མ་ཎི་ཡི་གེ་དྲུག་མ་ནི་གསར་རྙིང་ཀུན་གྱིས་ཁས་ལེན་ཞིང་རྒྱུད་རྒྱ་གཞུང་གི་ཁུངས་དང་ལྡན་པ་ཞིག་ཡིན་ཏེ་གསང་སྔགས་རྙིང་མའི་མ་ཎི་བཀའ་འབུམ་ནང་དུ་ཡི་གེ་དྲུག་མའི་ཕན་ཡོན་རྒྱ་ཆེན་པོ་གསུངས་པ་ལས་བདུན་མའི་ཕན་ཡོན་ཏིལ་ཙམ་ཡང་གསུངས་མེད་པ་དང༌།བོད་ལ་ཆོས་སྐལ་སྤྱན་རས་གཟིགས་ཀྱི་མདོ་རྒྱུད་ཉེར་གཅིག་གི་ནང་དུའང་ཡི་གེ་དྲུག་མའི་གཟུངས་བཤད་པ་ལས་བདུན་མ་བཤད་མེད།

 སློབ་དཔོན་ཐོན་མིའི་ཡིག་ཕུད་དེང་སང་ཕ་བོང་ཁར་དངོས་སུ་ཡོད་པ་དེའང་ཡི་གེ་དྲུག་མ་ལས་བདུན་མ་མིན། དེ་བཞིན་དུ་སློབ་མའི་པད་མ་འབྱུང་གནས་ཀྱི་ཡི་གེ་དྲུག་མའི་སྒྲུབ་ཐབས་ལས་ཀྱང་ཡི་གེ་དྲུག་མ་གསུངས་པ་ལས་བདུན་མ་གསུངས་མེད། དེ་བཞིན་དུ་སྔ་འགྱུར་རྙིང་མའི་གསུང་གང་མང་ཞིག་གི་ནང་དུ་ཡིག་དྲུག་བཤད་ཅིང་དེ་བཞིན་སྤྱོད་བཞིན་ལགས། 

ཁྲོ་ཕུ་བུ་སྟོན་རིན་ཆེན་གྲུབ་ཀྱི་ཆོས་ལོག་སུན་འབྱིན་ལས། གཞན་ཡང་ཁོ་ཡིས་འདོད་པ་ལ།།མ་ཎི་པདྨེ་ཡིག་དྲུག་ལ།།ཧྲཱི་བསྣན་པ་ལ་སྐྱོན་མེད་དེ།།ཧྲཱི་འདི་ཐུགས་རྗེ་ཆེན་པོ་ཡི།།ས་བོན་ཡིན་པས་བསྣན་ནོ་ཟེར།།འདི་ཡང་འཐད་པ་མ་ཡིན་ཏེ།།ཟ་མ་ཏོག་གི་མདོ་ལས་ཀྱང་།།ཡི་གེ་དྲུག་པ་ཉིད་དུ་བཤད།།སངས་རྒྱས་ལས་ནི་ཁོ་མི་ལྷག།རྒྱ་གར་མཁས་པས་འདི་ལྟར་བཞེད།།ཨོཾ་མེད་པ་ལ་ཨོཾ་བཅུག་དང་།།སྭཱ་ཧཱ་ཕཊ་ལ་སོགས་པ་ཀུན།།ཡོད་པ་ཆད་དང་ལྷག་གྱུར་ན།།སྔགས་ཀྱི་ནུས་པ་མེད་པར་གསུངས།།ཞེས་གསུངས་ཡོད།

ཁྱད་པར་གུང་ཐང་བསྟན་པའི་སྒྲོན་མེས་ངེད་ཅག་ཁ་བ་ཅན་པ་ཚོ་ཐུགས་རྗེ་ཆེན་པོ་རང་ལ་མ་བརྟེན་པར་འགྲོ་ནུས་པའི་རེ་བ་མེད། མ་ཎིའི་མཇུག་ཏུ་ཧྲཱི་སྦྱོར་མི་རུང༌། དེ་བྱས་ན་ཡི་གེ་བདུན་དུ་འགྲོ་ཞིང་༌། འདི་ལ་རྒྱུད་སྡེ་རྣམས་སུའང་གཟུངས་སྔགས་ཡི་གེ་དྲུག་པ་སྟེ། ཡི་གེ་དྲུག་གིའང་སྦྱང་གཞི་འགྲོ་བ་རིགས་དྲུག་དང་༌། སྦྱོང་བྱེད་ཀྱི་ལམ་ཕར་ཕྱིན་དྲུག འབྲས་བུ་རྒྱལ་བ་རིགས་དྲུག་འབྱུང་ཞིང་༌། ཡིག་འབྲུ་འདི་དག་ཀྱང་སྣང་མཛད་ནས་མི་བསྐྱོད་པའི་བར་དྲུག་གིས་གསུངས་པ་ཡིན། དེས་ན་མ་ཎི་ནོར་བུ་དང༌། པདྨ་བོད་ལ་མེད་པས་སྐད་ཟུར་དུ་མ་བྱུང་ངོ། མེ་ཞེས་པའི་རིང་ཆ་ནི། བྱིས་པས་མ་ལ་འབོད་པའི་ཚེ་གདངས་རིང་པོར་འབོད་པ་ལྟར། ཨེ་ཞེས་པ་རྣམ་དབྱེ་བརྒྱད་པ་བོད་པའི་སྒྲ་ཡིན་པས། ཀྱེ་ཞེས་བོས་ནས། ཧ་ཞེས་པ་ཐུགས་ཀྱི་ས་བོན་ཡིན་པས་ཐུགས་རྒྱུད་བསྐུལ་ཏེ་ཐུགས་རྗེ་གཟིགས་ཞེས་པ་ལ། ཅི་བྱེད་དགོས་ཤེ་ན།ཨོ་ལ་ཡི་གེ་ཕྲལ་བའི་ཨ་ཨུ་མ་གསུམ་འབྱུང་ཞིང༌། དེས་སྐུ་གསུང་ཐུགས་གསུམ་མཚོན་པས་སྐུ་གསུང་ཐུགས་ཀྱི་དངོས་གྲུབ་སྩོལ་ཞེས་པ་ཡིན་ནོ། ཞེས་གསུངས་སོ། །

མགོན་པོ་གང་གིས་ཀྱང་ཡི་གེ་ཤེས་ཏེ་མ་ཎིའི་དོན་ཤེས་ནས་མ་ཎི་བགྲངས་པ་དང༌། དོན་མ་ཤེས་པར་བགྲངས་པ་ལ་ཁྱད་ཆེན་པོ་ཡོད། མ་ཎིའི་དོན་གང་ཡང་མི་ཤེས་པའི་ཁ་ལ་ཚིག་ཀྱང་མི་དག་པར། ཨོ་མ་ཎི་པདྨེ་ཧཱུཾ་ཧྲཱི་ཞེས་བརྗོད་དེ་ཡིག་དྲུག་དེ་ཡིག་བདུན་བཟོས། ད་དུང་ཧྲཱི་དེ་ཡང་མ་དག་པ་རེད་བརྗོད་པ་དེ་ལྟ་བུ་བྱས་ན་ཕན་ཐོག་གང་ནས་ཡང་མེད་པས། ཕྱིན་ཆད་ང་ཚོ་ཚང་མས་དེ་རིགས་གསུམ་གསུངས་པ་ངེས་པར་གཟབ་གཟབ་བྱེད་དགོས། ཞེས་གསུངས་པས་གསར་རྙིང་གཉིས་ཀས་ཁས་ལེན་པ་ཡི་གེ་དྲུག་མ་ཡིན་ཞིང་རྩོད་པ་མེད་པ་ནི་ཡི་གེ་དྲུག་མ་འདི་ཉིད་ཡིན་ནོ། །

འགའ་རེས་མ་ནི་ཡི་གེ་དྲུག་མ་གསར་ཆོས་དང་བདུན་མ་སྔ་འགྱུར་རྙིང་མའི་ཆོས་ཡིག་ཟེར་བ་དང་སྔ་འགྱུར་རྙིང་མ་ངོ་མི་ཤེས་པའི་རྟགས་ཡིན་ལ། ལྷག་པར་མ་ནི་ཡི་གེ་འདུན་མ་ལས་དྲུག་མ་བཏོན་ན་ཕན་ཡོན་མེད་ཟེར་བ་ནི་བླུན་པོ་ཆོས་སྤངས་པའི་ལས་གསོག་པ་ཡིན་པས་ཆོས་ལ་བརྟེན་ནས་སྡིག་པ་མི་གསོག་པ་གལ་ཆེ་བས་གཟབ་པར་འོས་སོ།  །