ཀོའུ་བ་ཆོས་ཀྱི་རྒྱ་མཚོའི་རྣམ་ཐར་ཚིགས་བཅད་མ་བཞུགས་སོ།།
ཀུ༵ན་བཟང་ཀུ༵ན་གྱི་རང་བཞིན་ཆོས་ཀྱི་དབྱིངས། ། ག༵ང་ཐུགས་ག༵ང་གིས་མཉམ་པར་བཞག་པའི་ཚེ། ། སྟོ༵ང་སང་སྟོ༵ང་བའི་ངང་དུ་ལེགས་འཆར་བའི། ། བླ༵་མེད་བླ༵་མ་རྒྱ་མཚོས་བདག་སྐྱོངས་ཤིག། བླ་མའི་འཁྲུངས་ཡུལ་གངས་ཅན་ཤར་གྱི་ཕྱོགས། ། མདོ་སྨད་ཁྲི་ཀའི་ཨར་རྐོང༼ དེང་སྐབས་མདོ་སྨད་ཁྲི་ཀ་འོག་མ་ཞེས་གྲགས་པའི་གཅན་ཚ་རྫོང་གདོང་སྣ་གྲོང་རྡལ་སྐར་མ་ཐང་སྡེ་བ་ཡིན། ༽ས་ཆ་རུ། ། བསོད་ནམས་རིན་ཆེན་པདྨ་མཚོ་གཉིས་ཀྱི། ། སྲས་སུ་བསམ་བཞིན་འཁྲུངས་ལ་གསོལ་བ་འདེབས། ། མངལ་དུ་བཞུགས་ཚེ་ཡུམ་གྱི་ལུས་བདེ་ཞིང་། ། སེམས་ལ་དགའ་རྒྱས་རྨི་ལམ་གནས་སྐབས་སུ། ། དུང་གི་སྐ་རགས་འཆིང་བ་ལ་སོགས་པའི། ། ཡ་མཚན་ལྟས་མང་བསྟན་ལ་གསོལ་བ་འདེབས། ། གཞོན་ནུའི་དུས་ནའང་དཀོན་མཆོག་རྟེན་རྣམས་དང་། ། རབ་བྱུང་ལ་མོས་ན་བཟའི་ཚལ་བུ་ཡང་། ། སྤྱི་བོར་འཇོག་ཅིང་སེར་གཟུགས་འཛིན་ཙམ་ཡང་། ། མཐོང་ནས་དད་ཕྱག་མཛད་ལ་གསོལ་བ་འདེབས། ། ལོ་བདུན་བཞེས་ཚེ་ཁྱིམ་ནས་ལེགས་ཐོན་ནས། ། གོང་མ་ཆོས་རྗེ་ཆོས་ཀྱི་རྒྱལ་མཚན་གྱིས། ། རབ་ཏུ་བྱུང་ནས་ཆོས་ཀྱི་རྒྱ་མཚོ་ཞེས། ། མཚན་གསོལ་གཅེས་པར་བསྐྱངས་ལ་གསོལ་བ་འདེབས། ། རབ་ཏུ་བྱུང་ནས་བཅུ་དྲུག་བར་དག་དུ། ། མཁན་པོ་བསྟེན་ནས་ཡི་གེ་འབྲི་ཀློག་དང་། ། ཁ་ཏོན་འཛིན་གཤར་བསྙེན་སྒྲུབ་སོགས་འབད་པས། ། ཀུན་གྱིས་ཆེས་ཆེར་བསྔགས་ལ་གསོལ་བ་འདེབས། ། བཅུ་བཞི་བཞེས་ཚེ་ཤར་ཕྱོགས་ཙོང་ཁ་རུ། ། སྤྲུལ་སྐུ་བསོད་ནམས་རྒྱ་མཚོའི་ཞབས་དྲུང་དུ། ། དགེ་ཚུལ་བསྒྲུབ་ནས་ཁས་བླངས་སྡོམ་ཁྲིམས་ལ། ། རྟག་ཏུ་གཅེས་སྤྲས་མཛད་ལ་གསོལ་བ་འདེབས། ། བཅུ་བདུན་བཞེས་ཚེ་གངས་ཅན་དབུས་སུ་བྱོན། ། ཇོ་ཤྰཀ་སོགས་མཇལ་དགེ་ལྡན་ཆོས་སྡེ་རུ། ། རྔོག་ལོའི་རྣམ་འཕྲུལ་བྱམས་པ་རྒྱ་མཚོ་ཡིས། ། སླར་ཡང་དགེ་ཚུལ་བསྒྲུབ་ལ་གསོལ་བ་འདེབས། ། གནས་དེར་རྒྱལ་སྲས་དམ་ཆོས་དཔལ་འབར་དང་། ། ཐམས་ཅད་མཁྱེན་པ་ནམ་མཁའ་རྒྱལ་མཚན་སོགས། ། རྩོད་མེད་མཁས་གྲུབ་དུ་མའི་ཞབས་གཏུགས་ནས། ། དམ་ཆོས་མང་དུ་གསན་ལ་གསོལ་བ་འདེབས། ། ཁྱད་པར་འབྲས་སྤུངས་སྒོ་མང་ཆོས་གྲྭ་རུ། ། ཆུ་བཟང་ཆོས་རྗེ་བྱམས་པ་ལྷུན་གྲུབ་ལ། ། བསྡུས་པའི་ཟིན་ཐུན་ཕར་ཕྱིན་ཐལ་ཕྲེང་སོགས། ། ཞིབ་ཏུ་གསན་ཅིང་བསླབ་ལ་གསོལ་བ་འདེབས། ། མགོན་དེའི་དྲིན་ལས་མི་ཕམ་གསུང་གི་བཅུད། ། མངོན་རྟོགས་རྒྱན་གྱི་གཞུང་དོན་གདམས་པ་རུ། ། ལེགས་པར་ཤར་བས་སེང་བཟང་གཉིས་པ་ཞེས། ། གཟུར་གནས་མཁས་ཀུན་བསྟོད་ལ་གསོལ་བ་འདེབས། ། དེ་ནས་ཞྭ་དམར་བརྩོན་འགྲུས་རྒྱ་མཚོ་ལ། ། དབུ་མ་འདུལ་མཛོད་ཐལ་སྤྱི་མང་གསན་པའི། ། དཀའ་ཆེན་ཕྱི་མ་རྣམས་ཀྱི་དཀའ་གནས་ལ། ། མཁྱེན་རབ་ཐོགས་མེད་རྒྱས་ལ་གསོལ་བ་འདེབས། ། ཉེར་དྲུག་བཞེས་ཚེ་འབྲས་སྤུངས་དགོན་པ་རུ། ། ཕར་ཚད་གཉིས་ལ་གླིང་བསྲེས་མཛད་པའི་ཚེ། ། རྩོད་ཟླ་ཟིལ་མནན་དཔང་བཞུགས་མཁས་པའི་ཚོགས། ། དབང་མེད་རངས་པར་མཛད་ལ་གསོལ་བ་འདེབས། ། ཉེར་བདུན་བཞེས་ཚེ་གཙང་གི་ཕྱོགས་སུ་བྱོན། ། ཆོས་སྡེ་མང་མཇལ་ཁྱད་པར་གངས་ཅན་དུ། ། ཚད་མའི་ཕྱོགས་ལ་ཞིབ་དུ་སྦྱངས་པའི་མཐུས། ། ཆོས་གྲགས་གཉིས་པར་གྲགས་ལ་གསོལ་བ་འདེབས། ། དེ་རྗེས་བྱང་ཕྱོགས་ངམ་རིང་ཆོས་སྡེ་རུ། ། རྣམ་འགྲེལ་ལ་སོགས་བཀའ་པོད་མང་པོ་ལ། ། འཆད་དང་རྩོད་པའི་སྒོ་ནས་རབ་འབྱམས་ཀྱི། ། མཚན་གསོལ་མཚན་དོན་མཐུན་ལ་གསོལ་བ་འདེབས། ། ཉེར་བརྒྱད་བཞེས་ཚེ་དབེན་པའི་དགོན་པར་ཕེབས། ། རྡོ་རྗེ་འཆང་དབང་པཎ་ཆེན་ཐམས་ཅད་མཁྱེན། ། མཇལ་བས་སྔོན་གྱི་བླ་མར་རྗེས་དྲན་པས། ། སངས་རྒྱས་འདུ་ཤེས་འཁྲུངས་ལ་གསོལ་བ་འདེབས། ། མགོན་པོ་དེ་ཡིས་བདེ་གསང་འཇིགས་གསུམ་སོགས། ། དབང་དང་རྗེས་གནང་ཟབ་མོས་སྨིན་བྱས་ནས། ། སྙན་བརྒྱུད་གདམས་པར་ཐུགས་རྒྱུད་བཀང་བ་ལས། ། གདམས་པའི་གཏེར་དུ་གྱུར་ལ་གསོལ་བ་འདེབས། ། པཎ་ཆེན་ཐམས་ཅད་མཁྱེན་པས་མཁན་སློབ་དང་། ། རྗེ་དབོན་ཆེན་པོས་གསང་སྟོན་ལེགས་མཛད་ནས། ། བསྙེན་པར་རྫོགས་ཚེ་བློ་བཟང་དོན་གྲུབ་ཀྱི། ། དྲིན་དུ་ལུང་བསྟན་བརྙེས་ལ་གསོལ་བ་འདེབས། ། གནས་དེར་ཟླ་ཤས་བསྒྲུབ་ལ་ཆེར་གཞོལ་བས། ། འགྲོ་བའི་སྡུག་བསྔལ་ཡིད་ལ་དྲན་ཙམ་གྱིས། ། སྤྱན་ཆབ་གང་གྰའི་རྒྱུན་ལྟར་རྟག་ཕབ་ནས། ། གཞན་ལ་ཇི་ཕན་མཛད་ལ་གསོལ་བ་འདེབས། ། ནང་དུ་སྤྲོས་པའི་སྣང་བ་ཀུན་བཀག་ནས། ། བཀག་པའི་མེད་དགག་འཛིན་སྟངས་ཡུལ་བསྐྱངས་པས། ། ཕྱི་རུ་གང་སྣང་སྒྱུ་མའི་རོལ་བར་ཤར། ། སྐྱེ་མེད་རྣལ་འབྱོར་མཆོག་ལ་གསོལ་བ་འདེབས། ། དེ་ནས་སླར་ཡང་དབུས་སུ་ལེགས་ཕེབས་ནས། ། ཀུན་མཁྱེན་གཉིས་པ་བློ་གྲོས་རྒྱ་མཚོ་དང་། ། སྔགས་པ་ཆོས་རྗེ་ནམ་མཁའ་བཟང་པོ་ལ། ། རྒྱུད་སྡེའི་ཆོས་མང་གསན་ལ་གསོལ་བ་འདེབས། ། རྒྱུད་གྲྭར་ཆོས་རྗེ་རྣམ་རྒྱལ་དཔལ་བཟང་ལ། ། དངོས་གྲུབ་རྒྱ་མཚོ་རིམ་ལྔ་གསལ་སྒྲོན་སོགས། ། གསན་ཅིང་འདུས་པ་འཕགས་པའི་སྐོར་ཀུན་ལ། ། སྦྱངས་བས་མཆོག་ཏུ་མཁས་ལ་གསོལ་བ་འདེབས། ། སོ་བཞི་བཞེས་ཚེ་རང་གི་ཡུལ་དུ་བྱོན། ། བརྒྱ་རྩ་བརྒྱ་ཕྱག་འཇིགས་བྱེད་བསྙེན་སྒྲུབ་དང་། ། ཡིག་བརྒྱ་བརྒྱ་རྩ་རྩ་ཤེས་ཀློག་འདོན་སོགས། ། ཉིན་མཚན་འཁོར་ཡུག་གཞོལ་ལ་གསོལ་བ་འདེབས། ། ཞེ་བདུན་བཞེས་པའི་དམར་སེར་མེ་སྦྲུལ་ལ། ། སྐུ་འབུམ་ཆོས་སྡེར་བློ་གསལ་ཚོགས་རྣམས་ལ། ། བསྡུས་ཕར་ལ་སོགས་ལེགས་བཤད་ཆར་ཕབས་ནས། ། བཤད་པའི་བསྟན་པ་སྤེལ་ལ་གསོལ་བ་འདེབས། ། ཞེ་དགུ་བཞེས་པའི་དོན་གྲུབ་ས་ལུག་ལ། ། རྒྱལ་བའི་དབང་པོ་སྡེ་བ་ཆོས་ཀྱི་རྗེ། ། མཚན་གཞན་བསྟན་འཛིན་བློ་བཟང་རྒྱ་མཚོ་བའི། ། ཞལ་མཇལ་གུས་པས་བསྟེན་ལ་གསོལ་བ་འདེབས། ། རྒྱལ་དབང་དེ་ཡི་དྲིན་ལས་མདོ་སྔགས་ཀྱི། ། ལམ་རིམ་ལ་སོགས་བཀའ་ལུང་ཡོངས་རྫོགས་པའི