དགའ་ལྡན་ཁྲི་ཐོག་གྱ་བརྒྱད་པ་ལྕང་རྒྱབ་མཁྱེན་རབ་ཡོན་ཏན་རྒྱ་མཚོ་ནི། དགའ་ལྡན་ཁྲི་ཐོག་གྱ་བརྒྱད་པ་ལྕང་རྒྱབ་མཁྱེན་རབ་ཡོན་ཏན་རྒྱ་མཚོ་ནི། རབ་བྱུང་བཅོ་ལྔ་དུས་རབས་བཅུ་དགུ་པའི་དཀྱིལ་ཙམ་དུ་དབུས་ཀྱི་འབྲེི་གུང་དུ་སྐུ་འཁྲུངས།

             སྐུ་ན་ཆུང་དུས་ནས་གདན་ས་འབྲས་སྤུངས་སུ་ཕེབས་ནས་ཐོག་མར་སྒོ་མང་གྲྭ་ཚང་དུ་འཛུལ་ཞུགས་བྱས་ཀྱང་འདིའི་ཡབ་མདོ་ཁམས་ཏྲེ་ཧོར་རོང་པ་ཚ་དགོན་གསར་ནས་ཡིན་ཞིང་ཆུས་དུས་ལྷ་སར་ཚོང་ལས་ལ་ཞུགས་ནས་རིམ་གྱིས་འབྲི་གུང་དུ་གཞིས་ཆགས་པ་ཡིན་སྟབས་མི་རྒྱུད་གཞིར་བཟུང་གིས་བློ་གསལ་གླིང་གི་ཏྲེ་ཧོར་ཁང་ཚན་གྱི་ཉེ་འཁོར་གྲྭ་རྒྱུན་གྱི་ཐོབ་ཁོངས་ལྟར་འཛུལ་ཞུགས་ཐོག ཁང་གསར་སྐྱབས་མགོན་བློ་བཟང་ཚུལ་ཁྲིམས་སོགས་སྐྱེས་ཆེན་དུ་མའི་དྲུང་ནས་བསྡུས་གཞུང་དང་རྣམ་འགྲེལ། དབུ་ཕར། འདུལ་མཛོད་བཅས་ལ་མཁས་པར་སྦྱངས།

             ལྷ་ལྡན་སྨོན་ལམ་ཆེན་མོའི་ནང་གཞུང་ཆེན་ལྔའི་གྲྭ་སྐོར་མཛད་ནས་ལྷ་རམས་པའི་མཚན་གནས་བཞེས། རྒྱུད་གྲྭ་སྨད་དུ་ཕེབས་ནས་རྒྱུད་སྡེ་རྒྱ་མཚོ་ལྟ་བུ་ལ་གསན་བསམ་དཔྱིས་ཕྱིན་པར་མཛད། ཁྲི་ཆེན་ངག་དབང་ནོར་བུ་དང༌། ཁང་གསར་སྐྱབས་མགོན་བློ་བཟང་ཚུལ་ཁྲིམས།

              ཀེའུ་ཚང་བློ་བཟང་བསྟན་འཛིན་ཡར་རྒྱས། ཡོངས་འཛིན་གླིང་སྤྲུལ་བློ་བཟང་ལུང་རྟོགས་བསྟན་འཛིན་འཕྲིན་ལས་སོགས་ལས་མདོ་སྔགས་ཀྱི་བསྡུས་པའི་དབང་ལུང་མན་ངག་རྒྱ་ཆེར་མནོས། རྒྱུད་སྨད་ཀྱི་མཁན་ཁྲིར་ཕེབས་ཏེ་རྒྱུད་ཀྱི་འཆད་མཉན་རྒྱ་ཆེར་གནང༌། བོད་ཀྱི་མཁས་དབང་རིམ་བྱུང་གི་མིང་མཛོད་དང༌། པོ་ཏཱ་ལའི་གསུང་འབུམ་དཀར་ཆག་གཉིས་ཀའི་ནང་རྗེ་འདི་ཉིད་རྒྱུད་སྟོད་དུ་ཞུགས་ཚུལ་དང༌།

              དེའི་མཁན་ཁྲིར་ཕེབས་ཚུལ་གྱི་འོལ་ཚོད་དང་རྫུན་ཕྲེང་བསྒྲིགས་འདུག སྨད་རྒྱུད་གྲྭ་ཚང་གི་མཁན་རབས་གསོལ་འདེབས་ལས། ངོ་མཚར་བཀོད་པའི་ཚོགས་གཉིས་བསྲུབས་པ་ལས། ། མ་སྨད་མཆོག་གི་བང་རིམ་མངོན་པར་མཐོ། ། ལེགས་གོམས་ཚུལ་གྱི་གཞན་ཕན་ཉི་ཟླས་རྒྱན། ། རྣམ་དག་ཁྲིམས་ལྡན་དབང་པོར་གསོལ་བ་འདེབས། །

              ཞེས་པའི་ཐད་ཀྱི་དགའ་ལྡན་ཁྲི་ཐོག་བརྒྱ་བ་ཆོས་རྗེ་བློ་བཟང་ཉི་མ་དཔལ་བཟང་པོའི་ཆོས་འབྱུང་གཡའ་དག་འཕྲུལ་གྱི་མེ་ལོང་ལས། འདི་མཚན་སྒྲ་མི་གསལ་ཡང་གོང་འོག་གི་བབ་ལས་མཁྱེན་རབ་ཡོན་ཏན་རྒྱ་མཚོ་རྒྱུད་སྨད་ཀྱི་ཁྲིར་བྱོན་པ་མངོན་ཏེ། ཞེས་དང༌། དཔལ་ལྡན་སྨད་རྒྱུད་དུ་ཕེབས་ནས་མཁན་ཁྲིར་བྱོན་དེ་འཆད་ཉན་མཛད། བྱང་རྩེ་རྒྱུད་རབ་བྱུང་བཅོ་ལྔ་པའི་ཤིང་སྟག་ལོར་གདན་སར་ཕེབས་ནས་ཆོས་འཁོར་བསྐོར།

            ཞེས་དང༌། གུང་བསྟན་གྱི་ཁྲི་རབས་ཡོངས་འདུའི་ལྗོན་བཟང་དུ། རྒྱུད་སྨད་དང་བྱང་རྩེ་བརྒྱུད་ནས་དགའ་ལྡན་ཁྲིར་ཕེབས་ཞེས་དང༌། གོང་ས་བཅུ་གསུམ་པའི་རྣམ་ཐར་ཤོག་གྲངས་༥༢༩ལས། ཤིང་སྟག་ཟླ་བ་ལྔ་པའི་ཚེས་བཅུ་བཞི་ཉིན་ཚེ་གླིང་ཤ་ཅིན་ཏེལ་གེག་ཆེ་དགའ་ལྡན་ཁྲི་ཐོག་འཕོས་ཚབ་བྱང་རྩེ་ཆོས་རྗེ་མཁྱེན་རབ་ཡོན་ཏན་རྒྱ་མཚོ་དང༌། བྱང་རྩེ་ཆོས་རྗེ་གསར་པ་བྱམས་པ་ཆོས་གྲགས་གཉིས་སུ་ངེས་པ་སོ་སོར་ནས་བཀའ་བསྒྱུར་མཇལ་དར་དང༌། རྟེན་གསུམ་འདེགས་འབུལ་ཞུས། ཞེས་འབྱུང་བལྟར༌།

            རྗེ་འདི་ཉིད་རྒྱུད་སྨད་ནས་སྔགས་ཀྱི་གསན་སྦྱངས་གནང་སྟེ་རྒྱུད་སྨད་མཁན་ཁྲིར་ཕེབས། པོ་ཏཱ་ལའི་གསུང་འབུམ་དཀར་ཆག་སོགས་སུ་རྒྱུད་སྟོད་མཁན་ཁྲིར་ཕེབས་པར་བཤད་པ་ནི་ནོར་བའོ། །དེ་ནས་རབ་བྱུང་བཅོ་ལྔ་པའི་ལྕགས་གླང་༡༩༠༡ལོར་བྱང་རྩེ་ཁྲིར་ཕེབས་ཏེ་བྱང་རྩེར་བཞུགས་རིང་བྱང་ཆུབ་ལམ་རིམ་ཆུང་ངུ་དང༌། རྗེ་ཉིད་ཀྱི་སྦྱོར་ཆོས་ཟིན་བྲིས། བླ་མཆོད་ཟིན་བྲིས་སོགས་ཀྱི་བཀའ་འཁྲིད་རྒྱ་ཆེར་གནང༌།

              རྗེ་འདིས་བཀའ་ཁྲིད་གང་ཞིག་གནང་ཡང་གསུང་བཤད་རྒྱ་ཆེ་ཞིང་གསུང་གི་གདངས་སྲོང་པ། འཆད་པའི་ཐབས་ཚུལ་གཟན་ ལས་ཁྱད་དུ་ཞུགས་པས་ཆོས་ཞུ་བ་ཤིན་ཏུ་མང་པོ་འདུ། གཞན་ཡང་རྗེ་འདིས་བྱང་རྩེ་ཆོས་རྗེ་མཛད་པའི་སྐབས་སྡེ་སྲིད་སངས་རྒྱས་རྒྱ་མཚོའི་བཻཌཱུརྱ་དཀར་པོའི་དཔར་ཤིང་ལ་ཞུས་དག་མཛད་པ་སོགས། མདོར་ན་དགའ་ལྡན་ཕོ་བྲང་པའི་ཆབ་སྲིད་དང༌། བོད་ཀྱི་རིག་གཞུང༌། དགེ་ལྡན་པའི་བསྟན་པ་བཅས་ལ་བཤད་སྒྲུབ་ལས་གསུམ་གྱི་འཕྲིན་ལས་བླ་ན་འཕེལ་བར་མཛད།

           རབ་བྱུང་བཅོ་ལྔ་པའི་ཤིང་སྟག་༡༩༡༤ལོར་དགའ་ལྡན་གསེར་ཁྲིར་ཞབས་སོར་འཁོད། དེའི་ཕྱི་༡༩༡༥ལོར་བླ་མ་གནས་བརྟན་པས་སྦྱིན་བདག་ཞུས་ནས། སྐྱབས་རྗེ་ཁྲི་བྱང་རིན་པོ་ཆེ་གཙོས་པའི་སྐྱེས་ཆེན་བརྒྱ་ཕྲག་བརྒལ་བར་རྡོ་རྗེ་ཕྲེང་བའི་བཀའ་དབང་གནང་བས་མཚོན། མདོ་སྔགས་ཀྱི་ཆོས་འཁོར་རྒྱ་ཆེར་བསྐོར།

             སྐྱབས་རྗེ་ཁྲི་བྱང་རིན་པོ་ཆེ་བློ་བཟང་ཡེ་ཤེས་དང༌། སྟག་ཕུ་པདྨ་བཛྲ། སྒོ་མང་འབུལ་སྡུད་རིན་པོ་ཆེ། སོག་པོ་མགོན་དཀར་སྐྱབས། རྡོ་སྦིས་དགེ་བཤེས་ཤེས་རབ་རྒྱ་མཚོ་སོགས་མཁས་གྲུབ་གཉིས་ལྡན་གྱི་སློབ་མ་ཤིན་ཏུ་མང་པོ་བྱུང།སྣང་སྟེ། སྐྱབས་རྗེ་ཁྲི་བྱང་རང་རྣམ་འཁྲུལ་སྣང་སྒྱུ་མའི་ཟློས་གར་ལས།

             རང་ལོ་བཅོ་ལྔ་པ་ཤིང་ཡོས་༡༩༡༥ཟླ་བ་དྲུག་པའི་ཚེས་བཅུ་བདུན་ནས་བཟུང་དགའ་ལྡན་ཡངས་པ་ཅན་གྱི་གཙུག་ལག་ཁང་དུ་དགའ་བྱང་ཚ་བ་དགེ་བསྐོས་ཟུར་པ་ཡེ་ཤེས་ལགས་ཀྱིས་ཞུས་བསྐུལ་བཞིན་དགའ་ལྡན་ཁྲི་ཐོག་གྱ་བརྒྱད་པ་ཁྲི་ཆེན་མཁྱེན་རབ་ཡོན་ཏན་རྒྱ་མཚོ་དཔལ་བཟང་པོའི་ཞལ་སྔ་ནས་འཕགས་ཡུལ་གྱི་སློབ་དཔོན་ཆེན་པོ་ཨ་ཁཎ་ཀ་ར་གུརྐྱྣ་ཞེས་སམ་འཇིགས་མེད་འབྱུང་གནས་ཞབས་ཀྱིས་སྲོལ་ལེགས་པར་ཕྱེ་བའི་རྡོ་རྗེ་ཕྲེང་བའི་དཀྱིལ་འཁོར་ཞེ་གཉིས་དང༌། པབརསྤྱ༣་ཏ་དར་པཎ་ཨ་ཙ་འམ་འགྲོ་བའི་མེ་ལོང་ཞབས་ཀྱིས་སྲོལ་ཕྱེ་བའི་ཀྲྀ་ཡས་མུགད་ནས་བཤད་པའི་བདེ་ལེགས་སུ་བྱེད་པའི་དཀྱིལ་འཁོར་གསུམ་བཅས་དཀྱིལ་འཁོར་ཞེ་ལྔའི་དབང་ཆེན་སྟ་གོན་དང་བཅས་པར་ལེགས་པར་སྩལ་སོང་བར་ྋསྐྱབས་མཆོག་འབུལ་སྡུད་རྡོ་རྗེ་འཆང་དང༌།

             ལྔ་རིག་སྨྲ་བའི་དབང་ཕྱུག་འབྲས་སྤུངས་ཀླུ་འབུམ་དགེ་བཤེས་ཤེས་རབ་རྒྱ་མཚོ་རིན་པོ་ཆེ། གཞན་ཡང་བླ་སྤྲུལ་དགེ་བཤེས་མཁས་གྲགས་ཅན་སོགས་དགེ་འདུན་དྲུག་བརྒྱ་ལྷག་ཙམ་དང་ལྷན་དུ་སྐལ་བཟང་གི་དགའ་སྟོན་ཐོབ་ཅིང༌། བདེ་མཆོག་འཁོར་ལོ་བསྒྱུར་དྲུག་གི་དབང་ཆེན་གྱི་བརྟུལ་ཞུགས་དབང་སྐབས་ཁོ་བོར་རུས་པའི་རྒྱན་དྲུག་སོགས་ཆས་འཇུག་རྒྱས་པར་སྩལ་ཞིང༌། གདུགས་རྒྱལ་མཚན་སོགས་དང་བཅས་དཀྱིལ་འཁོར་ལ་བསྐོར་བ་དང༌། སློབ་མ་ལྷ་ལ་འབུལ་བ་སོགས་བསོད་ནམས་ཀྱི་སྐལ་བ་ཡང་མི་དམན་པ་ཐོབ།

              དབང་ཆེན་འདི་དག་གི་རིང་ྋསྐྱབས་མཆོག་འབུལ་སྡུད་རྡོ་རྗེ་འཆང་གི་སྐུའི་གཞོགས་འགྲམ་དེར་སྡོད་རྒྱུ་ཁེལ་ཞིང༌། རྡོ་རྗེ་འཆང་ཉིད་དབང་ཚུགས་ནས་མ་གྲོལ་བར་དམིགས་པ་ཡེངས་མེད་དུ་བཞུགས་པའི་དཔེ་སྟོན་བཟང་བ་དང༌། ལོ་སྔོན་མར་ཀུན་བདེ་གླིང་དུ་དབང་ཆེན་སྐབས་གསུང་བཤད་ལེགས་ཐོས་བྱུང་བ་སོགས་ཀྱིས་འདི་རེས་ཀྱང་དམིགས་རྣམ་རྐང་གྲངས་མ་ཆད་ཙམ་སྐྱོང་ཁུལ་བྱས། ཞེས་གསུངས་པས་སོ།

              འདིའི་ཟབས་བརྟན་གསོལ་འདེབས་སུ། བྱང་ཆུབ་སྤྱོད་པའི་ལམ་ལ་བགྲོད་པའི་འགྲོ། །འགྲོ་མྱུར་རྗེ་བཙུན་བླ་མར་གསོལ་བ་འདེབས། །ཞེས་ཡོད་འདུག་པར་རྡོ་སྦོས་དགེ་བཤེས་ཤེས་རབ་རྒྱ་མཚོས་ང་ཚོའི་བླ་མ་རིན་པོ་ཆེ་འགྲོས་མགྱོག་པོ་ཡོད་པར་འདྲ། ཞེས་ཞུས་པས། འབུལ་སྡུས་རིན་པོ་ཆེས་ཕྱག་གིས་དབུ་འཕུར་གྱིན་གཞད་མོ་གནང་ཚོད་འདུག༌། ཅེས་ཛེ་སྨད་གསུང་འབུམ་དུ་གསལ། གསུང་རྩོམ་ཡང་བླ་མཆོད་ཁྲིད་ཡིག་མན་ངག་གཏེར་མཛོད་དང༌།

            ལོ་གྱོན་རིལ་བུའི་སྦྱར་ཐབས། ཀེག་རྩིས་རབ་གནས་བཤད་པ། རྡོ་དབྱིངས་ཀྱི་སྒྲུབ་དཀྱིལ། བོད་ཀྱི་བརྡ་སྤྲོད་པའི་གཞུང་སུམ་རྟགས་ཉུང་ངུའི་ཚིག་གི་གོ་བདེ་བཀྲལ་བ་བློ་རྨོངས་གསལ་སྒྲོན་སོགས་མདོ་སྔགས་ཀྱི་ལེགས་བཤད་དང་ཐུན་མོང་གི་ལེགས་བཤད་འདུས་པའི་པོད་ཆེན་གཅིག་བཞུགས་དེང་སང་ཡང་ཕལ་ཆེར་ལྷ་ས་པོ་ཏཱ་ལའི་དཔེ་མཛོད་ཁང་དུ་ཡོད་པར་འདྲ། རྗེ་འདིའི་རྡོ་དབྱིངས་ཀྱི་སྒྲུབ་དཀྱིལ་ནི། དགའ་ལྡན་ཚ་བ་དང་བསམ་བློ་གཉིས་ཀྱི་སྟག་རྩེ་སྒྲུབ་མཆོད་སྐབས་རྒྱུན་འདོན་གནང་བཞིན་ཡོད་ཅེས་ཁྲི་ཆེན་བློ་བཟང་ཉི་མས་རྒྱུད་སྨད་ཆོས་འབྱུང་དུ་གསུངས། །

            རབ་བྱུང་བཅོ་ལྔ་པའི་ས་ལུག་༡༩༡༩ལོར་ཁྲི་ལས་ཟུར་ནས། ལྷ་སྔགས་ཏིང་འཛིན་ལ་བརྩོན་བཞིན་པའི་མུར་ལྕགས་བྱ༡༩༢༡ལོར་དགོངས་པ་ཆོས་དབྱིངས་སུ་ཐིམ་པའི་སྐུ་གདུངརིན་པོ་ཆེ་དངུལ་གྱི་མཆོད་སྡོང་ཟ་མ་ཏོག་འབྲས་སྤུངས་ཏྲེ་ཧོར་ཁང་ཚན་དུ་བཞུགས།

              ཞལ་ཆེམས་སུ་ངའི་ཡང་སྲིད་མེད་པས་རྩད་གཅོད་མ་བྱེད་ཅེས་བཀའ་གནང་བ་ལྟར་སྐུ་ཆས་གང་ཡོད་དགོངས་རྫོགས་མཆོད་འབུལ་དུ་གཏོང་འཆར་ཡང༌། ཁྲི་ཆེན་འདིའི་སྐུ་ཚ་ཞིག་གིས། ཡང་སྲིད་བརྩད་གཅོད་ལ་ཁ་གཡར་ནས་དོན་མེད་གྱོད་འཛུགས་བྱས་པས་རང་གཞུང་གིས་རྗེ་འདིའི་གཟིམས་ཤག་འབྲས་སྤུངས་ཏྲེ་ཧོར་ཁང་ཚན་གྱི་འདུ་ཁང་ཐོག་ཁར་ཡོད་པ་དེ་ཉིད་ལ་སྒོ་ཐེལ་འཛུགས།

            དུས་ཕྱིས་དགའ་ལྡན་ཁྲི་ཆེན་དགུ་བཅུ་པ་ཏྲེ་ཧོར་བྱམས་པ་ཆོས་གྲགས་དགའ་ལྡན་ཁྲིར་ཕེབས་སྐབས་སྐྱབས་མགོན་བཅུ་གསུམ་པ་ཆེན་པོས་གཟིམ་ཆུང་དེ་ཉིད་དུ་བཞུགས་རྒྱུའི་བཀའ་འཁྲོལ་ལྟར་གཞི་ནས་གཟིམས་ཤག་སྒོ་དབྱེ་ཆོག་པ་བྱུང་ཡང༌། མི་ལོ་མང་པོ་སོང་སྟབས་ཅ་དངོས་ཕྱག་རྫས་ཕལ་ཆེ་བ་བེད་མེད་ཆགས་ཚར་ཚུལ་ད་ལྟར་ཞབས་བཞུགས་ཡོད་པའི་ཏྲེ་ཧོར་སྤྱི་རྒན་དགེ་བཤེས་པདྨ་ཡོངས་འཛིན་ལགས་ཀྱི་ཞལ་ནས་ཁོ་བོས་དངོས་སུ་ཐོས། དུང་དཀར་ཚིག་མཛོད་དུ། རྗེ་འདི་དགོངས་པ་རྫོགས་ལོ་༡༩༡༩ལོར་ཡིན་པར་གསུངས་པ་ནི་ནོར་བའོ། །

                     དགའ་ལྡན་ཁྲི་རབས་རིམ་བྱུང་གི་རྣམ་ཐར་ཛམྦུའི་གསེར་གྱི་ཕྲེང་བ་ལས་བཤུས། 
                  

       རྩོམ་སྒྲིག་པ། ཀླུ་ཚང་ འཇམ་དབྱངས་ཤེས་རབ།

          གསལ་འདེབས།
             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
           དྲ་བའི་སྦྲེལ་ཐགhttp://www.tb1025. cn