གདན་རབས་ཚིགས་བཅད་མ་ལས། 

བྱང་རྒྱུད་འཛིན་མའི་ལྟེ་བར་ནཱ་ལེནྡྲའི། །

དགེ་ལེགས་འབུམ་ཕྲག་ཆགས་པ་ཆོས་ཀྱི་ཞིང་། །

དཔལ་ལྡན་མི་འགྱུར་བཀྲ་ཤིས་ཆོས་སྡིངས་ཀྱི། །

ཐོག་མར་འདེབས་པ་བོ་ནི་འདི་ལྟར་ཏེ། །ཞེས་བྱུང་། 

མདོ་ཁམས་སྨད་ཀྱི་ཡུལ་དེ་ལ་རྨ་ཀླུང་རིང་མོའི་འགྲོས་ཀྱིས་ཕྱེ་བའི་བྱང་རྒྱུད་དུ་གཏོགས་པའི་འཛིན་མའི་དཀྱིལ་འཁོར་གྱི་ལྟེ་བར་ཤར་ཙོང་ཁའི་སྐྱེས་རིའི་ཉེ་འདབས་སུ་དཔལ་ནཱ་ལེནྡྲ་ལྟ་བུའི་སྣོད་བཅུད་ཀྱི་བཀོད་པའི་དགེ་ལེགས་འབུམ་ཕྲག་དཔལ་དུ་ཆགས་པའི་ཆོས་ཀྱི་ཞིང་ཁམས། དཔལ་ལྡན་མི་འགྱུར་བཀྲ་ཤིས་ཆོས་སྡིངས་ཞེས་སྲིད་ན་སྙན་པ་རིང་དུ་སོང་བའི་ཆོས་ཀྱི་སྡེ་ཆེན་པོ་ཐོག་མར་ཕྱག་འདེབས་མཛད་པ་བོ་ནི་འདི་ལྟར་བརྗོད་པར་བྱ་སྟེ། 

གདན་རབས་ཚིགས་བཅད་མ་ལས། 

མ་སྨད་རིགས་བཟང་ཀུན་དགའི་སྐྱེད་ཚལ་དུ། །

ཁམས་གསུམ་འགྲོ་བའི་བསོད་ནམས་ཞིང་གི་མཆོག །

སྐྱབས་གཅིག་མིག་གི་བདུད་རྩིར་ལེགས་འཁྲུངས་ཏེ། །

གོང་མའི་ཡང་སྤྲུལ་ཉིད་དུ་ངོས་འཛིན་མཛད། །ཅེས་བྱུང་། 

འཕགས་མཆོག་འཇིག་རྟེན་དབང་ཕྱུག་མིའི་གར་གྱི་རྣམ་པར་རོལ་པ་༧གོང་ས་རྒྱལ་དབང་བཅུ་གསུམ་པ་ཆེན་པོའི་རིགས་ཀྱི་ཅོད་པན། རང་ཅག་རྣམས་ཀྱི་མེ་ཏོག་ཕོག་པའི་ལྷ་སྐལ་གཅིག་པུ། ༧ རྗེ་ཞྭ་དམར་རིན་པོ་ཆེའི་སྐུ་ཕྲེང་བཞི་བ་རྡོ་རྗེ་འཆང་དགེ་འདུན་བསྟན་འཛིན་རྒྱ་མཚོ་དཔལ་བཟང་བོ་མཆོག་ནི། སློབ་དཔོན་ཆེན་པོ་པདྨ་ཀ་རའི་དགོངས་འདུས་གསེར་ཆོས་སུ་གྲགས་པའི་ལུང་བསྟན་ཉི་ཟླའི་འཁོར་ལོ་ལས། བྱང་སེམས་བདུད་རྩི་འཇོ་ནུས་པའི། །ལུང་རིགས་དེད་དཔོན་བླ་མ་འབྱུང་། །དམར་པོ་ཞྭ་མིང་སྐྱེས་བུའང་འབྱུང་། །མདོ་སྔགས་རིས་མེད་སྒྲོན་མེ་བྱེད། །ཅེས་པ་དང་། དེ་སོགས་པད་འབྱུང་ངའི་སྤྲུལ་པ། །སུ་ཡིས་ཚད་བཟུང་ག་ལ་སྲིད། །ཅེས་རྡོ་རྗེའི་ཚིག་གིས་གསལ་བར་ལུང་བསྟན་ཅིང་། ངེས་པའི་དོན་དུ་མགོན་པོ་འོད་མཐའ་ཡས་པ་དང་འཕགས་མཆོག་ཕྱག་ན་པདྨོ་ངུར་སྨྲིག་གི་རྣམ་རོལ་ཏུ་བྱོན་པ་ཡིན་ལ། དྲང་དོན་གདུལ་བྱའི་སྣང་ངོར་ཡང་། མཉམ་མེད་བུ་རམ་ཤིང་བའི་འཁོར་དུ་དགེ་སློང་ཆོས་ཀྱི་བློ་གྲོས། འཕགས་པའི་གནས་བརྟན་བཅུ་དྲུག་གི་ཞབས་འབྲངས་པ་དགེ་བསྙེན་དྷརྨ་ཏཱ་ལ། སངས་རྒྱས་གཉིས་པ་སློབ་དཔོན་དབྱིག་གཉེན། བུ་སྟོན་ཐམས་ཅད་མཁྱེན་པ། ཇོ་ནང་ཀུན་མཁྱེན་ཆེན་པོ། སྒྲུབ་བརྒྱུད་བསྟན་པའི་མངའ་བདག་སྤྱན་སྔ་བ་གྲགས་པ་བྱང་ཆུབ། རྗེའི་དངོས་སློབ་བློ་གྲོས་བརྟན་པ། ཁྱབ་བདག་སྟག་ཕུ་བ་གར་གྱི་དབང་ཕྱུག་སོགས་འཕགས་བོད་ཀྱི་ལྗོངས་སུ་མཁས་གྲུབ་དམ་པ་མཐའ་ཡས་པའི་རྣམ་པར་བྱོན་ཅིང་། ཁྱད་པར་དུ་ཡོངས་སུ་གྲགས་པའི་ཞྭ་དམར་སྐུ་ཕྲེང་ཐོག་མ་རབ་འབྱམས་གཞུང་བརྒྱ་སྨྲ་བའི་དབང་ཕྱུག་རྗེ་ངག་དབང་འཕྲིན་ལས་ནི། རབ་བྱུང་བཅུ་གཅིག་པའི་ལྕགས་གླང་སྤྱི་ལོ་༡༦༦༡ལོར་འབལ་གཞུང་དུ། ཞྭ་དམར་ཀརྨ་སྐྱབས་ཟེར་བའི་སྲས་སུ་འཁྲུངས། དགུང་ལོ་གཞོན་ནུའི་དུས་སུ་དབུས་འགྱུར་ཆོས་ཀྱི་སྐྱེད་ཚལ་དུ་བྱོན་ཏེ་དཔལ་ལྡན་འབྲས་སྤུངས་ཀྱི་གྲྭ་ཚང་བཞིའི་ཡ་གྱལ་བཀྲ་ཤིས་སྒོ་མང་གི་ཆོས་གྲྭར། བསྡུས་གྲྭ། རྣམ་འགྲེལ། དབུ་ཕར་འདུལ་མཛོད་སོགས་གཞུང་ལུགས་ཆེན་པོ་རྣམས་ལ་ཞིབ་པར་སྦྱངས་པས་རིགས་པ་སྨྲ་བའི་ཡང་རྩེར་སོན། ཀུན་གཟིགས་ལྔ་བ་ཆེན་པོ་ལས་བསྙེན་པར་རྫོགས་ཤིང་མཁས་པ་དང་གྲུབ་པའི་སྐྱེས་ཆེན་དུ་མའི་དྲུང་ནས་དབང་ཁྲིད་མན་ངག་གི་རྒྱུན་མཐའ་ཡས་པ་གསན། ལྷ་ལྡན་སྨོན་ལམ་གྱི་དམ་བཅའ་གྲུབ་རྗེས། རྒྱུད་སྨད་དུ་ཡུན་རིང་འགྲིམ། དུས་དེར་སེ་འབྲས་དགེ་གསུམ་རྒྱུད་གྲྭ་སྟོད་སྨད་རྭ་སྟོད་བཅས་ཀྱི་མཁས་མང་རྒྱ་མཚོ་ལྟ་བུའི་ཁྲོད་ན་རྗེ་འདིའི་རྩོད་ཟླ་ཕེར་བ་དཀའ་བར་གླེང་། ལཱ་མོའི་དཔོན་སློབ་ངག་དབང་བློ་བཟང་བཀྲ་ཤིས་དང་ལྷན་ཅིག་མདོ་སྨད་དུ་བྱོན་ནས་ཀྱང་དགེ་བཤེས་ང་མཁས་ཟེར་བ་མང་བོ་ལུང་རིགས་ཀྱིས་ཚར་བཅད་པའི་སྙན་གྲགས་ཆེ། ལཱ་མོའི་གདན་ས་ཆེན་པོ་གསར་འདེབས་མཛད་དེ་བཀའ་པོད་ལྔའི་འཆད་ཉན་གསར་དུ་བཙུགས་སྐབས་དཔོན་སློབ་ཆེན་མོའི་ཕྱགས་ཕྱིར་བྱོན་པའི་དགེ་བཤེས་ཤིན་ཏུ་མང་ཡང་རྗེ་འདི་ཉིད་སྲས་ཀྱི་ཐུ་བོར་གྱུར་པས། བློ་གསལ་རྣམས་ལ་གཞུང་སོ་སོའི་མཛུབ་ཁྲིད་དང་ཆོས་གྲྭར་ལུང་རིགས་ཀྱིས་བརྡར་ཤ་གཅོད་ཚུལ་ཞིབ་པར་སློབ་པ་གནང་། ཁྱད་པར་ཀུན་མཁྱེན་འཇམ་དབྱངས་བཞད་པ་བདེ་ཆེན་ཆོས་གླིང་དུ་ཕེབས་སྐབས་སྟོན་ཆེན་དང་བོའི་བཞུགས་གྲལ་དུ་སྨྲ་བའི་ཁྱུ་མཆོག་བཀའ་བཅུ་བ་བསེ་ངག་དབང་བཀྲ་ཤིས་པ་དང་མཉམ་དུ་ཚོགས་གླེང་མཛད་པས་ཕྱོགས་གླང་དང་ཆོས་གྲགས་གཉིས་དམ་པའི་ཆོས་ཀྱི་བརྒལ་བརྟག་ལ་གདན་འཛོམས་པ་ལྟ་བུར་གྱུར། བསེ་ཚང་གིས་ཡིག་ཆ་གསར་བའི་ཁས་ལེན་བསྐྱར་བས་རྟོག་གེ་མགོ་མཁྲེགས་ཀྱི་སྤྱི་ལུགས་ཀྱིས་དེ་ལྟར་ན་རྩོམ་པ་བོ་དང་རྩོད་པ་བོ་གཉིས་ཀ་ལ་འཁོར་གསུམ་བྱས་པས། བསེ་ཚང་ཐུགས་འཇིགས་ཉམས་ལྟ་བུས་ཁྱོད་དཀོར་གྱིས་ཚོས་འདུག་ཞུས། དེ་ཀ་རང་། ང་ཚིག་ཟིན་དང་། ཁྱོད་འཚིག་དགོས་ཡིན་པའི་ཕྱིར་གསུངས། ཁོང་བ་ཕྱིས་སུ་བཀྲ་ཤིས་འཁྱིལ་གྱི་ཁྲི་མཛད། གདུལ་བྱ་རྒྱས་པས་ད་ངག་དབང་འཕྲིན་ལས་ཀྱི་ལུང་བསྟན་ཐོག་ལ་བབས་སོང་ཞེས་ཐུགས་སྐྱོ་ཉམས་མཛད་པར་གྲགས་སོ། །དགུང་ལོ་ང་བཞི་བ་ཤིང་རྟ་སྤྱི་ལོ་༡༧༡༤ལོར་གདན་ས་ཆེན་པོའི་མཁན་ཁྲིར་ཕེབས། དེ་ནས་བཟུང་མེ་རྟའི་བར་ལོ་བཅུ་གསུམ་གྱི་རིང་འཆད་ཉན་གྱི་རྒྱལ་མཚན་བསྒྲེངས་པས་འདི་དུས་དགེ་བཤེས་ཤིན་ཏུ་ཐོན་ཆེ་བར་གླེང་། 

སྐུ་ཕྲེང་གཉིས་པ་གྲུབ་པའི་དབང་ཕྱུག་རྗེ་ངག་དབང་འཕྲིན་ལས་དཔལ་བཟང་ནི་རབ་བྱུང་བཅུ་གཉིས་པའི་མཇུག་གི་ལོ་ཚིགས་གང་རུང་ལ་འབལ་དུ་རྒྱ་སྐོར་གྱི་རིགས་སུ་འཁྲུངས། དགུང་ལོ་གཞོན་དུས་ཁྲི་སྤྲུལ་བློ་བཟང་བསྟན་པའི་ཉི་མ་དང་། བཀའ་བཅུ་སྨོན་ལམ་དཔལ་འབྱོར་སོགས་ཡོངས་འཛིན་མཁས་པ་དུ་མའི་དྲུང་ནས་མདོ་སྔགས་ཀྱི་ཟབ་ཆོས་མང་ཙམ་གསན་པར་མངོན། སེང་གདོང་དུང་ཕྱུར་དང་། ནཱ་རོ་མཁའ་སྤྱོད་མའི་སྔགས་དུང་ཕྱུར་ཞལ་འདོན་མཛད་པར་གསུངས། གཞན་ཕན་རླབས་ཆེ་བས་དད་འབུལ་རྣམས་ཆུད་མི་ཟ་བའི་ཕྱིར་འབལ་གཞུང་དུ་སྒྲུབ་པའི་སྡེ་ཞིག་གསར་འདེབས་མཛད་ཅིང་གཙུག་ལག་ཁང་རྟེན་བརྟེན་པ་མང་པོ་གསར་བཞེངས་དང་ཆོས་སྤྱོད་ཉམས་བཞེས་ཀྱི་རྒྱུན་བཙུགས་ཏེ་ཆོས་སྲིད་ཀྱིས་བསྐྱངས་པའི་དགེ་འདུན་པ་བརྒྱ་ཕྲག་ལྷག་འདུས་པར་གྲགས་པ་རྗེས་སོར་དུས་ཀྱི་འཕོ་འགྱུར་གྱིས་ཡུན་རིང་དུ་མ་གནས། འབལ་གཞུང་དུ་དགོན་ཤུལ་ད་ལྟ་ཡོད་པ་ལ་དཔགས་ན་འཕྲིན་ལས་རྒྱས་ཡོད་པར་མངོན་ནོ། །ཞྭ་དམར་ཁྱུང་རྩེ་མཚམས་ཁང་ད་ལྟའང་འབལ་གཞུང་དུ་མཇལ་རྒྱུ་ཡོད་དོ། །

སྐུ་ཕྲེང་གསུམ་པ་མཁས་རྒུའི་གཙུག་རྒྱན་རྗེ་ངག་དབང་བསྟན་འཛིན་རྒྱ་མཚོ་ནི་ཡབ་ཞྭ་དམར་ཡི་དམ་དང་ཡུམ་དཀར་མོ་སྐྱིད་ཟེར་བ་གཉིས་ཀྱི་སྲས་སུ་རབ་བྱུང་བཅུ་བཞི་པའི་ཐོག་མ་མེ་ཡོས་སྤྱི་ལོ་༡༨༠༧ལོར་སྐུ་འཁྲུངས། དོགས་གནས་འགའ་དང་བཅས་གུང་ཐང་འཇམ་པའི་དབྱངས་བསྟན་པའི་སྒྲོན་མེའི་མདུན་དུ་ཐུགས་བརྟག་ཞུས་པར་འདི་ཀ་ངོ་མཐོ་བའི་གསལ་ཆ་གནང་། མར་ཁའི་དཔོན་སློབ་རིན་པོ་ཆེ་ངག་དབང་བསྟན་འཛིན་པའི་དྲུང་ནས་རབ་ཏུ་བྱུང་སྟེ། མཚན་ངག་དབང་བསྟན་འཛིན་རྒྱ་མཚོར་གསོལ། རང་དགོན་གྱི་ཆོས་གྲྭར་བསྡུས་གྲྭ་ནས་སློབ་གཉེར་ལ་བརྩོན་པ་ཤུགས་དྲག་མཛད། དགུང་ལོ་ཉི་ཤུའི་དུས་གཡོན་རུ་དཔོན་སློབ་ངག་དབང་སྙན་གྲགས་ལས་བསྙེན་པར་རྫོགས་ཤིང་དེ་ཉིད་ལས་སུམ་རྟགས། སྙན་ངག དབྱངས་ཅན་སྒྲ་མདོ། སྡེབ་སྦྱོར། རྩིས་དཀར་ནག་སོགས་ཐ་སྙད་རིག་གནས་ཕལ་མོ་ཆེར་སྦྱངས་པས་མཁས་པའི་ཕུལ་དུ་ཕྱིན། རྔ་སྒར་བྱང་ཆུབ་གླིང་དང་ཨོ་བསྭོ་དགོན་གྱི་ཁྲི་བའང་མཛད། 

ཕྱིས་སུ་གོང་ས་ཞབས་དྲུང་རིན་པོ་ཆེ་ནས་གདན་ས་ཆེན་པོའི་མཁན་ཁྲི་འགའ་རེ་མཐར་མ་ཕྱིན་སྟབས་ཁྲི་གེགས་འདུལ་ཕྱིར་རྗེ་ཉིད་ཅིས་ཀྱང་མཁན་ཁྲིར་བཞུགས་དགོས་ཚུལ་གྱི་བཀའ་གསུང་ཕེབས་པས། དགུང་ལོ་ཉེར་ལྔ་བ་ལ་གདན་ཁྲིར་བཞུགས་ཏེ་ལོ་གསུམ་གྱི་རིང་འཆད་ཉན་གྱིས་བསྐྱངས་ཤིང་། དེ་ནས་བཟུང་ཁྲི་བ་རྣམས་ཀྱང་སྐུ་ཚེ་བརྟན་པ་བྱུང་ངོ་། །རྗེ་གསེར་ཁང་བ་ཆེན་པོའི་མདུན་ནས་གང་གི་རྣམ་ཐར་བཞིན་ཀུན་སྤངས་མཛད་རྒྱུའི་སྐྱབས་འཇུག་ཞུས་ནས་ཁོང་གི་ཕྱགས་ཕྱིར་ཕྱོགས་ཡས་མས་སུ་ཕེབས་པ་དང་། དབེན་པའི་རི་སུལ་དུ་མར་ཡང་དག་པའི་ཉམས་བཞེས་གནད་དུ་སྨིན་པ་གནང་། རི་ཁྲོད་དུ་ཕེབས་པ་ནས་སྔ་མོར་ཐུན་ལ་བཞུགས་པ་དང་། ཉི་ཤར་ཙམ་ལ་བརྒྱ་རྩ། སྨན་བླ། སྤྱོད་འཇུག་གསུང་བཞིན་ཏིང་ཕོར་སྟོང་ཕྲག་ཏུ་ཡོན་ཆབ་འབུལ་ཞིང་བརྐྱངས་ཕྱག་མང་པོ་གནང་། སྔ་དྲོར་དཔེ་གཟིགས་དང་། གུང་ཚིགས་དུས་ཆོས་གོས་བསྣམས་ནས་རྟེན་འབྲེལ་བསྟོད་པ་དཀོན་མཆོག་རྗེས་དྲན་མཇུག་ཏུ་ཟས་བསྔོ་ཡོན་སྦྱོང་བཅས་མཛད། སླར་སྨན་ཐུང་སྒོས་ཡོན་ཆབ་སྟོང་འབུལ་དང་བསྟོད་སྤྲིན་རྒྱ་མཚོ་གསུང་བཞིན་འཇམ་དབྱངས་ཀྱི་སྐུ་བརྙན་བརྒྱ་ཕྲག་རེ་པར་འདེབས་པ་གནང་རྗེས་ལམ་རིམ་དང་སྔགས་རིམ་ཤོག་གྲངས་ཉི་ཤུ་རེ་གསུངས། དེ་ནས་དཔེ་གཟིགས་དགུང་ཇའི་འཕྲོར་མཁའ་སྤྱོད་མའི་ཆོ་གའི་སྒོས་ཨོཾ་གསུམ་མའི་བཟླས་པ་མང་ཙམ་གནང་ཞིང་ནམ་གྱི་ཆ་སྟོད་སྨད་ལ་ཉམས་ལེན་གྱིས་དུས་འདའ་བར་མཛད་དོ། །ལམ་རིམ་ཆེན་མོ། སྔགས་རིམ་ཆེན་མོ། ལེགས་བཤད་སྙིང་བོ། བྱམས་ཆོས་སྡེ་ལྔ། སྤྱོད་འཇུག་ཆེན་མོ་སོགས་གཞུང་ཆེན་དུ་མ་ཐུགས་ལ་བཞུགས་ཤིང་རྒྱུན་པར་སྐྱོར་སྦྱང་གནང་། ཟལ་མོ་དགོན་དུ་བཞུགས་དུས་ཡབ་རྗེ་གསེར་ཁང་བས་བཀའ་ཆོས་གནང་སྐབས་སུ་རྗེ་འདི་ལ་སྐུ་གསུང་ཐུགས་རྟེན་སོགས་དངོས་འབུལ་བཅས། ཕྱིན་ཆད་རི་ཁྲོད་སྐྱབས་འཇུག་ཞུ་ནའང་ཞྭ་དམར་ཚང་དང་སྐུ་མཆེད་རྣམ་པ་གཉིས་ལ་ཞུས། ལམ་ཁྲིད་སོགས་བཀའ་ཆོས་རེ་གནང་ནས་བསྟན་འགྲོར་གང་ཕན་རེ་མཛད་དགོས། ངས་ཁྱེད་ལ་གཏད་པ་ཡིན་ཞེས་ཁོང་གི་རྒྱལ་ཚབ་ཏུ་དབང་བསྐུར་བའི་ཞལ་གསུང་ཡང་གནང་ངོ་། །

དགུང་ལོ་སོ་བརྒྱད་པ་ཤིང་འབྲུག་སྤྱི་ལོ་༡༨༤༤ལོའི་སྟོན་རི་བོ་རྩེ་ལྔར་ཆས་ཏེ་སོག་ཡུལ་ཨོ་ཐོག་པེ་ལིའི་སར་འབྱོར། ཤི་ནི་ཇོའི་དགོན་དུ་མྱུར་ལམ་གྱི་ཁྲིད་ཉིན་བཅོ་ལྔར་གནང་། རྩེ་ལྔར་ཕེབས་འཕྲལ་སྐུ་མཚམས་གནང་བ་དབྱར་སྐུ་མཚམས་གྲོལ་ཏེ་གནས་མཇལ་མཛད་སྐབས་ཆིས་ཉན་ཏུང་ཟེར་བའི་སྒྲོལ་མའི་ལྷ་ཁང་དང་། པི་པོ་ཐར་ཟེར་བའི་འོད་དཔག་མེད་ཀྱི་ལྷ་ཁང་ཉིན་ལམ་དྲུག་བདུན་གྱི་ས་ན་ཡོད་པ་དང་། ཕ་དམ་པས་རྒྱ་གར་ནས་གདན་དྲངས་པའི་རྣམ་རྒྱལ་མའི་གཟུངས་ཀྱི་རྡོ་ཡིག་ཕུ་ཟུན་ཏེན་གྱི་ནུབ་ཕྱོགས་སུ་སའི་འོག་ཏུ་ནུབ་འདུག་པ་རྣམས་རྒྱའི་ཡིག་ཚང་ལས་མཁྱེན་ནས་རྩད་བཅད་ཅིང་ངོས་འཛིན་མཛད་དེ་མཇལ་བའི་སྲོལ་བཏོད། དེ་དག་ལ་སོགས་པའི་སྔར་རྒྱུས་མེད་པའི་རྟེན་མང་བོ་ངོས་འཛིན་གནང་། པེ་ཅིན་དུ་ཕེབས་ཏེ་ཙན་དན་ཇོ་བོར་མཇལ་ཞིང་མཆོད་རྫས་དུ་མས་ཉིན་མང་བོར་མཆོད་འབུལ་ངང་ཐུགས་སྨོན་རྒྱ་ཆེན་པོ་གནང་། ཞལ་ནས་ལྟད་མོ་གཞན་ཡོད་སར་ང་མི་འགྲོ་ཡང་སྒྱུ་མ་མཁན་ཡོད་སར་ང་འགྲོ་རྒྱུ་ཡིན། དེ་སྟོང་ཉིད་ཀྱི་ལྟ་བ་ལ་གསོས་འདེབས་བྱེད་ཀྱི་བློ་སྦྱོང་ཡག་པོ་ཞིག་རེད་གསུངས། ཨ་ལགས་ཇ་སག ཆེན་པོ་ཁྲིན་ཝང་། སྟོང་སྐོར་ཧུ་ཐོག་ཐུ། གཞན་ཝང་པེ་ལི་པེ་སི་གུང་ཇ་སག་སོགས་དྲེགས་ལྡན་དུ་མས་གཙུག་ཏུ་བཀུར་ཞིང་འདོད་ཆོས་དུ་མ་ཞུས་པ་རྣམས་སོ་སོའི་འདུན་པ་བཞིན་གནང་། མི་ཆེན་སོ་སོས་རང་རང་གི་ཡུལ་དུ་གདན་འདྲེན་པ་དང་། ཕྱི་ལོག་ནང་ལོག་གར་བཞུགས་ཀྱང་གཟིམ་ཁང་འབུབ་རྒྱུ་སོགས་ཡུན་རིང་བཞུགས་དགོས་ཚུལ་ཅི་ཙམ་ཞུས་ཀྱང་ཞལ་བཞེས་ཡེ་མ་གནང་བས། ཆེན་པོ་དེ་དག་གྲོས་མཐུན་པར་ཁོང་བཞུགས་ཐབས་སུ་གོང་མ་ཆེན་པོར་ཞུ་བ་ཕུལ་ནས། དབུ་བླའི་ཐོབ་བསྩལ་ཏེ་བཞུགས་དགོས་ཀྱི་བཀའ་གནང་རྒྱུ་ཡིན་ཚུལ་གྱི་འཕྲོས་ངེས་འདྲོངས་གསན་འཕྲལ། ང་རི་ཁྲོད་པ་ཞིག་གིས་དེ་འདྲ་ཞིག་བྱས་ཚེ་ངེས་པར་ཞབས་འདྲེན་ཡིན་གསུངས་ཤིང་བྲོས་སྟབས་ཀྱིས་རྒྱ་ཚུགས་བརྒྱུད་དེ་མགར་ཐང་དུ་བྱོན། མི་ཉག་དགེ་བཤེས་ཆེན་པོ་ཚུལ་ཁྲིམས་རྣམ་རྒྱལ་བའི་དྲུང་དུ་གཞུང་ཆེན་དུ་མའི་གཟབ་བཤད་མང་ཙམ་གསན། ལམ་རིམ་སྐོར་ལ་ཁྱེད་ཀྱི་གོ་བ་ལས་ལྷག་ང་ལ་བཤད་རྒྱུ་མེད་གསུངས་ཤིང་ཐུགས་ཤིན་ཏུ་དགྱེས་ཏེ། ང་མི་རྒན་ས་མཐའ་འཁོབ་ཅིག་ཏུ་ཨ་མདོ་སྤྲུལ་སྐུ་ལྟ་བུའི་མཁས་པའི་དབང་ཕྱུག་ཆེན་པོ་ཞིག་དང་འཕྲད་སྙམ་པ་མེད། ངའི་དགེ་ཕྲུག་དགའ་ལྡན་ཐེ་བོ་སྤྲུལ་སྐུ་ཡང་སེ་འབྲས་དགེ་གསུམ་གྱི་མཁས་པའི་མཆོག་ཏུ་གྱུར་པ་ཤེས་རབ་ཆེན་པོ་དང་ལྡན་པ་ཡིན་ཀྱང་ཨ་མདོ་སྤྲུལ་སྐུ་ལྟ་བུའི་གཞུང་དོན་ལ་འཇུག་པའི་ཤེས་རབ་ཟབ་པ་མེད། ད་ངའི་བསམ་དོན་འགྲུབ་པ་ཡིན། ང་ལ་ཡང་ཆོས་འབྲེལ་ཞིག་གནང་དགོས་གསུངས་ནས་ཚུར་ལ་ཆོས་འབྲེལ་ཞུས། ཡོངས་འཛིན་ཡེ་ཤེས་རྒྱལ་མཚན་འདས་ཚུན་ལ་དབུས་གཙང་གི་ལམ་ཁྲིད་ཀྱི་རྒྱུན་ཉམས་འདུག་པ་གསོ་ཨེ་ཐུབ་ཐུགས་ལ་ཟུངས། ཞེས་སོགས་བསླབ་སྟོན་ཀྱང་བསྩལ། འདི་དུས་རང་དགོན་ནས་མཚོ་ཁ་རབ་འབྱམས་པ་སོགས་སླེབས། དབུས་ཕེབས་བཤོལ་ཏེ་ཅིས་ཀྱང་རང་ཡུལ་དུ་ཕེབས་དགོས་ཞེས་ཨུ་ཚུགས་བྱས་ཀྱང་བཤོལ་མ་ཐེབས་པར། ཁྱིའི་ལོར་ཅིས་ཀྱང་རང་དགོན་དུ་སླེབས་པ་བྱེད་ཅེས་དགོངས་གཞི་ཅན་གྱི་ཞལ་བཞེས་གནང་། དེ་ནས་འགའ་དྭགས། ལི་ཐང་། འབའ་ཆོས་རྗེའི་དགོན། ཆབ་མདོ་སོགས་བརྒྱུད་དེ་ཁྱུང་བོ་གཅམ་མདའ་ཟམ་ཁར་ཕེབས། དེ་སྔོན་ལྔ་བའི་ཉི་ཤུ་ནས་སྐུ་ཅུང་མི་བདེ་ཚུལ་མཛད་པ་འདི་དུས་བབས་ཇེ་ལྕིར་སོང་སྟབས། རྒྱ་ཤོད་བན་སྒར་དུ་ཉིན་ལམ་བདུན་ཡོད་པས་ཅིས་ཀྱང་སླེབས་པ་བྱེད་དགོས་གསུངས་ཏེ། དགུང་ལོ་ཞེ་གསུམ་པ་ས་བྱ་སྤྱི་ལོ་༡༨༤༩ལོའི་ཟླ་བ་བཅུ་བའི་ཚེས་ལྔ་ལ་ཕྱགས་བཏེགས། ཚེས་བརྒྱད་ཀྱི་ཉིན་ཞམ་རིང་བ་ཚོས་ནན་ཞུས་བགྱིས་ཏེ་ནགས་གསེབ་ཅིག་ཏུ་ངལ་བསོས་པར་དགོང་མོར་ཞམ་རིང་བ་རྣམས་སྐུ་མདུན་དུ་བསྡུས་ཏེ། ཁྱེད་རྣམས་ཀྱིས་ཀྱང་རང་ཚོད་ཀྱི་ལམ་རིམ་ལ་བག་ཆགས་རེ་འཇོག་ཨེ་ཐུབ་ལྟོས། རྗེའི་ལམ་རིམ་ཆེན་མོ་ལ་བློ་རབ་འབྲིང་ཐ་མ་གང་གིས་བལྟས་ཀྱང་བློ་དང་འཚམ་པའི་གོ་རྒྱུ་རེ་ཡོད་ཅིང་ཉམས་ལེན་བྱེད་ནའང་རང་རང་ཚོད་ཀྱི་བག་ཆགས་འཇོག་ཚུལ་ཡོད་པ་དེའི་ཁྱད་ཆོས་ཡིན། ངས་ཀྱང་ལམ་རིམ་ལ་བག་ཆགས་བཟང་བོ་ཞིག་འཇོག་ཁུལ་བྱས་པ་ཡིན། ལམ་རིམ་ཉམས་སུ་ལེན་ཚུལ་གང་ཡིན་ཞེ་ན། དེ་ལ་གཉིས། ལམ་གྱི་རྩ་བ་བཤེས་གཉེན་བསྟེན་པའི་ཚུལ་དང་། བསྟེན་ནས་བློ་ཇི་ལྟར་སྦྱངས་པའི་རིམ་པའོ། །ཞེས་ས་བཅད་བཀྲམ་སྟེ་སྦྱོར་བས་བསྟེན་ཚུལ་བར་གསུངས་ཤིང་མཇུག་ཏུ་གནས་བཅུའི་དབུ་བསྐུལ་ཏེ་ཐམས་ཅད་ཀྱིས་གསུངས། བཅུ་གཅིག་གི་ཉིན་རྒྱ་ཤོད་བན་སྒར་དང་ཉེ་བར་སླེབས། ཞལ་གསུང་མི་གནང་ཡང་གློ་གཡས་པ་ཕབ་སྟེ་སེངྒེའི་ཉལ་སྟངས་ཀྱིས་བཞུགས་ཤིང་། སྡོང་བོ་བཀོད་པ་ལས་གསུངས་པའི། དགེ་བའི་བཤེས་གཉེན་རྣམས་ནི་བདག་ངན་སོང་ཐམས་ཅད་ལས་སྐྱོབ་པའོ། །ཞེས་སོགས་གསུང་བཞིན་ཞལ་དབུགས་ཀྱི་རྒྱུ་བ་མི་མངོན་པར་གྱུར་ཏེ་མྱ་ངན་ལས་འདས། སྐུ་གདུང་རིན་པོ་ཆེ་རྒྱ་ཤོད་བན་སྒར་དུ་གདན་དྲངས། སྟག་ཕུ་སྤྲུལ་པའི་སྐུ་ནས་ཐུགས་དམ་གསལ་འདེབས་གནང་ཞིང་སྤྲུལ་སྐུ་མྱུར་འབྱོན་ཞིག་ཀྱང་ལྗགས་རྩོམ་མཛད། དགོན་དེ་ཀའི་གྲྭ་བ་རྣམས་ནས་ཉེར་ལྔའི་བར་གདུང་མདུན་དུ་གསང་བདེ་འཇིགས་གསུམ་ཀུན་རིག་སོགས་ཀྱི་བདག་འཇུག་བཞེས། ཞག་བདུན་ནས་ཐུགས་དམ་གྲོལ་རྟགས་བྱུང་ཞིང་དྲོད་ཀྱང་ཡལ། ཉེར་ལྔའི་ཉིན་ཞུགས་མཆོད་ཕུལ་ཞིང་གདུང་རུས་རྣམས་དབུས་སུ་ཞུས་ཏེ་གསེར་ཟངས་ལས་གྲུབ་པའི་བྱང་ཆུབ་མཆོད་རྟེན་ཁྲུ་དོ་བ་ཕྲ་རྒྱན་གྱིས་སྤྲས་པ་བཞེངས་པའི་གཟུངས་སུ་ཕུལ་པ། དགེ་ལྡན་རྣམ་པར་རྒྱལ་བའི་གླིང་གི་ཀླུ་འབུམ་ཁམས་ཚན་གྱི་ཚོམས་སུ་བཞུགས་སོ། །

༈ ཀླུ་རྒྱལ་ནག་པོ་ཆེན་པོའི་འཕྲིན་བཅོལ་བཞུགས་སོ། །

ན་མོ་མཉྫུ་གྷོ་ཥཱ་ཡ། ངེས་པའི་དོན་དུ་འཇམ་པའི་རྡོ་རྗེ་དང་། །མཁའ་ལ་མཁའ་བཞིན་དབྱེ་བ་མི་དམིགས་ཀྱང་། །མིག་འཕྲུལ་ཆུ་ཟླའི་རོལ་པ་ཇི་བཞིན་དུ། །གཉིས་མེད་གཉིས་སུ་ཤར་བའི་བཀའ་སྡོད་མཆོག །ཀླུ་རྒྱལ་ཆེན་པོ་འཁོར་དང་བཅས་རྣམས་ལ། །རྩེ་གཅིག་དད་པའི་གདུང་ཤུགས་དྲག་པོ་ཡིས། །ཡིད་ལ་བརྣག་པའི་དོན་ཀུན་གསོལ་བྱེད་ན། །འདོད་པའི་རེ་བ་འབྲས་བུ་མཆིས་པར་མཛོད། །སྐྱེ་དགུ་ཕན་བདེ་འབྱུང་གནས་རྒྱལ་བའི་བསྟན། །དེ་ཡི་ཡང་སྙིང་རྒྱལ་བ་གཉིས་པའི་ལུགས། །འཁྲུལ་བྲལ་མདོ་སྔགས་བཤད་སྒྲུབ་བསྟན་པའི་སྲོལ། །ཕྱོགས་ཀུན་དར་ཞིང་རྒྱས་པའི་འཕྲིན་ལས་མཛོད། །བསྟན་འཛིན་མཐའ་དག་ཞབས་པད་བསྐལ་བརྒྱར་བརྟན། །འཕྲིན་ལས་དཔག་བསམ་ཤིང་ལྟར་རྒྱས་པ་དང་། །དགེ་འདུན་སྡེ་རྣམས་ཐུགས་མཐུན་ཁྲིམས་གཙང་ཞིང་། །བཤད་སྒྲུབ་ཐོས་བསམ་འཕེལ་བའི་འཕྲིན་ལས་མཛོད། །གནམ་བསྐོས་འཇམ་དབྱངས་གོང་མ་ཆེན་པོ་ཡི། །ཆོས་སྲིད་མངའ་ཐང་དགུང་ལ་རེག་པ་དང་། །ཆབ་འབངས་མཐའ་དག་དགེ་བཅུ་དཀར་ཁྲིམས་ཀྱིས། །རྟག་ཏུ་བདེ་བར་འཚོ་བའི་འཕྲིན་ལས་མཛོད། །ཁྱད་པར་བདག་སོགས་འཁོར་བཅས་ཐམས་ཅད་ལ། །རྗེས་སུ་འཛིན་པའི་ཉིན་མཚན་དུས་དྲུག་ཏུ། །ཡེ་ཤེས་སྤྱན་གྱིས་བྱ་ར་མ་གཡེལ་བར། །རྣམ་ཀུན་བུ་བཞིན་སྐྱོང་བའི་འཕྲིན་ལས་མཛོད། །སྔོན་ལས་འཕྲལ་རྐྱེན་ངན་པས་བྱེད་པ་ཡི། །མི་ཕྱུགས་ནད་རིམས་འཐབ་རྩོད་འཁྲུག་ལོང་སོགས། །མི་འདོད་ཉེར་འཚེའི་མིང་ཡང་མི་འབྱུང་བར། །བདེ་སྐྱིད་དཔལ་ལ་རོལ་བའི་འཕྲིན་ལས་མཛོད། །ཚེ་དང་བསོད་ནམས་དཔལ་དང་འབྱོར་བ་དང་། །མངའ་ཐང་སྙན་གྲགས་གཟི་བརྗིད་ལ་སོགས་པའི། །ལེགས་པའི་ཚོགས་ཀྱི་ཡོན་ཏན་མ་ལུས་པ། །ཡར་ངོའི་ཟླ་ལྟར་རྒྱས་པའི་འཕྲིན་ལས་མཛོད། །ཡངས་པའི་རྒྱལ་ཁམས་སྤྱི་དང་ཡུལ་ཕྱོགས་འདིར། །ཆར་ཆུ་དུས་འབབ་རྩི་ཤིང་ལོ་ཏོག་སྨིན། །ཟས་ནོར་ལོངས་སྤྱོད་ཕྱུགས་ཀྱི་འཕེལ་ཁ་སོགས། །རྫོགས་ལྡན་དུས་བཞིན་འཕེལ་བའི་འཕྲིན་ལས་མཛོད། །སྐྱེས་བུ་མཐའ་དག་བསམ་ངན་སྦྱོར་རྩུབ་དང་། །བྲལ་ནས་རྟག་ཏུ་བློ་མཐུན་དགེ་ལེགས་སྤྱོད། །ཉིན་མཚན་བདེ་སྐྱིད་དཔལ་གྱིས་འདའ་བ་སོགས། །བཀྲ་ཤིས་རྒྱ་མཚོས་ཕྱོགས་ཀུན་ཁྱབ་པར་མཛོད། །ཅེས་རྗེ་བཙུན་འཇམ་པའི་དབྱངས་ཀྱི་བཀའ་སྡོད་ཀླུ་རྒྱལ་ཆེན་པོའི་འཕྲིན་བཅོལ་འདི་ནི། ཀླུ་རྒྱལ་ལྷ་ཁང་གི་གནས་འཛིན་ཧྭ་ཤང་གིས་ལྷ་རྫས་བཅས་བསྐུལ་བ་ལྟར། ཞྭ་དམར་བྱ་བྲལ་བས་སངས་རྒྱས་རབ་བདུན་གྱི་ལྷ་ཁང་དུ་སྦྱར་བའོ། །པར་འདི་རི་བོ་རྩེ་ལྔའི་འཇམ་དབྱངས་ཆོས་འཁོར་གླིང་དུ་བཞུགས། དགེའོ། །

གསུང་འདི་ནི་སྤྱི་ལོ་༢༠༡༣ལོའི་ཟླ་བདུན་པའི་ཚེས་མགོ་ནས་ཕྲན་གྱིས་རི་བོ་རྩེ་ལྔའི་རྒྱལ་བ་ཚངས་དབྱངས་རྒྱ་མཚོའི་སྒྲུབ་ཕུག་དགོན་པ་（观音洞）དེར་རྗེ་བཙུན་འཇམ་དབྱངས་ཀྱི་བསྙེན་མཚམས་ལ་གནས་པའི་སྐབས་སུ་ལག་ཏུ་ཆུད་པས་འདི་བའི་གསུང་ཡིན་ནམ་སྙམ་ནས་འདིར་བཀོད་པའོ། །

སྐུ་ཕྲེང་བཞི་བ་རྡོ་རྗེ་འཆང་དགེ་འདུན་བསྟན་འཛིན་རྒྱ་མཚོ་དཔལ་བཟང་བོ་དང་། སྐུ་ཕྲེང་ལྔ་བ་བློ་བཟང་བཤད་སྒྲུབ་བསྟན་འཛིན་རྒྱ་མཚོ། སྐུ་ཕྲེང་དྲུག་པ་བློ་བཟང་འཇིགས་མེད་བསྟན་འཛིན་རྒྱ་མཚོ། སྐུ་ཕྲེང་བདུན་པ་ད་ལྟའི་མཆོག་སྤྲུལ་དམ་པ་བསྟན་འཛིན་དགེ་འདུན་ཕུལ་བྱུང་རྒྱ་མཚོ་ཡིན་ལ་འདི་རྣམས་ཀྱི་རྣམ་པར་ཐར་བ་འཆད་པར་འགྱུར་རོ། །

  སྐུ་ཕྲེང་བཞི་བ་ཡབ་རྗེ་བླ་མ་ཡོངས་འཛིན་ནོ་མོན་ཧན་ཞྭ་དམར་རྡོ་རྗེ་འཆང་གང་ཉིད་སྐུ་བལྟམས་པའི་ཡུལ་ནི། ཆུ་གཏེར་ཆེན་པོ་ཁྲི་གཤོག་རྒྱལ་མོའི་ཉེ་འགྲམ། རྒྱལ་དབང་བསོད་ནམས་རྒྱ་མཚོས་སོག་པོ་རྣམས་མི་ཤི་ན་ཕྱུགས་མང་བོ་གསོད་དགོས་པའི་སྲོལ་ངན་ལས་བཟློག་པར་མཛད་པས་དཀར་ཐང་མར་ཁུའི་མཚོ་མོར་གྲགས་པ། ལྔ་བ་ཆེན་མོ་ཡུན་རིང་བཞུགས་ཤིང་རྒྱལ་དབང་ཡོན་ཏན་རྒྱ་མཚོའི་རྣམ་ཐར་བཀའ་རྩོམ་གནང་སའི་གནས་ཆོས་ལུང་དུ་གྲགས་པ་དེ་ཡིན་ལ། གནས་དེར་མདའ་བཞིའི་ནང་ཚན་ཉིན་ཐུབ་ཤོག་ཁའི་ཞྭ་དམར་དུ་གྲགས་པའི་ཚོ་ཚན་བྱུང་སྟེ། དེ་ཡང་ཞྭ་ལ་ཕོད་ཁ་དམར་བོ་བཙུགས་པས་ཞྭ་དམར་དུ་གྲགས་ཟེར་བའི་ཚོ་བ་དེ་ཉིད་སྔར་འབལ་གཞུང་དུ་ཡོད་ཀྱང་རྗེས་སུ་ལྕགས་ཡོས་སྤྱི་ལོ་༡༨༣༡ཡས་མས་སུ་མཚོ་སྔོན་མདའ་བཞི་ས་ཆར་རུ་ཡོང་བར་ཐོས་སོ། །

རྗེ་འཇིགས་མེད་རིགས་པའི་བློ་གྲོས་ཀྱི་ཞལ་ནས། ཞྭ་དམར་པཎྜི་ཏ་ཞེས་པའི་ཞྭ་དམར་གྱི་དོན་ནི། མཚོ་སྔོན་མདའ་བཞི་ན་ཞྭ་དམར་ཞེས་པའི་ཚོ་བ་ཞིག་ཡོད། ཞྭ་དམར་རིན་པོ་ཆེ་སྔ་ཕྱིར་སྐུ་ཕྲེང་བཞི་ཚོ་བ་དེར་འཁྲུངས། སྔོན་ཆད་སོག་པོ་ཧོར་གྱི་རྒྱལ་བློན་གྱི་ཆོ་ལོ་ལ་ཞྭ་ཡི་ཀླད་དུ་ཀྱ་ལ་དམར་བོ་བསྟོད་པ་ཞིག་ཡིན་པས་ཚོ་བ་དེའི་སྡེ་དཔོན་ཞིག་ལ་དེ་འདྲའི་ཆོ་ལོ་ཡོད་པའི་དབང་གིས་ཞྭ་དམར་ཞེས་བཏགས་པར་གླེང་། ཞེས་གསུངས་པ་ལྟར། རྗེ་ངག་དབང་འཕྲིན་ལས་དང་། སྐུ་ཕྲེང་གསུམ་པ་ལ་སོགས་སྐྱེས་ཆེན་དམ་པ་མང་བོ་འཁྲུངས་པའི་ཁྱིམ་གཞིས་སུ་མ་སྨད་རིགས་རྒྱུད་བཟང་བོའི་ཡབ་ནི་མེས་པོ་ཞྭ་དམར་ཡི་དམ་ལ་བུ་གཉིས་ཡོད་པའི་ཆེ་ཤོས་ནི་རྗེ་གོང་མ་ངག་དབང་བསྟན་འཛིན་རྒྱ་མཚོ་ཡིན་ལ། དེའི་གཅུང་བན་སྨུག་ཅེས་པ་དང་། ཡུམ་མ་ཅིག་གཉིས་ཀྱི་སྲས་སུ་རབ་བྱུང་བཅུ་བཞི་བའི་ཆུ་བྱི་སྤྱི་ལོ་༡༨༥༢ལོར་ངོ་མཚར་བའི་ལྟས་དང་བཅས་ཀུན་དགའི་སྐྱེད་ཚལ་དེར་སྐུའི་མཚན་དཔེའི་མེ་ཏོག་བཞད།

 དགུང་ལོ་གསུམ་བཞེས་པའི་དུས་ཐེངས་ཤིག་ཡབ་ཀྱི་པང་ན་བཞུགས་སྐབས་རྔོན་པ་ཞིག་གིས་རི་དྭགས་བསད་པའི་ཤ་ཞིག་བྱིན་བྱུང་བ་ཡབ་ཀྱིས་དམ་པ་ཉིད་ཀྱི་ཞལ་དུ་ཅུང་ཟད་བཞག་པ་ན། དེ་མ་ཐག་ཕྱིར་བསྐྱུར་ཞིང་ལྗགས་ཀྱི་སྟེང་ཕྱག་གིས་བྲད་དེ་ཤིན་ཏུ་གདུངས་པའི་ཉམས་ཀྱིས་ཆོ་ངེ་བཏབ་ཅིང་ངུས་པས། རྔོན་པ་དེ་འཇིགས་སྐྲག་སྐྱེས་ཏེ་ལངས་ནས་ཕྱག་འཚལ་ཞིང་ཕྱིན་ཆད་རི་དྭགས་མི་གསོད་པའི་དམ་བཅའ་ཕུལ་པ་དང་། སྐབས་ཤིག་ཆུ་འགྲམ་ཞིག་ཏུ་བྱིས་པ་ཁ་ཤས་དང་ལྷན་ཅིག་རྩེད་མོ་མཛད་བཞིན་པའི་ཚེ་བྱིས་པ་ཚོས་ཕོར་བའི་ནང་དུ་ཕྱེ་མ་དཔར་ཏེ་གུར་ཡིན་ཁུལ་བྱས་པར། རྗེ་ཉིད་ནས་ཕོར་བར་ཆུ་བླུགས་པ་ཡང་ཕྱེ་མ་བཞིན་དཔར་ཏེ་གུར་གྲལ་དུ་བསྒྲིགས་པ་སོགས་སྐུ་བྱིས་པའི་དུས་ནས་ངོ་མཚར་བའི་མཛད་པ་ཤིན་ཏུ་མང་ངོ་། །

གདན་རབས་ཚིགས་བཅད་མ་ལས། 

སྟོན་པ་མཆོག་དང་ངོ་བོ་དབྱེར་མེད་པའི། །

ཐར་ཤུལ་ཆོས་སྐྱོང་རྒྱ་མཚོའི་སྐུ་དྲུང་ནས། །

ཁྱིམ་ནས་ཁྱིམ་མེད་རབ་ཏུ་བྱུང་མཛད་དེ། །

བསྟན་པའི་རྒྱལ་མཚན་ཐོག་མར་བསྒྲེངས་འདི་མཚར། །ཞེས་བྱུང་། 

དགུང་ལོ་བརྒྱད་བཞེས་པ་སྤྱི་ལོ་༡༨༥༩ལོར་སྟོན་པ་ཐུགས་རྗེ་ཅན་མཆོག་དང་ངོ་བོ་དབྱེར་མེད་པའི་སྐྱབས་རྗེ་ཐར་ཤུལ་རིན་པོ་ཆེ་དགེ་འདུན་ཆོས་སྐྱོང་རྒྱ་མཚོའི་སྐུ་དྲུང་ལས་ཁྱིམ་ནས་ཁྱིམ་མེད་པར་རབ་ཏུ་བྱུང་ཞིང་། དགེ་འདུན་བསྟན་འཛིན་བཟང་བོ་ཞེས་པའི་མཚན་གསོལ། རྗེ་གོང་མའི་ཞམ་རིང་བ་རྒྱུན་པར་འཇམ་དབྱངས་ཡི་དམ་དུ་བྱེད་ཅིང་ཨ་ར་པ་ཙ་དུང་ཕྱུར་གསུམ་ལྷག་གསུངས་པའི་ཞྭ་དམར་རི་ཁྲོད་པ་ཀུན་སྤངས་སེམས་དཔའ་ཆེན་པོ་བསྟན་འཛིན་རྒྱལ་མཚན་དགེ་རྒན་དུ་བསྟེན་ཏེ་ཐོག་མར་འཇམ་དཔལ་མཚན་བརྗོད་ཐུགས་འཛིན་མཛད་པས་ཧ་ཅང་ཟིན་དཀའ་བའི་ཚུལ་མཛད་པར། དགེ་རྒན་ཚང་ནས་ཀྱང་ཐུགས་ཁྲེལ་གནང་ཞིང་རྟིང་བསྐུལ་གང་དྲག་མཛད་པས་ཤོག་ལྡེབ་གཉིས་གསུམ་ཙམ་སློབ་པ་ལ་དཀའ་ཚེགས་ཆེན་པོ་བྱུང་། ཉིན་གཅིག་རྗེ་ཉིད་ནས་གུར་ནང་དུ་ཕྱག་དཔེ་སྐྱོར་བཞིན་པའི་དུས་དགེ་རྒན་ཁམས་སངས་ནས་སླར་ཕེབས་ཏེ་གུར་གྱི་ཕྱི་ནས་གསན་པས་སྔར་གྱི་བསླབ་མཚམས་མན་གྱི་ཤོག་བྱང་ཁ་ཤས་ཤར་ཤར་གསུངས་པ་ཐོས་པས་ཐུགས་ཤིན་ཏུ་དགྱེས། དེ་ཕྱིན་ཆད་ཀློག་སློབ་པ་ལ་ཧ་ཅང་ཙག་ཙག་མ་བྱས་ཀྱང་བསྟན་པ་ཙམ་གྱིས་མཁྱེན་པ་བྱུང་སྟེ། རྒྱན་འཇུག་ཆོས་སྤྱོད། གསང་བདེ་འཇིགས་གསུམ་གྱི་ཆོ་ག་སོགས་འདོན་ཆའི་སྐོར་དུ་མ་ཐུགས་འཛིན་མཛད་ཅིང་སྒྲ་དག་གསལ་གསུམ་གྱི་སྒོ་ནས་སྙན་པའི་གདངས་ཀྱིས་ཡང་ཡང་སྐྱོར་སྦྱང་གནང་བས་གཟུར་གནས་མཐའ་དག་རྗེས་སུ་ཡི་རངས་པས་བསྔགས་པ་བརྗོད་པས་དུས་འདའ་བར་བྱེད། དགུང་ལོ་དགུ་བཞེས་པའི་དུས་སུ་ཁྱབ་བདག་འཁོར་ལོའི་མགོན་པོ་རྗེ་སྐུ་མཆེད་རིན་པོ་ཆེས་བཅོམ་ལྡན་དུས་དགྲའི་དབང་བོའི་དཀྱིལ་འཁོར་དུ་དབང་བསྐུར་ཏེ་ཐོག་མར་སྨིན་པར་མཛད་དོ། །

དགུང་ལོ་བཅུ་བཞེས་པ་སྤྱི་ལོ་༡༨༦༡ལོར་སྐུ་ཕྲེང་གོང་མ་རྣམས་ཀྱི་གདན་ས་བཤད་སྒྲུབ་ཟུང་དུ་འབྲེལ་བའི་ཆོས་སྡེ་ཆེན་པོ་བདེ་ཆེན་ཆོས་འཁོར་གླིང་དུ་ཚོགས་ཞུགས་གནང་། དགུང་ལོ་བཅུ་གཅིག་བཞེས་པ་ཆུ་ཁྱི་ལོའི་དུས་ཚེས་དགེ་བར་ལཱ་མོའི་གདན་ས་ཆེན་པོ་བདེ་ཆེན་ཆོས་འཁོར་གླིང་དུ་ཆིབས་ཀྱི་ཁ་ལོ་བསྒྱུར་ཏེ། སྐུ་ཕྲེང་གོང་མ་རིམ་བྱོན་གྱིས་བྱིན་གྱིས་བརླབས་པའི་ཆོས་ཀྱི་ཁྲི་ལ་ཞབས་སྐྱེས་པདྨོའི་རྡུལ་ཕྲེང་ཉེ་བར་བཀོད་དེ་དགེ་མཚན་གྱི་སྣང་བ་རྒྱས་པར་གྱུར་ཏོ། །

དེ་དུས་ཨ་ཁུས་རི་ཁྲོད་པ་དཀྱུས་མའི་ལུགས་བཞིན་སྟོན་དུས་སུ་འབྲུ་བསོད་རེ་བསླངས་པས་ངེད་དཔོན་གཡོག་རྣམས་ཀྱིས་འཚོ་ཆས་མཛད་པ་མ་གཏོགས་ཇ་མར་སོགས་ཀྱང་མོད་ཆིལ་ལེ་བ་མེད་ཅེས་གསུངས་སོ། །

དགུང་ལོ་བཅུ་བཞི་བ་སྤྱི་ལོ་༡༨༦༥ལོར་བདེ་ཆེན་ཆོས་འཁོར་གླིང་གི་རྩོད་པའི་གྲྭར་ཞུགས་ཏེ། ཡོངས་ཀྱི་དགེ་བའི་བཤེས་གཉེན་ཆེན་པོ་སྟག་རི་རབ་འབྱམས་པ་བློ་བཟང་ཉི་མ་དགེ་རྒན་དུ་བསྟེན་ནས། དཔེ་ཁྲིད་ལ་མ་ཆག་པར་ཕེབས་པ་དང་ཆབས་ཅིག་བསྡུས་གྲྭའི་ཡིག་ཆ་ཐུགས་འཛིན་གནང་ཞིང་། གྲོགས་རིགས་པ་སྨྲ་བ་རྣམས་དང་ལྷན་དུ་ཆོས་གྲྭར་བགྲོ་གླེང་ལ་བརྩོན་པས་བསྡུས་གྲྭའི་རིགས་འཕྲུལ་མ་ལུས་པ་ཐུགས་སུ་ཆུད་ཅིང་སྙན་པའི་གྲགས་པ་རྒྱས། དེ་ནས་བློ་རྟགས་ཀྱི་ཡིག་ཆ་ཐུགས་འཛིན་གནང་ཞིང་དཔེ་ཁྲིད་ཞིབ་ཏུ་མནོས་ཏེ། ལོ་གཅིག་གཉིས་ཀྱི་ཁོངས་སུ་བསྡུས་གྲྭར་གྲགས་པ་ཚད་མ་རྣམ་འགྲེལ་གྱི་རིགས་པའི་སྒོ་དུ་མ་ཕྱོགས་གཅིག་ཏུ་དྲིལ་བ་དང་། བློ་རྟགས་སོགས་རྟོག་གེའི་གསང་ཚིག་མ་ལུས་པ་ཐུགས་སུ་ཆུད་དེ་རྟགས་གསལ་གཏོང་བ་དང་ལན་འདེབས་པ་ལ་ཐོགས་པ་མེད་པར་སྨྲ་བའི་སྤོབས་པ་བླ་ན་མེད་པར་གྱུར་པས་དཔྱོད་ལྡན་གཟུ་བོར་གནས་པ་རྣམས་ཀྱིས་བསྔགས་པའི་གནས་སུ་གྱུར་ཏོ། །

གདན་རབས་ཚིགས་བཅད་མ་ལས། 

ལྷོ་རྒྱུད་གདན་སར་སློབ་གཉེར་མཛད་སྐབས་སུ། །

སྔོན་ནས་འབྲེལ་ཟབ་ལུང་རིགས་མཚན་ཅན་ལ། །

ཡིད་དགའ་ཆོས་འཛིན་གཉིས་པར་ཐོག་མར་མཇལ། །

མགོན་དེས་ཐུབ་པའི་ལི་སྐུ་ཚད་ལྡན་བཅས། །

ཕྱག་གིས་བསྩལ་བས་ཕྱི་ནས་རྒྱལ་ཚབ་ཏུ། །

དབང་བསྐུར་མཛད་པ་ལགས་ཞེས་ཀུན་གྱིས་གླེང་། །ཞེས་བྱུང་། 

དགུང་ལོ་བཅོ་ལྔ་བ་མེ་སྟག་ལོའི་སྟོན་དུས་སྒྲུབ་རྒྱུད་བསྟན་པའི་མངའ་བདག་སྐྱབས་རྗེ་བློ་བཟང་ལུང་རིགས་རྒྱ་མཚོ་རེབ་གོང་སྨད་ཀྱི་སྒྲུབ་པའི་སྐྱེད་ཚལ་ཡིད་དགའ་ཆོས་འཛིན་དུ་ཕྱགས་ཕེབས་པའི་གནས་ཚུལ་གསན་འཕྲལ་དད་པའི་སྤུ་ལོང་གཡོས་ཤིང་དངོས་མཇལ་ལ་ཤིན་ཏུ་རིངས་པར་གསུངས་པ་ཡང་སྔོན་ཡུན་རིང་ཡོངས་སུ་འཛིན་པར་གྱུར་པའི་འབྲེལ་ཟབ་པ་དང་། རྗེ་བཙུན་མི་ལས་ལྷོ་བྲག་མར་བའི་མཚན་ཐོས་པ་ཙམ་གྱིས་ཐུགས་དད་དཔེ་མེད་འཁྲུངས་པས་ཕྱིས་སུ་བླ་མ་དེ་ལ་བསྟེན་ནས་སྐུ་ཚེ་དེར་མཆོག་གི་དངོས་གྲུབ་བརྙེས་པ་དང་ཚུལ་མཚུངས་པའི་རྣམ་པར་ཐར་པའོ། །

དེ་འཕྲལ་ལམ་དུ་ཆས་ཏེ་སྒྲུབ་པའི་སྡེ་ཡིད་དགའ་ཆོས་འཛིན་དུ་ཕེབས། སྐྱབས་མགོན་མཆོག་གི་དགྱེས་ཞལ་ཐོག་མར་མཇལ་བ་ཙམ་གྱིས་དད་གུས་ཚད་མེད་པ་འཁྲུངས་ཚུལ་གསུངས་ཤིང་། ལྕགས་སྟག་ལོར་ཨ་མཛོའི་སྒར་དུ་ཐུགས་རྗེ་ཆེན་པོའི་དབང་གནང་བའི་བརྒྱུད་རིམ་གསུང་བཤད་སྐབས་ངའི་བླ་མ་ཨ་རོལ་རྡོ་རྗེ་འཆང་ཆེན་པོ་དེ་ཉིད་སྐལ་ལྡན་དད་པ་ཅན་ལ་འཕགས་པ་སྤྱན་རས་གཟིགས་ཕྱག་བཞི་བའི་རྣམ་པར་དངོས་སུ་མཐོང་རྒྱུ་ཡོད་པ་ཞིག་ཡིན། ངས་ཁོང་གི་མདུན་ནས་ཐོབ་པ་ཡིན་པས་འཕགས་པ་སྤྱན་རས་གཟིགས་དངོས་ལས་ཐོབ་སྙམ་པ་ཡོད་གསུངས། གཞན་དཔལ་རྡོ་རྗེ་འཇིགས་བྱེད་བདུད་ལས་རྣམ་རྒྱལ་དཔའ་བོ་གཅིག་པ་དང་། བདེ་མཆོག་ལཱུ་ཨི་པ་ལྷ་རེ་གཉིས། སྨན་བླ་ལྷ་ང་གཅིག་རྣམས་ཀྱི་དབང་དང་། རིགས་གསུམ་སྤྱི་སྒྲུབ། ཀླུ་དབང་རྒྱལ་བོ། སེངྒེའི་སྒྲ། ཆོས་རྒྱལ། ལྷ་མོ་རྣམས་ཀྱི་རྗེས་གནང་སོགས་ལེགས་བཤད་བདུད་རྩིའི་དགའ་སྟོན་ཀྱང་ཕངས་མེད་དུ་བསྩལ། སྐབས་སྐབས་སུ་སྐུ་མདུན་དུ་བོས་ཏེ་གསོལ་ཚིགས་དང་ཞལ་འཕྲོས་ཀྱང་ཡུན་རིང་དམར། ཕྱིར་ཕེབས་ཁར་ཡབ་སྲས་འབྲལ་མི་ཕོད་པ་ལྟ་བུའི་བརྩེ་ཉམས་དང་བཅས་ཐུབ་པའི་སྐུ་རྒྱ་གར་ལི་མ་ཞིག་གནང་སྟེ་སློབ་གཉེར་ཧུར་ཐག་བྱེད་དགོས་ཚུལ་སོགས་ཐོས་བསམ་དང་ཉམས་བཞེས་ཇི་ལྟར་མཛད་ཚུལ་གྱི་བསླབ་སྟོན་དང་སླད་མར་བརྩེ་བས་རྗེས་འཛིན་གྱི་ཞལ་བཞེས་ཀྱང་མཛད་དོ། །

ཚུལ་འདི་ནི་མཉམ་མེད་ཇོ་བོ་ཆེན་པོ་གསེར་གླིང་ནས་ཕེབས་ཁར་གསེར་གླིང་བ་ནས་སྟོན་པའི་གསེར་སྐུ་གནང་ཞིང་བསྟན་པའི་བདག་པོར་བྱིན་གྱིས་བརླབས་པ་དང་ཚུལ་མཐུན་པར་རིང་མིན་སྐྱབས་རྗེ་ཉིད་ཀྱི་ཆོས་ཀྱི་རྒྱལ་ཚབ་ཏུ་གྱུར་ནས་འཇམ་མགོན་རྒྱལ་བ་གཉིས་པའི་ལུང་རྟོགས་ཀྱི་བསྟན་པ་རིན་པོ་ཆེ་ཕྱོགས་བརྒྱར་སྤེལ་བར་བྱེད་པའི་འབྱུང་འགྱུར་མངོན་སུམ་དུ་གཟིགས་པར་མངོན་གསུངས། ཡང་ཉིད་ཀྱི་ཞལ་ནས། ང་ཡི་སྒར་དུ་སོང་སྐབས་གནས་ཚང་གི་ཤག་དེར་རོང་བོའི་དགེ་བཤེས་ཤིག་བཞུགས་འདུག་པར། ཉིན་གཅིག་ཁོང་བཞུགས་སའི་དྲ་སྒོའི་ཕྱི་ནས་གྲྭ་བ་ཞིག་དང་ངེད་གཉིས་ཀྱིས་རྩོད་པ་བྱས་པར་དགེ་བཤེས་ཚང་ཐུགས་རྒྱལ་བཞེངས་ཏེ་སྒོར་ཕེབས་ནས་ཁ་རོག་འདུག་མི་ཐུབ་པར་ཅི་བཤད་པ་ཡིན་གསུངས། བགྲོ་གླེང་བྱས་ཚུལ་ཞུས་པར། ཡ་ཐོངས་དང་གསུངས། དེ་དུས་ངེད་རྟགས་གསལ་ལ་བྱང་བོ་ཡིན་ཅིང་སྐྲག་རྒྱུ་མ་ཤེས་པར་རྟགས་གསལ་བརྒྱུད་མར་བཏང་བས་དགེ་བཤེས་ཚང་ཐུགས་རྒྱལ་ཞི་ཞིང་ཐུགས་དགྱེས་ཏེ། ཨ་ཙི་བཀའ་དྲིན་ཆེ། སྐྱེས་བུ་དམ་པའི་རྟགས་རེད། དེ་མིན་ན་བྱིས་པ་ཆུང་ངུ་ཞིག་གིས་རྟགས་གསལ་འདི་འདྲ་གཏོང་ག་ལ་ཤེས། ཕྱིན་ཆད་སློབ་གཉེར་ལ་ཐུགས་བརྩོན་མ་ལྷོད་པ་མཛོད་དང་། ངེས་པར་རྗེ་བླ་མའི་བསྟན་འཛིན་གྱི་སྐྱེས་བུ་དམ་པ་ཞིག་ཕེབས་རྒྱུ་རེད། ཅེས་བསྔགས་བརྗོད་དང་ཐུགས་བརྩེ་བརྩེ་གནང་། ཕེབས་ཁར་ཡང་གང་ཅིའི་བསླབ་སྟོན་དང་རྗེས་སོར་བདེ་ཆེན་དུའང་ཕྱག་བྲིས་ཡང་ཡང་བསྐུར་ཞིང་སློབ་གཉེར་གྱི་རྟིང་བསྐུལ་མཛད་པའི་ཡི་གེ་ཞིག་གི་ནང་དུ། བཀའ་བསྟན་གཞུང་བརྒྱའི་ཆུ་གཏེར་ལས། །བློ་བཟང་དེད་དཔོན་གྱིས་བླངས་པའི། །ལེགས་བཤད་གསེར་གྱི་ཕྲེང་བ་གང་། །བློ་གྲོས་མགུལ་དུ་དལ་གྱིས་བཞེས། །ཟེར་བ་ཞིག་ཡོད་པ་དྲན་གསུངས། འཛིན་གྲྭ་གཞུང་དུ་ཕེབས་པ་ནས་བཟུང་གཞུང་བརྒྱའི་མངའ་བདག་བཤེས་གཉེན་ཆེན་པོ་ཤེས་རབ་རྒྱ་མཚོ། ལུང་རིགས་སྨྲ་བ་ཚུལ་ཁྲིམས་དཔལ་ལྡན་སོགས་ལས་གཞུང་སོ་སོའི་མཛུབ་ཁྲིད་དང་དོགས་གཅོད་རྒྱུན་པར་གནང་ཞིང་། མངོན་པར་རྟོགས་པའི་རྒྱན་གྱི་ལུས་རྣམ་གཞག་དང་བསྡུས་དོན་གྱི་འགྲེལ་བ་ཡིག་ཆའི་དོན་བདུན་ཅུ་ཐུགས་འཛིན་དང་འབྲེལ་བར་དངོས་བརྒྱད་དོན་བདུན་ཅུའི་མཚན་ཉིད་མཚན་གཞི་སྒྲ་དོན་དབྱེ་བ་ས་མཚམས་ངེས་པ་གཞིར་བཟུང་། འགྲེལ་བ་དོན་གསལ། ཕར་ཕྱིན་མཐའ་དཔྱོད། བསམ་གཟུགས་ཆེ་ཆུང་། བསེའི་རྟེན་འབྲེལ་ཆེན་མོ། དྲང་ངེས་ཆེ་འབྲིང་ཆུང་གསུམ་སོགས་ཀུན་མཁྱེན་བླ་མ་ཡབ་སྲས་ཀྱི་ཡིག་ཆའི་སྐོར་རྣམས་དང་། ཁྱད་པར་དུ་རྗེ་ཐམས་ཅད་མཁྱེན་པས་འཕགས་སེང་གི་འགྲེལ་བ་དག་གཞིར་བཞག་ཅིང་རྒྱ་འགྲེལ་གཞན་རྣམས་ཀྱི་ཚིག་དོན་གྱི་དྲི་མ་མཐའ་དག་ཞིབ་པར་བསལ་ཞིང་འཕགས་བོད་ཀྱི་གཞུང་ལུགས་མཐའ་དག་གི་ལེགས་པའི་ཆ་བསྡུས་པ་འགྲན་ཟླ་མེད་པའི་ལེགས་བཤད་གསེར་གྱི་ཕྲེང་བ་དང་། རྗེ་ཐམས་ཅད་མཁྱེན་པས་ཤེར་ཕྱིན་གྱི་དོན་ལ་དཔྱད་པ་རྫོགས་རྗེས་སུ། རྗེ་བཙུན་འཇམ་པའི་དབྱངས་ཀྱི་མན་ངག་གིས་བརྒྱན་ནས་ཤེར་ཕྱིན་གྱི་དོན་ཞིབ་མོར་ཉམས་སུ་ལེན་ཚུལ་ལམ་གྱི་རིམ་པར་བསྒྲིགས་པ་སྲས་ཀྱི་ཐུ་བོ་རྒྱལ་ཚབ་དར་མ་རིན་ཆེན་གྱི་ཟིན་བྲིས་རྣམ་བཤད་སྙིང་བོའི་རྒྱན་དང་ལམ་བསྒྲིགས་སོགས་ལ་ཡང་ཡང་གོམས་འདྲིས་མཛད་པས། ནང་གི་དཔྱད་པ་དང་ཆོས་གྲྭའི་རྩོད་པ་ཟུང་འབྲེལ་གྱིས་ཐལ་འཕྲེང་ཟུར་བཀོལ་སོ་སོའི་ལམ་གྱི་ལུས། དཀའ་གནད་ཀྱི་དོགས་གནས། རྒྱ་བོད་མཁས་པ་མང་བོའི་དགག་སྒྲུབ་ཀྱི་རིགས་པའི་འགྲོས་ཕྲ་ཞིང་ཕྲ་བ་དག་ལ་ངེས་པ་གཏིང་ཚུགས་པ་རྙེད་དེ་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་དོན་མ་ལུས་པ་ཐུགས་སུ་ཆུད་པར་གྱུར་ཏོ། །

ས་འབྲུག་སྤྱི་ལོ་༡༨༦༨ལོར་འཛིན་གྲྭའི་དབང་གིས་ཆོས་གྲྭར་མངོན་ཚན་ཆེ་བའི་རྩོད་པ་མ་སོང་ཡང་། ཡུམ་དོན་དངོས་བསྟན་སྟོང་ཉིད་ཀྱི་རིམ་པ་ཟབ་རྒྱས་གཉིས་ཚོགས་ཀྱིས་འཇུག་པའི་བསྟན་བཅོས་ཆེན་མོ་དབུ་མ་རྩ་ཤེས་དང་འཇུག་པ་རང་འགྲེལ་དང་བཅས་པའི་དོན། རྣམ་བཤད་དགོངས་པ་རབ་གསལ་དང་། འཇུག་ཊཱིཀ་གསལ་བའི་མེ་ལོང་། དབུ་མ་རྒྱས་པ་དང་། ལུང་རིགས་སྒྲོན་མེ་རྣམས་ཀྱི་སྟེང་ནས་མཛུབ་ཁྲིད་དང་། དཔེ་གཟིགས་མཛད་པ་སོགས་གཞན་གྱིས་བསྐུལ་བ་ལ་མ་ལྟོས་པར་ཇི་ལྟར་ཉི་མས་གདུངས་པའི་ལག་ལྡན་པད་མཚོར་འཇུག་པའི་དཔེ་བཞིན་གྱུར་པས་རིང་བོར་མི་ཐོགས་པར་གཞུང་དོན་ཡིད་བཞིན་གྱི་ནོར་བུའི་བང་མཛོད་ལ་འདོད་རྒུར་དབང་འབྱོར་བའི་ཆོས་ཀྱི་དེད་དཔོན་བླ་ན་མེད་པར་གྱུར་ཏོ། །སྐབས་དེ་དག་ཏུ་ཡང་ཞང་སྟོན་ཆོས་ཀྱི་རྒྱལ་བོས། ཚིལ་བུ་ཐལ་མོས་གཞལ་དགོས་ཚོན་པོའི་ཤ །མར་ཕྱུར་བཅུད་བཟང་བསྡུས་པའི་ཞུན་དང་ཐུད། །སྤུངས་པའི་དཀྱིལ་ན་གང་འཇམ་གང་ལེགས་ཀྱིས། །བཀླུབས་པའི་གཅེས་ཕྲུག་ལང་ལ་ཤོར་བའི་ཚུལ། །མ་ཡིན་བྲག་སྟར་གདུས་པའི་ཁུ་བ་དང་། །ལོ་གཏོར་སྐམ་པོ་བརྡུངས་པའི་ཐུག་པ་སོགས། །ཟས་གོས་སྲོག་འཚོ་ཙམ་ལ་བརྟེན་ནས་སུ། །ཚ་གྲང་བཀྲེས་སྐོམ་དཀའ་ཐུབ་དང་དུ་བཞེས། །ཞེས་གསུངས་པ་དང་ཚུལ་མཐུན་པར་འཚོ་བ་ངན་ངོན་གྱི་དཀའ་སྤྱད་ལ་བརྟེན་ནས་ཐོས་བསམ་ལ་བརྩོན་པར་མཛད་པ་ཡིན་ཏེ། བཀའ་ལས། བླ་སྤྲུལ་ཆུང་ངུ་ཚོར་བདག་པོ་བཟང་བོ་ཞིག་མེད་ན་ལད་འགྲོ་ཟེར་ཡང་སྔོན་གྱི་ལས་སྨོན་ཞིག་ཡོད་ན་དྲག ང་ཆུང་དུས་བདེ་ཆེན་དུ་སོང་སྟེ་ལོ་གཅིག་ཙམ་གྱི་འཕྲོར་དགེ་རྒན་ཨ་ཁུ་གཉིས་མ་འཆམས་པར་གཉིས་ཀ་བུད་སོང་། ཕུ་བོ་མཆོག་གྲུབ་དང་ངེད་གཉིས་བསྡད་པ་ཡིན། ཁོ་གཞན་དུ་སོང་སྟེ་མ་ཡོང་དུས་གུང་ཚིགས་སྐབས་ཇ་འཁྱག་རེའི་ནང་དུ་རྩམ་པ་ཟོས་ནས་བསྡད་དུས་མང་། ཚོགས་གླེང་ལྟ་བུའི་སྐབས་སུ་ཡང་སྐུ་ཕྱོགས་སྒོ་མང་ཚང་གི་ན་བཟའ་རེ་གཡར་བོ་བྱས་པ་ལས་རང་ལ་གོན་པ་བཟང་པོའང་མེད། གཅིག་པུར་བསྡད་ན་སུན་སྣང་སྐྱེ་སྐབས་རྗེ་གོང་མའི་ཕྱག་དཔེ་མང་བས་དཔེ་ཀློག་རེ་བྱས་ན་སུན་རྒྱུ་མེད། སྐབས་སྐབས་སུ་དཔེ་ཁྲིད་རེ་ལ་འགྲོ་བའི་ཞར་ལ་ཁྲི་སྤྲུལ་རིན་པོ་ཆེའི་མདུན་དུ་སོང་ཚེ། ཁོང་གི་ཉེ་འཁོར་དུ་ཕྱག་དཔེ་ཆ་རེ་མ་གཏོགས་གཞན་ཁྲ་ཁྲ་རིག་རིག་ཅི་ཡང་མེད་པར་གཙང་སང་ངེ་བཞུགས་ཡོད་པ་ཞིག་ཡིན་སྟབས། དེས་ཡིད་དྲངས་ཏེ་འདི་ལྟ་བུ་ཞིག་བྱས་ནས་འདུག་ཐུབ་ན་སྙམ་པ་རྒྱུན་དུ་འཆར། གཞན་དོ་དམ་བྱེད་མཁན་མེད་ཀྱང་རང་གིས་རང་ངན་ལང་དུ་མ་བཏང་བར་སློབ་གཉེར་ལ་སྡུག་རུས་བྱས་པ་ཡིན་ཞེས་གསུངས་སོ། །

སྐབས་ཤིག་ནས་སྤྱིར་མཚན་ཉིད་ཀྱི་སློབ་གཉེར་དཔྱིས་ཕྱིན་པ་ཞིག་བྱེད་ཐུབ་ན་ཤིན་ཏུ་ལེགས་ཀྱང་། དེང་སང་གི་མཚན་ཉིད་པ་ཕར་ཆེར་གཞུང་དོན་གལ་ཆེན་ལམ་དང་འབྲས་བུའི་གནད་ལ་རྟོག་དཔྱོད་ཡེ་མ་ཞུགས་པར་ཚིག་གི་ཟེར་ལུགས་ཙམ་གྱི་རིགས་ལམ་ཉི་ཚེ་འབའ་ཞིག་ལ་མགོ་འཁོར་ཏེ་མི་ཚེ་སྐྱེལ་བར་འདུག་པས། དེ་ལྟ་བུའི་གང་ཤེས་ཁ་བཤད་དུ་འཁྱེར་བ་ཙམ་ལས་རྒྱུད་ལ་སྦྱོར་བའི་ཉམས་ལེན་གཅིག་ཀྱང་མེད་པར་སངས་རྒྱས་ལའང་འཁོར་གསུམ་བསྐོར་ཆོག་སྙམ་པའི་རང་མཐོང་ཅན་ཞིག་ཏུ་གྱུར་ན་ངེས་པར་འཕུང་ཚབས་ཆེ་བས། མཉམ་མེད་ཇོ་བོ་ཆེན་པོས། ཚེ་ནི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ཀྱང་ཅི་ཙམ་མི་ཤེས་པས། །ངང་བས་ཆུ་ལས་འོ་མ་ལེན་པ་བཞིན། །བདག་གི་འདོད་པ་དང་དུ་བླང་བར་བྱ། །ཞེས་གསུངས་པ་བཞིན་ཐོས་དོན་རྒྱུད་ལ་སྦྱོར་བའི་ཉམས་ལེན་ཞིག་ཅིས་ཀྱང་བྱེད་དགོས་སྙམ་པའི་ཐུགས་འདུན་རྒྱུན་ཆགས་སུ་ཡོད་པའི་ཁར་ལྔ་ཕྲག་སྙིགས་མའི་རང་མཚང་ལྷག་པར་བདོ་བའི་དབང་གིས་སྲིད་འབྱོར་གྱིས་དྲེགས་པར་རློམས་པའི་སྐྱེ་བོ་མི་བསྲུན་པ་དུ་མས་ལོག་སྤྱོད་ཀྱིས་ཐུགས་ལྷག་པར་སྐྱོ་སྟེ། སྙིགས་མའི་དུས་འདིར་སྡེ་དགོན་ཞིག་ཏུ་གནས་པའང་ཆགས་སྡང་གི་རུ་མར་སོང་འདུག་གཤིས། ཡབ་རྗེ་གསེར་ཁང་བ་ཆེན་པོའི་རྣམ་ཐར་བཞིན་གནས་ངེས་མེད་དུ་འཚོ་བ་བསོད་སྙོམས་ཙམ་ལ་བརྟེན་ནས་ཐོས་དོན་རྒྱུད་ལ་སྦྱོར་བའི་ཉམས་ལེན་རྡོ་རུས་ཐུག་པ་ཞིག་བྱ་བར་ཐག་བཅད་དེ། དགུང་ལོ་བཅོ་བརྒྱད་བཞེས་པ་ས་སྦྲུལ་སྤྱི་ལོ་༡༨༦༩ལོའི་སྟོན་སྐུ་དབོན་བློ་གྲོས་དཔལ་བཟང་དང་ལྷན་ཅིག་གསང་སྟབས་གྱིས་སྔོན་ཀརྨ་རོལ་བའི་རྡོ་རྗེ་དང་། ཀོའུ་བ་ཆོས་རྒྱ་མཚོ་དང་། འགྲོ་མགོན་གསེར་ཁང་བ་ཆེན་པོ་སོགས་སྐྱེས་ཆེན་དུ་མས་བྱིན་གྱིས་བརླབས་པའི་གནས་ཆེན་ལོ་བའི་བྲག་དཀར་དུ་གྲགས་པ་དེའི་མདུན་ངོས་སེངྒེའི་རི་ཁྲོད་དུ་ཕེབས་ནས་སྒྲུབ་པ་ཉམས་ལེན་ལ་གཞོལ་བར་མཛད་ཅིང་དུས་དེ་ནས་བཟུང་ཐོས་དོན་རྒྱུད་ལ་སྦྱོར་བའི་ཉམས་ལེན་གནད་ལ་ཁེལ་བ་ཞིག་ཅིས་ཀྱང་བྱེད་དགོས་སྙམ་པའི་ཐུགས་འདུན་རྒྱུན་ཆགས་སུ་མཆིས་སོ། །

གདན་རབས་ཚིགས་བཅད་མ་ལས། 

གསེར་མོ་ལྗོངས་སུ་གྲགས་པའི་ཕྱོགས་དེ་རུ། །

མགོན་པོ་དེ་ཡི་སྤྱན་སྔར་ལོ་མང་བཞུགས། །

ཡབ་རྗེ་གསེར་ཁང་བ་ཡི་རྣམ་ཐར་བཞིན། །

ཀུན་སྤངས་དཀྱུས་མའི་རྣམ་ཐར་བདག་གིར་བཞེས། །ཞེས་བྱུང་། 

དགུང་ལོ་བཅུ་དགུ་བར་རེབ་གོང་གསེར་མོ་ལྗོངས་ཞེས་གྲགས་པའི་རིག་པའི་ཞིང་ཁམས་སུ་ཕེབས་ཏེ་ཡར་ནང་བདེ་ཆེན་བཀྲ་ཤིས་ཆོས་གླིང་དུ་སྐྱབས་རྗེ་ཨ་རོལ་རིན་པོ་ཆེ་བློ་བཟང་ལུང་རིགས་རྒྱ་མཚོ་དཔལ་བཟང་བོ་བཞུགས་པ་དང་མཇལ་ཏེ། རྗེ་བླ་མ་མཆོག་གི་རྣམ་ཐར་བཞིན་དབེན་པར་ཐོས་དོན་རྒྱུད་ལ་སྦྱོར་བའི་ཉམས་ལེན་ལ་ཆིག་དྲིལ་མཛད་རྒྱུའི་དམ་བཅའ་དང་། བཞེད་དོན་མཐར་ཕྱིན་པའི་སྐྱབས་འཇུག་ཞུས་པར་བླ་མ་རིན་པོ་ཆེ་ཐུགས་དགྱེས་པའི་རྩེར་སོན་ཅིང་། ཞལ་ནས། ཁྱེད་རི་ཁྲོད་དུ་ཕེབས་པ་དེ་ཤིན་ཏུ་བཟང་། འོན་ཀྱང་སྐུ་ན་གཞོན་རིང་ཐོས་པ་བྱེད་པ་ཤིན་ཏུ་གལ་ཆེ་བས་ད་དུང་བླ་བྲང་དུ་ཕེབས་ནས་རེ་ཞིག་སློབ་གཉེར་བྱེད་ཐུབ་ན་ལེགས་མོད། དེ་མིན་ཀྱང་ཨ་ཁུ་རྡོ་རྗེ་འཆང་ཆེན་པོའི་ཞབས་ལ་གཏུགས་ཏེ་ཆོས་བཀའ་གསན་བཞེས་གནང་རྒྱུ་ངེས་པར་གལ་ཆེ་ཞེས་ནང་བཅར་གྱི་སློབ་སྟོན་གནད་འདྲིལ་དང་། རྒྱ་དངུལ་བཅུ་མགོ་མའི་གསོལ་རས་སོགས་བསྩལ། དེ་དུས་རྗེ་ཉིད་ནས་རྗེ་བཙུན་ཤེས་རབ་རྒྱ་མཚོའི་མཚན་ཐོས་པ་ཙམ་གྱིས་དད་གུས་དང་དགའ་སྤྲོ་ཆེན་པོས་འཕྲལ་དུ་ཕེབས་འདུན་བཟློག་ཏུ་མེད་པ་ཐུགས་ལ་འཁྲུངས་ཏེ་བཀའ་བཞིན་སྒྲུབ་པའི་དམ་བཅའ་ཕུལ་པར་གསུངས་པ་ཡང་སྐུ་ཚེ་དུ་མར་རིགས་ཀྱི་བདག་པོར་གྱུར་ཏེ་ཟབ་རྒྱས་གསུང་གི་བདུད་རྩིས་བསྐྱངས་པའི་སྔོན་གོམས་དགེ་བའི་བག་ཆགས་ཀྱི་མཐུ་མངོན་པར་གྱུར་པར་གདོན་མི་ཟ་བར་གནས་སོ། །

གདན་རབས་ཚིགས་བཅད་མ་ལས། 

དེ་ནས་བླ་མའི་བཀའ་ལུང་ཇི་བཞིན་དུ། །

བཀྲ་ཤིས་གཡས་སུ་འཁྱིལ་བའི་གདན་ས་རུ། །

འཇམ་མགོན་པྲཛྙཱ་སོགས་ཀྱི་མདུན་དྲུང་ནས། །

དབང་ལུང་རྗེས་གནང་ཁྲིད་སོགས་ཆོས་ཀྱི་རྒྱུན། །

བུམ་པ་གང་བྱོའི་ཚུལ་གྱིས་ལེགས་བཞེས་ཏེ། །

བསྟན་པའི་བདག་པོ་ཉིད་དུ་གྱུར་པ་ལགས། །ཞེས་བྱུང་། 

དེ་ནས་བླ་མ་རྡོ་རྗེ་འཆང་གི་བཀའ་བཞིན་ལོ་དེར་མདོ་སྨད་བཤད་གྲྭ་ཀུན་གྱི་དབུས་ན་རྒྱལ་མཚན་གྱི་ཏོག་ལྟར་མངོན་པར་མཐོ་བ་དཔལ་ལྡན་བཀྲ་ཤིས་འཁྱིལ་དུ་ཕེབས་ཏེ། ཡོངས་རྫོགས་བསྟན་པའི་མངའ་བདག་རྗེ་ཤེས་རབ་རྒྱ་མཚོ་དེ་ཉིད་ཀྱི་དགྱེས་ཞལ་མཇལ་བ་ཙམ་གྱིས་སྨྲ་མི་ཤེས་པའི་དགའ་སྤྲོ་དང་དད་གུས་ཚད་མེད་འཁྲུངས། རྗེ་བཙུན་སྒྲོལ་བའི་མགོན་པོས་ཕྱོགས་གཅིག་ཏུ་བསྒྲིགས་པའི་སྒྲུབ་ཐབས་རིན་པོ་ཆེའི་འབྱུང་གནས་ནས་བཤད་པའི་ཐུན་མོང་དང་ཐུན་མོང་མ་ཡིན་པའི་རྗེས་གནང་བཟླས་ལུང་བཀའ་གཏད་ལུང་དང་བཅས་པ་ཡོངས་སུ་རྫོགས་པ་དང་། གཡུ་ཐོག་པའི་ཆ་ལག་བཅོ་བརྒྱད་ཀྱི་ལུང་། གྲུབ་མཆོག་མི་ཏྲ་ཛོ་ཀིའི་ཐུགས་བཅུད་མི་ཏྲ་བརྒྱ་རྩར་གྲགས་པའི་ནང་ཚན་རྡོར་ཕྲེང་དང་ཐུན་མོང་མ་ཡིན་པའི་དབང་དྲུག་ཅུ་རེ་ལྔ་དང་། ཕྲེང་ཀྲ་སྦྲགས་པའི་དབང་ཞེ་ལྔ། མགོན་པོའི་བཀའ་ཆེན་བཅུ་གསུམ། རྣམ་སྲས་བཀའ་བཅོ་ལྔའི་རྗེས་གནང་སོགས་དབང་ལུང་ཁྲིད་རྗེས་གནང་སོགས་ཟབ་པ་དང་རྒྱ་ཆེ་བའི་ཆོས་རྒྱུན་མཐའ་ཡས་པ་གསན་བཞེས་གནང་། 

དགུང་ལོ་ཉི་ཤུ་བ་ལྕགས་ལུག་སྤྱི་ལོ་༡༨༧༡ལོའི་ཟླ་བཞི་བའི་ཚེས་བཅོ་ལྔར་རྗེ་བཙུན་ཤེས་རབ་རྒྱ་མཚོ་དཔལ་བཟང་བོ་ལས་བསྟན་པའི་གཞི་མ་སོ་སོ་ཐར་བའི་སྡོམ་པ་ཡོངས་སུ་རྫོགས་པའི་དངོས་པོ་ཡང་དག་པར་བཞེས་ཤིང་སྔར་གྱི་མཚན་ལ་མཁན་པོའི་མཚན་ཟུར་ཙམ་བསྣན་ནས། དགེ་འདུན་བསྟན་འཛིན་རྒྱ་མཚོ་དཔལ་བཟང་བོར་གསོལ། དེ་འཕྲལ་མཁས་དབང་དགེ་འདུན་བཟང་བོ་ལས་འདུལ་བའི་བསླབ་བྱ་ལག་ལེན་དང་བཅས་པའི་ཞིབ་ཁྲིད་ལེགས་པར་གསན་ཏེ། དགག་སྒྲུབ་གནང་གསུམ་གྱི་བཅས་མཚམས་ཕྲ་རགས་ཐམས་ཅད་ཐུགས་སུ་ཆུད་པར་མཛད་ཅིང་ལྟུང་བ་འབྱུང་བའི་སྒོ་ཁེགས་ངེས་གནང་། རྗེ་བཙུན་ཤེས་རབ་རྒྱ་མཚོ་དཔལ་བཟང་བོ་དང་། ཐུའུ་བཀྭན་ཡོངས་འཛིན་རིན་པོ་ཆེ་ཞང་སྟོན་བསྟན་པ་རྒྱ་མཚོ་སོགས་ལས་རྗེ་ཙོང་ཁ་བ་ཆེན་པོའི་བཀའ་འབུམ་ལས། སྔགས་རིམ་ཆེན་མོ། རིམ་ལྔ་གསལ་སྒྲོན། སྦས་དོན་ཀུན་གསལ། འགྲེལ་བ་བཞི་སྦྲགས། སྦྱིན་སྲེག་དངོས་གྲུབ་རྒྱ་མཚོ། ལམ་རིམ་ཆེ་ཆུང་། ལམ་རིམ་མཆན་བཞི་མ། ལེགས་བཤད་སྙིང་བོ། རྟེན་འབྲེལ་བསྟོད་པ། བསྐྱེད་རིམ་དངོས་གྲུབ་རྒྱ་མཚོ་སོགས་ཀྱི་བཤད་ལུང་། གྲུབ་མཐའ་རིན་ཆེན་ཕྲེང་བའི་གཟབ་བཤད་དང་རྣམ་བཤད་སྙིང་བོ་རྒྱན་གྱི་མཛུབ་ཁྲིད། བདེ་མཆོག་ལཱུ་དྲིལ་གཉིས་ཀྱི་བསྐྱེད་རྫོགས་ཀྱི་ཁྲིད་སོགས་ཁྲིད་ཀྱི་སྐོར་དང་། ཇོ་བོའི་ཆོས་ཆུང་བརྒྱ་རྩ། ལས་ཆེན་ཀུན་རྒྱལ་བས་མཛད་པའི་བཀའ་གདམས་ཆོས་འབྱུང་། སྐྱིད་ཤོད་སྤྲུལ་སྐུའི་བཀའ་འབུམ། ཐུའུ་བཀྭན་ཆོས་ཀྱི་ཉི་མའི་གསུང་འབུམ། ཏེ་ལོ། ནཱ་རོ། མར་བ་གསུམ་གྱི་རྣམ་ཐར། འབྲོང་རྩེ་ལྷ་བཙུན་པའི་འཇིགས་བྱེད་བསྐྱེད་རྫོགས། ཐང་སག་པའི་འཇིགས་བྱེད་བསྐྱེད་རྫོགས། ལམ་ཁྲིད་གསེར་གྱི་ཡང་ཞུན། དྭགས་པོ་སྒོམ་ཆེན་པའི་ལམ་རིམ་ཚིགས་བཅད་མ། བཀའ་གདམས་གླེགས་བམ། དཔེ་ཆོས་རྩ་འགྲེལ། བེའུ་བུམ་སྔོན་པོ་རྩ་འགྲེལ། ཆིག་ལབ་རིང་མོ། བྱང་སེམས་རྭ་སྒྲེང་བའི་བློ་སྦྱོང་། དིང་རི་བརྒྱད་ཅུ་བ། དབེན་ས་བཀའ་འབུམ་སོགས་ལུང་གི་སྐོར་མང་བོ་དང་། གསང་འདུས་བསྐྱེད་རྫོགས་ཀྱི་ཁྲིད། བླ་མ་མཆོད་པ་དང་ལམ་གཙོའི་ཁྲིད་སོགས་གསན་བཞེས་གནང་། མི་ཏྲ་རྡོར་ཕྲེང་དང་བརྒྱ་རྩ། ཟུར་བཀའི་དབང་མང་བོ། སྒྲུབ་ཐབས་རིན་འབྱུང་དང་རྒྱ་མཚོ། སྣར་ཐང་བརྒྱ་རྩ། ས་སྐྱའི་གསེར་ཆོས། འཇམ་དབྱངས་ཆོས་སྐོར། མགོན་པོ་བཀའ་བཅུ་གསུམ་དང་། རྣམ་སྲས་བཀའ་བཅོ་ལྔ་སོགས་སྤྱི་ཟུར་གྱི་རྗེས་གནང་སྐོར་དང་། བདེ་ལམ་གྱི་ཁྲིད་ཚར་གསུམ། འཇམ་དཔལ་ཞལ་ལུང་གི་ཁྲིད། བདེ་གསང་འཇིགས་གསུམ་གྱི་བསྐྱེད་རྫོགས་སོགས་ཁྲིད་ཀྱི་སྐོར་སོགས་བཤད་ལུང་གི་རྒྱུན་གང་བཞུགས། བཀའ་འགྱུར། རྒྱ་གཞུང་། རྗེ་ཡབ་སྲས་ལྔའི་གསུང་འབུམ་སོགས་ལུང་གིས་མཚོན་པའི་དབང་དང་རྗེས་གནང་ཁྲིད་ལུང་སོགས་མདོ་སྔགས་ཀྱི་ཟབ་ཆོས་མང་དུ་གསན་པས་ཆོས་རྒྱུན་གྱི་བང་མཛོད་དུ་གྱུར། 

སླར་རེབ་གོང་དུ་ཕེབས་ཏེ་སྐྱབས་རྗེ་ཨ་རོལ་རིན་པོ་ཆེའི་དྲུང་དུ་མཇལ་བར། བླ་མ་མཆོག་ནས་སྔར་མ་གསན་པའི་ཆོས་རྒྱུན་དུ་མ་གནང་དགོས་ཚུལ་གྱི་གསུང་ནན་ལྕི་བ་བསྩལ་བ་བཟློག་མ་ནུས་པར་འཕྲལ་དུ་དབུ་བཙུགས་ནས་རྗེ་ཤེས་རབ་རྒྱ་མཚོའི་གསུང་འབུམ་གྱི་ལུང་སོགས་ཕུལ་པར་བསྟུན། བླ་མ་རིན་པོ་ཆེ་ཐུགས་དགྱེས་པའི་རྩེར་སོན་ཅིང་ཡབ་རྗེ་གསེར་ཁང་བའི་རྣམ་ཐར་བདག་གིར་བཞེས་ཏེ་སྐུ་གཟན་སེར་པོ་བཞེས་འཕྲོ་སོགས་དངོས་འབུལ་བཅས་མགོན་པོ་གང་གི་ཆོས་ཀྱི་རྒྱལ་ཚབ་ཏུ་མངའ་གསོལ་བར་མཛད། སྐྱབས་རྗེ་དམ་པ་བློ་བཟང་ལུང་རིགས་རྒྱ་མཚོས་གཙོས་མཁས་གྲུབ་དམ་པ་དུ་མ་ལས་ཆོས་བཀའ་རྒྱ་མཚོ་ལྟ་བུ་གསན་བཞེས་གནང་བ་དང་། རི་ཁྲོད་དུ་ཕེབས་པ་ནས་ཚེ་འདིའི་འཁྲི་བ་བཙན་ཆོད་གནང་སྟེ་གནས་ངེས་མེད་དུ་ལོ་མང་བོའི་རིང་ལ་དགུན་བཅད་རྒྱའི་ངོས་ལམ་ཡོངས་རྫོགས་ཀྱི་ཉམས་བཞེས་དང་འབྲེལ་ལྷག་ལྷ་དུ་མའི་བསྙེན་སྒྲུབ་དང་ཡང་དག་འཇོག་ལ་ཁོར་མོ་ཡུག་ཏུ་གཞོལ་བར་མཛད་ཅིང་། དབྱར་བླ་བྲང་དུ་ཕེབས་ནས་རྗེ་ཤེས་རབ་རྒྱ་མཚོ་སོགས་ལས་ཆོས་རྒྱུན་རྣམ་དག་མཐའ་ཡས་པ་གསན་པ་མ་ཆག་པར་མཛད་དེ། གངས་ཅན་གྱི་ལྗོངས་འདིར་དར་རོ་ཅོག་གི་ཆོས་རྒྱུན་རྣམ་དག་མ་གསན་པ་མེད་པ་ལྟ་བུ་གནང་ནས་མང་ཐོས་རྒྱ་མཚོའི་ཕ་རོལ་ཏུ་སོན། 

ཤིང་ཕག་སྤྱི་ལོ་༡༨༧༥ལོའི་ཟླ་ལྔ་བའི་ནང་སྒིས་སྟེང་ཆོས་འཕེལ་གླིང་དུ་སྐྱབས་རྗེ་ཨ་རོལ་རྡོ་རྗེ་འཆང་ལ་རི་ཁྲོད་པའི་གཞུང་ནས་ཞུས་ངོར། ཡོངས་འཛིན་ཁྲིད་ཡིག་བློ་བཟང་དགོངས་རྒྱན་གྱི་སྟེང་ནས་བློ་སྦྱོང་དོན་བདུན་མའི་ཉམས་ཁྲིད་གནང་བ་གསན། འདི་སྐབས་ཆོས་གྲྭ་ཆེན་པོ་དཔལ་ལྡན་བཀྲ་ཤིས་འཁྱིལ་ནས་སྙིགས་མའི་དུས་སུ་རྒྱལ་བའི་དམ་ཆོས་འཛིན་པ་ལ་ཐུགས་བསྐྱེད་ཀྱི་མཐུ་མཚུངས་མེད་རྗེ་བཙུན་ཤེས་རབ་རྒྱ་མཚོ་དཔལ་བཟང་བོ་དེ་ཉིད་ཞིང་ཁམས་གཞན་དུ་དགོངས་པ་གཏད་པའི་གནས་ཚུལ་གསན་འཕྲལ་འཇིགས་སར་སྐྱེལ་མས་བོར་བ་ལྟ་བུའི་ཐུགས་ངལ་ཚད་མེད་པ་དང་བཅས་སྐྱབས་མགོན་རྡོ་རྗེ་འཆང་དང་རི་ཁྲོད་པ་རྣམས་ལ་སྐུ་འགྱེད་ཞུས་ཤིང་། ཆུ་སྟོད་ཟླ་བའི་ཚེས་བཅོ་བརྒྱད་ཀྱི་དགོང་མོར་བླ་མ་རིན་པོ་ཆེ་དེ་སྔོན་ལྔ་བའི་ནང་ཞི་བར་མནལ་སྟབས་ཁོང་གི་རྣམ་ཐར་དང་བཀའ་དྲིན་དྲན་པས་ཡིད་གཏིང་ནས་སྐྱོ་བ་ཞིག་བྱུང་སྟེ། ལེགས་བཤད་འཚོལ་ལ་མའི་གསོལ་འདེབས་བཅས་སྙིང་ཐག་པ་ནས་གསོལ་བ་དྲག་ཏུ་བཏབ་སྟེ་ཉལ་བའི་རྨི་ལམ་དུ་བཀའ་ཆོས་ཤིག་ལ་སོང་བར་སྐུ་ཞབས་ཐར་ཤུལ་རིན་པོ་ཆེ་ཡིན་རྒྱུ་བ་ཞིག་གིས་གསུང་ཟབ་མོ་མང་བོ་ཞིག་གནང་བྱུང་བ་ཐོས་པས་བདག་གི་ཡིད་ལ་ཁོང་གིས་བཀའ་ཆོས་མ་གནང་བ་མ་གཏོགས་གནང་ན་ངེས་པར་གཞན་དང་མི་འདྲ་སྙམ་དུ་དད་པ་བྱས་པས་ཨ་ཁུ་རྡོ་རྗེ་འཆང་གི་གསུང་གདངས་ལྟ་བུའི་སྒྲ་གྲགས་པར་ཡར་བལྟས་པའི་ཨ་ཁུ་བཀའ་དྲིན་ཅན་དངོས་སུ་མཇལ་བ་ལྟར་བཞུགས་འདུག་པས་གསུང་བཤད་ཤིན་ཏུ་འགང་ཆེ་བ་དུ་མ་ཞིག་གནང་བའི་མཐར་ཐུགས་བརྩེ་བའི་ཉམས་ཀྱིས་ཡུན་རིང་སྤྱན་རས་བཙའ་བ་ཞིག་རྨིས། ཞེས་གསུངས་པ་ནི་རྗེ་བཙུན་བླ་མ་ཉིད་ཐུགས་ཤིན་ཏུ་སྒམ་ཞིང་བཀའ་གདམས་རྣམ་ཐར་གཙང་མ་ལྷུར་བཞེས་མཛད་པའི་དབང་གིས་དེ་ཙམ་ལས་མ་གསུངས་པ་མ་གཏོགས། དོན་དུ་སྒྲ་སྒྱུར་མར་བས་པཎ་ཆེན་ནཱ་རོ་བ་འདས་པའི་རྗེས་སུ་ལན་ལྔའི་བར་དུ་ཞལ་གཟིགས་ཤིང་གདམས་ངག་གསན་པ་དང་། མཁས་གྲུབ་རིན་པོ་ཆེ་ལ་རྗེ་ཐམས་ཅད་མཁྱེན་པ་མྱ་ངན་ལས་འདས་པའི་རྗེས་སུ་ལན་ལྔའི་བར་དུ་ཞལ་གཟིགས་ཤིང་གདམས་པ་མཐའ་ཡས་པ་བསྩལ་པའི་ཚུལ་རྣམ་ཐར་རྣམས་སུ་གསལ་བ་དང་ཆ་མཐུན་པར་རྗེ་བཙུན་བླ་མ་མཆོག་ལ་ཡང་ཁྱབ་བདག་པྲཛྙཱའི་མཚན་ཅན་ཉིད་ཞི་བར་མནལ་བའི་རྗེས་སུ་སླར་ཡང་དགྱེས་ཞལ་དངོས་སུ་བསྟན་ཏེ་གདམས་པའི་བདུད་རྩི་བསྩལ་པར་གོར་མ་ཆག་པར་གསུངས་ལ། རྗེ་ཉིད་ཀྱིས་མཛད་པའི་སྙན་དངགས་དཔེར་བརྗོད་ལེགས་བཤད་བདུད་རྩིའི་མཆོད་ཡོན་དུ་ཉམས་ལྡན་རྒྱན་གྱི་དཔེར་བརྗོད་སྐབས། གང་ཉིད་ཞི་བར་གཞོལ་ཚེ་གདུང་ཤུགས་ཀྱིས། །མཇལ་ཕྱིར་ཕ་རོལ་ལམ་དུ་བགྲོད་བརྩམས་པ། །ཁྱབ་བདག་བླ་མ་དམ་པའི་དགྱེས་འཛུམ་ཞལ། །མངོན་སུམ་གྱུར་འདི་རྨི་ལམ་མིན་ནམ་ཅི། །ཞེས་གསུངས་པའང་དོན་འདི་ལ་དགོངས་པར་སྣང་། 

མེ་གླང་སྤྱི་ལོ་༡༨༧༧ལོར་མཁས་པའི་དབང་ཕྱུག་ཚངས་སྲས་དགྱེས་པའི་བློ་ལྡན་ནམ་ཡོངས་གྲགས་ལ་ཨ་ཁུ་ཐུབ་བསྟན་ཞུ་བ་དེ་ཉིད་ལས། སྙན་ངག་མེ་ལོང་དབྱངས་ཅན་དགྱེས་གླུ་དང་སྦྲགས་ཏེ་བོད་མཁས་འགྲེལ་བ་དང་དཔེར་བརྗོད་སོགས་ཀྱིས་ཟུར་བརྒྱན་པའི་གཟབ་ཁྲིད་ཞིབ་རྒྱས་སུ་བསྩལ་པ་གསན་ཅིང་། རྩོམ་རྒྱུགས་ཕུལ་པ་ལ་བདག་གིས་ཀྱང་རྩོམ་འདི་འདྲ་ཡོང་དཀའ། ཁོང་སྔོན་ནས་སྙན་ངག་གི་ཕ་རོལ་ཏུ་ཕྱིན་འདུག་ཅེས་བསྔགས་བརྗོད་ཚད་མེད་པ་གནང་བར་གྲགས། 

ས་ཡོས་སྤྱི་ལོ་༡༨༧༩ལོར་གནས་ལྔ་གཟིགས་པ་རྗེ་ཚྭ་འདམ་པ་ཆེན་པོ་ལས་སྒྲའི་བསྟན་བཅོས་ཆེན་པོ་དབྱངས་ཅན་བྱཱ་ཀ་ར་ཎ་རྩ་འགྲེལ་གྱི་ཞིབ་ཁྲིད་མནོས་ཏེ་ས་རིས་ཕལ་ཆེར་རྫོགས་པར་ཉེ་བར་གནང་། རི་ཁྲོད་དུ་ཕེབས་འཕྲལ་ལོ་བཞིའི་རིང་དབྱར་ཐོག་བླ་བྲང་དུ་ཕེབས་པ་མ་གཏོགས་ལོ་བཅུ་བདུན་ཙམ་གྱི་རིང་ལ་ཕེབས་བཞུད་དང་དགུན་མཚམས་མིན་པའི་སྐབས་ཐམས་ཅད་དུ་ཨ་རོལ་རིན་པོ་ཆེ་མཆོག་གི་ཉེ་འཁོར་དུ་བཞུགས་བཞིན་པ་ཡིན་པས་བཀའ་ཆོས་གང་གནང་ཕལ་ཆེར་མ་གསན་པ་མེད་པར་གནང་ངོ་། །

དགུང་ལོ་ཉེར་དགུ་བ་ལྕགས་འབྲུག་སྤྱི་ལོ་༡༨༨༠ལོའི་ཟླ་ལྔ་བའི་ནང་ཆེད་གཉེར་གྱིས་རྙེ་དགོན་ལྷུན་གྲུབ་ཆོས་རྫོང་དུ་ཕེབས་ཏེ། མདོ་རྒྱུད་རྒྱ་མཚོའི་མངའ་བདག་ཡོངས་ཀྱི་དགེ་བའི་བཤེས་གཉེན་ཆེན་པོ་བདེ་ཆེན་ས་བགོས་རབ་འབྱམས་པ་ཚུལ་ཁྲིམས་བསྟན་འཛིན་དཔལ་བཟང་བོ་ལས། སྙིགས་དུས་ཀྱི་ཐམས་ཅད་མཁྱེན་པ་ཡབ་རྗེ་གསེར་ཁང་བ་ཆེན་པོ་བློ་བཟང་བསྟན་འཛིན་རྒྱ་མཚོ་ལས་བརྒྱུད་པའི་ཆེ་བ་བཞི་ལྡན་བྱང་ཆུབ་ལམ་གྱི་རིམ་པའི་བཤད་ལུང་། སྐུ་མཆེད་བསྟན་པ་རྒྱ་མཚོ། ཞྭ་དམར་ངག་དབང་བསྟན་འཛིན་རྒྱ་མཚོ། རྙེ་བློ་བཟང་བསྟན་པའི་རྒྱལ་མཚན་ཏེ་ཕྱོགས་གླང་ཆོས་གྲགས་ལྟ་བུའི་རིགས་པའི་དབང་ཕྱུག་རྣམ་པ་གསུམ་ལས་གསན་པའི་གསུང་བཤད་ཀྱི་རྒྱུན་ལུང་དང་རིགས་པའི་ལམ་ནས་དྲངས་པ་དགག་སྒྲུབ་ཀྱི་སྤྲོས་པ་རྒྱ་ཆེན་པོ་དང་བཅས་ཆོས་ཐུན་ཤིན་ཏུ་རིང་བ་ཉིན་ཉེར་གཉིས་ཀྱི་བར་དུ་བསྩལ་པ་གསན་པས་སྔོན་མེད་ལེགས་པར་བཤད་པའི་བདུད་རྩིས་ཐུགས་ཀྱི་བུམ་བཟང་ཡོངས་སུ་གཏམས་པར་མཛད་དེ་རེག་ཟིག་ཀྱང་མཛད་དོ། །

ལྕགས་སྦྲུལ་སྤྱི་ལོ་༡༨༨༡ལོའི་དགུན་ཁར་རེབ་གོང་རྒྱལ་བོ་གླིང་ཚང་གི་སྡེ་དགོན་དབེན་གནས་རི་ཁྲོད་ཚ་རྒྱལ་ཐར་བ་གླིང་དུ་ཕེབས་ནས། ཚེ་ཡི་རིག་བྱེད་འཛིན་པ་ཆུ་ཆཱ་འཚོ་བྱེད་ལས་དཔལ་ལྡན་རྒྱུད་བཞི་རྩ་འགྲེལ་དང་། རྗེས་འབྲང་གི་ཡིག་ཆ་དུ་མ་གུང་བསྒྲིགས་ཏེ་གསོ་རིག་གཞུང་གི་མན་ངག་ལ་སྦྱངས་པ་ཕུལ་ཕྱིན་མཛད། 

དགུང་ལོ་སོ་གཅིག་པ་ཆུ་རྟ་སྤྱི་ལོ་༡༨༨༢ལ་ཉ་ལུང་སྔགས་རམས་པ་དགེ་འདུན་བསྟན་འཛིན་མཆོག་ལས། དཔལ་དུས་ཀྱི་འཁོར་ལོའི་རྒྱུད་ཀྱི་དགོངས་དོན་ཕྱི་དུས་ཀྱི་འཁོར་ལོ་སྐར་རྩིས་རི་མོས་གཏན་ལ་འབེབ་ཚུལ། ལྔ་བསྡུས། སྒྲ་གཅན། གདོང་མཇུག ལོ་འཕོ། ཟླ་འཕོ། གཟའ་འཛིན་གཟའ་ལྔ། དེ་དག་གི་མྱུར་རྩིས། ཉི་ལྡོག་འཁོར་ལོ། དུས་སྦྱོར། ཞག་གསུམ་རྣམ་དབྱེ་གོ་ལ་བྲི་ཚུལ་སོགས་ཞིབ་སྦྱངས་མཛད། 

སྤྲུལ་པའི་སྐྱེས་མཆོག་དམ་པ་ཀིརྟིའི་མཚན་ཅན་ལས། གངས་ཅན་བོད་ཀྱི་བརྡ་སྤྲོད་ཀྱི་ཕྱི་མོ་སུམ་རྟགས་སོགས་སྦྱང་བ་འཕྲིགས་སུ་ཆུད་པར་བྱས། སྔ་སོར་ཆུ་རྟ་ལོར་བླ་བྲང་བཀྲ་ཤིས་འཁྱིལ་དུ། མཁན་ཆེན་ངག་དབང་ཐུབ་བསྟན་རྒྱ་མཚོ་མཆོག་གིས་བཀའ་འགྱུར་གྱི་ལུང་གནང་སྐབས། རྗེ་ཚཱ་འདམ་པ་ཆེད་གཉེར་གྱིས་ཕེབས་ཏེ་གསན་ནས་སླར་རེབ་གོང་དུ་ཕེབས་འཕྲལ། རྗེ་ཉིད་ཀྱིས་ཡང་ཡང་ཞུས་པས་ཤེས་བྱའི་དཀྱིལ་འཁོར་མ་ལུས་པ་གཟིགས་པའི་མཚོ་སྔོན་བཀའ་འགྱུར་བ་ཆེན་པོ་འཇམ་དབྱངས་ཚུལ་ཁྲིམས་རྒྱ་མཚོ་མཆོག་ལས་ཤིང་སྤྲེལ་ཟླ་དང་བོའི་ཚེས་བཅུ་གསུམ་ནས་དབུ་བཙུགས་ཏེ་རྒྱལ་བའི་བཀའ་འགྱུར་རོ་ཅོག་གི་བཀླག་ལུང་གསན་བཞེས་མཛད། 

དགུང་ལོ་སོ་བཞི་བ་ཤིང་བྱ་སྤྱི་ལོ་༡༨༨༥ལོའི་ཟླ་གཉིས་པའི་ཚེས་མགོར་སྙིགས་དུས་ཀྱི་ཐམས་ཅད་མཁྱེན་པ་སྐྱབས་རྗེ་ཨ་རོལ་རྡོ་རྗེ་འཆང་གཉན་ཐོག་དགོན་པར་བཞུགས་པ་དང་མཇལ་བར། སྔ་མོ་ནས་བཀའ་ཆོས་གནང་དགོས་ཚུལ་གྱི་ཐུགས་བཀོད་སྐབས་རྣམས་སུ་ཉིད་སྔགས་ཕྱོགས་ལ་འདྲིས་ཆ་ཆུང་སྟབས་དབང་ཆེན་གནང་སོང་ཟེར་བ་ཞིག་གཏན་ནས་བྱེད་རྒྱུ་མིན་ཞེས་ཡང་ཡང་ཞུ་བཞིན་པ་ཡིན་ཀྱང་། འདི་དུས་ཡང་བསྐྱར་གྱིས་ཁོང་ནི་རྒས་པས་ནོན་ཏེ་ཕུང་བོས་མི་ལྕོགས་པར་འདུག་པས་ཁྱེད་ཀྱིས་དབང་རེ་ཅིས་ཀྱང་གནང་དགོས་པའི་ཞལ་གསུང་ནན་ཆེན་བསྩལ་པས། ཉིན་གཅིག་ཁ་དར་བཅས་རྭ་རྒྱའི་གྲྭ་བ་གཉིས་ལ་འཇིགས་བྱེད་དཔའ་བོ་གཅིག་པའི་དབང་ཞིག་ཅིས་ཀྱང་གནང་དགོས་ཞེས་དབང་ཆས་སོགས་སྐུ་མདུན་ནས་བསྐུར་བྱུང་བས། བཀའ་ནན་བསྩལ་པ་བཟློག་མ་ནུས་པར་དེ་འཕྲལ་སྒོ་དམར་དགའ་ལྡན་ཕུན་ཚོགས་གླིང་དུ་གཞིས་བྱེས་ཀྱི་གསན་མཁན་སུམ་བརྒྱ་ལྷག་ལ། སྟ་གོན་སྔོན་དུ་འགྲོ་བའི་བཅོམ་ལྡན་འདས་འཇིགས་མཛད་དུས་དགྲའི་དབང་བོ་བདུད་ལས་རྣམ་པར་རྒྱལ་གྱི་དབང་ཆེན་དམ་པའི་ཕྱག་བཞེས་བཞིན་དུ་གསུང་བཤད་འབྱམས་སུ་ཀླས་པས་བརྒྱན་ཏེ་བསྩལ་པ་འདི་ཉིད་སྐུ་ཚེ་འདིར་བླ་མེད་ཀྱི་དབང་གནང་བའི་ཐོག་མ་ཡིན་པར་གསུངས། ས་ག་ཟླ་བའི་ཚེས་བཅོ་ལྔ་ལ་བཤད་སྒྲུབ་བསྟན་པའི་འབྱུང་གནས་རོང་བོ་དཔལ་གྱི་དགོན་ཆེན་བདེ་ཆེན་ཆོས་འཁོར་གླིང་དུ་ཕེབས་ཏེ། ཁྲི་ལས་ཐོག་པ་རྫོང་ཆུང་སྤྲུལ་སྐུ་འཇིགས་མེད་བསྟན་པའི་རྒྱལ་མཚན། བྱང་རྩེ་མཁན་སྤྲུལ། ལྕང་ལུང་ཁྲི་རྒན་མཆོག་སྤྲུལ་དམ་པ། བཀའ་རབ་འབྱམས་དགེ་བའི་བཤེས་གཉེན་སོགས་གསན་མཁན་བཞི་བརྒྱ་ཉེ་བ་ལ། བྱང་ཆུབ་ལམ་རིམ་ཆེན་མོའི་བཤད་ལུང་སོགས་གནང་། དྲུག་པའི་ཚེས་མགོར་རོང་བོ་བཀྲ་ཤིས་འཁྱིལ་བའི་རྒན་པས་དབྱར་བཞུགས་ཞུས་པ་བཞིན་དུ། ཤར་རབ་དགའ་ནས་དབྱར་ཁས་ལེན་དང་། ཨ་རོལ་རྡོ་རྗེ་འཆང་གི་གསུང་འབུམ་གྱི་ལུང་གནང་། ཤར་རབ་དགའི་གནས་བསྟོད་པད་དཀར་ཆུན་པོ་ལྗགས་རྩོམ་མཛད། 

ལྔ་རིག་སྨྲ་བའི་རྗེ་ཚཱ་འདམ་པ་ཆེན་པོའི་དྲུང་དུ་སྒྲ་བ་ཆོས་དཔལ་དང་ཨ་ཀྱཱ་ཡོངས་འཛིན་གཉིས་ཀྱི་འགྲེལ་བ་བསྡུར་ཏེ་སྡེབ་སྦྱོར་རིན་ཆེན་འབྱུང་གནས་ཞིབ་ཁྲིད་ཞུས། ལོ་འདིའི་ལྔ་བའི་ཚེས་མགོར་བླ་བྲང་དུ་ཕེབས་ཏེ་མཁས་གྲུབ་གཉིས་ལྡན་གྱི་མཁན་ཆེན་ངག་དབང་ཐུབ་བསྟན་རྒྱ་མཚོར་མཇལ་ཏེ། གསུང་ཆོས་ཞུས་ངོར་བླ་མཆོད་དང་ཕྱག་ཆེན་སྦྲགས་མ་དང་། གླང་རི་ཐང་བའི་བློ་སྦྱོང་ཚིགས་བརྒྱད་མ་དང་། གྲུབ་ཆེན་མི་ཏྲ་ཛོ་ཀིའི་གདམས་པ་སྙིང་བོ་དོན་གསུམ་པ་དང་། དགེ་ལྡན་སྙན་བརྒྱུད་ཀྱི་ལྟ་ཁྲིད་དྲན་པ་བཞི་ལྡན་གྱི་ཁྲིད་སོགས་བཀའ་ཆོས་མང་བོ་གསན། 

རྗེ་གནས་ལྔ་གཟིགས་པ་ཚྭ་འདམ་པ་ཆེན་པོ་འཇམ་དབྱངས་ཚུལ་ཁྲིམས་རྒྱ་མཚོ་ལས་སྒྲའི་བསྟན་བཅོས་དབྱངས་ཅན་བྱཱ་ཀ་ར་ཎ་རྩ་འགྲེལ་གྱི་ཞིབ་ཁྲིད་མནོས་ཏེ་ས་རིས་ཕལ་ཆེར་རྫོགས་པར་མཛད། ཡང་རྗེ་འདི་ཉིད་ལས་སྒྲ་བ་ཆོས་དཔལ་དང་། ཨ་ཀྱཱ་ཡོངས་འཛིན་སོགས་ཀྱི་འགྲེལ་བ་བསྡུར་ཏེ་སྡེབ་སྦྱོར་རིན་ཆེན་འབྱུང་གནས་ཀྱི་ཞིབ་ཁྲིད་གསན་པས་མཚོན། ཤེས་བྱ་རིག་པའི་གནས་མཐའ་ཡས་པར་སྦྱངས་པ་མཐིལ་ཕྱིན་གནང་ནས་གནས་ལྔ་རིག་པའི་པཎྜི་ཏ་ཆེན་པོར་གྱུར་ཏོ། །

རི་ཁྲོད་དུ་ཕེབས་པ་ནས་ཉམས་བཞེས་ལ་གཞོལ་བའི་སྐབས་ཧྲིལ་བོར་གྲུབ་དབང་སྐལ་ལྡན་རྒྱ་མཚོའི་རྣམ་ཐར་བཞིན་བཤད་སྒྲུབ་ཟུང་འབྲེལ་གནང་ཞིང་། དེ་ཡང་འབྱོན་བཞུད་དང་བཀའ་ཆོས་གསན་གནང་གི་སྐབས་རེ་འགའ་མ་གཏོགས་ཐུན་བཞིའི་རྣལ་འབྱོར་རྒྱུན་འཁྱོངས་སྒོས་ལམ་རིམ་གཉིས་ཀྱི་ཉམས་བཞེས་ལ་གཞོལ་བར་མཛད་པའི་ཞོར་བཀའ་བསྟན་མང་བོར་གཟིགས་རྟོག་ཞིབ་ཏུ་གནང་ཞིང་། ཐུན་མཚམས་རྣམས་སུ་གཞུང་བརྒྱའི་མངའ་བདག་བཤེས་གཉེན་ཆེན་པོ་སངས་རྒྱས་ཆོས་གྲགས་སོགས་ལས་བཀའ་པོད་མང་བོའི་མཛུབ་ཁྲིད་གསན་ཅིང་། སྨྲ་བའི་དབང་ཕྱུག་ཧོར་ཆེན་ཡེ་ཤེས་རྒྱ་མཚོ་སོགས་དང་མཉམ་དུ་བརྒལ་བརྟགས་ཀྱིས་གཏན་ལ་ཕབ་པས། རབ་འབྱམས་གཞུང་བརྒྱའི་མངའ་བདག་དང་གྲུབ་མཐའ་རྒྱ་མཚོའི་ཕ་རོལ་ཏུ་ཕྱིན་པ་ཡིན་ནོ། །

གདན་རབས་ཚིགས་བཅད་མ་ལས། 

སྔོན་བྱོན་ཀུན་དགའ་བོ་ཡི་རྣམ་ཐར་བཞིན། །

བླ་མའི་ཉེ་གནས་འཇམ་དབྱངས་དཔལ་ལྡན་གྱིས། །

གང་གི་ཚེམས་གཅིག་ཀུན་སྤངས་མཚན་ཐོ་བཅས། །

ཕུལ་ཚེ་བླ་མའི་རྒྱལ་ཚབ་ཉིད་དུ་བཞུགས། །ཞེས་བྱུང་། 

དགུང་ལོ་སོ་ལྔ་བ་མེ་ཁྱི་སྤྱི་ལོ་༡༨༨༦ལོའི་རྒྱལ་ཟླའི་ཚེས་བཅོ་ལྔའི་ཉིན་སྐྱབས་རྗེ་ཨ་རོལ་རྡོ་རྗེ་འཆང་མཆོག་གིས་མཛད་པའི་མཐའ་མ་བདག་གིར་བཞེས་པའི་སྐབས་སུ། ཐུགས་དམ་གསལ་འདེབས་དང་། མཆོད་འབུལ་རྒྱ་ཆེར་མཛད་ཅིང་། མཆོག་སྤྲུལ་མྱུར་འབྱོན་གྱི་སྨོན་ཚིག་ཀྱང་ལྗགས་རྩོམ་མཛད། རྒྱལ་ཟླའི་ཚེས་བཅོ་ལྔའི་ཉིན་འདིར། བཀའ་སློབ་རི་ཁྲོད་པ་བླ་གྲྭ་མང་ལྷན་རྒྱས་ཏེ། གདུང་མདུན་མཆོད་འབུལ་སོགས་མཛད་པའི་དབུས་སུ། སྔོན་སྟོན་པའི་འཁོར་དུ་བྱོན་པའི་ཀུན་དགའ་བོས་སྟོན་པ་ལ་རིམ་གྲོ་སྒྲུབ་པའི་རྣམ་ཐར་བཞིན་མཉེས་པ་གསུམ་གྱི་སྒོ་ནས་དཔལ་ལྡན་བླ་མ་སྐྱབས་རྗེ་ཨ་རོལ་རིན་པོ་ཆེས་ཟིན་པའི་ཉེ་གནས་ཆེན་པོ་རྗེ་བཙུན་འཇམ་དབྱངས་དཔལ་ལྡན་མཆོག་གིས་བླ་མ་རྡོ་རྗེ་འཆང་གི་ཚེམས་དང་། ལྷ་རྫས་ནང་མཛོད་ཟུང་འབྲེལ་བཅས་རི་ཁྲོད་པའི་མཚན་ཐོ་རྗེ་ཉིད་ཀྱི་ཕྱག་ཏུ་ཕུལ་ཏེ་སྐྱབས་རྗེ་བླ་མ་མཆོག་གི་ཐུགས་དགོངས་བཞིན་དུ་རྒྱལ་བ་ཚེ་མཐའ་ཡས་པའི་ངོ་བོར་བརྟན་པར་བཞུགས་ནས། འཇམ་མགོན་སྙན་བརྒྱུད་ཀྱི་ལུང་རྟོགས་ཆོས་ཀྱི་རྒྱལ་སྲིད་ལ་བཤད་སྒྲུབ་གསེར་གྱི་འཁོར་ལོས་དབང་བསྒྱུར་ཏེ། བཀའ་སློབ་བྱ་བཏང་རི་ཁྲོད་འཛིན་པ་རྣམས་ཀྱིས་གཙོས་སྐལ་བཟང་གདུལ་བྱའི་ཚོགས་རྣམས་ལེགས་བཤད་བདུད་རྩིས་ཅི་དགར་སྐྱོང་དགོས་ཞེས་འཇམ་མགོན་སྒྲུབ་བརྒྱུད་བསྟན་པའི་བདག་པོ་གང་གི་རྒྱལ་ཚབ་དམ་པར་མངའ་གསོལ་ཞིང་། རྗེ་ཉིད་ནས་བླ་མའི་སྐུ་ཡོན་དང་བཀའ་དྲིན་དྲན་པས་སྤྱན་ཆབ་མང་དུ་གསིལ་བཞིན་ཞལ་བཞེས་ཀྱི་གསུང་ལན་དང་། བསླབ་བྱ་ཡིད་ཀྱི་གསོས་སྨན་དུ་འགྱུར་ངེས་པ་བསྩལ་ཏོ། །

གདན་རབས་ཚིགས་བཅད་མ་ལས། 

མ་ཅིག་གུང་རུ་ཡེ་ཤེས་མཁའ་འགྲོ་མས། །

བྱང་རྒྱུད་སྐྱེས་རི་མཐོན་པོའི་ཉེ་འདབས་ན། །

མགོན་པོ་ཁྱོད་ཀྱི་གདན་ས་ཡོད་དོ་ཞེས། །

གསལ་བར་ལུང་བསྟན་ཡོད་པ་དེ་བཞིན་དུ། །ཞེས་བྱུང་། 

གུང་རུ་ཡེ་ཤེས་མཁའ་འགྲོ་མ་དཀོན་མཆོག་རིག་འཛིན་དབང་མོར་འཕྲལ་ཕུགས་གང་སར་རེབ་གོང་དང་། མཚེར་མོ་ཆེ་གཉིས་གང་ལེགས་སོགས་བརྟག་པ་ཞུས་པར། ཕག་བྱི་གཉིས་ལ་ཅུང་འཚུབ་པས། རེབ་གོང་དུ་ཡུན་རིང་མ་བསྡད་ན་བཟང་། འདུ་འཛིའི་བྲེལ་གཡེང་བསྐྱུངས་ཏེ་གནས་སྐབས་མཚེར་མོ་ཆེ་རང་དུ་མཚམས་བྱས་ན་ལེགས་ཤིང་། སླར་དེ་དང་། རེབ་གོང་གཉིས་ཀར་ཕར་ཕེབས་ཚུར་ཕེབས་གནང་ན་ཨེ་དགའ་གསུངས་པ་དང་། སྐྱབས་རྗེ་ཤིང་བཟའ་རིན་པོ་ཆེས་བརྟག་པ་མཛད་དེ་རྣམ་པ་གཉིས་ཀྱིས་ཞལ་མཐུན་པར་རེབ་གོང་དུ་ཡུན་རིང་མ་བཞུགས་པར་བྱང་རྒྱུད་ཙོང་ཁའི་སྐྱེས་རི་མཐོན་པོའི་ཉེ་འདབས་མཚེར་མོ་ཆེར་ཕེབས་ན་མགོན་པོ་ཁྱོད་ཀྱི་གདན་ས་གནས་དེར་ཡོད་དོ་ཞེས་གསལ་བར་ལུང་བསྟན་འཁྲུལ་མེད་གསུངས་ཡོད་པ་དེ་བཞིན་དུ་གནང་བའི་ཚུལ་ནི། 

གདན་རབས་ཚིགས་བཅད་མ་ལས། 

ངོ་མཚར་སྐྱེས་རིའི་བསམ་གཏན་ཆོས་སྡིངས་སུ། །

ཞབས་ཀྱི་པདྨོ་ཐོག་མར་བཀོད་པ་ནས། །

ཆོས་རྒྱུན་མང་བོ་ཕྱོགས་འདིར་སྤེལ་བྱས་ཏེ། །

བསྟན་པ་ཉི་འོད་བཞིན་དུ་གསལ་བར་མཛད། །

དད་གུས་མི་འགྱུར་རྩ་བ་རབ་ཏུ་བརྟན། །

མངའ་འབངས་ཡལ་འདབ་མ་ལུས་ཕྱོགས་སུ་རྒྱས། །ཞེས་བྱུང་། 

རྗེ་ཉིད་དགུང་ལོ་སོ་དྲུག་ཏུ་སོན་པ་མེ་ཕག་སྤྱི་ལོ་༡༨༨༧ལོར། སྐྱབས་མགོན་ལུང་རིགས་རྒྱ་མཚོ་དང་། ཤིང་བཟའ་རྡོ་རྗེ་འཆང་། གུང་རུ་ཚང་རྣམས་ཀྱི་ལུང་བསྟན་དང་། རྗེ་ཉིད་ཀྱི་རྨད་དུ་བྱུང་བའི་ཐུགས་བསྐྱེད་ཀྱི་མཐུས་རྨ་ཉིན་གྲུབ་པའི་བསྟི་གནས་མཚེར་མོ་ཆེའམ་སྐྱེས་རིའི་བསམ་གཏན་ཆོས་སྡིངས་སུ་རེབ་གོང་ནས་སློབ་བུ་བྱ་བཏང་བ་བཅུ་ཕྲག་དུ་མ་དང་བཅས་བཅོམ་ལྡན་འཁོར་བཅས་ཐོག་མར་ཞབས་ཀྱིས་བཅགས་ཤིང་གཞུང་ལུགས་འཆད་སྤེལ་ཉམས་བཞེས་གནང་། ཚེ་འདིའི་འཁྲི་བ་བཙན་ཆོད་ཀྱིས་ཐོས་དོན་རྒྱུད་ལ་སྦྱོར་བའི་ཀུན་སྤངས་སོགས་ཐར་འདོད་སྐྱེ་བོ་པདྨའི་ཚལ་ལ་བུང་བ་འདུས་པ་བཞིན་རྗེ་ཉིད་ཀྱི་དྲུང་དུ་གདན་འཛོམས་ཏེ་ལེགས་གསུང་སྦྲང་རྩིའི་བཅུད་ལ་ངོམས་མེད་དུ་རོལ་མཁན་མང་བོ་བྱུང་ཞིང་། ཁྱད་པར་ས་གླང་སྤྱི་ལོ་༡༨༨༩ལོར་སྐྱབས་རྗེ་ཐར་ཤུལ་རིན་པོ་ཆེའི་གདུང་མཆོད་དུ་དམིགས་ཏེ། མགོན་པོ་ཉིད་ཀྱིས་གཙོས་ཉེ་འཁོར་དུ་བཞུགས་པའི་སྒྲུབ་པའི་རྒྱལ་མཚན་འཛིན་པ་བཅུ་ཕྲག་ལྔ་ལྷག་ཞལ་འཛོམས་ཏེ། བྱ་ཁྱུང་གསེར་གདུང་ཆེན་མོའི་དྲུང་དུ་མཆོད་འབུལ་རྒྱ་ཆེར་གནང་ནས་རྒྱལ་སྲས་ཀྱི་སྨོན་ལམ་རླབས་པོ་ཆེ་ཐུགས་ཉམས་སུ་བསྟར་བ་ན། ལྷ་ཁང་ཕྱི་ནང་དུ་དྲི་བཟང་བོས་ཁྱབ་ཅིང་མཆོད་རྟེན་ལས་བདུད་རྩི་ཤིན་ཏུ་མང་བོ་བབས་པ་སོགས་བཀྲ་ཤིས་དང་དགེ་བའི་མཚན་མ་རྒྱ་ཆེར་བྱུང་བ་ནས་བཟུང་། ལོ་རེ་བཞིན་འཆར་ཅན་མཆོད་འབུལ་ཆེན་མོ་བཙུགས་ཏེ་འགྲོ་མགོན་ཉིད་ཀྱིས་གཙོས་ཀུན་སྤངས་རི་ཁྲོད་འཛིན་པ་བརྒྱ་ཕྲག་དུ་མའི་འཁོར་དང་བཅས་གནས་ངེས་མེད་དུ་བཤད་སྒྲུབ་ཀྱི་བྱ་བ་རླབས་པོ་ཆེ་མཛད་བཞིན་ལྷོ་བྱང་གི་སྡེ་དགོན་དུ་མར་བྱོན་ཏེ། འཆར་ཅན་གྱི་མཆོད་འབུལ་གནང་བ་ཡང་མ་ཆག་པར་མཛད་པ་ཡིན་ནོ། །

ལྕགས་ཡོས་སྤྱི་ལོ་༡༨༩༡ལོར་ཨ་རོལ་རྡོ་རྗེ་འཆང་གི་རྣམ་ཐར་བརྩམས་གྲུབ་བྱུང་བའི་པར་ཡིག་དང་། ཐར་ཤུལ་རིན་པོ་ཆེའི་གསུང་འབུམ་གྱི་པར་ཡིག་ཞུ་དག་གནང་། ཆུ་འབྲུག་སྤྱི་ལོ་༡༨༩༢ལོར་སྐྱབས་རྗེ་ཐར་ཤུལ་རིན་པོ་ཆེའི་གསུང་འབུམ་དཀར་ཆག་ལྗགས་རྩོམ་གནང་། ལོ་འདིའི་ཧོར་ཟླ་བརྒྱད་པའི་ནང་ཡོངས་ཀྱི་དགེ་བའི་བཤེས་གཉེན་ཆེན་པོ་དཔའ་རིས་རབ་གསལ་ཕེབས་ནས། མཚམས་ཁོངས་སུ་མཇལ་འཛོམས་མཛད། བཀའ་གདམས་གླེགས་བམ་གྱི་ལུང་ཞུས་པ་བཞིན་ཉིན་བདུན་བརྒྱད་ཙམ་ལ་ཐུན་བར་རྣམས་སུ་གནང་། ཉིན་བཞིན་ཚ་བཞེས་དང་གསོལ་ཚིགས་ལྷན་ཅིག་གནང་ཞིང་། གཞུང་ཆེན་དུ་མའི་དཀའ་གནད་ལས་བརྩམས་པའི་འདྲི་རྨེད་མཛད་པས་མཁྱེན་རབ་ཀྱི་རྩལ་དང་ཡོན་ཏན་ལ་དོན་དང་མཐུན་པའི་བསྔགས་བརྗོད་དང་། གསར་དུ་ལྗགས་རྩོམ་མཛད་པའི་ཨ་རོལ་རིན་པོ་ཆེའི་རྣམ་ཐར་གཟིགས་ཏེ། གཞུང་ཆེན་མོའི་བརྡ་ཆད་ལ་བྱང་ཆ་སོང་ན་ཅི་བྱེད་ལས་སླ་བོ་རེད། ཅེས་གསུངས་ནས་རྗེས་སུ་ཡི་རང་གི་བསྔགས་པ་ཚད་ལས་བརྒལ་བ་མཛད། དགུན་ཐོག་སྐྱབས་རྗེ་ཤིང་བཟའ་རིན་པོ་ཆེའི་རྣམ་ཐར་རྩོམ་པའི་དབུ་བཙུགས། 

དགུང་ལོ་ཞེ་གཉིས་པ་ཆུ་སྦྲུལ་སྤྱི་ལོ་༡༨༩༣ལ་དགེ་བའི་བཤེས་གཉེན་ཆེན་པོ་དཔའ་རིས་རབ་གསལ་ཚང་ཨ་མདོའི་དགོན་ཆེན་རྣམས་སུ་གྲྭ་སྐོར་མཛད་པའི་དུས་འདིར་མཚེར་མོ་ཆེར་ཕེབས་ཏེ་བླ་མ་རྡོ་རྗེ་འཆང་དང་མཇལ་འཕྲད་གནང་ཞིང་། མདོ་སྔགས་ཀྱི་གཞུང་ཆེན་མོའི་འཕྲོས་པ་གནང་ནས་ཞག་ཤས་བཞུགས། བརྒྱད་པའི་ནང་བྱ་ཁྱུང་དུ་ཕེབས་ནས་དམ་བཅའ་བཞག ཕྱིར་ཕེབས་པར་ཐུགས་ཀུན་ནས་དགྱེས་ཏེ་གསོལ་སྟོན་བཅས་མདོ་སྨད་འདིར་གྲྭ་སྐོར་གྱི་སྲོལ་ནུབ་ནས་མི་ལོ་དྲུག་ཅུ་ལྷག་སོང་བ་ཁྱེད་ཀྱིས་སླར་གསོ་བྱས་པ་ངེས་པར་བསྟན་པ་ལ་བྱ་བ་རླབས་པོ་ཆེ་མཛད་པ་ཡིན་པས་བཀའ་དྲིན་ཆེ་ཞེས་རྗེས་སུ་ཡི་རང་གི་གསུང་དང་། དགྱེས་པའི་ལེགས་སྐྱེས་མང་བོ་བསྩལ། 

ཤིང་རྟ་སྤྱི་ལོ་༡༨༩༤ལོར་རྗེ་ཉིད་ཀྱིས་སྔོན་བླ་བྲང་ནས་སྙན་ངག་གསན་སྐབས་ཀྱི་དཔེར་བརྗོད་ལ་བསྒྱུར་བཅོས་ཕྲན་བུ་གནང་སྟེ་སྙན་ངག་གི་དཔེར་བརྗོད་ལེགས་བཤད་བདུད་རྩིའི་མཆོད་ཡོན་གསར་དུ་གྲུབ་པར་བྱས། ཤིང་ལུག་སྤྱི་ལོ་༡༨༩༥ལོའི་ཟླ་བརྒྱད་པའི་ནང་ནས་བཅད་རྒྱ་མཛད་ཅིང་ཐུན་མཚམས་རྣམས་སུ་བཤེས་གཉེན་ཆེན་པོ་སངས་རྒྱས་ཆོས་གྲགས་མཚན་ཅན་ལས། མཆིམས་མཛོད་མངོན་པའི་རྒྱན། ཐར་ལམ་གསལ་བྱེད་སོགས་ཡིག་ཆ་མང་བོ་གུང་བསྒྲིགས་ནས་སྦྱང་བ་ཞིབ་རྒྱས་གནང་བར་གསུངས། བཤེས་གཉེན་ཆེན་པོ་འདི་བ་ལས་སྔ་ཕྱི་ཀུན་ལ་མདོ་སྔགས་གཞུང་ཆེན་མང་བོར་འཕྲོས་པ་དོགས་གཅོད་གཟབ་རྒྱས་མཛད་པ་ཡིན་ནོ། །

སྔོན་སྐྱེས་རིའི་ལྷ་ཞོལ་རི་ཁྲོད་བསམ་གཏན་ཆོས་སྡིངས་སུ་བཞུགས་སྐབས་ཉིན་ཞིག་ལ་སྐུ་དབོན་བློ་གྲོས་དཔལ་བཟང་དང་གསུང་འཕྲོས་ཀྱི་ལྷོངས་ཤིག་ཏུ། དབོན་རྒན་ནས་སྔོན་རྗེ་གོང་མ་དེ་ཉིད་བར་ཁམས་སུ་སྐུ་བསྙུན་བཞེས་ཏེ་ཆབ་མདོ་བརྒྱུད་ཁྱུང་བོར་ཕེབས། དེ་ནས་རྒྱ་ཤོད་བན་སྒར་ཟེར་བའི་དགོན་པར་ཉིན་ལམ་བདུན་ཡོད་ཟེར་བས་དེར་ཅིས་ཀྱང་ཐོན་ཐབས་བྱེད་དགོས་གསུངས་ཏེ། ཟླ་བ་བཅུ་བའི་ཚེས་ལྔ་ལ་གཅམ་མདའ་ཟམ་ཁ་ནས་བཏེགས་པ། ངལ་མ་གསོས་ན་སླེབ་རྒྱུ་ཡིན་ཀྱང་། སྐུ་ཉམས་ཤིན་ཏུ་ཞན་སྟབས་ཞམ་རིང་བ་ཚོས་ཅིས་ཀྱང་ངལ་གསོ་དགོས་ཚུལ་ཞུས་ཏེ་ཚེས་བརྒྱད་ཀྱི་བཅགས་མལ་བགྱིས་པས། ཚེས་བཅུ་གཅིག་ཉིན་རྒྱ་ཤོདབན་སྒར་གྱི་ཐག་ཉེར་སླེབས་པས་དེར་མྱ་ངན་ལས་འདས་ཚུལ་དང་། སྔ་སོར་ཁྲི་ལུང་དུ་བཞུགས་སྐབས་ཤིག ང་ལ་དགོན་པ་ཞིག་གི་སྣང་བ་རྒྱུན་དུ་འཆར་གིན་འདུག ཁ་ལྟ་ཕྱོགས་ལུང་བ་འདི་ལྟ་བུ། ལུང་བ་ཡངས་པོ་མདུན་ན་ཆུ་ཆེན་ཞིག་ཡོད་པ། རྒྱབ་རི་བྲག་རིར་ཤུག་པ་སྐྱེས་པ་དང་། མདུན་རི་ལའང་ནགས་ཚལ་ཅུང་ཟད་ཡོད་པ་ཞིག་རེད། ཅེས་ཡང་ཡང་གསུངས་པ། ཕྱིས་སུ་རྒྱ་ཤོད་བན་སྒར་གྱི་དགོན་པ་ཡོད་ས་དེ་ངེས་པར་དེ་ཇི་མ་ཇི་བཞིན་རེད་ཞུས་པར། ཞལ་ནས། ཨ་ཁུ། དེ་ཡིན་ན་ཆོག་རྒྱུ་རེད། དགོན་པ་དེ་ཁམས་སྟག་ཕུ་བའི་དགོན་པ་ཞིག་རེད། རང་རེའི་གོང་མ་ཚང་དེ་བ་སྟག་ཕུ་བའི་སྤྲུལ་སྐུ་ཡིན་ཞེས་གྲགས་ཆེ་བ་རེད། ཅེས་གསུངས་སོ། །

མེ་སྤྲེལ་སྤྱི་ལོ་༡༨༩༦ལོ་ལ་ཁྲི་རྒན་འཇམ་པའི་དབྱངས་སོགས་ཀྱིས་ཞུས་ངོར། རོང་བོ་དཔལ་གྱི་དགོན་ཆེན་དུ་གསན་མཁན་ལྔ་བརྒྱ་ལས་བརྒལ་བར་ཆོས་རྒྱུན་མང་བོ་སྤེལ། 

མེ་བྱ་སྤྱི་ལོ་༡༨༩༧ལོའི་ཟླ་དགུ་བའི་ཚེས་མགོར་རྨ་འགྲམ་ཆོས་ཀྱི་བསྟི་གནས་བན་གྲོ་དགེ་ལེགས་ཆོས་རྫོང་གི་སྒྲུབ་ཁང་དུ་ཕེབས་ནས། ཆ་གན་ཧུ་ཐོག་ཐུ་སོགས་ཀྱིས་སྔ་ཕྱི་དང་། དགེ་བཤེས་ཆེན་པོ་སངས་རྒྱས་ཆོས་གྲགས་པས་ཀྱང་གསུང་བསྐུལ་ནན་ཆེར་ཕེབས་པ་ལྟར་ལྷག་མཐོང་ཆེན་པོའི་དཀའ་འགྲེལ་གསར་རྩོམ་གྱི་དབུ་བཙུགས། སྐབས་འདིར་སྐྱབས་རྗེ་ཤིང་བཟའ་རིན་པོ་ཆེའི་དགོངས་པ་གཞན་དུ་གཏད་པས་ཕྱག་མཛོད་ཀྱིས་ཞུས་པ་བཞིན་མཆོག་སྤྲུལ་མྱུར་འབྱོན་གྱི་གསོལ་འདེབས་ལྗགས་རྩོམ་མཛད་དོ། །

གདན་རབས་ཚིགས་བཅད་མ་ལས། 

ལྗོངས་འདིའི་མགོན་མེད་ཟས་སྦྱིན་གཉིས་པའི་ཟླ། །

ས་ཡི་ཚངས་པ་བཀྲ་ཤིས་ཚེ་རིང་ནས། །

ཡབ་རྗེ་རྣམ་འདྲེན་དམ་པ་འཁོར་ཚོགས་བཅས། །

ཐོག་མར་སྤྱན་དྲངས་བསྙེན་བཀུར་ཚད་མེད་བྱས། །

ངོ་མཚར་ཀུན་དགའ་ར་བ་གསར་བསྒྲུབས་ཏེ། །

དགོན་གནས་ཐོག་མར་ཕུལ་པ་ཞལ་གྱིས་བཞེས། །ཞེས་བྱུང་། 

སྤྱིར་རིག་པའི་གནས་ཆེ་ཆུང་ཐམས་ཅད་དང་། ཁྱད་པར་བཀའ་པོ་ཏི་ཆེན་པོ་ལྔ་ལ་སློབ་གཉེར་བྱེད་པའི་སྲོལ་བཙུགས་ན་རྣམ་གྲོལ་དོན་དུ་གཉེར་བ་དག་དང་། ཕྱོགས་མཐའི་འགྲོ་བ་མང་བོའི་སྨན་ཡོན་དུ་འགྱུར་བར་དགོངས་ནས། དགུང་ལོ་ང་གཉིས་པ་ཆུ་ཡོས་སྤྱི་ལོ་༡༩༠༣ལོར་རབ་འབྱམས་གཞུང་བརྒྱའི་མངའ་བདག་ཧོར་ཆེན་སྨྲ་བའི་སེངྒེ་རྗེ་ཡེ་ཤེས་རྒྱ་མཚོ་གདན་དྲངས་ནས་སྐལ་བཟང་རྣམ་དཔྱོད་ལྡན་པའི་ཚོགས་ལ་དཔེ་ཁྲིད་སྩོལ་དུ་བཅུག་སྟེ་མཚན་ཉིད་གསར་དུ་བཙུགས་པ་ནས། རྗེ་ཉིད་ཀྱིས་ཀྱང་གཞུང་ཆེན་མང་བོ་གུང་བསྒྲིགས་ཏེ། དོན་གྱི་འགང་གཤོག་པའི་བཤད་རྒྱུན་དུ་མ་དང་། དཀའ་བའི་གནས་རྣམས་བརྒལ་བརྟག་གི་སྒོ་ནས་གོ་བ་སྟེར་ཕུལ་ཆེ་བའི་ལེགས་བཤད་ཐང་མར་བརྡལ་བས། གཟིམ་སྤྱིལ་གྱི་ཉེ་འཁོར་དུ་རྒྱུན་བཞུགས་གནང་ནས་ལེགས་བཤད་དོན་གཉེར་གྱི་མང་ཐོས་སྒྲུབ་ལ་གཞོལ་བའི་ཀུན་སྤངས་བརྒྱ་ཕྲག་གསུམ་ལྷག་འདུས་ཤིང་། དེ་ལ་བརྟེན་ནས་དད་གཏོང་ནོར་གྱིས་མཛེས་པའི་བསྟན་པའི་སྦྱིན་བདག་ནང་སོ་བཀྲ་ཤིས་ཚེ་རིང་གིས་འདུ་ཁང་དང་ནང་ཆེན་སོགས་གསར་དུ་བཞེངས་ཏེ་སྡེ་ཚའི་པང་ལས་ཤར་ཞེས་པའི་དགོན་གནས་ཐོག་མར་ཕུལ་པ་ཞལ་གྱིས་བཞེས་ཏེ་དཔལ་མི་འགྱུར་རི་ཁྲོད་བཀྲ་ཤིས་ཆོས་སྡིངས་ཞེས་སྲིད་པ་གསུམ་ན་ཡོངས་སུ་གྲགས་པའི་བཤད་སྒྲུབ་ཟུང་དུ་འབྲེལ་བའི་ཆོས་ཀྱི་སྡེ་ཆེན་པོ་ཕྱག་འདེབས་མཛད་དོ། །

གདན་རབས་ཚིགས་བཅད་མ་ལས། 

དེ་ནས་རིམ་བཞིན་གདན་ས་ཆེན་པོ་འདི། །

མྱུར་དུ་དར་ཞིང་རྒྱས་པས་མཚན་སྙན་འབར། །

དཔལ་ལྡན་རི་ཁྲོད་བཀྲ་ཤིས་ཆོས་སྡིངས་ཞེས། །

དཔལ་ལྡན་འཕགས་ཡུལ་ནཱ་ལེནྡྲ་ཡི་ཟླར། །

ཟླ་མེད་ལྷ་རྟེན་ཇི་ལྟར་བཞུགས་ཚུལ་ཀུན། །

ཀུན་ནས་བགྲང་ལ་སོར་མོ་ངལ་བར་གྱུར། །

ངོ་མཚར་བསྟན་པའི་རིན་ཆེན་གདུགས་དཀར་བོ། །

ཉམས་པ་མེད་པར་ཕྱོགས་བཞིར་བསྒྲེངས་མཛད་པའི། །

རང་སྲས་ཡོངས་ཀྱི་དགེ་བའི་བཤེས་གཉེན་ཆེ། །

དུ་མའི་མཛད་འཕྲིན་ཀུན་གསལ་མཐའ་དང་མཉམ། །ཞེས་བྱུང་། 

སྡེ་འདིར་གཞུང་བརྒྱའི་དགོངས་དོན་མ་ནོར་བར་སྨྲ་བའི་དགེ་བའི་བཤེས་གཉེན། ལམ་ཡོངས་རྫོགས་ཀྱི་ཉམས་བཞེས་ལ་གཞོལ་བའི་བྱ་བཏང་སྒྲུབ་པའི་རྒྱལ་མཚན་འཛིན་པ། ལྔ་རིག་ནོར་བུའི་ཕྲེང་བ་རྣམ་དཔྱོད་ཀྱི་རྒྱན་དུ་ངོམ་པའི་པཎྜི་ཏ་སོགས་བསྟན་འཛིན་དམ་པ་བགྲང་ཡས་པ་རིམ་བཞིན་བྱོན་པའི་གདན་ས་ཆེན་པོ་འདི། ཡུན་ཐུང་ཞིག་ལ་མྱུར་དུ་དར་ཞིང་རྒྱས་པས་མཚན་སྙན་སྲིད་པ་གསུམ་ན་འབར་བའི་དཔལ་ལྡན་རི་ཁྲོད་བཀྲ་ཤིས་ཆོས་སྡིངས་ཞེས། དཔལ་ལྡན་འཕགས་ཡུལ་གྱི་ནཱ་ལེནྡྲའི་སྣོད་བཅུད་ཀྱི་བཀོད་པས་འགྲན་ཟླ་མེད་པ་ལྟ་བུའི་ལྷ་རྟེན་ཇི་ལྟར་བཞུགས་པ་རྒྱུ་སྐར་ཕྲེང་ཐག་ཆད་པ་ས་ལ་འཐོར་བ་དང་ཚུལ་ཀུན་ནས་མཚུངས་པས་རེ་རེ་བགྲང་བ་ལ་ཐུབ་པའི་སོར་མོའང་ངལ་བར་གྱུར་ཏོ། །

འགྲོ་བའི་མགོན་པོ་འདི་ཉིད་བསྟན་འགྲོའི་དོན་སྒྲུབ་པར་སྐྱོ་ངལ་གཏན་ནས་མི་མངའ་བས། རོང་བོ་དགོན་ཆེན་དང་བཀྲ་ཤིས་འཁྱིལ་སོགས་རེབ་གོང་ཕྱོགས་ཀྱི་དགོན་མ་ལག་ཐམས་ཅད་དང་། གདན་ས་བདེ་ཆེན་ཆོས་གླིང་དང་། མགུར་རྣམ་རྒྱལ་གླིང་སོགས་ལཱ་མོའི་དགོན་མ་ལག་རྣམས་དང་། གོང་བ་གྲྭ་ཚང་སོགས་ཁྲི་ཀའི་ཕྱོགས་ཀྱི་དགོན་སྡེ་དུ་མ་དང་། བིས་མདོ་དགོན་ཆེན། སྐུ་འབུམ། བྱ་ཁྱུང་། དགོན་ལུང་། གསེར་ཁོག་སོགས་ཙོང་ཁ་ཉིན་སྲིབ་ཀྱི་དགོན་སྡེ་མང་བོ་དང་། ཨ་རིག་དགོན་ཆེན་དང་རྐང་ཚའི་དགོན་ཆེན་སོགས་མཚོ་སྔོན་ཕྱོགས་ཀྱི་སྡེ་དགོན་དུ་མས་མཚོན། མདོར་ན་མདོ་ཁམས་སྨད་ཀྱི་བཤད་སྒྲུབ་ཆོས་ཀྱི་སྡེ་ཕལ་ཆེར་དུ་ལན་དུ་མར་ཞབས་ཀྱིས་བཅགས་ཤིང་། དབང་ལུང་ཁྲིད་མན་ངག་སོགས་ཆོས་ཆར་ཅི་འདོད་དུ་བསྩལ་པས། སྐལ་བཟང་གདུལ་བྱ་མ་སྨིན་པ་སྨིན་པར་མཛད་ཅིང་། སྨིན་པ་གྲོལ་བ་དང་། གྲོལ་བ་མཐར་ཕྱིན་པར་མཛད་པ་དང་ཆབས་ཅིག་ཞལ་མཇལ་གསུང་ཐོས་ཀྱི་འགྲོ་བ་སའི་རྡུལ་གྲངས་དང་མཉམ་པའི་རྒྱུད་ལ་ཐར་བའི་ས་བོན་ཁྱད་པར་ཅན་བསྐྲུན་པར་མཛད་དོ། །

དེ་ལྟར་ངོ་མཚར་བའི་མཛད་འཕྲིན་གྱི་འོག་ཏུ་བསྟན་པ་རིན་པོ་ཆེའི་གདུགས་དཀར་བོ་དུས་ནམ་ཡང་ཉམས་པ་མེད་པར་ཕྱོགས་བཞིར་བསྒྲེངས་པར་མཛད་པ་ཁོང་རང་ཉིད་ཀྱི་སྲས་སུ་གྱུར་པའི་ཡོངས་ཀྱི་དགེ་བའི་བཤེས་གཉེན་ཆེན་མོ་དུ་མའི་མཛད་འཕྲིན་ནི་ཀུན་གསལ་གྱི་མཐའ་དང་མཉམ་པ་བྱུང་ངོ་ཞེས་པའོ། །

གདན་རབས་ཚིགས་བཅད་མ་ལས། 

ཁྱད་པར་གངས་ཅན་རྣམ་འདྲེན་བཅུ་གསུམ་པའི། །

རིགས་ཀྱི་ཅོད་པན་ཉིད་དུ་གྱུར་པ་ན། །

གཟུར་གནས་བློ་ལྡན་ཀུན་གྱིས་མེ་ཏོག་འཐོར། །

ཁ་ཅིག་ཡིད་ལ་དུཿཁ་སྐྱེས་པར་གླེང་། །ཞེས་བྱུང་། 

གངས་ལྗོངས་འགྲོ་བའི་མགོན་པོ་རྒྱལ་སྲས་ཕྱག་ན་པདྨོ་བཤེས་གཉེན་གར་གྱི་རྣམ་པར་རོལ་པ་ཀུན་གཟིགས་རྒྱལ་བའི་དབང་བོ་བཅུ་གསུམ་པ་ཆེན་པོ་༧རྗེ་བཙུན་ངག་དབང་བློ་བཟང་ཐུབ་བསྟན་རྒྱ་མཚོ་དཔལ་བཟང་བོ་དེ་ཉིད་རབ་ཚེས་མེ་རྟ་སྤྱི་ལོ་༡༩༠༦ལོར། ཇི་སྐད་དུ་བཀའ་གདམས་རིན་པོ་ཆེའི་གླེགས་བམ་ལས། བོད་བྱང་གི་ཕྱོགས་ནས་བྱང་ཕྱོགས་སུ། །མི་ཁྱོད་ཀྱི་སྤྲུལ་པ་དམ་པ་ཞིག །འབངས་མགོན་མེད་མང་བོ་འདུལ་དུ་འགྲོ། །ཞེས་ལུང་བསྟན་པ་བཞིན་ཆེན་པོ་ཧོར་གྱི་ཡུལ་གྲུར་ཆིབས་ཀྱི་ཁ་ལོ་བསྒྱུར་ཏེ། ཧལ་ཧ་ཁུ་རེ་ཆེན་མོ། ཛ་ཡའི་དགོན་ཆེན་སོགས་ཧོར་ཡུལ་དུ་བླ་སྤྲུལ་རྒྱལ་བློན་སེར་སྐྱ་དྲག་ཞན་སའི་རྡུལ་གྲངས་དང་མཉམ་པ་རྣམས་ལ་རང་མོས་དང་འཚམས་པའི་ལེགས་བཤད་གསར་བའི་བདུད་རྩི་ཕངས་མེད་དུ་བསྟབས་ཤིང་། འཆད་རྩོད་རྩོམ་གསུམ་གྱི་ལེགས་མཛད་འོད་ཀྱི་སྣང་བས་མཐའ་འཁོབ་རྒུད་པའི་མུན་ཚོགས་དྲུངས་ནས་ཕྱུང་སྟེ་ཡུལ་དབུས་འགྱུར་འཆང་དང་སྐལ་བ་མཉམ་པར་བསྒྲུབས། རིམ་གྱིས་བོད་ཆེན་པོའི་ཡུལ་གྲུ་མདོ་ཁམས་སྨད་དུ་གཏོགས་པའི་གདུལ་བྱ་རྣམས་ཡང་དག་པའི་ལམ་དུ་བཀྲི་བ་དང་། རྗེ་བཙུན་བླ་མ་མཆོག་ལས་ལེགས་བཤད་བདུད་རྩིའི་དགའ་སྟོན་གསོལ་བཞེད་ཀྱིས་གངས་ཅན་འཛིན་མའི་རྒྱན་གཅིག ལུམྦིའི་དགའ་ཚལ་གཉིས་པ་མཁས་པའི་འདུན་ས་ཆེན་པོ་སྐུ་འབུམ་བྱམས་པ་གླིང་དུ་ཞབས་ཀྱི་པདྨོ་ཉེ་བར་བཀོད་པའི་གནས་ཚུལ་གསན་འཕྲལ། རྗེ་ཉིད་ཞམ་རིང་བ་དང་རྗེས་འབྲང་ཀུན་སྤངས་སུམ་བརྒྱ་སྐོར་བཅས་ཐ་སྐར་ཟླ་བའི་ཚེས་ཉེར་གཅིག་ལ་སྐུ་འབུམ་བྱམས་པ་གླིང་དུ་ཕེབས་ཏེ། ཆེ་ཤོས་སྒར་བར་བཞུགས། ཕྱི་ཉིན་ཆེ་ཤོས་མཆོག་སྤྲུལ་རིན་པོ་ཆེ་ནས་ཞུ་སྣ་མཛད་དེ། རྒྱལ་དབང་ཐམས་ཅད་མཁྱེན་ཅིང་གཟིགས་པ་བཅུ་གསུམ་པ་ཆེན་པོར་གཟིམ་ཆུང་དུ་མཇལ་ཁ་ཞུས་སྐབས། སྲིད་དུ་རིང་བའི་ལྷ་དར། སྐུ་གསུང་ཐུགས་རྟེན་སོགས་དངོས་འབུལ་སྤུས་གཙང་བཅས། ཀུན་གཟིགས་རྒྱལ་བའི་དབང་བོ་ཉིད་ནས་བདག་ཅག་མདོ་སྨད་ཀྱི་གདུལ་བྱ་རྣམས་ལ་བརྩེས་གཟིགས་ཆེན་པོས་ཆིབས་བསྒྱུར་མཛད་པ་བཀའ་དྲིན་ཆེ་ཚུལ། སླད་མར་ཡང་འཇམ་མགོན་རྒྱལ་བའི་བསྟན་པ་རིན་པོ་ཆེ་ཐུགས་ལ་བསྣམས་དགོས་ཚུལ་སོགས་ལས་བརྩམས་པའི་ཞུ་འབུལ་མཛད་པར། ༧ གོང་ས་མཆོག་ནས་ཀྱང་དགྱེས་པའི་གསུང་ལན་ཐུགས་ཀྱི་གསོས་སྨན་དུ་འགྱུར་ངེས་བཀའ་དྲིན་བསྐྱངས། འདི་དག་གི་སྐབས་སུ་རྗེ་བཙུན་བླ་མ་ཡབ་སྲས་ཀྱི་དག་པའི་གཟིགས་ངོར་འཇམ་མགོན་རྒྱལ་བའི་དབང་བོ་དང་ལྷོ་བྲག་ནམ་མཁའ་རྒྱལ་མཚན་ཡབ་སྲས་མཇལ་དུས་ལྟ་བུའི་གཟིགས་སྣང་ངོ་མཚར་ཅན་ཕལ་བའི་བསམ་བརྗོད་ཀྱི་ཡུལ་ལས་འདས་པ་དག་བྱུང་བར་གདོན་མི་ཟ་ལ། ཚུར་མཐོང་གི་སྣང་ཚོད་ལ་ཡང་རྒྱལ་དབང་མཆོག་ནས་གཟིགས་མ་ཐག་ཕྱག་ཐལ་མོ་སྦྱོར་བ་གནང་ཞིང་། ལྔ་བ་ཆེན་པོ་དངོས་སུ་འདུག་གསུངས་ཏེ་གང་ལྟར་དགྱེས་བརྩེའི་ཉམས་ཁྱད་དུ་འཕགས་པ་དང་། བླ་མ་མཆོག་ནས་ཀྱང་དད་གུས་སྤྲོ་ཉམས་རྨད་དུ་བྱུང་བས་ཡུན་རིང་སྟོར་བའི་མ་བུ་ལྷན་ཅིག་གསར་འཕྲད་ལྟ་བུ་ཉེ་འཁོར་ན་ཡོད་པ་ཐམས་ཅད་ལ་མཐུན་སྣང་དུ་མཇལ་རྒྱུ་བྱུང་བའང་། རིང་མོ་ཉིད་ནས་བསྟན་འགྲོར་གཅིག་ཏུ་སྨན་པའི་ཐུགས་བསྐྱེད་དང་། རྒྱལ་སྲས་ཀྱི་སྨོན་ལམ་རླབས་པོ་ཆེས་ཕན་ཚུན་ལུ་གུ་རྒྱུད་དུ་བཅིངས་པའི་རང་མདངས་ཁོ་ནར་གསལ་ལོ། །ཤག་ཏུ་ཕེབས་པ་ན། ༧ གོང་ས་མཆོག་ནས་ཉིད་ཀྱི་གསན་ཡིག་ལ་གཟིགས་རྒྱུའི་བཀའ་གནང་བ་བཞིན། འཕྲལ་དུ་གསན་ཐོ་རགས་བསྡུས་ཤིག་བྲིས་ཏེ་ཕུལ་པར་ཞིབ་གཟིགས་མཛད་དེ། དུས་ཚེས་དགེ་བར་དྲི་བྲལ་སྲིད་དུ་རིང་བའི་ལྷ་དར་བཅས་ཆེ་ཤོས་རིན་པོ་ཆེ་ཆེད་མངགས་ཀྱིས། རྒྱལ་བའི་དབང་བོ་ཉིད་ནས་མ་གསན་པའི་ཆོས་རྒྱུན་མང་བོ་ཞིག་ཅིས་ཀྱང་གནང་དགོས་ཚུལ་བཟློག་ཏུ་མེད་པའི་བཀའ་ལུང་ནོར་བུའི་དོ་ཤལ་ཆེས་ལྕི་བ་བསྩལ་པས་ཞལ་བཞེས་མི་གནང་ཀ་མེད་བྱུང་བ་བཞིན་བཀའ་བཞིན་སྒྲུབ་པའི་ཞལ་བཞེས་མཛད། རྗེས་སོར་བཀའ་ལས། དེ་དུས་ ༧ གོང་ས་རྒྱལ་བའི་དབང་བོ་མཆོག་ནས་སྔར་མ་གསན་པའི་ཆོས་བཀའ་མང་བོ་འབུལ་དགོས་ཚུལ་བཟློག་ཏུ་མེད་པའི་བཀའ་ལུང་ནོར་བུའི་ཅོད་པན་སྤྱི་བོར་བསྩལ་བྱུང་བར། ངའི་སེམས་ལ་སྐྱབས་མགོན་རིན་པོ་ཆེ་འཕགས་པ་སྤྱན་རས་གཟིགས་དངོས་ཡིན་པས་དེ་ཉིད་ཀྱི་གསུང་བཞིན་སྒྲུབ་རྒྱུ་བྱུང་ན་སྐལ་བ་བཟང་སྙམ་པ་དང་། ཁོང་ལ་ཆོས་རྒྱུན་རྣམ་དག་རེ་འབུལ་ཐུབ་སོང་ན་ཁོང་འཕྲིན་ལས་ནམ་མཁའ་དང་མཉམ་པས་བསྟན་འགྲོར་ཕན་རླབས་ཆེ་ཞིང་རང་ལ་ཡང་བསོད་ནམས་རྒྱ་ཆེན་པོ་ཐོབ་རྒྱུ་རེད་སྙམ་པ་མ་གཏོགས། ང་རང་རི་ཁྲོད་པ་ལྟ་བུ་ཞིག་གི་མིང་བཟུང་ཡོད་སྟབས། སྐྱབས་མགོན་ཐམས་ཅད་མཁྱེན་པའི་ཡོངས་འཛིན་དུ་གྱུར་པས་གོ་ས་མཐོན་པོ་ཞིག་ཐོབ་བྱུང་། མཚན་སྙན་གྲགས་ཆེན་པོ་ཞིག་ཡོང་རྒྱུ་རེད་སྙམ་པའི་དགའ་སྤྲོ་ཅུང་ཟད་ཙམ་ཡང་མ་སྐྱེས་ཞེས་གསུངས་པ་ཞལ་ལས་ཐུགས་སྲས་གྲགས་པའི་ཞབས་ཀྱིས་དངོས་སུ་ཐོས་པའི་ཚུལ་འདི་ནི། ཆོས་བརྒྱད་མགོ་སྙོམས་པའི་བདག་ཉིད་ཆེན་པོའི་རྣམ་པར་ཐར་བ་ཁྱད་པར་དུ་འཕགས་པ་ཞིག་སྟེ། གཞན་དུ་ན་ཇི་ལྟ་བུའི་བླ་མ་ཆེན་པོ་ཞིག་ཡིན་རུང་འབད་རྩོལ་ཆེན་པོ་བྱས་ཀྱང་ཐོབ་པར་དཀའ་བའི་གནས། རྒྱལ་དབང་པད་དཀར་འཆང་བའི་ཡོངས་འཛིན་འབད་རྩོལ་མེད་པར་གནམ་བབས་ཀྱི་ཚུལ་དུ་ཕྱག་ཏུ་འབྱོར་ཚེ་ཐུགས་དགྱེས་དྲགས་པས་སྐུ་ལུས་ཞིག་འགྲོ་བའི་ཚོད་དུ་འདུག་གོ །འདི་སྐབས་རྗེ་གོང་མའི་སྐུ་དབོན་རྒྱ་སྐོར་རི་ཁྲོད་པ་བློ་གྲོས་དཔལ་བཟང་ཞུ་བ་རྗེ་ཉིད་ལ་སྐུ་དྲིན་ཤིན་ཏུ་ཆེ་བ་དེ་ཉིད་དགུང་ལོ་གྱ་དགུར་སླེབས་པ་ཞལ་མ་འཚོ་བས། གོང་ས་མཆོག་ལ་བསྔོ་རྟེན་དང་། རྗེ་ཉིད་རེ་ཞིག་དྷཱིཿཚར་ཕེབས་ནས་ཁུ་བོའི་དགེ་སྒྲུབ་བགྱིས་འཕྲལ་སླར་ཕེབས་ཆོག་པའི་དགོངས་ཞུ་ཕུལ་ཏེ་སླར་དྷཱིཿཚར་ཕེབས། དེ་འཕྲལ་དྷཱིཿཚ་རེབ་གོང་ཁྲི་ཀ་ཕྱོགས་གསུམ་གྱི་རི་ཁྲོད་པ་རྣམས་དང་། སྐུ་འབུམ། བྱ་ཁྱུང་། བདེ་ཆེན། གསེར་དགོན་སོགས་དགོན་ཆེ་ཆུང་དུ་མར་མང་འགྱེད། ལྗོངས་འདིའི་བླ་སྤྲུལ་བཞུགས་ཚད་ལ་བསྔོ་རྟེན་ཕུལ་པ་བཅས་དངུལ་ཕབ། སྲང་སྟོང་ཕྲག་གཉིས་དང་ལྔ་བརྒྱ་སུམ་ཅུ་ཙམ་ཐོབ་ངེས་ཀྱིས་དགེ་སྒྲུབ་ཆེན་པོ་དང་། རྗེ་ཉིད་ཀྱང་བཅད་རྒྱའི་ངོས་ཆེད་དམིགས་ཀྱི་ཐུགས་དམ་རྣལ་འབྱོར་ཟབ་མོའི་སྒོ་ནས་ཁུ་བོར་དྲིན་གཟོ་མཛད། བཅུ་བའི་ཚེས་ཉེར་དགུ་ལ་ ༧ གོང་ས་མཆོག་གི་མི་སྣ་ཆེ་ཤོས་ཕྱག་མཛོད་སོགས་གདན་འདྲེན་པ་མང་བོ་སླེབས་པས་ཕེབས་བྱམས་ལ་གདན་དྲངས་ཏེ་སྐུ་འབུམ་དུ་ཕེབས་ནས་ཁོང་བཀྲ་ཤིས་བཟང་བོའི་ཤག་ཏུ་བཞུགས་སྟན་འཇགས། མགོ་ཟླའི་ཡར་ཚེས་ལ་གངས་ཅན་འཛིན་མའི་རྒྱན་གཅིག་ལུམྦིའི་དགའ་ཚལ་གཉིས་པ། གདན་ས་ཆེན་པོ་སྐུ་འབུམ་བྱམས་པ་གླིང་གི་བླ་བྲང་རྩེའི་གཟིམ་ཆུང་བཀྲ་ཤིས་ཁང་གསར་དུ། རྒྱལ་དབང་པད་དཀར་འཆང་བས་གཙོས་གངས་ཅན་མཁས་གྲུབ་བྱེ་བའི་གཙུག་ཏོར་གྱི་ནོར་བུས་མངོན་པར་མཆོད་པའི་ཁྲི་འཕང་ཤར་གྱི་རི་བོའི་སྤོར། སྔོན་གྱི་ཐུགས་བསྐྱེད་དང་སྨོན་ལམ་རླབས་པོ་ཆེའི་རྟ་མཆོག་བདུན་གྱི་ཤིང་རྟས་མངོན་པར་དྲངས་ཤིང་། ལུང་དང་རྟོགས་པའི་ཡོན་ཏན་གྱི་དཀྱིལ་འཁོར་ཡོངས་སུ་རྫོགས་པ་ལས་གཞན་ཕན་འཕྲིན་ལས་ཀྱི་འོད་སྟོང་ཕྱོགས་བརྒྱར་སྤྲོ་བ་སྙིགས་མའི་དུས་ཀྱི་སངས་རྒྱས་བཅོམ་ལྡན་འདས་རྗེ་བཙུན་དགེ་འདུན་བསྟན་འཛིན་རྒྱ་མཚོ་དཔལ་བཟང་བོ་ཞེས་ཡོངས་སུ་གྲགས་པའི་ཀུན་གཟིགས་སྨྲ་བའི་ཉི་མ་དེ་ཉིད་མངོན་པར་འཛེགས་ཏེ། སྲིད་ཞིའི་གཙུག་གི་རྒྱན་གཅིག་རྒྱལ་བའི་དབང་བོ་བཅུ་གསུམ་པ་ཆེན་པོ་རྗེ་བཙུན་ངག་དབང་བློ་བཟང་ཐུབ་བསྟན་རྒྱ་མཚོ་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེ་དེ་ཉིད་ལ་ཐོག་མའི་ལེགས་བཤད་ཀྱི་སྐྱེས་སུ། དུས་གསུམ་གྱི་རྒྱལ་བ་མ་ལུས་པའི་བགྲོད་པ་གཅིག་པའི་ལམ་བཟང་། གསུང་རབ་ཐམས་ཅད་ཀྱི་གནད་བསྡུས་པ་ཤིང་རྟ་ཆེན་པོ་ཀླུ་སྒྲུབ་དང་ཐོགས་མེད་གཉིས་ཀྱི་ལམ་སྲོལ། དཔལ་ཨ་ཏི་ཤ་དང་འཇམ་མགོན་རྒྱལ་བ་གཉིས་པའི་ཐུགས་ཀྱི་ཉིང་ཁུ་ལེགས་བཤད་མཐར་ཐུག་པ། བྱང་ཆུབ་ལམ་གྱི་རིམ་པ་ཉམས་སུ་ལེན་ཚུལ། གཙང་བརྒྱུད་ཀྱི་ལམ་རིམ་ཐམས་ཅད་མཁྱེན་པར་བགྲོད་པའི་བདེ་ལམ་གྱི་ཁྲིད་དམིགས་སྐྱོང་ཚུལ་རྗེ་ཉིད་ཀྱིས་མཛད་པའི་ལམ་ཁྲིད་དགེ་ལེགས་འོད་སྣང་འགྱེད་པའི་ཉིན་བྱེད་ཀྱི་སྟེང་ནས་ལུང་གི་རྒྱབ་རྟེན། དཔེ་དང་གཏན་ཚིགས་དམ་པའི་གསུང་སྒྲོས་ཀྱིས་བརྒྱན་པའི་ཉམས་མྱོང་གི་བཤད་པ་རྒྱས་བསྡུས་འཚམས་ཤིང་གོ་བདེ་བ་ཉིན་བཅུའི་རིང་ལ་གྲུབ་པར་མཛད་པས་དབུ་བཙུགས་ཏེ། རིམ་གྱིས་ཐུགས་བསྐྱེད་གསེར་གྱི་ཤིང་རྟས་ཉེ་བར་བཟུང་བའི་དབང་ཁྲིད་མན་ངག་རིན་པོ་ཆེ་སིལ་མའི་ཕུང་བོ། ཀུན་གཟིགས་རྒྱལ་བའི་དབང་བོ་མཆོག་གི་ཐུགས་མཛོད་ནོར་བུའི་བ་གམ་དུ་ཉི་མ་རེ་རེ་བཞིན་འདྲེན་པའི་ཁུར་ཆེན་བདག་གིར་མཛད་དོ། །

རྒྱལ་ཟླའི་ནང་རྗེ་ཉིད་ནས་སྒྲོལ་དཀར་ཡིད་བཞིན་འཁོར་ལོའི་སྒོ་ནས་ཚེ་སྒྲུབ་གནད་སྨིན་མཛད་དེ་མེ་ལུག་སྤྱི་ལོ་༡༩༠༧ལོའི་གནམ་ལོ་གསར་ཚེས་ལ། ༧ རྒྱལ་དབང་ཐམས་ཅད་མཁྱེན་པའི་སྐུ་དྲུང་དུ་ཆེ་ཤོས་རིན་པོ་ཆེ་དང་རྣམ་པ་གཉིས་ཀྱིས་རི་ཁྲོད་པའི་ལུགས་བཞིན་ཚེ་བུམ་ཕུལ་ཏེ་ཞབས་པད་ཡུན་བརྟན་གྱི་བདེན་ཚིག་དང་བརྟན་བཞུགས་ཀྱི་ཞུ་འབུལ་མཛད། ༧ གོང་ས་མཆོག་ནས་ཀྱང་དགྱེས་པའི་ཞལ་བཞེས་ཐུགས་ཀྱི་གསོས་སྨན་དུ་འགྱུར་ངེས་དང་། འབུལ་ནོད་ཀྱང་བསྟར། ཆོ་འཕྲུལ་མཆོད་པའི་མཚན་དུས་འདོ་ལི་ལ་བཞུགས་ཏེ་ཞིབ་མཇལ་མཛད། གོང་ས་མཆོག་ནས་རྒྱའི་ལུགས་ཀྱི་རྩེད་མོ་མང་བོ་སྤྱན་ལམ་དུ་བསྟར་རྒྱུའི་བཀའ་གནང་ཡང་། ཉིད་ཆུང་དུས་ནས་རྩེད་མོ་སོགས་ལ་གཏན་ནས་བལྟ་འདོད་མེད་པ་ཞིག་ཡིན་ཚུལ་ཞུས་ཏེ་གཟིགས་རྒྱུར་བཤོལ། འདི་དང་སྔོན་བྱ་ཁྱུང་དང་གསེར་དགོན་དུ་འཆམ་གཟིགས་ལ་ཅིས་ཀྱང་ཕེབས་དགོས་ཚུལ་ཨུ་ཚུགས་མཐར་སྐྱེལ་བྱས་ཀྱང་གསན་དགོངས་གཏན་མ་མཛད་ཚུལ་གོང་དུ་བཤད་པ་དག་ཀྱང་འདི་སྣང་ཆོས་བརྒྱད་ཀྱི་ཡོ་ལང་ལ་ཐུགས་གཏིང་ནས་ལོག་པའི་གཏན་ཚིགས་སུ་འཁུམས། འཆར་ཅན་མཆོད་འབུལ་ཆེན་མོའི་དུས་ཀྱིས་གཏུགས་པས། ༧ གོང་ས་མཆོག་ལ་དགོངས་ཞུས་ཕུལ་ཏེ་ཉི་ཤུའི་ནང་དྷཱིཿཚར་ཕེབས།  དབོ་ཟླའི་ཚེས་ནས་ཀུན་སྤངས་རི་ཁྲོད་པའི་ཚོགས་དང་ལྷན་ཅིག་མཆོད་འབུལ་མཛད་པས་མཆོད་མེ་ཁྲི་ལྔ་ དང་། མཆོད་པ་འབུམ་གཏེར་མང་བོ་ཕུལ་ཏེ་བསྟན་འགྲོར་སྨན་པའི་རྒྱལ་བའི་སྲས་ཀྱི་སྨོན་ལམ་རླབས་པོ་ཆེ་ཐུགས་ཉམས་སུ་བསྟར། རི་ཁྲོད་པ་རྣམས་ལ་དངུལ་དོང་ཚེ་ཁ་དར་ཀར་སིལ་སོགས་ཀྱི་འགྱེད་དང་། སྤྲང་འགྱེད་ཀྱང་གཟབ། སྡེ་ཚའི་དཔོན་འབངས་རྣམས་ཀྱིས་ཇ་ཐུག་འགྱེད་སོགས་གང་གཟབ་ངོས་མཆོད་མེའི་མཇུག་ཏུ་ཞབས་བརྟན་མང་བོ་བསྒྲུབས་ཏེ་བརྟན་བཞུགས་འབུལ་བ་སོགས་དཀྱུས་ལྟར་དང་། ལྷག་ལྷ་འགའ་ཞིག་གི་ལྗགས་བསྙེན་ཡང་གནང་།

 ས་གའི་ཚེས་ལ་གོང་ནས་མགྲོན་གཉེར་ཆེན་པོ་ལྷ་སྡིངས་ཆོས་མཛད་སོགས་གདན་འདྲེན་པ་ཆེད་མངགས་བཞིན་སྐུ་འབུམ་དུ་ཆིབས་བསྐྱོད་དེ་ཤིང་བཟའ་སྒར་བར་བཞུགས། ༧ གོང་ས་མཆོག་དང་དངོས་མཇལ་གྲུབ་བསྟུན་གཡུ་ཐོག་ཡོན་ཏན་མགོན་པོས་མཛད་པའི་སྨན་གྱི་ཆ་ལག་བཅོ་བརྒྱད་ཀྱི་ལུང་། རྔོག་དཀྱིལ་བདུན་དང་སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་སོགས་ཆོས་བཀའ་མང་བོ་རིམ་པར་ཕུལ། སྐབས་ཤིག་སྐྱབས་མགོན་མཆོག་གི་ཕྱག་བྲིས་དངོས་མ་ཞིག་ཞུས་པ་བཞིན། གོང་ནས་གསུང་རྩོམ་ཚིགས་བཅད་ཁ་ཤས་དང་ཡིག་གཟུགས་མི་གཅིག་པ་དུ་མ་ཕྱག་བྲིས་མཛད་དེ་གནང་ ཞིང་། སྐྱབས་མགོན་མཆོག་གི་བཀའ་བཞིན་བླ་མ་རྡོ་རྗེ་འཆང་ནས་ཀྱང་གསུང་རྩོམ་ཚིགས་བཅད་ཁ་ཤས་ཕུལ་པས་མཚོན་ཡབ་སྲས་ཐུགས་ཡིད་གཅིག་འདྲེས་ཀྱི་ཐུགས་ནང་གཤིན་པའི་མཛད་སྒོ་ཁྱད་པར་ཅན་མང་བོ་མཇལ་རྒྱུ་བྱུང་བས། དེ་ཡན་ལ་རང་རེའི་བླ་མ་རིན་པོ་ཆེ་ཆོས་ཀྱི་ངོས་ནས་ལུང་དང་རྟོགས་པའི་ཡོན་ཏན་ནམ་མཁའ་དང་མཉམ་ཡང་། འཇིག་རྟེན་ངོས་ནས་དྲག་ཞན་སུ་དང་ཡང་མི་བསྟུན་ཞིང་ཕྲན་བུ་རེ་ཞུས་ནའང་ཉིད་ནས་བོད་ཀྱི་འགྲོ་ཚུལ་མི་ཤེས་གསུངས་ཏེ་གསན་དགོངས་ཡེ་མི་མཛད་པས་ཅི་འདྲ་སྙམ་དུ་བློ་མ་བདེ་ཡང་།  འདི་དུས་ནས་བཟུང་སྟེ་སེམས་བདེ་འབོལ་གྱིས་སོང་ཞེས་ཆེ་ཤོས་མཆོག་སྤྲུལ་རིན་པོ་ཆེའི་ཞལ་ལས་གྲགས་པ་རིན་པོ་ཆེས་དངོས་སུ་ཐོས།  བརྒྱད་པའི་ནང་རེབ་གོང་ནས་སྐྱབས་རྗེ་ཤར་རིན་པོ་ཆེ། མཁན་ཆེན་མཆོག་སྤྲུལ།  མཚན་སྒྲོགས་ཚང་།ཚོ་འདུ་ཚང་། དྲུང་ཡིག་ཚང་སོགས་དྲག་རིམ་དུ་མའི་སྐུ་འཁོར་བཅས་རྒྱལ་དབང་ཐམས་ཅད་མཁྱེན་པར་མཇལ་དུ་ཕེབས། སྐུ་འབུམ་དུ་སླེབས་འཕྲལ་ཉེ་གནས་ཆེན་པོ་འཚམས་ཞུར་མངགས་པ་དང་། ཕྱི་ཉིན་སྐུ་མདུན་དུ་ཕེབས་པའི་ཚེ་ཡང་རྗེ་ཉིད་ནས་གཟིམ་ཁང་སྒོར་བསུས་ཤིང་། སྐུ་མདུན་དུ་གདན་ཁྲི་བཤམས་པ་སོགས་བཀུར་གཟོས་ཆེན་པོ་གནང་ཞིང་། ཕན་ཚུན་གང་བཅར་གྱི་བཀའ་མཆིད་ཡུན་རིང་མཛད་ལ། རྗེས་སོར་ཀུན་གཟིགས་རྒྱལ་བའི་དབང་བོ་ཚོགས་དབུར་ཞུས་སྐབས་ཀྱི་མཎྜལ་བཤད་པའང་ཉིད་ནས་ལྗགས་རྩོམ་མཛད། འདི་དུས་ཟླ་བ་ངོ་མཐོང་བདུན་ཙམ་བཞུགས་པ་སོགས་སྔ་ཕྱིའི་སྐབས་ཐམས་ཅད་དུ་རྗེ་བཙུན་བླ་མ་འཁོར་བཅས་ལ་བཞེས་ཆས་སྤུས་གཙང་མོད་ཆིལ་ལེ་བའི་གསོལ་ཕོག་གཞུང་ས་མཆོག་ནས་གནང་སྟེ་ཕུན་སུམ་ཚོགས་པའི་བསྙེན་བཀུར་དང་། ཕེབས་ཁར་ཡང་ན་བཟའ་སྐོར། རྒྱ་དངུལ། ཁ་ཆེ་གུར་ཀུམ་བམ་པོ། དབུས་སྤོས། གཟིམ་སྤོས། རྣམ་འཇོམས་རིལ་བུ། རྟེན་འདུས་དང་ལོ་གྱོན་ཕོན་ཆེ། རྗེ་ཉིད་ཞམ་རིང་བཅས་རི་ཁྲོད་པ་དམངས་ལ་འདང་ངེས་ཀྱི་ཕྱག་ཚྭ་དང་། ནང་མཛོད་ཆེ་ལེགས་དུ་མ་སོགས་འབུལ་ནོད་ཀྱང་སྤམ་མཐོ་བ་བསྩལ་ཅིང་བཅུ་བའི་ཚེས་ལ་དྷཱིཿཚར་ཕེབས། བཅུ་གཅིག་པའི་ཚེས་ལ་༧ གོང་ས་མཆོག་ནས་རྒྱ་དངུལ་རྡོ་ཚད། ལྷ་རྫས་ནང་མཛོད་བཅས་རྗེ་བཙུན་བླ་མ་མཆོག་གི་འདྲ་ཐང་གསར་སྐྲུན་མཛད་པའི་སྐུ་རྒྱབ་ཏུ་ཕྱག་པར་དང་འདོད་གསོལ་གསར་རྩོམ་དགོས་ཚུལ་གསུངས་པ་བཞིན། མཐའ་ཀླས་ཞིང་ཁམས་ཡངས་པོར་འཚོ་གཞེས་པའི། །རྒྱལ་བ་ཀུན་གྱི་མཉེས་གཤིན་སྙིང་རྗེའི་མཚོ། །རླབས་ཆེན་ལེགས་བྱས་རི་དབང་གིས་བསྲུབས་པས། །མཚན་དཔེའི་ཟླ་གཞོན་སྐྱེ་རྒུའི་གཉེན་དུ་ཤར། །མཛད་བཟང་བདུད་རྩིའི་ཟེགས་མ་ཆ་རེས་ཀྱང་། །ས་གསུམ་གདུང་བ་མ་ལུས་དྲུངས་འབྱིན་པའི། །ཐུགས་རྗེ་གཏེར་ཁྱོད་དེང་ནས་བྱང་ཆུབ་བར། །གཏན་གྱི་སྐྱབས་སུ་བསྟེན་པའི་གཡར་དམ་བགྱིད། །དེ་སླད་མཁས་མང་ལྷ་བརྒྱའི་ཟུར་ཕུད་རྩེར། །ཞབས་ཟུང་གཞོམ་མེད་ལང་ཚོར་བརྟན་བཞུགས་ནས། །བྱམས་བརྩེའི་ལྕགས་ཀྱུས་བདག་ཅག་སྙིགས་མའི་འགྲོ། །རིང་མིན་གཏན་བདེའི་ས་ལ་དྲང་དུ་གསོལ། །ཞེས་པའི་ཤོ་ལོ་ཀ་གསུམ་དང་ཕྱག་པར་སོགས་བཀའ་བཞིན་བསྒྲུབས། 

ས་བྱ་སྤྱི་ལོ་༡༩༠༩ལོའི་ཟླ་བཞི་བའི་ཡར་ཚེས་ལ་གསང་སྒྲོགས་དགོན་པར་དཔྱིད་ཆོས་ཚུགས།  རྗེ་ཉིད་ཕེབས་ལམ་སྐར་མ་ཐང་དུ་ ༧ རྒྱལ་དབང་ཐམས་ཅད་མཁྱེན་པ་བྱ་ཁྱུང་དུ་ཕྱགས་ཕེབས་ཏེ་གདན་འདྲེན་གྱི་བཀའ་གླེགས་འབྱོར་འཕྲལ་སླར་བྱ་ཁྱུང་དུ་བཏེགས། སྐྱབས་མགོན་མཆོག་ཡབ་སྲས་ལྷན་རྒྱས་ལ་དགོན་དེ་ཀའི་རིགས་སྨྲ་རྣམས་ཀྱིས་རྩོད་རྒྱུགས་ཕུལ་པར་གཟིགས་རྟོག་མཛད། 

དེ་ཡང་མེ་རྟ་སྤྱི་ལོ་༡༩༠༦ནས་བཟུང་སྟེ་ལོ་ངོ་མཐོང་གསུམ་གྱི་རིང་ལ་སྔ་ཕྱིར། ༧ གོང་ས་རྒྱལ་བའི་དབང་བོར་ཆོས་བཀའ་ཇི་སྙེད་ཅིག་ཕུལ་པའི་རིམ་པ་ནི། ཉིད་ཀྱིས་མཛད་པའི་ཁྲིད་ཡིག་སྟེང་ནས་ལམ་གྱི་རིམ་པའི་མྱོང་ཁྲིད། བླ་མཆོད་བདེ་སྟོང་དབྱེར་མེད་མ་དང་སྦྲགས་ཏེ་དགེ་ལྡན་སྙན་བརྒྱུད་ལས་འོངས་པའི་ཕྱག་རྒྱ་ཆེན་པོའི་ཟབ་ཁྲིད། ཁྱུང་བོ་མགུར་བརྒྱད་དང་རྭ་བའི་ཆོས་བརྒྱད་ཀྱི་མན་ངག་བྱིན་རླབས་ཀྱི་ཁྲིད། རྗེ་བདག་ཉིད་ཆེན་པོས་མཁས་གྲུབ་རྗེ་ལ་ཆིག་བརྒྱུད་དུ་གནང་བའི་བླ་མའི་རྣལ་འབྱོར་གྱི་ཁྲིད། དབེན་ས་སྙན་བརྒྱུད་ལས་བྱུང་བའི་འོད་དཔག་མེད་ཀྱི་འཕོ་བ་དཔའ་བོ་གཡུལ་འཇུག་མའི་ཁྲིད། དེས་རྒྱས་བཀབ་དགའ་ལྡན་འཕོ་ཁྲིད། ལྷའི་དགེ་བསྙེན་གྱིས་བྱང་སྒྲ་མི་སྙན་ནས་སྤྱན་དྲངས་ཏེ་དགྲ་བཅོམ་པ་འཆི་མེད་ལ་ཕུལ་པའི་སྒྲ་མི་སྙན་གྱི་ཚེ་ཁྲིད། དགེ་ལྡན་ལྟ་ཁྲིད་དྲན་པ་བཞི་ལྡན། གླང་རི་ཐང་བ་རྡོ་རྗེ་སེང་གེའི་ལུགས་ཀྱི་བློ་སྦྱོང་ཚིགས་བརྒྱད་མའི་ཁྲིད། མེ་ཏོག་བཅུད་ལེན་གྱི་ཁྲིད། དརྦན་ཨ་ཙར་ཡའི་ལུགས་འཇམ་དབྱངས་ཆོས་སྐོར་གྱི་ཁྲིད། རྗེ་བདག་ཉིད་ཆེན་པོས་ཐུགས་ཉམས་སུ་བཞེས་པའི་སྙིང་རླུང་གི་གེགས་སེལ་མན་ངག་ཧ་འདོན་ནམ་མ་ནིང་ཧ་འདོན་དུ་གྲགས་པའི་རླུང་སྦྱོར་གྱི་ཁྲིད། དཔལ་རྡོ་རྗེ་འཇིགས་བྱེད་ལྷ་བཅུ་གསུམ་མའི་བསྐྱེད་རྫོགས་ཀྱི་དམར་ཁྲིད་ཞལ་ཤེས་བཅས་དང་། གསང་འདུས་རིམ་ལྔ། དུས་འཁོར་སྦྱོར་དྲུག ནཱ་རོ་ཆོས་དྲུག ལཱུ་ཨི་པའི་རྣལ་འབྱོར་ཆེན་པོ། དྲིལ་བུ་རིམ་ལྔ། འཇིགས་བྱེད་ཀྱི་རྣལ་འབྱོར་བཞི་རིམ། ཕྱག་རྡོར་འཁོར་ཆེན་གྱི་བྱིན་རླབས་བཞི་ལྡན། འཇམ་རྡོར་གྱི་ཐིག་ལེ་བཞི་རིམ་སྟེ་སྨད་རྒྱུད་ཁྲིད་ཆེན་བརྒྱད་དུ་གྲགས་པའི་རྫོགས་རིམ་སྐོར་གྱི་ཁྲིད། ཇོ་ནང་རྗེ་བཙུན་ཀུན་དགའ་གྲོལ་མཆོག་གིས་དཀའ་བ་བརྒྱ་ཕྲག་དུ་མའི་སྒོ་ནས་བཙལ་བའི་མདོ་སྔགས་སྣ་ཚོགས་ཀྱི་ཁྲིད་བརྒྱ་རྩ་བརྒྱད་ཕྱོགས་བསྒྲིགས་མཛད་པ་ཁྲིད་བརྒྱར་གྲགས་པའི་ཁྲིད་ལུང་དང་བཅས་པ། རྔོག་དཀྱིལ་ལས་མ་རྒྱུད་དཀྱིལ་འཁོར་དྲུག་གི་དབང་། རྣལ་འབྱོར་རྒྱུད་དེ་ཉིད་བསྡུས་པའི་དུམ་བུ་དང་བོ་ལས་གསུངས་པའི་རྡོར་དབྱིངས་ཀྱི་དབང་། དེའི་དུམ་བུ་གཉིས་པ་ལས་འཕྲོས་པའི་སྦྱོང་རྒྱུད་ཀྱི་རྟོག་པ་ནས་བཤད་པ་དགེ་ལུགས་ཀུན་རིག་རྩ་བའི་དབང་། ས་ལུགས་སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་། འཇམ་དཔལ་གསང་ལྡན་གྱི་དབང་། བཀའ་གདམས་ཐིག་ལེ་བཅུ་དྲུག་གི་དབང་། གསང་འདུས་དང་བདེ་མཆོག་སྔགས་བཏུའི་རྗེས་གནང་། གྲུབ་ཆེན་བརྒྱད་ཅུའི་རྗེས་གནང་། སྒྲོལ་མ་ཉེར་གཅིག་སོ་སོར་ཕྱེ་བའི་རྗེས་གནང་། ལྷོ་བྲག་སྙན་བརྒྱུད་སྐོར་ལ་རྣམ་འཇོམས་སྣུར་ལུགས་རྩ་བའི་ལྷ་སོ་ལྔ་ཁྱམས་ཀྱི་རྡོ་རྗེ་ཕོ་ཉ་མོ་དྲུག་ཅུ་རྩ་བཞི་དང་བཅས་པའི་དབང་། དོན་དམ་སེམས་བསྐྱེད་ཀྱི་བྱིན་རླབས་སུ་གྲགས་པ་ཐུབ་དབང་ལ་ཉེ་སྲས་བརྒྱད་ཀྱིས་བསྐོར་བའི་རྗེས་གནང་། སྐུའི་ཕྱག་ན་རྡོ་རྗེ། གསུང་གི་ཕྱག་ན་རྡོ་རྗེ། ཐུགས་ཀྱི་ཕྱག་ན་རྡོ་རྗེ། ཡོན་ཏན་གྱི་ཕྱག་རྡོར་ཞལ་གསུམ་ཕྱག་བཞི་བ། འཕྲིན་ལས་ཀྱི་ཕྱག་རྡོར་ཞལ་གསུམ་ཕྱག་དྲུག་སྟེ་ཕྱག་རྡོར་སྐུ་ལྔའི་རྗེས་གནང་། ཕྱག་རྡོར་གཏུམ་པོ་ཞལ་གཅིག་ཕྱག་གཉིས་པའི་ཐུགས་ཀར་ཕྱག་དྲུག་པ་བཀོད་པ་རྡོ་རྗེ་གཅེས་འཕྲེང་གི་རྗེས་གནང་། ཡང་གསང་བདུད་རྩིའི་རྒྱ་མཚོར་གྲགས་པ་གཏུམ་པོ་མེ་འབར་གྱི་རྗེས་གནང་། ཕྱག་རྡོར་དྲག་པོ་གསུམ་སྒྲིལ་གྱི་རྗེས་གནང་། ཚེ་དཔག་མེད་ལྷ་བཅུ་དགུའི་ཚེ་དབང་འཆི་བདག་བདུད་འཇོམས་སུ་གྲགས་པ་རྣམས་དང་། མཁས་གྲུབ་སྨྲ་བའི་ཉི་མས་མཛད་པའི་དཔལ་གསང་བ་འདུས་པའི་བསྐྱེད་རིམ་དངོས་གྲུབ་རྒྱ་མཚོའི་བཤད་ལུང་། རྗེ་བདག་ཉིད་ཆེན་པོས་མཛད་པའི་གསང་འདུས་རྫོགས་རིམ་རིམ་ལྔ་གསལ་སྒྲོན་གྱི་བཤད་ལུང་། བདེ་མཆོག་གི་རྒྱུད་འགྲེལ་སྦས་དོན་ཀུན་གསལ་གྱི་བཤད་ལུང་། དུས་འཁོར་འགྲེལ་ཆེན་དྲི་མེད་འོད་འབྲོ་ལོ་ཙཱ་བའི་འགྱུར་ལ་ཤོང་སྟོན་གྱིས་འགྱུར་བཅོས་མཛད་པ་བུ་སྟོན་རིན་པོ་ཆེའི་མཆན་དང་སྦྲགས་པའི་བཤད་ལུང་། ཀུན་མཁྱེན་བར་བས་མཛད་པའི་ལྟ་མགུར་འགྲེལ་བ་ཚིག་གི་སྒྲོན་མེའི་བཤད་ལུང་། དབལ་མང་པཎྜི་ཏའི་མདོ་རྒྱན་འགྲེལ་བའི་བཤད་ལུང་རྣམས་དང་། རྩིས་ཐང་ལ་ས་ཆེན་ཀུན་དགའ་རྒྱལ་མཚན་གྱིས་མཛད་པའི་བཀའ་གདམས་ཆོས་འབྱུང་གསལ་བའི་མེ་ལོང་། འབྲོམ་གྱིས་མཛད་པའི་མི་ཆོས་གནད་ཀྱི་ཕྲེང་བའི་ལུང་། པོ་ཏོ་བའི་ཆིག་ལབ་རིང་མོ་དང་བྱང་ཆུབ་འོད་ཀྱི་ཞལ་གདམས་གཉིས་ཀྱི་ལུང་། ཕ་དམ་པས་མཛད་པའི་དིང་རི་བརྒྱད་ཅུ་བའི་ལུང་། བློ་སྦྱོང་དོན་བདུན་མའི་ལུང་། བློ་སྦྱོང་ཚིག་རྐང་བརྒྱད་མའི་རྩ་བའི་ལུང་། དགེ་བཤེས་ཤ་ར་བ་ཡོན་ཏན་གྲགས་ཀྱི་ལམ་རིམ་ཆུང་བ་དབུར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སངས་རྒྱས་ཀྱིས་བསྟན་པའི་ཆོས་ཐམས་ཅད་སྐྱེས་བུ་གསུམ་གྱི་ལམ་གྱི་རིམ་པར་འདུས་ཏེ། ཞེས་དང་། དལ་བ་དོན་མེད་པར་མི་འགྱུར་རོ། །སྐྱེས་བུ་གསུམ་གྱི་ལམ་གྱི་རིམ་པ་ཤཱཀྱའི་དགེ་སློང་ཡོན་ཏན་གྲགས་ཀྱིས་སྦྱར་བའོ། །ཞེས་པའི་མཐའ་ཅན། ཁ་རག་སྒོམ་ཆུང་བས་མཛད་པའི་ཐོ་ཆོས་དང་བློ་སྦྱོང་བློ་ལྡོག་བཞི་བ། ཨང་ཡིག་དོན་གཉིས་མ་རྣམས་ཀྱི་ལུང་། པོ་ཏོ་བའི་གསུང་རྒྱུན་དགེ་བཤེས་ཡ་གད་པའམ་དོལ་བོ་ཤེས་རབ་རྒྱ་མཚོས་བསྒྲིགས་པ་དོན་གྱི་ལམ་རིམ་བེའུ་བུམ་སྔོན་པོའི་རྩ་བ་དང་། དེའི་འགྲེལ་བ་སློབ་དཔོན་ཇོ་བོ་ལྷ་འབྲི་སྒང་བས་མཛད་པ། པོ་ཏོ་བའི་གསུང་དགེ་བཤེས་གྲབ་པ་དང་བྲག་དཀར་བས་བསྡེབས་པ་དཔེ་ཆོས་རྩ་བའི་ལུང་། དེའི་འགྲེལ་བ་ལྕེ་སྒོམ་ཤེས་རབ་རྡོ་རྗེས་མཛད་པའི་ལུང་། བེའུ་བུམ་དང་དཔེ་ཆོས་གཉིས་ལ་མཁོ་བའི་གཏམ་རྒྱུད་རིན་ཆེན་ཕྲེང་མཛེས་ཀྱི་ལུང་། སྤོང་བ་བསམ་གཏན་པ་རྣམས་ལ་དགེ་སྦྱོར་གྱི་གེགས་སེལ་བོགས་འདོན་མེད་དུ་མི་རུང་བ་མན་ངག་རིན་ཆེན་སྤུངས་པ་ལེའུ་བཅུ་གསུམ་གྱི་བདག་ཉིད་ཅན་ལྕེ་སྒོམ་ཤེས་རབ་རྡོ་རྗེས་མཛད་པའི་ལུང་། མཉམ་མེད་དྭགས་པོ་ལྷ་རྗེ་བསོད་ནམས་རིན་ཆེན་གྱིས་མཛད་པའི་ལམ་རིམ་ཐར་བ་རིན་པོ་ཆེའི་རྒྱན་གྱི་ལུང་། རྒྱལ་སྲས་ཐོགས་མེད་པའི་དངོས་སློབ་འགྲོ་མགོན་དཔལ་ལྡན་ཡེ་ཤེས་ཀྱི་ཟིན་བྲིས་བློ་སྦྱོང་སྙན་བརྒྱུད་ཆེན་མོའམ་བློ་སྦྱོང་གསུང་སྒྲོས་མར་གྲགས་པའི་ལུང་། བྱང་སེམས་རྭ་སྒྲེང་བ་ཤཱཀྱ་བསོད་ནམས་ཀྱིས་མཛད་པའི་ཐེག་ཆེན་བློ་སྦྱོང་བྱང་ཆུབ་སེམས་ཀྱི་ཆུ་རྒྱུན་གྱི་ལུང་། དྭགས་པོ་སྒོམ་ཆེན་ངག་དབང་གྲགས་པས་མཛད་པའི་ལམ་རིམ་ཚིགས་བཅད་མ་ལེགས་གསུང་ཀུན་གྱི་ཉིང་ཁུའི་ལུང་། རྗེ་ངག་དབང་བྱམས་པས་མྱུར་ལམ་གྱི་ཁྲིད་གནང་སྐབས་ཀྱི་ཟིན་བྲིས་བླ་མའི་སྐུ་ཚབ་ཏུ་གྲགས་པའི་ལུང་། འཇམ་དབྱངས་དགའ་བའི་བློ་གྲོས་ཀྱིས་མཛད་པའི་ལྟ་ཁྲིད་འབྲིང་བོ་དེ་ཉིད་གསལ་བྱེད་དང་། ལྟ་ཁྲིད་བསྡུས་པ་འཇམ་དཔལ་ཞལ་ལུང་གཉིས་ཀྱི་ལུང་། རྩེ་བཤེར་བཟང་བའི་རིམ་ལྔའི་བཤད་པ་རྡོ་ལག་བརྒྱུད་མའི་ལུང་། ཆུ་མིག་ལུང་བའི་ཁྲིད་ཡིག་རྡོ་ལག་བརྒྱུད་མའི་ལུང་། འབྲོང་རྩེའི་འཇིགས་བྱེད་བསྐྱེད་རྫོགས། ཐང་སག་པའི་འཇིགས་བྱེད་བསྐྱེད་རྫོགས། སྒོམ་སྡེའི་འཇིགས་བྱེད་བསྐྱེད་རྫོགས། ཞི་སྤྲུལ་པའི་མཁའ་སྤྱོད་བསྐྱེད་རྫོགས་རྣམས་ཀྱི་ལུང་། འཇམ་དབྱངས་སྨྲ་བའི་སེངྒེའི་ཆོས་སྐོར་གྱི་ལུང་། སྔགས་འཆང་འཇམ་དབྱངས་བློ་གྲོས་ཀྱི་མི་ཏྲའི་དབང་ཆོག་གི་ལུང་། འཇམ་དབྱངས་བདེ་བའི་རྡོ་རྗེའི་བཀའ་འབུམ་གྱི་ལུང་། སྙེ་ནམ་རྭ་ལོ་ཙཱ་བ་རྡོ་རྗེ་གྲགས་ཡབ་སྲས་གཉིས་དང་། ཆོས་རབ་ཀྱི་སྲས་རྭ་ངྷརྨ་སེངྒེ་དང་། རྭ་ཡེ་ཤེས་སེངྒེ་སོགས་རྭ་ཤར་ནུབ་ནས་བརྒྱུད་པའི་གདམས་པ་ནག་འཇིགས་སྐོར་གསུམ་གྱི་གླེགས་བམ་རྭ་པོད་དུ་གྲགས་པའི་ལུང་། ཞང་སྟོན་ནམ་མཁའ་གྲགས་ཀྱི་སློབ་མ་འབྲི་གུང་དཔལ་འཛིན་གྱིས་མཛད་པའི་རྡོ་རྗེ་འཇིགས་བྱེད་ཀྱི་ཆོས་སྐོར་དཔལ་པོད་ཀྱི་ལུང་། མཁའ་སྤྱོད་སྐོར་གསུམ་གྱི་བེའུ་བུམ། རིགས་བྱེད་མའི་བེའུ་བུམ། རྣམ་སྲས་བེའུ་བུམ། ལྷ་མོའི་བེའུ་བུམ། ཞལ་གྱི་བེའུ་བུམ་ཧ་ལ་ནག་པོ་མ་ཡིག་བཅས། བེ་རྒྱེའུ་བེའུ་བུམ། ན་བཟའ་བེའུ་བུམ། སྒྱུ་མ་བེའུ་བུམ། ཕ་དམ་པའི་མཁྱུད་སྤྱད་དཀར་ནག་ཁྲ་གསུམ། ཇག་ཆིངས་རྭ་རུ་མ། གཡུ་ཐོག་ཡོན་ཏན་མགོན་པོའི་སྨན་གྱི་ཆ་ལག་བཅོ་བརྒྱད། རྗེ་ཉིད་ཀྱི་གསུང་ལས། ལྟ་ཁྲིད་དྲན་པ་བཞི་ལྡན་གྱི་ཟིན་བྲིས། བློ་སྦྱོང་ཚིགས་བརྒྱད་མའི་ཟིན་བྲིས། མེ་ཏོག་བཅུད་ལེན་གྱི་ཟིན་བྲིས་རྣམས་ཀྱི་ལུང་དང་། འདི་སྐབས་ཀྱང་འཁོར་ཆེན་ཆོ་ག སྙན་ངག་དཔེར་བརྗོད། རིགས་བྱེད་མའི་ཚེ་སྒྲུབ་སོགས་ལེ་ཚན་ཁ་ཤས་དང་། སྐྱབས་རྗེ་ཤིང་བཟའ་རྡོ་རྗེ་འཆང་གི་རྣམ་ཐར་རྒྱལ་སྲས་སྤྱོད་པའི་རྒྱན་གྱི་ལུང་གི་མཇུག་ཏུ་ལམ་རིམ་ཆེན་མོ་དབུ་ཚུགས་ཙམ་མཛད་དེ། བསྟན་པའི་ཆུ་མགོ་འཇམ་མགོན་བླ་མ་ཡབ་སྲས་ཀྱི་གདན་ས་འདི་ཉིད་དུ་བཀའ་ཆོས་ཀྱི་མཇུག་གྲུབ་པར་མཛད་པ་ལ་དགོངས་གཞི་ཆེ་བར་མངོན། 

ས་ག་ཟླ་བའི་ཚེས་བཅུའི་ཉིན་སྐྱབས་མགོན་ཐམས་ཅད་མཁྱེན་པར་དངོས་འབུལ་བཅས། རྒྱལ་ཀུན་སྙིང་རྗེའི་བདག་ཉིད་འཕགས་མཆོག་ཕྱག་ན་པདྨོའི་སྒྱུ་འཕྲུལ་༧སྐྱབས་མགོན་ལྷ་མིའི་རྣམ་འདྲེན་ཆེན་པོའི་ཞབས་པད་དགེ་མཚན་གྱི་འདབ་བརྒྱ་གྲོལ་བའི་ཉེ་དྲུང་དུ། ཕྲན་ཆུང་ཞྭ་དམར་སྐྱེ་མིང་བ་ནས་གུས་ཕྱག་གྲངས་མང་སྔོན་དུ་འགྲོ་བས་ཞུ་གསོལ། ཉེ་བར་སྐྱབས་མགོན་ཐམས་ཅད་མཁྱེན་གཟིགས་ཆེན་པོ་བོད་ཡུལ་དབུས་འགྱུར་ཆོས་ཀྱི་དགའ་ཚལ་དུ་ཆིབས་ཞལ་བསྒྱུར་ཉེ་བའི་ཕེབས་རྫོངས་མཚོན་བྱེད་ཙམ་དུ། མཎྜལ་རྟེན་དོད་སྲང་ལྔ། རྒྱ་དངུལ་རྟ་རྨིག་མ་གསུམ། བཟང་གོས་སེར་བོ་གྱོན་འདང་གཉིས། དམར་སེར་བཟོ་འདང་གཅིག དམར་བོ་འབྲུག་རིས་མ་གཅིག གསེར་ཐིས་ནག་པོ་བུབས་གཅིག མགོ་སྣམ་བཟོ་འདང་། ཕྲུག་དམར་བོ་གཉིས། ཡི་མོའུ་དན་བཟོ་འདང་གསུམ། ཅེན་ཁྲོའུ་བཟོ་འདང་གསུམ། བི་ཏང་ཁེ་ལིང་བཟོ་འདང་། ཡང་གོས་སྔོ་ནག་ཡུག་གཅིག དམར་བོ་ཡུག་ཆེན་གཅིག ནང་མཛོད་ཆེ་ལེགས་བཅས་འབུལ་ལམ་ཞུ་བ་ལགས་ན། ལུས་ཅན་ཕན་བདེའི་རྩ་ལག་འཁྲུལ་བྲལ་བསྟན་པའི་སྙིང་བོ་དར་རྒྱས་ཡུན་རིང་དུ་གནས་པ་ཁོ་ནའི་ཆེད་དུ་༧སྐྱབས་མགོན་སྲིད་ཞིའི་གཙུག་རྒྱན་ཆེན་པོ་ཉིད་ཞབས་ཟུང་གཡོ་མེད་གཞོམ་གཞིག་བྲལ་བ་རྡོ་རྗེའི་རང་བཞིན་དུ་བརྟན་པར་བཞུགས་པའི་བཀའ་དྲིན་མི་ཆུང་བ་དང་སྔ་དུས་ཡང་ཡང་ཞུས་ཟིན་ལྟར་རྒྱལ་སྲིད་ནི་ཁེ་ཉེན་གྱི་གཞིར་སྣང་གཤིས། གཟུ་བོའི་བློ་ཅན་ཞིག་གི་བགོ་སྐལ་དུ་ཆེད་གཏད་ངོས། ༧ སྐྱབས་མཆོག་ཉིད་བཤད་སྒྲུབ་བྱ་བ་ལས་ཀྱི་འཁོར་ལོའི་མཛད་བཟང་ཁོ་ནར་རྩེ་གཅིག་གཞོལ་བའི་ཐུགས་རྗེ་མི་ཆུང་བ་དང་། ཕྲན་འབྲེལ་ཐོགས་རྣམས་དང་བཅས་པ་རྣམ་ཀུན་བརྩེ་བས་རྗེས་སུ་བཟུང་སྟེ་གདོད་མའི་ས་ལ་སྨིན་ཅིང་གྲོལ་བའི་སྐྱབས་ཀྱི་འཇུག་པ་ནམ་ཡང་མི་ལྷོད་པ་ཅིས་ཀྱང་མཁྱེན་མཁྱེན་མཁྱེན་ཞེས་ཚིག་ཙམ་མིན་པར་སྙིང་ནས་གསོལ་བ་འདེབས་པ་ལགས། ཞེས་ཞུས་པར། ཀུན་གཟིགས་མཆོག་ནས་ཀྱང་དགྱེས་པ་ཆེན་པོས་གང་གསུང་དང་ལེན་གྱི་ཞལ་བཞེས་མཛད་པ་སོགས་ཆེ་ཤོས་རིན་པོ་ཆེ་ནས་དངོས་སུ་མཇལ། སྐྱབས་མགོན་ཐམས་ཅད་མཁྱེན་པ་ནས་སྲུང་མདུད་ལྷ་རྫས་ནང་མཛོད་བཅས། བླ་མ་རིན་པོ་ཆེར་མཁན་ཐོབ་ཅིག་འབུལ་རྒྱུ་ཡོད་པ་ལེན་ཕྱིར་ཞབས་གྲས་ཤིག་སྐུ་འབུམ་དུ་འགྲོ་དགོས། ཁོང་རིན་པོ་ཆེ་ལ་མཁོ་གལ་མི་ཆེ་ཡང་ངེད་རང་གི་ངོས་ནས་དམ་པའི་ཆོས་ཀྱི་ཆེ་འདོན་དང་། དྲིན་གཟོའི་ཕུ་དུད་ལགས་གཤིས་ཅིས་ཀྱང་བཞེས་དགོས་ཚུལ་གྱི་གསུང་ནན་བཟློག་ཏུ་མེད་པ་དང་། ཐུགས་ལ་བརྣག་པའི་འཕྲལ་ཡུན་གྱི་སྐྱབས་འཇུག་ཀྱང་ཞུ་བར་མཛད་དོ། །

དེ་ལྟར་ངེས་པའི་དོན་དུ་རྒྱལ་ཀུན་སྙིང་རྗེའི་ཕུང་བོ་བཞིན་ལག་གར་གྱིས་རྣམ་པར་རོལ་པ་འཕགས་མཆོག་ཕྱག་ན་པདྨོ་ཉིད་ལས་གཞན་དུ་མ་དམིགས་ཀྱང་། དྲང་དོན་གདུལ་བྱའི་སྣང་ངོར་མདོ་དབུས་ཐ་དད་པར་ངུར་སྨྲིག་འཛིན་པའི་བཤེས་གཉེན་མཆོག་གི་སྒྱུ་འཕྲུལ་དྲ་བའི་གར་གྱིས། ཟབ་རྒྱས་གདམས་པ་ནོར་བུའི་ཕུང་བོ་སྤེལ་བ་དང་སྡུད་པའི་ཚུལ་གྱིས་བསྟན་འགྲོའི་དོན་མཛད་པ་དེའི་ཚེ་ན། རྗེ་བཙུན་བླ་མ་མཆོག་ནས་དབང་ཁྲིད་མན་ངག་རྗེས་གནང་ལུང་སོགས་དཀོན་པའི་ཆོས་རྒྱུན་མང་བོ་ཕུལ་པས་མཚོན་བཤད་སྒྲུབ་བསྟན་པའི་རྒྱལ་མཚན། ཐམས་ཅད་གཟིགས་པ་མཆོག་གི་ཕྱག་ཏུ་གཏད་ཅིང་། ༧ གོང་ས་མཆོག་ནས་ཀྱང་ཐུགས་བཞེད་གྲུབ་པའི་དགྱེས་ཚོར་ཆེན་པོ་མཛད་དོ། །

དེ་ནས་ཡབ་སྲས་ཕན་ཚུན་འབྲལ་མི་ཕོད་པར་ཐུགས་འཁྲེང་བའི་ཉམས་དང་བཅས། ༧ རྒྱལ་བའི་དབང་བོ་མཆོག་ནོར་བུ་ལེན་པའི་དེད་དཔོན་བཞིན་དབུས་འགྱུར་ཆོས་ཀྱི་ཞིང་དུ་ཆིབས་ཞལ་བསྒྱུར་ཞིང་། རྗེ་བཙུན་བླ་མ་ཉིད་ལྗོངས་འདིའི་གདུལ་བྱ་རྣམས་ཀྱི་མགོན་དུ་བཞུགས་སྟན་འཇགས་སོ། །

ཤར་ཕྱོགས་རྒྱལ་ཁབ་ཆེན་པོར་ཆིབས་བསྒྱུར་སྐབས་སྐུ་འབུམ་ནས་གནང་བའི་བཀའ་གླེགས་འདི་ལྟར། ༧ ཁྱབ་བདག་དང་བོའི་ཟློས་གར་གསུམ་ལྡན་ངུར་སྨྲིག་འཛིན་པའི་དམ་པ་རིན་པོ་ཆེར་སྟབས་ཞུ། ད་ལམ་བཀའ་བྲིས་ཕེབས་ཚོགས་བཟང་བོ་དང་། གནང་སྐྱེས་གྱ་ནོམ་དང་བཅས་བསྩལ་འབྱོར་ཐོག་གཞན་གྱིས་ཐོབ་པར་དཀའ་བའི་བུ་སྟོན་ཡོ་ཊཱིཀ་བྱིན་རླབས་ཅན་སྤྱི་ཕེབས་རྣམས་དད་སྤྲོའི་ངང་ནས་ཞུས་ལགས་པ་ནམ་ཡང་གཞལ་དཀའི་བཀའ་དྲིན་ཤིན་ཏུ་ཆེ་ཆེ། སླར་ཞུ་ངོས་ཀྱང་སྨད་ཕྱོགས་ཐོན་རྒྱུ་འདི་དག་བསྟན་འགྲོའི་དོན་ཆེན་ལ་སྨན་ཚེ་རང་ཉིད་ཀྱི་ངལ་བ་ཅི་ཙམ་བསྟེན་ནུས་པ་ངལ་འབྲས་དོན་དང་ལྡན་ཡང་། སྙིགས་དུས་ནག་ཕྱོགས་ཁ་མཐོ་ཞིང་། གནམ་བསྐོས་ཆབ་སྲིད་ཀྱང་ཤུགས་ཀྱིས་ཉམས་དམའ་དུས་འདིར་བདག་ལྟ་བུས་རྔོ་ཐོགས་བྲལ་སྙམ་པའི་རེ་དོགས་འཆའ་ཞིང་། འོན་ཀྱང་རང་གི་བློས་དཔག་ནུས་ཚོད་ཀྱིས་བླ་མའི་མན་ངག་རྗེན་པར་བསྩལ་པ་རྣམས་སྒྲུབ་རྒྱུའི་སྨོན་པ་ཙམ་ཡང་བསོད་ནམས་དཔག་ཏུ་མེད་པ་རྫོགས་པར་འགྱུར་བས་ན། བླ་མ་མཆོག་གསུམ་ལ་གསོལ་འདེབས་ཀྱི་གྲོགས་སྦྱར་ཏེ་ཅི་སྒྲུབ་དང་བླངས་ཐོག རིང་མིན་ཡར་ལམ་སྐུ་འབུམ་འདིར་ལྷགས་ཏེ་དམ་པ་མཆོག་གི་ཞལ་བཟང་མཐོང་ནས་གསུང་གི་བདུད་རྩི་མྱོང་བར་སྨོན་ལགས་པས། རེ་འབྲས་རྣམས་གེགས་བྲལ་བསྟན་འགྲོའི་ཞབས་འདེགས་ཀྱི་ལེགས་ཚོགས་རྒྱ་ཆེན་པོའི་དོན་སོན་པའི་ཐུགས་སྨོན་འདོར་མེད་རྒྱུན་པར་བཅངས་པ་ཅི་ནས་འཚལ།

 རྟེན་ལྷ་རེག་བཅས་སློབ་བུའི་ཐ་ཤལ་བས་སྐུ་འབུམ་ནས་ཟླ་ཚེས་བཟང་བོར་ཕུལ།  ཅེས་སོགས་ཀྱི་བཀའ་གླེགས་དུ་མ་གནང་ཞིང་།

 ༧ གོང་ས་མཆོག་ནས་བསྩལ་པའི་ཁོང་རང་ཉིད་ཀྱི་འདྲ་ཐང་ཁྱད་མཚར། སྐུ་རྒྱབ་ཏུ་ཕྱག་པར་དང་། 

ཨོཾ་སྭ་སྟི། མ་ལུས་ཞིང་གི་རྣམ་འདྲེན་རིན་ཆེན་ཕུང་། །སྙིང་རྗེའི་རྡུལ་མང་གཅིག་བསྡུས་འཇིག་རྟེན་རྒྱན། །ལྗོངས་འདིའི་འགྲོ་ལ་ལྷག་བརྩེའི་འོད་རྣོན་འབར། །ལྷ་གཅིག་སྐྱེ་རྒུའི་གཙུག་ནོར་རིམ་བྱོན་རྒྱལ། །རྣམ་འདྲེན་རྒྱལ་བར་འོས་པའི་ཚུལ་དབེན་ཀྱང་། །དབང་མེད་རྐྱེན་གྱིས་སྐྱེས་གྲལ་ཚུད་པ་ལ། །དད་འདུན་ཐུགས་བརྩེའི་བཀའ་བཏགས་སྤྱི་བོར་བཅིངས། །ཡང་ཡང་ཐུགས་བསྐྱེད་དྲན་གསོའི་འདྲ་ཐང་བསྐྲུན། །གང་འཁོད་གནས་དེར་མགོན་ཁྱོད་ཞབས་བརྟན་ཅིང་། །རླབས་ཆེན་མཛད་འཕྲིན་བཞེད་དོན་སྐོང་བ་དང་། །བདག་ཀྱང་སྔོན་རབས་རྣམ་ཐར་ལྷུན་འགྲུབ་ཕྱིར། །འབྲལ་མེད་བདེན་ཚིག་བསྐུལ་བའི་རྟེན་དུ་འབུལ། །སརྦ་མངྒ་ལཾ། ཞེས་བཀའ་རྩོམ་ཤོ་ལོ་ཀ་གསུམ་ཅན་དང་། ཡོངས་འཛིན་ཆོས་ཀྱི་རྒྱལ་པོ་མ་ཧཱ་པཎྜི་ཏ་ནོ་མོན་ཧན་ཞེས་བསྔགས་པའི་འཇའ་ས་དང་། བཀའ་ཤོག ཐམ་ག་གྲུ་སྒོར། གདུགས་རྟ་དར། དབུ་ཞྭ་སྣེ་རིང་སོགས་ན་བཟའི་སྐོར་བཅས་མཁན་ཆས་ཆ་ཚང་ཞུས་ཏེ་སླེབས་པར། རི་ཁྲོད་པ་རྣམས་དང་དགོན་དེའི་བླ་གྲྭ་རྣམས་ཀྱིས་སེར་སྦྲེང་དང་། རྗེ་ཉིད་ནས་ཀྱང་གཟིམ་སྤྱིལ་སྒོར་བསུས་ཤིང་བཀུར་སྟི་ཆེན་པོས་ནང་དུ་གདན་དྲངས་ཏེ། བཞེས་སྤྲོ་སྣ་ལྔ་སོགས་ཀྱི་མཆོད་པ་དང་བཅས་པའི་ཁྲི་མཐོན་པོར་བཞུགས་སུ་གསོལ་ཞིང་། རྗེ་ཉིད་འཁོར་བཅས་ཀྱིས་ལྷ་ཕྱག་སྔོན་དུ་འགྲོ་བའི་ཡན་ལག་བདུན་པ་སེམས་བསྐྱེད་འཛིན་པ་བཅས་གནང་རྗེས། རྗེ་ཉིད་གདན་ལ་བཞུགས་པར་ཉེ་གནས་ཆེན་པོས་རེ་རེ་བཞིན་ཕྱག་ཏུ་ཕུལ་པའི་ཚེ་མཇལ་ཁ་དང་ཞིབ་གཟིགས་མཛད་ཅིང་། ཚོགས་མང་ལ་ཡང་མཇལ་ཁ་གནང་། རི་ཁྲོད་པའི་གཞུང་ནས་སྐུ་གསུང་ཐུགས་རྟེན་སོགས་ལེགས་འབུལ་བཅས་རི་ཁྲོད་པའི་དགེ་བསྐོས་བཤེས་གཉེན་ཆེན་པོ་དོར་ཤུལ་ངག་དབང་རྒྱ་མཚོས་མཎྜལ་བཤད་པ་ཞུས་ཤིང་ཚོགས་མང་གིས་དཔའ་དར་ཕུལ་ཏེ་མཇལ་ཁ་ཞུས་པར། བཀའ་ལས། སྐྱབས་མགོན་མཆོག་ནས་ཆོས་ཀྱི་ཆེ་བར་དགོངས་ཏེ་འདི་ལྟ་བུའི་འཇའ་ས་གནང་རྒྱུའི་གསུང་ནན་བསྩལ་པ་བདག་རི་ཁྲོད་པ་ཞིག་ལ་འོས་པ་མེད་ཀྱང་། ཧ་ཅང་ཨུ་ཚུགས་བྱས་ན་འཕགས་པ་སྤྱན་རས་གཟིགས་ཀྱིས་རྗེས་སུ་འཛིན་པའི་རྟེན་འབྲེལ་ལ་གནོད་དོགས་པས་བདག་གིར་མི་བྱེད་ཀ་མེད་བྱུང་། སྔོན་ཀུན་མཁྱེན་བླ་མར་གོང་ནས་ཐོབ་གནང་དུས། བླ་རྒན་ང་ལ་དགོས་པ་མེད་ཀྱང་། ང་ཁྱེད་ཚོའི་བླ་མ་ཡིན་སྟབས་ཁྱེད་ཚོ་ལ་ཕན་སྲིད་གསུངས་པ་ལྟ་བུ་རེད། ང་རི་ཁྲོད་པ་བླ་རྒན་ཞིག་ལ་ཐོབ་གོ་སས་དགའ་རྒྱུ་ཅང་མེད་མོད། ཁྱེད་རྣམ་པའི་བླ་མ་ལ་ཐོབ་བྱུང་ན་ཐུགས་དགྱེས་རྒྱུ་རེད་དེ། ཞེས་སོགས་དགོངས་གཞི་ཅན་གྱི་གསུང་བཀོད་དང་བསླབ་སྟོན་མཛད། བཀའ་ཤོག་དབུ་ནས་མར་གཟིགས་ཏེ་ཀུན་མཁྱེན་བར་བ་ལ་གཞུང་ནས་གནང་བའི་ཐོབ་དེ་རེད་གསུངས་ཏེ་བཞད་མོ་གནང་། མཁས་དབང་མ་ཏི་ཟི་གྲགས་པ་རྒྱ་མཚོ་མཆོག་གིས་ཚོགས་མང་གི་སྙན་གསན་དུ་བཀླགས། དེ་འཕྲལ་༧སྐྱབས་མགོན་ཐམས་ཅད་མཁྱེན་པའི་ཞབས་པད་དུ་རྒྱ་དངུལ་བྲེ་ཆེན་ལྷ་རྫས་ནང་མཛོད་སོགས་ཀྱི་ལེགས་འབུལ་བཅས། སྐྱབས་མགོན་མཆོག་གི་བཀའ་ནན་བཟློག་མ་ནུས་པར་ཆོས་བཀའ་ཁ་ཤས་བགྱིས་པའི་བྱས་པ་དྲིན་དུ་གཟོ་ཕྱིར་གཟེངས་བསྟོད་ཀྱི་བཀའ་ཤོག ཐམ་ག་གྲུ་སྒོར། གདུགས་རྟ་དར། མཁན་ཆས་ཆ་ཚང་བཅས་ཆེན་པོར་འོས་པའི་ལུང་ལས་དགྱེས་བཞིན་བསྩལ་པ་དམན་རྨོངས་བདག་ལྟ་བུར་འོས་པ་ཞིག་མིན་ཡང་ཆོས་ཀྱི་ཆེ་ཁྱད་འདོན་པའི་དགོངས་བཞེད་ཟབ་པ་དང་། འཕགས་པ་སྤྱན་རས་གཟིགས་ཀྱིས་རྣམ་ཀུན་རྗེས་སུ་འཛིན་པའི་བརྡ་ཐབས་སུ་འཁུམས་པས་དགའ་སྤྲོ་ཐོབ་ཚུལ། དེ་ལྟར་བརྩེ་བས་རྗེས་སུ་བསྐྱངས་པའི་བཀའ་དྲིན་གཞལ་བར་དཀའ་བའི་རང་བཞིན་ལས་མ་འདས་ཚུལ། རྣམ་པ་ཀུན་ཏུ་སྐྱབས་མགོན་མཆོག་གི་ཞབས་པད་བརྟན་པ་དང་བཞེད་དགོངས་འགྲུབ་པའི་ཞབས་རིམ་ལ་གཞོལ་བའི་འདུན་པ་ལྷོད་མེད་མཆིས་ཚུལ་སོགས་དོན་རྡོར་འཁོད་པའི་ཞུ་ཤོག་གོང་ས་མཆོག་ལ་ཕུལ་པའོ། །

དེ་ལྟ་བུའི་ཆེན་པོར་འོས་པའི་ལུང་ལས་དགྱེས་བཞིན་གནང་བའི་ཐོབ་བཅུ་གསུམ་ནི། ༡ གསོལ་དཔོན་བཞག་ཆོག་པའི་ཐོབ། ༢ གཟིམ་ཁང་གི་བདག་གཉེར་བ་བཞག་ཆོག་པའི་ཐོབ། ༣ གཞན་གྱི་མཆོད་གནས་ལ་བཞུགས་ཆོག་པའི་ཐོབ། ༤ མཇལ་ཡིག་གི་ཐོབ། ༥ གཞན་ལ་བཀའ་བསྒྲགས་ཆོག་པའི་གསེར་ཡིག་གི་ཐོབ། ༦ ཡུལ་གྱི་རྒྱལ་བོ་བཞིན་མཛོད་ཁང་གཉེར་ཆོག་པའི་ཐོབ། ༧ གཞན་ལ་ཕེབས་དུས་ལམ་བར་དུ་ཇ་ཐབ་བཟུང་ཆོག་པའི་ཐོབ། ༨ གདན་འདྲེན་ཞུ་མི་མངགས་ཆོག་པའི་ཐོབ། ༩ རྒྱལ་བོའི་མདུན་དུ་གདན་ཁྲི་བཤམས་ཆོག་པའི་ཐོབ། ༡༠ མི་སྐྱའི་གཡོག་འཁོར་བཟུང་ཆོག་པའི་ཐོབ། ༡༡ གདུགས་རྟ་དར་ཅན་གྱི་ཐོབ། ༡༢ མཛོ་གཡང་རྭ་ཅན་གྱི་ཐོབ། ༡༣ སྟག་ཁྱི་གཟིག་ཁྱིའི་ཐོབ་བཅས་བཅུ་གསུམ་ཡིན་ནོ། །རྗེ་མ་ཏི་ཟིས་མཛད་པའི་རྡོ་རྗེ་འཆང་གི་རྣམ་ཐར་ཆེན་མོ་ལས། ༧ གོང་ས་རྒྱལ་བའི་དབང་བོ་ཉིད་མདོ་སྨད་ཀྱི་ལྗོངས་འདིར་ཆེད་གཉེར་གྱིས་བྱོན་ནས། རྗེ་བཙུན་བླ་མ་འདི་ཉིད་ཀྱི་ཞབས་ལ་གཏུགས་ཏེ། ལེགས་བཤད་བདུད་རྩིའི་དགའ་སྟོན་ངོམས་མེད་དུ་གསོལ་བར་མཛད་ན། དེ་མན་གྱི་བླ་དཔོན་དྲེགས་ལྡན་སུ་ཞིག་གིས་གུས་འདུད་ལྷུར་ལེན་མི་བྱེད། འོན་ཀྱང་ཁྲོན་པའི་རུས་སྦལ་གྱི་དཔེ་བཞིན་སྡེ་དགོན་དང་ཡུལ་གྲོང་ཁ་ཤས་རེ་ལ་དབང་བསྒྱུར་བའི་རང་མཐོང་གི་ཁེངས་པས་སྙོམས་ལས་ཀྱི་མལ་དུ་བག་བརྐྱངས་ཤིང་ཆོས་བརྒྱད་ཀྱི་རོལ་རྩེད་ལ་གཡེང་བས་བསླུས་ཏེ། སངས་རྒྱས་དངོས་ལྟ་བུའི་ཐེག་པ་མཆོག་གི་དགེ་བའི་བཤེས་གཉེན་འདི་ལྟ་བུའི་ཞལ་མཇལ་བ་དང་ལེགས་གསུང་བདུད་རྩིའི་ཆ་ཤས་ལ་ཡང་ལོངས་སྤྱོད་པའི་སྐལ་བ་ཤིན་ཏུ་དམན་པ་དག་ནི་སྔོན་བྱས་ལས་ཀྱི་འབྲས་བུས་མཐོ་བརྩམས་པར་རྟོགས་སླའོ། །ཞེས་བླ་མ་རྡོ་རྗེ་འཆང་དེ་ཉིད་བྱ་བཏང་དཀྱུས་མའི་ངང་ཚུལ་ལས་མ་འདས་པར་བཞུགས་ནའང་གོང་ས་མཆོག་གིས་རིགས་ཀྱི་ཅོད་པན་དུ་བཀུར་བའི་ཚེ་གཟུར་གནས་མཁས་པ་རྣམས་ཀྱིས་དད་གསུམ་བསྔགས་པའི་མེ་ཏོག་འཐོར་ཞིང་རྗེས་སུ་ཡི་རང་གི་གནས་སུ་གྱུར་མོད། ཡོངས་འཛིན་མཆོག་གི་གོ་ས་ལ་རེ་བའི་ཆེན་པོ་འགའ་ཞིག་གི་རྒྱུད་ལ་ཕྲག་དོག་གི་ཚེར་མས་གདུངས་ཤིང་ཡིད་ལ་མི་བཟོད་པའི་སྡུག་བསྔལ་སྐྱེས་པའི་སྤྱོད་ལམ་ཡང་བསྟན་པར་གྲགས་པས་ཁ་ཅིག་ཡིད་ལ་དུཿཁ་སྐྱེས་པར་གླེང་ཞེས་པའོ། །

ས་བྱ་སྤྱི་ལོ་༡༩༠༩ལོའི་མཆུ་ཟླའི་མཇུག་ཏུ་རྒྱལ་དབང་ཐམས་ཅད་མཁྱེན་པ་ཟི་ལིང་དུ་ཕེབས་འཕྲལ་རྡོ་རྗེ་འཆང་གདན་འདྲེན་དུ་མངགས་པ་ལྟར་དབོ་ཟླའི་མགོར་སྐུ་འབུམ་དུ་ཕེབས། ཀུན་མཁྱེན་འཇམ་དབྱངས་བཞད་པ་སྐུ་ཕྲེང་བཞི་བ་བླ་མ་རྡོ་རྗེ་འཆང་ལ་མཇལ་ཕྱིར་དྷཱིཿཚར་ཕེབས་པར་རྗེ་འདིས་མཇལ་བར་གསུང་གླེང་དང་ལེགས་སྐྱེས་བསྩལ། 

གདན་རབས་ཚིགས་བཅད་མ་ལས། 

ཐུབ་པ་གནས་བརྟན་བཅུ་དྲུག་འཁོར་དང་བཅས། །

སྒྲོལ་མ་ཉེར་གཅིག་ལྟུང་བཤགས་སོ་ལྔ་སོགས། །

ལི་སྐུ་མང་བོ་རིན་ཆེན་གཉིས་པ་ཡིས། །

མཚོ་བདུན་ཕྱོགས་ནས་ལེགས་པར་བསྒྲུབས་ཏེ་ཕུལ། །

གསུང་གི་རྟེན་ལ་བཀའ་བསྟན་འགྱུར་རོ་ཅོག །

འཇམ་མགོན་ཡབ་སྲས་རྣམས་ཀྱི་གསུང་འབུམ་དང་། །

རྩོད་ཕྱོགས་ཡིག་ཆ་པོ་ཏི་སྟོང་ཕྲག་བསྒྲུབས། །

ལྗགས་རྩོམ་ལམ་ཁྲིད་སོགས་ཀྱང་བཀའ་དྲིན་མཛད། །ཅེས་བྱུང་། 

རྡོ་རྗེ་འཆང་སྐུ་དངོས་ཀྱིས་སྐུ་འབུམ་མཛོད་ཟུར་ཁོང་བཟོད་པ་བཟང་བོ་འདུ་ཁང་གསར་བཞེངས་ཀྱི་ལས་དཔོན་དུ་བསྐོས་ཏེ། གང་ཅིའི་བཀོད་ཁྱབ་མཐའ་དག་ཡི་གེར་ཕབ་ནས་སྤྲོད་པ་གནང་། རོང་བོ་མཚན་སྒྲོགས་ཧུ་ཐོག་ཐུ་རིན་པོ་ཆེ་སོག་ཡུལ་དུ་ཕེབས་རྒྱུའི་ཐོན་ཕྱག་ལ་ཕེབས་པར་སྔོན་ནས་ལྗགས་བཀོད་གནང་ཡོད་པ་བཞིན་འདུ་ཁང་གསར་བཞེངས་ཀྱི་རྟེན་གཙོར་བཞུགས་རྒྱུའི་སྟོན་པའི་སྣང་བརྙན་མི་ཚད་ལྷག་ཁྲི་དྲུག་འགྱོགས་ཅན་མཆོག་ཟུང་དང་བཅས་པ། མཉམ་མེད་ཇོ་བོ་དང་རྗེ་རིན་པོ་ཆེ་མི་ཚད་རེ། བཤགས་ལྷ་སོ་ལྔ། སྨན་བླ་བདེ་གཤེགས་བརྒྱད། གནས་བརྟན་བཅུ་དྲུག་དགེ་བསྙེན་ཧྭ་ཤང་རྒྱ་ཆེན་བཅས། ཉེ་སྲས་བརྒྱད། རྒྱན་དྲུག་མཆོག་གཉིས། ཇོ་ལུགས་སྒྲོལ་མ་ཉེར་གཅིག རྡོ་རྗེ་འཆང་། རྡོར་དབྱིངས། ཀུན་རིག རྣམ་སྣང་མངོན་བྱང་། ཕྱག་རྡོར་འབྱུང་འདུལ། དམ་ཚིག་གསུམ་བཀོད། ཚེ་དཔག་མེད། འཇམ་དབྱངས་དཀར་བོ། འོད་དཔག་མེད། གདུགས་དཀར། འོད་ཟེར་ཅན་མ་རྣམས་རྩེ་ཁྲུ་ལོངས་པ་རེ་བཅས་བསྒྲུབ་རྒྱུར་དངུལ་རྡོ་ཚད་ལྔ་བཅུ་ང་གཅིག་དང་། གཞན་དངོས་རྫས་མང་བོ་དངུལ་སྲང་ཉིས་སྟོང་བདུན་བརྒྱའི་རྩིས་བཅས་བསྐུར་གནང་མཛད། མཚོ་བདུན་ཕྱོགས་ནས་མཐུན་རྐྱེན་ལེགས་པར་བསྒྲུབས་ཏེ་ཕུལ། ཅོ་ནེ་ནས་དངུལ་རྡོ་ཚད་བཅོ་ལྔ་དང་བཅུ་མགོ་མ་གཉིས་ཀྱིས་བཀའ་འགྱུར་གསར་སྒྲུབ་དང་། རྐང་ཚའི་ཆན་ཧུ་གཅོད་པས་སྣར་ཐང་པར་མའི་བཀའ་བསྟན་གཉིས་ཕུལ་པ་དང་། རྒྱ་ཉག་ཚང་ནས་སྡེ་དགེ་བསྟན་འགྱུར་གཅིག་ཕུལ་པ་སོགས་སྐུ་གསུང་ཐུགས་ཀྱི་རྟེན་མང་བོ་ལྷུན་གྱིས་གྲུབ་ཅིང་། དཔེ་མཛོད་ཁང་དུ་བླ་མ་རྡོ་རྗེ་འཆང་ནས་གསར་བསྒྲུབས་དཔེ་པོད་བདུན་བརྒྱ་ལྷག་བཅས་ཕར་ཕྱིན་སྐོར་པོད་སུམ་བརྒྱ། དབུ་མའི་སྐོར་པོད་བརྒྱ་དང་བདུན་ཅུ། ཟུར་བཀོལ་བློ་རྟགས་སོགས་པོད་བརྒྱ་དང་བརྒྱད་ཅུ། བསྡུས་གྲྭ་སྐོར་པོད་བརྒྱ་ལྷག སྤྱི་མཁོའི་སྐོར་པོད་ཉིས་བརྒྱ། རིག་གནས་སྐོར་དང་སྔགས་ཕྱོགས་པོད་བརྒྱ་ལྷག་བཅས་པོ་ཏི་སྟོང་དང་ལྔ་བརྒྱར་ཉེ་བ་བསྒྲུབས། གཞན་ཕྱོགས་འདིའི་དྲེགས་ལྡན་མཐའ་དག་དང་། བཀའ་འབངས་སེར་སྐྱ་ཀུན་གྱིས་གུས་པས་བཀུར་ཞིང་མཆོད་པའི་ཡུལ་གཅིག་པུར་གྱུར་གཤིས་དཔལ་འབྱོར་ལོངས་སྤྱོད་ཟད་མི་ཤེས་པ་ངང་གིས་འདུ་བ་ཞིག་ལགས་ནའང་། རྒྱུ་རྫས་ལ་འཛིན་ཆགས་གཏན་མི་མངའ་བར་དད་འབུལ་གྱི་རྒྱུ་རྫས་ཡོངས་རྫོགས་ཕྱོགས་ཀྱི་འདུས་སྡེ་མང་བོར་ཆོས་ཐོག་གི་གཏོང་ཐེབས་དང་འགྱེད་ཐེབས། གདན་ས་བདེ་ཆེན་ཆོས་གླིང་དུ་བསྐལ་བཟང་སངས་རྒྱས་སྟོང་སྐུའི་ལྷ་ཁང་རྟེན་བཅས་དང་། ཁྲི་ཀའི་མཆོད་རྟེན་དཀར་བོ། ཏིང་ཀྱའི་ཨ་རིག་དགེ་བཤེས་ཆེན་མོའི་ལྷ་ཁང་རྟེན་བཅས་བཞེངས་པས་མཚོན་སྐུ་གསུང་ཐུགས་ཀྱི་རྟེན་མཐའ་ཡས་པ་གསར་བཞེངས་དང་། ཉམས་གསོ་གནང་བ་དང་། རིས་མེད་དབུལ་ཕོངས་རྣམས་ལ་སྦྱིན་གཏོང་སོགས་ཞིང་དག་པ་ཁོ་ནར་གཏོང་བ་གནང་བ་སོགས་ཀྱི་ལེགས་མཛད་དག་གིས་དད་ལྡན་ཀུན་གྱི་ཡིད་དབང་མེད་དུ་བཀུག་སྟེ། བསྔགས་བརྗོད་ཀྱིས་དུས་འདའ་བར་མ་ཟད། ཁ་ཆེ་བ་རྣམས་ཀྱི་ནང་དུའང་ལྐོག་ཏུ་མཇལ་ཁ་ཞུ་བ་དང་། དངོས་རྫས་རེ་ཕུལ་ཏེ་འདོད་དོན་འགྲུབ་པའི་སྐྱབས་འཇུག་ཞུ་བ་མང་དུ་བྱུང་ལ། ཁྱོད་ཚོའི་བླ་མ་འདི་བ་ཚང་མཐོང་ན་ཡང་གཞན་དང་མི་འདྲ་བར་སེམས་ལ་དགའ་སྤྲོ་སྐྱེ་བ་དང་། ཡང་ཡང་བལྟ་འདོད་པ་ཞིག་ཡོད་ལ། རྒྱུ་རྫས་ལ་གཏན་ནས་ཆགས་ཞེན་མེད་པར་ཆོས་ཕྱོགས་སུ་གཏོང་བ་དང་། ཉམ་ཐག་ཚོ་ལ་ཁྱད་མེད་པར་སྟེར་གང་ཐུབ་བྱེད་པས་ངེས་པར་སངས་རྒྱས་རེད། ཅེས་བསྔགས་པ་བརྗོད་མཁན་ཡང་ཤིན་ཏུ་མང་བོ་བྱུང་བར་གྲགས་སོ། །

གཞན་ཡང་རྗེ་འདི་ཉིད་འཇམ་མགོན་བླ་མའི་ལུགས་བཟང་དྲི་བྲལ་བསྟན་པའི་ཡང་སྙིང་བསྲེས་སླད་མེད་པར་འཛིན་པའི་ཐུགས་བསྐྱེད་ཀྱི་མཐུ་ཕུལ་ཏུ་ཕྱིན་པ་ལགས་ན་ཡང་། གྲུབ་མཐའི་ཕྱོགས་ཞེན་གཏན་མི་གནང་བར་གཞན་གྱིས་འདི་ལས་བརྩམས་པའི་ཚིག་འགའ་རེ་ཞུས་ནའང་སྐྱབས་འགྲོ་འདོར་ཉེན་ཡོད་པ་གསུངས་ནས་གསན་དུ་མི་བཞེད་ལ། ཕྱོགས་འདིར་གནས་པའི་གྲུབ་མཐའ་སོ་སོའི་དགོན་སྡེ་མཐའ་དག་ཆོས་ནོར་གཉིས་ཀྱིས་ལེགས་པར་སྐྱོང་བ་གནང་བས། རིས་མེད་བསྟན་འཛིན་དམ་པ་མ་ལུས་པའི་གཙུག་གི་ནོར་བུ་དང་། སྡེ་དགོན་ཐམས་ཅད་ཀྱིས་གཅིག་ཆོག་གཏན་གྱི་སྐྱབས་གནས་སུ་འཛིན་པ་ཡིན་ནོ། །

མདོར་ན་རྗེ་བཙུན་དམ་པ་མཆོག་འདི་ནི་ངེས་པའི་དོན་དུ་འཕགས་མཆོག་ཕྱག་ན་པདྨོ་དང་གཉིས་སུ་མ་མཆིས་ནའང་། ཐུན་མོང་གི་སྣང་ངོར་ཡང་སྡོམ་པ་གསུམ་གྱི་བཅས་མཚམས་མཐའ་དག་མིག་གི་འབྲས་བུ་བཞིན་བསྲུངས་པའི་ཚུལ་ཁྲིམས་རྣམ་པར་དག་པའི་གཞི་ལ་གནས་ཤིང་། ཐོས་བསམ་བསྒོམས་པས་ཐུགས་རྒྱུད་ལེགས་པར་སྦྱངས་ཏེ། བཤད་སྒྲུབ་གཉིས་ཀྱི་སྒོ་ནས་བསྟན་པ་ལ་བྱ་བ་རླབས་པོ་ཆེ་མཛད་པ་ནི། འཕགས་བོད་མཁས་གྲུབ་ཚད་ལྡན་རྣམས་ཀྱི་རྣམ་པར་ཐར་བ་དང་རྗེས་སུ་མཐུན་པ་ཁོ་ན་ལགས་ལ། དེ་ཡང་སྙིགས་དུས་ཀྱི་ཐམས་ཅད་མཁྱེན་པ་རྗེ་བཙུན་ཤེས་རབ་རྒྱ་མཚོ། ཕྱག་ན་པདྨོའི་སྒྱུ་འཕྲུལ་ཨ་རོལ་རྡོ་རྗེ་འཆང་བློ་བཟང་ལུང་རིགས་རྒྱ་མཚོ་སོགས་མཁས་ཤིང་གྲུབ་པ་བརྙེས་པའི་དགེ་བའི་བཤེས་གཉེན་བཅུ་ཕྲག་གསུམ་གྱི་ཞབས་པད་བསམ་སྦྱོར་གཉིས་ཀྱིས་ཚུལ་བཞིན་བསྟེན་ཏེ་སྡེ་སྣོད་གསུམ་དང་རྒྱུད་སྡེ་བཞིས་མཚོན་པའི་ལུང་གི་བསྟན་པ་མཐའ་དག་ལ་ཐོས་བསམ་མཐིལ་ཕྱིན་གནང་ཞིང་། གང་ཤེས་རྒྱུད་ལ་སྦྱོར་བའི་ཉམས་བཞེས་ཀྱི་དགོངས་དོན་འཚོལ་བ་ཉིད་གཙོ་བོར་མཛད་པས་མདོ་སྔགས་མཐའ་དག་གང་ཟག་གཅིག་སངས་རྒྱས་པའི་ཆ་རྐྱེན་འབའ་ཞིག་ཏུ་གཟིགས་ཏེ། གཞུང་ལུགས་ཐམས་ཅད་གདམས་ངག་ཏུ་ཐུགས་ངེས་བརྟན་པོ་འཁྲུངས་ཤིང་གསུང་རབ་ལ་ནང་བྱན་ཆུད་པར་གྱུར་ཏེ་དྲན་དབང་ཆེན་པོའི་གོ་འཕང་མངོན་དུ་གྱུར་ཅིང་། སྐུ་ན་ཕྲ་མོའི་དུས་ནས་སྲིད་པའི་ཕུན་ཚོགས་ཐམས་ཅད་ལ་ཞེན་པ་གཏིང་ནས་ལོག་པའི་ངེས་འབྱུང་དང་ཐོས་དོན་རྒྱུད་ལ་སྦྱོར་བའི་ཉམས་བཞེས་ལ་ཐུགས་འདུན་རང་འཁྲུངས་སུ་ཡོད་པའི་ཁར། སྐྱབས་མགོན་གསེར་ཁང་བ་ཆེན་པོ་ཡབ་སྲས་ཀྱི་རྣམ་ཐར་བཞིན་རི་ཁྲོད་དུ་ཕེབས་འཕྲལ་འདི་སྣང་གི་བྱ་བཞག་ཐམས་ཅད་འཕོངས་ཕྱིས་ཀྱི་རྡོ་བཞིན་དོར་ཏེ། དབྱར་དུས་ཐོས་བསམ་དང་བསགས་སྦྱངས་གཙོར་འདོན་དང་། དགུན་དུས་དབེན་པའི་གནས་མཐའ་ཡས་པར་སྤྲོས་པ་བཙན་ཆོད་ཀྱིས་བཅད་རྒྱའི་ངོས་རིམ་གཉིས་ཀྱི་རྣལ་འབྱོར་ཟབ་མོར་ཉིན་མཚན་ཁོར་མོ་ཡུག་ཏུ་གཞོལ་བར་མཛད་པས་བསླབ་པ་གསུམ་དང་རིམ་པ་གཉིས་ཀྱིས་བསྡུས་པའི་ས་ལམ་གྱི་རྟོགས་པ་ཁྱད་པར་ཅན་རྣམས་ཐུགས་རྒྱུད་ལ་ཇི་བཞིན་འཁྲུངས་ཤིང་གྲུབ་པའི་གོ་འཕང་མཐོན་པོར་གཤེགས་པ་ཡིན་ནོ། །དེའི་མཐུས་ཉེ་རིང་རིས་མེད་ན་ལེགས་བཤད་དོན་དུ་གཉེར་བའི་དཔྱོད་ལྡན་སློབ་ཚོགས་སའི་རྡུལ་གྲངས་དང་མཉམ་ན་ཡང་། དེ་དག་ལས་རེ་འགའ་ཙམ་སྨྲས་ན། གངས་ལྗོངས་འགྲོ་བའི་མགོན་པོ་ཕྱག་ན་པདྨོ་བཅུ་གསུམ་པ་ཆེན་པོ་ཉིད་སློབ་མའི་གཙོ་བོ་ཡིན་ལ། གཞན་ཡང་། ཕན་ཚུན་ཆོས་གསན་རེས་གནང་བའི་བླ་སློབ་གཉིས་ཀར་གཏོགས་པ། ཨ་རོལ་རྡོ་རྗེ་འཆང་བློ་བཟང་ལུང་རིགས་རྒྱ་མཚོ། གྲུབ་པའི་དབང་ཕྱུག་འཇིགས་མེད་བསམ་གཏན་པ་སོགས་མང་བོ་དང་། ཉིད་ཀྱི་བཀའ་སློབ། གོང་ས་༧ལཱ་མོ་ཞབས་དྲུང་རིན་པོ་ཆེ་དགེ་འདུན་བསྟན་འཛིན་ནོར་བུ། ཁྲི་སྐྲ་ནག་པའི་མཆོག་སྤྲུལ་བློ་བཟང་ཐུབ་བསྟན་རྒྱ་མཚོ། རྗེ་ཐར་ཤུལ་བ་དགེ་ལེགས་དབང་ཕྱུག་ཆོས་སྐྱོང་རྒྱ་མཚོ། ཤིང་བཟའ་པཎྜི་ཏ་བློ་བཟང་མཁས་བཙུན་བཤད་སྒྲུབ་དམ་ཆོས་རྒྱ་མཚོ། སྟོང་སྐོར་ཧུ་ཐོག་ཐུ་བློ་བཟང་འཇིགས་མེད་ཚུལ་ཁྲིམས་རྒྱ་མཚོ། གསེར་ཏོག་ནོ་མོན་ཧན་བློ་བཟང་ཚུལ་ཁྲིམས་རྒྱ་མཚོ། ཆེ་ཤོས་མཁན་ཆེན་བྱང་ཆུབ་བསྟན་པའི་སྒྲོན་མེ། ཚེ་ཏན་མཁན་སྤྲུལ་བློ་བཟང་འཇིགས་མེད་རབ་བརྟན། རོང་བོ་དཔལ་ཆོས་མཁན་སྤྲུལ་བློ་བཟང་ལུང་རྟོགས་ཆོས་ཀྱི་རྒྱ་མཚོ། ཁྲི་རྒན་མཆོག་སྤྲུལ་འཇམ་དབྱངས་ཐུབ་བསྟན་རྒྱ་མཚོ། ཨ་རོལ་མཆོག་སྤྲུལ་རྗེ་བློ་བཟང་ལུང་རྟོགས་བསྟན་པའི་རྒྱལ་མཚན། མི་ཉག་མཁན་སྤྲུལ་ངག་དབང་ལེགས་བཤད་རྒྱ་མཚོ། བདེ་ཡངས་མཁན་ཆེན་བློ་བཟང་བསྟན་འཛིན་ནོར་བུ། མཁས་གྲུབ་ཆེན་པོ་ཨ་བྷྱའི་མཆོག་སྤྲུལ་རིན་པོ་ཆེ་རྗེ་འཇིགས་མེད་དམ་ཆོས་རྒྱ་མཚོ། སྐུ་མཆེད་མཆོག་སྤྲུལ་རིན་པོ་ཆེ་དགེ་འདུན་བསྟན་པ་རབ་རྒྱས། སྒོམ་མཚེར་ཞབས་དྲུང་རྗེ་ངག་དབང་ལུང་རྟོགས་རྒྱ་མཚོ་སོགས་དང་། སྔ་འགྱུར་རིང་ལུགས་འཛིན་པའི་བུ་སློབ་ཐུགས་སྲས་ཞབས་དཀར་མཆོག་སྤྲུལ་རིན་པོ་ཆེ་བློ་བཟང་བྱམས་པ་རྒྱ་མཚོ། རྡོར་བྲག་མཁན་པོ་རིན་པོ་ཆེ་འཇིགས་མེད་བསོད་ནམས་རྣམ་རྒྱལ་སོགས་ཆོས་ཀྱི་གདན་ཁྲི་འཛིན་པའི་དམ་པའི་ཡང་སྤྲུལ་མཐའ་ཡས་པ་དང་། གཤེན་རབ་མི་བོ་ཆེའི་རྗེས་འབྲངས་དད་པའི་ཡོལ་གོར་ལེགས་བཤད་ཀྱི་སྐྱེས་ཐོབ་པ་ཡང་། སྒོམ་པ་ཝ་སེ། སྨར་ཁམས་མཁའ་འགྲོ་མར་གྲགས་པ་སོགས་མང་བོ་དང་། མཁས་ཤིང་གྲུབ་པའི་དབང་ཕྱུག་དར་གྲོང་རབ་འབྱམས་པ་ངག་དབང་བློ་གསལ། རྒྱལ་སྲས་བདག་ཉིད་ཆེན་པོ་ཁ་གྱ་འཇམ་དབྱངས་དཔལ་ལྡན། ཀུན་སྤངས་སེམས་དཔའ་ཆེན་པོ་རྗེ་འདུལ་འཛིན་འཇམ་དབྱངས་རྒྱ་མཚོ། ལྔ་རིག་སྨྲ་བའི་དབང་བོ་མ་ཏི་ཟི་གྲགས་པ་རྒྱ་མཚོ། རབ་འབྱམས་གཞུང་བརྒྱའི་མངའ་བདག་ཁ་སྒང་འཕྲིན་ལས་རྒྱ་མཚོ། ལུང་རིགས་སྨྲ་བའི་དབང་ཕྱུག་མཛོད་དགེ་ཚུལ་ཁྲིམས་རྒྱ་མཚོ། ཟླ་མེད་རིགས་པའི་དབང་ཕྱུག་སྒིས་སྟེང་བློ་བཟང་དཔལ་ལྡན་སོགས་བསླབ་གསུམ་རིམ་གཉིས་ཀྱི་རྣལ་འབྱོར་ལ་གཞོལ་ཞིང་། བཀའ་པོད་ལྔ་དང་རྒྱུད་སྡེ་བཞིའི་དགོངས་དོན་མཐའ་དག་དྲི་མ་མེད་པའི་ལུང་དང་རིགས་པའི་ལམ་ནས་སྨྲ་བ་ལ་ཐོགས་པ་མི་མངའ་བ། གཙུག་ལག་རྒྱ་མཚོའི་ཕ་རོལ་ཏུ་ཕྱིན་པའི་རྣལ་འབྱོར་བ་དང་པཎྜི་ཏ་ཉི་ཟེར་གྱི་རྡུལ་འཁྲིགས་པ་དང་མཚུངས་པའི་ཕྱིར་དེ་ཐམས་ཅད་ཀྱི་མཚན་རེ་རེ་བཞིན་བགྲང་བར་རྔོ་མི་ཐོགས་སོ། །ད་ལྟའང་རྨ་ཆུའི་ལྷོ་བྱང་གི་དགོན་སྡེ་ཁག་དང་། སློབ་གྲྭ་ཆེ་འབྲིང་དག་ན་བོད་ཀྱི་རིག་གནས་སློབ་པའི་སྲོལ་ཙམ་གནས་པའང་། རྗེ་འདིའི་སློབ་མ་དང་ཡང་སློབ་དུ་མས་ཐུན་མོང་དང་ཐུན་མོང་མ་ཡིན་པའི་རིག་པའི་གནས་མང་བོ་འཆད་སྤེལ་རྒྱ་ཆེར་གནང་བའི་བཀའ་དྲིན་ཁོ་ན་ལས་བྱུང་བ་གཟུར་གནས་རྣམས་ཀྱིས་ཤེས་པར་བྱའོ། །

རྩོམ་པའི་ཡོན་ཏན་ཁྱད་པར་དུ་འཕགས་པ་མངའ་བའི་ཚུལ་ནི། གསུང་རྩོམ་པོད་འདི་ཙམ་བཞུགས་སོ་ཞེས་གྲགས་པ་ཙམ་ལས་དོན་དུ་འཁྱལ་བའི་ངག་གི་རང་བཞིན་ལས་མ་འདས་པ་དག་དང་མི་མཚུངས་པར། རྗེ་འདི་ལ་རྩོམ་པ་ཕུན་སུམ་ཚོགས་པའི་རྒྱུ་གསུམ་ཚང་བས། བཀའ་རྩོམ་གང་གནང་ཐམས་ཅད་བརྗོད་བྱའི་དོན་བརླིང་ཡང་རྟོགས་སླ་བ། རྗོད་བྱེད་ཀྱི་ཚིག་སྙན་ངག་གི་རྒྱན་གྱིས་སྤྲས་པས་གུ་ཡངས་པ། ཚིག་སྦྱོར་འབྲེལ་ཆགས་ཤིང་བརྗོད་བྱའི་གནད་ལ་གཞོལ་བ། ཚིག་གོང་འོག་མི་ཟློས་ཤིང་ཕྱི་མ་སྔ་མའི་སྒྲུབ་བྱེད་དུ་འགྲོ་བ། ཁྱད་པར་ལམ་ཁྲིད་སོགས་མདོ་རྒྱུད་ཁུངས་དང་འབྲེལ་ཞིང་ལག་ཏུ་བླང་བདེ་བ། དོན་གོ་སླ་ཞིང་སེམས་ལ་ཕན་པ། དམ་པའི་མན་ངག་གིས་བརྒྱན་ཅིང་ཉམས་མྱོང་གི་གསུང་དུ་སྣང་བས་སྐྱོང་བདེ་ཞིང་རྒྱུད་འཁུལ་བ་ལ་སོགས་ཁྱད་ཆོས་བསམ་བརྗོད་ལས་འདས་པའི་ཚུལ་གཟུ་བོར་གནས་ཤིང་བློ་གྲོས་ཀྱི་ནོར་དང་ལྡན་པ་རྣམས་ཀྱིས་མཇལ་བ་ཙམ་གྱིས་ཤེས་ནུས་སོ། །

བཀའ་རྩོམ་ནི། བྱང་ཆུབ་བདེ་ལམ་གྱི་ཁྲིད་དམིགས་སྐྱོང་ཚུལ་ཤིན་ཏུ་གསལ་བར་བཀོད་པ་དགེ་ལེགས་འོད་སྣང་འགྱེད་པའི་ཉིན་བྱེད་སོགས་པོད་དགུ་མཛད་དོ། །

གདན་རབས་ཚིགས་བཅད་མ་ལས། 

དགུང་སྙིང་རེ་གཅིག་ཟླ་༧ཚེས་༦ཞིང་གཞན་གཤེགས། །

ཐུགས་ཀྱི་རྟེན་ལ་ཐུགས་ལྗགས་སྤྱན་གསུམ་སོགས། །

བརྩེ་བས་བུ་སློབ་སོགས་ལ་གནང་ཡོད་པ། །

སྟོབས་ཤུགས་བཙན་གྱིས་དབང་མེད་འཕྲོག་འདིས་སྐྱོ། །ཞེས་བྱུང་། 

དེ་ལྟར་མདོ་རྒྱུད་རྒྱ་མཚོའི་དགོངས་དོན་ཐོས་བསམ་བསྒོམས་པས་ཚུལ་བཞིན་ཉམས་སུ་བཞེས་པ་ལ་བརྟེན་ནས་མཁྱེན་བརྩེ་ནུས་གསུམ་དང་མཁས་བཙུན་བཟང་བའི་ཡོན་ཏན་ཡོངས་སུ་རྫོགས་ཤིང་། འཆད་རྩོད་རྩོམ་པ་དང་བྱ་བ་ལས་ཀྱི་འཁོར་ལོས་བསྟན་འགྲོའི་དོན་ཆེན་སྔོན་བྱོན་མཁས་གྲུབ་ཆེན་པོའི་ཆེན་པོ་དག་དང་ཆ་མཚུངས་པ་མཛད་དེ་སྐུ་དངོས་ཀྱི་གདུལ་བྱ་རྫོགས་པ་ན། 

རྗེ་ཉིད་དགུང་ལོ་རེ་གཅིག་བཞེས་པ། རབ་བྱུང་བཅོ་ལྔ་བའི་ཆུ་བྱི་སྤྱི་ལོ་༡༩༡༢ལོའི་གནམ་ལོ་གསར་བཞད་ཀྱི་དགྱེས་སྟོན་དཀྱུས་ལྟར་ལ་མགོན་ཀྱཱ་ཚང་ནས་ཚེ་སྐུ་རྒྱ་གར་ལི་མ་ཞིག་ཕུལ་པར་ཐུགས་མཉེས་མཉེས་མཛད། རི་ཁྲོད་པ་རྒན་པ་རྣམས་སྐུ་མདུན་དུ་ཕེབས་ཏེ་ལོ་འདིར་ཞབས་བརྟན་གལ་ཆེ་བས། ལོ་སྔ་མའི་དཀར་ཐིགས་ཀྱི་འཕྲོ་མས་ཟླ་བ་གཅིག་གི་རིང་ལ་ཞབས་བརྟན་བསྒྲུབས་ཏེ་བརྟན་བཞུགས་རྒྱས་པ་ཞིག་ཕུལ་ན་ཞེས་དགོངས་བསྟུན་ཞུས་པར་དགྱེས་བཞིན་ཞལ་བཀོད་གནང་། རང་རེའི་ཚེ་སྒྲུབ་ཆག་མེད་ཡིན་སྟབས་སྙིང་བོ་དུང་ཕྱུར་མང་བོ་སོང་ཡོད་པས་སྒྲོལ་མ་དཀར་མོའི་སྒོ་ནས་འབུལ་ཆོག་གསར་རྩོམ་ཞིག་བཀའ་དྲིན་བསྐྱང་ན་ཞུས་པར། དེ་ཆོག་གསུངས། བརྟན་བཞུགས་སྐབས་རྗེ་ཉིད་ཕེབས་བྱམས་ལ་མཆོད་རོལ་སྤོས་སྣ་བཅས་འདུ་ཁང་དུ་གདན་དྲངས་ཏེ་ཞབས་བརྟན་ཕུལ་ན་ཞུས་པར། དེ་མི་ཆོག་རྒྱུ་མི་འདུག་ཅེས་དང་ཞལ་ཀུར་གྱི་རྣམ་པས་སྤྲོས་པ་རྒྱ་ཆེན་པོ་གང་ཐུབ་གྱིས། བརྡུང་རྒྱུ་ཡོད་ཚད་པོ་རྡུངས། ཁྱེད་རྣམ་པ་གཅོད་པ་བ་ཚོས་གཅོད་ཌཱར་ཚོ་ཡང་བརྡུངས་ན་ཆོག ཅེས་གསུངས་ཏེ་བཞད་མོ་གནང་ཞིང་ཐུགས་དགྱེས་པའི་རྣམ་པ་མཛད། 

ནག་ཟླའི་ཚེས་ནས་ཞབས་བརྟན་བཙུགས། དེ་ལྟར་ཟླ་བ་གཅིག་རིང་རི་ཁྲོད་པ་ཉིས་བརྒྱ་ལྷག་ཕྱོགས་གཅིག་ཏུ་འཛོམས་པས་ཞབས་བརྟན་གྱི་རིམ་པ་མང་བོ་བསྒྲུབས་ཏེ། ས་གའི་ཡར་ཚེས་དུས་བཟང་ཉིན་གྱི་སྔ་བར་འདུ་ཁང་དུ་རྡོ་རྗེ་འཆང་ནས་ན་བཟའ་གསར་བ་དང་དབུ་པཎ་བཞེས་པ་སྤྱན་དྲངས་ཏེ་སེངྒེའི་ཁྲི་ལ་ཞབས་སེན་ཉེ་བར་བཀོད་པ་ལ་བརྟན་བཞུགས་རྒྱས་པ། སྐུ་གསུང་ཐུགས་རྟེན། ཚེ་བུམ། རིགས་ལྔའི་ཕྱག་མཚན། རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་རྣམས་རེ་རེ་བཞིན་ཆོ་གའི་ཚིག་དང་བསྟུན་ཏེ་ཕུལ་རྗེས་བརྟན་བཞུགས་མཎྜལ་རྒྱས་པ་ཕུལ་པའི་མཇུག་ཏུ། སྐྱབས་རྗེ་སྐུ་མཆེད་རིན་པོ་ཆེས་སྙན་ཚིག་ལམ་ནས་དྲངས་པའི་བརྟན་བཞུགས་ཀྱི་བཤད་པ་ཞུས་པའི་ལན་དུ་བཞེད་མཐུན་གྱི་གསུང་ལན་རྒྱས་པར་བསྩལ། འདི་སྐབས་གདན་ས་ཆེན་པོ་དཔལ་ལྡན་བྱ་ཁྱུང་ནས་ཀྱང་ཞབས་བརྟན་མང་དུ་བསྒྲུབས་ཏེ། མཁན་པོ་ལས་སྣེ་བཞི་རྒན་པ་བཅས་ཕེབས་ཏེ་རྟེན་འབྱུང་དངོས་འབུལ་བཅས་བརྟན་བཞུགས་ཕུལ་པར། བཀའ་ལས་བདག་ལ་འདི་ལྟ་བུའི་འོས་མེད་ཀྱང་འདུས་སྡེ་རིན་པོ་ཆེ་ནས་ཞབས་རིམ་མང་དུ་བསྒྲུབས་པ་བཀའ་དྲིན་ཆེ་ཚུལ་དང་། སླད་ནས་སྔོན་གྱི་སྒྲིག་ལམ་བཟང་བོ་མ་ཉམས་པའི་སྟེང་ནས་འཆད་ཉན་གོང་འཕེལ་གནང་དགོས་ཚུལ་ལས་བརྩམས་པའི་བསླབ་སྟོན་གནང་བའི་མཇུག་ཏུ། ང་རང་ཕྱོགས་ཕྱོགས་ནས་འབོད་མི་མང་བས་གར་འགྲོ་མི་ཤེས་ཀྱང་། གང་ལྟར་ལོ་རྗེས་མའི་ད་ཚོད་ང་ས་ཕྱོགས་འདི་ན་མེད། ངའི་རྗེས་ན་ཡོད་པའི་རི་ཁྲོད་པ་འདི་ཕལ་ཆེར་ས་ཐག་རིང་བོ་ནས་ང་བསམས་ཏེ་འོང་བ་ཤ་སྟག་ཡིན་པས། ངས་ཁོང་རྣམ་པ་ཚོ་ལ་བཅོལ་དམ་བྱས་པ་ཡིན། ངའི་འཕྲོ་ནས་འདི་ཚོ་ལ་གཞན་གྱིས་ཐུབ་ཚོད་རེ་མི་བྱེད་པ་ཁོང་རྣམ་པ་ཚོ་མཁྱེན་ཞེས་གསུངས། མ་འགྱངས་པར་རེབ་གོང་རི་ཁྲོད་པ་རྣམས་ཀྱིས་ཀྱང་ཞབས་བརྟན་མང་དུ་བསྒྲུབས་ཏེ་རོང་བོ་ཚོགས་ཆེན་ཁྲི་བ་ཨ་རོལ་མཆོག་སྤྲུལ་རིན་པོ་ཆེ་རི་ཁྲོད་པ་ཕྱེད་དང་ཉིས་བརྒྱ་ལྷག་བཅས་ཕེབས་པ་དང་། ཁྲི་ཀའི་རི་ཁྲོད་པ་རྣམས་ཀྱིས་ཀྱང་ཞབས་བརྟན་མང་དུ་བསྒྲུབས་ཏེ་ཨ་ལགས་ཕུན་ཚོགས་སོགས་དཔོན་གཡོག་མང་དུ་ཕེབས། དུས་ཚེས་དགེ་བར་ཕྱོགས་གསུམ་གྱི་རི་ཁྲོད་པ་འཚོགས་པའི་ཚོགས་དབུར་སྔར་བཞིན་རྗེ་བཙུན་བླ་མ་མཆོག་འདུ་ཁང་དུ་གདན་དྲངས་ཏེ་བདེ་མཆོག་དཀར་བོའི་སྒོ་ནས་བརྟན་བཞུགས་རྒྱས་པ་ཕུལ་ཞིང་ཨ་རོལ་མཆོག་སྤྲུལ་རིན་པོ་ཆེ་ནས། སྙན་ཚིག་གི་ལམ་ནས་དྲངས་པའི་བརྟན་བཞུགས་ཞུ་འབུལ་བགྱིས་པའི་ཕྱིར་ཕེབས་སུ། ང་ལ་ནི་མཆོག་སྤྲུལ་རིན་པོ་ཆེས་གསུངས་པ་ལྟར་གྱི་ཡོན་ཏན་གང་ཡང་མེད། ཁོང་རྣམ་པའི་ཐུགས་འདུན་བཞིན་ཡུན་རིང་འཚོ་བའི་འདུན་པ་བྱེད་ཅེས་དང་། སྔ་སོར་རེབ་གོང་སྐུ་ཕྱོགས་ཐུགས་རྗེ་ཅན་མ་བཞུགས་པའི་རྗེས་སུ་ང་འདི་ཕྱོགས་འོང་། རི་ཁྲོད་པ་རྣམས་ལ་རྟེན་ས་སུ་ཡང་མེད་མོད་རྒན་པ་རྣམས་ནས་ཁུར་བཞེས་མཛད་དེ་ད་ལྟའི་བར་འཐོར་མ་སོང་བ་ངེས་པར་བཀའ་དྲིན་ཆེ། སླན་ཆད་ཀྱང་རྐྱེན་ཅི་ལ་ཐུག་ཀྱང་བླ་མ་རྡོ་རྗེ་འཆང་གི་ཞབས་འདྲེན་དུ་མ་སོང་བ་རེ་གལ་ཆེ་ཚུལ། མཆོག་སྤྲུལ་རིན་པོ་ཆེ་ཡིན་ཀྱང་ཐུགས་ལ་བསྣམས་དགོས་ཚུལ་སོགས་ལས་བརྩམས་པའི་དགོངས་གཞི་ཅན་གྱི་བསླབ་སྟོན་རྒྱས་པར་བཀའ་དྲིན་བསྐྱངས། རེབ་གོང་རི་ཁྲོད་པ་རྣམས་ཀྱིས་ཞུས་ངོར་ལམ་རིམ་བདེ་ལམ་དང་། འཇམ་དཔལ་ཞལ་ལུང་གི་ཁྲིད་ཉིན་གསུམ་རེ་གནང་། ཉིན་གཅིག་ཡོངས་འཛིན་ཚང་ལ་གསང་སྟེ་མཆོག་སྤྲུལ་རིན་པོ་ཆེ་སྐུ་མདུན་དུ་འབོད་པ་གནང་ནས་ཉིད་ཀྱིས་བཞེས་འཕྲོ་སྐུ་གཟན་སེར་བོ། དབུ་པཎ་སྒོམ་ཞུ་གསར་བ་བཅས་བསྩལ་ཏེ་རྗེ་ཉིད་རོང་བོའི་ཁྲི་ཁུར་ཕོག་ཏུ་ཉེ་བས་ད་ནས་བཟུང་སྟེ་ཡབ་རྗེ་གོང་མའི་རྣམ་ཐར་བཞིན་ཀུན་སྤངས་མཛད་དེ་ཐོས་དོན་རྒྱུད་ལ་སྦྱོར་བའི་ཉམས་བཞེས་གཙོར་འདོན་དང་ཀུན་སྤངས་རི་ཁྲོད་པ་རྣམས་སྐྱོང་དགོས་ཚུལ་སོགས་ལས་བརྩམས་པའི་བསླབ་སྟོན་གནང་། མཆོག་སྤྲུལ་རིན་པོ་ཆེ་ཐུགས་ཤིན་ཏུ་དགྱེས་པས་སྙིང་ནས་བཀའ་བཞིན་བསྒྲུབ་པའི་དམ་བཅའ་དང་འབྲལ་མེད་རྗེས་འཛིན་གྱི་སྐྱབས་འཇུག་སྙིང་ནས་ཞུ་བར་མཛད་དོ། །

དོར་ཤུལ་ཚོ་ལྔས་ཞུས་པ་བཞིན་སྟོན་འཁོར་བཅས་དེར་ཕེབས་ནས་སྣྲོན་ཟླའི་ཚེས་ཉི་ཤུ་ནས་དབྱར་ཆོས་ཚུགས་ནས་བསྙེན་བཀུར་གང་གཟབ་ཞུས། ལྔ་བའི་ཚེས་ཉི་ཤུ་ནས་བཟུང་སྐུ་ལྟེམ་ཚུལ་མཛད། ཉིན་ཞིག་ཉེ་འདབས་ཀྱི་སྒང་ཞིག་ཏུ་སྤྲོ་སངས་ལ་ཕེབས་སྐབས་ཞལ་ནས། ང་ཆུང་དུས་བདེ་ཆེན་དུ་སློབ་གཉེར་བྱེད་བཞིན་པའི་སྐབས། ཕྱི་སྐོར་དུ་སོང་དུས་ཚོར་རྨ་ཉིན་ཙོང་ཁའི་སྐྱེས་རིའི་ཕྱོགས་འདིའི་རི་སྐེད་དུ་ན་བུན་ཆགས་པ་མཐོང་ཚེ་སེམས་དགའ་སྤྲོ་དང་བཅས་གནས་དེར་སོང་ནས་འདུག་འདོད་ཅིག་རྒྱུན་དུ་སེམས་ལ་འཆར་བ་རྗེས་ནས་འདི་ཕྱོགས་སུ་འོངས་ཏེ་ཙོང་ཁའི་སྐྱེས་རིའི་གཡས་གཡོན་གྱི་རི་ཁྲོད་རྣམས་སུ་ཁ་ཏོན་དགེ་སྦྱོར་ཡང་དགའ་རབ་བྱས། ཆོས་འཆད་སྤེལ་ལྟ་བུའི་གཞན་ཕན་ཡང་དགའ་མོ་བྱེད་རྒྱུ་བྱུང་བ་དེ་དུས་ནས་སེམས་ཀྱིས་ཤེས་པ་ཡིན་རྒྱུ་རེད། ཅེས་ཉེ་གནས་ཆེན་པོ་ཚ་རྒྱལ་དཀོན་མཆོག་ཤེས་རབ་དང་དྲུང་ཆེན་གྲགས་པ་རྒྱ་མཚོ་རྣམས་ལ་དངོས་སུ་གསུངས་པའང་མ་འོངས་པ་ན་འབྱུང་འགྱུར་མཐའ་དག་མངོན་སུམ་དུ་གསལ་བར་གཟིགས་པ་ཞལ་གྱིས་བཞེས་པའི་གསུང་འཁྲུལ་བ་མེད་པའོ། །

སྐབས་དེར་བླ་བྲང་བཀྲ་ཤིས་འཁྱིལ་ནས་སློབ་གཉེར་བ་ཚོར་ཉེར་མཁོའི་དཔེ་པོད་ཉིས་བརྒྱ་སྐོར་བླུ་ཕྱིར། རི་ཁྲོད་པ་པདྨ་ཚེ་རིང་ལ་དངུལ་སྲང་ཉིས་བརྒྱ་སྤྲད་དེ། འཇམ་བཞད་སྐུ་སྲིང་སོགས་ལ་ཕྱག་ཡིག་བསྲིངས། བདེ་ཆེན་ནས་ཨ་ལགས་བཟོད་པ་ཕེབས་པར་སྔར་གོང་ས་སྒར་བ་རིན་པོ་ཆེ་དང་ངེད་གཉིས་ལ་བཀའ་བགྲོས་ཅུང་ཟད་ཡོད་མེད་ཁོང་ཕེབས་རྒྱུ་མ་བྱུང་བས། ད་ངས་དྷཱིཿཚ་ནས་རི་ཁྲོད་པའི་སློབ་གཉེར་བ་ཚོ་ཚོགས་པའི་ལྷ་ཁང་ཞིག་བཞེངས་རྩིས་བྱས་ཚར། ཁྱེད་ཀྱིས་ཀྱང་གྲོགས་དན་རེ་ཨེ་ཐུབ་ལྟོས། སྐུ་ཕྱོགས་སྒར་བས་དབང་བཀོལ་ས་མི་འགྲོ་ཁྱོད་ཀྱིས་སྐུ་ཕྱོགས་ལ་དེ་ལྟར་ཞུ་དགོས་ཞེས་གསུངས་པར། བཟོད་པས་རྗེ་ཉིད་ནས་གསུངས་ན་ཆོག་མོད་ཞུས་ཚེ། ང་ཐག་རིང་ཞིག་ཏུ་བུད་འགྲོ་གསུངས། ཁོས་མཆི་མ་བཏོན་ཏེ་དེ་འདྲ་གསུངས་མི་ཉན་ཞེས་ཡང་ཡང་ཞུས་པར། གཞན་མིན་གསེར་ཁོག་ཧོར་རྒྱ། འཁྱམ་རུ་སོགས་ཀྱི་བོས་ཡོད་པས་དེ་དག་ལ་འགྲོ་ཤས་ཆེ། ཁྱོད་སྐུ་མདུན་ན་ཡོད་པས་དེ་ལྟར་བཤད་པ་ཡིན་ཞེས་དགོངས་པ་གཞན་དུ་གཏད་ཟིན་པའི་གསུང་ཕེབས། དོར་ཤུལ་སྡེ་བས་བཀྲ་ཤིས་རྩེར་རྗེ་ཉིད་ཀྱི་བླ་མ་གསེར་ཁང་དགེ་བཤེས་སུ་གྲགས་པའི་བྱ་བྲལ་ལྷ་རམས་པ་སྨོན་ལམ་བཟང་བོ་ཡུན་རིང་བཞུགས་སའི་གཟིམ་ཁང་དེ་ཉིད་གསར་སྐྲུན་བགྱིས་ཡོད་པར་ཆོས་ཐོག་གྲོལ་རྗེས་ཕེབས་ཏེ་རེ་ཞིག་བཞུགས་དགོས་ཚུལ་གྱི་སྙན་བསྐུལ་ཕུལ་པ་ཞལ་གྱིས་བཞེས་ཡོད་སྟབས། བཅུ་བདུན་གྱི་དགོང་མོར་སླར་སྐུ་བསྙུན་འཕར་ཚུལ་མཛད་དེ། ད་མྱུར་མོར་བཀྲ་ཤིས་རྩེར་འགྲོ་དགོས། འཕྲོ་ནས་འགྲོ་མ་ཐུབ་ན་གྲོང་བ་ཚོས་དཀའ་ལས་མང་བོ་བྱས་པའི་འདུན་པ་མི་རྫོགས་གསུངས། སྐུ་ཕྱོགས་སྐུ་མཆེད་རིན་པོ་ཆེ་དང་རྒན་པ་རགས་བསྡུས་སྐུ་མདུན་དུ་སོང་ནས་ཞབས་བརྟན་ཞིག་བསྒྲུབ་རྒྱུའི་ཞལ་བཀོད་ཞུས་པར་རྩོད་པ་གཅོད་མི་ཉན་ཞེས་ཞབས་རིམ་ཆུང་ཆུང་ལས་ཞལ་བཀོད་མ་གནང་། བཀྲ་ཤིས་རྩེའི་གཟིམ་ཁང་གསར་དུ་གྲུབ་པ་ཡིན་སྟབས་རླན་ཆེ་བས། རྒན་པ་རྣམས་ཀྱིས་བཀྲ་ཤིས་རྩེར་ཅིས་ཀྱང་མི་ཕེབས་པར་ཞག་ཤས་བཞུགས་ནས་དྷཱིཿཚར་ཕེབས་ན་ཞེས་ཨུ་ཚུགས་ཀྱིས་ཞུས་པར། ཞལ་ནས་ང་བཀྲ་ཤིས་རྩེར་སོང་ན་མི་ལེགས་པ་དང་། གཞན་དུ་སོང་ན་ལེགས་པའི་གཏན་ཚིགས་ཅི་ཞིག་ཡོད། འགྲོ་རྒྱུ་ཡིན། སང་ཉིན་བཀྲ་ཤིས་རྩེར་མ་སོང་བའི་ཐབས་མེད། བཀྲ་ཤིས་རྩེ་མིང་ལེགས་པས་ཅིས་ཀྱང་འགྲོ་བ་ཡིན་གསུངས་པ་བཞིན་ཚེས་བཅུ་དགུའི་ཉིན་ཕེབས་བྱམས་ལ་བཞུགས་པ་རི་ཁྲོད་པ་རྣམས་ཀྱིས་གདན་དྲངས་ཤིང་སྐྱེལ་མ་ཞུས་ཏེ་བཀྲ་ཤིས་རྩེའི་གཟིམ་ཁང་དུ་ཕེབས་ཏེ་ཁྱམས་སུ་བཞུགས་ནས་གནས་འདི་ནི་ཤིན་ཏུ་སྐྱིད་པ་རེད་གསུངས། ཉེར་བདུན་ལ་སྐུ་མཆེད་རིན་པོ་ཆེ་མདུན་དུ་ཕེབས་ཏེ། བསྙེན་སོང་ཚོས་ཁྲོ་བཅུ་ཞིག་བཙུགས་ན་ཞུས་པར། ངའི་ཚེ་གང་བོར་བཀའ་གདམས་གོང་མའི་རྣམ་ཐར་བཞིན་དུ་དམིགས་བརྩེ་མ། མདོ་གདུགས་སྒྲོལ་མ་སོགས་གསུང་དུ་བཅུག གུང་རུ་མཁའ་འགྲོ་མའི་ལྗགས་བཀོད་བཞིན་རྟ་མགྲིན་འདི་ང་དྲིན་ཅན་ཡིན་པས་མང་བོ་གསུངས། ངས་མ་ཎི་དུང་ཕྱུར་གཉིས་དང་བྱེ་ཆེན་དྲུག་བཏོན་ཟིན་པས་དེའི་ཁ་ཡང་བསྐང་ཆོག མ་ཁ་ཁྱེད་ཀྱིས་བཀོད་པ་གྱིས་དང་དེ་ཡིན། ང་ལ་འདྲི་མི་དགོས། ཁྲོ་བཅུ་འཛུག་ན་ཡང་ཚུགས། མང་མ་ཚོགས་ན་ཡང་ཚོགས་ཆོག ཅེས་རྒྱལ་ཚབ་ཏུ་དབང་བསྐུར་བའི་གསུང་གནང་། དེ་སྐབས་ཀུན་མཁྱེན་འཇམ་དབྱངས་བཞད་པ་ཚང་སྒོ་མེ་གསང་སྔགས་བདེ་ཆེན་དགོན་དུ་བཞུགས་པས་བརྟན་བཞུགས་ཀྱི་ཕྱག་བྲིས་བསྩལ་པ་དྲུང་ཆེན་པས་སྙན་དུ་ཕུལ།

དེ་ལྟར་རྗེ་བཙུན་བླ་མ་མཆོག་གི་སྐུ་དངོས་ཀྱིས་གདུལ་བར་བྱ་བ་རྣམས་རེ་ཞིག་རྫོགས་པ་ན་རྟག་འཛིན་གྱི་འཆིང་བ་དམ་པོས་བཅིངས་པའི་སྐྱེ་བོ་རྣམས་ཆོས་ལ་བསྐུལ་ཕྱིར། ཆུ་བྱི་སྤྱི་ལོ་༡༩༡༢ལོའི་ཧོར་ཟླ་༧་ཚེས་༦ཉིན་ཏེ་གྲོ་ཞུན་ཟླ་བའི་དཀར་ཕྱོགས་ཀྱི་རྫོགས་པ་དང་བོའི་མཚན་གུང་ཡོལ་ཏེ་སྐྱ་རེངས་དང་བོ་ཤར་བའི་དུས་སུ་སྐུ་མྱ་ངན་ལས་འདས་པའི་ཚུལ་བསྟན་ཏོ། །

དེ་ནས་ཞབས་དྲུང་དུ་འཁོད་པ་རྣམས་འཇིགས་སར་སྐྱེལ་མས་བོར་བ་བཞིན་མགོན་སྐྱབས་དང་བྲལ་བས་ཅི་བྱ་གཏོལ་མེད་དུ་གྱུར་ཀྱང་བསྲན་བཙུགས་ཏེ། ཉེ་འཁོར་བྱི་དོར་དང་། སྐུ་གདུང་རིན་པོ་ཆེའི་མདུན་དུ་མཆོད་འབུལ་དགོངས་རྫོགས་རྒྱ་ཆེར་བསྒྲུབས། དུས་ཚེས་དགེ་བར་ཀུན་སྤངས་པ་ཆེན་པོ་ཁ་གྱ་འཇམ་དབྱངས་དཔལ་ལྡན་གཙོས་རི་ཁྲོད་པའི་རྒན་པ་རྣམས་དང་ཞམ་རིང་བ་ཐུན་མོང་ནས་རྟེན་འབྱུང་དངོས་འབུལ་བཅས་ཀུན་སྤངས་འདུས་སྡེ་རིན་པོ་ཆེའི་མཚན་ཐོ། ལུང་རྟོགས་ཡོན་ཏན་གྱི་མངའ་བདག་སྐུ་མཆེད་དགེ་འདུན་བསྟན་པ་རབ་རྒྱས་དཔལ་བཟང་བོའི་ཕྱག་ཏུ་ཕུལ་ཏེ་ཡབ་གཅིག་དང་བོའི་མགོན་པོ་བླ་མ་རྡོ་རྗེ་འཆང་གི་རྒྱལ་ཚབ་ཏུ་མངའ་གསོལ་ཏོ། །

ཚེས་བཅུ་གསུམ་གྱི་དགོང་མོར་སྐུ་གདུང་རིན་པོ་ཆེ་ཟ་མ་ཏོག་མཆོད་བསུས་དང་བཅས་སྤུར་ཁང་དུ་གདན་དྲངས་ཤིང་། སྙན་བརྒྱུད་རྒྱ་མཚོའི་མངའ་བདག་ཨ་རིག་ཡོན་ཤུལ་སྤྲུལ་པའི་སྐུ་བློ་བཟང་རྒྱ་མཚོས་རྡོ་རྗེ་སློབ་དཔོན་དང་། བཤེས་གཉེན་ཆེན་པོ་རྡོ་འཕོངས་མཁས་གྲུབ་བཟང་བོ་དང་། བཤེས་གཉེན་ཆེན་པོ་མཛོད་དགེ་ཚུལ་ཁྲིམས་རྒྱ་མཚོ་སོགས་ཆོག་གྲྭ་བཅོ་ལྔ་སྐོར་གྱིས་རྒྱུད་སྡེ་དང་མཐུན་པའི་ཕྱག་ལེན་བཞིན་ཞུགས་མཆོད་ཕུལ་པའི་ཚེ། མེ་ལྕེ་ཁ་དོག་ལྔ་བ་འཇའ་ཚོན་གྱི་རང་བཞིན་དུ་འབར་བ་དང་། དྲི་བཟང་བོས་ཁྱབ་པ་སོགས་ངོ་མཚར་བའི་ལྟས་མང་དུ་བྱུང་ཞིང་། ཚེས་བཅོ་ལྔའི་ཉིན་ལཱ་མོ་བདེ་ཆེན་གྱི་སྐུ་ཕྱོགས་གཡོན་རུ་རིན་པོ་ཆེ་སོགས་བླ་གྲྭ་མང་བོ་བྱོན་ཡོད་པ་རྣམས་དང་། རི་ཁྲོད་པའི་བླ་མ་གྲྭ་རྒན་ཐམས་ཅད་གདན་འཛོམས་པའི་དབུས་སུ་གདུང་ཁང་ཞལ་ཕྱེས་ཚེ་ཐུགས་ལྗགས་སྤྱན་གསུམ་ཞུགས་ཀྱིས་མ་གོས་པར་བྱོན་པ་སོགས་རིང་བསྲེལ་རྣམས་ལེགས་པར་གདན་དྲངས། སྐབས་དེར་བདེ་ཆེན་ནས་ད་རེས་སྐུ་གདུང་ངེས་ཅན་དུ་བདེ་ཆེན་དུ་བཞུགས་དགོས་ཚུལ་གྱི་གསུང་བཙན་བརྗིད་ཅན་དང་། ལ་ལས་ཁ་ཤ་ཞོ་སྙིང་གི་རྣམ་འགྱུར་ཅུང་ཟད་བསྟན་ཀྱང་བློ་གཟུ་བོར་གནས་པ་མང་བོ་དང་། གུས་ཞབས་པ་དག་བླ་མ་མ་བཞུགས་པའི་མྱ་ངན་གྱིས་གདུངས་དྲགས་ཤིང་ཅི་མི་སྙམ་པར་བཞག་པས་རང་ཞིར་སོང་། 

ཕྱི་ལོ་ཆུ་གླང་སྤྱི་ལོ་༡༩༡༣ལོའི་ཟླ་གཉིས་པའི་ཡར་ཚེས་ལ་རི་ཁྲོད་པ་ཐམས་ཅད་ཞལ་འཛོམས་ཏེ་སྔར་བཞིན་མཆོད་འབུལ་རྒྱ་ཆེར་ཕུལ་ཏེ་གདུང་མཆོད་ཟླ་ངོ་གཅིག་གི་རིང་མཛད། སྔར་ནས་གསོལ་དཔོན་སྦྱིན་པ་དང་ཉེ་གནས་བྱ་ཁྲ་འོད་ཟེར་གཉིས་ནང་མ་མཐུན་པའི་རྐྱེན་གྱིས་བྱ་ཁྲ་འོད་ཟེར་གྱིས་བདེ་ཆེན་ལ་བརྡ་བཏང་བས་བདེ་ཆེན་ནས་བསྟན་པའི་གསལ་བྱེད་རྐ་ཕུག་ཞབས་དྲུང་རིན་པོ་ཆེས་གཙོས་བླ་གྲྭ་སུམ་བརྒྱར་ཉེ་བ་གློ་བུར་དུ་ཕེབས་ཏེ། ཞི་དྲག་གི་རྣམ་འགྱུར་བསྟན་པའི་གཟི་བྱིན་མ་བཟོད་པའི་རྐྱེན་གྱིས་རི་ཁྲོད་པའི་གྲྭ་དཔོན་སློབ་རྣམས་ཅི་བྱ་གཏོལ་མེད་པ་ལྟ་བུར་གྱུར་ཡང་། སྐུ་ཕྱོགས་སྐུ་མཆེད་རིན་པོ་ཆེ་དང་། བླ་རྒན་གཙོས་དགེ་འདུན་ཕལ་ཆེ་བ་ནི། ཡབ་རྗེ་རྡོ་རྗེ་འཆང་གིས་ལམ་རིམ་ཁྲིད་ཀྱི་ལེགས་གསུང་བདུད་རྩིའི་བཅུད་ཀྱིས་ཡིད་རྟག་ཏུ་བརླན་པ་དང་། དུལ་ཞིང་ཞི་བའི་དགེ་སྦྱོང་དུ་བྱེད་པའི་ཆོས་བཞི་ཉམས་བཞེས་མཛད་བཞིན་པའི་མུར། གསར་བུ་བ་རྣམས་ལ་རེ་རེ་ནས་དམ་ཚིག་ལ་བཀར་ཏེ་ཚུལ་མཐུན་དུ་བཞུགས་སུ་བཅུག་ཅིང་། ཉིན་འགའི་འཕྲོར་ཀུན་སྤངས་རི་ཁྲོད་འཛིན་པ་རྣམས་མཆོད་འབུལ་ལ་བསྙད་དེ་ ༧ རྡོ་རྗེ་འཆང་ལ་སྔར་ནས་ཞུས་འདུག་པ་ལྟར་སྒོ་མེ་ཧོར་གྱའི་གྲྭ་ཚང་དུ་ཕེབས། དེའི་ཤུལ་ནས་གདུང་རྟེན་ཡིད་བཞིན་གྱི་ནོར་བུ་རིན་པོ་ཆེས་གཙོས་སྐུ་གསུང་ཐུགས་རྟེན། མཆོད་ཆ་ནང་ནོམ་ཐམས་ཅད་བདེ་ཆེན་དུ་བཙན་འཕྲོགས་ཀྱིས་ཞུས་པ་བྱུང་བས་ཀུན་གྱི་ཐུགས་སྐྱོ་བའི་གནས་སུ་ལྷུང་ངོ་། །འོན་ཀྱང་ཉེ་གནས་ཆེན་པོ་རྣམས་ཀྱིས་ལས་མཇུག་མ་བཏང་བར་བརྩོན་པ་ལྷུར་བཞེས་མཛད་པས་མ་འགྱངས་པར་འདི་ཀར་ཡང་སྐྱབས་མགོན་མཆོག་གི་ཐུགས་སྲས་བསྔགས་འོས་ཡོན་ཏན་དུ་མའི་མཛོད་འཛིན་སྐུ་འབུམ་ཆེ་ཤོས་མཁན་ཆེན་བྱང་ཆུབ་བསྟན་པའི་སྒྲོན་མེ་ནས་གསེར་ཟངས་ལས་གྲུབ་པའི་རྣམ་རྒྱལ་མཆོད་རྟེན་བཟོ་ཁྱད་ཕུན་སུམ་ཚོགས་པ་ཞིག་བསྩལ་པའི་གཟུངས་སུ། སྐྱབས་མགོན་རྡོ་རྗེ་འཆང་གི་ཚེམས།  གདུང་རུས་དུམ་བུ་འགའ།  དབུ་ལོ་བུབས་བཅུ་གསུམ།  ཕྱག་ ཏིང་། ཕྱག་ཕྲེང་། མཎྜལ། སྤྱན་ཤེལ། ན་བཟའ་སོགས་སྐུའི་ཉེར་སྤྱད་བྱིན་ཆགས་པ་མང་བོ་དང་། རིང་བསྲེལ་རྣམ་པ་བཞི་སོགས་ས་གསུམ་ན་རྙེད་པར་དཀའ་བའི་བྱིན་རླབས་ཀྱི་རྟེན་དུ་མས་བྱུར་བུར་གཏམས་པའི་གསེར་གྱི་མཆོད་སྡོང་བྱིན་རླབས་ཀྱི་གཟི་འོད་འབར་བ་སྐྱེ་རྒུའི་ལེགས་བྱས་ཀྱི་དཔལ་དུ་ལྷུན་གྱིས་གྲུབ་པ་ནི་འདུ་ཁང་ཆེན་མོའི་སྦུག་ཏུ་གཡས་ཀྱི་གྲལ་མགོའི་ཀུན་དགའ་ར་བར་བཞུགས་པ་འདི་ལགས་སོ། །

རྡོ་རྗེ་འཆང་གི་གསུང་འབུམ་སྤྱིའི་དཀར་ཆག

༼ ཀ ༽ཡོངས་རྫོགས་བསྟན་པའི་མངའ་བདག་བཀའ་དྲིན་མཉམ་མེད་རྗེ་བཙུན་བློ་བཟང་ལུང་རིགས་རྒྱ་མཚོ་དཔལ་བཟང་བོའི་ཞལ་སྔ་ནས་ཀྱི་རྣམ་པར་ཐར་བ་མདོ་ཙམ་བརྗོད་པ་དད་ལྡན་རྣ་བའི་བཅུད་ལེན་ལ། ༡༩༩ སྐྱབས་རྗེ་ཀིརྟི་རིན་པོ་ཆེ་བློ་བཟང་འཕྲིན་ལས་ཀྱི་རྣམ་ཐར་འཕྲོ་ཅན་ལ། ༢༢༨ ༼ ཁ ༽ཁྱབ་བདག་འཁོར་ལོའི་མགོན་པོ་བཀའ་དྲིན་ཟླ་མེད་རྗེ་བཙུན་བློ་བཟང་བསྟན་པའི་དབང་ཕྱུག་ཚུལ་ཁྲིམས་ཕུན་ཚོགས་དཔལ་བཟང་བོའི་རྣམ་པར་ཐར་བ་ཀུན་བཟང་སྤྱོད་ཚུལ་གསལ་བའི་མེ་ལོང་ལ། ༡༦༠ སྐུ་གསུང་ཐུགས་རྟེན་གསར་བཞེངས་ཀྱི་དཀར་ཆག་དང་ཞལ་བྱང་པར་སྨོན་བཤད་པ་འགའ་ཟུང་བཅས་ཕྱོགས་བསྡེབས་སུ་བཀོད་པ་བདེ་ལེགས་དགོས་འདོད་ཀུན་སྩོལ་ནོར་བུའི་གན་མཛོད་ལ། ༡༣༨ མཉམ་མེད་ཐུབ་པའི་དབང་བོ་བསྐལ་བཟང་རྣམ་འདྲེན་སྟོང་དང་ལྷག་ལྷ་དུ་མས་བསྐོར་བའི་སྣང་བརྙན་གཙུག་ལག་ཁང་བཅས་གསར་བཞེངས་ཀྱི་དཀར་ཆག་ལེགས་བྱས་ཟད་མི་ཤེས་པའི་བང་མཛོད་ལ། ༢༩ བཀའ་དྲིན་མཉམ་མེད་ཡོངས་འཛིན་པཎྜི་ཏ་ནོ་མོན་ཧན་རྗེ་བཙུན་དགེ་འདུན་བསྟན་འཛིན་རྒྱ་མཚོ་དཔལ་བཟང་བོའི་རིང་བསྲེལ་སྙིང་བོར་བཞུགས་པའི་གསེར་སྡོང་ནོར་འཛིན་མཛེས་རྒྱན་གྱི་དཀར་ཆག་དུང་གི་སྒྲ་དབྱངས་ལ། ༡༨ སྒར་སྡེའི་དགོན་གསར་དགའ་ལྡན་བཤད་སྒྲུབ་དར་རྒྱས་གླིང་གི་བཅའ་ཡིག་སྐལ་བཟང་འཇུག་ངོགས་སོགས་བཅའ་ཡིག་འགའ་ཞིག་ལ། ༣༦༼ ག ༽རྒྱལ་བའི་བཀའ་འགྱུར་རིན་པོ་ཆེའི་ཐོབ་ཡིག་ནོར་བུའི་ཕྲེང་མཛེས་ལ། ༩༡ རྗེ་བཙུན་བླ་མ་མཆོག་ནས་མཁས་པ་དང་གྲུབ་པའི་ཡོངས་འཛིན་དུ་མ་ལས་མདོ་སྔགས་ཟབ་རྒྱས་ཀྱི་གདམས་པའི་བདུད་རྩི་ཇི་སྙེད་ཅིག་གསན་བཞེས་མཛད་ཚུལ་ཕན་བདེའི་རིན་ཆེན་འབྱུང་གནས་ལ། ༢༠༢ བཤེས་གཉེན་དམ་པས་རྗེས་འཛིན་གྱི་སྨོན་ཚིག་སྐོར་འདོད་རྒུའི་གྲུ་ཆར་འཇོ་བའི་སྤྲིན་ཕུང་ལ། ༡༤ སྐྱེས་ཆེན་དམ་པ་རྣམས་ཀྱི་ཡང་སྲིད་མྱུར་བྱོན་གསོལ་འདེབས་སྐོར་ཉམ་ཆུང་ཡིད་ཀྱི་གསོས་སྨན་ལ། ༢༤ ལྷག་ལྷ་དུ་མའི་འདོད་གསོལ་བརྒྱུད་འདེབས་སྨོན་ལམ་སྣ་ཚོགས་ཕྱོགས་གཅིག་ཏུ་བསྡེབས་པ་བྱིན་རླབས་ནོར་བུའི་གཏེར་མཛོད་ལ། ༢༠ སྐྱེས་ཆེན་དམ་པ་རྣམས་ཀྱི་ཞབས་བརྟན་གསོལ་འདེབས་སྐོར་དྲང་སྲོང་རྒན་པོའི་བདེན་ཚིག་ལ། ༡༨ རང་གཞན་ཆོས་ལ་བསྐུལ་བའི་མགུར་དབྱངས་ཀྱི་རིམ་པ་ཕྱོགས་གཅིག་ཏུ་བཀོད་པ་སྐལ་བཟང་ཡིད་ཀྱི་གདུང་སེལ་ལ། ༡༢ ༼ ང ༽བྱང་ཆུབ་བདེ་ལམ་གྱི་ཁྲིད་དམིགས་སྐྱོང་ཚུལ་ཤིན་ཏུ་གསལ་བར་བཀོད་པ་དགེ་ལེགས་འོད་སྣང་འགྱེད་པའི་ཉིན་བྱེད་ལ། ༢༡༠ ལྷག་མཐོང་ཆེན་མོའི་དཀའ་གནད་རྣམས་བརྗེད་བྱང་དུ་བཀོད་པ་དགོངས་ཟབ་སྣང་བའི་སྒྲོན་མེ་ལ། ༡༡༠ བློ་སྦྱོང་ཚིགས་བརྒྱད་མའི་ཁྲིད་ཀྱི་ཟིན་བྲིས་སྐལ་བཟང་སྤྱི་ནོར་ལ། ༡༣ ལྟ་ཁྲིད་དྲན་པ་བཞི་ལྡན་གྱི་ཟིན་བྲིས་ལེགས་བཤད་རིན་ཐང་མེད་པའི་རྒྱན་ཕྲེང་ལ། ༡༢ མེ་ཏོག་བཅུད་ལེན་གྱི་ཟིན་བྲིས་མདོར་བསྡུས་དཀའ་ཐུབ་སྤྱོད་པའི་རྒྱན་ལ། ༦ སྦྱོར་བའི་ཆོས་དྲུག་གི་དམིགས་ཁྲིད་མདོར་བསྡུས་གནད་དོན་རབ་གསལ་ལ། ༡༠ སྤྱོད་འཇུག་ཆེན་མོའི་ས་བཅད་འཕྲོ་ཅན་སོགས་གསུང་རྩོམ་སྣ་ཚོགས་པའི་སྐོར་ལ། ༢༨ ༼ ཅ ༽མཁས་གྲུབ་བྱེ་བའི་གཙུག་ནོར་རྡོ་རྗེ་འཆང་པྲཛྙཱའི་མཚན་ཅན་ལས་མི་ཏྲའི་དབང་གསན་སྐབས་ཀྱི་ཟིན་བྲིས་དང་། རྡོར་ཕྲེང་གི་ཟིན་བྲིས་འཕྲོ་ཅན་ཉིད་ཀྱི་ཕྱག་བྲིས་ལས་བཤུས་པ་ལ། ༦༡ རིན་འབྱུང་སོགས་རྗེས་གནང་དང་ལུང་འགའ་ཞིག་གསན་དུས་ཀྱི་རེག་ཟིག་ཕྱག་བྲིས་ལས་བཤུས་པ་ལ། ༣༧ རྔོག་དཀྱིལ་བདུན་ལས་མ་རྒྱུད་དཀྱིལ་འཁོར་དྲུག་དང་རྡོར་དབྱིངས་དབང་གི་བརྗེད་བྱང་གདུང་སེལ་བདུད་རྩིའི་ཁྲུས་རྫིང་ལ། ༢༥ སྣར་ཐང་བརྒྱ་རྩའི་རྗེས་གནང་གི་ཆོ་གའི་མཚམས་སྦྱོར་ནག་འགྲོས་སུ་བཀོད་པ་སོགས་བྱིན་རླབས་ཅན་འགའ་ཞིག་གི་ཁ་སྐོང་ལ། ༢༧ བླ་མཆོད་དང་ཕྱག་ཆེན་སྦྲགས་པའི་ཁྲིད། སྒྲོལ་དཀར་ཚེ་ཁྲིད། མ་ནིང་ཧ་འདོན་ཁྲིད། མདོ་སྡེའི་རྒྱན་གྱི་བཤད་ལུང་བཅས་གསན་པའི་རེག་ཟིག་ལ། ༣༣ བླ་མ་མཆོད་པའི་ཆོ་ག་མདོར་བསྡུས་བསམ་འཕེལ་ནོར་བུའི་དོ་ཤལ་ལ། ༦ རྗེ་བཙུན་རིག་བྱེད་མ་ལ་བརྟེན་ནས་ཚེ་ཡི་དངོས་གྲུབ་སྒྲུབ་པའི་ཆོ་ག་དགེ་ལེགས་ཆུ་གཏེར་སྤེལ་བའི་ཟླ་ཤེལ་ལ། ༦ དཔལ་གསང་བའི་བདག་པོ་འཁོར་ལོ་ཆེན་པོའི་སྒྲུབ་ཐབས་མདོར་བསྡུས་བདུད་སྡེ་ཟིལ་གྱིས་གནོན་པའི་བཞད་སྒྲ་ལ། ༨ འཁོར་ཆེན་གྱི་བརྒྱུད་འདེབས་དང་སྨོན་ཤིས་མདོར་བསྡུས་ལ། ༢ དཔལ་མོའི་ལུགས་ཀྱི་ཐུགས་རྗེ་ཆེན་པོའི་སྒྲུབ་ཐབས་རྒྱུན་ཁྱེར་དང་། སྒྲོལ་མའི་མཎྜལ་བཞི་བའི་ཆོ་ག་མདོར་བསྡུས་ལ། ༢ རྡོ་རྗེ་མི་འཁྲུགས་པ་གཙོ་རྐྱང་གི་སྒྲུབ་ཐབས་མདོར་བསྡུས་ལ། ༢ སྒྲོལ་མ་དཀར་མོའི་སྒོ་ནས་ཞབས་བརྟན་འབུལ་བའི་ཆོ་ག་ལ། ༩ སྙན་ངག་གི་བསྟན་བཅོས་ཆེན་པོ་མེ་ལོང་ལས་བྱུང་བའི་རྒྱན་རྣམས་ཀྱི་དཔེར་བརྗོད་ལེགས་བཤད་བདུད་རྩིའི་མཆོད་ཡོན་ལ། ༣༩ སྙན་ངག་གི་བསྟན་བཅོས་ཆེན་པོ་མེ་ལོང་གི་རྒྱན་རྣམས་ཀྱི་དོགས་གཅོད་འཕྲོ་ཅན་ལ། ༣༧ རྒྱལ་དབང་སྲིད་ཞིའི་གཙུག་རྒྱན་མཆོག་ལ་སྔ་ཕྱིར་ཕུལ་པ་སོགས་ཆབ་ཤོག་གི་སྐོར་འགའ་ཞིག་ལ། ༢༤ ཡུལ་ལྷའི་རྒྱལ་བོ་གུར་ཁང་གི་གསོལ་མཆོད་དྲེགས་ལྡན་དགྱེས་པའི་དབྱངས་སྙན་སོགས་ལ། ༥ གཤེད་དམར་ལྷ་བཅུ་གསུམ་གྱི་དབང་ཟིན་ལ། ༢༡ བླ་མཆོད་ཁྲིད་དང་མདོ་རྒྱན་གྱི་བཤད་ལུང་གསན་པའི་ཟིན་བྲིས་ལ། ༣༣ པར་བྱང་སྨོན་ཚིག་ལ། ༩༼ ཆ ༽དྲིན་ཅན་བླ་མ་མཆོག་གིས་མཛད་པའི་ཕར་ཕྱིན་ཟིན་ཐོ་གཞུང་ལུགས་རབ་འབྱམས་གསལ་བའི་མེ་ལོང་ལས་སྐབས་དང་བོའི་སྐོར་ལ། ༢༢༢ སྐབས་གཉིས་པའི་སྐོར་ལ། ༣༥ སྐབས་གསུམ་པའི་སྐོར་ལ། ༢༡ སྐབས་བཞི་བའི་སྐོར་ལ། ༡༢༢༼ ཇ ༽རྨ་ལུང་རྡོ་རྗེ་བྲག་ཏུ་སྡེ་སྣོད་རྒྱ་མཚོའི་མངའ་བདག་དགེ་བའི་བཤེས་གཉེན་ཆེན་པོ་སངས་རྒྱས་ཆོས་གྲགས་རིན་པོ་ཆེ་དང་བགྲོས་པའི་དབུ་མའི་ཐོ་དཀའ་གནད་སྦུབས་རྒྱ་བཀྲོལ་བའི་ཉིན་བྱེད་བྱིན་རླབས་སྣང་བའི་གཏེར་མཛོད་ལ། ༡༨༤ ཕན་ཕྱིན་སྐབས་དང་བོའི་དཀའ་གནད་འགའ་ཞིག་ལ་དགོངས་གཞིགས་ཞིབ་ཏུ་མཛད་པའི་དཔྱད་ཐོ་མི་བསྙེལ་དྲན་གསོའི་ཐོ་ཡིག་རྨོངས་པའི་དྲི་མ་དག་བྱེད་བདུད་རྩིའི་བུམ་བཟང་ལ། ༤༣ དྲང་ངེས་ལེགས་བཤད་སྙིང་བོའི་དཀའ་གནས་ལས་བརྩམས་པའི་ཟིན་བྲིས་དཔྱོད་ལྡན་ཡིད་ཀྱི་མུན་སེལ་ལ། ༡༡༣ ཕར་ཕྱིན་ཟུར་བཀོལ་ལས་དགེ་འདུན་ཉི་ཤུ། རྟེན་འབྲེལ། དྲང་ངེས་ཞལ་ཐོ་ཧོར་ཁོང་ཅན་རྣམས་ཀྱི་རེག་ཟིག་དཀའ་གནད་གསལ་བའི་རིན་ཆེན་སྒྲོན་མེ་ལ། ༨༣༼ ཉ ༽ཆེ་བ་བཞི་ལྡན་བྱང་ཆུབ་ལམ་རིམ་ཆེན་མོའི་ཟིན་བྲིས་དང་། ཆེ་འབྲིང་གི་དཀའ་གནད་གཞུང་གུང་བསྒྲིགས་ཀྱིས་དགོངས་དཔྱད་དང་དགེ་བཤེས་མཁས་པ་དུ་མར་འཕྲོས་པ་གནང་བའི་ཞལ་ཐོ་ནོར་བུའི་གཏེར་མཛོད་ལ། ༣༡༦ བདེན་གཉིས་ཀྱི་ཞལ་ཐོ་གྲུབ་མཐའ་རྣམ་བཞིའི་ལམ་བཟང་གསལ་བའི་རིན་ཆེན་སྒྲོན་མེ་ལ། ༤༨ རྒྱུད་བླ་དར་ཊཱིཀ་དང་ཀུན་བཏུས་དར་ཊཱིཀ་གཉིས་ཀྱི་ཟིན་བྲིས་དགོས་འདོད་གཏེར་གྱི་བུམ་བཟང་ལ། ༥༧ ཟབ་ལམ་དབུ་མའི་ལྟ་བ་རྟོགས་པའི་མན་ངག་གསལ་བའི་ཉིན་བྱེད་ལ། ༦༼ ཏ ༽པྲཛྙཱ་ཞབས་ལས་བདེ་ལམ་རྒྱས་བསྡུས་གཉིས་དང་། འཇམ་དཔལ་ཞལ་ལུང་། རྗེ་ཨ་རོལ་ལས་མྱུར་ལམ་དང་། བླ་མཆོད་ཁྲིད་གསན་པའི་ཞལ་ཐོ་བཅས་ལ། ༡༠༡ལྷག་མཐོང་ཐོ་སྔ་མ་ཤོག་དྲིལ་གསུམ་དང་། དཀའ་གནས་ལ་དཔྱད་པའི་ཐོ་གསར་ཤོག་དྲིལ་གཅིག་བཅས་ལ། ༣༠ གཞུང་ཐོ་ཐར་ཐོར་དང་བཤད་ལུང་དང་ཁྲིད་ཀྱི་སྐོར་ཕྱོགས་བསྡེབས་བྱས་པ་ལ། ༡༠༩ གཤེད་དམར་ལྷ་བཅུ་གསུམ་མ་སོགས་ཟུར་བཀའི་དབང་འགའ་དང་། སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་གི་གསན་ཐོ་ལ། ༦༠ དབྱངས་ཅན་སྒྲ་མདོའི་ཐོ་ཤོག་དྲིལ་ཕྱེད་དང་ལྔ། དཔྱད་ཐོ་ཤོག་དྲིལ་ཕྱེད། སྙན་ངག་དཔེར་བརྗོད་ཤོག་དྲིལ་ལྔ། ཉིད་ཀྱི་སྒྲ་རྒྱན་བཀྲོལ་ཐོའི་ཤོག་དྲིལ་བཅས་ལ། ༨༠ སྡེ་སྲིད་སངས་རྒྱས་རྒྱ་མཚོའི་མན་ངག་ལྷན་ཐབས་ཀྱི་ཟིན་བྲིས་ལ། ༦༥ བཅས་པར་དུ་བཀོད་ཟིན་པ་པོད་དགུ་བཞུགས།

ཁོང་གི་གསུང་འབུམ་ཀྱི་ཁྲོད་ན་བཞུགས་པའི་མེ་ལོང་མའི་ལེའུ་གཉིས་པའི་རྒྱན་རྣམས་ཀྱི་དོགས་གཅོད་ཅེས་བྱ་བའི་སྙན་ངག་ཟིན་བྲིས་དང་། རྒྱལ་དབང་བཅུ་གསུམ་པའི་གསུང་འབུམ་དུ་བཞུགས་པའི་ཁ་བྱང་ལ། གནས་ལྔ་རིག་པའི་པཎྜི་ཏ་ཆེན་པོ་སྐྱབས་རྗེ་དཔའ་རིས་པ་བློ་བཟང་རབ་གསལ་མཆོག་གི་ཞལ་སྔ་ནས་སྙན་ངག་གི་བསྟན་བཅོས་མེ་ལོང་མའི་སྟེང་ནས་བཀའ་ཁྲིད་ནོད་སྐབས་ལེའུ་བར་བའི་དཀའ་གནད་བརྗེད་བྱང་དུ་བཀོད་པ་བཞུགས་སོ། །ཞེས་བྱ་བའི་སྙན་ངག་ཟིན་བྲིས་གཉིས་རིང་ཐུང་ཙམ་ལས་ཚིག་དོན་གཉིས་ཀ་གཅིག་ཡིན་འདུག་ཀྱང་། རྒྱལ་དབང་གསུང་གི་ཟིན་བྲིས་དེར་བསྡུས་བརྗོད་མན་ཆད་མེད་ལ། རྡོ་རྗེ་འཆང་གི་དེར། དགའ་བའི་རྒྱན་ཡན་ཆད་ཡོད་པ་ཙམ་ཁྱད་པར་ཏེ། རྡོ་རྗེ་འཆང་གི་སྙན་ངག་ཟིན་བྲིས་རྒྱལ་དབང་གི་ཕྱག་དཔེའི་ཁྲོད་ན་ཡོད་སྟབས། རྒྱལ་དབང་གིས་མཛད་པར་གཞིར་བཞག་གིས་ཁ་བྱང་བཏབ་སྟེ་གསུང་འབུམ་གྲས་སུ་བཞག་པ་ཡིན་འདུག་སྟེ། དཔེ་རྒྱན་ལས་འགལ་བའི་དཔེའི་དཔེར་བརྗོད་དུ། ཟིན་བྲིས་དེར། འདི་ལ་བསམ་ནས་ཁོ་བོའི་དཔེར་བརྗོད་དུ། ཡིད་འོང་མཚམས་སྤྲིན་གསར་བའི་ཕུང་བོ་དང་། །པདྨ་རཱ་གའི་རྡུལ་མང་བརྩེགས་པའི་རི། །རྣལ་འབྱོར་དབང་མོ་ཁྱོད་ཀྱི་མཛེས་སྐུ་རྣམས། །ཕན་ཚུན་རྣམ་པ་འགལ་བ་ཙམ་དུ་ཟད། །ཅེས་སྨྲས་སོ། །ཞེས་རྡོ་རྗེ་འཆང་གི་བདུད་རྩིའི་མཆོད་ཡོན་གྱི་ཚིག་དྲངས་སྐབས། ཁོ་བོའི་དཔེར་བརྗོད་ཅེས་པས་ཤེས་ལ། རྒྱལ་དབང་བཅུ་གསུམ་པའི་དཔེར་བརྗོད་ལས་འགལ་བའི་དཔེར། སྙན་དང་ལེགས་པར་སྨྲ་བའི་རྗེས་མཐུན་ལས། །དཔུང་མགོ་ཟླུམ་ཞིང་ལེགས་པར་འབྲེལ་བ་དང་། །རབ་མཛེས་གསེར་གྱི་བུམ་པའི་མགྲིན་པ་དག །མཚུངས་ཀྱང་ཕན་ཚུན་རྣམ་པར་འགལ་བ་ཉིད། །ཅེས་དེ་དང་མི་འདྲ་བར་འབྱུང་བས་སོ། །དེ་བཞིན་དུ་གཟུགས་བརྙན་གྱི་དགའ་བའི་དཔེར་བརྗོད་ཐད་དུ། ཟིན་བྲིས་དེར། འདི་ལ་བསམ་ནས་ཁོ་བོའི་དཔེར་བརྗོད་དུའང་། མཐའ་ཀླས་ཞིང་ཁམས་ཡངས་པོར་འཚོ་གཞེས་པའི། །རྒྱལ་ཀུན་རང་གཟུགས་དྲིན་ཅན་བླ་མའི་ཞལ། །དེང་འདིར་མཇལ་བ་ལས་ལྷག་སྤངས་རྟོགས་ཆ། །རྫོགས་པའི་སངས་རྒྱས་གཞན་དགའ་ལྟར་ཅི་འཚལ། །ཞེས་སྨྲས་པ་ཡིན་ནོ། །ཞེས་གསུངས་པ་འདི་ཡང་། རྡོ་རྗེ་འཆང་གི་བདུད་རྩིའི་མཆོད་ཡོན་ལས་འབྱུང་གི། རྒྱལ་དབང་བཅུ་གསུམ་པའི་དཔེར་བརྗོད་ལས། གཟུགས་བརྙན་གྱི་དགའ་བའི་དཔེར་བརྗོད་དུ། གཟུང་འོས་གདེང་ཅན་དབང་བོའི་སྙན་འགྱུར་གྱིས། །ལེགས་པར་བཤད་པའི་བརྡ་སྤྲོད་བརྩོན་པ་ཡིས། །སྐྱོ་ངལ་མེད་པར་རྣམ་པར་དཔྱོད་པའི་མཐུས། །ཚད་མེད་བདེ་བ་མཆོག་གི་རྣམ་པར་རོལ། །ཅེས་གསུངས་པ་ལྟར་རོ། །དེས་སྙན་འགྲེལ་ཡང་གསལ་སྣང་མཛོད་དུ་མཚུངས་གསལ་སྐབས་ཆ་ལ་སོགས་པ་བཅུ་གཅིག་གི་དཔེར་བརྗོད་འཇོག་སྐབས། རྒྱལ་དབང་བཅུ་གསུམ་པའི་དཔེར་བརྗོད་ལས། ཞེས་དྲངས་པའང་སྒྲ་ཇི་བཞིན་པར་གཟུང་དུ་མི་རུང་བ་ཐ་སྙད་རིག་གནས་སྨྲ་བ་རྣམས་ཀྱིས་ཤེས་དགོས་པ་ཞིག་ཏུ་སྣང་བས་འདིར་གསལ་བར་བཤད་དོ། །

གདན་རབས་ཚིགས་བཅད་མ་ལས། 

 དེ་ཚེ་དད་ལྡན་བུ་སློབ་ཚོགས་རྣམས་ཀྱིས། །

མཆོག་སྤྲུལ་མྱུར་འབྱོན་གསོལ་བ་བཏབ་པ་ཡིས། །

གོང་ས་རྒྱལ་བའི་དབང་བོ་བཅུ་གསུམ་པས། །

རང་གི་རིགས་ཀྱི་བདག་པོའི་མཆོག་སྤྲུལ་དུ། །

གསལ་བར་ངོས་འཛིན་མཛད་པ་ཆོས་ཀྱི་རྗེ། །

མཐོང་ཐོས་དྲན་པ་དོན་ལྡན་འགྲོ་བའི་མགོན། །

བློ་བཟང་བཤད་སྒྲུབ་བསྟན་འཛིན་རྒྱ་མཚོ་ཞེས། །

བདག་གི་དཔལ་ལྡན་བླ་མ་འདི་ལགས་སོ། །ཞེས་བྱུང་། 

བླ་མ་རྡོ་རྗེ་འཆང་གི་དགོངས་པ་གཞན་དུ་གཏད་ཟིན་པ་དེའི་ཚེ་ན་དད་ལྡན་བུ་སློབ་འདུས་པ་རྒྱ་མཚོའི་ཚོགས་རྣམས་ཀྱིས་གདུང་མཆོད་དང་འབྲེལ་ནས་གང་གི་མཆོག་སྤྲུལ་ཉི་མ་གཞོན་ནུ་མྱུར་དུ་འབྱོན་པའི་གསོལ་བ་ཡང་ཡང་བཏབ་པའི་མཐུ་ལ་བརྟེན་ནས། ལྷ་མིའི་འདྲེན་པ་ ༧ གོང་ས་རྒྱལ་བའི་དབང་བོ་བཅུ་གསུམ་པ་ཆེན་པོ་མཆོག་གིས་ཁོང་རང་གི་རིགས་ཀྱི་བདག་པོའི་མཆོག་སྤྲུལ་དུ་སྒྲིབ་མེད་སྤྱན་གྱིས་གསལ་བར་གཟིགས་ནས་ངོས་འཛིན་མཛད་པ་ལགས་ན། ཆོས་ཀྱི་རྗེ་མཐོང་ཐོས་དྲན་པ་དོན་དང་ལྡན་པའི་འགྲོ་བའི་མགོན་པོ་དེ་ཉིད་ལ་བློ་བཟང་བཤད་སྒྲུབ་བསྟན་འཛིན་རྒྱ་མཚོ་ཞེས་པའི་མཚན་གསོལ་བ་ནི་བདག་གི་དཔལ་ལྡན་བླ་མ་འདི་ཉིད་ལགས་སོ་ཞེས་པའོ། །

