དགའ་ལྡན་ཁྲི་ཐོག་གྱ་བཞི་པ་ཁྲི་ཆེན་བློ་བཟང་ཚུལ་ཁྲིམས་ནི། ཁམས་རྒྱལ་རོང་ཅོག་རྩེའི་ཁུལ་དུ་འཁྲུངས། སྐུ་ན་ཆུང་དུས་རང་དགོན་དུ་ཞུགས་ནས་ཡི་གེ་འབྲི་ཀློག་དང་ཆོས་སྤྱོད་ཆོ་ག་ལ་བསླབས་པས་ཚེགས་མེད་དུ་མཁྱེན། ན་སོན་པ་དང་དབུས་སུ་བྱོན་ནས་སེར་སྨད་གྲྭ་ཚང་རྒྱལ་རོང་ཁང་ཚན་དུ་ཆོས་ཞུགས་མཛད་དེ་བཤེས་གཉེན་མཁས་པ་དུ་མའི་ཞབས་པད་ལ་བཏུགས་ནས་གཞུང་ཆེན་པོའི་སློབ་གཉེར་མཐར་ཕྱིན་གནང༌།

       ལྷ་ལྡན་སྨོན་ལམ་ཆེན་མོའི་ནང་གདན་ས་གསུམ་གྱི་མཁས་པ་ཁྲི་ཕྲག་ཚོགས་པའི་དབུས་རྒྱལ་མཚན་དཀར་པོའི་འོག་ཏུ་གཞུང་ཆེན་བཀའ་པོད་ལྔར་རྩོད་སྒྲུབ་རིགས་པའི་ལམ་ནས་གྲྭ་སྐོར་དམ་བཅའ་བཞག་ནས་དགེ་བཤེས་ལྷ་རམས་པའི་མཚན་བཏགས་བཞེས།

       དེ་ནས་རྒྱུད་སྨད་དུ་ཞུགས་ཏེ་རྒྱུད་སྡེ་རྒྱ་མཚོའི་གཞུང་ལུགས་ལ་གཞན་དྲིང་མེད་པའི་མཁས་པ་དུ་མའི་ཞབས་དྲུང་ནས་གསང་སྔགས་ཀྱི་སློབ་གཉེར་གསན་བཞེས་ལེགས་པར་གྲུབ། པཎ་ཆེན་བསྟན་པའི་ཉི་མ་དང༌། ཡོངས་འཛིན་ཕུར་ལྕོག་རིན་པོ་ཆེ། ཁང་གསར་སྐྱབས་མགོན་བློ་བཟང་ཚུལ་ཁྲིམས། དགའ་ལྡན་གསེར་ཀོང་རྡོ་རྗེ་འཆང་སོགས་སྐྱེས་ཆེན་དུ་མའི་དྲུང་ནས་མདོ་སྔགས་ཀྱི་ཆོས་འབྲེལ་རྒྱ་ཆེར་ཞུས། རིམ་བཞིན་རྒྱུད་སྨད་བླ་མ་དབུ་མཛད་དང༌། མཁན་པོ། བྱང་རྩེ་ཆོས་རྗེ་བཅས་ཀྱི་ཁྲི་ལ་ཕེབས།

       རྒྱུད་པའི་སྒྲིག་སྤྱོད་དང༌། ཊིཀྐཱ་སྐྱོར་སྦྱངས། བརྩི་བཞག་སོགས་དམ་པའི་གོང་མའི་ཕྱག་སྲོལ་མ་ཉམས་པར་འཛིན་སྐྱོང་སྤེལ་གསུམ་གྱི་རྣམ་ཐར་བཟང་པོ་བདག་གིར་མཛད། བསྟན་གླིང་རྒྱལ་ཚབ་ནོ་མི་ཧན་དེ་མོ་འཕྲིན་ལས་རབ་རྒྱས་ཀྱི་དབུ་བླར་བསྟེན་པ་ལྟར་མདོ་སྔགས་ཀྱི་ཆོས་ཚུལ་རྒྱ་ཆེར་ཕུལ།

       སྨྲ༡སེར་སྨད་ཆོས་འབྱུང་༡༡༤ རབ་བྱུང་བཅོ་ལྔ་པའི་ལྕགས་སྟག་༡༨༩༠ལོར་དགའ་ལྡན་གསེར་ཁྲིར་ཕེབས་ཏེ་ཁྲི་ལོ་བདུན་བསྐྱངས་རིང་འཇམ་མགོན་རྒྱལ་བ་གཉིས་པའི་ལུང་རྟོགས་ཀྱི་བསྟན་པ་འདི་ཉིད་བཤད་སྒྲུབ་ལས་གསུམ་ཀྱི་སྒོ་ནས་བླ་ན་སྤེལ།

      ཤིང་ལུག་༡༨༩༥ལོར་ཆོ་འཕྲུལ་ཟླ་བའི་ཚེས་བཅུ་གཅིག་ཉིན་ལྷ་ལྡན་སྤྲུལ་པའི་གཙུག་ཁང་དུ་འཛམ་གླིང་རྟེན་གྱི་གཙོ་བོ་ཇོ་བོ་ཤཱཀྱ་མུ་ནིའི་སྤྱན་སྔར་ྋགོང་ས་རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་ལ་ཕུར་མཆཽག་ཡོངས་འཛིན་བློ་བཟང་ཚུལ་ཁྲིམས་མཆོག་གིས་མཁན་སློབ་སྦྲགས་མ་མཛད་ཅིང༌།

        ཡོངས་འཛིན་གླིང་སྤྲུལ་བློ་བཟང་ལུང་རྟོགས་བསྟན་འཛིན་འཕྲིན་ལས་ཀྱིས་གསང་སྟོན། སྒྲུབ་ཁང་སྤྲུལ་སྐུ་བློ་བཟང་ངག་དབང་བསྟན་འཛིན་རྒྱ་མཚོས་དུས་གོ་བ་མཛད་ནས་བརྙེན་པར་རྫོགས་པའི་དགེ་སློང་གི་སྡོམ་པ་ཕུལ་པའི་སྐབས་ཁྲི་ཆེན་རིན་པོ་ཆེ་འདི་ཉིད་དང་ཤར་རྩེ་ཆོས་རྗེ་བསྟན་པ་སྐལ་བཟང༌།

       བྱང་རྩེ་ཆོས་རྗེ་གཙང་ཐོབ་རྒྱལ་བློ་བཟང་རྒྱལ་མཚན་སོགས་ཀྱིས་ཁ་སྐོང་གི་ལས་གྲྭ་གནང༌། རྒྱལ་རོང་ཁྲི་པ་འདི་ཉིད་ཆོས་སྲིད་གང་ཅིར་མཁྱེན་རྒྱ་ཆེ་བའི་ཚུལ་མི་མཛད་པར་གྲགས་ཀྱང༌། ངེས་པའི་དོན་དུ་གྲུབ་པའི་དབང་ཕྱུག་ཆེན་པོ་ཞིག་སྟེ། ཁྲི་པ་ལས་ཐོག་སྐབས་སྒོ་མང་དགེ་བཤེས་ཤར་ཆེན་བསྟན་པ་སྐལ་བཟང་ལ། ངས་དགའ་ལྡན་གསེར་གདུང་ཁང་གི་ལྡེ་མིག་དེ་ཁྲི་བྱང་ཆུབ་སྤྲུལ་སྐུ་ལ་མ་གཏོགས།

       ཁྱོད་ལ་སྤྲད་རྒྱུ་མིན་ཞེས་ཡང་ཡང་གསུངས་པ་ལྟར། འབྲས་སྒོ་མང་འཇུག་ཆེད་པ་ཤར་ཆེན་བསྟན་པ་སྐལ་བཟང་ལོ་བཅུ་བཞིའི་རིང་ཤར་པ་ཆོས་རྗེའི་ཁྲིར་བཞུགས་པ་དེ་ཉིད། དགའ་ལྡན་གསེར་ཁྲི་ཆེན་མོར་ཕེབས་ཉེ་མཚམས་གློ་བུར་ཞི་བར་གཤེགས་པས། ཁྲི་བྱང་སྐུ་ཕྲེང་གཉིས་པ་ཚུལ་ཁྲིམས་དཔལ་ལྡན་ཤར་རྩེ་ཆོས་རྗེའི་ཁྲིར་ཕེབས་ཏེ།

       ཟླ་བ་གསུམ་ཙམ་སོང་རྗེས་དགའ་ལྡན་ཁྲི་ཆེན་སེར་སྨད་རྒྱལ་རོང་བློ་བཟང་ཚུལ་ཁྲིམས་ཁྲི་ལོ་བདུན་རྫོགས་པའི་བརྗེ་ཚབ་ཏུ་དགའ་ལྡན་གསེར་ཁྲིར་ཕེབས་པ་སོགས་དོན་ལ་གནས་པར་གྱུར་པས་མངོན་ཤེས་ཐོགས་མེད་དུ་མངའ་བ་བཤད།༢དགའ་ཤར་ཆོས་འབྱུང་ འཁྲུངས་ལོ་དང་འདས་ལོ་སོགས་མི་གསལ། རྗེ་འདིའི་རྣམ་ཐར་ཟུར་འཁོད་རིགས་ཀྱང་མེད་པར་འདྲ།

                   དགའ་ལྡན་ཁྲི་རབས་རིམ་བྱུང་གི་རྣམ་ཐར་ཛམྦུའི་གསེར་གྱི་ཕྲེང་བ་ལས་བཤུས།
   

      རྩོམ་སྒྲིག་པ། ཀླུ་ཚང་ འཇམ་དབྱངས་ཤེས་རབ།
     གསལ་འདེབས།
           རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།  གལ་ཏེ་འགོད་ ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
     དྲ་བའི་སྦྲེལ་ཐགhttp://www.tb1025. cn