དགའ་ལྡན་ཁྲི་ཐོག་བཅོ་བརྒྱད་པ་བྱེ་རི་རྒྱལ་མཚན་བཟང་པོ།
དགའ་ལྡན་ཁྲི་ཐོག་བཅོ་བརྒྱད་པ་བྱེ་རི་རྒྱལ་མཚན་བཟང་པོ་ནི། རབ་བྱུང་བརྒྱད་པའི་མེ་སྦྲུལ་༡༤༩༧ལོར་བྱང་བྱེ་རི་སྟག་རྩེའི་སྟག་གི་གྲོང་དུ་སྐུ་འཁྲུངས།
དགུང་ལོ་རེ་གཅིག་པ་རབ་བྱུང་དགུ་པའི་ཆུ་སྦྲུལ་༡༥༣༣ལོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་ཕེབས། རྗེའི་རིམ་ལྔ་གསལ་སྒྲོན་དང༌། བསྐྱེད་རིམ་དངོས་གྲུབ་རྒྱ་མཚོ་འགྲེལ་བ་བཞི་སྦྲགས་སོགས་སྔགས་ཕྱོགས་རྒྱུད་སྡེ་གཞུང་ལུགས་དུ་མའི་འཆད་ཉན་རྒྱ་ཆེར་སྤེལ་བཞིན་པའི་མུར། བྱང་རྩེ་ཆོས་རྗེར་ཕེབས།
དགུང་གྲངས་ལྔ་བཅུ་པ་རབ་བྱུང་དགུ་པའི་མེ་རྟ་༡༥༤༦ལོར་འཇམ་མགོན་རྒྱལ་བ་གཉིས་པའི་གདན་ས་དགའ་ལྡན་རྣམ་པར་རྒྱལ་བའི་གླིང་གི་མི་འཇིགས་གདོང་ལྔས་བཏེགས་པའི་གསེར་ཁྲིར་ཕེབས་ནས་མི་ལོ་གསུམ་གྱི་རིང་གསེར་ཁྲི་བསྐྱངས་ཏེ། བཤད་སྒྲུབ་འཁོར་ལོ་གསུམ་གྱི་སྒོ་ནས་འཇམ་མགོན་རྒྱལ་བ་གཉིས་པའི་ལུགས་བཟང་བླ་ནས་བླ་ན་བཏེགས།
དགུང་ལོ་ང་གཉིས་པ་རབ་བྱུང་དགུ་པའི་ས་སྤྲེལ་༡༥༤༨ཟླ་བ་དྲུག་པའི་ཚེས་ཉེར་དྲུག་ལ་མེ་ཏོག་གི་ཆར་འབབ་པ་དང་འཇའ་འོད་ཀྱིས་གུར་ཕུབ་པ་སོགས་ངོ་མཚར་བའི་ལྟས་དུ་མ་དང་བཅས་དགའ་ལྡན་དག་པའི་ཞིང་ཁམས་ཡབ་གཅིག་འཇམ་དཔལ་སྙིང་པོའི་དྲུང་དུ་གཤེགས།
སྐུ་གདུང་ཞུགས་ལ་ཕུལ་བའི་སྐབས་རིང་བསྲེལ་ཁ་བ་འབབ་པ་ལྟར་བྱུང་བ་མ་ཟད། ལྷ་སྐུ་དང་ཡིག་འབྲུ་དུ་མ་བྱུང་བ་རྣམས་ནང་རྟེན་དུ་བྱས་པའི་གདུང་རྟེན་དངུལ་གྱི་མཆོད་སྡོང་རིན་པོ་ཆེ་ལི་མ་ལྷ་ཁང་གི་ཤར་གྱི་རྟེན་གཙོའི་གཡོན་ཕྱོགས་ལྔ་པར་བཞུགས།
ལྷ་ཁང་འདིའི་མིང་ལ་ལོ་རྒྱུས་གཞནདང་གཞན་དུ་རྒྱ་གུར་ཞེས་ཀྱང་བྲིས་སྣང༌། རྗེ་འདི་ཡི་འཁྲུངས་གཤེགས་དང་གསེར་ཁྲིར་ཕེབས་པའི་ལོ་ཚིགས་ཐད་སྟག་ལུང་བྲག་གི་གདན་རབས་དང་ཀུན་མཁྱེན་བླ་མའི་འཇིགས་བྱེད་ཆོས་འབྱུང་སོགས་གསུང་སྒྲོས་མི་མཐུན་པ་དུ་མར་མཐོང་ཡང་ཁྲི་ཆེན་གོང་འོག་གི་རྣམ་ཐར་ལ་གཞིགས་ན་འདི་ཉིད་ཁུངས་ལྡན་དུ་བརྩིས་ན་འགྲིགས་སམ་སྙམ། །
དགའ་ལྡན་ཁྲི་རབས་རིམ་བྱུང་གི་རྣམ་ཐར་ཛམྦུའི་གསེར་གྱི་ཕྲེང་བ་ལས་བཤུས།
རྩོམ་སྒྲིག་པ། ཀླུ་ཚང་ འཇམ་དབྱངས་ཤེས་རབ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025. cn