། ། ཚིག་གསན་དོན་ཀུན་ཐུགས་སུ་ཆུད་པ་ལས། ། དབང་ལུང་གདམས་པའི་མཛོད་ལ་གསོལ་བ་འདེབས། ། བླ་མ་དེ་ལས་ཡི་དམ་དཔའ་ཅིག་གི། དབང་གསན་དུས་སུ་སྟ་གོན་མནལ་ལམ་དུ། ། མཉམ་རྗེས་གཉིས་ནི་ཐོ་རངས་ནམ་མཁའ་དང་། ། ཁུག་སྣ་འདྲ་བར་གཟིགས་ལ་གསོལ་བ་འདེབས། ། འདོད་ཡོན་སྤུ་གྲིའི་སོར་ཆགས་སྦྲང་རྩི་དང་། ། འཁོར་བ་དུག་སྦྲུལ་ཚང་ལྟར་ལེགས་གཟིགས་ནས། ། རྒྱལ་བས་བསྔགས་པའི་རི་ཁྲོད་དབེན་པ་ལ། ། ཡིད་གཡོས་ཆེས་ཆེར་བསྔགས་ལ་གསོལ་བ་འདེབས། ། དེ་མཐུས་ཨ་ཆུང་གནམ་རྫོང་རི་ཁྲོད་དང་། ། རྒོད་པོ་རྫོང་དང་བྲག་དཀར་དབེན་གནས་སོགས། ། ཐུགས་ལ་གང་བཞེད་གང་འགོལ་བས་མཐའ་རུ། ། སྒྲུབ་པ་སྙིང་པོར་མཛད་ལ་གསོལ་བ་འདེབས། ། ཁྱད་པར་རྨ་ཀླུང་ཆོས་རྫོང་རི་ཁྲོད་དུ། ། མཚན་བཅས་མཚན་མེད་དགེ་སྦྱོར་རིམ་པ་རྣམས། ། ཉིན་གཅིག་ཙམ་ཡང་འཆགས་མེད་མཛད་པའི་མཐུས། ། ཉམས་རྟོགས་ཆེས་ཆེར་འབར་ལ་གསོལ་བ་འདེབས། ། དལ་སྐབས་ཡུལ་ཕྱོགས་མང་པོར་ཕྱག་ཕེབས་ནས། ། དབང་ལུང་རྗེས་གནང་གང་དང་གང་ཡིན་པ། ། དེ་དང་དེ་དག་འདོད་པའི་གདུལ་བྱ་ལ། ། མ་སྦས་ལྷུག་པར་འདོམས་ལ་གསོལ་བ་འདེབས། ། ང་དགུ་བཞེས་པའི་ས་མོ་སྦྲུལ་ལོ་ལ། ། སྤྲུལ་བའི་གནས་ཆེན་བྱམས་ཆེན་གླིང་མཆོག་ཏུ། ། རྡོ་རྗེ་འཆང་དབང་བསྟན་འཛིན་བློ་བཟང་ལ། ། རྡོ་རྗེ་ཕྲེང་དབང་གསན་ལ་གསོལ་བ་འདེབས། ། གསུང་རབ་རྣམས་ལ་རབ་གནས་མཛད་པའི་ཚེ། ། ཕྱག་ནས་སྐུ་དང་ཡིག་འབྲུ་འཛིན་པ་དང་། ། རང་བསྲེལ་གཅིག་ཡང་མང་པོར་སྤྲུལ་བ་སོགས། ། གྲུབ་རྟགས་དཔག་ཡས་སྟོན་ལ་གསོལ་བ་འདེབས། ། སྤྱིར་ནི་བླ་མ་ཉི་ཤུ་རྩ་གཅིག་དང་། ། སྒོས་སུ་ཆོས་འབྲེལ་ཟབ་པའི་བཤེས་གཉེན་དགུ། ། ཡང་སྒོས་བཀའ་དྲིན་འཁོར་དཀའི་ཡོངས་འཛིན་གསུམ། ། གུས་པས་ཚུལ་བཞིན་བསྟེན་ལ་གསོལ་བ་འདེབས། ། རྩ་བའི་བླ་མའི་ཡོན་ཏན་བརྗོད་པའམ། ། མཚན་ཙམ་ཐོས་ཚེ་ཞལ་རས་ཆེར་བསྡུས་ནས། ། སྤྱན་ཆབ་བསིལ་ཞིང་ཕྱག་གཉིས་ཐལ་སྦྱར་ནས། ། ཞལ་ནས་མཆོག་ཏུ་བསྟོད་ལ་གསོལ་བ་འདེབས། ། དེ་ལྟར་བཤེས་གཉེན་ལེགས་བསྟེན་ཐོས་ལ་འབད། ། བསྟན་པ་རྒྱས་མཛད་སྒྲུབ་ལ་ཆེར་གཞོལ་བས། ། ཏིང་འཛིན་སྒོ་འཕར་བརྒྱ་ཕྲག་ལེགས་ཕྱེ་ནས། ། ལྷག་མཐོང་དགའ་ཚལ་གཟིགས་ལ་གསོལ་བ་འདེབས། ། རང་གི་བཞེད་པའི་དོན་ཀུན་ལེགས་གྲུབ་ནས། ། རེ་ལྔ་བཞེས་པའི་ཆུ་མོ་ཕག་ལོ་ལ། ། ཙོང་ཁའི་ཡུལ་ལྗོངས་ཨར་རྩེ་ཞེས་བྱ་ནས། ། དག་པའི་ཞིང་དུ་གཤེགས་ལ་གསོལ་བ་འདེབས། ། སྐུ་གདུང་ཞུགས་ལ་སྦྱངས་ནས་གསོལ་བཏབ་ཚེ། ། དུང་དཀར་གཡས་འཁྱིལ་ལ་སོགས་ཡ་མཚན་པའི། ། ལྟས་མང་བསྟན་ནས་ཐམས་ཅད་དད་བྱས་པས། ། ཐར་བའི་ལམ་ཆེན་ཕྱེ་ལ་གསོལ་བ་འདེབས། ། དེ་ལྟར་བླ་མ་མཆོག་གི་ཡོན་ཏན་འག༵འ། ། འག༵འ་ལ་ཕན་པར་བསམ་ནས་བདག་གིས་བརྩ༵མས། ། བརྩ༵མས་པའི་སྒྲུབ་རྒྱུད་བྱ་བ་གང་ཡིན་ཀུ༵ན། ། ཀུ༵ན་མཁྱེན་བཀའ་བཞིན་གེགས་མེད་མྱུར་འགྲུབ་ཤོག།
ཅེས་རྗེ་བཙུན་ཆོས་ཀྱི་རྒྱལ་པོ་ཐམས་ཅད་མཁྱེན་པ་ཆོས་ཀྱི་རྒྱ་མཚོའི་རྣམ་པར་ཐར་བ་ཚིགས་བཅད་ཀྱི་བསྟོད་པར་བསྒྲིགས་པ་འདི་ནི། དང་པོར་བླ་མ་དེ་ཉིད་ཀྱི་བཀའ་འཁོར་ཆོས་རྫོང་དང་། དགོན་པར་བཞུགས་པའི་དགེ་ཚུལ་སློང་ཐམས་ཅད་ཀྱིས་ནན་ཆེར་བསྐུལ་ཞིང་། ཕྱིས་སུ་སྒྲུབ་པ་བསམ་གཏན་གྱི་འཁོར་ལོ་ལ་རྩེ་གཅིག་ཏུ་གཞོལ་བའི་ཆོས་ཀྱི་སྤྱན་ཅན་མཁས་བཙུན་རྒྱ་མཚོས་ཀྱང་ནན་ཆེར་ལན་འགར་བསྐུལ་བ་སོགས་ལ་བསྟེན་ནས། བླ་མ་དེ་ཉིད་ཀྱི་བཀའ་འབངས་མང་ཐོས་རི་ཁྲོད་པ་སྐལ་ལྡན་རྒྱ་མཚོས་སྦྱར་བའི་ཡི་གེ་བ་ནི་དད་ལྡན་ཐོས་བསམ་རྒྱ་མཚོའོ། ། དགེ་ལེགས་ནམ་མཁའ་དང་མཉམ་པར་གྱུར་ཅིག། ། ཞོ་བཟང་དགེ་འདུན་ཚུལ་ཁྲིམས་ཀྱིས་ཡི་གེར་གཏགས་ནས་མཁོ་སྤྲོད་བྱས་པའོ། །
རྩོམ་སྒྲིག་པ། ཤེས་རབ་རལ་གྲི།
དྲ་བའི་སྦྲེལ་ཐགhttp://www.tb1025.cn
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
