ཆེད་བསྒྲིགས། མཚོ་ཁ་ནས་ཙོང་ཁ་བ་དྲན་པ།
ཀླུ་འབུམ་དགེ་དང་ཤིང་བཟའ་ཨ་ཆོས་ཀྱི།།
སྲས་སུ་འཁྲུངས་ཤིང་མཚར་ལོང་བྱུང་པ་ཡི།།
གངས་ཅན་མཁས་པའི་ཚོགས་ཀྱི་ཡང་སྙིང་སྟེ།།
བློ་བཟང་གྲགས་པའི་དཔལ་ལ་གུས་པས་འདུད།།
འཆད་རྩོད་རྩོམ་དང་ལྟ་སྤྱོད་སྒོམ་གསུམ་ལ།།
འགྲན་ཟླ་བྲལ་ཞིང་སྐྱོན་གྱི་མ་གོས་པས།།
བླ་མེད་མཁས་པ་ཀུན་དགའ་སྙིང་པོ་ནི།།
བསྟན་དང་འགྲོ་བ་བསམ་པའི་སེམས་དཔའ་ཉིད།།
གཞན་དང་མི་མཚུངས་རྣམ་དཔྱོད་ལྡན་པ་ཡིས།།
ཞབས་ཟུང་དབུས་སུ་བཏེགས་དེ་སློབ་གཉེར་མཛད།།
རིག་གནས་ཆེ་ཆུང་མ་ལུས་དཔྱིས་ཕྱིན་པས།།
གྲྭ་བསྐོར་མཛད་དེ་མཚན་སྙན་གླིང་ལ་ཁྱབ།།
ཡུལ་ལ་མ་སླེབས་མ་ལོར་མ་འཕྲད་པ།།
མ་བུའི་བརྩེ་སེམས་མེད་པ་མ་ཡིན་ལ།།
རླབས་ཆེན་བྱ་བཞག་དོན་དུ་གཉེར་བས་ན།།
བློས་གཏོང་སྙིང་སྟོབས་ཡིན་པ་སོམ་ཉི་ཅི།།
བླང་དོར་གནས་ལ་དཔྱོད་པའི་ཤེས་རབ་ཀྱིས།།
རྟེན་འབྱུང་ལྟ་བར་གོ་བ་ཟབ་མོ་རྙེད།།
རྒྱ་བོད་གཞུང་བརྒྱའི་གནད་ལ་ཐོས་བསམ་བྱས།།
བསྟན་པའི་མེ་ཆེན་དབུས་གཙང་ཞིང་ནས་སྦར།།
རེ་གསུམ་རྟ་ཟླའི་ཉེར་ལྔའི་མཚན་མོ་དེར།།
རྒྱལ་ཚབ་རྗེ་ལ་གདན་ས་སྐྱོང་དགོས་ཞེས།།
བྱང་ཆུབ་སེམས་ནི་བསྒོམས་པར་གདམས་པ་ནི།།
མི་ཚེ་མཐའ་མར་བསྟན་པའི་མཛད་པ་ཡིན།།
མདོ་དབུས་ཁམས་གསུམ་ས་གནས་སོ་སོ་ན།།
མར་མེ་འོད་ཀྱིས་ས་གསུམ་ཁྱབ་པ་ནི།།
རླབས་ཆེན་སྐྱེས་བུ་ཁྱེད་ནི་སེམས་ཅན་གྱི།།
བསམ་བློའི་སྒྲོན་མེ་ཡིན་པར་རྗེས་དྲན་ནོ།།
༢༠༡༦ལོའི་བོད་ཟླ་༡༠ཚེས་༢༥ཉིན།
རྩོམ་སྒྲིག་པ། ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn