བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །རབ་འབྱམས་རྒྱལ་བའི་ཆོས་སྐུ་ནམ་མཁའི་དབྱིངས། །སྤྲུལ་སྐུའི་འཆར་བ་བགྲང་ཡས་སྐར་ཚོགས་བཞིན། །འགྲོ་ལ་ལམ་བཟང་ཉེར་མཚོན་བཤེས་གཉེན་གྱི། །རྣམ་རོལ་གང་དེ་མཆོག་ཏུ་བསྔགས་པར་འོས། །མི་དམན་བསོད་ནམས་ནོར་བུའི་རྐང་སྟེགས་ཀྱིས། །བློ་བཟང་ཆོས་ཀྱི་གདན་ཁྲི་ལ་འཛེགས་པའི། །རབ་དཀར་གྲགས་པའི་བ་དན་ས་གསུམ་ན། །འཕུར་ལྡིང་གར་གྱིས་མཛེས་ལ་(༥༨བ)གསོལ་བ་འདེབས། །བདེ་ཆེན་ཡུམ་གྱི་ཆུ་འཛིན་ཕུང་པོ་ལས། །འཁྲུངས་མ་ཐག་ཏུ་སར་པའི་ཟླ་ཚེས་ནི། །དྲན་དང་ཤེས་བཞིན་བག་ཡོད་ཤེས་རབ་ཀྱི། །བདུད་རྩིའི་འོད་ཀྱིས་མཛེས་ལ་གསོལ་བ་འདེབས། །ཐུབ་བསྟན་འཛིན་མའི་ལྟོ་བར་ལེགས་ཞུགས་པའི། །ཁྱོད་སྐུའི་ལྷུན་པོ་ཆོས་གོས་འཚམས་སྤྲིན་གྱིས། །གསར་དུ་བརྒྱན་ཚེ་ཉེ་བར་འཁོར་ལྟ་བུར། །བསྔགས་འོས་མཆོག་ཏུ་གྱུར་ལ་གསོལ་བ་འདེབས། །མངོན་མཐོ་ངེས་ལེགས་ཕུན་ཚོགས་ཇི་སྙེད་པ། །གང་ལ་རག་ལས་ཐེག་མཆོག་དགེ་བའི་བཤེས། །གུས་པས་བསྟེན་ལ་མཁས་པའི་མཆོག་གྱུར་པའི། །ནོར་བཟང་དང་མཚུངས་ཁྱོད་ལ་གསོལ་བ་འདེབས། །ཕུན་ཚོགས་དལ་དང་འབྱོར་བའི་ཡིད་བཞིན་ནོར། །རྙེད་དཀའ་དོན་ཆེར་གཟིགས་ནས་བསླབ་གསུམ་གྱི། །རྒྱལ་མཚན་རྩེར་བཀོད་ཐོས་བསམ་སྒོམ་པ་ཡིས། །བྱི་དོར་མཆོག་ཏུ་མཛད་ལ་གསོལ་བ་འདེབས། །ལུས་སྲོག་གཡོ་བ་གློག་གི་ཟློས་གར་དང་། །ཚེ་འདིའི་དཔལ་འབྱོར་གདུག་པའི་སྦྲུལ་གྱི་གནས། །ཇི་བཞིན་ཐུགས་ཆུད་དཀར་ནག་ལས་འབྲས་ལ། །བླང་དོར་ཚུལ་བཞིན་མཛད་ལ་གསོལ་བ་འདེབས། །བཟོད་དཀའ་སྡུག་བསྔལ་གསུམ་གྱི་དུས་མཐའི་སེམས། །སྙིང་ལ་ཁོལ་བ་འཛིན་པའི་འཁོར་བའི་གནས། །རབ་འབར་དམྱལ་བའི་ལྕགས་ཁང་ལྟར་གཟིགས་ནས། །ཐར་པའི་ལམ་ལ་གཞོལ་ལ་གསོལ་བ་འདེབས། །མི་དམན་ལྷག་བསམ་མཆོག་གི་སྟོབས་རྒྱས་ཤིང་། །སྙིང་རྗེ་ཆེན་པོའི་སྐྱ་བ་འཛིན་མཁས་པས། །རིན་ཅེན་བྱང་ཆུབ་སེམས་ཀྱི་གྲུར་ཞུགས་ནས། །འགྲོ་བའི་དེད་(༥༩ན)དཔོན་གྱུར་ལ་གསོལ་བ་འདེབས། །ཐེག་མཆོག་རིགས་ཀྱི་ས་བོན་ལས་འཁྲུངས་ཤིང་། །བྱམས་བརྩེའི་མེ་ཏོག་དཀར་པོ་རབ་རྒྱས་ལ། །ཕ་རོལ་ཕྱིན་དྲུག་ཡལ་གའི་ཁྱོན་ཡངས་པ། །སྐུ་བཞིའི་འབྲས་བུས་མཛེས་ལ་གསོལ་བ་འདེབས། །དེ་ལྟར་ཐུན་མོང་ལམ་གྱིས་རྒྱུད་སྦྱངས་ནས། །རྡོ་རྗེ་ཐེག་པའི་ཡིད་བཞིན་རྒྱ་མཚོ་ཆེར། །དངོས་གྲུབ་གཉིས་ཀྱི་རིན་ཅེན་ལེན་པ་ལ། །བརྩོན་པ་ལྷུར་མཛད་ཁྱོད་ལ་གསོལ་བ་འདེབས། ཁྱད་པར་དྲེགས་ལྡན་དྲག་པོ་གསུམ་གྱི་ཡིད། །རྣམ་པར་གནོན་མཛད་གཏུམ་པོ་གོས་སྔོན་ཅན། །གང་དེས་རྗེས་བཟུང་ནག་ཕྱོགས་བདུད་སྡེའི་དཔུང་། །ཟིལ་གྱིས་གནོན་མཛད་ཁྱོད་ལ་གསོལ་བ་འདེབས། །ལེགས་དཔྱད་འབྱོར་པའི་དབང་ཕྱུག་རྣམ་ཐོས་སྲས། །མཁྱེན་པའི་སྤྱན་སྟོང་རབ་གཡོ་འཆི་མེད་བདག །མི་ཟད་ནུས་མཐུའི་གཏེར་གྱུར་རྡོ་རྗེ་འཛིན། །ངོ་མཚར་གཏེར་ཆེན་གྱུར་ལ་གསོལ་བ་འདེབས། །ཐུགས་ཀྱི་ཤེལ་བུམ་རྨད་བྱུང་ལུང་རྟོགས་ཀྱི། །བདུད་རྩིས་ཡོངས་གང་མཐོན་པོའི་ཆོས་ཀྱི་ཁྲི། །ལེགས་བཤད་སྨྲ་བའི་དཔལ་གྱིས་རབ་མཛེས་པ། །བློ་གསལ་གདུལ་བྱའི་གཉེན་གསོལ་བ་འདེབས། ཁྱབ་བདག་རྡོ་རྗེ་འཆང་དུ་ལེགས་བསྒོམས་ནས། །ཞབས་ལ་གུས་པས་བརྟེན་པའི་འགྲོ་འདི་ལ། །འཕྲལ་དང་ཡུན་གྱི་ཕན་བདེ་མ་ལུས་པ། །སྩོལ་མཛད་དགེ་བའི་བཤེས་ལ་གསོལ་བ་འདེབས། །དེ་ལྟར་བཤེས་གཉེན་དམ་པའི་ཡོན་ཏན་ལ། །ཆ་ཙམ་བསྟོད་ལས་བྱུང་བའི་རྣམ་དཀར་གྱིས། །ཚེ་རབས་ཀུན་ཏུ་ཡོངས་འཛིན་བླ་མ་ཡིས། །(༥༩བ)དགྱེས་བཞིན་རྗེས་སུ་འཛིན་པར་བྱིན་གྱིས་རློབས། །ཚེ་འདིའི་ཆོས་བརྒྱད་རོལ་རྩེད་རྒྱང་བསྲིངས་ཤིང་། །སྲིད་པའི་ཕུན་ཚོགས་ཀུན་ལ་མ་ཆགས་པར། །བྱམས་དང་སྙིང་རྗེ་བྱང་ཆུབ་སེམས་བསྐྱེད་ནས། རྒྱལ་སྲས་སྤྱོད་ལ་སློབ་པར་བྱིན་གྱིས་རློབས། །རིང་ནས་གོམས་པའི་འཁྲུལ་པའི་བག་ཆགས་ཀྱིས། །རྨི་ལམ་བཞིན་དུ་འཁྲུལ་པའི་བློ་འདི་ལ། །སྣ་ཚོགས་ཆོས་ཀུན་ཡུལ་སྟེང་ནས་གྲུབ་པར། །སྣང་ཚུལ་ཇི་བཞིན་རྟོགས་པར་བྱིན་གྱིས་རློབས། །འཁོར་འདས་ཡུལ་དང་ཡུལ་ཅན་མ་ལུས་པ། །རྟོག་པས་རི་མོར་བྱས་ཙམ་ཁོ་ན་ལས། །མ་གཏོགས་ཡུལ་སྟེང་ཆ་ཙམ་མ་མཆིས་པའི། །གནས་ལུགས་མཐར་ཐུག་རྟོགས་པར་བྱིན་གྱིས་རློབས། །ཞེས་རྗེ་བཙུན་ཆོས་ཀྱི་རྒྱལ་པོ་བཙོང་ཁ་པའི་ཆོས་ཀྱི་རྒྱལ་སྲིད་འཛིན་པ་མདར་བ་བློ་བཟང་གྲགས་པའི་ཞབས་ལ་བསྟོད་པ་འདི་ནི་ཆོས་རྒྱལ་མིའི་དབང་པོ་རྣམ་རྒྱལ་བའི་བཀས་བསྐུལ་ནས་དགེ་འདུན་རྒྱ་མཚོའི་དཔལ་གྱིས་ཕོ་བྲང་འོལ་ཁ་སྟག་རྩེར་སྨྲས་པའོ། །

                                                                   རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ། 
      གསལ་འདེབས། 
   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
             དྲ་བའི་སྦྲེལ་ཐགhttp://www.tb1025.cn