ཆེན་སྐུ་འཕྲེང་གསུམ་པ༧རྗེ་བློ་བཟང་འཇམ་དཔལ་བསྟན་འཛིན་སེང་གེ་ནི་རབ་བྱུང་བཅུ་བཞི་བའི་ཤིང་སྟག༼1854༽་ལོར་ཁོ་ཚེ༼བསང་ཆུ་རྫོང་ཁོངས༽་རུ་ཡབ་སྦྱིན་པ་རྒྱ་མཚོ་དང་། ཡུམ་ཇོ་མོ་ཐར་གཉིས་ཀྱི་སྲས་སུ་སྐུ་འཁྲུངས། ལྷ་མོ་དང་གཙོས་དགོན་གོང་འོག་གཉིས་ཀྱི་ལས་སྣེ་ཆེ་བགྲེས་རྣམས་གྲོས་མཐུན་གྱིས་རེ་ཞིག་གཙོས་དགོན་པར་ཕེབས་རྒྱུའི་ཐག་བཅད་ལྟར།

དགུང་ལོ་བཞི་བར་དགོན་གོང་འོག་གི་མཁན་སློབ་ཁྲི་གདན་ཟུར་སོགས་ཀྱིས་གཙོ་བྱས་པའི་སེར་སྐྱ་དྲག་ཞན་གྱི་ཚོགས་ཆེན་པོའི་བསུ་བ་སྔ་ཕྱི་སེར་སྦྲེང་དང་བཅས་པས་གཙོས་དགོན་པར་གདན་དྲངས། དགེ་བའི་བཤེས་གཉེན་སྨོན་ལམ་རྒྱ་མཚོ་ཚང་ཡོངས་འཛིན་དུ་བསྟེན། སྐུ་ན་ཕྲ་དུས་ནས་འདོན་ཆ་སོགས་བསླབས་པས་ཚེགས་མེད་པར་ཐུགས་སུ་ཆུད།

དགུང་ལོ་བརྒྱད་པར་ཆོ་འཕྲུལ་སྨོན་ལམ་གྱི་གསུང་ཆོས་ལ་ཡོན་ཏན་གཞིར་གྱུར་མའི་སྟེང་ནས་ལམ་ཡོངས་རྫོགས་ཀྱི་གསུང་བཤད་གནད་དྲིལ་བ་བསྩལ་པས་ཀུན་གྱིས་བསྔགས་པའི་མེ་ཏོག་འཐོར། མེ་ཡོས་ལོར་འཁྲུངས་ཡུལ་དང་གུཤྲཱི་བསྟན་འཛིན་ཆོས་རྒྱལ་གྱི་གདུང་རྒྱུད་དངོས་རྒྱལ་བོ་ཆིན་ཝང་གི་ཨུརྒེར་ཆིབས་ཀྱི་ཁ་ལོ་བསྒྱུར་ཏེ། ཁྲི་ཆེན་གོང་མ་ནས་མཆོད་ཡོན་གྱི་འབྲེལ་ཁྱད་པར་བ་ཡར་ལྡན་དུ་སྤེལ།

དགུང་ལོ་ཉེར་གཅིག་པར་དབུས་སུ་ཆིབས་བསྒྱུར་གནང་སྐབས་གདན་ས་སྟག་ཚང་ལྷ་མོར་ཕེབས། གསེར་ཁྲི་ནང་ཆེན་གྱིས་གཙོས་པའི་སྒར་གྲོང་གིས་ཕེབས་རྫོངས་རྒྱ་ཆེན་ཕུལ། དབུས་ནས་སླར་ཡང་རང་ཡུལ་དུ་ཞལ་ཕྱོགས་ལ་ཉེ་བ་ན། རྒྱལ་མཆོག་བཅུ་གཉིས་པ་ཆེན་པོས་བྱིན་རྟེན་དུ་མ་དང་། གཞུང་ས་ནས་བཀའ་ཤོག་སོགས་བསྩལ། དམ་པ་འདི་ཉིད་ཀྱིས་འགྲོ་བ་རྣམས་ཀྱི་མངོན་མཐོ་ངེས་ལེགས་ཀྱི་ཕན་བདེ་མ་ལུས་པ་འབྱུང་བའི་གནས་གཅིག་པུ་རྒྱལ་བའི་བསྟན་པ་རིན་པོ་ཆེ་བཤད་སྒྲུབ་གཉིས་ཀྱི་སྒོ་ནས་འཛིན་སྐྱོང་སྤེལ་གསུམ་མཛད་དེ་སྐུའི་གདུལ་བྱ་རེ་ཞིག་རྫོགས་པ་ན། དགུང་གྲངས་ཉེར་གསུམ་བཞེས་པ་རབ་བྱུང་བཅོ་ལྔ་བའི་མེ་བྱི༼1876༽་ལོར་གཟུགས་སྐུ་རགས་པའི་བཀོད་པ་བསྡུ་བར་མཛད་དོ། །

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn