ཨ་རོལ་ལུང་རྟོགས་བསྟན་པའི་རྒྱལ་མཚན་གྱི་ངོ་སྤྲོད།

ཡོང་ཁུངས།   དགེ་ལུགས་དྲ་བ།     སྤེལ་དུས།  2018-01-11 23:13:30     རྩོམ་པ་པོ།   མི་གསལ།    ཀློག་ཐེངས།  

 ཨ་རོལ་ལུང་རྟོགས་རྒྱ་མཚོ.jpg

    རེབ་གོང་སྐུ་གཞོགས་ཆེན་མོ༧ཨ་རོལ་རྡོ་རྗེ་འཆང་སྐུ་ཕྲེང་གསུམ་པ་བློ་བཟང་ལུང་རྟོགས་བསྟན་པའི་རྒྱལ་མཚན་དཔལ་བཟང་པོ་ནི།མདོ་སྨད་རེབ་གོང་གསེར་མོ་ལྗོངས་ཀྱི་ཆར་གཏོགས་མགར་རྩེ་ཉིན་ནམ་ཨ་བུར་དུ་གྲགས་པའི་འབྲོག་སྡེ་ཁམ་མདངས་ཞེས་པར་མགར་གྱི་རིགས་ལས་མཆེད་པའི་ཨ་བུར་ནང་སོའམ་པེ་ཧུའི་རྒྱུད་ལས་ཡབ་དགེ་འདུན་བསོད་ནམས་དང་ཡུམ་སྒྲོལ་མ་སྐྱིད་གཉིས་ཀྱི་སྲས་སུ་རབ་བྱུང་བཅོ་ལྔ་བའི་ས་བྱི་སྟེ་སྤྱི་ལོ༡༨༨༨ལོར་སྐུ་འཁྲུངས་པ་ཡིན་ཞིང་།དམ་པ་འདི་ཉིད་ཐུན་མོང་མ་ཡིན་པའི་ངོ་བོར་རྒྱལ་ཀུན་སྙིང་རྗེའི་རང་གཟུགས་འཕགས་མཆོག་ཕྱག་ན་པདྨོ་དང་།གྲུབ་མཐའ་ཐམས་ཅད་ཀྱི་ཡང་རྩེ་དཔལ་ལྡན་ཐལ་འགྱུར་བའི་ཤིང་རྟའི་སྲོལ་འབྱེད་ཆེན་པོ་སློབ་དཔོན་སངས་རྒྱས་བསྐྱངས།བཀའ་གདམས་བསྟན་པའི་མེས་པོ་འབྲོམ་སྟོན་རྒྱལ་བའི་འབྱུང་གནས།བོ་དོང་པཎ་ཆེན་ཕྱོགས་ལས་རྣམ་རྒྱལ།རྗེ་དྲུང་མཁས་གྲུབ་བསམ་གཏན་རིན་ཆེན།རོང་སྟོན་མཁན་ཆེན་བློ་བཟང་གྲགས་པ།མགར་རྩེ་ཆོས་རྗེ་ཤེས་རབ་ཉི་མ། གྲུབ་པའི་གཙུག་རྒྱན་རྣམ་འདྲེན་བླ་མ་སྐལ་ལྡན་རྒྱ་མཚོ་རྣམས་ཀྱི་སྤྲུལ་བ་ཡིན་པར་བཤད་ལ། ཡོངས་གྲགས་སུ་རྗེ་འདིའི་སྐུ་ཕྲེང་དང་པོ་ནི་རབ་འབྱམས་གཞུང་བརྒྱའི་མངའ་བདག་ཨ་རོལ་གྲགས་པ་རྒྱ་མཚོ་དང་།གཉིས་པ་ཁྱབ་བདག་འཁོར་ལོའི་མགོན་པོ་སྐྱབས་རྗེ་བློ་བཟང་ལུང་རིགས་རྒྱ་མཚོ།གསུམ་པ་ཡོངས་རྫོགས་བསྟན་པའི་བདག་པོ་རྡོ་རྗེ་འཆང་འདི་ཉིད་ཡིན་ནོ།།

