གསེར་ཉ་ནི་ཉ་མོ་གསེར་གྱི་ཁྲབ་ཅན་གྱི་ལོ་རྒྱུས་ལྟར་བཀྲ་ཤིས་དང་། རྒྱ་མཚོར་རོལ་པས་དམ་པའི་ཆོས་ལ་སྤྱོད་པ་དང་། མྱུར་འཁྱུག་གིས་ཤེས་རབ་དང་། གསེར་མདོག་ཅན་གྱི་མིག་གཉིས་འབུར་བས་བདེན་གཉིས་བཅས་མཚོན་ནོ། །

བུམ་པ་བཟང་བོ་ནི་རྫས་སྔགས་ཏིང་འཛིན་གྱིས་བསྒྲུབས་པའི་གཏེར་གྱིས་བུམ་པ་ཞེས་པ་གྲུབ་པ་རིན་པོ་ཆེ་མཛད་པ་མེད་པའི་རང་བཞིན་དུ་གྱུར་ནས་བཀྲ་ཤིས་པ་ལྟར། དོན་དམ་པའི་ཆོས་གྲུབ་པ་ནས་སྲིད་ཞིའི་དགེ་ལེགས་མཛད་མེད་འཕེལ་བ་སོགས་མཚོན་ནོ། །

པད་མ་ནི་བསྐལ་པ་འདི་ཆགས་པ་ན་རྒྱ་མཚོ་ཆེན་པོ་ལས་འདབ་སྟོང་པདྨ་སྐྱེས་པ་དེ་རྣམ་འདྲེན་སྟོང་རྩ་འབྱོན་པའི་བཀྲ་ཤིས་པའི་རྟགས་སུ་བྱུང་བ་དང་། འདོད་ཡོན་ལྔའི་ཡོན་ཏན་དང་ལྡན་པས་ལྷ་ཆེན་པོ་རྣམས་ཀྱང་དེ་ལ་དགའ་བ་སོགས་ལྟར་ཏེ། དེས་ཀྱང་ལམ་འབྲས་ལྟ་སྤྱོད་སོགས་ཕྱི་ནང་ཡོངས་གཙང་སྦྲང་རྩིའི་བཅུད་ཆགས་འདྲ་སོགས་མཚོན་ནོ། །

དུང་དཀར་གཡས་འཁྱིལ་ནི་བྱང་ཆུབ་སེམས་དཔའ་སྐྱེ་བ་ལྔ་བས་བདག་གིར་བཞེས་པའི་རྟེན་དེ་བུས་པའི་སྒྲ་སུས་ཐོས་ཀྱང་ངན་འགྲོར་མི་སྐྱེ་བའི་ཕན་ཡོན་ཡོད་ཅིང་། སྟོན་པ་ལ་ཆོས་འཁོར་བསྐོར་བར་སྐུལ་བའི་རྟེན་དུའང་དེ་འདྲ་བྱུང་བ་དང་། དམ་པའི་ཆོས་ཀྱི་སྒྲས་ཕྱོགས་སུ་ཁྱབ་པ་འབྱུང་བ་སོགས་མཚོན་ནོ། །

དཔལ་བེའུ་ནི་གཡུང་དྲུང་གི་རི་མོ་སྟེ། ལྷ་དང་སངས་རྒྱས་སོགས་རྟག་བརྟན་དང་ཚེ་རིང་འབྱུང་བའི་རྟགས་སུ་ལུས་ལ་དེའི་རི་མོ་འབྱུང་བ་དང་། དེས་རྟག་བརྟན་འཆི་བ་མེད་པའི་གོ་འཕང་སྟེ་ཐར་ལམ་མཚོན་ནོ། །

རྒྱལ་མཚན་ནི་འཇིག་རྟེན་ན་གང་གཡུལ་ལས་རྣམ་པར་རྒྱལ་བའི་རྟགས་སུ་རྒྱལ་མཚན་གྱི་དར་འཕྱར་བ་དང་། དེས་བདུད་བཞིའི་གཡུལ་ལས་རྒྱལ་བའི་མཚན་མ་ནི། ཁྱུང་དང་སེང་གེ་འདུས་པ་ལས་སེང་གེ་ཁྱུང་གི་གཤོག་པ་ཅན། དུང་དང་ཆུ་སྲིན་འདུས་པ་ལས་ཆུ་སྲིན་དུང་གི་མཇུག་མ་ཅན། ཉ་སྲམ་འདུས་པ་ལས་ཉ་སྤུ་ཅན་སྲམ་གྱི་སྡེར་མོ་ཅན་ཏེ་མི་མཐུན་དྲུག་སྦྱོར་གྱི་རྟགས་ཀྱང་བྱའོ། །

འཁོར་ལོ་ནི། འཁོར་ལོས་བསྒྱུར་བའི་རྒྱལ་པོའི་བསོད་ནམས་ཀྱི་མཐུས་འགྲུབ་པའི་མཚོན་ཆའི་འཁོར་ལོ་སྟེ་མིས་བསྐོར་མི་དགོས་པར་རང་འཁོར་གྱིས་དགྲ་ལས་རྒྱལ་བར་བྱེད་པ་དང་། དེ་ཡང་གཡུལ་ལས་རྒྱལ་བ་ལས་རྒྱལ་བ་དང་། རྒྱལ་བ་གནད་དུ་འབེབ་པ་དང་། མཐོ་བར་འཕར་བ་དང་། དམའ་བར་འབབ་པ་ལ་སོགས་པའི་དཔེ་ཇི་བཞིན། འདིར་ཡང་དེ་ལྟར་མཚོན་བྱ་དོན་གྱི་ལྷའི་དབང་བོ་བརྒྱ་བྱིན་གྱིས་སྟོན་པ་བཅོམ་ལྡན་འདས་ལ་ཆོས་འཁོར་བསྐོར་བར་སྐུལ་བྱེད་ཀྱི་རྫས་ཀྱང་ཡིན་པས་བཀྲ་ཤིས་པ་འབྱུང་བར་བྱེད་པའི་རྫས་དང་། དེས་ནི་གདུལ་བྱ་ལ་ཆོས་འཁོར་བསྐོར་ནས་འཇིག་རྟེན་ཀུན་ལ་བཀྲ་　　ཤིས་པར་བྱས་པ་དེ་མཚོན་ཞིང་། མ་འོངས་པ་ན་ཡང་དེ་ལྟར་བཀྲ་ཤིས་པ་འབྱུང་བའི་རྫས་སུ་བསྒྱུར་པ་ལྟར་འདིར་ཡང་དེ་ལྟར་བཀྲ་ཤིས་པའི་དངོས་པོར་མཆོད་པར་བྱ་བ་ཡིན་པ་བརྒྱད་ཀ་ལའང་འདྲའོ། །

ཡང་ན་གདུགས་དཀར་གྱིས་སངས་རྒྱས་ཀྱི་སྐུའི་དབུ་གདུགས་ལྟར་རྒྱས་པ་མཚོན་པ་དང་། གསེར་ཉས་ཡེ་ཤེས་ཀྱི་སྤྱན་དང་ལྡན་པ་མཚོན་ལ། པད་མས་ཞལ་དཀྱིལ་ཁེབས་པའི་ལྗགས་མཚོན་པ་དང་། ཆོས་དུང་གིས་དཔལ་གྱི་མགུལ་བ་མཚོན་པ་དང་། བུམ་པས་གསུང་གི་ཡོན་ཏན་མཚོན་པ་དང་། དཔལ་བེའུས་ཐུགས་ཀྱི་ཡོན་ཏན་མཚོན་ཞིང་། ནོར་བུས་སྐུའི་ཡོན་ཏན་མཚོན་པ་དང་། འཁོར་ལོ་འཕྲིན་ལས་ཀྱི་ཡོན་ཏན་མཚོན་བྱེད་དུ་སྦྱར་ནས་དེ་དང་དེས་འཇིག་རྟེན་ཐམས་ཅད་དགེ་བར་མཛད་པའི་ཚུལ་དང་བཅས་རྒྱ་ཆེར་སྤྲོས་པར་ཡོད་དོ། །

                《ནང་བསྟན་ལྷ་ཚོགས་ཆེན་མོ》ལས་བཤུས།

                                            རྩོམ་སྒྲིག་པ།  ཤེས་རབ་རལ་གྲི། 
གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn