རྗེ་བླ་མ་རྗེས་དྲན་ཆེད་བསྒྲིགས། རྗེ་བླ་མ་རྗེས་སུ་དྲན་པའི་གསོལ་འདེབས།
རྨད་བྱུང་མཁྱེན་པས་ཤེས་བྱ་མ་ལུས་གཟིགས།།
སྙིང་རྗེའི་ཆེན་པོས་འགྲོ་རྣམས་བུ་བཞིན་སྐྱོང་།།
མཚན་ཙམ་ཐོས་པས་བདུད་དཔུང་མ་ལུས་འཇོམས།།
རིགས་གསུམ་མགོན་པོའི་ཞལ་ལ་གསོལ་བ་འདེབས།།
སྙིང་རྗེའི་སྤྲིན་དཀར་ཕུང་བོའི་ལྡིང་ཁང་ནས།།
ཞལ་བཟང་འཛུམ་པའི་ཕྲེང་བ་རབ་ཏུ་སྟོན།།
དྲི་མེད་ཆོས་ཀྱི་ཆར་བ་ལེགས་བསྩལ་ཏེ།།
བདུད་རྩིའི་ཆུ་ཡིས་བདག་བློ་ཚིམ་པར་ཤོག །
བདག་སོགས་ཁྱེད་ཀྱི་སྙིང་རྗེའི་གྲུ་ཆེན་གྱིས།།
འཁོར་བ་སྡུག་གི་མཚོ་ལས་མི་སྒྲོལ་ན།།
འདི་ལས་སྒྲོལ་མཁན་གཞན་པ་སུ་ལ་རེ།།
སྡུག་ལས་སྒྲོལ་ཅིག་བླ་མ་བློ་བཟང་གྲགས།།
བདག་ནི་འཆི་བར་ཉེ་བའི་དུས་ཀྱི་ཚེ།།
དགའ་ལྡན་ཞིང་ནས་བླ་མ་ཁྱོད་བྱོན་ནས།།
བུ་ཁྱོད་མ་སྐྲག་དགའ་ལྡན་ཞིང་ཁམས་སུ།།
ཤོག་ཅེས་གསུངས་ཤིག་བླ་མ་བློ་བཟང་གྲགས།།
ལུས་པོ་ལྷོད་ཀྱང་སོ་ལ་དྲེག་པ་ཆགས།།
ཉམས་སྣང་སྨིག་རྒྱུ་ལྟ་བུ་འཆར་བའི་རྟགས།།
འབྱུང་བ་ས་ནི་ཆུ་ལ་ཐིམ་པའི་ཚེ།།
མ་འཇིགས་གསུངས་ཤིག་བླ་མ་བློ་བཟང་གྲགས།།
ལྕེ་ཐུང་ཤེས་པ་འཚུབ་ཅིང་ཁ་སྣ་བརྫས།།
ཉམས་སྣང་དུ་བ་ལྟ་བུ་འཆར་བའི་རྟགས།།
འབྱུང་བ་ཆུ་ནི་མེ་ལ་ཐིམ་པའི་ཚེ།།
སེམས་གསོ་མཛོད་ཅིག་བླ་མ་བློ་བཟང་གྲགས།།
རང་མདངས་ཉམས་ཤིང་ལུས་ཀྱི་ཚ་དྲོད་སྡུད།།
ཉམས་སྣང་མེ་ཁྱེར་ལྟ་བུ་འཆར་བའི་རྟགས།།
འབྱུང་བ་མེ་ནི་རླུང་ལ་ཐིམ་པའི་ཚེ།།
ཆོས་སྒྲ་སྒྲོགས་ཤིག་བླ་མ་བློ་བཟང་གྲགས།།
དབུགས་ཕྲེང་ཆད་ཅིང་ལུས་པོ་ཤིགས་སེ་འཐོར།།
ཉམས་སྣང་མར་མེ་ལྟ་བུ་འཆར་བའི་རྟགས།།
རྣམ་པར་ཤེས་པ་རླུང་ལ་ཐིམ་པའི་ཚེ།།
བསུ་བར་བྱོན་ཅིག་བླ་མ་བློ་བཟང་གྲགས།།
ཁྱོད་ཐུགས་སྙིང་རྗེའི་ལྕགས་ཀྱུ་རྣོ་པོ་ཡིས།།
ཐོགས་མེད་གཙུག་སྒོ་བུ་གར་རབ་ཞུགས་ཏེ།།
དབུ་མའི་ལམ་དུ་སེམས་ཉིད་ཡུད་ཙམ་ལ།།
ཐུགས་ཀར་དྲོངས་ཤིག་བླ་མ་བློ་བཟང་གྲགས།།
རྣམ་ཤེས་སྐྱེས་བུ་གང་ནི་དེ་མ་ཐག །
ཁྱོད་དང་ཐེག་ཆེན་སྲས་ཀྱི་ཐུ་བོ་རྣམས།།
ལྷན་ཅིག་དགའ་ལྡན་ཞིང་དང་མི་འབྲལ་བར།།
འགྲོགས་པར་ཤོག་ཅིག་བླ་མ་བློ་བཟང་གྲགས།།
ཁྱོད་ཉིད་བཞུགས་པའི་དགའ་ལྡན་ཞིང་མཆོག་དེར།།
ཇོ་བོ་ཨ་ཏི་ཤ་དང་འབྲོམ་སྟོན་རྗེ།།
དབང་བོ་རྣོ་པོ་ཐེག་པ་ཆེན་པོའི་རིགས།།
མཇལ་བར་ཤོག་ཅིག་བླ་མ་བློ་བཟང་གྲགས།།
སྐྱེས་མ་ཐག་ཏུ་རྗེ་བཙུན་བྱམས་མགོན་གྱི།།
ཞལ་མཆོག་མཐོང་ཞིང་གསུང་གི་བདུད་རྩིའི་བཅུད།།
ངོམས་པ་མེད་པར་འཐུང་བའི་སྐལ་བ་ནི།།
ལྡན་པར་ཤོག་ཅིག་བླ་མ་བློ་བཟང་གྲགས།།
ལས་ཀྱི་དབང་གིས་བར་དོར་སྐྱེས་གྱུར་ཀྱང་།།
ཐེག་ཆེན་བྱང་ཆུབ་སེམས་དཔའ་ཐམས་ཅད་ཀྱིས།།
དམ་ཆོས་བསྟན་པའི་གསུང་སྒྲ་ལྷང་ལྷང་དུ།།
ཐོས་པར་ཤོག་ཅིག་བླ་མ་བློ་བཟང་གྲགས།།
གང་དུ་སྐྱེས་ཀྱང་གནས་དེ་དག་པའི་ཞིང་།།
གང་དང་འགྲོགས་ཀྱང་གྲོགས་དེ་ལྷ་ཡི་གྲོགས།།
གང་ལ་ཉན་ཡང་ཆོས་དེ་རྒྱལ་བའི་གསུང་།།
ཡིན་པར་ཤོག་ཅིག་བླ་མ་བློ་བཟང་གྲགས།།
སངས་རྒྱས་བྱང་སེམས་རྣམས་ཀྱི་མཛེས་པའི་ཕྱག །
བདག་གི་སྤྱི་བོར་བཞག་ནས་སྙན་པའི་གསུང་།།
སངས་རྒྱས་མྱུར་དུ་ཐོབ་པར་ལུང་བསྟན་པའི།།
སྣང་བ་སྟོན་ཅིག་བླ་མ་བློ་བཟང་གྲགས།།
ཡང་གཅིག་སྐྱེ་བ་ལེན་པར་འདོད་པའི་ཚེ།།
ཟབ་མོའི་དམ་ཆོས་ཉམས་སུ་ནུས་ཤིང་།།
ནད་མེད་ཚེ་རིང་རིགས་མཐོ་གཟུགས་བཟང་བར།།
སྐྱེ་བར་ཤོག་ཅིག་བླ་མ་བློ་བཟང་གྲགས།།
གཞོན་དུས་སངས་རྒྱས་བསྟན་པའི་སྒོར་ཞུགས་ནས།།
བསམ་སྦྱོར་གཉིས་ཀྱིས་བཤེས་གཉེན་ལེགས་བསྟན་ཏེ།།
བཀའ་པོད་ལྔ་ལ་སྦྱང་བའི་མཁས་རྣམས་ཀྱི།།
ཡང་རྩེར་ཤོག་ཅིག་བླ་མ་བློ་བཟང་གྲགས།།
རྒྱལ་བའི་བསྟན་པ་འཆད་རྩོད་རྩོམ་པ་ཡིས།།
གངས་ཅན་ས་གཞི་ཡངས་པའི་ཁྱོན་ཀུན་ཏུ།།
སྤེལ་བར་མཛད་མཁས་དམ་པ་ཁྱེད་འདྲ་བར།།
དེ་འདྲར་ཤོག་ཅིག་བླ་མ་བློ་བཟང་གྲགས།།
ཚེ་ཐུང་གཅིག་ལ་སྒྲུབ་པ་ཉམས་ལེན་སོགས།།
བྱ་དཀའི་གནས་རྣམས་བརྩོན་པས་བསྒྲུབས་པ་ལ།།
རྣལ་འབྱོར་དབང་ཕྱུག་མི་ལ་རྡོ་རྗེ་དང་།།
མཚུངས་པར་ཤོག་ཅིག་བླ་མ་བློ་བཟང་གྲགས།།
འདི་ལྟར་ཁྱེད་ལ་གསོལ་བ་བཏབ་པའི་མཐུས།།
ཐེག་ཆེན་བཤེས་གཉེན་མགོན་དང་མི་འབྲལ་བར།།
ཁྱེད་ཀྱི་བསྟན་པའི་རྒྱལ་མཚན་སྲིད་པའི་རྩེར།།
བསྒྲེང་བར་བྱེད་ལ་ཟླ་དང་བྲལ་བར་ཤོག །
ཅེས་རྗེ་བཙུན་བླ་མ་བློ་བཟང་གྲགས་པ་ལ་དད་པ་དང་དག་སྣང་ཐུན་མོང་མ་ཡིན་པ་ཞིག་གིས་ཡིད་བསྐུལ་བ་ལ་བརྟེན་ནས་བོད་རབ་རྒྱན་མེ་སྤྲེལ་ལོའི་ཧོར་ཟླ་བཅུ་བའི་ཚེས་ཉེར་ལྔ་སྟེ།ལྔ་མཆོད་ཆེན་མོ་ཞེས་ཡོངས་སུ་གྲགས་པའི་དུས་ཆེན་གྱི་ཉིན་འདི་ལ་ཐེག་ཆེན་གསོ་སྦྱོང་གི་སྡོམ་པའི་ངང་ནས་རྗེ་བླ་མ་ལ་རྗེས་དྲན་གྱི་ཚུལ་དུ་གསོལ་བ་བཏབ་པའོ།
རྩོམ་སྒྲིག་པ། ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn