ཁྱོད་ཡོན་རི་ཡི་དབང་བོས་ཤེས་བྱ་ཡི།།

དཀྱིལ་འཁོར་ཡུངས་འབྲུའི་གོ་སར་འགོད་(བྱེད)ཅིང་།།

རྣམ་དཔྱོད་གཟུགས་སུ་མ་མཛད་ཆོས་རྣམ་ཀུན།།

རང་རང་ལུས་འཛིན་སྐལ་བ་ཅི་ཡང་བཟང༌།།

བློ་བཟང་མཁྱེན་པའི་སྐད་ཅིག་གིས།།

ཤེས་བྱའི་དཀྱིལ་འཁོར་ཀུན་ཁྱབ་ཅན།།

གྲགས་པའི་འོད་དཔུང་ས་གསུམ་གྱི།།

ཁོངས་ལས་ཨེ་མ་ཤིན་ཏུ་བརྒལ།།

ཕྱོགས་བཅུའི་རྒྱལ་རྣམས་ཀུན་མཆོད་ལས།།

འདི་ཡི་ལུས་སྐྱེས་ཁང་བཟང་ནི།།

དང་བ་ཆེས་ལྷག་ལེ་ལོའི་སྐབས།།

ནམ་ཡང་རགས་པ་མ་ཡིན་ནོ།།

མཁན་པོ་ཁྱོད་ལས་རིག་པ་ནི།།

ཆ་ཤས་མངོན་སུམ་བགྱིས་པ་གང༌།།

འདི་ནི་སྲིད་མཚོ་ཉམ་ང་ལས།།

ངེས་པར་སྒྲོལ་བའི་གྲུ་བརྫིངས་(རྫིངས)ཉིད།།

ཁྱོད་ཀྱི་དྲིན་ལས་གསུང་རབ་ཚོགས།།

རིགས་ལམ་ནས་དྲངས་བསྒྲུབ་བགྱིད་ཅིང༌།།

སྡེབ་སྦྱོར་ལ་མཁས་ངག་སྨྲ་འདིས།།

སྙིང་ནས་ཁྱོད་མཆོད་མཉེས་གྱུར་ཅིག།

 དབང་བོའི་སྒོ་ཀུན་ལེགས་བསྡམས་ཤིང༌།།

དགེ་ལས་མི་གཡོའི་རྟ་དམར་ཅན།།

བླང་དོར་རྣམ་འབྱེད་དཔྱོད་བཟང་གིས།།

 རྟག་ཏུ་དམ་པ་ཁྱོད་མཆོད་དོ།།

 བསྟན་པ་འདི་ལས་ཕྱིར་ཕྱོགས་པའི།།

 རྟོག་གེའི་རིགས་ཚུལ་བྱེ་བ་བརྒྱའི།།

 མི་གཡོའི་སེམས་ཀྱི་རི་ཡི་དབང༌།།

འདི་བསྟེན་ཞབས་ཟུང་ཆུ་སྐྱེས་རྒོད།།

དོན་དེ་ཉིད་ཚིགས་སུ་བཅད་དེ་ཡང་སྨྲ་བ།།

བླ་མའི་ཡོན་ཏན་ཆུ་ཕུང་ལས་འོངས་པའི།།

དད་པའི་ཆུ་ཀླུང་ཆེ་ཆེར་རྒྱས་པ་ན།།

བསྟོད་ཚིག་རྦ་རླབས་བསྟན་པར་མ་བཟོད་དེ།།

མྱུར་བ་མྱུར་བར་ཆལ་ཆིལ་མངོན་པར་འཕྲོ།།

         ཅེས་བྱ་བ་ནི་རྗེ་བཙུན་བླ་མ་ཙོང་ཁ་བ་ཆེན་པོའི་བཀའ་དྲིན་གློ་བུར་ཐོ་རུངས་ ( ཐོ་རེངས་ ) སུ་དྲན་པའི་དད་པའི་ཆུ་ཀླུང་ཅེས་བྱ་བ་ལས་བསྟོད་ཚིག་རྦ་རླབས་ཀྱི་ཕྲེང་བ་མངོན་པར་གཡོ་བ་སྟེ། དོན་ཆེན་པོ་དང་ལྡན་པ་ཉིད་ཀྱི་ཕྱིར་ངག་རིག་(སྨྲ་བ་)ཆོས་དབང་གྲགས་པས་མྱུར་བར་བྲིས་པའོ།།

                                   རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                    དྲ་བའི་སྦྲེལ་ཐགhttp://www.tb1025.cn