གངས་ཅན་ལྗོངས་ཀྱི་མི་ཡི་་སྲོལ།།

སྲོལ་གྱི་དམ་པ་ཡ་རབས་སྲོལ།།

སྲོལ་བཟང་ཕ་མེས་སྙིང་གི་སྲོལ།།

སྲོལ་གྱི་སྙིང་བོ་ལུགས་ཀྱི་སྲོལ།།

ད་ལྟ་བོད་ཀྱི་གུས་པའི་སྐོར་མི་ཤེས་པ་མང་བས་ཆེད་དུ་འདི་འདྲ་ཞིག་བསྒྲིག་རྒྱུ་ཡིན། འདིར་མ་འདུས་པ་དག་གསུང་རོགས།

བརྩི་བཀུར་གྱི་སྐོར། 

ཡི་གེ་ལ་ཆོས་བཞིན་བཀུར།

དགེ་རྒན་དང་ལོ་ལོན་དང་ཕ་མ།  ཡོན་ཏན། རང་ལས་ཆེ་བ་ལ་གུས་པ་བྱ་དགོས། ཡོང་ན་ལངས་པ་དང་།ལག་གི་དངོས་པོ་ལེན་པ་སོགས་བྱ་དགོས།

རང་རྒན་པའི་གོང་དུ་མི་འདུག་པ།འདུག་དུས་རང་གཞན་ལས་མཐོ་བ་མི་བྱེད་པ།

མི་གཞན་པའམ་ལྷག་པར་རྒན་པའི་སྔོན་ནས་ཡར་འགྲོ་མར་འགྲོ་མི་བྱེད་པ། 

བླ་མ་གྲྭ་བ་ཕེབས་སྐབས་གུས་པ་བྱེད། རང་གི་དགེ་རྒན་རིག་ན་གུས་པ་བྱེད། སྟོན་པའི་མནབ་བཟའ་ལ་གུས་པ་བྱེད། རྒན་པ་སོགས་ཀྱི་གོན་པ་ལ་མི་འགབ་པ།

དུས་སྟོན་གྱི་སྐོར།

ལོ་གསར་སྐབས་ལོ་ལོན་དང་དགེ་རྒན་ལ་ལོ་གསར་ལ་ངེས་པར་འགྲོ་དགོས།ལོ་ལོན་ལ་ལོ་གསར་བྱེད་ཅེས་སྐུ་གསུང་ཐུགས་རྟེན་ལ་ཕྱག་བྱེད།

ཚེ་འདས་ཀྱི་སྐོར།

མི་ཤི་ན་དགྲ་ཡིན་རུང་མི་སྔུན་ལ་འགྲོ་དགོས།རོང་བས་གཤིན་པོ་ལ་ཕྱག་བྱེད།

སུ་ཞིག་གི་ཁྱིམ་དུ་ཚེ་འདས་བྱུང་ན་ཉེ་འཁོར་དུ་གླུ་ལེན་གར་རྩེ་མི་བྱེད།བྱས་ན་བརྙས་པར་བརྩི།

ཤི་བའི་མིང་ནས་མི་འཛིན།དངོས་པོ་དང་ཉེར་སྤྱད་སོགས་མཐོང་སར་མི་འཇོག  ཕྲེང་བ་སོགས་བུ་ཕྲུག་གི་རྟེན་དུ་འཛིན།

གཙང་སྦྲའི་སྐོར།

ཆུ་མིག་གི་ཉེ་སར་བཤང་གཅིན་མི་འདོར།རྒྱུན་དུ་གཙང་སྦྲ་བྱེད།

སྲུང་མའི་སྐོར།

བསང་འཕུད་ན་སྲུང་མ་གཙོ་བོར་བྱེད།ཁྱིམ་གྱི་བསང་ཁུང་དུ་གཞན་ལ་བསངས་འབུལ་དུ་མི་འཇུག

བྱིས་པ་སྐྱེས་ན་སྲུང་མ་བསངས་འབུལ།བཀྲ་ཤིས་བརྩེགས་པ་འདོན།

སྐད་ཆའི་སྐོར།

རྒན་པ་ལ་ཐུང་ལན་མི་སློག་པ། ཕ་མ་ལ་ཚིག་ལན་མི་སློག་པ། 

ཕ་ཡུལ་བརྗེད་རུང་ཕ་སྐད་མ་བརྗེད་ཅེས་རང་ཡུལ་ནས་ངེས་པེ་ཕ་སྐད་བཤད་དགོས།

ཟ་འཐུང་གི་སྐོར།

ཇ་སྟེར་ན་ལག་པ་གཉིས་ཀྱིས་སྟེར་བ།

ཟས་བཟང་བོའི་ཕུད་ཁ་ཕ་མ་དང་མགྲོན་ལ་འདྲེན་པ།

ཇ་ལྡུད་ན་དཀར་ཡོལ་ཕྱེད་ཙམ་མི་ལྡུད།

ཟས་རིགས་ཀྱི་སྟེང་ལ་མི་འགོམ། འགོམ་ན་བསོད་ནམས་ཉམས་པར་བརྩི།

ཟ་མ་ལ་བཀུར་དགོས།རྐང་བས་བརྫིས་པ་དང་གང་སར་མི་འཕེན། ཐོར་བུ་ཡོད་ན་བྱ་དང་སྲོག་ཆགས་ལ་བསྟེར་དགོས།

བཟའ་བཏུང་ལ་ལོངས་སྤྱོད་དུས་མཆོད་ཁ་འཕེན་པ་དང་།  ཟས་མཆོད་དང་ཇ་མཆོད་འདོན་དགོས།

དགུང་མོ་ལས་དང་བཟང་བཏུང་གྲུབ་རྗེས་གོ་འདོན་བྱས་ནས་སོ་སོར་ཉལ།

གོས་ཀྱི་སྐོར།

གོན་པ་སེར་པོ་སོགས་མི་གོན་པ།

འཛེམ་བྱའི་སྐོར།

བུད་མེད་ཀྱི་སྐྲ་ལུང་འདོགས།ཁྱོ་ག་ཤི་ན་སྐྲ་ལུང་ནང་དུ་སྐོར།སྐྲ་ལུང་མི་འདོགས་པ་ཐན་དུ་བརྩི།

འགྲུལ་བ་ཡོད་དུས་ནང་མི་ཕྱགས།ཕྱགས་ན་ཁྱོད་སོངས་ཞེས་པའི་བརྡ་ཡིན།

གཞན་གྱི་མགོ་ལ་སོགས་པར་གང་འགར་མི་རེག

ནད་པ་སོགས་བྱུང་ན་སྒོར་མེ་ཐོ་འཇོག མེ་ཐོ་བཞག་ཡོད་ན་ཁྱིམ་དེར་མི་འགྲོ།

བླ་མར་མཇལ་བའམ་ཆོས་ཉན་པའི་སྐོར། 

ཆོས་དཔེ་ལ་ལྷག་ཏུ་གུས་པ་དང་གདན་སོགས་ལ་མི་འཇོག་པ། 

ཞྭ་འཕུད་དགོས།

བོད་ལྭའི་ཕུ་རུང་གོན་དགོས།

བུད་མེད་ཀྱིས་སྐྲ་ཐོར་ཅོག་མི་བྱེད།

སྔགས་པས་རལ་བ་མདུན་དུ་ལེན།

བུད་མེད་རྣམས་ཀྱི་སྐྲ་མདུན་དུ་ལེན་དགོས།

བཞུགས་ནས་ཉན་པ་ལས་འགྲོ་བཞིན་དུ་མི་ཉན།

ཁྲི་དང་ཨོང་སྟེགས་སྟེང་ནས་བསྡད་དེ་ཆོས་མི་ཉན།

ཆོས་ཉན་དུས་ཁ་ཐུམ་ལེན་དགོས། 

ལྷམ་ཕུད་པ་རྐང་འབོག་ཀྱང་འཕུད་དགོས།

ཁ་བཏགས་འབུལ་པའི་སྐོར། 

ཁ་བཏགས་འབུལ་དུས་ཁ་བཏགས་ཉིས་ལྡེབ་ཀྱིས་ཁ་འབུལ་ཡུལ་ལ་གཏོད་དགོས།

དམན་པར་ཁ་བཏགས་ལ་སྐེ་ལ་འཐེན།ཆེ་བར་ཕྱག་ཏུ་འབུལ།

ཡ་རབས་ལུགས་བཟང་འཇིག་རྟེན་མི་ཡི་ཆོས།  ། 

ཆོས་ལྡན་ཡུལ་གྱི་སྲོལ་བཟང་དམ་པའི་ཆོས།། 

ཆོས་འདི་ལེགས་ན་དམ་པའི་ལྷ་ཡི་ཆོས།།

ཆོས་བཞིན་ཡོང་ངོ་ཕ་བཟང་བུ་རྒོད་དག། 

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn