བདེན་བཞིའི་རྣམ་གཞག་ཚིགས་བཅད་དུ་བསྡེབས་པ་བློ་གསལ་གཞོན་ནུའི་མགུལ་རྒྱན་ཞེས་བྱ་བ།

ཡོང་ཁུངས།   དགེ་ལུགས་པའི་དྲ་བ།     སྤེལ་དུས།  2018-10-14 16:15:55     རྩོམ་པ་པོ།   བཛྲ་ཚུལ་ཁྲིམས་རྒྱ་མཚོ།    ཀློག་ཐེངས།  

༼༡༽

རྟེན་འབྲེལ་ཇི་བཞིན་སྟོན་པའི་སངས་རྒྱས་དང་།།

དེ་ཡིས་བསྟན་པ་འགོག་ལམ་དམ་པའི་ཆོས།།

དེ་དོན་སྒྲུབ་པའི་རིག་གྲོལ་དགེ་འདུན་སྡེ།།

ནམ་ཡང་མི་འབྲལ་སྤྱི་གཙུག་རྒྱན་དུ་མཆོད།།

ཟབ་དང་རྒྱ་ཆེའི་ལམ་གྱི་རིམ་པའི་རྒྱུན།།

འཕགས་བོད་ཀུན་ལ་བརྩེ་བས་འདོམས་མཛད་པ།།

བྱམས་དང་འཇམ་དབྱངས་ཀླུ་སྒྲུབ་ཐོགས་མེད་སོགས།།

རྒྱ་བོད་ལོ་པཎ་ཀུན་ལ་སྙིང་ནས་འདུད།།

གང་གིས་ཚུལ་བཞིན་བསྟེན་ན་ལེགས་ཚོགས་ཀུན།།

བདེ་བླག་ཉིད་དུ་སྩོལ་མཛད་བླ་མ་ལ།།

སྒོ་གསུམ་གུས་པས་འདུད་དོ་དགེ་བའི་ནོར།།

བདག་རྒྱུད་མཛོད་ལ་གཏེར་བཞིན་སྤུངས་པར་མཛོད།།

སྔོན་ཚེ་ཐུབ་པས་སྐལ་ལྡན་གདུལ་བྱའི་ཚོགས།།

རྣམ་གྲོལ་ཐར་བར་འགོད་ཕྱིར་བཀའ་བསྩལ་བའི།།

ཐེག་གསུམ་ལམ་གྱི་སྙིང་བོ་བསྡུས་པའི་སྡོམ།།བ

དེན་བཞིའི་རྣམ་གཞག་འདིར་ཡང་མདོ་ཙམ་འགོད།།

དེ་ཡང་སྟོན་པས་ཇི་སྙེད་བཀའ་བསྩལ་བ།།

ཀུན་གྱི་དགོངས་པའི་གཏད་སོ་མར་གྱུར་འགྲོ།།

མ་ལུས་སྲིད་མཚོར་བྱིང་བ་སྒྲོལ་བའི་ཆེད།།

ཉིད་དུ་འཕགས་བོད་མཁས་རྣམས་མགྲིན་གཅིག་གླེང་།།

འོན་ཀྱང་ཕྱི་རོལ་ཚེར་མ་འདོན་པ་བཞིན།།

ནང་གི་སྡུག་བསྔལ་སེལ་བའི་ཐབས་མེད་པས།།

དེ་དག་ཀུན་གྱི་རྩ་བ་དུས་ཀུན་ཏུ།།

གཏན་ཏུ་སྐྱེ་མེད་དྲུངས་ནས་སུན་དབྱུང་དགོས།།

དེ་ཡང་སྡུག་བསྔལ་མ་ལུས་ལས་ལས་བྱུང་།།

ལས་ཀྱང་ཕྲ་རྒྱས་དེ་དག་ཉིད་ལས་ཀྱང་།།ག

ཙོ་བོ་བདག་ཏུ་འཛིན་པའི་མ་རིག་པ།།

དགྲ་ཡི་དྭངས་མ་ཉིད་དུ་ཤེས་པར་མཛོད།།

༼༢༽

དེ་ཉིད་དྲུངས་ནས་འབྱིན་པའི་་གཉེན་པོ་དངོས།།

ཟབ་མོ་རྟེན་འབྲེལ་རྟོགས་པའི་ཤེས་རབ་ཏུ།།

ངེས་ཕྱིར་སྡེ་སྣོད་ཀུན་ཀྱང་ལམ་དེ་རུ།།

འབབ་ཅིང་གཞོལ་བ་ཉིད་དུ་མཁས་རྣམས་གསུངས།།

མདོར་ན་བཀའ་དང་དགོངས་འགྲེལ་དྲི་མེད་ཀུན།།

གདུལ་བྱའི་སྡུག་བསྔལ་རྒྱུ་བཅས་སྤོང་བ་དང་།།

མྱང་འདས་ཐོབ་བྱེད་ལམ་བཅས་འདོམས་པ་ལས།།

མེད་ཕྱིར་བདེན་བཞིའི་ཚུལ་འདི་གཅེས་མཛོད་ཉིད།།

བདེན་བཞིའི་བླང་དོར་ཇི་བཞིན་སྟོན་ནུས་པས།།

སྟོན་པ་ཚད་མར་བསྒྲུབས་ཤིང་མི་རྟག་སོགས།།

སྟོན་པའི་རྟགས་ཀྱིས་ཐེག་པ་ཆེན་པོ་ཡང་།།

བཀའ་ལུང་ཚད་མར་བསྒྲུབ་ནུས་འདི་གལ་ཆེ།།

དེ་ཡང་ཁྱད་གཞི་བདེན་བཞིའི་རྣམ་གཞག་དང་།།

ཁྱད་ཆོས་མི་རྟག་སོགས་ཀྱི་རྣམ་པར་གཞག།

དེ་དག་གོམས་པས་ལམ་གྱི་བགྲོད་ཚུལ་གསུམ།།

བློ་གསལ་གཞོན་ནུའི་བློ་ཡི་རྒྱན་དུ་འབུལ།།

དང་བོ་བདེན་པ་བཞི་ཡི་རྣམ་གཞག་ལ།།

བཞི་རུ་ཕྱེ་བའི་དགོས་པ་བཤད་པ་དང་།།

སྡུག་བདེན་སྔོན་དུ་གསུངས་པའི་དགོས་པ་དང་།།

སོ་སོའི་ངོ་བོ་གྲུབ་མཐའི་འདོད་ཚུལ་བཞི།།

སྡུག་བསྔལ་བདེན་དང་ཀུན་འབྱུང་བདེན་པ་དང་།།

འགོག་པའི་བདེན་པ་ལམ་གྱི་བདེན་པ་སྟེ།།

བཞི་ནི་བདེན་པ་བཞིའོ་བཞིར་ཕྱེ་ནས།།

གསུངས་པའི་དགོས་པ་འདི་ལྟར་ཤེས་བྱ་སྟེ།།

སྲིད་ན་ཆེར་རློམ་ཚངས་དང་དབང་བོ་དང་།།

ཀུན་ལ་དབང་བསྒྱུར་འཁོར་ལོས་བསྒྱུར་རྒྱལ་ནས།།

དམའ་བ་འབངས་དང་སློང་མོ་བ་རྣམས་དང་།།

ཐ་ན་ཉམ་ཆུང་སྲིན་འབུ་ཡིན་ཡང་རུང་།།

སྡུག་བསྔལ་ཕྲ་མོ་ཙམ་ཡང་མི་འདོད་ཅིང་།།

བདེ་ལ་ནམ་ཡང་ཆོག་ཤེས་མེད་པའི་ཚུལ།།

སྔོན་བྱོན་དམ་པས་གསུངས་ཤིང་མྱོང་བས་ཀྱང་།།

འགྲུབ་པའང་མང་བས་བློ་ལྡན་སུ་ཞིག་བསྙོན།།

དེས་ན་རང་ཉིད་ལེགས་སུ་འདོད་པ་རྣམས།།

གང་ལས་ལྡོག་པ་གང་དུ་འཇུག་པ་ཉིད།།

ཤེས་ནས་བླང་དོར་བྱ་ཕྱིར་ཀུན་ཉོན་དང་།།

རྣམ་བྱང་ཕྱོགས་གཉིས་གཏན་ལ་དབབ་བྱར་ངེས།།

དེ་ཡང་བསྡུས་ན་སྡུག་ཀུན་རྒྱུ་འབྲས་གཉིས།།

ཀུན་ཉོན་ཕྱོགས་དང་རྣམ་པར་བྱང་བའི་ཕྱོགས།།

འགོག་ལམ་གཉིས་སུ་འདུ་བའི་དབང་བྱས་ནས་།།

གསུངས་ཀྱི་ཕུང་གསུམ་སེལ་བའི་གྲངས་ངེས་མིན།།

༼༣༽

དེ་ལ་དཀར་དང་ནག་པོའི་ཕྱོགས་གཉིས་ལ།།

བརྟེན་པ་གཉིས་སུ་ངེས་པས་བདེན་པ་བཞིར།།

བཞག་ཅེས་ཉན་སར་གསུངས་པའང་ཀུན་བྱང་ལ།།

གོ་ཡི་དཀར་ནག་སྤྱི་ལ་མི་རུང་སྟེ།།

འཕེན་བྱེད་དགེ་ལས་ལྟ་བུ་སྤྱིར་བཏང་ནི།།

དཀར་པོའི་ཕྱོགས་སུ་འདོད་དགོས་སྤྱད་པ་ལས།།

བདེ་འབྱུང་ཕྱིར་དང་དེ་དེའི་མཚན་ཉིད་ཕྱིར།།

འདིར་ནི་ནག་ཕྱོགས་ལྡོག་བྱའི་བདེན་པའི་ཕྱིར།།

ལ་ལས་ལྡོག་བྱ་མིན་ཏེ་གནས་སྐབས་ཀྱི།།

བླང་བྱ་ཡིན་ཕྱིར་ཟེར་ཡང་བདེན་པ་བཞིའི།།

འཇུག་ལྡོག་སྟོན་པ་སྤྱི་ལུགས་དང་འགལ་ཞིང་།།

ཁྱད་པར་བཞི་བརྒྱ་རྩ་འགྲེལ་གཞུང་དང་འགལ།།

ད་དུང་འདི་ལ་བཤད་བྱ་མང་ན་ཡང་།།

ད་ལྟ་ཕལ་ཆེར་དོན་གཉེར་དམན་པའི་ཕྱིར།།

ད་ནི་དེ་ཙམ་བྱའོ་ཤེས་འདོད་ན།།

ད་རུང་གཞུང་ཆེན་ལྟོས་དང་ཡ་མཚན་ཡོད།།གཉིས་པ་སྤྱིར་ནི་གོ་རིམ་སྣ་ཚོགས་ཏེ།།

བཤད་དང་རྒྱུ་འབྲས་དམན་མཆོག་ངེས་དཀའ་སླ།།

ཇི་ལྟར་མངོན་རྟོགས་སྐྱེ་བའི་རིམ་པ་སོགས།།

མདོ་དང་བསྟན་བཅོས་དག་ལ་མཇལ་ན་གསལ།།

མངོན་རྟོགས་རྒྱན་ལས་སེམས་བསྐྱེད་རིགས་ཀྱི་སྔོན།།

གསུངས་པ་ལྟ་བུ་བཤད་པའི་རིམ་པ་དང་།།

ཕྱིན་དྲུག་རགས་ཕྲ་རྒྱུ་འབྲས་དམན་མཆོག་གམ།།

དཀའ་སླའི་གོ་རིམ་སོགས་སུ་མདོ་རྒྱན་གསུངས།།

དེ་ལྟར་མང་ཡང་བདེན་བཞིའི་གོ་རིམ་ལ།།

རྒྱན་ལས་རྒྱུ་དང་ལམ་དང་སྡུག་བསྔལ་དང་།།

ཞེས་པ་ལྟ་བུ་རྒྱུ་འབྲས་དོན་གྱི་རིམ།།

སྟོན་ཚུལ་སྐབས་འགར་སྲིད་ཀྱང་ཕལ་མོ་ཆེར།།

སྡུག་བསྔལ་ཀུན་འབྱུང་འགོག་དང་ལམ་བདེན་ཞེས།།

རྒྱུ་འབྲས་ལས་ལྡོག་སྡུག་བདེན་ཐོག་མ་རུ།།

གསུངས་པ་ཅིའི་ཕྱིར་སྙམ་ན་མངོན་མཛོད་ལས།།

མངོན་རྟོགས་སྐྱེ་བའི་རིམ་པར་གསུངས་ཕྱིར་རོ།།

༼༤༽

དེ་ཡང་སྡུག་བསྔལ་ནད་འདྲར་ཤེས་པ་ན།།

དེ་དང་འབྲལ་དགོས་པའང་ཤེས་འགྱུར་ཞིང་།།

དེ་ལ་དེ་རྒྱུ་ལོག་པར་ལྟོས་མཐོང་ནས།།

དེ་རྒྱུ་ཀུན་འབྱུང་སྤོང་འདོད་སྐྱེ་བར་འགྱུར།།

དེ་ཡང་རྒྱུ་ཡི་རྩ་བ་ངོས་ཟིན་ནས།།

དེ་ཡི་ཞེན་ཡུལ་ཁེགས་ན་དེ་ཉིད་ཀྱང་།།

གཞི་མེད་པས་ན་སྤོང་ནུས་སུ་ཤེས་ནས།།

འགོག་པ་མངོན་དུ་བྱ་བའི་བློ་སྐྱེའོ།།

དེ་ལྟར་སྡུག་བསྔལ་རྒྱུ་བཅས་སྤོང་དགོས་ཤིང་།།

རང་གིས་ཀྱང་ནི་སྤོང་བར་ནུས་མཐོང་སྟེ།།

དེ་སྤོང་ལ་འཇུག་དཔྱོད་ལྡན་སྤྱིའི་ལམ་སྲོལ།།

ཉིད་ཕྱིར་ལམ་གྱི་བདེན་པ་བཞི་བར་བསྟན།།

འདི་ཡང་རྒྱུད་བླ་རྩ་འགྲེལ་རྣམ་འགྲེལ་སོགས།།

གཞུང་ཆེན་དགོངས་པ་ཉིད་ཕྱིར་གལ་ཆེ་ཞིང་།།

གསར་རྟོགས་སྐབས་སུ་མ་ཟད་ཉམས་ལེན་གནད།།

ཡོད་པས་རིམ་པ་འདི་ལྟར་བསྟན་ཞེས་གསུངས།།

དེ་ཡང་རང་ཅག་ཕལ་བའི་ཤེས་རྒྱུད་ལ།།

ཞིབ་ཏུ་བརྟགས་ན་ཚིག་སྤྱི་ཙམ་མ་གཏོགས།།

སྙིང་ནས་ཐར་བ་དོན་གཉེར་མི་སྐྱེ་ཞིང་།།

སྡུག་བསྔལ་རྒྱུ་ལ་ངང་གིས་འཇུག་པ་འདི།།

ཅི་ཕྱིར་སྙམ་ན་ཐོག་མ་མེད་པ་ནས།།

རང་སེམས་ཉོན་མོངས་དབང་གྱུར་སྡུག་བསྔལ་ལ།།

བདེ་བར་འཁྲུལ་བས་བསླུས་ཏེ་ནད་སེལ་བྱེད།།

གཉེན་པོ་མི་བསྟེན་འཕེལ་བྱེད་ལ་འཇུག་བཞིན།།

དེས་ན་རང་ཉིད་ནད་ལས་བཟློག་པ་ལ།།

ནད་ལ་ནད་དུ་ངེས་པར་ཤེས་དགོས་ལྟར།།

སྲིད་པ་སྡུག་བསྔལ་ཉིད་ལ་སྡུག་བསྔལ་དུ།།

མཐོང་ཞིང་ཞེན་པ་གཏིང་ནས་མ་ལོག་ན།།

ཇི་ལྟར་རྩ་བ་ཆད་པའི་ལྗོན་ཤིང་ལ།།

ཕུན་ཚོགས་འབྲས་བུ་སྨིན་པར་མི་འགྱུར་ལྟར།།

དེ་མུར་འབད་ལོ་བྱས་ཀྱང་བདེ་མིན་ལ།།

བདེར་བཟུང་ཐར་འདོད་རྣལ་མ་གཏན་མི་སྐྱེ།།

སྡུག་བསྔལ་གསུམ་ལས་སྡུག་བསྔལ་གྱི་སྡུག་བསྔལ།།

དབྱུག་པས་བརྡུང་དང་མཁལ་མའི་ཟུག་གཟེར་བཞིན།།

དུད་འགྲོ་རྣམས་ཀྱང་ཤེས་ནུས་དེ་ཉིད་ལ།།

ཡིད་འབྱུང་ཀུན་ལ་ཡོད་ཚུལ་ཤེས་པར་སླ།།

འགྱུར་བའི་སྡུག་བསྔལ་སྡུག་བསྔལ་ཆེ་རིམ་ནས།།

འགག་ཤུལ་སྡུག་བསྔལ་ཆུང་ངུར་བདེར་སྣང་བའི།།

ཟག་བཅས་ཚོར་བདེ་ཙམ་སྟེ་རང་བཞིན་གྱི།།

བདེ་མིན་ཡུན་དུ་བསྟེན་ན་འགྱུར་ཕྱིར་རོ།།

དཔེར་ན་ཚ་བས་གདུངས་པའི་མི་འགའ་ཞིག།

བསིལ་བར་བསྡད་ཚེ་དང་བོར་བདེ་ཉམས་ཙམ།།

སྐྱེ་ཡང་ཡུན་དུ་བསྟེན་ན་སྡུག་བསྔལ་དུ།།

འགྱུར་བས་ཡིད་འབྱུང་ཕྱི་རོལ་བ་ལའང་ཡོད།།

༼༥༽

སྡུག་བསྔལ་བ་དང་ཉོན་མོངས་སྐྱེད་པ་ཡི།།

ནུས་པའམ་ས་བོན་མ་ཉམས་བརྟན་ཆགས་པར།།

ལྡན་པའི་ཕུང་ལྔར་ཁྱབ་པ་འདུ་བྱེད་ཀྱི།།

སྡུག་བསྔལ་ཞེས་བྱར་ལམ་རིམ་སོགས་ལས་གསུངས།།

ཇི་ལྟར་བཙོན་དུ་ཚུད་ཅིང་གསོད་ངེས་ཤིག།

གནས་སྐབས་ངོ་ཆེན་ཞུས་པས་ཁྲིམས་ཆད་ཀྱིས།།

ལུས་ལ་སྡུག་བསྔལ་མེད་ཀྱང་ཉིན་རེ་བཞིན།།

འཆི་ལ་ཉེ་བས་བློ་ཕུག་མི་བདེ་ཞིང་།།

གཡང་ལ་ལྷུང་ངེས་འགའ་ཞིག་གཡང་ཁ་ན།།

སྐྱིད་པའི་ཉམས་ཀྱིས་སྡོད་ཀྱང་སྐྱིད་མེད་ཅིང་།།

ཇི་ལྟར་ཁུར་ཆེན་ཁྱེར་རྣམས་ཁུར་དེ་ཉིད།།

ཇི་ཙམ་འཁུར་དགོས་དེ་སྲིད་བདེ་མི་འགྱུར།།

དེ་བཞིན་སྡུག་བསྔལ་ཉོན་མོངས་གནས་ངན་ལེན།།

བརྟན་ཆགས་ལྡན་པའི་ཉེར་ལེན་ཕུང་བོ་འདི།།

ཡོད་ཚེ་གནས་སྐབས་སྡུག་མི་བསྔལ་ན་ཡང་།།

སྡུག་བསྔལ་བསྐྱེད་པར་འགྱུར་བས་བདེ་ཡོད་མིན།།

མཐོ་བ་སྲིད་པའི་རྩེ་ནས་མནར་མེད་བར།།

ཁྱབ་པའམ་བདེ་སྡུག་བཏང་སྙོམས་ཐམས་ཅད་ལ།།

ཁྱབ་པས་ཁྱབ་པ་སྡུག་བསྔལ་གཞན་གཉིས་ནི།།

འདུ་བྱེད་པའམ་སྐྱེད་པས་འདུ་བྱེད་དོ།།

འདི་ནི་ཚོར་བ་སྡུག་བསྔལ་དངོས་མིན་ཡང་།།

དེ་ཡི་རང་བཞིན་ཉིད་ལས་མ་འདས་པས།།

སྡུག་བསྔལ་ཞེས་བརྗོད་ཐར་འདོད་ཐར་བ་རུ།།

བགྲོད་པར་ཉམས་ལེན་ཟབ་མོའི་གནད་བསྟན་ཡོད།།

ཚོར་བ་སྡུག་བསྔལ་འདོད་ཁམས་ཁོ་ནར་ཡོད།།

ཚོར་བ་བདེ་བ་བསམ་གཏན་གསུམ་པའི་བར།།

བཏང་སྙོམས་ཁམས་གསུམ་ལ་ཁྱབ་སྲིད་གསུམ་ལ།།

ངེས་འབྱུང་ནང་བ་ཁོ་ནས་ཤེས་ཤིང་སྒོམ།།

བདེན་བཞི་ཕྲ་རགས་མ་ལུས་མངོན་སུམ་དུ།།

རང་གིས་གཟིགས་ཤིང་གཞན་ལའང་ཇི་བཞིན་དུ།།

སྟོན་མཛད་སྟོན་པ་ཚད་མས་སྡུག་བསྔལ་ནི།།

ཤེས་བྱར་གསུངས་པའང་གཙོ་བོར་འདུ་བྱེད་དོ།།

མདོར་ན་སྲིད་པ་མཐའ་དག་མེ་འོབས་སམ།།

རལ་གྲི་གདེངས་པའི་གཤེད་མ་ལྟར་མཐོང་བའི།།

འདུ་ཤེས་འབྱུང་ཞིང་དེ་ལས་ཐར་འདོད་ཀྱི།།

ངེས་འབྱུང་རྣལ་མས་རྣམ་གྲོལ་བསྒྲུབ་ཕྱིར་དང་།།

དེ་ལྟར་རང་གི་ཉམས་ལ་དཔགས་ན་ནི།།

མར་གྱུར་འགྲོ་བ་མ་ལུས་སྲིད་མཚོ་ལས།།

སྐྱོབས་འདོད་སྙིང་རྗེ་ཚེགས་མེད་པར་འབྱུང་བས།།

སྡུག་བདེན་ཐོག་མར་གསུངས་ལ་དགོས་པ་ཆེ།།

༼༦༽

གསུམ་པ་སོ་སོའི་ངོ་བོ་འདི་ལྟ་སྟེ།།

རང་རྒྱུ་ཀུན་འབྱུང་བདེན་པ་ལས་སྐྱེས་པའི།།

ཆ་ནས་བཞག་པའི་ཟག་བཅས་དངོས་པོ་དེ།།

དང་བོ་སྡུག་བསྔལ་བདེན་པའི་མཚན་ཉིད་དོ།།

དབྱེ་ན་རྣམ་སྨིན་འབྲས་བུ་ཉེར་ཕུང་དང་།།

བདག་འབྲས་མ་དག་སྣོད་དེ་ཕྱི་ནང་གཉིས།།

ངོ་བོའི་སྒོ་ནས་སྡུག་བསྔལ་གྱི་སྡུག་བསྔལ།།

འགྱུར་དང་ཁྱབ་པ་འདུ་བྱེད་སྡུག་བསྔལ་གསུམ།།

རང་ལུགས་སྡུག་བདེན་སྣོད་བཅུད་གཉིས་བཞག་པ།།

ཤིང་རྟ་ཆེན་པོའི་དགོངས་དོན་ཉིད་ཡིན་ཏེ།།

སེམས་ཅན་སྐྱེ་དང་སྐྱེ་པའི་གནས་ཀྱིས་ཀྱང་།།

སྡུག་བདེན་རིག་བྱར་ཀུན་བཏུས་གསུངས་ཕྱིར་རོ།།

འོ་ན་སྡུག་བསྔལ་འཁོར་བ་ཅན་ཕུང་བོ།།

ཞེས་སོགས་རྣམ་འགྲེལ་ལུང་དོན་ཅི་ཞེ་ན།།

དེ་ལ་སྣོད་དང་བཅུད་གཉིས་ཡོད་ན་ཡང་།།

ཉེར་ཕུང་བཤད་པ་ཡིད་འབྱུང་བསྐྱེད་ཕྱིར་གསུངས།།

སྡུག་བསྔལ་བདེན་པར་འཁོར་བས་ཁྱབ་མ་ཁྱབ།།

ལ་སོགས་མཁས་པའི་བཞེད་ཚུལ་མང་མོད་ཀྱང་།།

མི་རྩོད་ཚུལ་འདི་སྡེ་རྒྱན་དགོངས་དོན་ལགས།།

སྡུག་བསྔལ་དེ་ལ་སྡུག་བསྔལ་གསུམ་དབྱེ་ན།།

ཟག་བཅས་ཚོར་བདེ་གཟུགས་མེད་ཉེར་ཕུང་གིས།།

མ་ངེས་དེ་གཉིས་འགྱུར་དང་འདུ་བྱེད་ཕྱིར།།

རང་འབྲས་སྡུག་བདེན་བསྐྱེད་པའི་ལས་ཉོན་གྱི།།

ཆ་ནས་བཞག་པའི་ཟག་བཅས་དངོས་པོ་དེ།།

ཀུན་འབྱུང་བདེན་པའོ་དབྱེ་ན་ལས་ཉོན་གཉིས།།

ལ་སོགས་འཇོག་ཚུལ་གཞུང་བཞིན་ཤེས་པར་བྱ།།

ཀུན་འབྱུང་བདེན་པར་སྡུག་བདེན་གྱིས་ཁྱབ་ཀྱང་།།

སྡུག་བསྔལ་བདེན་པར་ཀུན་འབྱུང་གིས་མ་ཁྱབ།།

ཀུན་འབྱུང་བདེན་ལ་སྤང་བྱས་ཁྱབ་ན་ཡང་།།

འཕེན་བྱེད་དགེ་ལས་གནས་སྐབས་བླང་བྱ་ཡིན།།

ལས་ལ་ཀུན་འབྱུང་བདེན་པས་མ་ཁྱབ་སྟེ།།

སངས་འཕགས་རྒྱུད་ཀྱི་ཟག་མེད་ལས་སེམས་པ།།

མིན་ཏེ་ཡང་སྲིད་སྐྱེད་མིན་ཕྱིར་རོ།།

ཀུན་ལས་བཏུས་དང་ལེགས་བཤད་གསེར་འཕྲེང་སོགས།།

ཚད་ལྡན་གཞུང་ལ་གཟིགས་དང་ཚུལ་འདི་གསལ།།

འདི་དཔྱད་དོན་མེད་མ་ཡིན་སྡུག་བསྔལ་དང་།།

དེ་རྒྱུ་དྲུངས་འབྱིན་འདོད་ན་གལ་ཆེ་ཕྱིར།།

༼༧༽

རང་ཉིད་ཐོབ་བྱེད་ཐབས་སུ་གྱུར་བ་ཡི།།

བར་ཆད་མེད་པའི་ལམ་གྱི་ངོས་སྐལ་གྱི།།

སྒྲིབ་པ་སྤངས་པའི་སོ་སོར་བརྟགས་འགོག་དེ།།

འགོག་བདེན་དབྱེ་ན་ཐེག་གསུམ་འགོག་བདེན་གསུམ།།

འགོག་པ་ལ་ནི་འགོག་བདེན་མི་དགོས་ཏེ།།

སོ་སོར་བརྟགས་མིན་འགོག་པ་དེ་མིན་ཕྱིར།།

སྡུག་བསྔལ་ལ་སོགས་བདེན་པར་ཤེས་རབ་ཀྱིས།།

སོ་སོར་བརྟགས་པས་ཐོབ་པའི་བྲལ་མིན་ཕྱིར།།

འགོག་བདེན་ཐོབ་བྱེད་ཐབས་སུ་གྱུར་བ་ཡི།།

ཆ་ནས་བཞག་པའི་འཕགས་ལམ་ལམ་བདེན་ཏེ།།

དབྱེ་ན་ཐེག་གསུམ་མཐོང་སྒོམ་མི་སློབ་ལམ།།

གསུམ་གསུམ་འཇོག་ཚུལ་སོགས་ཀྱང་ཤེས་པར་བྱ།།

དགྲ་བཅོམ་རྟོགས་པ་སྔོན་སོང་ཐེག་ཆེན་གྱི།།

ཚོགས་སྦྱོར་ལམ་པའི་རྒྱུད་ཀྱི་ལམ་དེ་ཉིད།།

ཐེག་ཆེན་གང་ཟག་རྒྱུད་ཀྱི་ལམ་བདེན་དུ།།

འགྲོ་ཡང་ཐེག་ཆེན་ལམ་བདེན་མ་ཡིན་ནོ།།

ཁ་ཅིག་རྣམ་མཁྱེན་ལམ་བདེན་མ་ཡིན་ཏེ།།

སྤང་བྱ་སྤོང་ཕྱིར་བརྩོན་པ་མིན་ཕྱིར་དང་།།

ཁྱབ་པ་མདོ་ལས་ལམ་བསྒོམ་བྱ་ཞེས་པས།།

སྒྲུབ་ཀྱང་མ་ཁྱབ་ལམ་གྱི་བདེན་པ་ལ།།

འདིས་འགྲོ་ལམ་དང་འདིར་བགྲོད་ལམ་གཉིས་ལས།།

རྣམ་མཁྱེན་སྔ་མ་མིན་ཡང་ཕྱི་མ་རུ།།

འགྱུར་ཚུལ་ཞིབ་ཏུ་དཔྱད་ན་ཤེས་སླ་ཞིང་།།

མདོ་དོན་སྔ་མའི་དབང་དུ་བྱས་ཕྱིར་རོ།།

བློ་གསལ་དོན་གཉེར་ཅན་དག་མཚན་ལྡན་བཤེས།།

ཚུལ་བཞིན་བསྟེན་ནས་དེ་ལྟར་གཞུང་ཆེན་ལ།།

ཐོས་བསམ་སྒོམ་པས་ཞུགས་ནས་དལ་འབྱོར་རྟེན།།

དོན་ལྡན་བྱེད་པའི་ཚུལ་ལ་སུ་མི་གུས།།

༼༨༽

འོན་ཀྱང་རྒྱ་ཆེན་གཞུང་ལ་ལུང་རིགས་ཀྱིས།།

དཔྱོད་པའི་བློ་མིག་མ་སྦྱངས་བློ་གསར་ཚོའི།།

བློ་དང་བསྟུན་ནས་ཅུང་ཟད་གོ་སླ་བར།།

བཤད་ན་བདེན་བཞི་ཞེས་པ་འདི་ལྟ་སྟེ།།

མི་འདོད་སྐྱེ་རྒ་ན་འཆི་སྡུག་བདེན་ཏེ།།

དེ་རྒྱུ་ལས་དང་ཉོན་མོངས་ཀུན་འབྱུང་བདེན།།

དེ་ཞི་འགོག་བདེན་དེ་ཉིད་ཐོབ་བྱེད་ཐབས།།

དངོས་དང་དེ་རྒྱུན་འཕགས་ལམ་ལམ་བདེན་ནོ།།

སྡུག་བདེན་ནད་འདྲ་ཀུན་འབྱུང་ནད་ཀྱི་རྒྱུ།།

འགོག་བདེན་ནད་ལས་ཐར་བའི་བདེ་བ་འདྲ།།

ལམ་བདེན་ནད་ལས་གྲོལ་བྱེད་སྨན་འདྲ་ཞེས།།

རྗེ་བཙུན་བྱམས་པས་གསུངས་བཞིན་ཤེས་པར་བྱ།།

སྒྲ་བཤད་བཤད་ཚུལ་མང་ཡང་ཉན་ས་ལས།།

འཕགས་པ་རྣམས་ཀྱིས་ཇི་ལྟར་གཟིགས་པ་ལྟར།།

གནས་ཀྱི་བྱིས་པ་ཕལ་བས་མཐོང་བ་བཞིན།།

མི་བདེན་པས་ན་འཕགས་པའི་བདེན་པར་གསུངས།།

༼༩༽

བཞི་བ་འཕགས་པའི་བདེན་བཞིའི་འཇོག་ཚུལ་ལའང་།།

གྲུབ་མཐའ་གོང་འོག་འདོད་ཚུལ་མི་འདྲ་བའི།།

ཁྱད་པར་མང་སྟེ་བྱེ་སྨྲས་སྡུག་ཀུན་གཉིས།།

དོན་གཅིག་མདོ་སྡེས་སྲེད་པ་ཉིད་ཀུན་འབྱུང་།།

བྱེ་མདོ་གཉིས་ཀས་སྡུག་ཀུན་ཕྲ་རགས་ཀྱི།།

དབྱེ་བ་མི་འདོད་གོང་མས་འཇོག་ཚུལ་སོགས།།

ཕྲ་ཞིབ་གཞུང་གི་དོན་ལ་ལུང་རིགས་ཀྱིས།།

དཔྱད་ནས་སྲིད་པའི་སྐྱོན་མཚང་ཤེས་ན་མཚར།།

བྱེ་སྨས་བཏགས་དོན་འཚོ་བ་ཐལ་ཆེ་བས།།

འགོག་བདེན་མ་ཡིན་དགག་དང་མདོ་སྡེ་བས།།

མེད་དགག་རྩོད་ཚུལ་མཛོད་འགྲེལ་གནས་གཉིས་པར།།

ཞིབ་པས་དོན་གཉེར་ཅན་རྣམས་གཟིགས་འཚལ་ལོ།།

སེམས་ཙམ་སེམས་ཀྱི་རང་བཞིན་འོད་གསལ་བ།།

ནམ་མཁའ་ལྟ་བུ་སོ་སྐྱེ་ལ་ཡོད་ཀྱང་།།

དྲི་མའི་སྤྲིན་གྱིས་བསྒྲིབས་པས་དེ་ཉིད་ནི།།

འགོག་པའི་བདེན་པ་ཉིད་དུ་མི་བཞེད་དོ།།

ནམ་ཞིག་སྤྲིན་དེ་ནམ་མཁའི་དབྱིངས་ཟད་ལྟར།།

དྲི་མ་གློ་བུར་བ་རྣམས་དེའི་ངོ་བོར།།

ཟད་ཚེ་རང་བཞིན་འོད་གསལ་འགོག་བདེན་དུ།།

འདོད་པས་ཐོག་མར་སེམས་གཤིས་ཤེས་པ་གལ།།

འཇིག་རྟེན་ལམ་གྱིས་ས་བོན་ཉམས་སྨད་པས།།

འགོག་པ་གང་ཡིན་དེ་ཙམ་སོ་སྐྱེ་ལ།།

ཡོད་ཀྱང་བཏགས་པའོ་འཕགས་པའི་ཤེས་རབ་ཀྱིས།།

ས་བོན་དྲུངས་མ་ཕྱུང་བས་འགོག་བདེན་མེད།།

ཁ་ཅིག་འགོག་བདེན་དེ་བཞིན་ཉིད་ཁོ་ནས་།།

ཁྱབ་འདོད་འགའ་ཞིག་བཟློག་སོགས་མི་རིགས་ཤིང་།།

སེམས་ཀྱི་རང་བཞིན་དྲི་བྲལ་གནས་གྱུར་བའང་།།

འགོག་པའི་བདེན་པར་འདོད་དགོས་གསེར་འཕྲེང་གསལ།།

ལམ་བདེན་ལ་ཡང་བྱེ་སྨྲས་འཕགས་རྒྱུད་ཀྱི།།

ལམ་ལ་འཕགས་ལམ་མི་དགོས་བཀའ་བསྟན་ལས།།

འཕགས་པའི་བདེན་པར་གསུངས་པའི་སྒྲ་དོན་ཡང་།།

བཤད་ཚུལ་མི་འདྲ་མང་ཡོད་ཤེས་ན་མཚར།།

དེ་ལྟར་ཕྲ་ཞིབ་གཞུང་གི་དགོངས་དོན་རྣམས།།

རིགས་སྨྲ་འབུམ་སྡེའི་ངོ་མཚར་ལུང་རིགས་ཀྱིས།།

རྨོངས་མུན་རྨང་ནས་འཇོམས་པའི་ཆོས་གྲྭ་རུ།།

དཔྱད་ན་སེམས་གསང་ཡ་མཚན་རྙེད་རྒྱུ་མང་།།

༼༡༠༽

རྩ་བའི་ས་བཅད་གཉིས་པ་བདེན་པ་བཞིའི།།

ཁྱད་ཆོས་མི་རྟག་སྡུག་བསྔལ་ལ་སོགས་པའི།།

བཅུ་དྲུག་རྣམ་གཞག་མདོ་ཙམ་གཞུང་བཞིན་དུ།།

ཇི་ལྟར་ནུས་བཞིན་འཆད་དོ་ནོངས་རྣམས་འཆགས།།

རྣམ་དག་ངེས་འབྱུང་མེད་པར་སྲིད་མཚོ་ཡི།།

བདེ་འབྲས་དོན་གཉེར་ཞི་བའི་ཐབས་མེད་ཅེས།།

འཇམ་མགོན་བླ་མས་རང་ཅག་གདུལ་བ་ལ།།

བརྩེ་བས་གདམས་པའི་དོན་ལ་ངེས་རྙེད་ནས།།

རྣམ་གྲོལ་ཐར་བའི་གླིང་དུ་བགྲོད་པ་ལ།།

དེ་ཡི་ཕན་ཡོན་འཁོར་བའི་ཉེས་དམིགས་སོགས།།

ཇི་བཞིན་ཤེས་པའི་ངེས་འབྱུང་བསྐྱེད་པའི་ཕྱིར།།

བདེན་བཞིའི་འཇུག་ལྡོག་ངེས་པ་ཤིན་ཏུ་གཅེས།།

དེ་ཡང་ཐར་ལམ་སྒྲུབ་པའི་རྣལ་འབྱོར་བས།།

ཐོག་མར་འཁོར་བ་གང་ཞིག་སྡུག་བསྔལ་གྱི།།

རང་བཞིན་ཉིད་དུ་ཤེས་པ་གལ་ཆེ་བས།།

སྡུག་བདེན་ཤེས་པ་གནད་ཀྱི་དོན་པོར་མཐོང་།།

དེ་ཡང་རང་ཅག་ཟག་བཅས་ཉེར་ཕུང་འདི།།

གཙང་བདེ་རྟག་བདག་ཉིད་དུ་སྒྲོ་འདོགས་པའི།།

ལོག་ཞུགས་བཞི་ཡིས་མནར་བ་རྒྱུན་གཅོད་ཕྱིར།།

སྡུག་བདེན་ཁྱད་ཆོས་རྣམ་བཞི་བསྒོམ་ཚུལ་གསུངས།།

སྐད་ཅིག་རེ་རེར་འཇིག་ཕྱིར་མི་རྟག་པ།།

ལས་ཉོན་དབང་གྱུར་ཡང་ན་འཕགས་རྣམས་དང་།།

མི་མཐུན་ཉིད་ཕྱིར་སྡུག་བསྔལ་རང་ཉིད་ལས།།

དོན་གཞན་བདག་དང་བྲལ་ཕྱིར་སྟོང་བ་དང་།།

རང་གི་ངོ་བོ་བདག་དང་བྲལ་བའི་ཕྱིར།།

བདག་མེད་པ་སྟེ་སྡུག་བདེན་རྣམ་པ་བཞི།།

ཚང་བར་ཚད་མས་གཏན་ལ་མ་ཕེབས་ན།།

ཐར་བློ་རྣམ་དག་རྫོགས་པར་མི་སྐྱེ་སྟེ།།

སྡུག་བསྔལ་ཉིད་དུ་རྟོགས་པས་འབྲལ་འདོད་ཙམ།།

སྐྱེས་ཀྱང་མི་རྟག་ངང་ཚུལ་མ་རྟོགས་ན།།

ཕུང་སོགས་འབྲལ་ངེས་ཉིད་དུ་མི་རྟོགས་པས།།

དེ་ལ་སྲེད་པའི་རྒྱུ་བ་འགོག་མི་ནུས།།

དེ་ནས་ད་དུང་དེ་ཉིད་བདག་མེད་དུ།།

མ་རྟོགས་ན་ནི་དབང་སོགས་བདག་གི་བར།།

སྲེད་པ་ངང་གིས་འདྲེན་པས་བདག་འཛིན་དེས།།

བདག་བདེ་སྒྲུབ་བྱེད་འདོད་བློ་འདྲེན་པར་འགྱུར།།

དེས་ན་ཕུང་སོགས་མི་རྟག་སྡུག་བསྔལ་དུ།།

རྟོགས་པས་འབྲལ་ངེས་འབྲལ་འདོད་སྐྱེས་ན་ཡང།།

ཟག་བཅས་མཐའ་དག་མི་འདོད་ཐར་བའི་བློ།།

རྣལ་མ་རང་བཞིན་བདག་བྲལ་ཤེས་ལ་རག།

༼༡༡༽

རྒྱང་འཕེན་ལྟ་བུ་སྡུག་བསྔལ་རྒྱུ་མེད་དང་།།

གསལ་བྱེད་རྒྱུ་གཅིག་ཁོ་ན་རིག་བྱེད་པས།།

སྒྲའི་ཚངས་འགྱུར་བ་བྱེ་རིག་དབང་བཞིན་དབང་ཕྱུག།

རྒྱུར་འཛིན་ཀུན་འབྱུང་ལོག་ཞུགས་བཞིའི་གཉེན་པོར།།

སྡུག་བསྔལ་སྐྱེད་པས་རྒྱུ་དང་སྡུག་བསྔལ་གྱི།།

རྫས་རིགས་ཀུན་གྱི་འབྱུང་གནས་ཕྱིར་ཀུན་འབྱུང།།

སྡུག་བསྔལ་དྲག་ཏུ་སྐྱེད་པས་རབ་སྐྱེ་དང་།།

བརྒྱུད་མར་ལན་མང་སྐྱེད་པས་རྐྱེན་བཞི་གསུངས།།

སྡུག་བསྔལ་མི་འདོད་བདེ་ལ་ངོམས་མེད་པ།།

མཚུངས་ཀྱང་འདོད་པ་ཇི་བཞིན་མ་བྱུང་བ།།

གང་གིས་སྡུག་བསྔལ་ཇི་ལྟར་བསྐྱེད་པའི་ཚུལ།།

མ་ཤེས་ལས་བྱུང་དེ་ཕྱིར་འདི་འཚོལ་རིགས།།

རྒྱང་འཕེན་ཇི་བཞིན་ཐར་བ་གཏན་མེད་དང་།།

ཉོན་མོངས་མ་སྤངས་ཟག་བཅས་ཐར་བ་དང་།།

སྡུག་བསྔལ་འགག་པ་ལས་གཞན་ཐར་ཡོད་དང་།།

རེ་ཞིག་ཐར་ཀྱང་གཏན་དུ་ཐར་བ་ཞིག།

མེད་པར་འཛིན་པ་འདི་བཞི་འགོག་བདེན་ལ།།

མི་ཤེས་རྨོངས་པས་ལོག་པར་ཞུགས་པ་སྟེ།།

དེ་ཕྱིར་དེ་དག་བསལ་ཞིང་འགོག་བདེན་གྱི།།

ངོ་བོ་ཇི་བཞིན་སྟོན་ཕྱིར་བཞི་གསུངས་ཏེ།།

སྡུག་བསྔལ་སྤངས་པས་འགོག་པ་ཉོན་མོངས་རྣམས།།

སྤངས་པས་ཞི་བ་འདི་ལས་མཆོག་གྱུར་བའི།།

གཞན་མེད་ཕྱིར་ན་གྱ་ནོམ་འདི་ཐོབ་ནས།།

སླར་མི་ལྡོག་ཕྱིར་ངེས་འབྱུང་ཉིད་དུ་གསུངས།།

ཐར་ལམ་གཏན་མེད་བདག་མེད་རྟོགས་པའི་བློ།།

གྲོལ་ལམ་མིན་པར་འཛིན་དང་བློ་དེ་ཉིད།།

ཡུལ་ལ་ལོག་ཞུགས་དེ་ཡིས་སྡུག་བསྔལ་རྣམས།།

གཏན་དུ་ཟད་མི་ནུས་འཛིན་ལོག་ཞུགས་བཞི།།

བསལ་ཕྱིར་ལམ་བདེན་རྣམ་པ་བཞི་གསུངས་ཏེ།།

བགྲོད་པར་བྱེད་ཕྱིར་ལམ་དང་ཉོན་མོངས་པའི།།

གཉེན་པོའི་དོན་ཕྱིར་རིགས་དང་ནང་གི་སེམས།།

ཕྱིན་ཅི་མ་ལོག་སྒྲུབ་ཕྱིར་སྒྲུབ་པ་དང་།།

རྟག་པའི་གནས་སུ་ངེས་པར་ཕྱིན་བྱེད་ཕྱིར།།

ངེས་འབྱིན་ཉིད་དང་བཞིའོ་འདིའི་སྐབས་ཀྱི།།

རྟག་པའི་གནས་ནི་སླར་མི་ལྡོག་དོན་དུ།།

སྡེ་བདུན་རྒྱན་ལས་གསུངས་པས་དེ་ལྟར་རོ།།

འདི་ལྟར་ལམ་དང་ལམ་མིན་དབྱེ་བ་གང་།།

ཡང་དག་རིགས་པས་རྟོགས་ན་རྟོག་གེ་བས།།

སྒྲོ་བཏགས་ལྟར་སྣང་ལམ་ལ་སེམས་གཏིང་ནས།།

ཡི་ག་ལོག་ཅིང་ཐར་ལམ་རྙེད་པར་འགྱུར།།

༼༡༢༽

ལོག་ཞུགས་བཅུ་དྲུག་གཉེན་པོ་བཅུ་དྲུག་དང་།།

སྤང་གཉེན་སྦྱོར་ཚུལ་གྲངས་འདི་ཁོ་ན་ལྟར།།

སྦྱོར་མིན་ལ་སོགས་ཕྲ་ཞིབ་ཤེས་འདོད་ན།།

བསྡུ་བ་རྟོགས་སྣང་ལ་སོགས་གཞུང་ཆེན་ལྟོས།།

རང་ཉིད་བློ་གྲོས་གསལ་བར་འདོད་པ་འགས།།

འགོག་བདེན་སྟེང་གི་ལོག་ཞུགས་ཐ་མ་ལ།།

ཐར་བ་གཏན་མི་ལྡོག་པ་མིན་སྙམ་དུ།།

འཛིན་པའི་ལོག་རྟོག་གསེར་འཕྲེང་ལས་བཞག་པས།།

འདི་ཡོད་གཞན་སྡེ་ཁོ་ནར་མ་ངེས་པར།།

རང་སྡེ་བྱེ་སྨྲ་ལའང་བཞག་དགོས་ཏེ།།

དགྲ་བཅོམ་ཉམས་པ་འདོད་ཕྱིར་ཞེས་ཟེར་བ།།

བདེན་པར་སྣང་ཡང་བརྟགས་ན་ཤིན་ཏུ་འཁྲུལ།།

ལམ་དེ་བསྒོམས་པའི་སྟོབས་ཀྱིས་རེ་ཞིག་ཙམ།།

ཐར་ཡང་ཉམས་ན་ལམ་དུ་མ་ཞུགས་པའི།།

གནས་སྐབས་ཇི་བཞིན་སྲིད་པར་འཁྱམས་པ་ཞིག།

འདོད་པ་འདི་ཡིན་བྱེ་སྨྲས་གཏན་མི་འདོད།།

ཚུལ་འདི་བློ་དང་ལྡན་རྣམས་མངོན་མཛོད་དང་།།

གང་སྤེལ་རྟོག་གེ་འབར་བ་ལ་སོགས་པའི།།

ཚད་ལྡན་གཞུང་ལ་ཚུལ་མཐུན་ཐོས་བསམ་གྱིས།།

ཞུགས་ནས་དཔྱད་ན་ཤེས་པས་སྦྱོང་བ་གཅེས།།

༼༡༣༽

ཁྱད་ཆོས་མི་རྟག་ལ་སོགས་བཅུ་དྲུག་ཀྱང་།།

དམ་བཅའ་ཙམ་མིན་ཚུལ་གསུམ་ཚང་བའི་རྟགས།།

བཅུ་དྲུག་དག་གིས་སྒྲུབ་ཚུལ་ཤེས་ན་ནི།།

ལོག་འཛིན་བློ་ནས་འབྱིན་པས་ཅུང་འཆད་དོ།།

རེས་འགའ་སྐྱེ་བའི་ཕྱིར་དང་ལས་ཉོན་གྱི།།

གཞན་དབང་ཅན་ཕྱིར་བྱིན་རློབས་བདག་དབེན་ཕྱིར།།

དུ་མ་གཞན་དབང་ཅན་ཕྱིར་ཉེར་ཕུང་ལྔ།།

མི་རྟག་སྡུག་བསྔལ་སྟོང་དང་བདག་མེད་དོ།།

སྲེད་འདི་རྒྱུ་སྟེ་ཡང་སྲིད་ཀྱི་བག་ཆགས།།

འཇོག་པའི་རྩ་བ་ཉིད་ཕྱིར་དུས་ཡང་ཡང་།།

བསྐྱེད་ཕྱིར་ཀུན་འབྱུང་འགྲོ་ལྔ་སྐྱེ་གནས་སོགས།།

སོ་སོར་སྐྱེད་ནུས་ཉིད་ཕྱིར་རབ་སྐྱེའོ།།

ཉེར་ལེན་གཙོ་བོ་འདུ་བྱེད་ལས་ཡིན་ཀྱང་།།

སྲེད་པས་དེ་ལ་གསོས་བཏབ་སྲིད་པ་གཞན།།

འགྲུབ་པས་འཁོར་བའི་འཁོར་ལོ་བསྐོར་བའི་ཕྱིར།།

སྲེད་པ་རྐྱེན་ཡིན་ཀུན་འབྱུང་གཙོ་བོར་བཞག།

དགག་བྱ་སྡུག་བསྔལ་སྤངས་པའི་བྲལ་ཕྱིར་དང་།།

སྤོང་བྱ་ཉོན་མོངས་སྤངས་པའི་བྲལ་བའི་ཕྱིར།།

སྡུག་བསྔལ་གཏན་དུ་ཟད་པའི་བྲལ་བ་དེ།།

འགོག་དང་ཞི་བའི་རྣམ་པ་ཉིད་དུ་བརྗོད།།

དེ་ལྟར་སྡུག་བསྔལ་བ་དང་ཉོན་མོངས་ཉིད།།

མཐའ་དག་སྤངས་པའི་འཕྲལ་ཕུགས་གཉིས་ཀར་ཡང་།།

དགེ་ཞིང་གཙང་བས་གྱ་ནོམ་མི་ལྡོག་པའི།།

ཆོས་ཅན་ཉིད་ཕྱིར་ངེས་པར་འབྱུང་ཞེས་བརྗོད།།

བདག་མེད་མངོན་སུམ་རྟོགས་པའི་ཤེས་རབ་དེ།།

ཐེག་གསུམ་བགྲོད་པ་གཅིག་པའི་ཐར་ལམ་ཕྱིར།།

ལམ་མོ་མ་རིག་འགལ་ཟླའི་གཉེན་པོའི་ཕྱིར།།

དེ་ནི་རིག་པའི་རྣམ་པར་ཤེས་བྱ་ཞིང་།།

སེམས་དེ་ལོག་པར་འཕྲོ་བ་བཀག་ནས་ནི།།

གནས་ལུགས་སྟེང་དུ་སྒྲུབ་ཅིང་གནས་ལུགས་དེ།།

མངོན་སུམ་ཉིད་དུ་རྟོགས་པའི་ཡེ་ཤེས་ཕྱིར།།

སྒྲུབ་པའི་རྣམ་པ་ཉིད་དུ་རབ་བརྗོད་དོ།།

དེ་ཉིད་ངེས་འབྱིན་ཡིན་ཏེ་གང་ཟག་གང་།།

སླར་མི་ལྡོག་པའི་ཐར་བའི་གནས་དེ་རུ།།

ཕྱིན་བྱེད་ཉིད་ཕྱིར་ཞེས་སོགས་སོ་སོ་ཡི།།

ཁྱད་ཆོས་སྒྲུབ་ཚུལ་གཞུང་བཞིན་ཤེས་པར་བྱ།།

༼༡༤༽

སྟོབས་དང་ལྡན་པའི་མེ་ཡིས་དེར་ཉེ་བའི།།

གྲང་འབྲས་ཟད་པ་མྱོང་བས་གྲུབ་པ་བཞིན།།

རང་ཉིད་འགྲིབ་བྱེད་མི་མཐུན་ཕྱོགས་སྟོབས་ལྡན།།

དམིགས་པས་རང་ཉིད་རིམ་ཟད་ཅིས་མི་འགྲུབ།།

དེས་ན་སྡུག་བསྔལ་ལྡན་པའི་ཕུང་བོ་ཡང་།།

ཟད་པ་ཡོད་དེ་རྩ་བ་བདག་འཛིན་ལ།།

གནོད་བྱེད་བདག་མེད་རྟོགས་པའི་ཤེས་རབ་དེ།།

དམིགས་ཕྱིར་འགོག་བདེན་འགྲུབ་པ་ཅིས་མི་འཐད།།

གང་ཞིག་གོམས་ཟིན་འབད་རྩོལ་བསྐྱར་མ་ལ།།

མི་ལྟོས་སེམས་ཀྱི་ཆོས་ཕྱིར་ཤེས་རབ་དེ།།

གོམས་བྱེད་མ་བྲལ་གོམས་ན་གོམས་བྱ་ལ།།

གསལ་སྣང་མཐར་ཐུག་ཐོབ་ཕྱིར་ལམ་བདེན་འགྲུབ།།

སྡུག་བསྔལ་མི་འདོད་བདེ་བས་མི་ཚིམ་པ།།

འདྲ་ཡང་རྨོངས་དང་མི་རྨོངས་ཁྱད་པར་ལས།།

གཏན་གྱི་བདེ་བ་རྙེད་དང་མི་རྙེད་ལ།།

ཁྱད་པར་ཆེ་བས་དེ་རྒྱུ་འཚོལ་བ་གཅེས།།

དེ་ཡང་ཐར་དང་ཐམས་ཅད་མཁྱེན་པ་ཡི།།

གོ་འཕང་སྙིང་ནས་སྒྲུབ་པར་འདོད་པ་རྣམས།།

བདེན་བཞིའི་བླང་དོར་ཕྱིན་ཅི་མ་ལོག་པར།།

ཤེས་ཤིང་སྒྲུབ་ལ་བརྩོན་པ་གནད་དུ་ཆེ།།

འོན་ཀྱང་བློ་འདི་ཆེས་ཆེར་རྨོངས་པའི་ཕྱིར།།

རང་བློའི་སྟོབས་ཀྱིས་བདེན་བཞིའི་གནས་ལུགས་ལ།།

འཇུག་པ་དཀའ་བས་ཐོགས་མེད་སྐུ་མཆེད་དང་།།

ཕྱོགས་གླང་ཡབ་སྲས་གཞུང་ལ་འདྲིས་པ་གལ།།

༼༡༥༽

ད་ནི་རྩ་བའི་ས་བཅད་གསུམ་པ་སྟེ།།

དེ་དག་གོམས་པས་ལམ་གྱི་བགྲོད་ཚུལ་ནི།།

ཤེས་པ་ཤིན་ཏུ་གལ་ཆེ་ཐར་འདོད་རྣམས།།

ཐར་བའི་གླིང་དུ་བགྲོད་པར་བྱེད་ཕྱིར་རོ།།

དང་བོར་ཐོས་པའི་སྒྲོན་མེ་མ་སྤར་ན།།

བླང་དོར་ཇི་ལྟར་བྱ་བ་མི་ཤེས་པས།།

ཐོག་མར་རྒྱ་ཆེན་ཐོས་པ་འཚོལ་དགོས་ཀྱང་།།

ཐོས་དོན་རྒྱུད་ལ་མ་སྦྱར་ཅི་ལ་ཕན།།

དེ་ཕྱིར་དམ་པ་རྣམས་ནི་མགྲིན་གཅིག་ཏུ།།

གང་ཐོས་བསྒོམ་བྱར་གཞུང་བརྒྱས་འགྲུབ་གསུངས་པས།།

དེས་ན་དེ་ལྟར་བདེན་བཞིའི་རྣམ་གཞག་ལ།།

བསླབ་པའི་དགོས་པའང་བསྒོམ་བྱར་ཤེས་པ་གཅེས།།

ལྟོ་བ་འགེངས་པའི་ཆོ་ག་ཙམ་ཞིག་ལ།།

མི་ཚེའི་སྙིང་བོར་མི་འཛིན་བློ་གྲོས་ཅན།།

སྐལ་ལྡན་ཐར་འདོད་རྣམས་ནི་བདེན་བཞིའི་དོན།།

གོམས་པས་ལམ་ལ་བགྲོད་ཚུལ་འདི་ལྟ་སྟེ།།

ཐོག་མར་རྩ་བ་གསུམ་དང་རྒྱུ་མཚན་དགུས།།

གཅེས་ཤིང་ཕོངས་པའི་སྲོག་འདི་ཡུན་རིང་བོར།།

འཚོ་དཀའ་རགས་པའི་མི་རྟག་རང་བཞིན་དངོས།།

ཇི་བཞིན་ཤེས་པར་བྱ་ཞིང་བསྒོམ་པར་བྱ།།

ཚེ་འདི་ཟད་ཀྱང་མར་མེ་ཤི་བ་ལྟར།།

མེད་དེ་མི་འགྲོ་ཕྱི་མར་ཉིང་མཚམས་སྦྱོར།།

ཁམས་གསུམ་འཁོར་བ་རིགས་དྲུག་གང་ཞིག་ལ།།

གར་འགྲོ་གཏོལ་མེད་ངང་ཚུལ་ཡང་ཡང་བསམ།།

དགེ་བ་བསྒྲུབ་ལོ་བྱས་ཀྱང་གྲངས་ཉུང་ཞིང་།།

གང་བྱས་ཤུགས་ཆུང་གཙང་ཞིང་དག་པ་ཡི།།

རང་ཡིད་གཏིང་ནས་ཚིམ་པ་ཆེས་དཀོན་པས།།

སླར་ཡང་བདེ་འགྲོ་རྙེད་པ་ཤིན་ཏུ་དཀའ།།

གལ་ཏེ་ངན་སོང་ངན་འགྲོར་ལྟུང་ན་ནི།།

ཚ་གྲང་བཀྲེས་སྐོམ་གཤགས་ཤིང་བཅད་གཏུབས་ཀྱི།།

སྡུག་བསྔལ་བཟོད་གླགས་མེད་པའི་ངང་ཚུལ་དེ།།

ཡང་ཡང་བསྒོམ་ཞིང་སྙིང་ནས་འཇིགས་བསྐྱེད་བྱ།།

སྙིང་ནས་ཇི་ལྟར་འཇིགས་ཀྱང་སྡུག་བསྔལ་ལས།།

སྐྱོབ་པའི་སྐྱབས་ཤིག་མི་འཚོལ་བཙལ་ན་ཡང་།།

ནམ་ཡང་མི་བསླུ་གཏན་གྱི་བདེ་སྟེར་བའི།།

སྐྱབས་ཤིག་མིན་ན་རེ་བ་ཇི་ལྟར་སྐོང་།།

དེ་ཕྱིར་ཐར་འདོད་བློ་དང་ལྡན་པ་རྣམས།།

སྐྱབས་དང་སྐྱབས་མིན་དབྱེ་བ་ངེས་བྱས་ནས།།

ནམ་ཡང་མི་བསླུ་སྐྱབས་སུ་འོས་པའི་རྒྱུ།།

ཡོངས་སུ་ཚང་བའི་མཆོག་གསུམ་སྙིང་ནས་བསྟེན།།

༼༡༦༽

སྐྱོན་གྱི་དྲི་མ་ཀུན་བྲལ་ཡོན་ཏན་ཀུན།།

རྫོགས་པའི་མཆོག་གསུམ་སྙིང་ནས་བསྟེན་ན་ཡང་།།

རང་གི་སྒོ་གསུམ་ཉེས་སྤྱོད་མ་བསྡམས་ན།།

ངན་འགྲོའི་གཡང་ལས་སྐྱོབ་ནུས་སུ་ཞིག་ཡོད།།

དེ་ཕྱིར་དགེ་སྡིག་བླང་དོར་ཇི་ལྟ་བུར།།

ཤེས་ཤིང་བརྩོན་པའི་སྐྱེས་བུ་ཆུང་ངུ་དང་།།

ཐུན་མོང་ལམ་ལ་ལེགས་པར་བློ་སྦྱོང་བ།།

འབྲིང་དང་ཆེན་པོའི་ལམ་གྱི་གཞི་མ་ཡིན།།

དེ་ཡང་གཙོ་བོར་སྡུག་བསྔལ་གྱི་སྡུག་བསྔལ།།

ཇི་བཞིན་ཤེས་ཤིང་ཚུལ་བཞིན་བསྒོམ་པ་དང་།།

དེ་ལས་སྐྱོབ་ནུས་སུ་ཡིན་ངེས་པ་དང་།།

དེ་རྒྱུ་ཤེས་ཤིང་བག་ཡོད་བསྟེན་པས་འགྲུབ།།

དེ་ལྟར་འཕེན་བྱེད་ཟག་བཅས་དགེ་ལས་དང་།།

མི་གཡོ་ལས་ཀྱིས་ལྷ་མིའི་མངོན་མཐོ་ཙམ།།

རེ་ཞིག་ཐོབ་ཀྱང་ལས་ཉོན་འཆིང་ཞགས་ཀྱིས།།

བཅིངས་པའི་འཁོར་བའི་གནས་ན་ད་དུང་འཁོར།།

སྲིད་པའི་བདེ་བ་གང་དག་རི་གཟར་གྱི།།

འབབ་ཆུ་ཇི་བཞིན་སྐད་ཅིག་ཉིད་ལ་ཡང་།།

མི་སྡོད་རིམ་གྱིས་ཟད་པས་མི་རྟག་ཅིང་།།

འགྱུར་བའི་སྡུག་བསྔལ་ཚུལ་ཡང་བསྒོམ་པར་བྱ།།

དམའ་བ་མནར་མེད་ནས་བཟུང་སྲིད་རྩེའི་བར།།

ཁམས་གསུམ་འཁོར་བའི་གནས་ལས་མ་ཐར་ན།།

སླར་ཡང་ལྟུང་ཞིང་ཁྱབ་པ་འདུ་བྱེད་ཀྱི།།

སྡུག་བསྔལ་ཉིད་ཀྱིས་བཅིངས་པའང་ཤེས་པར་བྱ།།

དེ་ལྟར་ཡང་དང་ཡང་དུ་བསམས་པ་ན།།

འཁོར་བ་མཐའ་དག་སྡུག་བསྔལ་རང་བཞིན་དུ།།

ཤེས་ནས་སྡུག་བསྔལ་ལྗོན་ཤིང་ཆེན་པོ་འདི།།

རྒྱུ་གང་ཞིག་ལས་བྱུང་སྙམ་དཔྱད་འགྱུར་ཞིང་།།

དེ་ཉིད་སྐྱེད་ལ་ལས་དང་ཉོན་མོངས་གཉིས།།

དགོས་ཀྱང་སྲེད་པའི་རླན་དང་མི་ལྡན་ན།།

སྐྱེ་བར་མི་ནུས་ཀུན་འབྱུང་འཇུག་རིམ་དེ།།

ཇི་བཞིན་བསྒོམས་པས་སྲིད་ལ་སྐྱོ་བ་འབྱུང་།།

དེ་ཡང་རྐྱེན་ཙམ་ཉིད་ལས་སྲིད་པ་ཡི།།

རྩ་བ་མཐར་ཐུག་མིན་པས་ཕུགས་གང་ཡིན།།

རྣམ་དཔྱོད་ལྡན་པས་ལེགས་པར་དཔྱད་པ་ན།།

བདག་འཛིན་ཉིད་ལ་ཐུག་པའང་ཤེས་པར་འགྱུར།།

༼༡༧༽

དེ་ནས་དེ་ཉིད་སྤོང་བར་ནུས་མི་ནུས།།

དཔྱད་པས་དེ་ལ་རྒྱབ་བརྟེན་ཚད་མ་མེད།།

ཕྱིན་ཅི་ལོག་ཕྱིར་དེ་ཡི་གཉེན་པོ་དང་།།

འཕྲད་པས་སྤོང་བར་ནུས་པའང་མཐོང་བར་འགྱུར།།

དེ་ནས་འཕགས་བོད་ཚད་ལྡན་མཁས་གྲུབ་ཀྱི།།

གཞུང་དང་བླ་མའི་མན་ངག་ལས་བྱུང་བའི།།

ངོ་མཚར་རིགས་པ་དག་གིས་བདག་མེད་ཚུལ།།

ལེགས་པར་གཏན་ལ་ཕབས་ནས་ངེས་པ་བསྐྱེད།།

དེ་ཉིད་ཡང་ཡང་གོམས་པས་ནམ་ཞིག་ཚེ།།

སྡུག་ཀུན་ཉེ་བར་ཞི་བའི་འགོག་བདེན་ནམ།།

ཐར་བ་མྱ་ངན་འདས་པའང་བློ་ལྡན་གྱིས།།

དྲི་མེད་ལུང་དང་རིགས་པས་ལེགས་པར་འགྲུབ།།

དེ་རྗེས་དེ་ཉིད་ཐོབ་བྱེད་ཡང་དག་ཐབས།།

བདག་འཛིན་དྲུངས་ནས་འབྱིན་བྱེད་གཉེན་པོའི་མཆོག།

བདག་མེད་མངོན་སུམ་ཉིད་དུ་རྟོགས་པའི་ལམ།།

མངོན་དུ་བྱ་བར་ནུས་པའང་མཐོང་བར་འགྱུར།།

དེ་ལྟར་གོམས་པས་ཁམས་གསུམ་འཁོར་བ་འདི།།

འཇིགས་རུང་སྲིན་མོའི་གདོང་གི་ཁྲོ་གཉེར་ལྟར།།

སྙིང་ནས་མཐོང་ཞིང་རྣམ་གྲོལ་དགའ་ཚལ་དུ།།

རྩོལ་ལ་མ་བལྟོས་ངང་གིས་འཇུག་འདོད་བློ།།

རྙེད་པར་གྱུར་བ་དེ་ཚེ་གང་ཟག་དེ།།

སྐྱེས་བུ་འབྲིང་ངམ་འབྲིང་དང་ཐུན་མོང་གི།།

ལམ་ལ་སླེབས་པ་ཉིད་དུ་ཤེས་བྱ་ཞིང་།།

འདི་ནི་ཆེན་པོའི་ལམ་གྱི་གཞི་མའང་ཡིན།།

དེ་ཡང་འགྱུར་དང་འདུ་བྱེད་སྡུག་བསྔལ་དང་།།དེ

་རྒྱུ་ལས་ཉོན་གྱིས་བསྡུས་ཀུན་འབྱུང་ཚུལ།།

ལེགས་པར་བསྒོམས་པས་བཅོས་མིན་ངེས་འབྱུང་གི།

བསམ་པར་ལྟོས་པས་ཚུལ་དེར་བརྩོན་པར་རིགས།།

༼༡༨༽

དེ་ཡང་འཇིག་རྟེན་འདི་ན་སྡུག་བདེན་ལ།།

སྐྱོ་བ་མང་ཡང་དེ་ཉིད་ཀུན་འབྱུང་གིས།།

བསྐྱེད་ཚུལ་མ་ཤེས་དེ་ཞི་འགོག་པ་དང་།།

ཞི་བྱེད་ལམ་ལ་རྨོངས་པས་གྲོལ་བ་ཉུང་།།

དེ་ཕྱིར་སྡུག་བདེན་འཁོར་བའི་ཉེས་དམིགས་དང་།།

དེ་རྒྱུ་ཀུན་འབྱུང་འཇུག་རིམ་གྱིས་འཇིགས་ནས།།

ཞི་དང་ཞི་བྱེད་འགོག་ལམ་ལ་བརྩོན་པའི།།

སྐྱེས་བུ་དེ་ཡང་བསྟོད་པར་འོས་མོད་ཀྱང་།།

ཇི་ལྟར་ཉེན་དང་འཕྲད་ཚེ་བཟའ་དཔོན་གྱིས།།

རང་གི་ཕ་མ་བུ་དང་ཆུང་མ་སོགས།།

དོར་ནས་རང་ཉིད་འབའ་ཞིག་འབྲོས་རྩོམ་པ།།

འཇིག་རྟེན་ན་ཡང་ཤིན་ཏུ་སྨད་འགྱུར་བཞིན།།

སེམས་དང་བསམ་པའི་ཁོངས་རབ་ཆེས་ཡངས་པའི།།

སྐྱེ་བོ་མཆོག་གི་རིགས་རྣམས་རང་ཉིད་ཙམ།།

སྡུག་བསྔལ་གསུམ་གྱིས་མནར་བའི་ངང་ཚུལ་དང་།།

དེ་ལས་ཐར་བའི་ཐབས་ཙམ་གཙོར་མི་འཛིན།།

ཇི་ལྟར་རང་ཉིད་སྡུག་ཀུན་གྱིས་མནར་བའི།།

ཚུལ་ལ་དམིགས་པའི་ཡིད་འབྱུང་ཤུགས་དྲག་པ།།

དེ་ཙམ་ཉིད་དུ་དེ་ཉམས་ལ་དཔགས་ནས།།

གཞན་དག་ལའང་མི་བཟོད་སྙིང་རྗེ་སྐྱེ།།

དེ་ལྟའི་སྙིང་རྗེ་ཅི་ཙམ་ཤུགས་དྲག་པ།།

དེ་ཙམ་འགྲོ་རྣམས་སྒྲོལ་བ་རང་ཉིད་ཀྱིས།།

ཁུར་དུ་ཁྱེར་བའི་ལྷག་བསམ་ཤུགས་དྲག་པ།།

འབྱུང་ཞིང་དེ་ཚེ་སྐྱེས་བུ་ཆེན་པོར་གྱུར།།

དེ་ལྟ་མོད་ཀྱང་རང་ལ་ནུས་པ་དེ།།

མེད་པར་མཐོང་ནས་མཁའ་ཁྱབ་མ་རྣམས་ཕྱིར།།

ཡང་དག་རྫོགས་བྱང་སྙིང་ནས་དོན་གཉེར་བའི།།

སེམས་བསྐྱེད་འཁྲུངས་ཤིང་ཐེག་པ་ཆེན་པོར་གྱུར།།

༼༡༩༽

ཐེག་པ་ཆེན་པོའི་བྱང་ཆུབ་མཆོག་ཉིད་དུ།།

བགྲོད་པར་བྱེད་དམ་བགྲོད་ཟིན་གང་རུང་གིས།།

བསྡུས་པའི་ཐེག་ཆེན་མཁྱེན་པ་ཐེག་ཆེན་ལམ།།

ཆེན་པོ་བདུན་དང་ལྡན་པས་ཆེན་པོར་བརྗོད།།

ས་མཚམས་ཐེག་ཆེན་ཚོགས་ལམ་ནས་བཟུང་སྟེ།།

རྫོགས་སངས་རྒྱས་བར་འཇོག་པས་ཐེག་ཆེན་ལ།།

སེམས་ཅན་ཁོ་ནས་མ་ཁྱབ་སངས་རྒྱས་ཀྱང་།།

འཇོག་དགོས་ཚུལ་སོགས་གཞུང་བཞིན་ཤེས་པར་བྱ།།

དེ་ཡང་ས་བཅུ་ལམ་ལྔ་རིམ་བཞིན་དུ།།

ཇི་ལྟར་བགྲོད་པའི་ཚུལ་ལ་མཁས་དགོས་ཀྱང་།།

མང་བར་འགྱུར་བས་ས་བཅུ་གཞན་དུ་ལྟོས།།

འདིར་ནི་ལམ་ལྔའི་བགྲོད་ཚུལ་མདོ་ཙམ་འཆད།།

གཞན་ཕྱིར་བླ་མེད་རྫོགས་བྱང་དོན་གཉེར་བློར།།

རྩོལ་མེད་མྱོང་བ་ཐོན་ཚེ་ཐེག་ཆེན་གྱི།།

ཚོགས་ལམ་ཐོབ་པོ་བདེན་བཞི་ལ་བརྟེན་པའི།།

དྲན་ཉེ་བཞིས་བསྡུས་ཚོགས་ལམ་གསུམ་ཡོད་དོ།།

དྲན་པས་སེམས་དེ་རང་གི་དམིགས་པ་ལ།།

ཡང་ཡང་གཏོད་པར་བྱེད་པས་དྲན་ཉེ་སྟེ།།

ཉེ་ལ་དོན་མང་བཤད་ཀྱང་སྐབས་འདིར་ནི།།

ཡང་་ཡང་ཞེས་པའི་དོན་དུ་གོ་དགོས་གསུངས།།

དེ་ལ་ལུས་དང་ཚོར་བ་སེམས་དང་ཆོས།།

དྲན་པ་ཉེར་བཞག་བཞི་ཡོད་ལུས་དྲན་ཉེས།།

ལུས་དེ་སྡུག་བདེན་ཉིད་དུ་བསམས་ནས་ནི།།

དེ་ལ་འབྲལ་འདོད་བསམ་པ་སྐྱེད་པར་བྱེད།།

ཚོར་བས་སྲེད་པ་འདྲེན་པར་མཐོང་ནས་ནི།།

སྲེད་པའམ་ཀུན་འབྱུང་སྙིང་ནས་སྤོང་འདོད་བློ།།

སྐྱེད་པར་བྱེད་པ་ཚོར་བ་དྲན་ཉེ་དེ།།

ཚུལ་བཞིན་བསྒོམས་པའི་ལག་རྗེས་ཉིད་དུ་བཤད།།

སེམས་ཀྱི་དྲན་པ་ཉེར་བཞག་ལ་གོམས་པས།།

བདག་བྲལ་སེམས་དེ་སྐད་ཅིག་སྐྱེ་འགག་སོགས།།

བྱེད་པར་རྟོགས་ནས་བདག་དེ་ཆད་དོགས་ཀྱིས།།

མི་འཇིགས་འགོག་པ་མངོན་དུ་བྱ་འདོད་སྐྱེད།།

ཀུན་ཉོན་སྤང་བྱ་རྣམ་བྱང་བསྟེན་བྱ་རུ།།

རྟོགས་ནས་ལམ་བདེན་བསྒོམ་པར་འདོད་པའི་བློ།།

སྐྱེད་པར་བྱེད་པ་ཆོས་དྲན་ཉེར་བཞག་དེ།།

བསྒོམས་པའི་ལག་རྗེས་ཉིད་དུ་ཤེས་པར་བྱ།།དེ

་ཕྱིར་དབུས་མཐར་བདེན་བཞི་ལ་འཇུག་པའི།།

དྲན་པ་ཉེ་བར་བཞག་པ་བསྒོམ་ཞེས་དང་།།

རྒྱན་ལས་དྲན་པ་ཉེར་བཞག་ནས་བཟུང་སྟེ།།

ཞེས་སོགས་གསུངས་པའང་གཞུང་བཞིན་ཤེས་པར་བྱ།།

༼༢༠༽

དེ་ནས་ཐེག་ཆེན་ཚོགས་ལམ་ཆེན་པོ་པས།།

ཞི་གནས་ལ་བརྟེན་བདེན་བཞིའི་གནས་ལུགས་ལ།།

མཚན་ཉིད་སོ་སོར་རིག་པའི་ཡིད་བྱེད་ཀྱིས།།

ཐོས་དང་བསམ་བྱུང་རེས་ཀྱིས་དཔྱད་སྟོབས་ཀྱིས།།

དྲངས་པའི་ཤིན་སྦྱངས་ཐོབ་དང་སྟོང་ཉིད་ལ།།

དམིགས་པའི་ལྷག་མཐོང་དེ་ལ་མོས་ཡིད་བྱེད།།

དེ་ཡི་ཞི་ལྷག་ཟུང་འབྲེལ་ཐོབ་པ་དང་།།

ཐེག་ཆེན་སྦྱོར་ལམ་ཐོབ་པ་དུས་མཉམ་མོ།།

དེ་ཡི་དྲོད་སོགས་ཇི་ལྟར་འཇོག་ཚུལ་དང་།།

དེ་ཉིད་ཁྱད་ཆོས་དྲུག་གིས་ཉན་རང་ལས།།

ཇི་ལྟར་འཕགས་ཚུལ་དབྱེ་བ་བཅུ་གཉིས་སོགས།།

ཤེས་པར་འདོད་ན་གཞུང་ཆེན་རྣམས་ལ་སློབ།།

གང་ཞིག་རང་ཞི་ཙམ་གྱི་རྣམ་གྲོལ་ལམ།།

སྒྲུབ་ལ་བརྩོན་རྣམས་མི་རྟག་སོགས་བཅུ་དྲུག།

ཙམ་གྱིས་བདེན་བཞི་བསྒོམ་ཡང་རྫོགས་བྱང་དུ།།

བགྲོད་རྣམས་བརྒྱ་དང་བདུན་ཅུར་ཕྱེ་ནས་བསྒོམ།།

ཐེག་ཆེན་རིགས་ངེས་མ་ངེས་སྦྱོར་ལམ་པས།།

སྟོང་བ་ཉིད་ལ་དམིགས་པའི་ཞི་ལྷག་དང་།།

ཟུང་དུ་འབྲེལ་ནས་ཇི་ལྟར་ཐོབ་ཚུལ་སོགས།།

གཞུང་ཆེན་ཞིབ་ཏུ་སྦྱངས་ན་ཇི་བཞིན་ཤེས།།

དེ་ནས་བདེན་བཞིའི་གནས་ལུགས་མངོན་སུམ་དུ།།

གསར་དུ་མཐོང་དང་སྦྱོར་ལམ་ཆོས་མཆོག་པ།།

མཐོང་བའི་ལམ་དུ་འཕོས་སོ་མཉམ་རྗེས་སོགས།།

ཇི་ལྟར་འཇོག་ཚུལ་སོགས་ཀྱང་འདིར་མི་འཆད།།

ཇི་ལྟར་རྐུན་མ་སྒོ་རུ་ཕྱུང་འདྲ་བའི།།

བར་ཆད་མེད་པའི་ལམ་དང་སྒོར་ཕྱུང་ནས།།

སྒོ་འཕར་བཅད་ལྟའི་དེས་དྲངས་རྣམ་གྲོལ་ལམ།།

ཇི་བཞིན་ཤེས་ན་ལམ་ལ་རྨོངས་མི་འགྱུར།།

མཐོང་ཟིན་དེ་ཉིད་ཡང་ཡང་གོམས་པ་ལས།།

སྤང་བྱ་སྒོམ་སྤང་སྒྲིབ་གཉིས་སྐོར་བཅུ་གཅིག།

སྒོམ་ལམ་བར་ཆད་མེད་ལམ་བཅུ་གཅིག་གིས།།

སྤོང་ཞིང་ས་བཅུ་རིམ་གྱིས་བགྲོད་པར་འགྱུར།།

དེ་ནས་རྒྱུན་མཐའི་བར་ཆད་མེད་ལམ་མམ།།

བྱང་སེམས་སྒོམ་ལམ་བར་ཆད་མེད་པའི་ལམ།།

ཆེན་པོའི་ཆེན་པོའམ་བྱང་ཆུབ་སེམས་དཔའ་ཡི།།

སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན།།

དེ་ཡིས་དྲི་མ་ཕྲ་མོའི་ཕྲ་མོ་ཀུན།།

ས་བོན་དང་བཅས་ལྷག་མ་མ་ལུས་པར།།

སྦྱངས་མཐར་གཙང་བདེ་རྟག་བདག་དམ་པ་ཡི།།

ཕར་ཕྱིན་བཞིས་བསྡུས་འབྲས་བུ་མཆོག་ཐོབ་འགྱུར།།

དེ་ནས་འཕྲིན་ལས་ལྷུན་གྱིས་གྲུབ་པའི་སྒོས།།

ཀུན་ལ་ཕན་བདེའི་སྒོ་བརྒྱ་འབྱེད་པར་འགྱུར།།

དེ་དག་ཀུན་ཀྱང་བདེན་བཞིའི་བླང་དོར་ལ།།

མཁས་ཤིང་བསྒྲུབས་ལས་བྱུང་བའི་འབྲས་མཆོག་ཉིད།།

དེ་ཕྱིར་ལེགས་ཉེས་དཔྱོད་པའི་བློ་གྲོས་མིག།

ཡོད་པ་བདེན་ན་བདེན་བཞིའི་གནས་ལུགས་ལ།།

ཐོས་བསམ་སྒོམ་པའི་ཚུལ་ལ་མི་བརྩོན་ཞིང་།།

བྱང་ཆེན་དོན་དུ་མི་གཉེར་སུ་ཞིག་ཡོད།།

༼༢༡༽

མདོར་ན་སྙིང་ནས་སྡུག་བསྔལ་ལ་འཇིགས་ན།།

སྡུག་བདེན་འཁོར་བའི་ཉེས་དམིགས་བསམ་དགོས་ཤིང་།།

བསམ་པས་མི་ཆོག་དེ་རྒྱུ་ལས་ཉོན་གྱིས།།

བསྡུས་པའི་ཀུན་འབྱུང་ཇི་བཞིན་ཤེས་དགོས་སོ།།

སྡུག་ཀུན་གཉིས་ཀྱིས་སྲིད་པར་འཁྱམས་པའི་ཚུལ།།

ཇི་བཞིན་ཤེས་ནས་ཇི་ལྟར་འཇིགས་ན་ཡང་།།

དེ་ཉིད་ཟད་པའམ་ཟད་པར་བྱེད་པའི་ཐབས།།

མ་རྙེད་བར་དུ་འཁུམ་ཞིང་སྲོ་ཤིའི་རྒྱུ།།

དེས་ན་རྒྱུ་བཅས་མི་རྟག་སྡུག་ཀུན་འདི།།

ཟད་པ་འགྲུབ་པས་ཞི་བ་འགོག་བདེན་དང་།།

ཟད་དང་ཐོབ་བྱེད་ལམ་གྱི་བགྲོད་ཚུལ་ལ།།

བསླབས་ཤིང་མཁས་ན་མི་འཇིགས་སྤོབས་པ་འཐོབ།།

དེ་ཕྱིར་ཀུན་མཁྱེན་ཀུན་གྱི་སྐྱབས་མཆོག་དེས།།

རྨོངས་པའི་གཉིད་དུ་ཡུར་བའི་འགྲོ་བ་ཀུན།།

སློང་ཕྱིར་རྟག་བརྟན་བདེ་ཆེན་རི་རྩེ་ནས།།

བདེན་བཞིའི་ཆོས་ཀྱི་དུང་ཆེན་ཐོག་མར་བུས།།

དེས་ན་སྡུག་ཀུན་འགོག་ལམ་འདིའོ་ཞེས།།

ལམ་འགྲོ་དབུལ་བོས་ཕྱུག་པོ་གཞན་གྱི་ཕྱུགས།།

བགྲང་བའི་རྣམ་ཐར་མི་བསྐྱང་རང་གི་རྒྱུད།།

འཆོས་ཕྱིར་བདེན་བཞིར་བསླབ་ན་དོན་ཡོད་ཡིན།།

འདི་ནི་མཁས་པའི་གྲལ་དུ་འཛུལ་བྱེད་མིན།།

གཞན་སེམས་ཞི་བདེ་དཀྲུག་པའི་དགག་གཞག་མིན།།

རྒྱུ་ནོར་ཐོབ་ཐང་འགུགས་པའི་འདོད་སྲེད་ཀྱི།།

ལྕགས་མ་ཡིན་ལྷག་བསམ་འོད་ཕུང་ཡིན།།

མཁྱེན་དཔྱོད་འདབ་གཤོག་རྩལ་གྱིས་མདོ་རྒྱུད་གཞུང་།།

ལྷ་ལམ་ཡངས་པོར་བགྲོད་ནུས་མཁའ་ལྡིང་ལ།།

འདི་མི་དགོས་ཀྱང་བདག་དང་སྐལ་མཉམ་གྱི།།

བློ་གསལ་གཤོག་རྩལ་སྦྱོང་རྣམས་བསྟེན་དང་ཕན།།

གལ་ཏེ་འདི་ལ་འབད་པས་རྣམ་དཀར་ལས།།

མཆིས་ན་དགེ་ཚོགས་མ་ལུས་བསྟན་འགྲོའི་དོན།།

འཕེལ་ཕྱིར་བསྔོའོ་མ་རྟོགས་ལོག་རྟོག་གིས།།

ནོངས་པ་ཅི་མཆིས་དམ་པའི་སྤྱན་སྔར་བཤགས།།

༼༢༢༽

ཞེས་བདེན་བཞིའི་རྣམ་གཞག་ཚིགས་བཅད་དུ་བསྡེབས་པ་བློ་གསལ་གཞོན་ནུའི་མགུལ་རྒྱན་ཞེས་བྱ་བ་འདི་ནི། བདག་གི་སྤུན་ཆུང་སྤྱན་སྔ་བ་བཛྲ་འཕྲིན་ལས་རྒྱ་མཚོས་བདེན་བཞིའི་དོན་ཚིགས་བཅད་དུ་བསྡེབས་པ་་བློར་འཛིན་བདེ་བ་ཞིག་ཅིས་ཀྱང་དགོས་ཞེས་རི་ཆུ་ཁྲི་སྟོང་གི་ཕ་རོལ་ནས་ཡང་དང་ཡང་དུ་བསྐུལ་བ་དང་། དེ་བཞིན་དུ་རང་གི་གམ་གཅར་བ་སྤུན་ཆུང་བཛྲ་འོད་ཟེར་དང་། ཐུབ་པའི་བསྟན་པ་ལ་རབ་ཏུ་བྱུང་བའི་གྲྭ་བ་མིན་ཡང་མཆོག་གསུམ་ལ་དད་པ་གཙང་ཞིང་རང་གཤིས་མཆོག་ཏུ་དྲང་བའི་ཚ་བོ་སྒྲོལ་མ་སྐྱབས་གཉིས་ཀྱིས་ཀྱང་ཡང་ཡང་ནན་གྱིས་བསྐུལ་བའི་རེ་བ་སྟོང་ཟད་དུ་མི་གཏོང་བའི་ཆེད་དང་། ལྷག་པར་ཡང་རང་ཉིད་དོན་འདི་ལ་བློ་གོམས་པའི་ཕྱིར་དང་།བསྟན་འགྲོའི་དོན་ཅུང་ཟད་རེ་བསྒྲུབ་ཐུབ་ནའང་ཅི་མ་རུང་སྙམ་པའི་ཀུན་སློང་གཙང་མའི་སྒོ་ནས་བྲིས་པ་ཡིན་ཞིང་། དེ་ཡང་ཆོས་ཟབ་མོ་ལ་རང་དགར་གཟུ་ལམ་དུ་འཇུག་པའམ་རང་གཟོ་སྤང་པའི་ཕྱིར་དུ་འཇམ་དབྱངས་བླ་མ་གུང་ཐང་བསྟན་པའི་སྒྲོན་མཆོག་གིས་མཛད་པའི་བདེན་བཞིའི་རྣམ་གཞག་ཐར་འདོད་འཇུག་ངོགས་མཁས་པའི་དགའ་སྟོན་གཞིར་བཟུང་ནས་དེའི་སྡོམ་ལྟ་བུར་བྲིས་པ་ལགས་ཤིང་།འདི་འབྲི་བཞིན་པའི་སྐབས་སུ་བདག་གི་བྱིས་དུས་ཀྱི་གྲོགས་པོ། སྲིང་མོའི་ཁྱོ་ག་གདུགས་དཀར་ཚེ་རིང་ཞེས་བྱ་བ་སྟབས་མ་ལེགས་པར་འགྲུམ་འགྲུལ་གྱི་དོན་རྐྱེན་ངན་པས་ཚེ་སྲོག་ཤོར་སོང་བས། བྱ་བ་བྲེལ་ཟིང་དང་སེམས་ཁམས་སྐྱོ་སྡུག་གིས་མནར་བས་རེ་ཞིག་འབྲི་མཚམས་འཇོག་དགོས་པ་ལྟ་བུ་ལ་ཐུག་ཀྱང་།འདི་ནི་རྣམ་དཀར་དགེ་བའི་ལས་ཤིག་ཡིན་པས་ཁོའི་དགེ་རྩར་དམིགས་ནས་མཚམས་མ་བཞག་པར་རྫོགས་པར་བྲིས་པ་ལགས་པས། ཁོ་རང་བར་དོ་ན་འཇིགས་སྐྲག་དང་ཕྱི་མ་ན་ངན་སོང་མེད་ཅིང་།སླར་ཡང་དལ་འབྱོར་གྱི་ལུས་རྟེན་བཟང་བོ་ཞིག་ཐོབ་སྟེ་རྒྱལ་བའི་བསྟན་པ་ལ་ལེགས་པར་བསླབ་ནས་ཐར་བའི་ལམ་སྣ་ཟིན་པའི་རྒྱུར་ཡང་བསྔོས་བས་དེ་བཞིན་དུ་གྱུར་ཅིག །

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn 


བརྒྱུད་འགོད།