྒྱ་རྩ།ཞལ་རྣམ་འགྱུར་བཅུ་བདུན། གསེར་ཆོས་བཅུ་གསུམ། འཇམ་དབྱངས་ཆོས་སྐོར། མགོན་བཀའ་བཅུ་གསུམ།སྟག་ཕུའི་དག་སྣང༌། རྣམ་སྲས་བཀའ་བཅོ་ལྔ། གྲུབ་ཆེན་བརྒྱད་ཅུའི་རྗེས་གནང་སོགས་སྤྱི་ཟུར་གྱི་དབང་དང་རྗེས་གནང་སྟོང་ཕྲག་ལྷག་གསན་པ་དང༌།གཞན་ཡང་བསྟན་འགྱུར་ལས་ལུང་གང་ཡོད་དང༌། རྗེ་ཡབ་སྲས་གསུམ་དང་ཀུན་མཁྱེན་ཡབ་སྲས་སོགས་ཀྱི་བཀའ་འབུམ་གྱི་བཀླགས་ལུང་དང་ཁྲིད་བཤད་ལུང་སོགས་ཆོས་རྒྱུན་དཀོན་པ་མཐའ་དག་ཆེད་གཉེར་གྱིས་གསན་བཞེས་མཛད་པ་སོགས་དམ་པ་གང་གིས་སྐུ་ཚེ་གང་བོར་ལྟོ་གོས་གཏམ་གསུམ་ལ་གྱོང་བསྐུར་ནས་གཞུང་ལུགས་རབ་འབྱམས་ལ་ཐོས་བསམ་དཔྱིས་ཕྱིན་པར་མཛད་ཅིང༌།དབང་ལུང་མན་ངག་སོགས་ཟབ་རྒྱས་གདམས་པ་བྱེ་བའི་གཏེར་མཛོད་དུ་གྱུར།
དགུང་ལོ་ལྔ་བཅུ་བ་སྟེ་ཆུ་ཁྱི་(ཕྱི་ལོ་༡༩༨༢)ལོར་བླ་བྲང་དགོན་པའི་དོ་དམ་ཁང་དུ་ཕེབས་ནས་བླ་མ་དང་གྲྭ་ཚང་ལ་ཞབས་ཞུ་གང་ལེགས་བསྒྲུབས་ལ།ཁྱད་པར་དུ་འདི་ནས་བཟུང་གཞུང་བཀའ་པོཏ་ལྔའི་དཔེ་ཁྲིད་ཆུ་བོའི་རྒྱུན་བཞིན་གནང་སྟེ་གོད་ཆག་གི་སྐབས་སུ་འཆད་ཉན་བཤད་སྒྲུབ་ཀྱི་བྱ་བ་ཉམས་རྒུད་དུ་གྱུར་པ་མཐའ་དག་སླར་གསོ་མཛད་པ་སོགས་ཆེས་གཞལ་དུ་མེད་པའི་བཀའ་དྲིན་བསྐྱངས།
དགུང་ལོ་ང་གསུམ་པ་སྟེ་མེ་སྟག་(ཕྱི་ལོ༡༩༨༦)ལོར་ཀན་སུའུ་ཞིང་ཆེན་ནང་བསྟན་སློབ་གླིང་གསར་ཚུགས་སྐབས་ནས་བཟུང་ད་ལྟའི་བར་དགེ་རྒན་གྱི་འགན་བཞེས་ཏེ་མཛོད་དང་དབུ་ཕར།ལམ་རིམ་སོགས་ཀྱི་དཔེ་ཁྲིད་ཟབ་རྒྱས་གནང༌།
དགུང་ལོ་རེ་གཅིག་པ་སྟེ་ཆུ་བྱ་(ཕྱི་ལོ་༡༩༩༣)ལོར་སློབ་གླིང་གིས་ཁོང་ལ་ཅའོ་ཧྲིའུ་སྟེ་སློབ་དཔོན་ཆེན་མོའི་མཚན་གནས་ཕུལ།
དགུང་ལོ་ང་བདུན་པ་སྟེ་ས་སྦྲུལ་ལོ་ནས་ལོ་ངོ་གསུམ་གྱི་རིང་ལ་གསོ་རིག་གཞན་ཕན་གླིང་གི་ཁྲི་ཁུར་བསྐྱངས་ཤིང་དཔལ་ལྡན་རྒྱུད་བཞི་དང་ལམ་རིམ་སོགས་ཀྱི་ཁྲིད་གནང་བར་མ་ཟད་བསྙེན་བཀུར་གཟབ་རྒྱས་ཕུལ།དགུང་ལོ་རེ་གསུམ་པ་སྟེ་ཤིང་ཕག་ལོར་དཔལ་ལྡན་རྒྱུད་སྨད་གྲྭ་ཚང་གི་ཆོས་ཁྲིར་བཞུགས་ཤིང་འགྲེལ་བ་བཞི་སྦྲགས་སོགས་ཀྱི་ཟབ་ཁྲིད་རྒྱས་པར་བསྩལ།གྲྭ་ཚང་རིན་པོ་ཆེ་ལ་མཆོད་འབུལ་བསྙེན་བཀུར་ཡང་རྒྱ་ཆེར་ཕུལ།
དགུང་ལོ་དྲུག་ཅུ་བ་དང་རེ་གཉིས་པ་ལ་སྔ་གཞུག་ཏུ་ཐུའུ་བཀྭན་མཆོག་སྤྲུལ་སྐུ་ཕྲེང་བརྒྱད་པ་འཇམ་དབྱངས་བློ་བཟང་བསྟན་པའི་ཉི་མ་དང༌།ཟམ་ཚ་མཆོག་སྤྲུལ་སྐུ་ཕྲེང་བདུན་པ་བློ་བཟང་དཀོན་མཆོག་ནམ་མཁའ་རྒྱལ་མཚན་རྣམ་གཉིས་ཀྱི་ཡོངས་འཛིན་དུ་བཞུགས།
དགུང་ལོ་རེ་དྲུག་པ་སྟེ་ས་སྟག་(ཕྱི་ལོ་༡༩༩༨)ལོར་ཀུན་གཟིགསསྣང་བ་མཐའ་ཡས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་༧ རྗེ་བཙུན་བློ་བཟང་བྱམས་པ་ལྷུན་གྲུབ་ཆོས་ཀྱི་རྒྱལ་བོ་མཆོག་གི་ཡོངས་འཛིན་དུ་ཕེབས་ནས་དཔལ་དུས་ཀྱི་འཁོར་ལོའི་དབང་ཆེན་སོགས་དབང་ལུང་མན་ངག་རྗེས་ཁྲིད་དང་བཅས་པ་བུམ་པ་གང་བྱོའི་ཚུལ་དུ་ཕུལ།
དགུང་ལོ་དོན་གཉིས་པ་སྟེ་ཤིང་སྤྲེལ་(ཕྱི་ལོ་༢༠༠༤)ལོར་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གིས་གདན་ཞུས་ལྟར་སྐབས་དང་བོའི་མཐོ་རིམ་རབ་འབྱམས་པའི་དགེ་རྒན་དུ་ཕེབས།
དགུང་ལོ་དོན་དྲུག་པ་སྟེ་ས་བྱི་(ཕྱི་ལོ་༢༠༠༨)ལོར་ཁྲི་ཆེན་འཇམ་པའི་དབྱངས་སྐུ་ཕྲེང་བདུན་པ་༧ བློ་བཟང་འཇམ་དབྱངས་དགེ་ལེགས་བསྟན་པའི་མཁན་ཆེན་མཆོག་ལ་ཚིགས་སྔ་མ་དགེ་ཚུལ་གྱི་སྡོམ་པ་ལེགས་པར་ཕུལ། སྔ་གཞུག་ཏུ་རྒྱལ་ཡོངས་སྲིད་གྲོས་སྐབས་དགུ་བ་དང་བཅུ་བའི་ཨུ་ཡོན་དང༌།སྲིད་གྲོས་སྐབས་དགུ་བ་དང་བཅུ་བའི་ཨུ་ཡོན་དང༌། སྲིད་གྲོས་ཀན་སུའུ་ཞིང་ཆེན་སྐབས་བདུན་པ་དང་བརྒྱད་པའི་ཨུ་ཡོན། སྐབས་དགུ་བའི་རྒྱུན་ལས་ཨུ་ཡོན།ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ཀན་སུའུ་ཞིང་ཆེན་ནང་བསྟན་མཐུན་ཚོགས་ཀྱི་ཚོགས་གཙོགཞོན་པ།ཀན་སུའུ་ཞིང་ཆེན་ནང་བསྟན་སློབ་གྲྭའི་སློན་དཔོན་ཆེན་མོ་བཅས་ཀྱི་འགན་བཞེས། གསུང་འབུམ་སྐོར་ལ་ཐོར་བུའི་ཚོགས་མང་ཡང་གཙོ་བོར་གྱུར་པ་ནི། 《ཕར་ཕྱིན་སྐབས་ཀྱི་དོགས་སློང་དང་བརྗོད་བྱ་རགས་ཙམ་བཀོད་པ་བླ་མའི་གསུང་རྒྱུན་བདུད་རྩིའི་ཐིགས་པ་ཞེས་བྱ་བ》 དང༌། 《དབུ་མའི་ལེགས་བཤད་ཀུན་ལས་བཏུས་པ་ཞེས་བྱ་བ།》 《བྱང་ཆུབ་སེམས་དཔའི་སྤྱོད་པ་ལ་འཇུག་པའི་རྣམ་པར་བཤད་པ་སྐལ་བཟང་ལེགས་ལམ་བགྲོད་པའི་ཐེམ་སྐས་དཔྱོད་ལྡན་སྤྱི་ནོར་ཞེས་བྱ་བ》 ལ་སོགས་པའི་གསུང་རྩོམ་མང༌།
མདོར་ན་དམ་པ་གང་གིས་བསྟན་འགྲོའི་དོན་ལ་མཛད་རྗེས་རླབས་ཆེན་བསྐྲུན་པའི་ཚུལ་ནི།གདན་ས་ཆེན་པོ་བཀྲ་ཤིས་ལྷུན་པོ་དང༌། མདོ་སྨད་བསྟན་པའི་འབྱུང་གནས་དཔལ་ལྡན་བཀྲ་ཤིས་འཁྱིལ་ལ་སོགས་པའི་དགོན་སྡེ་ཡུལ་གྲུ་མང་པོར་མི་ཏྲ་རྡོར་འཕྲེང་དང༌།སྒྲུབ་ཐབས་རིན་འབྱུང་སོགས་རྒྱུད་སྡེ་བཞིའི་དབང་དང་རྗེས་གནང༌། ཁྲིད་དང་བཤད་ལུང༌། གཞུང་ཆེན་བཀའ་པོད་ལྔ་སྔགས་དང་བཅས་པའི་དཔེ་ཁྲིད་སོགས་དམ་པའི་ཆོས་ཀྱི་བདུད་རྩིས་སྐལ་ལྡན་གྱི་གདུལ་བྱ་མཐའ་དག་ཚིམས་པར་མཛད་ཅིང༌།ཁྱད་པར་དུ་ཁོང་གིས་མཐུན་རྐྱེན་སྦྱར་ཏེ་ཁོ་ཚེ་དགོན་པའི་རིག་གནས་སློབ་གཉེར་ཁང་བཙུགས་པ་དང༌།ཇུན་དཀར་ཚང་གི་ཇོའི་ཁང་ནང་དུ་སངས་རྒྱས་སྟོང་སྐུ་བཞེངས་པའི་མཐུན་རྐྱེན་སྦྱར་བ་སོགས་སྤོང་བ་བསམ་གཏན་དང༌།ཀློག་པ་ཐོས་བསམ། བྱ་བ་ལས་ཀྱི་འཁོར་ལོ་སོགས་ཀྱིས་སངས་རྒྱས་ཀྱི་བསྟན་པ་ལ་མཛད་རྗེས་རླབས་ཆེན་བཞག་དང་འཇོག་མུས་སུ་བཞུགས་པ་ལགས་སོ།།  

                                                                          སྨྲས་པ།  འདི་ལྟར་བགྱིས་པའི་རྣམ་དཀར་འོ་མའི་རྒྱུན།།

བྱང་ཆུབ་ཆེན་པོའི་ཀློང་དུ་འཁྱིལ་བ་གང༌།།

  བསགས་པའི་མཐུ་ལས་དམ་པའི་སྐུ་ཚེ་བརྟན།།

  ཀུན་མཁྱེན་རྒྱལ་བའི་བསྟན་པ་འབར་གྱུར་ཅིག།

             ཅེས་མགོན་པོ་གང་གི་ཐུགས་རྗེའི་གྲིབ་བསིལ་ལ་བརྟེན་ཅིང་འཚོ་བའི་སློབ་བུ་དགེ་འདུན་ཆོས་གྲགས་ཀྱིས་༢༠༠༨ལོའི་ཧོར་ཟླ་༡༡ཚེས་༢༠ཉིན་གུས་ཕུལ།

                                                         རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།                    དྲ་བའི་སྦྲེལ་ཐགhttp://www.tb1025.cn