ཆེད་བསྒྲིགས། བླ་མ་དྲན་པའི་སྐྱོ་མགུར་དགའ་ལྡན་ཞིང་གི་མཆོད་པ།

ཡོང་ཁུངས།   ངེད་དགེ་ལུགས་པའི་དྲ་བ།     སྤེལ་དུས།  2016-11-24 17:00:47     རྩོམ་པ་པོ།   གངས་རམ་འདེགས།    ཀློག་ཐེངས།  

500315574943485425.jpg

མགོན་རྒྱལ་སྲས་ཤཱཀྱ་ཐུབ་པ་དང་།།

དེ་གཉིས་པ་རྫེ་བཙུན་ཙོང་ཁ་བར།།

དུས་དེ་རིང་གདུང་བའི་གསོལ་འདེབས་འདིར།།

ཐུགས་བརྩེ་བས་གཟིགས་ཤིག་རིན་ཆེན་རྣམས།།

སྔོན་སོང་གི་བསྐལ་བའི་ཁུགས་སོ་ནས།།

ཆོས་བསྟན་བདག་མཁས་གྲུབ་དུ་མ་ཡིས།།

ཐུགས་རྟོགས་པའི་ལུང་བསྟན་དེ་བཞིན་དུ།།

དཔལ་ཨ་ཏི་ཤ་ཡི་སྤྲུལ་བ་སོགས།།

བོད་གངས་རིའི་བསྟན་བདག་འབྱོན་ཞེས་དང་།།

ཁོང་ཡབ་ཡུམ་གཉིས་ལའང་ལུང་བསྟན་ནས།།

བོད་མདོ་ཁམས་ཙོང་ཁའི་ཡུལ་གྲུ་རུ།།

རྟགས་མཚན་བཟང་དུ་མའི་ལྟས་བཅས་འཁྲུངས།།

མགོན་ཆོས་རྗེ་དོན་གྲུབ་རིན་ཆེན་གཙོས།།

སྐུ་ངེས་དོན་དམ་པ་དུ་མས་བསྐྱངས།།

ཐུགས་རྣམ་དཔྱོད་ཉི་མ་རང་ཤར་བཞིན།།

ལས་སྒྲིབ་གཉིས་མུན་པ་སྐད་ཅིག་སངས།།

བློ་རབ་བཟང་འཇམ་དཔལ་གཞོན་ནུའི་སྲས།།

མཁས་གྲགས་སྙན་སྲིད་པའི་ཁྱོན་ན་རྒྱས།།

ཐུགས་མཁྱེན་བརྩེ་ཟུང་གིས་འཁོར་འབངས་ལ།།

དུས་གཏན་གྱི་བདེ་བའི་ལམ་སྟོན་མཛད།།

ཆོས་ཟང་ཟིང་སྒྱུ་མའི་འཁྲུལ་སྣང་ཀུན།།

ཤན་ཡང་དག་འབྱེད་མཛད་བསྟན་པའི་མགོན།།

དྲིན་འཁོར་མེད་རྒྱལ་བའི་བསྟན་དོན་དུ།།

རྗེ་ཁྱེད་འདྲ་བྱོན་པ་ཨེ་མ་རྨད།།

ཕྱོགས་རིས་བྲལ་གྲུབ་མཐའི་གཙུག་རྒྱན་རྣམས།།

ཚིག་ངག་སྒྲོས་བླུན་པོའི་གཤིས་མིན་པར།།

དགའ་ངག་གིས་བསྟོད་པ་གཅིག་ཏུ་མཐུན།།

འདི་བསམ་ན་བླ་མ་དེང་འདིར་དྲན།།

འབྲོག་དབེན་རི་དགའ་ལྡན་ཆོས་སྒར་ནས།།

དཔལ་མཉམ་མེད་རི་བོ་དགེ་ལྡན་གླིང་།།

རྗེ་ཁྱེད་ཀྱི་སྤྲུལ་བའི་མཛད་རྣམ་གྱིས།།

ཕྱོགས་ཀུན་ཏུ་དར་ཞིང་རྒྱས་པར་འདུད།།

