རྗེ་བཙུན་མི་གཡོ་མགོན་པོ་ལ་བསྟོད་པ་བྱིན་རླབས་གྱི་ཆུ་གཏེར་ཞེས་བྱ་བ། གངྒའི་བྱེ་སྙེད་གྲངས་མཉམ་ཕྱོགས་བཅུའི་རྒྱལ་རྣམས་ཀྱིས། །ཡན་ལག་དྲུག་བཅུའི་དབྱངས་ཀྱིས་རྟག་ཏུ་མགོན་པོ་ཁྱོད། །མཆོག་ཏུ་བསྟོད་མོད་འོན་ཀྱང་བདག་གིས་གུས་པ་ཡིས། །ལྷག་པའི་ལྷ་ཁྱོད་བསྟོད་དོ་རྗེས་སུ་གཟུང་དུ་གསོལ། །སྲིད་པའི་སྐྱོན་སྤངས་མཚོ་སྐྱེས་འདབ་མ་བརྒྱད། །ལོག་ལྟའི་མུན་སེལ་འོད་སྟོད་ལྡན་པ་ཅན། །དྲི་མེད་པད་ཉའི་གདན་ལ་རབ་བརྗིད་པའི། །བརྐྱང་བསྐུམ་ཞབས་ཀྱིས་བཞུགས་ལ་ཕྱག་འཚལ་ལོ། །འཁོར་འདས་ཀུན་གྱི་གཤིས་ལུགས་སྟོང་པ་ཉིད། །རང་བཞིན་འོད་གསལ་དྲི་མེད་ཆོས་ཀྱི་སྐུ། །མི་འགྱུར་འགྱུར་བ་མེད་པ་མཚོན་པའི་ཕྱིར། །ཨིནྡྲ་ནཱི་ལའི་མདོག་ཅན་ཁྱོད་ཕྱག་འཚལ། །ཁམ་སེར་རལ་བའི་སྐྲ་ལོ་གྱེན་དུ་མཛེས། །དམར་ཟླུམ་སྤྱན་གསུམ་སྡང་ཐབས་ཚུལ་གྱིས་བགྲད། །འཇིགས་པའི་ཁྲོ་གཉེར་དཔྲལ་བའི་དབུས་སུ་བསྡུས། །བདུད་དཔུང་བརླག་པར་མཛད་ལ་ཕྱག་འཚལ་ལོ། །བགེགས་དང་ལོག་འདྲེན་གདུག་པ་ཅན་རྣམས་ཀྱི། །མགུལ་བ་རྩད་ནས་འབྲེག་པར་མཛད་པའི་ཕྱིར། །གཡས་པའི་ཕྱག་གིས་འབར་ཞིང་རབ་འབར་བའི། །རལ་གྲི་འཕྱར་བར་མཛད་ལ་ཕྱག་འཚལ་ལོ། །སྲིད་ན་དྲེགས་པར་རློམ་པའི་དྲེགས་པ་ཅན། །ཚངས་དང་དབང་པོ་ཁྱབ་འཇུག་ལ་སོགས་ཀྱང་། །སྡིགས་མཛུབ་ཕྱག་གིས་རེངས་པར་མཛད་པའི་ཕྱིར། །གཡོན་པས་སྡིགས་མཛུབ་མཛད་ལ་ཕྱག་འཚལ་ལོ། །བདུད་བཞིའི་འཇིགས་པས་བསྐྱོད་པར་མི་ནུས་ཕྱིར། །གཡས་བསྐུམ་ཞབས་ཀྱི་མཐིལ་གྱིས་ཉི་གདན་ལ། །ཤིན་ཏུ་བརྟན་པའི་ཚུལ་གྱིས་བཞུགས་གྱུར་པ། །བདུད་འཇོམས་དཔའ་བོ་ཁྱོད་ལ་ཕྱག་འཚལ་ལོ། །མི་འགྱུར་བདེ་ལ་ཆེན་པོའི་སྐུ་བརྙེས་ཀྱང་། །རང་ཉིད་ཞི་བདེའི་འདོད་པ་སྤངས་གྱུར་ནས། །རྟག་ཏུ་གཞན་གྱི་དོན་དུ་གཤེགས་མཛད་ཕྱིར། །གཡོན་ཞབས་བརྐྱང་པར་མཛད་ལ་ཕྱག་འཚལ་ལོ། །ནང་གི་དུག་གསུམ་རྩད་ནས་བཅད་པའི་མཐུས། །ཕྱི་རོལ་དབྱིག་དུག་སྦྱར་བའི་དུག་ལ་སོགས། །འགལ་རྐྱེན་ཀུན་གྱིས་བརྫི་བར་མི་ནུས་ཕྱིར། །སྦྲུལ་གདུག་དོ་ཤལ་མཛད་ལ་ཕྱག་འཚལ་ལོ། །མཁྱེན་བརྩེའི་དཔུང་གིས་འཁོར་བའི་གཡུལ་ངོ་བཟློག །བདག་འཛིན་དགྲ་ཆེན་མ་རུངས་ཕམ་པར་བྱས། །རྒྱལ་དཀའི་གཡུལ་ལས་ལེགས་པར་རྒྱལ་བའི་ཕྱིར། །དཔའ་བོའི་སྟག་ལྤགས་མནབས་ལ་ཕྱག་འཚལ་ལོ། །གང་གི་ཁྱོད་བསྒོམ་སྙིང་པོ་བཟླས་པ་དང་། །རྩེ་གཅིག་ཡིད་ཀྱིས་ཁྱོད་ལ་དད་བྱེད་ན། །དེ་ལ་གང་འདོད་འབྲས་བུ་སྩོལ་བའི་ཕྱིར། །རིན་ཆེན་དུ་མས་བརྒྱན་ལ་ཕྱག་འཚལ་ལོ། །དམར་ནག་རབ་ཏུ་འཁྱུག་པ་བསྐལ་པའི་མེ། །གདོན་བགེགས་ཐལ་བར་སྲེག་པའི་ཚ་ཟེར་ཅན། །ཤིན་ཏུ་བཟོད་དཀའ་བལྟ་བར་མི་ནུས་པའི། །མེ་དཔུང་དབུས་ན་བཞུགས་ལ་ཕྱག་འཚལ་ལོ། །ནད་དང་གདོན་སོགས་ཕྱི་ནང་འཚེ་བ་ནི། །རྣམ་པ་དུ་མས་ཤིན་ཏུ་ཉམ་ཐག་ཚེ། །ལྷ་མཆོག་ཁྱོད་ལ་གུས་པས་སྐྱབས་བཅོལ་ན། །བར་ཆད་ཞི་མཛད་ཁྱོད་ལ་ཕྱག་འཚལ་ལོ། །གང་ཆེ་གནས་ལུགས་དོན་ལ་རྨོངས་པ་ཡི། །གཏི་མུག་མུན་པས་བློ་མིག་ཁེབས་པའི་ཚེ། །ཡེ་ཤེས་སྣང་བ་བསྐྱེད་པར་གསོལ་བཏབ་ན། །ཤེས་རབ་མིག་སྦྱིན་ཁྱོད་ལ་ཕྱག་འཚལ་ལོ། །གང་ཚེ་ཚེ་ཡི་འཕེལ་རྐྱེན་ཟད་པའི་མཐུས། །མི་འདོད་འཆི་ལྟས་དུ་མ་ཤར་བའི་ཚེ། །ལ་མང་བྱེ་བ་གནས་ཕྱིར་གསོལ་བཏབ་ན། །ཚེ་དཔག་མེད་སྟེར་ཁྱོད་ལ་ཕྱག་འཚལ་ལོ། །དངོས་སམ་རྨི་ལམ་དུས་སུ་ཚབས་ཆེན་གདོན། །ཤིན་ཏུ་དབྲལ་དཀས་བཏབ་པའི་ལྟས་བྱུང་ཚེ། །ལྷ་མཆོག་དྲན་ཞིང་རིག་སྔགས་བགྲངས་གྱུར་ན། །གདོན་གྱི་འཇིགས་ལས་སྒྲོལ་མཛད་ཁྱོད་ཕྱག་འཚལ། །མདོར་ན་མི་འདོད་སྣ་ཚོགས་ཞི་བ་དང་། །མཐུན་རྐྱེན་ཚེ་དང་དཔལ་འབྱོར་རྒྱས་ལ་སོགས། །གང་གང་འདོད་པ་དེ་ཀུན་གསོལ་བཏབ་ན། །མ་ལུས་སྩོལ་བར་མཛད་ལ་ཕྱག་འཚལ་ལོ། །དེ་ལྟར་ལྷག་པའི་ལྷ་མཆོག་བཅོམ་ལྡན་འདས། །ཁྲོ་བོའི་རྒྱལ་པོ་འཕགས་མཆོག་མི་གཡོ་མགོན། །ཁྱོད་ལ་དང་བའི་ཡིད་ཀྱིས་བསྟོད་པའི་མཐུས། །བདག་གི་བསམ་པའི་དོན་རྣམས་འགྲུབ་པ་མཛོད། །ཇི་སྲིད་ཁྱོད་ཀྱི་གོ་འཕང་མ་ཐོབ་པ། །དེ་སྲིད་བདག་ནི་ཚེ་རབས་ཐམས་ཅད་དུ། །ལྷ་མཆོག་ཁྱོད་བསྒོམས་རིག་སྔགས་བཟླས་པ་ལ། །སྐད་ཅིག་ཙམ་ཡང་གཡེལ་བར་མ་གྱུར་ཅིག །ཟག་བཅས་ལུས་འདི་རྣམ་ཤེས་དང་བྲལ་ཞིང་། །ཚེ་འདིའི་སྣང་བ་ནུབ་པར་གྱུར་མ་ཐག །བཅོམ་ལྡན་ཁྱོད་ཀྱི་ཞབས་ཀྱི་དྲུང་དུ་བདག །སྐྱེས་ནས་ཁྱོད་མཉེས་ཁོ་ན་བགྱིད་པར་ཤོག །གང་ཞིག་བསྟོད་པ་འདི་ཡིས་ལྷག་པའི་ལྷ། །ཁྲོ་རྒྱལ་མི་གཡོ་མགོན་ལ་བསྟོད་བྱེད་པ། །དེ་ཡི་སྙིང་ལ་བཅོམ་ལྡན་མི་གཡོ་མགོན། །རྟག་ཏུ་འབྲལ་བ་མེད་པར་གནས་གྱུར་ཅིག །རིགས་རུས་ཕུན་ཚོགས་དཔལ་གྱིས་རབ་མཐོ་ཞིང་། །རྣམ་ཐོས་བུ་ཡི་འབྱོར་བའང་ཟིལ་གནོན་པ། །ལྷག་བསམ་བཟང་པོ་ཅན་དེས་བསྐུལ་བའི་ངོར། །དཀའ་བཞི་སྨྲ་བ་བློ་བཟང་གྲགས་པས་སྦྱར། །
