དཔལ་ལྡན་ཚོགས་གཉིས་ཆུ་གཏེར་ལས་འཁྲུངས་ཤིང༌། །སྤངས་རྟོགས་ཡོན་ཏན་དཀྱིལ་འཁོར་ཡོངས་སུ་རྫོགས། །གསང་གསུམ་སྒྱུ་འཕྲུལ་དྲ་བའི་འོད་དཀར་ཅན། །སྨྲ་བའི་ཟླ་བ་ལུས་ཅན་གཙུག་ན་རྒྱལ། །མི་མཉམ་ཐུགས་བསྐྱེད་དབྱར་གྱི་དཔལ་མོའི་བྱིན། །རྒྱལ་བསྟན་ནོར་འཛིན་ཁྱབ་པར་སྤྲོ་བ་ཡི། །སྤྲུལ་བའི་ཟློས་གར་པདྨ་དཀར་པོའི་ཕྲེང༌། །བཤད་སྒྲུབ་སྦྲང་རྩིའི་དགའ་སྟོན་ཅི་ཡང་རྒྱས། །མཐའ་ཀླས་འགྲོ་བའི་ཁམས་ཀྱི་རྫིང་བུ་རུ། །བརྟན་གཡོ་རབ་འབྱམས་བཀོད་པའི་ཟླ་སྣང་འབུམ། །ཅིག་ཅར་སྤྲོ་ཡང་ཉེར་ཞིའི་མཁའ་དབྱིངས་ལས། །མི་གཡོ་སྐུ་བཞིའི་རྒྱལ་ཐབས་བླ་ན་མེད། །སྟོབས་བཅུའི་འཇུག་པ་སྲིད་ཞིའི་དངོས་ཀུན་གྱི། །རྗེས་འགྲོ་རབ་འབྱམས་རྒྱལ་གསུང་གསང་བའི་མཛོད། །གྲགས་པ་གཏིང་ཡངས་རོལ་མཚོའི་ཕྱོགས་ཆ་ཡང༌། །དབྱངས་ཅན་ངང་མོ་འབུམ་གྱི་རྩེ་དགའི་གནས། །འོན་ཀྱང་ཐུགས་རྗེ་ཧ་རི་ཙནྡན་གྱི། །གྲིབ་བསིལ་དགེ་བའི་ལམ་དུ་ངལ་བསོ་བ། །གང་ཞིག་དེ་ཡི་ངོ་མཚར་བསྔགས་པ་ཡི། །གཏམ་གྱི་གླིང་བུ་བསྒྱུར་ལ་སྤྲོ་བ་འཛིན། །འཛམ་གླིང་མཁས་དང་གྲུབ་པ་མ་ལུས་པའི། །རལ་པའི་ཅོད་པཎ་ནོར་བུའི་རྐང་སྟེགས་ཅན། །ཆོས་ཀྱི་རྒྱལ་པོ་འཇམ་དབྱངས་བཞད་པ་ཞེས། །སྙན་པའི་བ་དན་སྲིད་པ་གསུམ་ན་གཡོ། །དཔལ་ལྡན་བླ་མའི་ཞབས་ལ་གསོལ་བ་འདེབས། །མཚན་འཛིན་འཕོ་འཇིག་གཡུལ་ངོ་ལས་རྒྱལ་ཡང༌། །འགྲོ་བའི་དོན་སླད་སྤྲུལ་བའི་ཟློས་གར་ནི། །རྒྱ་བོད་མཚམས་ཀྱི་ལྗོངས་འདིར་བསྒྱུར་རོ་ཞེས། །བཀའ་ལུང་འགྱུར་བ་མེད་པའི་ཞལ་བཞེས་མཛད། །དཔལ་ལྡན་བླ་མའི་༝། །དེ་ནས་གཟིགས་པ་ལྔ་ཡིས་མཁྱེན་བཞིན་དུ། །ཌཱ་ཀིའི་མཚན་ལྡན་ཡུམ་གྱི་ལྷུམ་ཞུགས་ཚེ། །ཆོས་ཀྱི་རྒྱལ་པོ་རྒྱལ་ཆེན་རྣམ་སྲས་སོགས། །ཆོས་སྲུང་རྒྱ་མཚོས་གཡེལ་མེད་བྱ་ར་མཛད། །དཔལ་ལྡན་༝། །དགེ་མཚན་ལྟས་དང་བཅས་ཏེ་བལྟམས་པ་ན། །འཇིག་རྟེན་སྐྱོང་རྣམས་ལྷ་ཡི་གོས་བཟང་ཕུལ། །ཚུལ་ཁྲིམས་ཕུལ་པོ་ཡོངས་སུ་རྫོགས་པ་ཡི། །གོས་བཟང་དྲན་ཤེས་ནོར་བུའི་སྐ་རགས་འཆང༌། །དཔལ་ལྡན་༝། །ལྔ་བརྒྱའི་གཙུག་རྒྱན་ཇོ་བོ་ཨ་ཏི་ཤ །མངོན་སུམ་གཟིགས་པས་དགའ་བ་དཔག་མེད་འཁྲུངས། །པཎ་ཆེན་དུ་མར་འཁྲུངས་པའི་ངང་ཚུལ་ཀྱང༌། །རྗེས་དྲན་རྣམ་འགྱུར་རིགས་པའི་གད་རྒྱངས་བསྒྲགས། །དཔལ་ལྡན་༝། །དགེ་ལྡན་བསྟན་ལ་དབང་བསྒྱུར་རྟེན་འབྲེལ་གྱིས། །འཇམ་དཔལ་སྙིང་པོའི་སྣང་བརྙན་རྙེད་པ་ན། །ཉིན་མཚན་ཀུན་ཏུ་ཕྱག་མཆོད་ལྷུར་མཛད་པས། །འཇམ་དབྱངས་བླ་མས་མངོན་སུམ་རྗེས་སུ་གཟུང༌། །དཔལ་ལྡན་༝། །བག་མེད་བྱིས་པའི་སྤྱོད་པ་ཀུན་སྤངས་ཤིང༌། །གཙུག་ལག་རབ་འབྱམས་འབད་མེད་ཐུགས་སུ་ཆུད། །དོན་ཟབ་སྙན་ཚིག་སྤེལ་ལ་ཐོགས་མེད་པས། །བློ་ཆེན་རྒན་པོ་རྣམས་ཀྱི་སྙེམས་པ་ཕྲོགས། །དཔལ་ལྡན་༝། །ཅུང་ཟད་སྙུན་གྱིས་ཟིན་ཚེ་ཕ་དམ་པ། །མངོན་སུམ་བྱོན་ནས་གེགས་སེལ་བསྲུང་བ་མཛད། །ཡུམ་ཆེན་ལབ་སྒྲོན་དུས་ནས་ལྷན་ཅིག་ཏུ། །ཐུགས་བསྐྱེད་སྨོན་ལམ་ཟབ་མོས་འབྲེལ་བར་ངེས། །དཔལ་ལྡན་༝། །ཡི་དམ་ཆོས་སྲུང་དུ་མའི་ཞལ་གཟིགས་ཤིང༌། །ཕྱི་ནང་རྟེན་འབྲེལ་ཀུན་ལ་དབང་བསྒྱུར་བས། །རི་མོའི་འཕྲུལ་གྱིས་གདོན་བགེགས་དཔུང་བཅོམ་སྟེ། །ཟླ་གྲགས་སྒྱུ་མའི་རོལ་རྩེད་སླར་ཡང་བསྟན། །དཔལ་ལྡན་༝། །འཁྲུལ་བྲལ་དམ་པའི་ལུང་གིས་ངེས་རྙེད་ཅིང༌། །སྔོན་གནས་རྗེས་དྲན་ངོ་མཚར་མཛད་བཟང་གིས། །གཟུར་གནས་མཁས་པ་ཀུན་གྱི་ཡིད་འཕྲོག་སྟེ། །ཆོས་ཀྱི་ཁྲི་ལ་ཞབས་སེན་ཉེ་བར་བཀོད། །དཔལ་ལྡན་༝། །ཡབ་གཅིག་བློ་བཟང་རྒྱལ་བའི་དབང་པོ་ཡིས། །གནས་གསུམ་བྱིན་རླབས་ཟབ་མོའི་བརྡ་ཐབས་ཀྱིས། །མདོ་སྔགས་ཟབ་རྒྱས་ཆོས་ཚུལ་མ་ལུས་པ། །ཇི་བཞིན་ཉམས་སུ་ལེན་པའི་གདམས་པར་ཤར། །དཔལ་ལྡན་༝། །འཇམ་དབྱངས་གཞོན་ནུས་མངོན་སུམ་བྱིན་བརླབས་ཤིང༌། །སྐྱེས་ཐོབ་བློ་གྲོས་ལུས་རྩལ་རབ་རྫོགས་པས། །རྒྱལ་སྲས་སྤྱོད་པ་རྒྱ་མཚོའི་སྒྲ་དབྱངས་ཀྱིས། །སྨྲ་ངན་དཔུང་བཅོམ་བློ་གསལ་དགའ་བ་བསྐྱེད། །དཔལ་ལྡན་༝། །སྤྱན་རས་གཟིགས་དབང་སྣང་སྟོང་སྲིན་པོའི་སྐུར། །བཞེངས་པ་མྱུར་མཛད་ཡེ་ཤེས་མགོན་པོ་ཡིས། །འདུ་འབྲལ་མེད་པར་རྟག་ཏུ་རྗེས་འབྲངས་ནས། །འཕྲིན་ལས་གཡེལ་མེད་སྒྲུབ་པར་ཞལ་གྱིས་བཞེས། །དཔལ་ལྡན་༝། །གནམ་སའི་ཁྱོན་ཀུན་འགེངས་པ་འཇིགས་པའི་གཟུགས། །འཇམ་དཔལ་བཀའ་སྡོད་ལས་ཀྱི་གཤིན་རྗེ་ཡིས། །དགེ་ལྡན་ཆོས་ཀྱི་གསང་མཛོད་ཡོངས་གཏད་ནས། །བགེགས་ཚོགས་ཀུན་འཇོམས་རྡོ་རྗེའི་གཡར་དམ་བཅས། །དཔལ་ལྡན་༝། །རྒྱལ་དབང་མཆོག་དང་པཎ་ཆེན་ཐམས་ཅད་མཁྱེན། །རོལ་པའི་རྡོ་རྗེ་དགེ་འདུན་རྒྱ་མཚོའི་སྡེ། །མཻ་ཏྲིའི་ཞབས་སོགས་ཡོངས་འཛིན་མང་བསྟེན་ནས། །ས་སྟེང་གདམས་པ་ཀུན་གྱི་བདག་པོར་གྱུར། །དཔལ་ལྡན་༝། །ཁེངས་དང་དྲེགས་པའི་བག་ཆགས་རིང་སྤངས་ཏེ། །སངས་རྒྱས་དངོས་སུ་གཟིགས་པའི་མོས་གུས་ཀྱིས། །ལེགས་ཚོགས་རྩ་བ་བཤེས་གཉེན་བསྟེན་ཚུལ་ལ། །གངས་ལྗོངས་འདི་ན་འགྲན་པའི་ཟླ་དང་བྲལ། །དཔལ་ལྡན་༝། །ངག་གི་དཔལ་སྟེར་འཇམ་དབྱངས་དཀར་པོ་ཡིས། །མངོན་སུམ་རྗེས་བཟུང་མཁྱེན་པའི་ཀློང་རྡོལ་ཞིང༌། །ཚིག་དོན་མཐའ་དག་མི་བརྗེད་གསུངས་ཐོབ་པས། །མདོ་རྒྱུད་མན་ངག་ཀུན་གྱི་གཏེར་དུ་གྱུར། །དཔལ་ལྡན་༝།

                  །བསྟོད་ཚིག་དོན་ཡོད་ཞགས་པའི་འཁྲུལ་འཁོར་གྱིས། །མངོན་སུམ་མགྲོན་དུ་བཀུག་པའི་དབྱངས་ལྡན་མ། །མགྲིན་པར་འཁྱུད་པས་སྔོན་མེད་ལེགས་བཤད་ཀྱི། །དགའ་སྟོན་སྤེལ་བའི་སྤོབས་པ་བླ་ན་མེད། །དཔལ་ལྡན་༝། །སྦལ་ཏི་འདུལ་བ་འཛིན་པའི་གདན་ས་རུ། །ཀུན་མཁྱེན་གོང་མའི་དུས་བཞིན་ཨ་ཙརྻས། །སྐུ་ཚེའི་ཚད་དང་མཛད་པ་འཕྲིན་ལས་སོགས། །འབྱུང་འགྱུར་མཐའ་དག་མ་ནོར་ལུང་བསྟན་མཛད། །དཔལ་ལྡན་༝། །དཔལ་ལྡན་འབྲས་སྤུངས་ཆོས་ཀྱི་སྡེ་ཆེན་ནས། །འཇིགས་མཛད་རྡོ་རྗེའི་དབང་བསྐུར་མཛད་པའི་ཚེ། །ཡི་དམ་ལྷ་ཚོགས་རྟེན་དང་བརྟེན་པ་རྣམས། །མངོན་སུམ་གཟིགས་ཤིང་བྱིན་རླབས་དགའ་སྟོན་མྱོང༌། །དཔལ་ལྡན་༝། །རྟག་ཏུ་སྦས་པའི་བརྟུལ་ཞུགས་ལྷུར་མཛད་ཀྱང༌། །ཐོལ་བྱུང་ཚུལ་གྱིས་འབྱུང་འགྱུར་བསླབ་བྱ་སོགས། །གང་སྩལ་རྒྱ་མཚོའི་རླབས་བཞིན་ཅུང་ཟད་ཀྱང༌། །དུས་ལས་མི་ཡོལ་སྒྲིབ་མེད་མཁྱེན་པའི་གཏེར། །དཔལ་ལྡན་༝། །ཕ་རོལ་སེམས་ཀྱི་འགྱུར་བ་སྣ་ཚོགས་དང༌། །སོམ་ཉིའི་དྲ་བར་ཆུད་རྣམས་མ་ཞུས་ཀྱང༌། །གདུལ་བྱའི་མོས་པ་ཇི་བཞིན་གཟིགས་པ་ཡིས། །གསལ་བར་འདོམས་མཛད་ཐར་པའི་ས་མཁན་མཆོག །དཔལ་ལྡན་༝། །པཎ་ཆེན་མཆོག་དང་ཐུགས་ཡིད་གཅིག་འདྲེས་ཏེ། །དགོས་དབང་ཁྱད་འཕགས་གཟིགས་པས་ཡབ་སྲས་གཉིས། །བཀའ་གདམས་བསྟན་པའི་འབྱུང་གནས་རྭ་སྒྲེང་དུ། །ཞལ་འཛོམ་དག་པའི་སྣང་བ་འབྱམས་སུ་ཀླས། །དཔལ་ལྡན་༝། །མདོ་སྨད་ཡུལ་གྱི་གདན་ས་ཆེན་པོ་ཀུན། །འཁོར་ལོ་གསུམ་གྱིས་སྐྱོང་བར་མཛད་པའི་ཚེ། །སྤྱན་རས་གཟིགས་ཀྱིས་ལུང་བསྟན་བསྐུལ་མ་མཛད། །གཞན་ཕན་སྙིང་རྗེའི་རོལ་པ་ཁོ་ནར་ངེས། །དཔལ་ལྡན་༝། །གྲུབ་པའི་ཞིང་མཆོག་དབེན་གནས་ཐར་པ་རྩེར། །ཟབ་གསང་རྡོ་རྗེའི་རྣལ་འབྱོར་ལ་གནས་ཚེ། །ཧེ་རུ་ཀ་དཔལ་རྟེན་དང་བརྟེན་པ་ཡི། །དཀྱིལ་འཁོར་འཁོར་ལོའི་སྣང་བ་མངོན་སུམ་གཟིགས། །དཔལ་ལྡན་༝། །འཛམ་གླིང་ཆེ་དགུའི་སྙིང་སྟོབས་ལས་འདས་པ། །བགྲང་ཡས་འཁོར་ཚོགས་རིམས་ནད་དུཿཁ་ལས། །སྒྲོལ་ལ་འཇིགས་བྲལ་གྲུབ་པའི་རྣམ་དཔྱོད་ཀྱིས། །པཎ་ཆེན་སྣང་མཐའི་འཕྲིན་ལས་རུ་མཚོན་བསྒྲེང༌། །དཔལ་ལྡན་༝། །

                 ཆུ་ཀླུང་འཁྲུགས་པས་འདབས་འབྲེལ་གྲོང་ཁྱེར་ཆེ། །བཅོམ་པའི་ཁྲོད་ནས་ཉིད་ལ་སྐྱབས་འཚོལ་རྣམས། །ཉེར་འཚེ་ལས་གྲོལ་སྣོད་བཅུད་རྟེན་འབྲེལ་ལ། །མངའ་བསྒྱུར་ནམ་ཡང་བསླུ་མེད་སྐྱབས་ཀྱི་མཆོག །དཔལ་ལྡན་༝། །གཞན་གྱི་རྦད་འདྲེ་གདོན་བགེགས་ནད་རིམས་དང༌། །སད་སེར་ཐན་པ་ལ་སོགས་ཉེར་འཚེ་ཀུན། །སྤྱན་དམིགས་ཙམ་དང་བདེན་ཚིག་རེ་རེས་ཀྱང༌། །ལྷག་མེད་ཞི་མཛད་རྣལ་འབྱོར་དབང་ཕྱུག་ཆེ། །དཔལ་ལྡན་༝། །བོ་དོང་དགོན་པར་འདོད་ཁམས་དབང་ཕྱུག་མ། །འོལ་ཁར་ལྷ་ཆེན་འོ་དེ་གུང་རྒྱལ་དང༌། །རྒྱུན་གྱི་འབྱོན་བཞུད་ལ་ཡང་རྨ་རྒྱལ་སོགས། །དཀར་ཕྱོགས་སྐྱོང་བ་ཀུན་གྱིས་བསུ་སྐྱེལ་མཛད། །དཔལ་ལྡན༌༝། །ཆོས་འཁོར་ལྷ་སར་རྗེ་བཙུན་འཇམ་དབྱངས་དང༌། །གདན་ས་ཆེན་པོར་ཡབ་རྗེའི་སྣང་བརྙན་གྱིས། །སྙན་ཤལ་བཞེས་ཤིང་དགྱེས་པའི་འཛུམ་དཀར་གྱིས། །དགེ་ལྡན་བསྟན་པའི་བདག་པོར་མངལ་གསོལ་བ། །དཔལ་ལྡན་༝། །དབུས་གཙང་གཉིས་དང་མདོ་སྨད་ལྗོངས་ཀུན་ཏུ། །དབང་ཁྲིད་མན་ངག་གདམས་པ་མ་ལུས་པ། །མཁས་གྲུབ་ཀུན་ལ་ལན་བརྒྱར་སྤེལ་བ་ཡིས། །གསང་ཆེན་བསྟན་པའི་མེ་རོ་རྨང་ནས་གསོས། །དཔལ་ལྡན༌༝། །འཁོར་ལོ་གསུམ་གྱི་མཛད་འཕྲིན་མཐའ་ཀླས་པས། །ས་སྟེང་ཀུན་ཏུ་ཁྱབ་ཀྱང་རང་དོན་ལ། །སྲེད་པའི་འདུན་པ་ཆ་ཙམ་མ་འདྲེས་པར། །བདེན་པའི་ཚིག་གིས་ཞལ་བཞེས་ཐུབ་པ་མཆོག།།དཔལ་ལྡན༌༝། །འཆད་རྩོད་རྩོམ་པས་མཁས་ཀུན་གཙུག་གི་རྒྱན། །མཐུ་སྟོབས་ནུས་པས་གྲུབ་རིགས་ཚོགས་ཀྱི་རྗེ། །འཕྲིན་ལས་བཟང་པོས་འཇིག་རྟེན་ཀུན་གྱི་མགོན། །ཐུབ་བསྟན་ཡོངས་ཀྱི་མངའ་བདག་དྲིན་ཅན་རྗེ། །དཔལ་ལྡན༌༝། །མཐའ་བྲལ་དེ་ཉིད་མངོན་སུམ་གཟིགས་པ་ཡིས། །དངོས་འཛིན་འཆིང་བའི་དྲ་བ་ཀུན་བཅད་ཅིང༌། །ཟབ་ལམ་རིམ་གཉིས་རྣལ་འབྱོར་མཐར་ཕྱིན་པས། །ཐ་མལ་སྣང་ཞེན་དྲི་མ་མ་ལུས་སྦྱངས། །དཔལ་ལྡན༌༝། །འགྲོ་ཀུན་མི་ཕམ་མགོན་གྱིས་རྗེས་འཛིན་ཅིང༌། །ཉིད་ཀྱི་ཞལ་སྐྱིན་ལ་དགོངས་བྱམས་མགོན་གྱི། །སྣང་བརྙན་གསར་བསྐྲུན་རབ་གནས་མཛད་པའི་ཚེ། །ཡེ་ཤེས་མངོན་སུམ་ཞུགས་པའི་གཟི་བྱིན་འབར། །དཔལ་ལྡན༌༝། །

              འབྲོམ་རྗེས་སྟོང་ཆེན་ཐིག་ལེའི་སྤྲོ་བསྡུ་བཞིན། །གཟུགས་སྐུའི་བཀོད་པ་དབྱིངས་སུ་སྡུད་པའི་བརྡར། །གྲེ་ཕུགས་ཨ་ཡིག་འོད་ཀྱི་རང་བཞིན་ཅན། །སྐལ་ལྡན་དུ་མའི་མིག་ལ་མངོན་སུམ་བསྟན། །དཔལ་ལྡན་༝། །རབ་འབྱམས་རྒྱལ་བའི་འཁོར་ལོ་མ་ལུས་པའི། །གསང་གསུམ་ཡོན་ཏན་མེ་ཏོག་སིལ་མའི་ཕྲེང༌། །ཚོམ་བུར་བསྡུས་པ་དཀོན་མཆོག་གསུམ་གྱི་དངོས། །འཇིགས་མེད་དབང་པོ་སྲིད་ཞིའི་གཙུག་གི་རྒྱན། །དཔལ་ལྡན་བླ་མའི་ཞབས་ལ་གསོལ་བ་འདེབས། །དེ་ལྟར་དད་པའི་ཡིད་ཀྱི་རྔ་ཡབ་རྩེས། །ཟབ་གསང་ཡོན་ཏན་ཆུ་ཡི་ཕུང་པོ་ལས། །ཆ་ཙམ་སྤེལ་བའི་བདུད་རྩི་ཟེགས་མ་ནི། །བདག་གཞན་བསོད་ནམས་མྱུ་གུའི་གསོས་སུ་འགྲེམ། །དེ་ཡི་དགེ་བས་དལ་འབྱོར་རྟེན་གྱི་གཟིངས། །ཐོས་བསམ་བསྒོམ་པའི་བ་དན་གྱིས་མཛེས་པས། །ཕྲ་རགས་འཁོར་བའི་རྒྱ་མཚོ་བསྒྲལ་གྱི་བར། །དེད་དཔོན་མཆོག་གིས་རྟག་ཏུ་སྐྱོངས་གྱུར་ཅིག །སྲིད་ལ་རྒྱབ་ཀྱིས་ཕྱོགས་པའི་ངེས་འབྱུང་དང༌། །གཞན་ཕན་ཁུར་དུ་འཁྱེར་བའི་བྱང་ཆུབ་སེམས། །རྒྱལ་བ་དགྱེས་བྱེད་ཡང་དག་ལྟ་བ་རྣམས། །ཟུང་དུ་འབྲེལ་བའི་ལམ་བཟང་མངོན་གྱུར་ཤོག །དེ་ནས་གསང་བ་སྔགས་ཀྱི་ལམ་ཞུགས་ཏེ། །དངོས་གྲུབ་རིན་ཆེན་གཏེར་གྱི་སྒོ་གཅིག་པུ། །རྣམ་དག་དམ་ཚིག་སྡོམ་པ་ཆ་ཙམ་ཡང༌། །མི་ཉམས་སྲོག་དང་བསྡོས་ཏེ་བསྲུང་བར་ཤོག །དག་པའི་འཁོར་ལོ་འདབ་བརྒྱར་གྲོལ་བ་ལས། །ལྷན་སྐྱེས་བདེ་ཆེན་སྦྲང་རྩིས་མྱོས་པ་ཡིས། །ཟུང་འཇུག་འདབ་ཡངས་གཡོ་བའི་རྐང་དྲུག་གིས། །ཆོས་ཀྱི་སྒྲ་དབྱངས་རྟག་ཏུ་སྒྲོགས་གྱུར་ཅིག །
                 ཅེས་དུས་གསུམ་རྒྱལ་བ་ཀུན་གྱི་ཞལ་སྐྱིན། རིགས་དང་དཀྱིལ་འཁོར་རྒྱ་མཚོའི་མངའ་བདག །བཀའ་དྲིན་མཚུངས་ཟླ་མེད་པ་རྗེ་བཙུན་དཀོན་མཆོག་འཇིགས་མེད་དབང་པོའི་ཞལ་སྔ་ནས་ཀྱི་གསང་བའི་རྣམ་པར་ཐར་པ་མདོར་བསྡུས་པ་འདི་ནི། མདོ་དང་སྔགས་ཀྱི་གཞུང་ལུགས་རྒྱ་མཚོའི་གནད་ལ་གཞན་དྲིང་མི་འཇོག་པའི་མཁྱེན་རབ་ཀྱི་དབང་ཕྱུག་དམ་པ་རྒྱུད་པ་དཔོན་སློབ་དཀོན་མཆོག་རྒྱལ་མཚན། རྡོ་རམས་པ་སྐལ་བཟང་དཔལ་འབྱོར། རབ་འབྱམས་པ་ངག་དབང་མཆོག་ལྡན། རབ་འབྱམས་པ་མཐའ་ཡས་རྒྱ་མཚོ། དཀའ་བཅུ་འཇམ་དབྱངས་ནོར་བུ། དཀོན་མཆོག་དཔལ་ལྡན། སྦྱིན་པ་རྣམ་རྒྱལ། འཇམ་དབྱངས་ཆོས་གྲགས་སོགས་དོན་གཉེར་ཅན་དུ་མས་སྔ་ཕྱིར་བསྐུལ་ཞིང༌། གཙོ་ཆེར་རང་ཉིད་ཚེ་རབས་ཀུན་ཏུ་རྗེ་བཙུན་བླ་མ་མཆོག་གིས་འབྲལ་མེད་རྗེས་སུ་འཛིན་པའི་ཕྱིར་དུ་དམིགས་ཏེ། ྋབཙུན་པ་དཀོན་མཆོག་བསྟན་པའི་སྒྲོན་མེས་ཆོ་འཕྲུལ་ཟླ་བའི་ཡར་ཚེས་དགེ་བར་དཔལ་ལྡན་བཀྲ་ཤིས་འཁྱིལ་གྱི་འདུ་ཁང་ཆེན་པོའི་ཡང་རྩེར་བྲིས་པ་དགེ་ལེགས་འཕེལ། །

                                                                                                             རྩོམ་སྒྲིག་པ། བྱ་མདོ་གུར་ཀུམ།
      གསལ་འདེབས།
                 འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn