དགའ་ལྡན་ཁྲི་ཐོག་གོ་གཉིས་པ་གཙང་པ་ཐུབ་བསྟན་ཉིན་བྱེད།།
དགའ་ལྡན་ཁྲི་ཐོག་གོ་གཉིས་པ་གཙང་པ་ཐུབ་བསྟན་ཉིན་བྱེད་ནི། སྤྱི་ལོ་དུས་རབས་བཅུ་དགུའི་སྨད་ཙམ་རབ་བྱུང་བཅོ་ལྔ་པའི་ནང་གཙང་དུ་སྐུ་འཁྲུངས། བྱིས་པའི་སྐབས་ནས་མཛད་སྤྱོད་ཕལ་བའི་ཡུལ་ལས་འགོངས།
སྐུ་ན་ཕྲ་དུས་ནས་དབུས་འགྱུར་ཆོས་ཀྱི་ཞིང་སར་ཕེབས་ཏེ་ལྷ་ལྡན་ཇོ་ཤཱཀ་རྣམ་གཉིས་སོགས་རྩ་ཆེན་རྟེན་གསུམ་ཁག་ལ་མཇལ་བཅར་བྱས་ནས། གདན་ས་འབྲས་སྤུངས་མཁས་མང་བྱེ་བའི་འབྱུང་གནས་བློ་གསལ་གླིང་དུ་ཆོས་ཞུགས་གནང༌། བློ་གླིང་དར་མདོ་མཁན་པོ་མཁྱེན་རབ་ལྷུན་གྲུབ་དང༌།
རྒྱལ་རོང་ཡེ་ཤེས་ཆོས་གྲགས་སོགས་ལ་བསྟེན་ནས་དབུ་ཕར་དང་འདུལ་མཛོད་ཀྱི་གཞུང་ལུགས་རྒྱ་མཚོ་ལྟ་བུར་གསན་བསམ་མཐར་ཕྱིན་པར་མཛད། གསང་ཕུ་རྭ་བ་སྟོད་དུ་ཆོས་ཐོག་ཕེབས་ནས་སྡེ་བདུན་མདོ་དངབཅས་པའི་དགོངས་དོན་ལ་གཞན་དྲིང་མེད་པའི་མཁས་པར་སྦྱངས་ཏེ་གླིང་བསྲེས་དགེ་བཤེས་མཚན་རྟགས་བཞེས།
དུས་ཕྱིས་རབ་བྱུང་བཅོ་ལྔ་པའི་ཆུ་བྱི་༡༩༡༢ལོར་སྲིད་ཞིའི་རྣམ་འདྲེན་ྋགོང་ས་བཅུ་གསུམ་པ་ཆེན་པོས་གདན་ས་ཁག་དང་རྒྱུད་སྟོད་སྨད་ནས་གྲགས་ཅན་དགེ་བཤེས་བརྒྱ་ཕྲག་བརྒལ་བ་བསྡུས་ནས་ལྷ་རམས་དམ་འཇོག་བཟང་ཞན་ཀྱི་ཨང་རིམ་གནང་སྐབས་དམ་པ་འདི་ཉིད་ཨང་དང་པོའི་གྲལ་ལ་སླེབས།
སྨད་རྒྱུད་གྲྭ་ཚང་དུ་ཕེབས་ནས་རྒྱུད་སྡེ་རྒྱ་མཚོའི་གཞུང་ལུགས་ལ་གསན་བསམ་རྒྱ་ཆེར་མཛད་དེ་རྒྱུད་སྨད་དགེ་བསྐོས་དང་བླ་མ་དབུ་མཛད་རིམ་རྒྱུད་ཀྱིས་མཁན་ཁྲིར་ཕེབས་ནས་རྒྱུད་ཀྱི་འཆད་མཉན་རྒྱ་ཆེར་གནང༌། ཡོངས་འཛིན་ཕུར་ལྕོག་རིན་པོ་ཆེ་དང༌། ཁང་སར་སྐྱབས་མགོན་བློ་བཟང་ཚུལ་ཁྲིམས། ལྕང་རྒྱབ་ཁྲི་ཟུར་ཡོན་ཏན་རྒྱ་མཚོ། ཕ་བོང་ཁ་བྱམས་པ་བསྟན་འཛིན་འཕྲིན་ལས་རྒྱ་མཚོ་སོགས་སྐྱེས་ཆེན་དུ་མའི་ཞལ་སྔ་ནས་མདོ་སྔགས་ཀྱི་བཀའ་ལུང་མན་ངག་རྒྱ་ཆེར་གསན།
རྒྱུད་པའི་མཁན་ཁྲི་ལས་ཟུར་རྗེས་བྱང་རྩེ་ཆོས་རྗེའི་ཁྲིར་འཁོད་དེ་རབ་བྱུང་བཅུ་དྲུག་པའི་ཆུ་སྤྲེལ་༡༩༣༢ལོ་མཇུག་ཏུ་དགའ་ལྡན་རྣམ་པར་རྒྱལ་བའི་གླིང་གི་མི་འཇིགས་སེང་གེའི་ཁྲི་ལ་ཞབས་སེན་འཁོར་ལོའི་རེ་ཁ་བཀོད་པ་གསལ་ཏེ། ངོ་མཚར་རིན་པོ་ཆེའི་ཕྲེང་བ་ལས་ཆུ་སྤྲེལ་ཞེས་པ་ནས་དགའ་ལྡན་ཁྲི་ཆེན་བློ་བཟང་རྒྱལ་མཚན་ཞིང་གཤེགས་ཚབ་བྱང་རྩེ་ཆོས་རྗེ་ཐུབ་བསྟན་ཉིན་བྱེད་ལ་བསྐོ་བཞག་མཛད། ཞེས་གསུངས་པས་སོ། །
ལོ་དེའི་ཕྱི་མ་༡༩༣༣ལོ་གསར་སྐབས་ལྷ་ལྡན་སྨོན་ལམ་ཆེན་མོའི་ཚོགས་དབུར་ཕེབས་ནས་དཔག་བསམ་འཁྲི་ཤིང་དང༌། སྐྱེས་རབས་སོ་བཞི་པའི་བཤད་པ་རྒྱ་ཆེར་གནང༌། དཔྱིད་ཀར་སྡེ་དྲུག་རྨེ་རུ་གྲྭ་ཚང་དུ་ཁྲི་པ་རིམ་བྱོན་གྱིས་ལམ་རིམ་འཆད་ཉན་གནང་སྲོལ་ལྟར་རྗེ་འདི་བས་ཀྱང་དེ་གར་བཀའ་ཆོས་འཆད་བཞིན་པའི་མུར་དགོངས་པ་ཆོས་དབྱིངས་སུ་ཐིམ་པས་ཁྲི་པ་ཟླ་ཤས་ལས་མ་མཛད་པར་སྣང༌།
དེ་ཡང་སྐབས་དེར་གོང་ས་སྐུ་ཕྲེང་བཅུ་གསུམ་པ་ཆེན་པོ་ཞི་བའི་དབྱིངས་སུ་མནར་ཚུལ་བསྟན་རྒྱུའི་སྔ་རོལ་དུ་རྗེ་འདི་བར་རྒྱལ་ཚབ་ཏུ་མངའ་གསོལ་རྒྱུའི་བཀའ་རྒྱ་སྩལ་རྒྱུའི་དགོངས་པ་ཡོད་པ་དེ་ཉིད་མཁྱེན་ནས་དགའ་ལྡན་ཕོ་བྲང་པའི་སྲིད་དབང་འཛིན་རྒྱུར་སྐུ་ན་དང་གང་ཅིའི་ཐད་ནས་འགྲོ་དོན་ཆེ་བ་མ་གཟིགས་ནས།
ྋགོང་ས་ཆེན་པོའི་བཀའ་རྒྱ་མ་འབྱོར་བའི་སྔོན་ནས་གློ་བུར་དུ་དགོངས་པ་ཆོས་དབྱིངས་སུ་བསྟིམས་པར་བཤད་ཅིང༌། རྗེ་འདི་ཉིད་དགོངས་པ་རྫོགས་པའི་ཚུལ་ྋགོང་ས་རྒྱལ་དབང་ཐུབ་བསྟན་རྒྱ་མཚོ་ལ་སྙན་ཞུ་ཕུལ་སྐབས་ྋགོང་ས་མཆོག་གིས་རེ་ཞིག་ཐུགས་ཡིད་མི་ཆེས་པའི་ཚུལ་གྱིས་ཐུབ་བསྟན་ཉིན་བྱེད་དེ་སེམས་པ་ཆུང་བ་ལ་ཨང་ཞེས་གསུང་སྐུད།
འདིའི་གདུང་རུས་དངུལ་གྱི་མཆོད་སྡོང་དགའ་ལྡན་རྣམ་པར་རྒྱལ་བའི་གླིང་དུ་བཞུགས། རིང་བསྲེལ་གྱི་ནང་གཟུངས་ཡོད་པའི་སྨན་འདམ་གྱི་སྐུ་བརྙན་འབྲས་སྤུངས་གཙང་པ་ཁང་ཚན་དུ་བྱིན་རླབས་ཀྱི་ཚན་ཁ་འབར་བཞིན་བཞུགས་ཤིང༌། འདིའི་སྐུ་ཕྲེང་གཉིས་པ་གཙང་པ་ཁྲི་སྤྲུལ་རིན་པོ་ཆེ་ནི།
རབ་བྱུང་བཅུ་དྲུག་པའི་ཤིང་ཁྱི་༡༩༣༤ལོར་ལྷ་ས་ཞོལ་ཆིབས་རར་སྐུ་འཁྲུངས། སྐུ་ན་ཆུང་དུས་ནས་གོང་མའི་ཡང་སྲིད་འཁྲུལ་བྲལ་ངོས་འཛིན་བྱུང་སྟེ་འབྲས་སྤུངས་བློ་གླིང་གཙང་པ་ཁང་ཚན་དུ་ཆོས་ཞུགས་གནང༌། གཙང་པ་དགེ་བཤེས་བློ་གྲོས་ཆོས་ལྡན་སོགས་ལ་བསྟེན་ནས་ཡི་གེ་འབྲི་ཀློག་དང་ཆོས་སྤྱོད་ཆོ་ག་རིགས་ལམ་བསྡུས་གཞུང་དང༌། ཕར་ཚད། དབུ་མ། འདུལ་མཛོད་བཅས་ལ་གསན་བསམ་རྒྱ་ཆེར་མཛད་དེ་གླིང་བསྲེས་དགེ་བཤེས་མཚན་རྟགས་བཞེས།
སྐྱབས་མགོན་རྒྱལ་དབང་ཡབ་སྲས་དང་ལི་ཐང་ཤོག་དྲུག་སྐྱབས་མགོན་སོགས་ལས་མདོ་སྔགས་ཀྱི་ཆོས་ཚུལ་དུ་མ་ཞུས། བོད་དུ་གླེང་ལོག་བྱུང་རྗེས་འཕགས་ཡུལ་དུ་ཕེབས་ཏེ་ཝཱ་ཎཱ་མཐོ་སློབ་ཏུ་ཞུགས་ནས་ཆོས་རིག་ཁག་ལ་གསན་བསམ་མཛད། རབ་བྱུང་བཅུ་དྲུག་པའི་ཤིང་གླང་༡༩༨༥ལོར་ཀ་ལི་ཀ་ཏར་དགོངས་པ་ཆོས་དབྱིངས་སུ་ཐིམ། །
དགའ་ལྡན་ཁྲི་རབས་རིམ་བྱུང་གི་རྣམ་ཐར་ཛམྦུའི་གསེར་གྱི་ཕྲེང་བ་ལས་བཤུས།
རྩོམ་སྒྲིག་པ། ཀླུ་ཚང་ འཇམ་དབྱངས་ཤེས་རབ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025. cn