                                         བཅོམ་ལྡན་འདས་མི་གཡོ་མགོན་པོའི་སྒོ་ནས་སྨོན་ལམ་འདེབས་ཚུལ། 

 སྭསྟི། བདག་གིས་ཚེ་རབས་ཀུན་ཏུ་བསྟེན་པ། །ལྷག་པའི་ལྷ་མཆོག་མི་གཡོ་མགོན་པོ། །ཁྱོད་ཀྱིས་མཁྱེན་པར་མཛད་དུ་གསོལ་གྱིས། །དྲི་མེད་སྨོན་ལམ་བདག་གིས་གདབ་བོ། །བདག་ནི་གང་དུ་སྐྱེས་པར་གྱུར་ཀྱང་། །ལྷ་མཆོག་ཁྱོད་ཀྱི་བསྒོམ་བཟླས་དྲི་མེད། །སྒོ་གསུམ་གུས་པས་ཉམས་སུ་ལེན་ལ། །ནམ་ཡང་གཡེལ་བ་མེད་པར་གྱུར་ཅིག །ལྷག་པའི་ལྷ་ཁྱོད་བསྒྲུབས་པའི་མཐུ་ཡིས། །མ་ནོར་ལམ་སྟོན་བཤེས་གཉེན་བཟང་པོས། །བརྩེ་བའི་ཐུགས་ཀྱིས་རྗེས་སུ་བཟུང་སྟེ། །ཟབ་མོའི་ལམ་རྣམས་སྟོན་པར་གྱུར་ཅིག །གང་ཚེ་ཤིན་ཏུ་ཟབ་པའི་ཉེ་ལམ། །བདག་གིས་གུས་པས་སྒྲུབ་པ་དེ་ཚེ། །ཁྲོ་བོའི་རྒྱལ་པོ་ཁྱོད་ཀྱི་མཐུ་ཡིས། །འགལ་བའི་རྐྱེན་རྣམས་ཞི་བར་གྱུར་ཅིག །བདག་ནི་བདག་འཛིན་ཞགས་པ་དམ་པོས། །འཁོར་བའི་བཙོན་རར་བསྡམས་པའི་དེ་ཚེ། །བུ་གཅིག་པ་ལ་མ་ཡིསབརྩེ་བཞིན། །སྡུག་བསྔལ་མཚོ་ལས་སྒྲོལ་བར་གྱུར་ཅིག །ལས་ངན་རླུང་གི་ཤུགས་ཀྱིས་བདས་ཏེ། །ངན་འགྲོའི་གཡང་ལ་ལྷུང་བའི་དེ་ཚེ། །ཐུགས་རྗེའི་ཕྱག་ནི་ལེགས་པར་བརྐྱངས་ནས། །ངན་འགྲོའི་འཇིགས་ལས་སྐྱོབ་པར་གྱུར་ཅིག །མདོར་ན་འཕྲལ་དུ་ནད་གདོན་བར་ཆད། །མ་ལུས་ཞི་ཞིང་མཐར་ཐུག་རྒྱལ་བའི། །སྐུ་བཞིའི་འབྲས་བུ་དཀའ་བ་མེད་པར། །མྱུར་དུ་བདག་གིས་ཐོབ་པར་གྱུར་ཅིག །བཅོམ་ལྡན་མི་གཡོ་མགོན་པོའི་སྒོ་ནས། །སྨོན་ལམ་འདེབས་ཚུལ་ཚིགས་བཅད་བདུན་འདི། །མྱུར་བ་མྱུར་བར་རྩོམས་ཞེས་བསྐུལ་ཚེ། །དེ་ལྟ་དེ་ལྟར་བདག་གིས་སྦྱར་རོ། །ཞེས་པ་འདི་ཡང་དཔོན་དཔལ་འབྱོར་བཟང་པོས་བསྐུལ་བའི་ཚེ་བློ་བཟང་གྲགས་པས་ཇའི་གྲལ་དུ་སྨྲས་པའོ། །

                                       རྩོམ་སྒྲིག་པ། ནོར་བཟང་རྒྱ་མཚོ།
       གསལ་འདེབས།། 
           རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
          དྲ་བའི་སྦྲེལ་ཐགhttp://www.tb1025.cn