ཚོང་དཔོན་ནོར་བུ་བཟང་བོ་ནི་མེན་རྒྱལ་རབས་སྐབས་ཀྱི་མིང་དུ་གྲགས་པའི་ཚོང་བ་ཡིན་ལ།ད་ལྟའི་མཚོ་སྔོན་ཞིང་ཆེན་གཞོང་ཐང་རྫོང་གི་མི་ཡིན། ཁོང་སྐུ་བལྟམས་དུས་ཡ་མཚར་བའི་རྟགས་མང་བོ་བྱུང་ཞིང་། དེ་ལས་ཀྱང་ཁྱད་མཚར་བ་ནི་ཁོང་གིས་ལག་གཡས་པར་ནས་ལྡོག་གཅིག་བཟུང་ཡོད། ཆེ་ཆུང་ཧ་ལམ་སྲེག་སྒོང་དང་འདྲ་ལ་འོད་གསེར་སྟོང་ལྡན་འཕྲོས་འདུག

ནོར་བུ་བཟང་བོ་དགུང་ལོ་༢༦སྟེང་མཚོ་སྔོན་དང་ཉིན་ཞ། ཞི་ཨན་སོགས་ནས་ཚོང་ལས་གཉེར་འགོ་བརྩམས་ཤིང་མ་འགྱངས་བར་མ་རྩ་མང་བོ་བསགས་ནས་ཚོང་བའི་ཁྲོད་ཀྱི་སྐད་གྲགས་ཀྱང་ཆེ་ཆེར་རྒྱས།དུས་མཚུངས་སུ་ཁོང་གིས་བོད་སྐད་དང་རྒྱ་སྐད།ཧོར་སྐད་སོགས་བྱང་ཆུབ།དགུང་ལོ༣༨སྟེང་ཁོང་གི་ཚོང་ལས་ནང་སོག་དང་ཕྱི་སོག ཞིན་ཅང་སོགས་སུ་རྒྱ་བསྐྱེད།

སྐབས་དེར། འཚོང་རྒྱག་དུས་རྔ་མོང་དང་དྲེལ་ལ་བརྟེན་ནས་ཚོང་ཟོག་སྐྱེལ་འདྲེན་བྱེད་དགོས། ལམ་ཐག་རིང་བའི་རྐྱེན་གྱིས་ས་རུབ་དུས་གང་ལ་ཐོན་ན་དེར་སྒར་བཏབ་ནས་ངལ་གསོ་དགོས། རྔ་མོང་དང་དྲེལ། གཡག་དང་འཁོར་གཡོག་སོགས་ཁྲི་ཁྲག་དུ་མས་གྲུབ་པའི་རྣམ་པ་དེ་ནི་ཇི་འདྲའི་བརྗིད་ཉམས་ཆེ་བ་ལ།ཚོང་བ་མང་བོ་རང་འགུལ་སྒོས་ཁོང་དང་མཉམ་འབྲེལ་བྱས་ཏེ་ཚོང་ལས་གཉེར་བའི་རེ་བ་ཞུས། དུས་དེ་ནས་བཟུང་ནོར་བུ་བཟང་བོ་རྒྱུ་ནོར་མང་པོ་ཐོབ། ཁོང་གིས་རྔ་མོང་སྟོང་ཕྲག་ལྷག་ལ་གསེར་དངུལ་རིན་ཆེན་མང་པོ་བཀལ་ནས་སྡོད་གནས་བསྐྱར་སྐྲུན་བྱས་ཏེ་མིང་ལ་ཕོ་བྲང་ནོར་བཟང་གླིང་ཀ་བཏགས།བསྐྱར་སྐྲུན་རྗེས་ཀྱི་ཕོ་བྲང་ནོར་བཟང་གླིང་ཀའི་ཕྱི་མཁར་ནི་ཞི་ཨན་མཁར་དང་འདྲ་ལ། ཞེང་ཚད་མཛོ་མོ་མཁར་ལས་ཀྱང་མཐུག་པས་བརྗིད་ཉམས་ཧ་ཅང་ཆེ། དེར་བརྟེན་ནས་ནོར་བུ་བཟང་བོའི་མཚན་སྙན་འབྲུག་སྒྲ་ཇི་བཞིན་ཕྱོགས་ཡོངས་ལ་ཁྱབ།

ནོར་བུ་བཟང་བོས་བལ་བོ་ནས་ཚོང་རྒྱག་དུས། བོད་ལྗོངས་དང་བལ་བོའི་ས་མཚམས་སུ་ཧ་ཅང་རྒོད་པོའི་ཇག་རྐུན་སྐོར་ཞིག་གིས་འཚོང་བ་ཚོའི་སྲོག་ལ་རྒྱུན་དུ་གཙེ། ཁོ་ཚོ་རྒོད་དྲགས་པས་བལ་བོའི་རྒྱལ་བོ་ཡང་བྱ་ཐབས་ཅི་ཡང་མེད་པར་གྱུར། ནོར་བུ་བཟང་བོ་ས་དེར་བརྒྱུད་དུས་ཇག་རྐུན་དེ་དག་དང་འཕྲད། ཁོང་གིས་དེ་མ་ཐག་གཞུ་སྟེང་ལ་མདའ་མོ་གསུམ་བཞག་ཏེ་འཕངས་བས་མཉམ་གཅིག་ལ་ཇག་རྐུན་གྱི་འགོ་བ་གསུམ་བསད། དེ་བས་གཞན་དག་གིས་པུས་མོ་སར་བཙུགས་ནས་སྲོག་ཐར་གཏོང་བའི་ཞུ་བ་བྱེད་པ་ལས་བྱ་ཐབས་གཞན་མ་རྙེད།

ནོར་བུ་བཟང་བོས་ཇག་རྐུན་བཟུང་ནས་བལ་བོའི་རྒྱལ་བོར་སྤྲད་པས་བལ་བོ་མི་དམངས་ཀྱིས་ཁོང་ལ་བསྟོད་བསྔགས་ཚད་མེད་བྱས། བལ་བོའི་རྒྱལ་བོ་དགའ་ནས་ཁོང་ལ་གསོལ་སྟོན་རྒྱ་ཆེན་བཤམས། གསོལ་སྟོན་སྐབས་སུ་བལ་བོའི་རྒྱལ་བོས་ཁོང་གིས་དཔའ་ངར་ལ་བསྟོད་བསྔགས་ཚད་མེད་བྱས། ད་དུང་བལ་བོ་ནས་ཚོང་ལས་གཉེར་བའི་རེ་བ་ཡང་ཞུས།

བལ་བོའི་རྒྱལ་བོས་རོགས་སྐྱོར་འོག་ནོར་བུ་བཟང་བོ་འབྱོར་ཕྱུག་ཀླུ་ཡུལ་ལ་འགྲན་པའི་འཚོང་བ་སྟོབས་ཆེན་ཞིག་ཏུ་གྱུར། དུས་དེར་ཁོང་གིས་སྙན་གྲགས་བོད་ཡུལ་ཡོངས་སུ་ཁྱབ་ནས་ཚོང་དཔོན་ནོར་བུ་བཟང་བོར་གྱུར།

ནོར་བུ་བཟང་བོ་ལྷ་སར་ཐེངས་གསུམ་ལ་སོང་བ་དེ་ནི་ཆེད་དུ་རྗེ་ཙོང་ཁ་བར་མཇལ་དུ་སོང་བ་རེད། རྒྱུ་ནོར་དང་མཆོད་རྫས་གྱ་ནོམ་པ་ཁྱེར་བས་ཁོང་རང་རྗེ་ཙོང་ཁ་བའི་ཡོན་བདག་གཙོ་བོའི་གྲས་ཤིག་རེད།

ནོར་བུ་བཟང་བོ་ཐེངས་བཞི་བར་ལྷ་སར་མ་སོང་གོང་རྗེ་ཙོང་ཁ་བའི་ཡུམ་ལ་མཇལ་དུ་སོང་། ཡུམ་གྱིས་རང་གི་བུ་ཆུང་དྲན་དྲགས་པས་སྐྲ་དཀར་ཉག་ཅིག་སྐུར་ཞོར་སྐད་ཅིག་བཏང་། ཨ་མས་ཁྱོད་ཧ་ཅང་དྲན་པས་ཁྱོད་ཨ་མར་སྐོར་ཞིག་རྒྱབ་ན་བཟང་ཟེར།

རྗེ་ཙོང་ཁ་བའི་ཨ་མས་བསྐུར་བའི་སྐྲ་དཀར་དང་སྐད་ལ་ཉན་རྗེས་སེམས་སྡུག་ཚད་མེད་བྱུང་ཡང་། ད་ནི་དགེ་ལུགས་པ་གསར་འབྱེད་བྱེད་པའི་གནད་འགག་གི་སྐབས་ཡིན་པས་ཨ་མར་བལྟ་རུ་འགྲོ་མི་ཐུབ།ཨ་མ་དྲན་དྲགས་པའི་སེམས་སྡུག་གིས་ཁོང་ལ་སྣ་ཁྲག་མང་བོ་བཞུར། སྐབས་དེར་ཁོང་གིས་སྣ་ཁྲག་དང་རྫས་གཞན་བསྲེས་ནས་རང་གི་སྐུ་འདྲ་ཞིག་བྲིས། དེ་ནོར་བུ་བཟང་བོར་བསྐུར་ཞོར་འདྲ་འདི་རིག་ན་ང་དང་ངོ་མཐུག་པ་གཅིག་འདྲ་ཡིན། འདྲ་འདིའི་ཁྱེད་ལ་ཨ་མ་ཞེས་འབོད་སྲིད་ལ་ད་དུང་ཉིན་ཞག་དྲུག་ལ་ཁ་བརྡ་ཡང་བྱེད་ངེས་ཞེས་པའི་སྐད་ཞིག་ཀྱང་བསྐུར།

ནོར་བུ་བཟང་བོས་རྗེ་ཙོང་ཁ་བའི་ཨ་མར་སྐད་དང་འདྲ་འཕྲོད་པས།ཨ་མ་དགའ་དྲགས་ནས་རྗེ་ཙོང་ཁ་བ་འཁྲུངས་སར་སྐྱེས་པའི་ཙན་དན་ཤིང་དེའི་མགོར་རས་གུར་ཕུག བུ་ཆུང་གིས་བསྐུར་བའི་འདྲ་དེ་རས་གུར་དེའི་ནང་ནས་བཤམས།ནོར་བུ་བཟང་བོ་དགུང་ལོ་༩༠སྐྱེས་སྐར་སྟེང་རྗེ་ཙོང་ཁ་བའི་དགེ་ཕྲུག་ཆེ་བ་ཆོས་ཀྱི་རྒྱལ་བོས་ཁོང་ལ་ཚེ་རིང་གི་དབང་སྐུར།

དབང་སྐུར་ཚར་རྗེས་ཁོང་གཉིས་ཀ་ནོར་བཟང་གླིང་ག་ནས་འཆམ་འཆམ་བྱེད་དུས་ཙན་དན་གྱི་སྡོང་མགོ་ནས་ཁྭ་ཏ་བསྟུད་མར་ཐེངས་གསུམ་གྲགས་རྗེས་ཁ་ནས་གསེར་མདོག་གི་འོད་སྐྱུག

མི་འགྱངས་བར་ནོར་བཟང་གླིང་ག་ཧྲིལ་བོ་གསེར་མདོག་གི་འོད་ཀྱིས་བཀང་། ལྟས་བཟང་དེ་མཐོང་བས། ནོར་བུ་བཟང་བོས་ཆོས་ཀྱི་རྒྱལ་བོར་འདི་རྐྱེན་ཅི་ཡིན་པའི་རྒྱུན་མཚན་དྲིས། ཆོས་ཀྱི་རྒྱལ་བོས་འདི་ནི་ཁྱེད་ཀྱི་གླིང་ག་མི་འགྱངས་བར་དགོན་པར་འགྱུར་བའི་བཀྲ་ཤིས་ལྟས་བཟང་ཡིན་པ་བཤད།

ནོར་བུ་བཟང་བོ་ཧ་ཅང་དགའ་ནས་ཆོས་ཀྱི་རྒྱལ་བོར་དགོན་པར་མིང་ཞིག་སྩོལ་བའི་རེ་བ་ཞུས། ཆོས་ཀྱི་རྒྱལ་བོས་འདི་ནི་ཁྭ་ཏ་དེར་རག་ལས་བས་མིང་ལ་ཁྭ་ཏའི་ཁ་བབས་ཞེས་བཏགས། དེང་སྐབས་གཞོང་ཐང་རྫོང་གི་ཁྭ་ཏའི་ཁ་བབས་དགོན་པ་རེད།

དེར་མཐུད་ནས་ཁོང་གཉིས་ཀྱིས་དགོན་པའི་མ་འོངས་བའི་བཀོད་སྒྲིག་ཕྱོགས་ཡང་བགྲོ་གླིང་བྱས། ཐེངས་འདིར་ནོར་བུ་བཟང་བོ་ཡང་ཁྭ་ཏའི་ཁ་བབས་དགོན་པའི་ཡོན་བདག་གཙོ་བོར་གྱུར། ཁོང་གིས་མི་གྲངས་སྟོང་གཉིས་ལྷག་ཤོང་བའི་འདུ་ཁང་ཆེན་མོ་དང་། བཙུན་ཤག་སྟོང་གཅིག་ལྷག་གསར་བཞེངས་བྱས། ད་དུང་ཁོང་གིས་ཁང་བ་ཆེས་བཟང་ཤོས་ཆོས་ཀྱི་རྒྱལ་བོར་གཟིམས་ཤག་བྱེད་དུ་བཅུགརྗེས་ནས་ནོར་བུ་བཟང་བོས་ཕྱོགས་ཡར་མར་ནས་བཙུན་པ་སྟོང་གཅིག་གདན་དྲངས་ནས་ཁྭ་ཏའི་ཁ་བབས་དགོན་པ་ནས་རྒྱུན་སྡོད་བྱས། བཙུན་པ་ཚོའི་འགྲོ་སོང་ཡོད་ཚད་ཁོ་གཅིག་པོས་མཁོ་སྤྲོད་བྱས། བཀོད་སྒྲིག་བྱས་ཚར་རྗེས། ཁྭ་ཏའི་ཁ་བབས་དགོན་པའི་སྨོན་ལམ་ཆེན་མོ་ཐེངས་དང་པོར་ཆོས་ཀྱི་རྒྱལ་བོས་འགོ་འཛིན་བྱས།

ནོར་བུ་བཟང་བོ་དགུང་ལོ༩༩སོན་པའི་ལོ་དེའི་ལུགས་རྙིང་གི་ཟླ༩པའི་ཚེས༩ཉིན་གྱི་ནངས་མོར། ཁོང་རྒྱུན་ལྡན་དང་འདྲ་བར་མཆོད་པ་མཆོད་བཤམས་བྱས་ཚར་རྗེས་རྗེ་ཙོང་ཁ་བའི་ཐང་ཀ་དེའི་གསུང་བརྗོད་ནས་ཁྱེད་ཀྱི་ལས་དོན་ཡོངས་སུ་འགྲུབ་པས་དགེ་བ་བསམ་གྱིས་མི་ཁྱབ། འུ་གཉིས་དག་པའི་ཞིང་ནས་ཐུག་ཟེར། ནོར་བུ་བཟང་བོས་ཕྱག་འཚལ་ནས་བཀའ་དྲིན་ཞུ་རྗེས་འཇིག་རྟེན་འདི་དང་བྲལ་སོང་། སྐབས་དེར། ཁོང་གིས་ལུས་དང་བྲལ་མ་མྱོང་བའི་ནོར་བུ་བཟང་བོ་དེ་ཁོང་གི་ལུས་ལ་འཐིམས་སོང་།

རྩོམ་སྒྲིག་པ།  ཤེས་རབ་རལ་གྲི། 

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 

དྲ་བའི་སྦྲེལ་ཐགhttp://www.tb1025.cn