བཀའ་གདམས་པའི་སྲོལ་གཏོད་པ་པོ།བཀའ་གདམས་ཀྱི་མེས་པོ་ཇོ་འབྲོམ་ཡབ་སྲས་གསུམ་གྱི་ཡ་གྱལ་ཡིན་ལ།ཁུ་རྔོག་འབྲོམ་གསུམ་གྱི་ཡ་གྱལ་ཡང་ཡིན།རྗེ་འདི་ཉིད་ཡབ་རྟ་གསུམ་སྐུ་གཤེན་དང་ཡུམ་ཁུ་འོད་བཟའ་གཉིས་ཀྱི་སྲས་སུ་བོད་ཤིང་འབྲུག་(སྤྱི་ལོ་1004)ལོའམ་ཤིང་སྦྲུལ་(སྤྱི་ལོ་1005)ལོར་སྟོད་ལུང་ཕུར་སྐུ་འཁྲུངས།

དགུང་ལོ་བཅུ་གསུམ་ཙམ་ལ་དགེ་བཤེས་གཡུང་ཆོས་མགོན་བྱ་བས་ཀློག་ཡིག་བསླབས།དགུང་ལོ་བཅུ་བདུན་ལོར་ཇོ་བོ་སེ་བཙུན་ཁམས་ནས་རྒྱ་གར་ལ་བྱོན་པ་དང་མཇལ་བས་དད་པ་སྐྱེས་ཏེ་ཐུགས་རྗེ་ཆེན་པོ་ཡི་གེ་དྲུག་པའི་གདམས་པ་ཞུས།དེ་ནས་འབྲོམ་གྱིས་རྒྱལ་གྱི་ཞང་སྣ་ནམ་རྡོ་རྗེ་དབང་ཕྱུག་ལས་དགེ་བསྙེན་གྱི་སྡོན་པ་མནོས་ཏེ་མཚན་རྒྱལ་བའི་འབྱུང་གནས་སུ་གསོལ།

དགུང་ལོ་བཅུ་དགུ་ལོར་བླ་མ་སེ་བཙུན་མཇལ་བར་མདོ་ཁམས་འདན་མའི་ཡུལ་དུ་ཚོང་པ་དང་འགྲོགས་ནས་བྱོན་ཏེ་སེ་བཙུན་དང་མཇལ་འཛོམས་བྱུང་བ་དེ་ནས་བཟུང་བསམ་སྤྱོད་གཉིས་ཀྱི་སྒོ་ནས་ཚུལ་བཞིན་དུ་བསྟེན་ཏེ་མདོ་སྔགས་ཀྱི་ཆོས་གཞུང་མཐའ་ཡས་པ་ལ་སྦྱོང་བརྩོན་མཐར་ཕྱིན་པ་གནང་ཞིང་།དགེ་འདུན་བྱིངས་མའི་ཁྲོད་དུ་བགྲོ་གླང་མཛད་པར་སུས་ཀྱང་ལན་འདོན་སྤོབས་པར་མ་ནུས་ནས་མཁས་པའི་ཕུལ་དུ་ཕྱིན་པར་གྲགས།དེའི་དུས་སུ་ཁུ་སྟོན་བརྩོན་འགྲུས་གཡུང་དྲུང་དང་།རྔོག་ལེགས་པའི་ཤེས་རབ་གཉིས་ཀྱང་ཆོས་གྲྭ་དེར་བཞུགས་པས་ཁུ་རྔོག་འབྲོམ་གསུམ་ཞེས་པའང་ཐོག་མ་ཁམས་སུ་གྲགས་པ་ཡིན།

དེ་ནས་འབྲོམ་གྱིས་པཎྚི་ཏ་ཚེར་མ་དང་སྨྲི་ཏི་གཉིས་ཕྱོགས་དེར་བྱོན་པ་ལས་སྒྲ་རིག་པ་དང་སཾསྐྲྀ་ཏའི་སྐད་ཡིག་བསླབས་པས་ལེགས་པར་མཁྱེན།དེ་ལྟར་འབྲོམ་གྱིས་མདོ་ཁམས་སུ་བླ་མ་སེ་བཙུན་གྱི་སྤྱན་སྔར་ཁྱོན་ལོ་ཉི་ཤུ་བཞུགས་ཤིང་།མདོ་སྔགས་ཀྱི་ཆོས་མང་དུ་གསན་ཏེ་མཁས་པའི་ཕུལ་དུ་ཕྱིན་ནས་དགེ་བསྙེན་ཆོས་འཕེལ་དུ་གྲགས་པ་བྱུང་།

རབ་བྱུང་དང་པོའི་ཆུ་རྟ་འམ་ཤིང་སྤྲེལ་(སྤྱི་ལོ་1042སམ་1044)ལོར་ཇོ་བོ་རྗེ་ཨ་ཏི་ཤ་མངའ་རིས་པུ་ཕེབས་པ་གསན་ཏེ་ཁམས་ནས་ཞབས་ཐང་གིས་མངའ་རིས་ཕེབས།སྤུ་རངས་སུ་ཇོ་བོ་དང་མཇལ་ཞིང་བླ་མར་བསྟེན།དེ་ནས་འབྲོམ་གྱིས་ཇོ་བོ་དབུས་སུ་གདན་དྲངས་ཏེ་བཀའ་ཆོས་མང་དུ་གསན།ཇོ་བོ་ཡབ་སྲས་ཀྱི་གསང་ཆོས་བཀའ་གདམས་གླགས་བམ་དུ་གྲགས་པ་དེ་ཇོ་བོ་རྗེས་ཁུ་རྔོག་འབྲོམ་གསུམ་ལ་ཡེར་པ་ལྷ་རི་སྙིང་པོའི་མགུལ་དུ་གནང་བ་ཞིག་སྟེ་ཕ་འབྲོམ་སྟོན་པས་ཞུས་པ་ལ་བཀའ་གདམས་ཕ་ཆོས་སུ་གྲགས།དེ་ལྟར་འབྲོམ་གྱིས་ཇོ་བོ་མཇལ་བ་ནས་ཞི་བར་མ་གཤེགས་བར་ཟླ་བ་གཉིས་མ་གཏོགས་སྐད་ཅིག་ཀྱང་བྲལ་མ་མྱོང་གསུངས།ཇོ་བོ་རྗེ་སྐུ་མྱ་ངན་ལས་འདས་རྗེས་ཇོ་བོའི་འདས་མཆོད་རྒྱ་ཆེར་མཛད་ནས་སྐུ་གདུང་དངུལ་གྱི་མཆོད་རྟེན་དུ་བཞུགས་སུ་གསོལ།

རབ་བྱུང་དང་པོའི་ཤིང་ལུག་(སྤྱི་ལོ་1055)ལོར་འབྲོམ་སྟོན་པ་དང་སྐ་བ་ཤཱཀྱ་དབང་ཕྱུག་སོགས་ཀྱིས་ཇོ་བོ་རྗེ་སྐུ་གཤེགས་ནས་ལོ་གཅིག་སོང་བའི་སྐུ་མཆོད་དུ་སྙེ་ཐང་སྒྲོལ་མ་ལྷ་ཁང་ཐོག་བརྩེགས་གཉིས་ལྡན་ཞིག་བཞེངས་ཤིང་།འོག་ཁང་གི་ལྷ་ཁང་དཀྱིལ་མའི་ནང་དུ་གཙོ་བོར་ཇོ་བོ་རྗེའི་ཐུགས་དམ་གྱི་རྟེན་རྗེ་བཙུན་སྒྲོལ་མའི་སྐུ་ལི་མ་སོགས་བཞུགས་སུ་གསོལ།

དེ་ནས་འབྲོམ་གྱིས་ཇོ་བོའི་བཀའ་བཞིན་རབ་བྱུང་དང་པོའི་མེ་སྤྲེལ་ལམ་མེ་བྱ་(སྤྱི་ལོ་1056གམ་1057)ལོར་རྭ་སྒྲེང་དགོན་པ་ཕྱག་བཏབ་པ་ནས་བཟུང་ཇོ་བོ་རྗེའི་བཞེད་སྲོལ་དར་སྤེལ་བྱུ་བའི་ཆོས་ལུགས་ལ་བཀའ་གདམས་པ་ཞེས་སུ་གྲགས་ཤིང་།དེ་ནི་འབྲོམ་སྟོན་པ་རྒྱལ་བའི་འབྱུང་གནས་ཀྱིས་སྲོལ་གཏོད་པ་ལགས།ཇོ་བོའི་སློབ་མ་རྣམས་ཀྱང་འབྲོམ་གྱིས་ཆོས་དང་འཚོ་བ་གཉིས་ཀའི་སྒོ་ནས་བསྐྱངས་ཏེ་བཀའ་གདམས་པའི་བསྟན་པའི་བདག་པོར་གྱུར།འབྲོམ་ནི་དགེ་བསྙེན་ཡིན་ཡང་བསླབས་ཁྲིམས་བསྲུང་བ་ལ་དགེ་སློང་ལས་ལྷག་པར་མཛད།

མཐར་འབྲོམ་སྟོན་པ་དགུང་ལོ་དྲུག་ཅུ་བཞེས་པ་རབ་བྱུང་དང་པོའི་ཆུ་ཡོས་སམ་ཤིང་འབྲུག་(སྤྱི་ལོ་1063མམ1064)ལོར་རྭ་སྒྲེང་དུ་སྐུ་གཤེགས།སྲས་ཀྱི་ཐུ་བོ་པོ་ཏོ་བ་རིན་ཆེན་གསལ་བ་དང་།སྤྱན་སྔ་བ་ཚུལ་ཁྲིམས་འབར་བ།ཕུ་ཆུང་བ་གཞོན་ནུ་རྒྱལ་མཚན་གཙོ་བྱས་པའི་སློབ་མ་མཁས་གྲུབ་ཕུལ་དུ་བྱུང་བ་མང་པོ་ཡོད་དོ། །

གངས་ལྗོངས་ལོ་རྒྱུས་ཐོག་གི་གྲགས་ཅན་མི་སྣ་ ལས་བསྡུ་སྒྲིག་བྱས།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn