དུས་ཆེན་ངོས་འཛིན་དང་ཆོ་འཕྲུལ་བསྟོད་པ་བཞུགས།
༄༅།།ཨོ་བདེ་ལེགས་སུ་གྱུར་ཅིག།
ཟླ་མེད་སྟོན་པ་དེ་ལ་ཕྱག་འཚལ་ལོ།།
གཉིས་པའི་ཡར་ངོ་ཆོ་འཕྲུལ་ཆེ།།
དྲུག་པའི་བཞི་ལ་ཆོས་འཁོར་བསྐོར།།
དགུ་པའི་ཉེར་གཉིས་ལྷ་ལས་བབས།།
བཞི་པའི་བཅོ་ལྔ་རྫོགས་སངས་རྒྱས།།
ཞེས་ཡོངས་སུ་གྲགས་པའི་དུས་ཆེན་བཞི་དང་།
ས་ག་ཞེས་གྲགས་ཧོར་ཟླ་བཞི་པ་ཡི།།
དཀར་པོའི་ཕྱོགས་ཀྱི་ཚེས་པ་བཅོ་ལྔ་ལ།།
ཐུབ་དབང་ལྷུམས་ཞུགས་མངོན་པར་བྱང་ཆུབ་དང་།།
མྱ་ངན་འདས་པའི་དུས་ཆེན་ཡིན་པར་གསུངས།།
མཆུ་ཟླ་ཞེས་གྲགས་ཧོར་ཟླ་དང་པོ་ཡི།།
དཀར་པོའི་ཕྱོགས་ཀྱི་ཚེས་པ་བཅོ་ལྔ་ལ།།
ཐུབ་དབང་བལྟམས་པའི་དུས་ཆེན་ཡིན་པར་གསུངས།།
དབོ་ཟླ་ཞེས་གྲགས་ཧོར་ཟླ་གཉིས་པ་ཡི།།
དཀར་ཕྱོགས་སྤྱི་དང་ཁྱད་པར་ཚེས་བརྒྱད་ལ།།
ཆོ་འཕྲུལ་བསྟན་པའི་དུས་ཆེན་ཡིན་པར་གསུངས།།
ཆུ་སྟོད་ཅེས་གྲགས་ཧོར་ཟླ་དྲུག་པ་ཡི།།
དཀར་པོའི་ཕྱོགས་ཀྱི་ཚེས་པ་བཞི་ལ་ནི།།
ཆོས་འལོར་སྐོར་བའི་དུས་ཆེན་ཡིན་པར་གསུངས།།
ཐ་སྐར་ཞེས་བྱ་ཧོར་ཟླ་དགུ་པ་ཡི།།
མར་ངོའི་ཕྱོགས་ཀྱི་ཉི་ཤུ་གཉིས་ལ་ནི།།
ལྷ་ལས་བབས་པའི་དུས་ཆེན་ཡིན་པར་གསུངས།།
ས་ག་ཞེས་བྱ་ཧོར་ཟླ་བཞི་པ་ཡི།།
དཀར་པོའི་ཕྱོགས་ཀྱི་ཚེས་པ་བརྒྱད་ལ་ནི།།
རྒྱལ་ཕུར་འཛོམ་པའི་འགྲུབ་སྦྱོར་བཟང་པོ་ལ།།
རབ་ཏུ་བྱུང་བའི་དུས་ཆེན་ཡིན་པར་གསུངས།།
བཟང་པོའི་དུས་ཆེན་འདི་དག་རྣམས་ལས་ནི།།
ཡིད་ཆེས་རྙེད་པས་དགེ་བ་གང་བསྒྲུབས་དེ།།
བྱེ་བ་བརྒྱ་ཡི་འགྱུར་དུ་མདོ་ལས་གསུངས།།
དེ་ཕྱིར་དགེ་བ་སྒྲུབ་ལ་བརྩོན་པར་མཛོད།།
རྩོམ་སྒྲིག་པ།ཤེས་རབ་རལ་གྲི།
གསལ་འདེབས།རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།དྲ་བའི་སྦྲེལ་ཐགhttp://www.tb1025.cn