སྐུའི་མཛད་འཕྲིན་གངས་རིའི་ཁྱོན་ལ་ཁྱབ།།

གསུངས་འཆད་པས་ལོག་སྨྲ་ཚར་བཅད་དེ།།

ཐུགས་ཉམས་རྟོགས་སྲིད་ན་ཟླ་མེད་པའི།།

ཕ་བླ་མ་ཁྱེད་སྐུ་གང་དུ་བཞུགས།།

རྗེ་ཁྱེད་ཉིད་ཞིང་གཞན་གཤེགས་པ་ལ།།

དབུས་དགའ་ལྡན་གླིང་གི་གདུང་འབོད་དང་།།

བོད་ཆོལ་གསུམ་འཛིན་མའི་ཁྱོན་ཡོངས་སུ།།

རྗེ་བླ་མ་དྲན་པའི་གདུང་དབྱངས་ཁྱབ།།

ཆུང་བྱིས་དུས་དྲིན་ཆེན་ཕ་མ་ཚོས།།

མཚན་སྨག་ནང་སྒྲོན་མེ་ཕྱི་རུ་སྦར།།

བློ་ཐ་ཤལ་བྱིས་པ་སྣབས་བླུགས་དེས།།

ཡིད་དགའ་དགའི་རྩེད་མོའི་རྣམ་པར་རོལ།།

དུས་དེང་སང་བླ་མའི་གདུང་མཆོད་ཅེས།།

དོན་ཡོངས་སུ་སེམས་ངོ་ཤར་བ་དང་།།

རྗེ་ཁྱེད་ཀྱི་མཛད་རྣམ་ངོ་མཚར་ལ།།

ཡིད་དད་གུས་ཤོར་བའི་སྐྱོ་བ་ཆེ།།

ཟླ་བཅུ་བའི་ཚེས་ནི་ཉེར་ལྔ་འདིར།།

འཁོར་སློབ་འབངས་སྐྱོ་བ་ལོས་བདེན་ཏེ།།

ཆུ་གཙང་བོ་སྐྱོ་ནས་དར་དུ་བརྫུས།།

འདི་བསམ་ན་གངས་རིའི་མགོན་ཁྱེད་དྲན།།

དགུང་ཉི་ཟླ་སྐྱོ་ནས་དྲོད་མདངས་ཡལ།།

མཚོ་སྔོན་མོ་སྐྱོ་ནས་རླབས་ཕྲེང་འཇགས།།

ས་དོག་མོ་སྐྱོ་ནས་མུན་པ་རུབ།།

འདི་བསམ་ན་གངས་རིའི་མགོན་ཁྱེད་དྲན།།

དུས་ཁད་ཀྱིས་འགྱུར་བའི་དེང་གི་དུས།།

ཕྱོགས་ཀུན་ལས་ཁྱེད་བསྟན་དར་ན་ཡང་།།

ཆོས་བསྟན་པ་འདི་ཡི་འཕེལ་འགྲིབ་ལས།།

རྗེ་བླ་མ་ཁྱེད་སྐུ་སྙིང་ནས་དྲན།།

མགོན་དགེ་བའི་བཤེས་དང་ཆོས་གྲོགས་ཚང་།།

རྟེན་དལ་འབྱོར་མི་ལུས་དོན་ལྡན་ཡང་།།

རྗེ་ཁྱེད་ཉིད་གདུང་བའི་འབོད་ཐེངས་རེར།།

སེམས་སྐྱོ་བའི་མཆི་མ་གདོང་ལ་བསྟར།།

སེམས་སྐྱོ་བ་ཁྱེད་སྐུ་གཤེགས་པས་ཡིན།།

སེམས་སྤྲོ་བ་ཁྱེད་གསུངས་མཇལ་བས་ཡིན།།

སེམས་དགའ་སྐྱོ་ཟུང་གི་སྐྱོ་གར་ཁྲོད།།

རང་སྐྱོ་བའི་མགུར་གླུ་གསན་ལགས་སམ།།

འབངས་བདག་ཅག་ཕ་མ་རིགས་དྲུག་ལ།།

ཞེ་གནག་པའི་བསམ་ངན་མེད་པ་དང་།།

ཆོས་ཚད་མེད་བཞི་ཡི་ཞལ་འདོན་བཞིན།།

ཚིག་དོན་དང་ལྡན་པར་བྱིན་གྱིས་རློབས།།

བློ་འཛུམ་དཀར་བསླུ་བྲིད་སྦྱོར་བ་ཡིས།།

བདག་གཞན་དོན་ཐར་ལམ་མི་གཅོད་པར།།

སེམས་གང་བྱུང་ཤ་ཚའི་གཏམ་བཟང་གིས།།

གཅེས་གྲོགས་ལ་ཕན་པར་བྱིན་གྱིས་རློབས།།

སྒོས་འཇམ་མགོན་ཁྱེད་ཀྱི་ལུགས་བཟང་འདིར།།

མི་ལྷ་མིན་གཡུལ་སྦྱོར་མེད་པའི་ངང་།།

མགོན་བླ་སློབ་དམ་ཚིག་གཙང་མ་ཡིས།།

སྤང་མཛེས་སྡུག་འཕྲོག་པར་བྱིན་གྱིས་རློབས།།

ཆོས་བརྒྱད་ཀྱིས་གནམ་ས་སྒུལ་དུས་འདིར།།

བློ་ཕྲན་ཙམ་དགེ་བར་ཕྱོགས་པ་ལ།།

འཛུམ་སྡིག་གྲོགས་སྦྱོར་བར་མི་འཕྲད་པར།།

རྗེ་ཁྱེད་ལ་ཞུའོ་ཐུགས་རྗེས་སྐྱོངས།།

རྗེ་ཁྱེད་ཀྱི་བསྟན་སྒོར་ཚུད་པ་འདི།།

སྔོན་སྐྱེ་བར་བསགས་པའི་འབྲས་བུ་ཉིད།།

འདི་ཕྱིས་ཀྱི་ཚེ་རབས་ཕྲེང་ཀུན་ཏུ།།

བསྟན་འདི་ལ་མི་འབྲལ་སྨོན་ལམ་ཡོད།།

སྒོམ་ཉམས་རྟོགས་མེད་པའི་བླུན་པོ་ང་།།

དུས་ནམ་ཞིག་ངེས་མེད་འཆི་བའི་ཚེ།།

རྗེ་ཁྱེད་ཀྱི་ཞིང་དུ་སྐྱེ་བ་དང་།།

དུས་གཏན་ཏུ་འབྲལ་བ་མེད་པར་སྨོན།།

གསེར་རྒྱ་སྲང་གྲངས་ཀྱི་མཆོད་མ་འཛོམས།།

དངུལ་གྲངས་འབོར་ཕྱུག་ཆེན་ནོམ་མ་ཡོད།།

རྗེ་བླ་མ་དྲན་པའི་སྐྱོ་མགུར་འདིས།།

ལུས་སྒོ་གསུམ་མཆོད་པའི་རྟེན་དུ་འབུལ།།

སྒྲ་སྙན་ངག་དོན་གྱི་ཚིག་སྦྱོར་དབེན།།

གཞུང་ཚད་མའི་རིག་ལམ་དེ་བས་ཞན།།

སེམས་གང་ཤར་སྨྲས་པའི་ཐོལ་བྱུང་འདི།།

ངོ་ཚ་མེད་བླུན་པོའི་གཤིས་སུ་བྲིས།།

སྤྲེལ་རྫོང་ཤེར་བཟང་གྲགས་པའམ་གངས་རམ་འདེགས་ཀྱིས།

༢༠༡༦    ༡༡   ༢༤ དང་།  བོད་ཟླ་  ༩ ཚེས  ༢༦ ཧོར་ཟླ་  ༡༠  ཚེས་  ༢༥ ཉིན་ལ་རང་ཤག་ནས། 

                                                      རྩོམ་སྒྲིག་པ།ཤེས་རབ་རལ་གྲི།གསལ་འདེབས།རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།དྲ་བའི་སྦྲེལ་ཐགhttp://www.tb1025.cn


བརྒྱུད་འགོད།