སྐུ་འབུམ་རྒྱ་རྩང་སྒོམ་ཆེན་བློ་བཟང་རྒྱལ་མཚན་ནམ་རྒྱ་རྩང་སྒོམ་ཆེན་རིན་པོ་ཆེ་ནི་དུས་རབས་བཅོ་བརྒྱད་པའི་ནང་དུ་སྐུ་འབུམ་ཉེ་འཁོར་ཞིང་སྐྱོང་རྒྱ་རྩང་སྡེ་བར་སྐུ་འཁྲུངས།སྐུ་ན་གཞོན་དུས་ནས་རབ་བྱུང་དགེ་ཚུལ་གྱི་དངོས་པོ་ཡང་དག་པར་བཞེས་ཏེ་རྒྱལ་བའི་བསྟན་ལ་ཞུགས།སྐུ་འབུམ་བྱམས་པ་གླིང་དུ་ཆོས་ཞུགས་གནང་སྟེ་དཔལ་ཆོས་ཀྱི་གྲགས་པའི་ཚད་མ་རྣམ་འགྲེལ་སོགས་བསྡུས་ཚད་ཀྱི་གཞུང་ལ་ཞིབ་ཏུ་སྦྱངས།

དབུས་ལྷ་ལྡན་ཆོས་ཀྱི་ལྗོངས་སུ་ཕེབས་ཏེ་དཔལ་ལྡན་འབྲས་སྤུངས་སྒོ་མང་འགག་ཤིང་བ་བྲག་རྒྱབ་སྔགས་རམས་པ་བློ་བཟང་ཆོས་འཕེལ་སོགས་ཀྱི་དྲུང་ནས་དབུ་ཕར་དང་འདུལ་མཛོད།སྔགས་རྒྱུད་སྡེ་བཞི་སོགས་མདོ་རྒྱུད་གཞུང་ལུགས་ཀུན་ལ་ཐོས་བསམ་རྣལ་མ་མཛད་པས་མཁས་པའི་གྲགས་པ་ཕྱོགས་སུ་རྒྱས།ཡོངས་འཛིན་ཡེ་ཤེས་རྒྱལ་མཚན་གྱི་དྲུང་ནས་ཀྱང་གསུང་ཆོས་མང་དུ་གསན།དབུས་སམ་སྐུ་འབུམ་གང་ཡིན་མ་ངེས་ཀྱང་བཀའ་བཅུའི་གྲྭ་སྐོར་མཛད།

ཀུན་མཁྱེན་འཇིགས་མེད་དབང་བོ་སྐུ་འབུམ་གྱི་ཁྲིར་ཤིང་བྱ་ཕྱི་ལོ1765ལོར་བཞུགས་དུས་བླ་བྲང་རྩེའི་ལྟག་སྒོ་བརྒྱུད་ནས་སྐུ་མདུན་དུ་ནམ་འདོད་ལ་ཕེབས་ཏེ་མདོ་སྔགས་གཉིས་ཀའི་དཔེ་ཁྲིད་ཞུས་ཚུལ་༼མདོ་སྨད་ཆོས་འབྱུང་༽དུ་གསལ།

ལྕགས་བྱི་ཕྱི་ལོ1780ལོར་ཐུའུ་བཀྭན་ཆོས་ཀྱི་ཉི་མའི་དྲུང་དུ་གཙང་ཨ་རིག་སྤྲུལ་སྐུ་བློ་བཟང་བསྟན་པ་རྒྱ་མཚོ་དང་སེམས་ཉིད་སྒོམ་པ་ཡོན་ཏན།ཁུར་ལུག་དཀའ་བཅུ་བཀྲ་ཤིས་དར་རྒྱས་སོགས་དང་ལྷན་དུ་ནཱ་རོ་མཁའ་སྤྱོད་མ་དང་དེའི་བསྐྱེད་རྫོགས་སོགས་དང་།ས་ཕག་ཕྱི་ལོ1791ལོར་ཀུན་མཁྱེན་འཇིགས་མེད་དབང་བོ་མཆོག་སྒོ་མེ་ཆུ་ཚན་ཁ་རུ་ཕེབས་དུས་བཤེས་གཉེན་ངག་དབང་ཉི་མ་སོགས་དང་ལྷན་དུ་འཇིགས་བྱེད་བསྐྱེད་རྫོགས་སོགས་ཟབ་ཆོས་མང་དུ་གསན།མི་ཉག་ཚུལ་ཁྲིམས་བསྟན་པའི་ཉི་མ་ཚང་ལ་ལམ་ཁྲིད་ཞུས་ཚུལ་དེ་ཡི་རྣམ་ཐར་དུ་གསལ།སྐུ་འབུམ་དུ་བུ་སློབ་མང་པོར་གཞུང་ཆེན་པོའི་ཁྲིད་རྒྱུན་རྒྱ་ཆེར་སྤེལ་པས་མཁས་བཙུན་གྱི་སྙན་པ་རྒྱས།

ཐུའུ་བཀྭན་ཆོས་ཀྱི་ཉི་མས་ཆུ་གླང་ཕྱི་ལོ1793ལོར་སྐུ་འབུམ་ཉེ་འཁོར་ཧྭང་སི་སྒང་ངམ་ས་བཟང་ལ་ཁར་སྒོམ་ཁང་གསར་བཞེངས་མཛད་དུས་ཐོག་མར་སྒོམ་ཆེན་པ་འདི་ཉིད་བཞུགས་སུ་བཅུག་ནས་འཚོག་ཆས་ཐུའུ་བཀྭན་སྒར་བས་སྦྱོར་བར་མཛད་ཅིང་།སྐལ་ལྡན་བུ་སློབ་མང་པོར་མདོ་སྔགས་ཀྱི་ཟབ་ཆོས་མང་དུ་གནང་ཚུལ་༼ཐུའུ་བཀྭན་རྟོགས་བརྗོད་པད་མ་དཀར་པོ་༽དང་༽མདོ་སྨད་ཆོས་འབྱུང་༽སོགས་ལས་གསུངས།

ཤིང་ཡོས་ཕྱི་ལོ1795ལོར་ཆེ་ཤོས་སྤྲུལ་སྐུ་ངག་དབང་བཤད་སྒྲུབ་བསྟན་པའི་ཉི་མ་སོགས་ལ་འཇམ་དཔལ་མཚན་བརྗོད་ཀྱི་ལུང་དང་སྒོམ་ཆེན་པ་ཁོང་གིས་བསྒྲིགས་པའི་འཇམ་དབྱངས་གང་བློ་མའི་འདོན་ཐབས་ཀྱི་ཁྲིད་སོགས་གནང་།

ཤིང་བྱི་ཕྱི་ལོ1705ལོར་ལྕང་ལུང་པཎྡི་ཏ་སོགས་ལ་རྒྱལ་དབང་བསྐལ་བཟང་རྒྱ་མཚོའི་གསུང་འབུམ་ལས་ཆོས་ཚན་མང་པོ་བསྩལ་ཚུལ་དེ་ཡི་རྣམ་ཐར་དུ་གསལ།གཞན་ཨ་ཀྱཱ་འཇམ་དབྱངས་རྒྱ་མཚོའི་ཡོངས་འཛིན་དུ་བཞུགས་ཏེ་མདོ་སྔགས་ཀྱི་ཟབ་ཁྲིད་མང་དུ་ཕུལ་ཞིང་།དེ་ཉིད་ཀྱི་༼ལྟུང་བཤགས་ཀྱི་ཆོ་ག་སྡིག་ལྟུང་དྲི་འཁྲུད་གང་གའི་རྒྱུན་བཟང་༽གི་སྦྱར་བྱང་ལས་“བདག་གི་དཔལ་ལྡན་བླ་མ་དམ་པ་མདོ་སྔགས་ཆོས་ཚུལ་རྒྱ་མཚོའི་བང་མཛོད་རིན་ཆེན་བྱང་ཆུབ་སེམས་ཀྱི་མངའ་བདགངེས་པ་དོན་གྱི་ཀུན་སྤངས་ཆེན་པོ་༧རྗེ་བླ་མ་རྒྱ་རྩང་སྒོམ་ཆེན་རིན་པོ་ཆེ་དེ་ཉིད་ནས་”ཞེས་གསུངས།

ཀུན་མཁྱེན་འཇིགས་མེད་དབང་པོའི་རྣམ་ཐར་ལས་སྐུ་འབུམ་དུ་བཞུགས་པའི་བུ་སློབ་འདྲེན་དུས་“བཤེས་གཉེན་ཆེན་པོ་བློ་བཟང་རྒྱལ་མཚན།”ཞེས་གསུངས།ཐུའུ་བཀྭན་བློ་བཟང་ཆོས་ཀྱི་ཉི་མའི་གསུང་འབུམ་དུ་༼ཆོས་སྡེ་ཆེན་པོ་སྐུ་འབུམ་གྱི་དབེན་དགོན་དགའ་ལྡན་ཆོས་སྡིང་དུ་སྒྲུབ་པ་ལ་གཞོལ་བ་རྒྱ་རྩང་དཀའ་བཅུ་བློ་བཟང་རྒྱལ་མཚན་ལ་སྤྲིངས་པའི་ཆབ་ཤོག་རིན་ཆེན་སིལ་མ་༽ཞེས་པ་བཞུགས།ཆབ་ཤོག་ལས་འདི་བའི་མཁས་བཙུན་བཟང་གསུམ་ལ་བསྟོད་པ་དང་དགེ་སྦྱོང་ལ་གཅིག་ཏུ་གཞོལ་བར་བསྔགས་པ་རྒྱ་ཆེར་བརྗོད།ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས་ཀྱང་འདི་བའི་སློབ་མར་ངེས་ཏེ།དེ་ཉིད་ཀྱིས་མཛད་པའི་ཆོས་འབྲེལ་དངོས་ཐོབ་ཀྱི་བླ་མའི་གསོལ་འདེབས་ལས་“ཚེ་བློས་བཏང་སྒྲུབ་བརྒྱུད་བསྟན་པ་སྤེལ།།རྗེ་བློ་བཟང་རྒྱལ་མཚན་ལ་གསོལ་བ་འདེབས།།”ཞེས་གསུངས།

ཀུན་མཁྱེན་འཇིགས་མེད་དབང་བོའི་གསུང་འབུམ་ཉ་དུམ་པའི་ནང་ཁ་བྱང་མི་གསལ་བའི་ཁྲོ་བོའི་བསྟོད་པ་དང་བླ་མར་གསོལ་འདེབས་གཉིས་བཞུགས་པའི་སྦྱར་བྱང་དུ་དད་བརྩོན་རྣམ་དཔྱོད་ཕུལ་དུ་བྱུང་བ་བློ་བཟང་རྒྱལ་མཚན་གྱིས་བསྐུལ་ངོར་སྐུ་འབུམ་བྱམས་པ་གླིང་དུ་སྦྱར་བ་འདི་ཡང་དམ་པ་འདི་ཡིན་པར་སྙམ།དམ་པ་འདི་ཉིད་དུས་སྐབས་དེར་མཁས་བཙུན་བཟང་གསུམ་གྱི་སྙན་པ་དང་གདུལ་བྱ་ཧ་ཅང་རྒྱས།

གསུང་རྩོམ་ཅི་ཡོད་ཆ་མ་འཚལ་ཡང་སྐུ་འབུམ་པར་ཁང་དུ་༼  དཔལ་ཡེ་ཤེས་ཡོན་ཏན་བཟང་པོའི་བསྟོད་པ་ཡན་ལག་དང་བཅས་པ ་༽བཞུགས་ལ།ཁོང་གིས་བསྒྲིགས་པའི་འཇམ་དབྱངས་གང་བློ་མའི་འདོན་ཐབས་ཤིག་ཀྱང་བཞུགས་པར་བཤད།བློ་སྦྱོང་དོན་བདུན་མའི་ས་བཅད་མདོར་བསྡུས་ཀྱི་ཤོལ་དྲིལ་དང་བློ་སྦྱོང་རྩ་ཚིག་ལ་མཆན་བཏབ་པའི་ཤོག་དྲིལ་གཉིས་ཨ་ཀྱཱ་འཇམ་དབྱངས་རྒྱ་མཚོའི་གསུང་འབུམ་སྟོད་ཆའི་འའི་ཆོས་ཚན་དུ་བཞུགས།སྐུ་འབུམ་གྱི་བླ་མཆོད་དུས་བཟང་གི་ཆོ་ག་ཡང་རྒྱ་རྩང་སྒོམ་ཆེན་པ་འདི་ཉིད་ནས་བསྒྲིགས་པར་བཤད།

དུས་རབས་བཅུ་དགུ་བའི་སྟོད་དུ་སྐུ་མྱ་ངན་ལས་འདས།

བུ་སློབ་གཙོ་བོ་ལ་ལུང་རྟོགས་ཡོན་ཏན་མཛོད་འཛིན་ཨ་ཀྱཱ་འཇམ་དབྱངས་རྒྱ་མཚོ་དང་བསྟན་པའི་རྩ་ལག་དམ་པ་མི་ཉག་ཚུལ་ཁྲིམས་བསྟན་པའི་ཉི་མ།གཞུང་ལུགས་རབ་འབྱམས་སྨྲ་བ་ཆེ་ཤོས་ཡོངས་འཛིན་འཇམ་དབྱངས་དབང་རྒྱལ།བསྟན་པའི་གསལ་བྱེད་ཆེན་པོ་ཆེ་ཤོས་པཎྡི་ཏ་ངག་དབང་བཤད་སྒྲུབ་བསྟན་པའི་ཉི་མ།ལྕང་ལུང་པཎྡི་ཏ་ངག་དབང་བློ་བཟང་བསྟན་པའི་རྒྱལ་མཚན།བཤེས་གཉེན་ངག་དབང་སྨོན་ལམ་སོགས་མཁས་བཙུན་བཟང་གསུམ་གྱི་སྐྱེས་ཆེན་མང་དུ་བྱུང་།

ཁྲི་སྐལ་བཟང་བརྩོན་འགྲུས་ཀྱིས་བོད་ཤིང་སྦྲུལ་ཕྱི་ལོ༢༠༢༥ལོའི་ཧོར་ཟླ༢པའི་ཚེས༡༣ཉིན་སྐུ་འབུམ་བྱམས་པ་གླིང་གི་རང་ཤག་ནས་མཚམས་སྦྱོར་བའོ།།

༄༅།།ཆོས་སྡེ་ཆེན་པོ་སྐུ་འབུམ་གྱི་དབེན་དགོན་དགའ་ལྡན་ཆོས་སྡིང་*དུ་སྒྲུབ་པ་ལ་གཞོལ་བ་རྒྱ་རྩང་དཀའ་བཅུ་བློ་བཟང་རྒྱལ་མཚན་ལ་སྤྲིངས་པའི་ཆབ་ཤོག་རིན་ཆེན་སིལ་མ།།

ཐུའུ་བཀྭན་བློ་བཟང་ཆོས་ཀྱི་ཉི་མས་མཛད།

བསླབ་གསུམ་དག་པའི་ཤིང་ཤུན་གོས་འཆང་ཞིང་།།

ལེགས་བཤད་གཏམ་གྱི་རིལ་བ་སྦྲེང་མཁས་ལ།།

ཡང་དག་འཇོག་གི་བདེ་བས་ཡིད་སིམ་པའི།།

དྲང་སྲོང་བསེ་རུར་གནས་པ་གང་དེ་ལ།།

གཞན་སྣང་འདྲེད་པའི་ཟློས་གར་ལྷུར་ལེན་ཅིང་།།

ཆོས་བརྒྱད་གཉེར་མས་འཁུམ་པའི་སྤྲེལ་རྒན་ཞིག།

འདུ་འཛིའི་ཚང་ཚིང་ཁྲོད་ནས་དོན་ལྡན་གྱི།།

སྙན་ཚིག་འབྲས་བུ་སྨིན་པ་འདི་འཐོར་རོ།།

ཚུལ་ཁྲིམས་ཨ་མྲའི་ས་བོན་མ་རུལ་བ།།

སྨོན་ལམ་དྲོད་གཤེར་སྟོབས་ཀྱིས་སྨིན་པ་ལས།།

ཉེར་འཁྲུངས་དལ་འབྱོར་ལྗོན་པ་དུས་མིན་གྱི།།

འཚེ་བའི་རླུང་གིས་བསྐྱོད་པ་མེད་པ་ནས།།

ཐུབ་པའི་དབང་པོས་རང་གི་རྗེས་ཞུགས་པའི།།

མང་ཐོས་དགེ་སྦྱོང་རྣམས་ལ་བསྟི་གནས་སུ།།

ཆེར་བསྔགས་དབེན་པའི་གནས་སུ་ཆོས་དོན་ལ།།

གཅིག་ཏུ་གཞོལ་བ་ཁྱོད་ལ་གློ་བ་དགའ།།

ཚེ་ཡི་ཉི་མ་འདི་སྣང་སྟོང་བའི་མཁར།།

རྒས་ཏེ་དུས་ཀྱི་ནུབ་རིར་ཉེ་བ་བདག།

འདི་སྣང་པདྨའི་དཔལ་(ལ་)རྗེས་ཆགས་པས།།

ཐུན་མཚམས་ཕྱི་མིག་བལྟ་བ་མ་ཁེགས་ཀྱང་།།

རྣམ་དཔྱོད་དུང་དཀར་ཁོག་པ་མ་རྙོངས་པས།།

དོན་གཉེར་སྐྱེ་བོའི་དབུགས་ཀྱིས་བསྐུལ་བ་ན།།

མ་རིག་གཉིད་ལས་སློང་བྱེད་ཆོས་ཀྱི་དབྱངས།།

སྒྲོགས་པས་འཚོ་བ་དོན་མེད་མ་གྱུར་ཙམ།།

འོན་ཀྱང་ལས་ཉོན་སྒོ་ལྕགས་དམ་པོ་ཅན།།

སྲིད་པའི་བཙོན་དུ་སྡུག་བསྔལ་རྣམ་གསུམ་གྱིས།།

ཡུན་རིང་མནར་ཡང་ཐར་འདོད་ད་ལྟའི་བར།།

རྨི་ལམ་ཙམ་དུའང་མེད་འདི་ཀྱེ་མ་བླུན།།

རགས་པའི་སྡུག་བསྔལ་ཙམ་ལས་ཡིད་བྱུང་ཡང་།།

འདུ་བྱེད་སྡུག་བསྔལ་སྤོང་བའི་ཐབས་བྲལ་བས།།

སྲིད་པའི་རྩེ་མོར་སོན་ཡང་སླར་ལོག་ནས།།

དམྱལ་བའི་བུད་ཤིང་བྱེད་འདི་སྐྱོ་བའི་གནས།།

གྲོལ་བར་རེ་ནས་འཆིང་བའི་ཐབས་སྒྲུབ་པ།།

ལོག་པའི་ལམ་གྱིས་བསླུས་ལ་ཅི་ཞིག་གཤུང་།།

ཁོ་བོ་བསྟན་ལ་ཞུགས་ནས་འཁོར་བའི་མཐའ།།

རིང་དུ་བརྟན་པར་བྱེད་འདི་ངོ་རེ་གནོངས།།

ཀྱེ་ཁྱོད་རྣ་བ་ཐོས་པའི་ལམ་བྱང་ཞིང་།།

འཁོར་འདས་སྐྱོན་ཡོན་བློ་གྲོས་མིག་གིས་མཐོང་།།

འཇུག་ལྡོག་གནས་ལ་རྨོངས་པའི་རབ་རིབ་བྲལ།།

དམ་ཆོས་སྒྲུབ་པའི་མཐུན་རྐྱེན་རྣམས་ཀྱང་ཚང་།།

དེ་ཕྱིར་ཆོས་པར་ཁས་འཆེ་ཀུན་གྱི་སྙིང་།།

མ་ཚོར་དཀྲུགས་པ་མི་ཆོས་བརྒྱད་ཀྱི་གདོན།།

ཕྱོགས་སུ་ཉེ་བ་ཙམ་ཡང་མི་ནུས་པའི།།

ཞེན་ལོག་རྡོ་རྗེའི་ར་བ་བརྟན་པོའི་ནང་།།

ཟབ་དང་རྒྱ་ཆེའི་ལམ་གྱི་སྙིང་པོའི་གདུང་།།

རྣམ་དག་དམ་སྡོམ་ཀ་བས་བཏེག་པ་ལ།།

ཆོས་སྤྱོད་རྣམ་བཅུའི་ལྕམ་གྲ་ལེགས་བཀལ་བ།།

ཡང་དག་སྒྲུབ་པའི་ཁང་བཟང་ལ་ཞུགས་ནས།།

སྣང་ཤས་སྦུན་པས་མ་བསླད་ཉམས་ལེན་འབྲུ།།

ཐུན་དང་ཐུན་མཚམས་བྲེ་ཕུལ་གྱིས་གཞལ་བས།།

རང་རྒྱུད་བང་མཛོད་བཀང་སྟེ་བཤུལ་རིང་གི།

ཕྱི་མའི་ལམ་རྒྱགས་ཚགས་སུ་ཚུད་པ་མཛོད།།

གནས་ཆ་ཅུང་ཟད་བརྟན་པའི་རྫིང་བུ་ལ།།

སྣ་ཚོགས་ཉམས་ཀྱི་གཟུགས་བརྙན་གཤིས་ཀྱིས་འཆར།།

དེ་ཡིས་སྨིག་རྒྱུ་ཆུ་རུ་འཁྲུལ་བ་ཡི།།

རི་དྭགས་བཞིན་དུ་བསླུས་པའི་སྒོམ་ཆེན་མང་།།

ལྟར་སྣང་ཕྱོགས་རེའི་ལམ་གྱི་ཁྲོན་པ་ལས།།

སྐུ་གསུམ་ནོར་བུ་འབྱུང་བ་མི་སྲིད་པས།།

བླ་མའི་མན་ངག་གྲུ་གཟིངས་ལ་བརྟེན་ནས།།

ཆ་ཚང་ལམ་གྱི་རྒྱ་མཚོར་འཇུག་པ་འཚལ།།

བློ་བཟང་དགོངས་བཅུད་གདམས་ངག་བདུད་རྩིའི་མཚོ།།

དེང་དུས་ཐིགས་པ་ཙམ་དུ་གྱུར་པ་འདི།།

ལྷག་མེད་འགྱུར་ལ་རིང་པོ་མི་ཐོགས་པས།།

ཅི་ནུས་རྩལ་གྱིས་བགོ་སྐལ་མྱུར་བར་ལོང་།།

བདག་བློ་ལུས་ཕྲའི་རྩལ་གྱིས་ཉེར་བསྐྲུན་པའི།།

འཕྲིན་ཡིག་ལྷ་གོས་སྡེབ་སྦྱོར་ཐག་བཟང་བ།།

དགེ་བའི་སྙན་བསྐུལ་རི་མོ་བཀྲ་བ་འདི།།

མང་ཐོས་ཁྱོད་ལ་ངོ་མཚར་གཟིགས་མོར་སྤྲིངས།།

ཞེས་ལྷ་དར་དྲི་བྲལ་སྤྱོད་འཇུག་དར་ཊིག་བཅས་ཐར་བ་གླིང་ནས།།།།

*དབེན་དགོན་དགའ་ལྡན་ཆོས་སྡིང་ནི་སྐུ་འབུམ་བྱམས་པ་གླིང་གི་གཡོན་རིའི་རི་རྐེད་ན་སྔོན་ཧྭང་སི་སྒང་ངམ་ས་བཟང་ལ་ཁ་རི་ཁྲོད་ཅེས་པ་དེ་ཡིན། 

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn