གསུང་ཆོས་གནང་བ་ལ་པོ་ཏི་བརྒྱ་དང་སུམ་བཅུ་ཐུགས་བཤད་མཛད་པ་ཡིན་ལ། དེ་ལ་མདོ་བཅུ་གཅིག་ནི། ཤེར་ཕྱིན་སྟོང་ཕྲག་ཉི་ཤུ་ལྔ་པ། འཕགས་པ་བརྒྱད་སྟོང་པ། ཡོན་ཏན་རིན་པོ་ཆེ་སྡུད་པ། རྡོ་རྗེ་གཅོད་པ། ཤེས་རབ་སྙིང་པོ། མདོ་སྡེ་དགོངས་པ་ངེས་འགྲེལ། སཱ་ལུ་ལྗང་པའི་མདོ། རྟེན་འབྲེལ་གྱི་མདོ། འཕགས་པ་བཟང་པོ་སྤྱོད་པའི་སྨོན་ལམ། སོ་སོར་ཐར་བའི་མདོ། མདོ་སྡེ་ས་བཅུ་པའོ། །བསྟན་བཅོས་ལ་བརྒྱ་རྩ་བརྒྱད་དེ། བྱམས་ཆོས་ནི། མངོན་རྟོགས་རྒྱན། མདོ་སྡེ་རྒྱན། དབུས་མཐའ་རྣམ་འབྱེད། ཆོས་ཉིད་རྣམ་འབྱེད། རྒྱུད་བླ་མའོ། །དགྲ་བཅོམ་པ་ཆོས་སྐྱོབ་ཀྱིས་མཛད་པ་གཅིག་ནི། ཆེད་དུ་བརྗོད་པའི་ཚོམས་སོ། །ཀླུ་སྒྲུབ་ཀྱིས་མཛད་པ་བཅུ་བཞི་ནི། རྩ་བ་ཤེས་རབ། སྟོང་ཉིད་བདུན་ཅུ་པ། རིགས་པ་དྲུག་བཅུ་པ། རྩོད་བཟློག ཞིབ་མོ་རྣམ་འཐག རིན་ཆེན་ཕྲེང་བ། མདོ་ཀུན་བཏུས། བཤེས་སྤྲིངས། ཆོས་དབྱིངས་བསྟོད་པ། འཇིག་རྟེན་ལས་འདས་པར་བསྟོད་པ། ཤེས་རབ་བརྒྱ་པ། སྐྱེ་བོ་གསོ་ཐིགས། མདོར་བྱས། མདོ་བསྲེའོ། །

        འཕགས་པ་ལྷའི་མཛད་པ་ལྔ་ནི། བཞི་བརྒྱ་པ། ཡེ་ཤེས་སྙིང་པོ་ཀུན་བཏུས། དབུ་མ་འཁྲུལ་འཇོམས། ལག་པའི་ཚད་མ། ཆ་ཤས་ཀྱི་ཡན་ལག་གི་རབ་བྱེད་དོ། །དཔའ་བོས་མཛད་པ་དགུ་ནི། སྐྱེས་རབས། གཞོན་ནུ་མ་བདུན་གྱི་རྟོགས་བརྗོད། སྨོན་ལམ་བདུན་ཅུ་བ། ཕྱིན་ཅི་ལོག་བཞི་སྤོང་བའི་གདམས་ངག བླ་མ་ལྔ་བཅུ་པ། བསྟོད་པ་བརྒྱ་ལྔ་བཅུ་པ། ཀུན་རྫོབ་བྱང་ཆུབ་ཀྱི་སེམས་བསྒོམ་པའི་མན་ངག་རིན་ཆེན་སྤུངས་པ། དོན་དམ་བྱང་ཆུབ་ཀྱི་སེམས་བསྒོམ་པའི་རིམ་པ་རིན་ཆེན་སྒྲོན་མ། མྱ་ངན་བསལ་བའོ། །ཀླུ་བྱང་གི་གཅིག་ནི། རྣམ་བཞག་རིམ་པའོ། །ལེགས་ལྡན་འབྱེད་ཀྱི་གཉིས་ནི། དབུ་མ་སྙིང་པོ། རྟོག་གེ་འབར་བའོ། །ཟླ་གྲགས་ཀྱི་བཞི་ནི། རྡོར་སེམས་སྒྲུབ་ཐབས། ཚིག་གསལ། དབུ་མ་འཇུག་པ། དེའི་རང་འགྲེལ་ལོ། །ཞི་བ་ལྷས་མཛད་པ་གསུམ་ནི། སྤྱོད་འཇུག བསླབ་བཏུས་རྩ་འགྲེལ་ལོ། །དཔལ་སྦས་ཀྱི་གཅིག་ནི། དབུ་མའི་དེ་ཁོ་ན་ཉིད་ལ་འཇུག་པའོ། །ཡེ་ཤེས་སྙིང་པོའི་གཅིག་ནི། བདེན་གཉིས་འབྱེད་པའོ། །ཞི་བ་འཚོའི་གཞིས་ནི། དབུ་མ་རྒྱན། སྡོམ་པ་ཉི་ཤུ་པའི་འགྲེལ་པའོ། །

        སེང་བཟང་གི་གཅིག་ནི། འགྲེལ་པ་དོན་གསལ་ལོ། །ཀ་མ་ལ་ཤཱི་ལའི་བཞི་ནི། དབུ་མ་སྣང་བ། སྒོམ་རིམ་དང་པོ། བར་བ། ཐ་མའོ། །ཇོ་བོས་མཛད་པ་བཞི་ནི། ལམ་སྒྲོན། སྤྱོད་བསྡུས་སྒྲོན་མ། བདེན་གཉིས་ལ་འཇུག་པ། དབུ་མའི་མན་ངག་གོ མཐོ་བཙུན་གྱི་གཅིག་ནི། ཁྱད་པར་འཕགས་བསྟོད་དོ། །བདེ་བྱེད་ཀྱི་གཅིག་ནི། ལྷ་ལས་ཕུལ་བྱུང་གི་བསྟོད་པའོ། །འཕགས་པ་ཐོགས་མེད་ཀྱི་བཞི་ནི། ཐེག་བསྡུས། མདོན་པ་ཀུན་བཏུས། བྱང་ས། ཚུལ་ཁྲིམས་ལེའུ་སྟེ་བཞིའོ། །དབྱིག་གཉེན་གྱི་དགུ་ནི། མཛོད། ཕུང་པོ་ལྔའི་རབ་བྱེད། རྣམ་བཤད་རིགས་པ། ལས་གྲུབ་པའི་རབ་བྱེད། ཉི་ཤུ་པ། སུམ་ཅུ་པ། རྟེན་འབྲེལ་མདོ་འགལ། ཚིགས་ཀྱི་གཏམ། ཡོན་ཏན་བདུན་བརྗོད་པའི་གཏམ་མོ། །ཙནྟྲ་གོ་མིའི་གཉིས་ནི། སྡོམ་པ་ཉི་ཤུ་བ། སློབ་སྤྲིངས་སོ། །ཕྱོགས་གླང་གི་དྲུག་ནི། ཡོན་ཏན་མཐའ་ཡས་པར་བསྟོད་པ། བརྒྱད་སྟོང་དོན་བསྡུས། ཚད་མ་ཀུན་བཏུས། དམིགས་བརྟག་རྩ་འགྲེལ་གཉིས། རིགས་པ་ལ་འཇུག་པའི་སྒོའོ། །

        ཆོས་གྲགས་ཀྱི་བདུན་ནི། རྣམ་འགྲེལ། རྣམ་ངེས། རིགས་ཐིག གཏན་ཚིགས་ཐིག་པ། འབྲེལ་པ་བརྟག་པ། རྒྱུད་གཞན་གྲུབ་པ། རྩོད་པའི་རིགས་པའོ། །དགེ་སྲུང་གི་གཅིག་ནི། ཕྱི་རོལ་དོན་གྲུབ་པོ། །བྲམ་ཟེ་རིན་ཆེན་རྡོ་རྗེའི་གཅིག་ནི། ཚད་མ་རིགས་པ་ལ་སྦྱོར་བའོ། །ཆོས་མཆོག་གི་གཉིས་ནི། སྐད་ཅིག་མ་གྲུབ་པ། གཞན་སེལ་བརྟག་པའོ། །ཤཱནྟི་བའི་གཉིས་ནི། ཤེར་ཕྱིན་མན་རབ། ནང་གི་ཁྱབ་པའོ། །ཡོན་ཏན་འོད་ཀྱི་གཉིས་ནི། འདུལ་བ་མདོ་རྩ། ཀརྨ་ཤ་ཏམ་མོ། །ཤཱཀ་འོད་ཀྱི་གཅིག་ནི། འདུལ་བ་སུམ་བརྒྱ་པའོ། །དགེ་འདུན་བཟང་པོའི་གཅིག་ནི། ཀཱ་རི་ཀཱ་ལྔ་བཅུ་པའོ། །རྗེ་རིན་པོ་ཆེའི་བཅུ་གཅིག་ནི། གསེར་ཕྲེང་། རྩ་ཤེའི་ཊིཀ་ཆེན། རྣམ་བཤད་དགོངས་པ་རབ་གསལ། ལེགས་བཤད་སྙིང་པོ། བྱང་ཆུབ་གཞུང་ལམ། བླ་མ་ལྔ་བཅུ་པའི་རྣམ་བཤད། རྣམ་གཞག་རིམ་པའི་རྣམ་བཤད། རིམ་ལྔ་གདན་རྫོགས་ཀྱི་དམར་ཁྲིད། རིམ་ལྔ་གསལ་སྒྲོན། ནཱ་རོ་ཆོས་དྲུག་གི་ཁྲིད། ལམ་རིམ་ཆུང་བ་རྣམས་ཡིན་པར་གསུངས་ལ། འདིར་དངོས་སུ་བགྲངས་པ་ནི་བརྒྱ་དང་བཅུ་དགུ་འདུག་པས། འདིའི་སྟེང་དུ་ལམ་རིམ་ཆེན་མོ་སྔགས་རིམ་ཆེན་མོ་སོགས་ཀྱང་ཐུགས་བཤད་མཛད་པ་ཡོད་པ་འདྲའོ། །

        རྒྱུན་གྱི་ཐུགས་དམ་ནི། གསང་འདུས་འཕགས་ལུགས་བདེ་མཆོག་ལཱུ་ནག་དྲིལ་གསུམ། དགྱེས་རྡོར། དགྲ་འཇིགས་གཤེད་གསུམ། མི་གཡོ་བ་སྒྲོལ་མ་སོགས་ཡི་དམ་གྱི་ལྷ་མང་པོའི་བསྙེན་པ་རྒྱུན་དུ་མཛད། ཞག་རེ་ལ་ཨ་ར་པ་ཙ་ན་སྟོང་ཕྲག་གཉིས་རེ། མཚན་བརྗོད་ཚར་ནས་ཏ་རེ་གསུང་ཞིང་། གཙོ་བོར་ཡིག་དྲུག་ལ་ཐུགས་དམ་མཐིལ་དུ་མཛད་པས་ཕྱིས་དུང་ཕྱུར་གཉིས་ལྷག་པར་ལོངས། མཚན་ཉིད་པ་གཅིག་ལམ་ཎི་སྟོང་བ་རུ་མང་ཞེས་གསུང་བ་ཡིན་སྣང་། ལྷ་དང་བླ་མའི་གཟུགས་སྣང་གི་དབང་དུ་བྱས་ན། དབུས་ན་རྗེ་བཙུན་འཇམ་དབྱངས་གཡས་ན་མགོན་པོ་ཀླུ་སྒྲུབ། གཡོན་ན་མཁན་ཆེན་ཞི་བ་འཚོ། མདུན་ན་རྗེ་རིན་པོ་ཆེ་ངོ་ཆེན་གྱི་རྣམ་པ་ཅན་གྱིས་འཁོད་པ་ཞིག་གི་གཟིགས་སྣང་དངོས་སུ་རྒྱུན་མར་འབྱུང་བ་དང་། མནལ་ལམ་དུ་འཕགས་པ་ཀླུ་སྒྲུབ་གཙོ་འཁོར། ཆོས་རྒྱལ་སྲོང་བཙན་སྒམ་པོ་ཡབ་ཡུམ། རྗེ་རིན་པོ་ཆེ། ཡེ་ཤེས་མགོན་པོ་ཕྱག་དྲུག་པ། ལྕམ་དྲལ། རྒྱལ་ཆེན་བཞི་སོགས་ཀྱིས་རྗེས་སུ་བཟུང་བའི་མཚན་མ་བྱུང་བ་སོགས་བསམ་གྱིས་མི་ཁྱབ། མངོན་པར་རྟོགས་པའི་ཡོན་ཏན་གྱི་དབང་དུ་བྱས་ན། སྡོམ་པ་གསུམ་རྣམ་པར་དག་ཅིང་། ཀུན་རྫོབ་དང་དོན་དམ་པའི་སེམས་བསྐྱེད་བརྟན་པོས་སྤྱོད་ལམ་རྣམ་བཞི་གང་མཛད་ཀྱང་ཕར་ཕྱིན་དྲུག་ལྡན་དུ་ལམ་ལམ་འཆར་བ་བདེ་སྟོང་དབྱེར་མེད་ཀྱི་རྗོགས་རིམ་ཟབ་མོ་ཐུགས་རྒྱུད་ལ་མངའ་ཞིང་། རླུང་འོད་ཟེར་ལྔའི་ཁ་དོག་གསལ་བར་གཟིགས་པ་སོགས་དཔག་དཀའ་བ་སྟེ། སྐུ་ཚེ་སྔོན་མ་སྨྱོས་རྒྱལ་བ་ལྷ་ནང་བ་ལྟ་བུའི་རྣལ་འབྱོར་གྱི་དབང་ཕྱུག་ཏུ་གྱུར་ན།

        སྐུ་ཚེ་འདིར་ལྟ་ཅི་སྨོས། འཕྲལ་ཕྱི་མཛད་པའི་དབང་དུ་བྱས་ན། ཕྱག་ཏུ་བྱུང་བའི་དངོས་པོ་རྣམས་ཆ་གསུམ་དུ་བགོས་ནས། ཆ་གཅིག་གིས་ཕྱག་དཔེ་དང་རྟེན་གསུམ་བཞེངས། ཆ་གཅིག་གིས་ནད་པ་རྣམས་ཀྱི་ཕྱིར་དུ་སྨན་སྦྱིན་མཛད། ཆ་གཅིག་གིས་གཟིམས་ཁང་གི་ཐབ་སྤྱོད་དང་། སློབ་མ་སྐྱོང་བར་མཛད་ལ། ཕལ་ཆེར་ནི་ལྷ་ཁང་འདུས་སྡེ་བླ་མ་རྣམས་ཀྱི་ཞབས་ཏོག་སོགས་སུ་གཏོང་བར་མཛད་དོ། །   

                                                                                                                      རྩོམ་སྒྲིག་པ། མང་ར་བ།
             གསལ་འདེབས། 
                      རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                       དྲ་བའི་སྦྲེལ་ཐགhttp://www.tb1025.cn