སྨྲས་པ། 

དགེ༷་ལེགས་འོ་མའི་ཆུ་གཏེར་ལས་ཐོན་འདུན༷་ལྡན་གསེར་རིའི་དཀྱིལ་འཁོར་ན། །

བསྟན༷་པའི་སྡེ་བཞི་བང་རིམ་བརྩེགས་པ་སྲིད་ཞིའི་བླ་ན་མངོན་པར་འཕགས། །

བླ་གོས་ཐུན་མཚམས་ཆུ་འཛིན༷་འཁྱུད་བཞིན་འཕྲིན་ལས་གཟི་འོད་རྩེ་དགའ་ཅན། །

གདུལ་བྱ་རྒྱ༷་མཚོ༷་སྐྱོང་བར་མཛད་པའི་འདྲེན་མཆོག་སྨྲ་བའི་ལྷུན་པོ་རྒྱལ། །

སྤྲོས་བྲལ་ཆོས་དབྱིངས་མི་ཟད་ཀློང་དུ་ཡེ་ཤེས་གཟི་འོད་འབུམ་དཀྲིགས་པ། །

སྲིད་ཞིའི་མཛེས་སྡུག་གཅིག་ཏུ་སྨིན་པའི་རྒྱལ་ཡུམ་སྒེག་པའི་འཛུམ་དཀར་ཅན། །

སོར་མོའི་འདུ་བྱེད་གར་མཁན་མ་ཡིས་རྟོགས༷་བརྗོད༷་དད༷་གསུམ༷་ངག༷་གི༷་དཔལ། །

རྒྱུད་སྟོང་དབྱངས་སུ་གྱེར་བའི་རོལ༷་མོ༷་བདག་མགྲིན་སྦུབས་སུ་དཀྲོལ་བར་མཛོད། །

རྒྱལ་ཀུན་སྙིང་རྗེའི་ཞུན་མའི་ཐིག་ལེ་འཛུམ་པའི་ཟླ་ཤེལ་དཀྱིལ་འཁོར་ལས། །

སྤྲུལ་པ་ཡང་སྤྲུལ་འོད་རིས་རླབས་ཕྲེང་མཁའ་ཁྱབ་སྤྲོས་པ་སུ་ཞིག་གཞལ། །

སྟོན་པའི་ཀུན་འཁོར་ཆོས་ཀྱི་བློ་གྲོས་གནས་བརྟན་དགེ་བསྙེན་དྷརྨའི་མཚན། །

དབྱིག་གཉེན་ལ་སོགས་པཎ་གྲུབ་དུ་མས་འཕགས་ཡུལ་ཆོས་ཀྱི་ཚལ་དུ་བསྒྲུབས། །

པུར་རྒྱལ་བསྟན་དང་འགྲོ་བའི་དཔྱིད་དཔལ་སྤྱན་སྔ་གྲགས་པ་བྱང་ཆུབ་དཔལ། །

རྒྱལ་སྲས་བློ་གྲོས་བརྟན་པའི་སྡེ་དང་སྟག་ཕུ་རིམ་བྱོན་གསེར་རིའི་ཕྲེང་། །

དགེ་ལྡན་བཤད་སྒྲུབ་རིང་དུ་མཛད་པས་ཆོས་ཚུལ་རིན་ཆེན་བརྡལ་བའི་གཞིར། །

རྒྱལ་རྣམས་འོག་མིན་འཁྲུལ་བར་འཛིན་པ་ཡིད་སྲུབས་དཔུང་སྡེ་འཁྲུགས་པར་རྩོམ། །

དབུས་ལྗོངས་ཐུབ་བསྟན་གངས་ཀྱི་རི་བོར་མདོ་རྒྱུད་གཞུང་མང་གཡུ་རལ་གསིག །

ང༷ག་གི་རོལ་རྩེད་ཕྲ་མོ་ཡིས་ཀྱང་ཐུབ་དབ༷ང་གསུང་གི་མཆེ་སྡེར་གཡོ། །

འཕྲིན༷་ལས༷་ལུས་རྩལ་དར་བའི་སེང་ཆེན་རྩོད་ངག་ང་རོའི་དབྱངས་གཅིག་གིས། །

ཀུན་མཁྱེན་ཞེས་གྲགས་གཉིས་འཐུང་ལ་ཡང་འཇིགས་པ་བྱིན་པའི་དཔའ་རྟགས་ངོམ། །

འཇམ་དཔལ་ང༷ག་རིག་གསང་བའི་མཛོད་ལ་དབ༷ང་འབྱོར་ཐུགས་རྗེའི་མཁའ་དབྱིངས་སུ། །

འཕྲིན༷་ལ༷ས་ཆུ་འཛིན་འཁྲིགས་པའི་ཀློང་ལས་དགེ་ལེགས་ཆོས་ཀྱི་སྦྲང་ཆར་ཕབ། །

ཐུབ་བསྟན་ཆུ་སྐྱེས་དཔ༷ལ་ཡོན་རྒོད་པའི་སྐལ་བཟ༷ང་བུང་བ་འཕྲོ་འདུའི་གཞི། །

སྤེལ་བའི་སྙིང་སྟོབས་འོ་མའི་མཚོ་ཆེན་དབྱིངས་སུ་འཕྱོ་བའི་རྩེ་དགའ་འཛིན། །

ཐུགས་རྗེ་སྤྱན་སྟོང་བགྲད་པའི་འོད་ཞགས་སྙིགས་མའི་འགྲོ་ལ་རྟག་ཏུ་བཅིངས། །

མཛད་འཕྲིན་མཁའ་ཁྱབ་སྤྲོས་པའི་ཕྱག་སྟོང་བསྟན་འགྲོའི་དཔྱིད་དུ་གཡོ་བའི་གར། །

ང༷ག་གི་དབ༷ང་ཕྱུག་བསྟན༷་འཛི༷ན་རིམ་བྱོན་ཕྱག་ན་པདྨ་དཀར་བོའི་ཕྲེང་། །

ཞིང་འདིར་མཛད་པའི་ཕྱག་རིས་འོད་སྟོང་ཕན་བདེའི་རྒྱ༷་མཚོ༷འི་དཔྱིད་དུ་སྤྲོས། །

ཟླ་གཞོན་ལང་ཚོའི་སྟོད་གོས་བཀླུབས་པའི་དབྱིག་འཛིན་དཔལ་མོའི་སྤྱི་གཙུག་ཏུ། །

བཻཌྰུར་ཞུན་ཆེན་འཁྱིལ་བའི་མཚོ་མོར་ལན་བུའི་རྦ་རླབས་བསྐྱོད་པའི་འདབས། །

དགེ་བཅུ་སྨིན་པའི་མདའ་བཞིའི་ཚལ་ཡངས་རླུང་གི་རྒྱལ་མཚན་བསྒྲེངས་དང་ལྷན། །

ཧྲཱིཿཡིག་གཞི་ལས་འཛུམ་པའི་པད་དཀར་སྲིད་པའི་རྒྱན་དུ་ཅི་ཡང་བཞད། །

དགེ༷་ལ་འདུན༷་པའི་ཆོས༷་ཚུལ་སྐྱོང༷་མཛད་ཐུགས་རྗེ་རྒྱ༷་མཚོ༷འི་ཆུ་སྒྲོགས་མས། །

ལྷ་སྲས་ལྷན་སྐྱེས་སྤྱོད་པའི་དྲི་ངད་ལྡང་བའི་མ་ལ་ཡར་སྐྱེས་ལྗོན། །

བག་ཡོད་བསླབ་ཁྲིམས་བདུད་རྩིའི་ཆར་ཕབ་ལི་ཁྲིའི་ཆུ་འཛིན་མདངས་འཁྱུད་པས། །

བསླབ་གསུམ་རིན་ཆེན་ཡལ་འདབ་རྒྱས་པ་ཐུབ་བསྟན་མཛེས་པའི་དཔལ་དུ་གྲུབ། །

ན་ཚོད་བདེ་འབྱུང་མེ་ཏོག་བཞད་ཚེ་ལཱ༷་མོ༷འི་འཕྲིན་ལས་གཟི་འོད་ཀྱིས། །

ཕན་བདེ༷་རིན་ཆེན༷་འགྲེམ་པའི་གླིང་དུ་འཁོར་ཚོགས་སྤྲིན་གྱི་རླབས་བཞིན་འཕྱུར། །

འཕགས་མཆོག་རིམ་བྱོན་གོང་མའི་རྒྱལ་ཐབས་མི་འཇིགས་གདོང་ལྔས་བཏེགས་པའི་ཁྲིར། །

གང་ཞབས་གསེར་གྱི་འཁོར་ལོས་མཚན་པས་རྫོགས་ལྡན་གསར་བའི་དཔལ་ལ་བཀོད། །

བློ་བཟང་རིང་ལུགས་སྨྲ་བའི་ཉི་མ་སྤྱི་གཙུག་རྒྱན་དུ་འཆར་བའི་མོད། །

ཕྱོགས་གླང་ཆོས་གྲགས་རྟོག་གེའི་གཞུང་ལུགས་གངས་སེང་འོ་མས་བསྐྱེད་བསྲིངས་པས། །

ལུང་རིགས་གཡུ་རལ་གནམ་དུ་འཕྱོ་བ་རྩོད་ངག་མི་བཟད་ང་རོའི་སྒྲས། །

ཕས་རྒོལ་གླང་བོ་སྟོང་ཕྲག་འགྱེལ་བ་མ་ཐེག་དབྱིག་འཛིན་འགས་སྙམ་བྱེད། །

བློ༷་བཟ༷ང་ཐུབ་བསྟན་པདྨའི་ཚལ་དུ་ལུང༷་རི༷གས་རླབས་ཕྲེང་གཡོ་བ་ཡི། །

ལེགས་བཤད་རིན་ཆེན་བརྡོལ་བའི་རྒྱ༷་མཚོ༷ར་དེད་དཔོན་ནོར་ལ་གཉེར་བ་བཞིན། །

དགུང་གྲངས་ཚེས་ཀྱི་ལང་ཚོ་རྫོགས་དུས་གསེར་ལྗོངས་རིག་པའི་དགའ་ཚལ་དུ། །

པད་དཀར་འཆང་གཉིས་ལྷན་དུ་མཇལ་བས་ཐོས་པ་དགའ་བའི་རྣམ་ཐར་སྒྲོག །

གང་གི་ཞབས་སྐྱེས་ནོར་བུའི་ཅོད་པན་ཟུར་ཕུད་རྩེ་ལ་བཏེགས་པ་ཡིས། །

བརྩེ་ཆེན་ཐུགས་རྗེའི་ལྗགས་ཡངས་བརྐྱངས་ཏེ་སྨིན་བྱེད་བདུད་རྩིའི་ཀ་ལ་ཤས། །

རྡོ་རྗེའི་རིགས་ཀྱི་སྲས་སུ་དབང་བསྐུར་རང་རྒྱུད་ཟབ་རྒྱས་བཅུད་རྫོགས་ཏེ། །

སྟོན་པའི་རྒྱལ་ཐབས་ཉིད་ལ་དབང་ཕྱིར་ཐུབ་སྐུ་ཐུགས་དམ་རྟེན་དུ་བསྩལ། །

བཤེས་གཉེན་དེད་དཔོན་དུ་མ་ལ་བརྟེན་གསང་ཚིག་རིགས་པའི་རླབས་ཕྲེང་གིས། །

ཚད་མའི་གཞུང་ལུགས་རྒྱ་མཚོ་ལས་བརྒལ་ཕ་རོལ་རིན་ཆེན་གླིང་དུ་ཕྱིན། །

གཞུང་ལམ་འབྲས་བུ་ལེགས་པར་བཤད་པའི་དགོས་འདོད་ནོར་བུ་བརྒྱ་རྩ་བརྒྱད། །

རྣམ་དཔྱོད་གསེར་གྱི་སྲད་བུར་བརྒྱུས་པའི་ཕྲེང་མཛེས་མགུལ་བའི་རྒྱན་དུ་བསྟར། །

ཀླུ་སྒྲུབ་གཞུང་གི་ཟབ་དོན་ནོར་བུ་གུས་རྟག་རྒྱལ་མཚན་རྩེར་མཆོད་པས། །

དབུ་མ་ལྟ་བའི་དབྱིག་གི་ཆར་ཕབ་སྟོང་ཉིད་དགའ་མར་དམ་དུ་འཁྱུད། །

སྣང་སྟོང་བདེ་ཆེན་རོལ་བའི་ངང་ལས་ཆོས་མངོན་མཛོད་ཀྱི་མཁའ་དབྱིངས་སུ། །

གཞི་ལྔའི་རང་སྤྱིའི་དབང་གཞུ་བཀྲ་བ་མ་འདྲེས་ལག་མཐིལ་རྫས་བཞིན་གཟིགས། །

དགུང་གྲངས་བུག་གཟུགས་ལང་ཚོ་རྒྱས་ཚེ་བཀའ་ལུང་ནོར་བུ་ཕོག་པ་བཞིན། །

བཤད་སྒྲུབ་དབྱིག་གི་ཐང་མ་བརྡལ་བའི་བ༷ཀྲ་ཤིས༷་གཡས་སུ་འཁྱིལ༷་བའི་གླིང་། །

ཤེས༷་བྱར་མཁྱེན་དཔྱོད་རླབས་ཀྱིས་རབ༷་འགྲེམ་རྒྱ༷་མཚོ༷འི་ཞབས་སེན་མུ་ཏིག་ཕྲེང་། །

སྤྱི་བོར་མཆོད་པའི་རྩེ་དགའ་ལ་རོལ་གསང་གསུམ་སྒྲོམ་གྱི་སྒོ་བརྒྱ་གྲོལ། །

འཕགས་ཡུལ་གྲུབ་མཆོག་མི་ཏྲ་ཛོ་ཀིའི་ཐུགས་བཅུད་དབང་མཆོག་བརྒྱ་རྩའི་རྒྱུན། །

རིན་ཆེན་འབྱུང་གནས་མྱུར་མཛད་མགོན་དང་རྣམ་ཐོས་བུ་ཡི་བཀའ་ཆེན་སོགས། །

བགྲང་ཡས་སྨིན་བྱེད་བདུད་རྩིའི་སྙིང་བོ་ཐོག་མའི་སྐྱེས་སུ་ལེགས་བསྟབས་ནས། །

གཙང་དབུས་བརྒྱུད་པའི་ལམ་རིམ་ཁྲིད་ཀྱིས་རང་རྒྱུད་སེམས་མཆོག་བརླན་པར་བྱས། །

མཁའ་མིག་བགྲང་བྱའི་མཚར་སྡུག་རྫོགས་པ་ས་གའི་ཟླ་ཤེལ་ཉ་གང་བར། །

ཤེས༷་བྱར་མཁྱེན་རབ༷་རྩལ་གྱིས་འཇལ་བའི་མདོ་རྒྱུད་རྒྱ༷་མཚོ༷འི་མངའ་བདག་གང་། །

མཚན་ལྡན་དགེ་འདུན་གྲངས་ཚང་དབུས་སུ་སྤོང་བདུན་བསླབ་གཞིའི་ཆབ་རྒྱུན་གྱིས། །

སྒོ་གསུམ་ཉེས་སྤྱོད་ལྷག་མེད་བཀྲུས་ཏེ་ཐུབ་བསྟན་མངའ་བདག་ཁྲི་ལ་བཀོད། །

སྟོན་པའི་ཐུགས་བཅུད་འདུལ་བ་འབུམ་སྡེའི་སྙིང་བོ་ཕྱོགས་སུ་བསྡུས་པའི་མདོ། །

འདུལ་འཛིན་མཁས་མང་ལེགས་པར་བཤད་པའི་གཞུང་དོན་ཇི་བཞིན་གཟིགས་པའི་མོད། །

དགག་སྒྲུབ་གནང་བའི་བཅས་ཁྲིམས་ཐབས་ཀྱིས་དྲན་ཤེས་བག་ཡོད་བརྟན་པོ་ཡིས། །

བསླབ་གསུམ་དབྱིག་གི་རྒྱལ་མཚན་བསྒྲེངས་མཛད་ཨུ་པ་ལི་ཡི་སྙན་པ་འཕྲོགས། །

རབ་འབྱམས་ཤེས་བྱའི་མཁའ་དང་མཉམ་འཇུག་མཁྱེན་བརྩེ་འོད་ཀྱི་ཐིག་ལེ་ཡིས། །

བསྟན༷་པ༷་རྒྱས་པའི་པདྨའི་ཚལ་ཡངས་རྒྱ༷་མཚོ༷འི་མཐའ་ལ་སྤེལ་བའི་གཉེན། །

ངག་གི་དབང་ཕྱུག་དམ་པ་དུ་མའི་ཞབས་སེན་ནོར་བུ་འོད་འབར་བ། །

སྤྱི་གཙུག་ཆུ་སྐྱེས་ཟེའུ་འབྲུའི་དབུས་སུ་བསམ་དང་སྦྱོར་བས་འགྱུར་མེད་བསྟེན། །

ཐུབ་པ་ཆེན་པོ་གངས་རི་ལས་བབས་བརྒྱུད་ལྡན་དམ་པའི་ཡུར་ལམ་དུ། །

ལེགས་དྲངས་སྨིན་བྱེད་དབང་བཞི་རྗེས་གནང་ལུང་ཁྲིད་ཆོས་རྒྱུན་གངྒཱ་མ། །

རྒྱལ་སྲས་ཛ་ཧུའི་ལྟོ་བར་བསྐྱིལ་བས་ཡང་དག་ཆོས་ཆབ་ཀློང་བརྡོལ་ཏེ། །

སྲིད་ན་སྐོམ་པས་གདུངས་པའི་གསོས་སུ་སླར་ཡང་འབེབས་པའི་མོས་འདོད་སྐོང་། །

ཐོན་མིའི་སྙིང་བཅུད་བརྡ་སྤྲོད་སུམ་རྟགས་དབྱངས་ཅན་བཞད་པའི་སྒྲ་རིག་པ། །

ས་རིས་སྡེབ་སྦྱོར་སྐར་རྩིས་འབྱུང་རྩིས་ཚེ་ཡི་རིག་བྱེད་གསོ་དཔྱད་སོགས། །

ཐུན་མོང་ཐུན་མིན་རིག་པའི་གནས་རྣམས་སྒྱུ་རྩལ་མཐའ་ལ་བྱང་ཆུབ་པས། །

གཙུག་ལག་རིན་ཆེན་སྟོབས་ཀྱིས་དྲེགས་པས་མཁས་མང་ཕལ་གྱི་ཁེངས་པ་བསྙིལ། །

ངག་དབང་ཚང༷ས་སྲས༷་དགྱེས༷་པ༷འི་ཟློས་གར་བློ༷་གྲོས་དཔལ་དང་ལྡན༷་པ་ལས། །

ཉམས་འགྱུར་འབུམ་སྡེ་མེ་ལོང་དགྱེས་གླུའི་སྙན་ཚིག་རོ་མངར་འཐུངས་པའི་དཔྱིད། །

མཁས་ཀུན་རྣ་བའི་བདུད༷་རྩིའི༷་སྙིང་བོ་བཤེས་གཉེན་དགྱེས་པའི་མཆོད༷་ཡོན༷་དུ། །

སྤྲོས་པའི་ཚིག་གི་དཔག་བསམ་མེ་ཏོག་དྲན་དབང་འཆི་མེད་ཚལ་དུ་རྒོད། །

སྐྱེ་དགུའི་རེ་འདོད་སྐོང་བའི་ལྗོངས་སུ་བློ༷་བཟ༷ང་རིང་ལུགས་ཡིད་བཞིན་ནོར། །

ལུང༷་རིག༷ས་རླབས་ཀྱི་རྩེ་དགས་འགྲེམ་པའི་ཐུགས་རྗེ་མུ་མེད་རྒྱ༷་མ༷ཚོ་གང་། །

མི་ཟད་ཆོས་ཀྱི་ཆབ་རྒྱུན་མཆིས་སོ་ཕངས་མེད་ཕ་ནོར་བུ་ལ་བཞིན། །

བུམ་པ་གང་བྱོའི་ལས་ལ་ཞུགས་ཀྱང་མི་ངོམས་འཚོལ་བའི་སྲེད་འདི་ཅི། །

ལུང་རིགས་མཚན་སྙན་གཡོ་བའི་མཁའ་ལས་སྟོད་གོས་མཚམས་སྤྲིན་ཟོལ་གྱིས་བསྒྱུར། །

ཆོས་རྗེ་གསེར་ཁང་ཡབ་སྲས་རྣམ་ཐར་ལྷུར་བཞེས་ཆོ་ག་སྙན་དུ་སྒྲོན། །

ཆོས་བརྒྱད་འདུ་འཛི་སྲིད་འབྱོར་མཚོ་ལས་ཆོག་ཤེས་ནོར་བུ་གཙུག་ཏུ་འཛིན། །

དབེན་པའི་ཁྲོད་དུ་ཐོས་དོན་བསྒྲུབ་པར་ཏིང་འཛིན་ཞི་བའི་མནལ་དུ་བསྲེལ། །

ཚ་གྲང་དཀའ་ཐུབ་གོས་སུ་བཀླུབས་ཏེ་བཀའ་བསྟན་བྱེ་བའི་བཅུད་ཕྱུང་བ། །

ཆེ་བ་བཞི་ལྡན་ལམ་གྱི་རིམ་པར་དཔྱད་འཇོག་སྒོམ་གྱིས་ཉམས་བཞེས་པས། །

བསྟན་པ་ཐམས་ཅད་འགལ་མེད་ཚུལ་དང་གསུང་རབ་གདམས་པར་འཆར་བའི་གཟིས། །

ཉམས་རྟོགས་ཀློང་དུ་བརྡོལ་བའི་སྤྲིངས་ཡིག་ཕྱོགས་ཀྱི་བུ་མོས་སྒྲོག་ལ་བྲེལ། །

བཤད་སྒྲུབ་གསེར་གྱི་རི་མོ་འབུམ་གྲོལ་སཱ་ལའི་སྨན་ལྗོངས་མཛེས་པའི་རྒྱན། །

རོང་སྟོན་བྱིན་རླབས་འོད་བརྒྱས་སྨིན་པའི་སྐྱེ་དགུའི་པད་དཀར་ཚལ་ཡངས་སུ། །

ལེགས་བྱས་དད་གུས་རླུང་གིས་རབ་འཁྲིགས་ཐུགས་རྗེའི་ཆུ་འཛིན་གདེངས་ཀ་ལས། །

ཟབ་རྒྱས་བདུད་རྩིའི་གྲུ་ཆར་འཇོ་བས་རྫོགས་ལྡན་དཔལ་མོ་མགྲོན་དུ་བཀུག །

དགུང་གྲངས་ཕར་ཕྱིན་ཡོན་ཏན་རྒྱས་དུས་སྔོན་གྱི་རླབས་ཆེན་ཐུགས་བསྐྱེད་བཞིན། །

ལུང་བསྟན་བདེན་པའི་རྟེན་འབྲེལ་ཚོགས་ཀྱིས་བྱང་རྒྱུད་སྐྱེས་རིའི་ཆོས་སྡིངས་སུ། །

གང་ཞབས་ཨུཏྤལ་རི་མོ་གྲོལ་བས་ཕྱོགས་ཀྱི་བུ་མོའི་དཔལ་སྙེམས་པར། །

དཔྱོད་ལྡན་སྐལ་བཟང་ངང་གིས་འདུས་ལ་བརྒྱ་བྱིན་མཚར་བའི་མིག་སྟོང་བགྲད། །

གྲུབ་པའི་བསྟི་གནས་མཚེར་མོ་ཆེ་རུ་བློ་གསལ་དོན་གཉེར་དྲི་བཞོན་མས། །

ཐུགས་རྗེའི་རྒྱ་མཚོ་བསྲུབས་པའི་སྙིང་བཅུད་ཆེ་བ་བཞི་ལྡན་རྫིང་བུའི་ངོགས། །

བྱ་བཏང་ངང་མོ་བདེ་བར་ཞུགས་པས་འཆར་ཅན་མཆོད་མེའི་རླབས་ཕྲེང་གཡོ། །

ལུང་རིགས་སིལ་སྙན་འཁྲོལ་བའི་རྩེ་དགས་མངོན་དགའི་ཞིང་ལ་ཅོ་ཡང་འདྲི། །

འཇམ་མགོན་ཐུགས་ཀྱི་ཟིལ་དངར་འབུམ་ཕྲག་བཅུད་དུ་རྫོགས་པའི་ལམ་རིམ་ཆེ། །

རྡུལ་མང་བརྩེགས་པའི་པདྨའི་སྦུབས་སུ་ནུབ་པའི་མངར་ཁུ་ལྕི་བའི་ཕོན། །

དགེ༷་ལེག༷ས་ལུང་རིགས་འོད༷་ཀྱི་སྣང༷་བ་འགྱེད༷་པ༷འི་ལེགས་བཤད་ཉིན༷་བྱེད༷་ཀྱིས། །

བཞད་པའི་ཡོ་ལང་མཁའ་ལ་འཕྱུར་བ་སྐལ་བཟང་བྱེ་བའི་དཔལ་དུ་བསྐྲུན། །

མིག་མདའ་བགྲང་བྱའི་དཀྱིལ་འཁོར་བཟླུམས་ཚེ་ཙོང་ལར་ཆུ་འཛིན་འཁྱུད་པའི་བྱིན། །

རྗེས་ཆགས་རྨ་ཀླུང་སྒེག་ཉམས་གར་གྱིས་བཀྲ་ཤིས་དགེ་མཚན་འགུགས་པའི་སར། །

གང་ཐུགས་རིན་ཆེན་འབྱུང་གནས་ཀློང་ལས་ལུང་རིགས་རྦ་རླབས་དགུང་ལ་རེག །

འཇམ་དབྱངས་མཚམས་སྤྲིན་གསར་བའི་གཟུགས་ཀྱིས་ཀླུང་བརྒྱ་འཐུང་བའི་ཟློས་གར་རྩེན། །

དྷཱི༷ཿཡིག་ཁམས་ཀྱི་དཀྱིལ་འཁོར་ངོས་སུ་ཐུགས་རྗེའི་ཚ༷་རླབས་གཟི་འོད་ཀྱིས། །

སྡོམ་བརྩོན་གུར་ཀུམ་བཞད་པའི་སྙེ་མ་མཁའ་ལ་སྤུངས་པའི་དགའ་ཚལ་བསྐྲུན། །

བཀྲ༷་ཤིས༷་ཆོས༷་ཚུལ་མཛད་ཕན་སྟོང་གི་རྫོགས་ལྡན་གསར་བའི་རོལ་རྩེད་ཅན། །

བྱང་རྒྱུད་ཙོང་ཁའི་ས་འཛིན་སྡིང༷ས་སུ་ནཱ་ལེནྡྲ་ཡི་སྙེམས་པ་འཛིན། །

སྲིད་ན་ཟབ་རྒུའི་མན་ངག་ཟེར་བརྒྱ་མཁྱེན་དཔྱོད་ཆུ་སྐྱེས་འཐུང་དྲགས་པས། །

ལེགས་བཤད་དྲི་བསུང་ཆུ་མཐོངས་འགོག་མིན་མ་བོས་འདུས་ཚོགས་སྤྲིན་ལ་འཐབ། །

བློ་གསལ་རྐང་དྲུག་འཕྲོ་འདུའི་ཉེར་འཚོ་ཐུབ་བསྟན་དཔྱིད་དཔལ་སྤེལ་བའི་གཉེན། །

པཎ་ཆེན་མཚན་སྙན་གཡོ་བའི་ཅོད་པན་སྤྱི་བོར་གསོལ་བའི་མེ་ཏོག་འཛུམ། །

ཕྱོགས་ཀྱི་དྲེགས་མྱོས་འབུམ་རྒུའི་གཙུག་ཏུ་ཞབས་སེན་འོད་ཚོགས་ངལ་གསོ་བ། །

རྒྱལ༷་བ༷་ཀུན་གྱི་བརྩེ་བའི་རང་གཟུགས་ཐུབ༷་བསྟན༷་རྒྱ༷་མཚོ༷འི་མངའ་བདག་ཀྱང་། །

རལ་བའི་འདབ་བརྒྱ་བརྩེགས་པའི་ཁྲི་ལ་གང་ཞབས་འཁོར་ལོའི་མཚན་རིས་ཅན། །

གཡོ་མེད་བརྟན་པར་བཞུགས་སུ་གསོལ་བས་བཀའ་ཡི་རྩེད་འཇོ་རོལ་བར་རྩོམ། །

འཇམ་དཔལ་མི་རུ་ཟློས་པའི་ལྟེ་མཚལ་བདུད་རྩི་ས་ལ་འཕོ་བ་ལས། །

རྒྱལ་སྐུ༷་མེ་ཏོག་འབུམ༷་སྡེ་བཞད་པའི་ཙན་དན་མཆོད་སྡོང་གྲུབ་པའི་སར། །

རྒྱལ་བའི་དབང་བོ་འཁོར་ཚོགས་དབུས་སུ་ཐུགས་རྗེའི་ལྗགས་ཡངས་ཀུན་གསལ་ལས། །

དགེ་ལེགས་འོད་སྣང་འགྱེད་པའི་ཉིན་བྱེད་བློ་ཚལ་བཞད་པའི་སྐྱེས་སུ་སྤྲོས། །

མཁྱེན་དཔྱོད་ལུས་རྩལ་སྟོབས་ཀྱིས་རབ་དྲེགས་སྒྲ་ཚད་སྡེར་སེན་གཡོ་བའི་གར། །

མ་མཐོང་ན་ཡང་མི་བཟད་ང་རོས་ཕྱོགས་ཀྱི་རྒོལ་ངན་གླང་བོའི་ཚོགས། །

མྱོས་བུམ་དུམ་བུར་བཀས་པའི་འཐོར་རུས་ས་ལ་ཀུན་དའི་ཕོན་པོར་འཁྲུལ། །

ཕྱོགས་གླང་མཚན་སྙན་འདར་བར་སེམས་པས་འཕགས་ཡུལ་མྱ་ངན་ཚལ་དུ་བཀོད། །

སྙན་རྒྱུད་འབུམ་གྱི་རྦ་རླབས་ཕྱོགས་རྫོགས་དབྱངས་ཅན་རིག་པའི་ལན་གསུམ་ཆབ། །

མགྲིན་པའི་གཤོང་དུ་འཁྱིལ་བ་ལས་སྐྱེས་མདོ་རྒྱུད་དགོངས་དོན་བཀྲལ་བའི་འདབ། །

གྲོལ་བའི་མེ་ཏོག་རྒྱུ་སྐར་ཚོམ་བུ་བདུད་རྩིར་འགྲེམ་པའི་ཆ་རེ་ཡང་། །

མཁས་རྒུའི་བཞིན་གྱི་འཛུམ་དཀར་འོད་བརྒྱས་དགེ་དབང་དཔལ་གྱི་པདྨོ་བཅོམ། །

དགེ༷་ལེགས་འདུན༷་ཆེན་བྱེ་བའི་ཕུང་བོ་རྒྱལ་བསྟན༷་སྲིད་པའི་མིག་གཅིག་པུ། །

ཐུགས་བསྐྱེད་རྟ་བདུན་ཤིང་རྟས་ཉེར་དྲངས་རིན་ཆེན་འཛིན༷་མའི་ཐིག་ལེའི་གཞིར། །

ཟབ་རྒྱས་ལེགས་བཤད་སྣང་བའི་ཟེར་ཕྲེང་རྒྱ༷་མཚོ༷འི་སྲིད་མཐར་བརྡལ་བ་ལས། །

འཚོ་བའི་ཀུན་རིག་བུ་སློབ་ཚོགས་ཀྱིས་རྒྱུ་སྐར་གྲངས་ཀྱི་དཔལ་ལ་འཁུ། །

གཅིག་ལས་གཅིག་ལྷག་འགྲན་པའི་རྩེ་དགའ་སྒྱུ་མའི་གར་གྱི་དགྲ་ཟླར་རྩེན། །

སྡེ་བཞིའི་ཕུན་ཚོགས་དབྱར་གྱི་དགེ་མཚན་གཡེར་མོ་ཐང་ལ་མངོན་འཕོས་པས། །

རྒྱལ་རྣམས་སྐུ་བཞིའི་བང་མཛོད་བོར་ནས་མཁའ་ལ་སྤྲིན་དཀར་ཟོལ་གྱིས་འཁྲིགས། །

ཚད་མེད་ལེགས་བྱས་ཟོང་གིས་རྙེད་པའི་མགོན་ཁྱོད་གཙུག་རྒྱན་དུ་མས་ཀྱང་། །

ཁྱོད་ཡོན་ལུས་ཀྱི་ལང་ཚོ་ལ་ཆགས་ཟླ་སེན་ཟུར་ཕུད་མཛའ་བས་བཅིངས། །

ཟབ་རྒྱས་བཅུད་ལྡན་གཏང་རག་ཡོན་གྱིས་དགའ་བདེས་མྱོས་པའི་དཔལ་ཐོབ་པས། །

གསེར་ལྡན་མཛེས་མའི་འཛུམ་པ་ཤོར་བས་གངས་རིའི་མཆེ་བར་རང་འོད་འབར། །

ལས་ཉོན་ལྕེ་གཉིས་ཁ་རླངས་འཁོལ་བའི་འཇིགས་རུང་སྲིད་པའི་དུག་ཅན་མཚོར། །

བྱིང་བའི་བུ་ལ་སྙོམས་པའི་བྱམས་བརྩེ་གྲུ་འཛིན་བདག་པོར་ཆེས་མཉམ་ཡང་། །

ཤེས་བྱ་མཁྱེན་པའི་ཆ་ཤས་ལ་ནི་བློ་གཏེར་ར་བ་ལས་འགོངས་པས། །

རིགས་གསུམ་ནོངས་པས་ཙོང་ཁའི་ཡུལ་དུ་བྱིས་པའི་གཟུགས་ཀྱི་ཟོལ་ལ་བརྟེན། །

ཆེར་སྙིགས་རྟ་ལྗང་ཅན་གྱིས་འདྲེན་པའི་འཇམ་མགོན་རྒྱལ་བསྟན་ཨཱ་དིའི་བུ། །

ཆུ་ལྷའི་ཕང་བར་མནལ་ཐབས་ཆགས་ཀྱང་གང་ཐུགས་མཁྱེན་བརྩེའི་རླུང་ཤུགས་ཀྱིས། །

སླར་ཡང་ཤར་རིའི་ཕྲག་ལ་བསུས་པས་ཕན་བདེའི་དགའ་ཚལ་རྒོད་པའི་གཟིས། །

བསྟན་པ་འཇིག་པའི་བཀའ་ལུང་ས་མོས་བསླུ་བའི་ཆོས་ཀྱི་གནས་སུ་དོགས། །

ཁྱོད་ཞབས་གུར་ཀུམ་འཛུམ་པའི་རི་མོ་མ་བྲིས་དབྱིག་འཛིན་གང་ཞིག་མཆིས། །

དགེ་ལེགས་མེ་ཏོག་གྲོལ་བའི་རྡུལ་རེར་ལྔ་ལྡན་ཞིང་གི་དཔལ་རྫོགས་པས། །

སྐྱེ་དགུའི་ལེགས་བྱས་མཆོད་སྡོང་ལྗིད་ཀྱིས་འཛིན་མས་ཐེག་པའི་ངོ་མཚར་སྙན། །

ན་དར་གཞོན་ནུ་མྱོས་པའི་གར་གྱིས་ཀུན་གསལ་བུ་མོའི་མཐའ་ལ་འཁྱུད། །

ཆོས་སྲིད་འབྱོར་བས་སྲིད་ན་དྲེགས་ཀྱང་དད་རྫས་ལོངས་སྤྱོད་སྒྱུ་མའི་ནོར། །

དབུལ་ཕོངས་སྦྱིན་གཏོང་ཞིང་སར་བསྔོས་ཏེ་བྱ་བྲལ་དམན་པའི་བརྟུལ་ཞུགས་ཀྱིས། །

ལྟོ་སྐྱ་གོས་ཧྲུལ་གཉོམ་ཆུང་མཛད་རྣམ་འདི་སྣང་སྐུ་ཚེའི་མཐའ་འཁྱོལ་བས། །

མཛད་འཕྲིན་འོད་དཀར་ཡོངས་ལ་བསིལ་བར་བསམ་གྱིན་དད་པའི་འོ་འཚོ་འཕྱུར། །

ལས་ཉོན་ཆུ་སྲིན་ཁྲོས་པའི་གྲོང་འཇོམས་མི་ཤིགས་རྡོ་རྗེའི་སྐུ་བརྙེས་ཀྱང་། །

རྟག་འཛིན་བསླུ་བྲིད་རང་མཚང་སྟོན་སླད་སྙུན་ཚུལ་སྤྲིན་གྱི་སྒྲིབ་གཡོགས་བསྟེན། །

ཀུན་འདུས་རྟག་བརྟན་གསོལ་བའི་སྙིང་བོ་སྤྲིན་གྱི་སྒྲ་ཡིས་མཆོད་ན་ཡང་། །

དགེ་ལེགས་བྱེ་བའི་མཛོད་ཀྱི་ཟླ་ཤེལ་ཆུ་ལྷའི་མལ་དུ་མནལ་བར་བརྩོན། །

དགུང་གྲངས་ཟླ་མཚམས་དཀྱིལ་འཁོར་རྒྱས་པ་གྲོ་ཞུན་ཟླ་བའི་དགའ་གཉིས་པར། །

དབེན་གནས་རི་ཁྲོད་བཀྲ་ཤིས་རྩེ་རུ་རགས་པའི་སྐྱེ་མཆེད་ཉེར་བསྡུས་ཏེ། །

རེ་ཞིག་དགོངས་པ་སྤྱན་རས་གཟིགས་ཀྱི་ཐུགས་ཀྱི་དྲ་བར་ཡོངས་སིམ་པས། །

མྱ་ངན་སྲིན་མོ་དྲག་ཏུ་ཁྲོས་པས་ཀུན་གྱི་སྙིང་རྩ་རིམ་གྱིས་ཟོས། །

ཀྱེ་ཧུད་ལེགས་བཤད་གཏེར་གྱི་ནོར་བུ་ཞིང་གཞན་ཀླུ་དབང་རྒྱལ་བོས་ཞུས། །

རྔ་མོང་རྔེའུ་སྟོར་བ་ཇི་བཞིན་སློབ་ཚོགས་མྱ་ངན་བརྩེགས་པའི་སྟེང་། །

ཐུགས་ལྗགས་སྤྱན་གསུམ་བབས་པའི་གདུང་རྟེན་རྗེས་འཛིན་བུ་ལ་བསྩལ་ན་ཡང་། །

བདེ༷་ཆེན༷་དབང་ཤེད་བཙན་གྱིས་འཕྲོགས་པའི་ལས་འདི་བརྩེ་ལྡན་སུ་ཞིག་ཕོད། །

གདུལ་ཞིང་གངས་རི་མཛེས་པའི་ལྗོངས་ན་བཤད་སྒྲུབ་དབུལ་བའི་དུཿཁས་མྱོས། །

གོང་ས་པད་དཀར་འཆང་བ་མཆོག་གི་ཐུགས་ལ་མྱ་ངན་བྱེ་བས་མནར། །

བཀའ་སློབ་ཉི་ཟེར་རྡུལ་དུ་འཁྲིགས་པས་དགོངས་པ་རྫོགས་པའི་སྲི་ཞུའི་ནོར། །

མཆོད་ཚོགས་སྤྲིན་ཕུང་འཛུམ་པའི་ཀློང་ལས་གསང་གསུམ་འཛུམ་ཞལ་སྟོན་ལ་རེ། །

སྐྱེ་དགུའི་ལེགས་བྱས་ཡངས་པའི་མཁའ་ལ་ཡང་སྤྲུལ་ཟླ་གཞོན་འཛུམ་གྲོལ་བ། །

བློ༷་གྲོས་མཁྱེན་བཟ༷ང་ཆ་ཤས་ཡོངས་གང་བཤ༷ད་སྒྲུབ༷་ལེགས་མཛད་འོད་དཀར་སྤྲོ། །

བསྟན༷་འཛིན༷་ཀུ་མུད་རྒྱ༷་མཚོ༷འི་དགའ་ཚལ་ལྷུག་པར་གྲོལ་བའི་བྱིན་ཆགས་པས། །

བསྟན་དང་འགྲོ་བའི་དཔུང་གཉེན་གཅིག་པུ་རྒྱལ་རྣམས་ཁྱོད་ལ་གཅིག་ཏུ་བདམས། །

གང་ཞིག་སྐུ་ཐུགས་གྱེས་པའི་དབྱིངས་ལས་མྱ་ངན་སྨག་ཆེན་མཐའ་རུ་ཟིན། །

གདུང་རྟེན་ཞུགས་ཀྱི་མཆོད་པར་ཕུལ་ཀྱང་བརྩེ་ཞགས་འོད་ཀྱིས་བཅིངས་པའི་བརྡར། །

རང༷་བྱུང༷་མཁ༷འ་སྤྱོད༷་དབ༷ང་མོ༷འི་སྐུ་བརྙན་ཐུགས་ལྗགས་སྤྱན་གྱི་ཟ་མ་ཏོག །

རྟེན་དུ་འཕོས་པའི་མཆོད་སྡོང་ཆེན་པོས་གདན་ས་མཁའ་སྤྱོད་ཞིང་དུ་བསྒྲུབས། །

སྐྱེ་ཕྲེང་ཕར་ཕྱིན་ས་ལ་སྤྱོད་པའི་ཕྱག་ན་པདྨོའི་རྩེ་དགའ་ཅན། །

བློ༷་བཟ༷ང་སྲིད་ལ་འཇི༷གས་བྲལ་མཚུངས་མེ༷ད་དགེ་ལེགས་སྨྲ་བའི་ཉི་མ་བཞིན། །

འཇམ་མགོན་བསྟན༷་པའི་གོས་བཟང་ཡུག་གཅིག་ནོར་འཛི༷ན་དཔལ་མོའི་ལུས་མཛེས་པས། །

ཡང་དར་མཛའ་བོར་གཉེན་དུ་བསྡེབས་པས་རྫོགས་ལྡན་རྒྱ༷་མཚོ༷འི་དུས་སྟོན་བསུས། །

སྤྲུལ་རབས་ཐུབ་པའི་རྒྱལ་ཐབས་ལ་རོལ་བསྟ༷ན་ལ་མཛའ་བའི་མེ་ཏོག་སྤེལ། །

འཛིན༷་མར་དགེ༷་མཚན་སྤེལ་ལ་འདུན༷་པའི་ཕུལ༷་བྱུང༷་ཐུགས་བསྐྱེད་མཐུ་བརྟས་པས། །

ཕ་རྒོད་གོང་མའི་མཛད་ཆེན་གདུགས་དཀར་གྱེན་དུ་འདེགས་པའི་གྲིབ་བསིལ་སྨན། །

ལུས་ཅན་རྒྱ༷་མཚོ༷འི་དཔྱིད་དུ་སྨིན་པའི་འཕྲིན་ལས་ནམ་མཁའི་མཐར་ཁྱབ་ཤོག །

ཚུལ་འདིས་སྤྱན་རས་གཟིགས་ཀྱི་སྤྲུལ་རབས་ཕྱག་མཚན་བཞེས་པའི་བསྟི་གནས་སུ། །

འཇམ་དཔལ་ལི་ཁྲིའི་མཚོ་མོར་ཞུགས་ནས་སྡོམ་ལྡན་བྱུ་རུ་འཁྲིགས་པའི་ཚལ། །

རིག་པ་རིན་ཆེན་སྣ་ལྔའི་འོད་འཁྱུད་བཀྲ༷་ཤིས༷་ཆོས༷་ཀྱི་ཚོང་རྡལ་ཆེ། །

འདུན་ལྡན་དོན་མཐུན་ཁྱུ་ཚོགས་སྡིང༷ས་སུ་སྣ་ཚོགས་འབྱོར་བས་ཚིམ་གྱུར་ཅིག །

གང་ཞིག་རྟོག༷ས་པ་ཀློང་དུ་བརྡོལ་བའི་རྒྱ་མཚོའི་ཆུ་ཐིགས་ཟགས་པའི་ཆར། །

བསྔགས་བརྗོད༷་དད༷་གསུམ༷་འདྲེན་པའི་བདུད་རྩི་དབྱངས་ཅན་ང༷ག་གི༷་རོལ༷་མོ༷་གང་། །

ཐོས་འཛིན་དཔྱིད་དུ་ལྷུང་བ་ཇི་སྙེད་དགྱེས་འཛུམ་ལང་ཚོ་འཕེལ་བའི་མོད། །

རང་སེམས་ཐར་བའི་ལམ་ལ་བཀྲི་བར་བླ་མ་ལྷ་ཡིས་བྱིན་ཕོབས་ཤིག །

ཁྱོད་ཡོན་བསྔགས་པའི་ག་བུར་རྒྱུན་བཟང་སྲས་བཅས་ལེགས་བྱས་མ་དྲོས་ཀླུང་། །

གཅིག་ཏུ་གཡས་སུ་འཁྱིལ་བའི་ངོགས་སུ་ཡིད་ཅན་དྲི་མ་ཀུན་བཀྲུས་ཏེ། །

དོན་གཉེར་ཕུན་ཚོགས་དཔལ་ལ་སྤྱོད་ཅིང་བདག་གི་ཚེ་རབས་པདྨོའི་ཕྲེང་། །

གང་ཞབས་འོད་ཀྱི་རོལ་རྩེད་དང་འགྲོགས་གསང་གསུམ་ཟིལ་དངར་འབྲལ་མེད་ཤོག །

ཕན་བདེ་འབྱུང་གནས་རྒྱལ་བསྟན་སྤྱི་དང་ཁྱད་པར་བྱང་རྒྱུད་གྲྭ་གཅིག་ན། །

སཾ་གྷའི་ཞབས་ཀྱི་རིག་པའི་ཚལ་ལས་བློ་གྲོས་རྩལ་གྱིས་རྩེན་པའི་ཁྱུ། །

ཐུགས་མཐུན་ཁྲིམས་གཙང་ཆོས་སྤྱོད་ཉམས་བཞེས་བཤད་སྒྲུབ་སྲིད་ལ་སྤྱོད་པ་ཡིས། །

དགེ་ལྡན་ལུགས་བཟང་འོད་ཀྱི་དྲ་བ་སྲིད་ཞིའི་མཐའ་ལ་རེག་གྱུར་ཅིག །

ཅེས་བྱ་བ་ནི་བར་སྐབས་ཀྱི་བསྡུ་བའི་ཚིགས་སུ་བཅད་པའོ། །

ཞེས་གདན་རབས་དཔག་བསམ་འཁྲི་ཤིང་གི་ཐོག་མར་དགེ་བ་སྔོན་རབས་གཏམ་གྱི་ཆོས་སྡེ་ཆེན་པོའི་ས་བོན་གསར་དུ་འཛུམ་པའི་ཚུལ་ལས་ཐོག་མར་ཕྱག་འདེབས་མཛད་པ་བོའི་རྣམ་པར་ཐར་བ་བརྗོད་པའི་ཡལ་འདབ་སྟེ་དང་བོའོ། །

ཞེས་པ་འདི་ནི་དྷཱིཿཚ་བཀྲ་ཤིས་ཆོས་སྡིངས་ཀྱི་གྲྭ་རིགས་སེང་གཤོང་དགེ་འདུན་འཇིགས་མེད་ཀྱིས་བྲིས་པ་དགེའོ།།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn