དེ་ལྟར་མཛད་པའི་མཐུས་ཐུབ་པའི་བསྟན་པ་ཉམས་པ་གསོས་ཏེ་ལོ་སྟོང་གི་བར་དུ་འཕེལ་ཞིང་གནས་པ་དང༌། རྗེ་འདི་ཉིད་མ་འོངས་པ་ན་ངོ་མཚར་རྨད་བྱུང་བཀོད་པའི་འཇིག་རྟེན་དུ་རྒྱལ་བ་སེང་གེའི་ང་རོ་ཞེས་བྱ་བར་འཚང་རྒྱ་བར་འགྱུར་བ་དང༌། རྗེ་བླ་མ་འདི་ལ་དད་པ་བྱེད་པ་རྣམས་ཀྱང་ཞིང་དེར་སྐྱེ་བར་འགྱུར་རོ་ཞེས་སྟོན་པ་ལ། དེ་ལ་གསོལ་བ་རབ་འདེབས་ན། །བསྟན་པ་ལོ་སྟོང་བར་དུ་གནས། །དེ་ནས་འཕོས་ནས་ཤར་ཕྱོགས་ཀྱི། །རྨད་བྱུང་བཀོད་པའི་འཇིག་རྟེན་དུ། །སེང་གེའི་ང་རོ་ཞེས་བྱར་འགྱུར། །དེ་ལ་དད་བྱེད་ཞིང་དེར་སྐྱེ། །ཞིང་མཆོག་དེ་ནི་ཁྱད་པར་འཕགས། །ཞེས་གསལ་བར་གསུངས་སོ། །ལྷ་མོ་དྲི་མ་མེད་པས་ཞུས་པའི་མདོ་ལས།བྱང་ཕྱོགས་གངས་རིའི་རྒྱུད་ཀྱི་སར། །དགེ་བ་ལྡན་པའི་ས་ཕྱོགས་སུ། །དམ་པའི་ཆོས་ནི་རྒྱས་པར་འགྱུར། །ཞེས་རྗེ་བླ་མ་འདི་ཉིད་གང་དུ་འབྱོན་པའི་དགོན་གནས་གསལ་བར་ལུང་བསྟན་ཏོ། །ལང་ཀར་གཤེགས་པའི་མདོ་ལས་བསྟན་པ་ནི། མདོ་དེ་ཉིད་རྒྱ་ནག་ཏུ་འགྱུར་བ་ལས། བཅོམ་ལྡན་འདས་ལ་ཀླུའི་རྒྱལ་པོ་མ་དྲོས་པས་དུང་དཀར་པོ་ཞིག་ཕུལ་བ་མཽ་འགལ་གྱི་བུ་ལ་གནང་ནས་འདི་ཁྱོད་ཀྱིས་འགོག་པའི་རིར་སྦོས་ཤིག །མ་འོངས་པ་ན་དགེ་སློང་པདྨའི་ངང་ལྡན་འདིས་གཏེར་ནས་འདོན་པས་དེའི་ཚོགས་དུང་དུ་འགྱུར་གྱི་གཏེར་བདག་སྤྲེའུ་གནས་བྱེད་དོ། །ཞེས་རྗེ་བདག་ཉིད་ཆེན་པོ་འདིས། འགོག་པ་རི་ཞེས་བྱ་བ་འབྲོག་རི་བོ་ཆེ་དགའ་ལྡན་གྱི་བྱང་ངོས་ནས་དུང་གཏེར་ནས་བཞེས་ཏེ་ལྷ་ས་སྨོན་ལམ་ཆེན་མོའི་ཚོགས་དུང་མཛད། དེ་ནས་འཇམ་དབྱངས་ཆོས་རྗེ་ལ་གནང་སྟེ་འབྲས་སྤུངས་སུ་རྗེའི་བསྟན་པ་ཆེས་ཆེར་འཕེལ་བའི་རྟེན་འབྲེལ་བསྒྲིག་པར་མཛད། ཐུགས་སྨོན་མཛད་པ་ལྟར་གྲུབ་སྟེ་ད་ལྟ་ཡང་འཛམ་བུའི་གླིང་ན་མདོ་སྔགས་ཀྱི་བཤད་སྒྲུབ་འཕེལ་བ་དང༌། དགེ་འདུན་གྲངས་མང་བར་བཞུགས་ཤིང༌། གཏེར་དུང་ཡང་ཀུན་གྱི་མིག་ལ་བལྟར་ཡོད་པ་འདི་ལྟར་རོ། །རྗེ་བཙུན་འཇམ་པའི་དབྱངས་ཀྱིས་ཀྱང་རྗེ་རིན་པོ་ཆེ་ཉིད་ལ་སྤྲུལ་པའི་གླེགས་བམ་ཆེན་མོ་གནང་དུས་གཏེར་དུང་འདིའི་ལོ་རྒྱུས་གསལ་བར་གསུངས་པ་གྲུབ་ཆེན་དབེན་ས་བས་ལུང་བསྟན་གསལ་བའི་མེ་ལོང་ཡི་གེར་བཀོད་པ་དབེན་ས་བཀའ་འབུམ་ན་བཞུགས་པ་ལྟར་རོ། །

                    རྗེ་བླ་མ་འདི་ཉིད་རྒྱུད་ནས་ལུང་བསྟན་ཚུལ་ནི། འཇམ་དཔལ་རྩ་རྒྱུད་ལས། འཇིག་རྟེན་ང་ནི་མྱ་ངན་འདས། །ས་ཡི་སྟེང་འདི་སྟོང་གྱུར་ན། ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །དེ་ཚེ་དགོན་ཆེན་རབ་དགའ་བ། ཁ་བ་ཅན་ནང་ཡོད་པ་ཡིན། །ཞེས་གསལ་བར་ལུང་བསྟན་ཏེ། དེ་ཡང་རྒྱལ་བ་མྱ་ངན་ལས་འདས་ནས་འགྲོ་བ་མགོན་སྐྱབས་དང་བྲལ་བར་གྱུར་པ་ན་རྗེ་བཙུན་འཇམ་པའི་དབྱངས་བྱིས་པ་སྟེ་ཐ་མལ་པའི་ཚུལ་བཟུང་ནས་སེམས་ཅན་གྱི་དོན་རྒྱ་ཆེར་མཛད་པ་དང༌། ལྷག་པར་བྱང་ཕྱོགས་ཁ་བ་ཅན་དུ་དགའ་ལྡན་ཞེས་བྱ་བའི་དགོན་པར་སངས་རྒྱས་ཀྱིས་མཛད་པ་བྱེད་པ་དང༌། མཚན་ཡང་བློ་བཟང་གྲགས་པ་ཞེས་འབྱུང་བར་ལུང་བསྟན། ཡང་འཇམ་དཔལ་རྩ་རྒྱུད་ལས། བློ་ལྡན་དང་པོར་ཡེ་གེ་མ། །དེ་བཞིན་སྡོམ་བརྩོན་དད་པ་བྱུང༌། །རྣམ་པ་དུ་མར་སྡོམ་བརྩོན་གསུངས། །དེ་ཚེ་མཐའ་ཡས་འབྱུང་བར་འགྱུར། །སྡོམ་བརྩོན་ཐམས་ཅད་བསྒྲགས་པ་ཡང༌། །སྟོན་པའི་བསྟན་པ་གསལ་བར་བྱེད། །བསྟན་པ་དེ་ཚེ་ས་སྟེང་དུ། །རྣམ་པར་ཉམས་ཤིང་སྣང་མེད་ལ། །སྟོན་པའི་གཟུགས་བརྙན་ཡིད་དུ་འོང༌། །བྱེད་པར་འགྱུར་བར་ཐེ་ཚོམ་མེད། །ཐམས་ཅད་བྱང་ཆུབ་ལུང་བསྟན་ཏེ། །ང་ཡི་བྱང་ཆུབ་མཆོག་ཐོབ་འགྱུར། །དེར་ནི་འཇིག་རྟེན་སྦྱིན་གནས་འགྱུར། །སྲིད་པ་གསུམ་གྱི་མཐར་ཡང་བྱེད། །སྔགས་དང་རྒྱུད་ལ་མངོན་བརྩོན་པའི། །གྲགས་པ་འཛིན་པར་ཤེས་པར་བྱ། །ཞེས་ཤིན་ཏུ་གསལ་བར་ལུང་བསྟན་ཏེ། ཡི་གེ་མ་ཞེས་པ་ནི། བློ་བཟང་གྲགས་པ་ཞེས་པའི་སཾ་སྐྲ་ཏའི་སྐད་ཀྱི་མིང་ཡིག་དང་པོ་སྟེ། བློ་བཟང་གྲགས་པ་ཞེས་པའི་སྐད་དོད་ལ། མ་ཏི་བྷ་དྲ་ཀིརྟི་ཞེས་འབྱུང་ངོ༌། །དེ་ཡང་མ་ཏི་ཞེས་པ་གཞན་དག་འཁྲུལ་གཞི་མི་འབྱུང་བའི་ཕྱིར་རྗེ་འདིའི་མཛད་ཆེན་བཞིའི་ཡ་གྱལ་ཆོ་འཕྲུལ་མཆོད་པའི་མཛད་པ་ཇོ་བོ་ལ་དབུ་རྒྱན་ཕུལ་ཏེ་ཡིད་འོང་དུ་བྱེད་པ་དང༌། དེའི་ཚེ་གདུལ་བྱ་བགྲང་བ་ལས་འདས་པ་ལ་དགེ་བའི་རྩ་བ་བསྐྱེད་དེ་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་བ་དང༌། དེ་ལྟ་བུའི་བསྟན་པ་འཛིན་པའི་བདག་ཉིད་ཆེན་པོ་དེ་གྲགས་པའི་མཚན་ཅན་ཞིག་བྱུང་ངོ༌། །ཞེས་གཞན་སུ་དང་ཡང་མི་ནོར་བར་བྱ་བའི་ཕྱིར་གསེར་བརྟག་པའི་རྡོ་ཀ་ཞི་པ་ལྟར་ལུང་བསྟན་མཛད་དོ། །དེ་ལྟར་མདོ་རྒྱུད་དུ་མ་ནས་ལུང་བསྟན་ཅིང་སྔོན་གྱི་སྐྱེས་བུ་དམ་པ་དུ་མས་ཀྱང་བསྟན་པའི་བདག་པོ་རྗེ་བླ་མ་འདི་ལྟར་འབྱོན་པ་ལུང་བསྟན་ཏེ། ཆོས་རྒྱལ་སྲོང་བཙན་སྒམ་པོས། དེ་ནས་ཁྱད་པར་བསྙེན་བཀུར་ཆེར་མཛད་པ། །དགེ་སློང་བྱང་སེམས་ཤར་ཕྱོགས་སྐུ་འཁྲུངས་པ། །གསང་སྔགས་འཆང་ཞིང་སྐྱེས་ཆེན་དམ་པ་ནི། །སྙིང་པོའི་མཐའ་རྟེན་རྣལ་འབྱོར་ཆེན་པོ་དེས། །ཞལ་ཡང་བསྒྱུར་ཞིང་བསྙེན་བཀུར་ཆེན་པོ་མཛད། །དེ་ལ་བསྙེན་བཀུར་ཆེར་བྱེད་དེ་དག་ནི། །འཕགས་པའི་གང་ཟག་དགེ་སྦྱོར་ཤ་སྟག་གོ །དེ་ཕྱིར་དེ་དག་ཀུན་ལ་གུས་པ་བསྐྱེད། །དེ་དག་ཅི་ཕྱིར་འཕགས་པ་ཡིན་ཞེ་ན། །སངས་རྒྱས་རྣམས་ལ་མཛད་པ་ཆེན་པོ་མཛད། །དེ་ཕྱིར་དེ་དག་འཕགས་པའི་གང་ཟག་གོ །དེ་ལྟར་འཕགས་པའི་གང་ཟག་རྣམས་འབྱུང་ཞིང༌། །འཁོར་ནི་ལེགས་གནས་སྟོན་པའི་གསུང་རབ་དང༌། །སྟོན་པའི་སྐུ་གཟུགས་དངོས་སུ་བཞུགས་པ་དང༌། །རི་བོ་ཡོན་ཏན་ཅན་ཡང་དེ་ན་ཡོད། །ཅེས་བདག་ཉིད་ཆེན་པོ་འདི་འཁྲུངས་ཡུལ་དང༌། དགེ་བསྙེན་གྱི་སྡོམ་པ་བཞེས་པའི་མཚན་དང༌། ཇོ་བོ་རྣམ་གཉིས་ལ་དབུ་རྒྱན་འབུལ་བ་དང༌། མཆོད་པ་རྒྱ་ཆེན་པོ་མཛད་དེ་བསྟན་པ་རྒྱས་པར་མཛད་པ་དང༌། གསུང་ལས་སྐྱེས་པའི་འཕགས་པའི་གང་ཟག་མཐའ་ཡས་པ་འབྱུང་ཞིང་སྟོན་པའི་བསྟན་པ་ཆེས་ཆེར་གསལ་བར་མཛད་པ་རྣམས་གསལ་བར་ལུང་བསྟན་ཏོ། །

                    ཇོ་བོ་རྗེ་དཔལ་ལྡན་ཨ་ཏི་ཤ་དང་འབྲོམ་རིན་པོ་ཆེ་གཉིས་ཀྱིས་ཡེར་པ་ལྷ་རི་སྙིང་པོར་ལོ་གསུམ་གྱི་བར་དུ་འགྲོ་བ་མཛད་པའི་གསང་ཆོས་བཀའ་གདམས་གླེགས་བམ་ལས། བླ་མ་དྲི་མ་མེད་པས། བདག་ཀྱང་གནས་དེར་ལྷ་འདྲེ་འདུལ་དུ་འགྲོ། །ཞེས་སློབ་དཔོན་པདྨ་དང༌།སྤྲུལ་པ་གཅིག་ནི་རྒྱ་གར་གནས་སུ་འགྲོ། །ཞེས་ཇོ་བོ་ཆེན་པོ་དང༌། སྤྲུལ་པ་གཅིག་ནི་བལ་པོའི་མཐིལ་དུ་འགྲོ། །ཞེས་པཎྜི་ཏ་པདྨ་ཏ་བཛྲ་དང༌། སྤྲུལ་པ་གཅིག་ནི་མདོ་ཁམས་སྨད་ལ་འགྲོ། །མདོ་སྨད་དུ་འཁྲུངས་པ་འཇམ་མགོན་བླ་མ་དང༌། མར་མེ་མཛད་ཀྱང་གནས་མཆོག་འདིར། །སྒྲོལ་མར་བཅས་ཏེ་སྤྲུལ་སྟོང་འགྱེད། །ལྷག་པར་ཆགས་མེད་བསོད་སྙོམས་པས། །སྙན་པའི་དབྱངས་ཀྱིས་གསོལ་བ་འདེབས། །ཕྱོགས་བཞིའི་ལས་ཅན་དབང་དུ་སྡུད། །ང་ཡི་མཆོད་ཚོགས་རྒྱས་པར་བྱེད། །མར་མེ་མཛད་དང་བྱམས་པ་ཡང༌། ཁྱོད་ཀྱི་གྲོགས་བཟང་སྤེལ་བར་བྱེད། །རིང་པོར་མི་ཐོགས་གནས་མཆོག་འདིར། །མཆོད་ཚོགས་རྒྱ་མཚོ་འདུ་བར་འགྱུར། །སྤྱན་རས་གཟིགས་དབང་བཟང་པོར་སྤྲུལ། །ཞེས་དང༌། གླེགས་བམ་ཕ་ཆོས་ལས། གྲགས་དང་ཡང་གྲགས་རིན་ཆེན་གྱི། །གྲགས་པའི་མཐའ་བཟང་དཔལ་དུ་གྲགས། །བློ་གྲོས་ཤེས་རབ་གཞན་དུ་གསོལ། །གཞན་ཡང་གྲགས་པའི་མཚན་རབ་ཅན། །མང་པོས་འགྲོ་བའི་བདེ་སྐྱིད་བསྐྲུན། །ཞེས་དང༌། དེ་ཉིད་ལས། བདག་གི་སྤྲུལ་པ་དམ་པ་ཞིག །རེས་འགའ་དགེ་སློང་ཉིད་དུ་སྤྲུལ། །དེས་ནི་གནས་དེ་སྐྱོང་བར་བྱེད། །རེས་འགའ་བྱིས་པའི་གཟུགས་སུ་འོང༌། །རེས་འགའ་དབུལ་ཕོངས་སྤྲང་པོའི་གཟུགས། །རེས་འགའ་བྱོལ་སོང་བྱ་ཁྱིའི་གཟུགས། །རེས་འགའ་གསོལ་འདེབས་དབྱངས་ཀྱི་གཟུགས། །རེས་འགའ་ཡིག་འབྲུ་གཟུངས་ཀྱི་གཟུགས། །གྲགས་པ་ཅན་ནི་དགེ་སློང་ངོ༌། །བསྟན་གནས་བར་དུ་ཡང་ཡང་འོང༌། །དེ་ནི་རྒྱུད་པ་ཉིད་དང་མཚུངས། །ཁྲིམས་ལྡན་དེ་ཡིས་བྱིན་བརླབས་ཤིང༌། །སྐྱེས་བུ་གསུམ་ནི་དོན་གཉེར་བའི། །བྱ་བ་མྱོང་བ་བརྒྱ་ཕྲག་ཙམ། །གནས་དེར་བསམ་གཏན་སྒོམ་པར་བྱེད། །ཅེས་དང༌། ལྷ་དང་བཅས་པའི་མཆོད་པ་གནས། །བཀུར་འོས་ཉིད་དུ་ངེས་པར་འགྱུར། །མདོར་ན་གནས་མཆོག་དེ་དག་ཏུ། །དང་པོ་བཞི་གྲྭ་ནས་བཟུང་སྟེ། །ཐ་མར་སྟོང་ཕྲག་ཕྱེད་དང་གསུམ། །བསླབ་པ་གསུམ་ལྡན་ཤཱཀྱའི་སྲས། །འགྲོ་བ་ཀུན་གྱི་མགོན་དུ་འགྱུར། །གནས་དེར་ཕྱོགས་དང་ཕྱོགས་མཚམས་ནས། །དགེ་འདུན་དཔག་མེད་འདུ་བར་འགྱུར། །སྤྱིར་ཡང་ལས་ཅན་ཕྱོགས་བཅུར་འཕྲོ། །ཕྱི་ཡི་རྒྱ་མཚོ་དག་དང་མཚུངས། །ཆུ་བོ་བརྒྱ་ཡིས་གང་མི་ནུས། །ཅི་ཙམ་ཞིག་གིས་དམའ་མི་ནུས། །ཞེས་དང༌། ཡང༌། ཐ་མར་བསྟན་པའི་མེ་རོ་དག །གྲགས་པའི་མཚན་གྱིས་གསོ་བར་བྱེད། །དུ་མའི་ཕན་བདེ་སྒྲུབ་བྱེད་པའི། །དེ་ཡང་གནས་མཆོག་དམ་པ་ཡི། །ཞེས་རྗེ་བདག་ཉིད་ཆེན་པོ་འཁོར་དང་བཅས་པ་གསལ་བར་ལུང་བསྟན་ཏོ། །རྗེ་བཙུན་འཇམ་པའི་དབྱངས་ཀྱིས་གྲུབ་ཆེན་འཇམ་དཔལ་རྒྱ་མཚོ་ལ་གསུངས་བའི་ལུང་བསྟན་ལས་ཀྱང༌། སྔོན་བསྐལ་པ་གྲངས་མེད་དཔག་ཏུ་མེད་པའི་སྔ་རོལ་ཏུ། དེ་བཞིན་གཤེགས་པ་དབང་པོའི་ཏོག་ཅེས་བྱ་བ་འཇིག་རྟེན་དུ་བྱུང་སྟེ། འཁོར་ཚོགས་རྒྱ་མཚོའི་དབུས་སུ་ཐེག་པ་མཆོག་ཏུ་གྱུར་པ་རྡོ་རྗེ་ཐེག་པའི་ཆོས་ཀྱི་འཁོར་ལོ་བསྐོར་བར་མཛད་དོ། །

           རྩོམ་སྒྲིག་པ། མང་ར་བ།
              གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                       དྲ་བའི་སྦྲེལ་ཐགhttp://www.tb1025.cn