ལྷ་མོ་སྒྲོལ་མ་ལ་སྨྲེ་སྔགས་ཀྱི་གསོལ་བ་འདེབས་པ་ཞེས་བྱ་བའི་བསྟོད་པ།

ཡོང་ཁུངས།   ངེད་དགེ་ལུགས་དྲ་བ།     སྤེལ་དུས།  2022-02-04 17:57:14         ཀློག་ཐེངས།  

༄༅༅།།རྒྱ་གར་སྐད་དུ།དེ་བཱི་ཏཱ་ར་ཀུ་བཱ་ཀྱཱ་དེ་ཤ་ནཱ་མ་སྟོ་ཏྲ།བོད་སྐད་དུ།ལྷ་མོ་སྒྲོལ་མ་ལ་སྨྲེ་སྔགས་ཀྱི་གསོལ་བ་འདེབས་པ་ཞེས་བྱ་བའི་བསྟོད་པ།རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ།།ཕྱག་འཚལ་ཕྱག་འཚལ་འཇིག་རྟེན་ཀུན་སྒྲོལ་མ།།ཕྱག་འཚལ་སྐྱབས་མེད་ཕོངས་པ་ཀུན་སྐྱོབ་མ།།ཕྱག་འཚལ་ཡང་ཡང་དྲན་པས་རྗེས་འཛིན་མ།།དེ་རིང་ད་ལྟ་མགོན་མེད་བདག་ལ་སྐྱོབ།།ཁྱོད་སྔོན་སྐྱོབ་པ་རྣམ་གཟིགས་སྤྱན་ཆབ་ལས།།གང་འཁྲུངས་དེ་ཚེ་དེ་མ་ཐག་འདི་སྐད།།སྲིད་གནས་གང་སུ་འཇིགས་པས་འཇིགས་འགྱུར་ཡོད།།དེ་ཀུན་ངས་སྐྱབས་ཞེས་གསུངས་དམ་བཅའ་དགོངས།།མཁའ་ལྟར་ཐུགས་ཟབ་མཁའ་འདྲ་ཡི།།མདོག་འཆང་འགྲོ་ལ་རྗེས་བརྩེ་མ།།སྲིད་གནས་འགྲོ་བ་ལག་འཛིན་པར།།ཞལ་བཞེས་སླུ་བ་མ་མཛད་ཅིག།ཁྱོད་ཉིད་རིག་འཛིན་ལྷ་ཚོགས་ནང་།།ཟག་མེད་དགའ་བདེས་རྣམ་རོལ་བགྱིད།།ཁྱོད་འབངས་བུ་ནི་མེ་ནང་བསྲེག།ཀྱེ་ཀྱེ་ཐོགས་མེད་མཁྱེན་ལྡན་གཟིགས།།བདག་རང་གིས་ནི་ནོངས་བགྱི་ནས།།མེ་ཆུ་དགྲ་སོགས་འཇིགས་གྱུར་པའང་།།གལ་ཏེ་ཁྱོད་སྐུ་རྗེས་དྲན་གྱུར།།སྐྱོབ་མཛད་ལགས་ན་བདག་ཅིས་མིན།།ཉིད་ཕྱག་མཆོད་སྦྱིན་བདུད་རྩི་ཡི།།རྒྱུན་འབེབས་ཡི་དགས་འབུམ་ཕྲག་ཀྱང་།།ཅིག་ཅར་ཚིམ་བགྱིད་ཁོ་བོ་མེས།།ལུས་ཞུ་ཐིག་ལེ་འབེབས་མ་ལགས།།ཡིད་འོང་ཕྱག་མཚན་ཨུཏྤལ་རྩི།།མངར་བསིལ་གྲིབ་མ་བསིལ་ལྡན་པས།།ཅུང་ཟད་རེག་ནའང་གདུང་སེལ་མ།།གུས་ལྡན་བུ་བདག་ཉུག་མི་མཛད།།ཐུགས་རྗེས་བརྐྱང་བའི་ཞབས་གཡས་ཀྱི།།མཐེ་བོང་རྒྱུན་བཟངས་ཐུར་འབེབས་ནས།།ངན་འགྲོའི་གནས་གསུམ་ཚིམ་མཛད་ན།།ཕོངས་པ་བདག་ཅག་གི་ནར་དོར།།ཏིང་འཛིན་གཡོན་བསྐུམ་སྐྱིལ་ཀྲུང་གི།།གར་གྱིས་ས་གསུམ་བདེ་མཛད་མ།།སྦྲང་བུ་མེར་བཅུག་ཁོ་བོ་ལྟ།།གར་སྟབས་རླུང་གིས་ཅིས་མི་བསྐྱོད།།འཛུམ་ཞལ་དགྱེས་མས་གང་གཟིགས་ན།།ཕག་སྡིག་གདོལ་པ་མཛེ་ཅན་ཡང་།།ལྷ་གཟུགས་སྡུག་མཛེས་སྒྱུར་སྤྱོད་ན།།ཁོ་བོ་གཅིག་སྤྱན་ཡུལ་མ་གྱུར།།སྒེག་ལྡེམ་འགྱིང་མཛེས་གཟི་འོད་ལྡན།།ཁྱོད་སྐུ་སུས་མཐོང་དེ་དོན་འགྲུབ།།དོན་གཉེར་རྩེ་གཅིག་རྗེས་སློབ་བུ།།བདག་ལ་ཉིད་གཟུགས་སྟོན་མ་ལགས།།ཁྱོད་སྤྱན་ཨུཏྤལ་དཀྱུས་རིང་གིས།།ཟུར་གཟིགས་འདོད་པའི་ལྷར་འདྲར་འགྱུར།།རྟག་ཏུ་ཉིད་ཀྱི་གདན་གནས་དག།ཇི་ལྟར་སྣང་ཡང་མཁྱེན་མ་ལགས།།ལྷ་སྙན་མདའ་མ་སྒྲ་ཀུན་གྱི།།རྗེས་ཞུགས་ཡུལ་དུས་ཀུན་རིག་མ།།ཁོ་བོ་ཉམ་ཐག་ང་རོས་འབོད།།འབྲུག་སྒྲ་བྲག་རི་ལྟར་གྱུར་གྱི།།སྐྱོབ་མ་ལྷ་ཡི་ཤངས་དྲན་པས།།གངྒཱའི་བྱེ་རྒལ་དྲི་རབ་བསྲུང་།།བདག་འདིར་མེས་ཚིག་ཤ་ཚིལ་གསུར།།རྒྱ་ཆེན་ཕྱོགས་ཁྱབ་ཚོར་མ་ལགས།།ཐུབ་ཆེན་མ་གཅིག་ཟླ་བའི་ལྗགས།།བུང་བའི་མཆུ་རྩེའི་རོ་མཁྱེན་ན།།སེང་གེ་འཕྲོག་བྱེད་མཆོད་སྦྱིན་དུ།།རོ་བྲོ་བ་ལ་ལྗགས་རྨོངས་སྲིད།།ཕྲ་རབ་རྡུལ་བརྒྱའི་རྡུལ་བྱེ་མ།།རྡོ་རྗེའི་ལུས་མངའ་རེག་མཁྱེན་མ།།སྡིག་རྒྱལ་ཁྲོས་པས་མེ་ལྷ་མཆོད།།མི་བཟད་རེག་བྱེད་ཅིས་མི་རེག།ཕྱོགས་དུས་རྣམ་ཀུན་ཐོགས་མེད་པར།།མ་ཆགས་མ་འདྲེས་ཅི་དགའ་ཡང་།།མཁྱེན་མ་དེ་རིང་སྐལ་ངན་བདག།གནས་སྐབས་འདི་འདྲར་གྱུར་མ་དགོངས།།རང་བཞིན་གཉིས་སྡིག་རང་སྤྱོད་དམ།།གཞན་སྟོབས་གཞན་དབང་གྱུར་དེ་ཡང་།།ཐབས་སྟོབས་བརྒྱ་མངའ་ཁྱོད་སྐྱབས་མཛད།།བདག་འདིར་ནོངས་པ་གང་མཆིས་གྲང་།།གཅིག་ཏུ་གཞན་ལ་ཕན་ཞུགས་པས།།མི་ནི་བརྒྱ་རྩ་བརྒྱད་ཞུགས་བཙལ།།དེ་དབུས་ཁོ་བོ་ཁྱོད་འབངས་བསྲེག།ཀྱེ་མ་ཡུམ་གཅིག་བདག་གཡར་ཚ།།སྔོན་ལས་འབྲས་བུ་རྗེས་གཅོད་པའི།།གནས་གྱུར་དེ་དང་དེ་ལས་ཀྱང་།།ཁྱོད་ཐུགས་གསུང་དང་སྐུ་འཇིག་བགྱིད།།དེ་ལས་གཞན་བདག་ཉིད་ཅིར་དགོངས།།ཀྱི་ཧུད་ཁྱོད་ལྷ་ཞབས་པད་དྲུང་།།བསིལ་བའི་གནས་ནས་འབར་བའི་མེས།།མེར་བརྩོན་ཇི་བཞིན་དམྱལ་མེས་འཚེད།།འདི་ཅི་སུས་ཁུར་ལགས་ཞེས་གསུང་།།དེ་བས་མགོན་མེད་མགོན་གཅིག་མ།།ཁྱོད་ཐབས་ཐུགས་རྗེ་ཐོགས་མེད་དེས།།བདག་དང་འགྲོ་བ་ཅི་དགའ་ཡང་།།མཛད་མིན་མཛད་སྲིད་ཁྱེད་ཞུས་པས།།འོན་ཀྱང་ཁོ་བོ་འདིར་ཚིག་པས།།ལུས་ཅན་ཀུན་གྱི་ཟུག་རྔུ་དང་།།ཉོན་མོངས་སྡིག་ལས་ཚིག་གྱུར་ཅིག།ད་ནི་སུ་ལ་རེ་བར་བྱ།།ཁ་ཆེའི་སློབ་དཔོན་ཐམས་ཅད་མཁྱེན་པའི་བཤེས་གཉེན་ཞེས་བྱ་བ།མི་བརྒྱ་དང་བདུན་གྱིས་བསྐོར་བ་ལ་ཙནྡན་གྱི་མེས་བསྲེགས་པའི་ཚེ།ཉིད་ཀྱི་ཡི་དམ་གྱི་ལྷ་རྗེ་བཙུན་མ་འཕགས་མ་སྒྲོལ་མ་ལ་སྨྲེ་སྔགས་ཀྱི་ཚིགས་སུ་བཅད་པ་འདིས་གསོལ་བ་བཏབ་པ་དང་།སྐད་ཅིག་ཡུད་ཙམ་ཐང་ཅིག་ལ་འཕགས་མའི་ཕྱག་ནས་ཆར་གྱི་རྒྱུན་གཉའ་ཤིང་ཙམ་བབས་ནས་མཚོ་ནང་གི་པདྨ་ལྟར་གྱུར་ཏོ་ཞེས་གྲག་གོ།།པཎྜི་ཏ་ཤཱཀྱ་ཤྲཱི་དང་ལོ་ཙཱ་བ་བྱམས་པའི་དཔལ་གྱིས་བསྒྱུར་བ་རྫོགས་སོ།།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn 


བརྒྱུད་འགོད།