གཡོན་ནས།ཁ་ཀྱཱ་སྐུ་ཕྲེང་གཉིས་པ་བློ་བཟང་འཇམ་དབྱངས་དགེ་ལེགས་རྒྱལ་མཚན་དང་།རྡོ་སྦིས་དགེ་བཤེས།ཨ་རོལ་སྐུ་ཕྲེང་གསུམ་པ་བློ་བཟང་ལུང་རྟོགས་བསྟན་པའི་རྒྱལ་མཚན་བཅས་ཡིན།.jpg

 

གཡོན་ནས།ཁ་ཀྱཱ་སྐུ་ཕྲེང་གཉིས་པ་བློ་བཟང་འཇམ་དབྱངས་དགེ་ལེགས་རྒྱལ་མཚན་དང་།རྡོ་སྦིས་དགེ་བཤེས།ཨ་རོལ་སྐུ་ཕྲེང་གསུམ་པ་བློ་བཟང་ལུང་རྟོགས་བསྟན་པའི་རྒྱལ་མཚན་བཅས་ཡིན།

 

     མཆོག་སྤྲུལ་འདི་ཉིད་འཁྲུངས་མ་ཐག་ནས་ཙོག་པུར་སྤྱན་ཕྱེ་ཞིང་འཛུམ་དང་བཅས་བཞུགས་པ་སོགས་ཡ་མཚན་པའི་སྤྱོད་པ་ཕལ་བའི་ངང་ཚུལ་ལས་འདས་པ་བྱུང་།དེའི་ཚེ་ཡབ་ཀྱིས་ཡི་དམ་སྐྱབས་ཞེས་མཚན་གསོལ།སྐུ་ན་ཕྲ་མོའི་དུས་ཀྱི་རྩེད་འཇོའང་རི་ཁྲོད་འདེབས་པ་དང་ལྷ་ཁང་བཞེངས་པ།མཆོད་པ་འབུལ་བ།ཕྱག་གཉིས་མཉམ་གཞག་མཛད་དེ་ཏིང་ངེ་འཛིན་ལ་བཞུགས་པའི་ཚུལ།གྲོགས་ཀྱི་བྱིས་པ་རྣམས་ལ་ཆོས་འཆད་པ་དང་།ཕྱག་དབང་འཇོག་པ།བུམ་ཆུ་གཏོར་བའི་རྣམ་པ་སོགས་རིང་ནས་ལེགས་མཛད་དེ་དག་ལ་གོམས་པའི་དན་རྟགས་སྐྱེས་ཆེན་དམ་པའི་ཡོན་ཏན་ལྷན་སྐྱེས་སུ་མངའ་བ་དང་།ཕྱིའི་འབྱུང་གི་རྟེན་འབྲེལ་གྱི་སྣང་བ་མངོན་དུ་གྱུར་པ་མང་དུ་མཛད། གཞན་ཡང་ཁོང་ལ་སྐུ་མཆེད༧ངེས་པ་དོན་གྱི་པཎྜི་ཏ་ཆེན་པོ་མར་ནང་རྡོ་རྗེ་འཆང་འཇིགས་མེད་དམ་ཆོས་རྒྱ་མཚོ་མི་ཕམ་དབྱངས་ཅན་དགེས་པའི་རྡོ་རྗེ་དཔལ་བཟང་པོ་འཁྲུངས་ཤིང་།སྐུ་སྲིང་གསུམ་བཅས་མིང་སྲིང་ལྔ་ཡོད་པར་གྲགས། ཁོང་རིན་པོ་ཆེ་དགུང་ལོ་གསུམ་གྱི་སྟེང་རྒྱལ་བའི་དབང་བོ་བཅུ་གསུམ་པ་ཆེན་པོའི་རིགས་ཀྱི་ཅོད་པན་ཡོངས་འཛིན་ཞྭ་དམར་པཎྜི་ཏ་དགེ་འདུན་བསྟན་འཛིན་རྒྱ་མཚོ་དང་དཔལ་རྡོ་རྗེ་འཇིགས་བྱེད་དང་མི་གཉིས་པ་གྲུབ་པའི་དབང་ཕྱུག་ཆེན་པོ༧རྗེ་འཇིགས་མེད་བསམ་གཏན་རིན་པོ་ཆེ་རྣམ་གཉིས་ཀྱི་ལུང་བཞིན།གསེར་ལྗོངས་ཡུལ་གྱི་སྐྱབས་མགོན་དྲུག་པ་ཆེན་པོ་ཤར་ཐམས་ཅད་མཁྱེན་པ༧རྗེ་བཙུན་བློ་བཟང་སྐལ་ལྡན་བསྟན་པའི་རྒྱལ་མཚན་དཔལ་བཟང་པོས་རྗེ་ཨ་རོལ་བློ་བཟང་ལུང་རིགས་རྒྱ་མཚོའི་ཡང་སྲིད་དུ་ཐུགས་ཐག་བཅད།དགུང་ལོ་ལྔའི་སྟེང་རོང་བོ་དགོན་ཆེན་གྱི་དགེ་བའི་བཤེས་གཉེན་ཆེན་པོ་རབ་འབྱམས་པ་བློ་བཟང་དར་རྒྱས་ཡོངས་འཛིན་དུ་བསྟེན་ཏེ། དབྱངས་དང་གསལ་བྱེད་ཀྱི་ཡི་གེ་སྦྱོར་ཀློག་དང་མགོ་སྐྱབས་འགྲོ་ནས་བཟུང་འདོན་ཆ་ཡོངས་རྫོགས་ཐུགས་འཛིན་མཛད་པར་དཀའ་ཚེགས་ཅུང་ཟད་ཀྱང་མེད་པར་ཐུགས་སུ་ཆུད།དགུང་ལོ་བདུན་པའི་སྟེང༧གོང་ས་སྐྱབས་མགོན་ཐམས་ཅད་མཁྱེན་པ་རྗེ་བཙུན་བློ་བཟང་སྐལ་ལྡན་བསྟན་པའི་རྒྱལ་མཚན་དཔལ་བཟང་པོའི་སྤྱན་སྔར།བར་མ་བར་བྱུང་དང་དགེ་ཚུལ་གྱི་སྡོམ་པ་བཞེས་ཏེ་བློ་བཟང་ལུང་རྟོགས་བསྟན་པའི་རྒྱལ་མཚན་དཔལ་བཟང་པོ་ཞེས་མཚན་གསོལ། ལོ་དེར་རོང་བོ་དགོན་ཆེན་བདེ་ཆེན་ཆོས་འཁོར་གླིང་གི་ཆོས་ཁྲིར་མངའ་གསོལ་ཞིང་།མཁས་གྲུབ་བྱེ་བའི་བསྟི་གནས་རོང་དགོན་ཐོས་བསམ་རྣམ་རྒྱལ་གླིང་གི་ཆོས་གྲྭར་གསར་ཞུགས་མཛད་དེ་དགུང་གྲངས་ཉེར་བཞིའི་བར་དུ་རིག་པའི་སྒོ་འབྱེད་བསྡུས་གྲྭ་ནས་བཟུང་གཞུང་ཆེན་བཀའ་པོད་ལྔའི་སྤྱི་དོན་དང་མཐའ་དཔྱོད་ཀྱི་སྟེང་དཔེ་ཁྲིད་ཞིབ་རྒྱས་དང་རྩོད་པ།དོགས་གཅོད།ཐུགས་འཛིན།སྐྱོར་སྦྱངས་སོགས་སློབ་གཉེར་ཤིུན་ཏུ་དམར་བ་མཛད་པས་མཁས་དགུའི་ཡིད་ཀྱི་བརྟན་པ་དབང་མེད་དུ་ཕྲོགས།ཐུགས་བར་ཤིན་ཏུ་ཆེ་བ་དཔེར་ན་སྔ་དྲོ་རེ་ལ་ལེགས་བཤད་སྙིང་བོའི་དཔེ་ཆ་མདའ་ཚད་མ་གསུམ་རེ་སྐྱོར་ཚར་ལྔ་དྲུག་ཙམ་གནང་ན་ཐུགས་ཐོག་ནས་ཤར་མར་འགྲོ་བ་དང་།གང་ཟིན་གཏན་ནས་བསྙེལ་དུ་མེད་པས་གཟུངས་སྤོབས་ཤེས་རབ་ཀྱི་གཏེར་ལ་དབང་འབྱོར་བའི་རང་རྟགས་མངོན་དུ་གསལ། ཞོར་དུ་སུམ་རྟགས་དག་གསུམ་དང་སྒྲ་སྙན་སྨན་རྩིས་སོགས་ཐུན་མོང་བའི་རིག་གནས་མཐའ་དག་ལའང་སྦྱངས་པ་མཐར་ཕྱིན་པ་གནང་།གཞན་ཡང་ཐུན་མོང་མ་ཡིན་པའི་ནང་དོན་རིག་པ་ལས།གསང་སྔགས་རྒྱུད་སྡེ་བཞིའི་ལམ་གྱི་གནད་སྤྱི་དང་བྱེ་བྲག་རྒྱུད་སྡེ་སོ་སོའི་དཀྱིལ་འཁོར་གྱི་ཐིག་དང་ཕྱག་རྒྱ།གར་དང་རོལ་མོ་འབུད་དཀྲོལ་རྡུང་གསུམ་ཚུན་ཆད་ཀྱི་ཕྱག་ལེན་དང་།ཞིབ་ཆ་རྣམས་སོ་སོར་མ་འདྲེས་པར་བཤེས་གཉེན་མཁས་པའི་མདུན་སར་ཞིབ་ཁྲིད་དང་བརྡར་ཤ་ཆོད་པའི་སྦྱང་བ་གཏིང་ཕྱིན་པར་མཛད་པ་སོགས་མདོར་ན་མདོ་སྔགས་རིག་གནས་དང་བཅས་པའི་གཞུང་ལུགས་མཐའ་དག་ཐོས་ཙམ་དང་སྦྱངས་ཙམ་མ་ཡིན་པར།ལུང་དང་རིགས་པའི་ལམ་ནས་ཐོས་བསམ་གྱི་སྒྲོ་འདོགས་ལྷག་ལུས་མེད་པར་བཅད་དེ་མཁས་དགུའི་གཙུག་རྒྱན་དམ་པར་གྱུར།

དགུང་ལོ་ཉེར་གཅིག་པ་ས་སྤྲེལ་ཏེ་སྤྱི་ལོ༡༩༠༨ལོའི་ས་གའི་བཅུ་གཅིག་ཉིན་སྐྱབས་མགོན་ཐམས་ཅད་མཁྱེན་པ་རྗེ་བཙུན་བློ་བཟང་སྐལ་ལྡན་བསྟན་པའི་རྒྱལ་མཚན་དཔལ་བཟང་པོའི་ཞལ་སྔ་ནས་མཁན་སློབ་སྦྲགས་མ་གནང་སྟེ་བརྟན་མཁས་གཉིས་ལྡན་གྱི་དགེ་འདུན་གྲངས་ཚང་བའི་དབུས་སུ་བསླབ་གཞི་ཡོངས་སུ་རྫོགས་པའི་དགེ་སློང་གི་སྡོམ་པ་ལེགས་པར་མནོས།ལོ་སྔ་ཕྱི་འདི་དག་གི་སྐབས་སུ་རྒྱལ་དབང་ཐམས་ཅད་མཁྱེན་པའི་རིགས་ཀྱི་ཅོད་པན་ཡོངས་འཛིན་ཞྭ་དམར་པཎྜི་ཏ་དགེ་འདུན་བསྟན་འཛིན་རྒྱ་མཚོ་དང་ཤར་སྐྱབས་མགོན་དྲུག་པ་ཆེན་པོ་རྗེ་བཙུན་བློ་བཟང་སྐལ་ལྡན་བསྟན་པའི་རྒྱལ་མཚན།གཤིན་རྗེ་གཤེད་ཀྱི་རྣལ་འབྱོར་པ་གྲུབ་པའི་དབང་ཕྱུག་རྗེ་འཇིགས་མེད་བསམ་གཏན།སྐྱབས་མཆོག་ཀིརྟི་རིན་པོ་ཆེ་བློ་བཟང་འཕྲིན་ལས།རོང་བོའི་ཁྲི་ཆེན་རྡོ་རྗེ་འཆང་འཇམ་དབྱངས་ཐུབ་བསྟན་རྒྱ་མཚོ།སྙན་བརྒྱུད་གདམས་པའི་མངའ་བདག་བླ་ཁོ་རྡོ་རྗེ་འཆང་འཇིགས་མེད་འཕྲིན་ལས་རྒྱ་མཚོ་དཔལ་བཟང་པོ།ཆེ་ཤོས་བྱང་ཆུབ་བསྟན་པའི་སྒྲོན་མེ་སོགས་མཁས་གྲུབ་དམ་པ་བཅུ་ཕྲག་ལྷག་གི་ཞབས་པད་ཚུལ་བཞིན་བསྟེན་ཏེ།སྡེ་སྣོད་གསུམ་རྒྱུད་སྡེ་བཞི་ཐུན་མོང་རིག་གནས་དང་བཅས་པའི་དགོངས་དོན་ཐོས་པས་མཐའ་རྒྱ་བཅད།བསམ་པས་གཏན་ལ་ཕབ། སྒོམ་པས་ཉམས་སུ་བཞེས་ཏེ་མཁས་བཙུན་བཟང་གསུམ་འཆད་རྩོད་རྩོམ་གསུམ་དང་འཁོར་ལོ་གསུམ་གྱི་སྒོ་ནས་རྒྱལ་བསྟན་རིན་པོ་ཆེ་སྤྱི་དང་རྒྱལ་བ་བློ་བཟང་གྲགས་པའི་མདོ་སྔགས་ཆོས་ཚུལ་དྲི་བྲལ་གསེར་སྦྱངས་བཙོ་མ་ལྟ་བུ་ཕྱོགས་ཐམས་ཅད་དུ་དར་ཞིང་རྒྱས་པར་མཛད། 

 

ཁོང་གི་གསུང་རྩོམ།

༡.jpg

   གཞན་ཡང་། རྒྱལ་བའི་བཀའ་དང་བསྟན་བཅོས་འགྱུར་རོ་ཅོག་གི་ལྗགས་ལུང་གི་རྒྱུན་གང་བཞུགས་དང་། རྗེ་ཡབ་སྲས་གསུམ་དང་རྒྱལ་དབང་པཎ་ཆེན་སྐུ་ཕྲེང་རིམ་བྱོན། ས་སྐྱ་གོང་མ་རྣམ་ལྔ་སོགས་གྲུབ་མཐའ་རིས་མེད་ཀྱི་སྔོན་བྱོན་མཁས་པའི་དབང་བོ་ཚད་མར་གྱུར་པ་མཐའ་དག་གི་གསུང་འབུམ་གྱི་ལུང་རྒྱུན་གང་བཞུགས་དང་། བྱང་ཆུབ་ལམ་གྱི་རིམ་པའི་ཁྲིད་ཆེན་བརྒྱད་དུ་གྲགས་པ་སོགས་དེང་སྐབས་མདོ་དབུས་ཁམས་གསུམ་ན་དབང་ལུང་ཁྲིད་གསུམ་མན་ངག་སྙན་བརྒྱུད་ཀྱི་གདམས་པ་བར་མ་ཆད་པ་གང་བཞུགས་ཐམས་ཅད་སྐུ་ངལ་ལ་མ་བལྟས་པར་རྩོལ་བ་ཤུགས་དྲག་པོས་གསན་བཞེས་མཛད་པས་ཐོས་པ་རྒྱ་མཚོའི་ཕ་རོལ་ཏུ་སོན་ཅིང་། མན་ངག་རྒྱ་མཚོའི་གཏེར་ལ་མངའ་བསྒྱུར་བའི་ཆོས་ཀྱི་རྒྱལ་པོ་ཆེན་པོར་གྱུར་ཏོ། 

   དེ་ལྟར་ལུང་དང་རྟོགས་པའི་ཡོན་ཏན་ཀློང་དུ་བརྡོལ་ཏེ་མཁས་གྲུབ་བྱེ་བའི་གཙུག་རྒྱན་དུ་གྱུར་ཀྱང་ཆེར་རློམ་དྲེགས་པའི་དྲི་ཙམ་ཡང་མི་མངའ་ཞིང་ཞི་དུལ་སྤྱོད་པའི་རྨད་བྱུང་རྣམ་ཐར་གཙང་མ་ལས་མི་འདའ་བར་རྒྱལ་བ་དགྱེས་པའི་ཚུལ་ཁྲིམས་རྣམ་པར་དག་པའི་དྲི་བསུང་ཕྱོགས་བཅུར་ཁྱབ་པའི་འདུལ་འཛིན་ཆེན་པོ་ལགས། དགུང་གྲངས་ཉེར་ལྔ་བ་ཆུ་བྱི་སྟེ་སྤྱི་ལོ༡༩༡༢ལོར།རོང་བོ་དགོན་ཆེན་གྱི་གསེར་ཁྲིར་མངའ་གསོལ་མཛད་དེ་བགྲང་བྱ་གསུམ་གྱི་རིང་འཆད་ཉན་འགྲིག་ཁྲིམས་སོགས་ཤིན་ཏུ་དམར་བར་བསྐྱངས།དགུང་གྲངས་ཉེར་བརྒྱད་པ་ཤིང་ཡོས་ཏེ་སྤྱི་ལོ༡༩༡༥ལོར་སྐྱབས་མགོན་དྲུག་པ་ཆེན་པོ་དགོངས་པ་ཆོས་དབྱིངས་སུ་ཐིམ་རྗེས།རྡོ་རྗེ་འཆང་འདི་ཉིད་རོང་བོ་དགོན་ཆེན་དུ་སྐྱབས་མགོན་ཐམས་ཅད་མཁྱེན་པའི་རྒྱལ་ཚབ་ཏུ་བཞུགས་ཏེ།སྐྱབས་མགོན་བདུན་པ་ཆེན་པོ་གདན་སར་ཕེབས་པའི་བར་དགོན་ཆེན་གཙོ་བྱས་སྒྲུབ་སྡེ་ལྷ་འབངས་དང་བཅས་པའི་ཆོས་སྲིད་ཀྱི་བྱ་བ་སྤྱིའི་འགན་ཅི་ལྕོགས་ཀྱིས་བཞེས་ཤིང་།ལྷག་པར་ཡང་སྲིད་རིན་པོ་ཆེ་རྩད་གཅོད་དང་བརྟག་ཞུ། མཚན་འབུལ།གདན་ས་ཆེན་པོར་ཞབས་པད་འཁོད་པ་སོགས་ཀྱི་བྱ་བའི་གདུང་ཕྲག་ཏུ་བཞེས།དེ་ནས་དགུང་གྲངས་སོ་ལྔའི་བར་རེབ་གོང་ཕྱོགས་ཀྱི་དགོན་སྡེ་ཆེ་ཆུང་ཤིན་ཏུ་མང་པོར་ཕེབས་ཏེ་དབང་ལུང་བཀའ་ཆོས་མཐའ་ཡས་པ་བསྩལ་ཏེ་དད་ལྡན་འགྲོ་བ་ཀུན་ལ་ཐར་བའི་ས་བོན་བསྐྲུན།དགུང་གྲངས་སོ་དྲུག་བཞེས་པ་ཆུ་ཕག་སྟེ་སྤྱི་ལོ༡༩༢༣ལོར་ཨ་ཚོགས་དཔོན་པོས་དགོན་པ་གསར་འདེབས་ཀྱི་མཐུན་རྐྱེན་དུ་རྟ་ཆེན་བརྒྱ་དང་ལུག་ཆིག་སྟོང་སྦྱར་འོག དཔལ་འཁོར་ལོ་སྡོམ་པའི་ཕོ་བྲང་མདོ་སྨད་རྫོང་བཞིའི་ཡང་རྩེ་གནས་ཆེན་ཙ་རི་དང་བྱིན་རླབས་མཉམ་པའི་གནས་མཆོག་སྐྱིད་པོ་བྲག་དཀར་སྤྲེལ་རྫོང་དུ་ཆོས་སྡེ་ཆེན་ཐོས་བསམ་ཡོན་ཏན་དར་རྒྱས་གླིང་ཕྱག་འདེབས་མཛད་པའི་འགོ་ཚུགས།ཐོག་མའི་དུས་ལ་དགོན་མཚན་དུ་བདེ་ཆེན་ལྷུན་འགྲུབ་ཆོས་རྫོང་ཞེས་གསོལ་བར་གྲགས།

 

                                                       མཁོ་སྤྲོད་པ།  སྤྲེལ་བློ་བཟང་ལེགས་བཤད།

 རྩོམ་སྒྲིག་པ།  ཤེས་རབ་རལ་གྲི།  

གསལ་འདེབས། 

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།  

 

 

དྲ་བའི་སྦྲེལ་ཐགhttp://www.tb1025.cn      

བརྒྱུད་འགོད།