མཁས་གྲུབ་རྟེན་གྱི་གཡོན་དུ་འཇམ་དབྱངས་བདུན་གྱི་བཞི་པ་རྗེ་བློ་གྲོས་ཆོས་སྐྱོང་གི་དངུལ་གདུང་བཀྲ་ཤིས་སྒོ་མང་རྗེ་ཆོས་སྐྱོང་རང་གིས་བཞེངས་ཤིང་རབ་གནས་མཛད་པ་དང༌། ཞྭ་ལུ་བའི་མཆོད་རྟེན་གྱི་གཡས་སུ་བདེ་སྟོང་གི་ཏིང་ངེ་འཛིན་ཟབ་མོ་སྐྱེས་པ་འཇམ་དབྱངས་བདུན་གྱི་ལྔ་པ་བ་སོ་ཆོས་ཀྱི་རྒྱལ་མཚན་གྱི་དངུལ་གདུང་བྱང་ཆུབ་མཆོད་རྟེན་ཁྱད་འཕགས། མཁས་གྲུབ་ཆོས་རྗེའི་རྟེན་གྱི་གཡོན་དུ་རྩེ་ཤར་ཁྲི་གསུམ་དུ་གྲགས་པའི་བྱང་རྩེའི་ཁྲིའི་ཐོག་མ་མཁས་གྲུབ་ཟུང་དུ་འབྲེལ་བ། རྗེ་བདག་ཉིད་ཆེན་པོའི་ཉེ་གནས་ལོ་བཅུ་གཉིས་མཛད་ནས་བྱང་ཆུབ་ཀྱི་སེམས་ཞུས་པས་བདག་པས་གཞན་གཅེས་པའི་བྱང་ཆུབ་སེམས་ཀྱི་གཏེར་ཆེན་པོ་ཧོར་སྟོན་ནམ་མཁའ་དཔལ་གྱི་རྟེན་དངུལ་གྱི་མཆོད་རྟེན་བཀྲ་ཤིས་སྒོ་མང་རྟེན་ཕྲ་སྐུ་སོགས་བཀོད་པས་མཛེས་པ་བྱིན་རླབས་ཅན་འདི་ལགས། དེའི་གཡོན་དུ་འཇམ་དབྱངས་བདུན་གྱི་དྲུག་པ་མཁས་གྲུབ་ཆེན་པོ་བློ་གྲོས་བསྟན་པ་ཞེས་པ་པོ་ཏི་ཆེས་མང་པོར་ཐུགས་བཤད་མཛད་པ། དྭགས་པོ་གྲྭ་ཚང་སོགས་དགེ་འདུན་གྱི་སྡེ་ཆེ་ཆུང་དུ་མ་བཙུགས་པ་དེའི་དངུལ་གདུང་བཀྲ་ཤིས་སྒོ་མང་སངས་རྒྱས་བྱང་སེམས་ཀྱི་སྐུ་གདུང་དུ་མས་སྤྲས་པ་འདི་ལགས།

                  རྒྱ་གུར་གྱི་གོས་འདི་བྱམས་ཆེན་ཆོས་རྗེས་དངུལ་གདུང་མཐོང་བ་དོན་ལྡན་ལ་ཕུལ་བར་ཕྱིས་སུ་ཡར་རྒྱབ་པས་ལེན་འདོད་ཀྱིས་དམག་ལན་གསུམ་བྱས་ཀྱང༌། མཐུ་སྟོབས་དབང་ཕྱུག་འཇམ་དབྱངས་བདུན་པ་སྨོན་ལམ་དཔལ་བས་མགོན་པོའི་གཏོར་ཆེན་གྱི་བཟློག་པར་དེབ་ཐེར་གཞོན་ནུའི་དགའ་སྟོན་ལྟར་ལགས་ལ། ལ་ལས་དེ་དུས་སམ་དེའི་གོང་ནས་ཀྱང་མགོན་ཆོས་ཀྱི་སྐུ་མི་གསལ་ཙམ་རང་བྱོན་བྱུང་བ་རྗེ་སྨོན་ལམ་དཔལ་བས་རི་མོར་བྱས་པར་གྲགས་ཤིང༌། གང་ལྟར་ཡེ་ཤེས་པ་མངོན་སུམ་པ་ལྟར་ཡོད་སྣང༌། རྒྱ་གུར་གྱི་སྒོའི་གཡས་སུ་ཁྲི་རིན་པོ་ཆེ་སངས་རྒྱས་དཔལ་བཟང་གི་དངུལ་གདུང༌། གཡོན་དུ་མཁས་གྲུབ་ཆེན་པོ་སྒོམ་སྡེ་ནམ་མཁའ་རྒྱལ་མཚན་གྱི་དངུལ་གདུང་ཡོད། འདིའི་ཁྲི་པ་སོ་སོའི་རྟེན་གྱི་ལོ་རྒྱུས་གདན་རབས་གཉིས་ལས་བྲིས། ཡངས་པ་ཅན་གྱི་བྱང་གི་གཙང་ཁང་དུ་རྗེ་རང་གིས་རྒྱུ་དང་བཟོ་བོ་ལག་ཆ་ཚོན་སོགས་ལ་བྱིན་རླབས་གནང་ཞིང༌། སྔར་ལྟར་ཕྱག་ཚད་རྗེ་རང་ཉིད་ཀྱིས་བཀོད་པ་གནང་སྟེ། རྒྱུ་གོས་དར་བཟང་པོ་ཁོ་ན་བརྡུངས་པའི་དར་འདག་འབའ་ཞིག་ལས་གྲུབ་པའི་རྡོ་རྗེ་འཇིགས་བྱེད་ཞལ་ཕྱག་ཡོངས་རྫོགས་བཞེངས་པ། འདིའི་རྩ་ཞལ་ནི་རྣམ་ཐར་ཟུར་འདེབས་སུ། གཞན་ཡང་རྡོ་རྗེ་འཇིགས་བྱེད་ཆེན་པོ་བཞེངས་དུས་རྩ་ཞལ་རང་བྱོན་པ་དང་ཞེས་གསུངས་པ་ལྟར་རྩ་ཞལ་རང་བྱོན་པ་དང༌། ཡང་རྣམ་ཐར་ཟུར་འདེབས་ལས། རྡོ་རྗེ་འཇིགས་བྱེད་ཆེན་པོའི་རབ་གནས་ཀྱི་ཉིན་པར་ནམ་མཁའ་དྭངས་པའི་དཀྱིལ་ནས། སྒྲ་ཆེན་པོ་འབྲུག་སྒྲ་ཙམ་ཞིག་བྱུང་ནས་མཆོད་ཁང་དུ་ཞུགས་པ་ཀུན་གྱིས་ཚོར་ལ། དེ་དང་མཚུངས་པའི་གསང་འདུས་རིམ་ལྔ་དང༌། བདེ་མཆོག་རིམ་ལྔའི་རྣལ་འབྱོར་པ་འགས་རྡོ་རྗེ་འཇིགས་བྱེད་ཀྱི་དཀྱིལ་འཁོར་ནམ་མཁའ་གང་བ་ཙམ་ཕྱོགས་བཞི་ཀ་ནས་བྱུང་ནས་ལྡེར་སྐུ་ལ་ཐིམ་པ་སོགས་སུ་གཟིགས་སོ། །ཞེས་གསུངས་པ། རྗེ་བདག་ཉིད་ཆེན་པོ་རང་གིས་རབ་གནས་མཛད་དེ་ཡེ་ཤེས་པ་མངོན་སུམ་དུ་བཞུགས་ཤིང༌། ཐུགས་ཀ་ན་དྲོད་ལྕོག་སྒོང་ཙམ་ཡོད་པར་གྲགས་ལ།

                 དེ་བཞིན་དུ་རྗེ་རང་གི་ཞལ་བཀོད་ལྟར་རྒྱལ་ཚབ་རྗེས་མགོན་པོ་སོགས་བཞེངས་པས་རང་བྱོན་ལྟར་བྱུང་བར་རྣམ་ཐར་ཟུར་འདེབས་སུ་བཤད་པ་འདི་ན་མགོན་ཆོས་གཉིས་སོགས་མངོན་སུམ་ལྟར་རྒྱུ་བའི་ལོ་རྒྱུས་དང་རྟགས་མཚན་མང༌། སྟེང་གི་བློས་བསླང་འདི་ཡང་རྗེ་བདག་ཉིད་ཆེན་པོ་རང་གིས་ཕྱག་ཚད་བྱིན་རླབས་སོགས་མཛད་པས་ལུགས་ཕུད་ལ་ཁཎྜ་ཀཱ་པ་ལ་འཇའ་ཚོན་མ་དང༌། རྡོར་དབྱིངས་ཀྱི་ཡང་རྡོ་རྗེ་རྒྱལ་པོ་དང༌། རྡོ་རྗེ་ཆགས་པ་གཉིས་འཇའ་ཚོན་མར་བྱུང་ཚུལ་ཡང༌། གནས་རྙིང་ཀུན་དགའ་བདེ་ལེགས་ཀྱི་རྗེའི་རྣམ་ཐར་ལས། ཁྱད་པར་དུ་གཞལ་ཡས་ཁང་རྣམས་ཀྱི་ལུགས་ཕུད་ལ་དཔའ་པོ་ཁཎྜ་ཀཱ་པ་ལ་འཇའ་ཚོན་མ་བྱུང་སྟེ། ཞེས་དང༌། ཡང་དེ་ཉིད་ལས། གཞན་ཡང་རྡོར་དབྱིངས་ཀྱི་རྡོ་རྗེ་རྒྱལ་པོ་དང༌། རྡོ་རྗེ་ཆགས་པ་གཉིས་ཀྱང་འཇའ་ཚོན་མར་བྱོན་ནོ། །ཞེས་གསུངས་པ་ལྟར་ཡིན་ལ། སྐུ་འདི་དག་ལ་ད་ལྟ་སོ་སོ་ལ་མཐོང་སྣང་འཇའ་ཚོན་ཡོད་མེད། ཟངས་དང་གསེར་སྐུ་མཐོང་ཚུལ་སྣ་ཚོགས་པ་འབྲས་སྤུངས་འཇིགས་བྱེད་དང༌། གསང་ཕུའི་བསེ་ཁྲབ་པའི་སྐུ་སོགས་དང་འདྲ་བར་སྣང་ལ། བློས་བསླང་གསུམ་ཀའི་གཙོ་བོ་གསུམ་རང་བྱོན་ལྟར་བྱུང་བ་དང། བདེ་མཆོག་གི་གཙོ་བོའི་ཐུགས་ཀ་ནས་དྲོད་རྟ་རྔ་ཙམ་རྗེའི་རྣམ་ཐར་ཟུར་འདེབས་སོགས་ལས་བཤད་ཅིང༌། མཐོང་ཐོས་ཐམས་ཅད་ལ་དངོས་གྲུབ་ཆེན་པོ་སྩོལ་པའི་སངས་རྒྱས་དངོས་ཀྱི་རྣམ་པར་བཞུགས་པ་འདི་ལགས་སོ། །

                                                                                                                   རྩོམ་སྒྲིག་པ། མང་ར་བ།

         གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                    དྲ་བའི་སྦྲེལ་ཐགhttp://www.tb1025.cn