བློ་བཟང་གཞལ་མེད་ཐིག་ལེར་མངོན་ཆགས་པའི།།
སྒྱུ་འཕྲུལ་ཀློང་ལ་རོལ་བའི་སྟངས་སྟབས་ཀྱིས།།
མཁས་མངས་རྒྱ་མཚོའི་གྲགས་པ་ཉམས་བྱེད་པ།
ཡབ་རྗེ་ཙོང་ཁ་བ་ཁྱོད་སྙིང་ནས་གུས།།

ཉིད་ཀྱི་བྱམས་བརྩེ་ཉི་མ་གཞོན་ནུ་ཡིས།།
ཟེ་མ་རེ་རེའི་འོད་ཀྱི་རླབས་འཕྲེང་གིས།།
བསྐྱང་བའི་པདྨ་སྟོང་གི་མགོ་བོ་འང་།།
བྲང་ཁར་དུད་པའི་མིག་ཆུའི་རླབས་འཕྲེང་གཡོ།།

ཁྱོད་སྐུ་བསིལ་ཟེར་བྱེད་པོ་འཛུམ་པ་ཡིས།།
མཚན་དཔེའི་མེ་ཏོག་འདབ་མ་རབ་རྒྱས་ཀྱང་།།
མི་མཐོང་ཞི་བའི་དབྱིངས་སུ་གཟིམ་པ་འདིས།།
འགྲོ་ཀུན་ཨུཏྤལ་འདབ་མ་ཟུམ་པར་བྱས།།

ཁྱོད་ཐུགས་ཀློང་ལས་བཞུར་བའི་གངས་ཀྱི་ཆབ།།
འཐུང་འདོད་སེམས་ཀྱི་ཚ་རླབས་གདུས་དྲགས་པས།།
གདུང་བའི་ཡིད་ཀྱི་མཆི་མ་བསྐོལ་བྱས་ནས།།
མིག་གི་ཕྲུ་མར་འཁྱིལ་བའི་རྫིང་བུ་འགག།

ཁྱོད་ཡོན་ནམ་མཁའི་མཐའ་ལས་ཆ་ཤས་ཤིག།
གདུལ་བྱའི་བློ་ཡི་མེ་ལོང་ལ་འཆར་ནས།།
དྲན་གདུང་ངག་རིག་སྙན་པའི་དབྱངས་རྟ་ལ།།
དྲངས་པའི་འབོད་དབྱངས་ནམ་མཁའི་མཐོངས་སུ་འཕུར།། 

ལྷ་ཡི་རྔ་ལྟར་ཡིད་འབབ་གསུང་དབྱངས་ཀྱིས།།
ཚངས་པའི་སྲས་མོའི་སྙན་པ་འགག་བྱས་པའི།།
ཙོང་ཁའི་རྒྱས་སྲས་དྲན་པའི་གདུང་དབྱངས་ཀྱིས།།
སྙན་པའི་དབྱངས་རྟ་ཨ་སྔོན་མཁའ་ལ་འཕུར།།

བརྩེ་བའི་འོ་མཚོ་གཡས་སུ་འཁྱིལ་བ་འདི།།
མཐའ་ཀླས་གདུལ་བྱའི་ཧུབ་གྱིས་དྲངས་ནའང་།།
ད་དུང་ཟད་པ་མེད་པར་གྱུར་བ་ཡི།།
མགོན་ཁྱོད་དྲན་པའི་གདུང་དབྱངས་སྨུག་ལ་འདྲེས།།

རིག་བྱེད་རླབས་ཕྲེང་ཆས་ཆེར་གཡོ་བ་ཡིས།།
ཛམ་བུའི་གསེར་གྱི་དབུ་བ་རབ་བརྩེགས་པས།།
གཞན་སྡེ་རིག་བྱེད་སྨྲ་བས་མིང་འཛིན་དག།།
སྨྲ་བཅད་སྡེ་ལ་བཀོད་པས་ལྷག་ཏུ་དྲན།།

2015/10/19ཞེས་རྩེ་སྐྱེས་བློ་བཟང་གྲོལ་སྡེ་འམ་བྲན་མིང་བར་འབོད་པའི་རང་ཤག་གླེགས་བམ་བརྩེགས་པའི་ལྡིང་ཁང་ནས་བྲིས་པ་དགེ།

                                                 རྩོམ་སྒྲིག་པ།  ཤེས་རབ་རལ་གྲི། 
གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn