རྒྱ་གར་སྐད་དུ། ཨཱརྱ་དཱུ་མ་སཱུ་ཏྲ། བོད་སྐད་དུ། འཕགས་པ་ལྗོན་ཤིང་གི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།།

ཇི་ལྟར་དབྱར་གྱི་ལྗོན་ཤིང་བཟང་པོ་ལ།།འབྲས་བུ་ལོ་མ་མེ་ཏོག་འདབ་རྒྱས་ཀྱང་།།གྲང་ལྷགས་ཐན་པ་དུས་ཀྱི་རླུང་བྱུང་ཚེ།།སྐད་ཅིག་ཙམ་ལ་མེད་པར་འགྱུར་བ་བཞིན།།ཅིས་ཀྱང་མི་སྡོད་སྒྱུ་མའི་རང་བཞིན་ལ།།རང་བཞིན་ཐ་མལ་དེ་བཞིན་ཤེས་པར་བྱ།།དབྱུག་པས་རྒྱབ་ཀྱང་རང་ལ་འབད་པའི་སེམས་མེད་ན།།བྱོལ་སོང་ཕྱུགས་ཀྱི་བུ་དང་ཅིས་མི་ཁྱད།།བསམ་པ་མེད་པར་ཉལ་ཏེ་གཉིད་ལོག་ན།།འཇིག་རྟེན་འདི་ཡི་ཉི་མ་སྒོ་རུ་ནུབ།།སྔོན་གྱི་བསོད་ནམས་ཅི་བསགས་ཟད་དུ་ཉེ།།རང་གི་རང་ལ་བཞེངས་བསྐུལ་མ་བཏབ་ན།།དེ་ལ་གཞན་གྱིས་བཞེངས་བསྐུལ་འདེབས་པ་སུ།།དགེ་བའི་ལས་རྣམས་ཕར་ཆེར་སྤྱད་པ་ནི།།ཞིང་རབ་གཤིན་ལ་ས་བོན་བཏབ་པ་བཞིན།།དཔྱིད་ན་སྣང་བ་མེད་ཀྱང་སྟོན་ན་འབྲས་བུ་སྨིན།།སྡིག་པའི་ལས་རྣམས་ཕལ་ཆེར་སྤྱད་པ་ནི།།གང་ལྟར་འགྲོ་བའི་ས་ཕྱོགས་དེ་ན་སྡོད།།ཕ་དང་མའི་དོན་དུའང་སྡིག་པའི་ལས་མི་བྱ།།ལུས་དང་སྲོག་གི་ཕྱིར་ཡང་དམ་པའི་ཆོས་མི་སྤོང་།།ད་ལྟར་ཆོས་སྤྱོད་ཁོམ་པའི་དུས་ན་བགྱི།།དགེ་བའི་ལས་རྣམས་ཕལ་ཆེར་སྤྱད་པ་ནི།།གང་ལྟར་འགྲོ་བའི་ས་ཕྱོགས་དེ་ན་སྡོད།།དགེ་བ་བཅུ་ཡི་མེལ་ཚེ་དམ་དུ་སྡོམས།།བླ་མེད་བྱང་ཆུབ་སངས་རྒྱས་དང་།།མཐོ་རིས་སྐྱེ་བ་ལྷ་དང་མི།།ཡི་དྭགས་བྱོལ་སོང་དམྱལ་བ་གསུམ།།གང་འདམ་རང་ལ་དབང་ཡོད་ན།།རང་གིས་རང་ལ་གནོད་མ་བྱེད།།དུག་དང་བདུད་རྩི་གང་ཕན་པ།།བལྟས་ན་གསལ་ཏེ་མི་མངོན་ནམ།།བླུན་པོ་བྱིས་པ་ལྟ་བུའི་བློ།།འབྲས་བུ་འདོད་པས་བསླུས་ན་ནི།།ངན་སོང་གསུམ་གྱི་གནས་ཁང་དུ།།སླེབ་ནས་འགྱོད་པས་ཅི་ལ་ཕན།།ཇི་ལྟར་གཉེན་འབྲེལ་མང་ལ་དབང་ཆེ་ཡང་།།ཤི་ནས་གྲོགས་ལ་འགྲོ་རུ་མེད།།དེ་ཡི་དུས་ན་དཔའ་ངར་མེད།།བདག་ཉིད་མལ་ན་ཉལ་བཞིན་དུ།།གཉེན་བཤེས་མང་པོས་མཐའ་བསྐོར་ཡང་།།གཤིན་རྗེའི་ཕོ་ཉས་ཟིན་པའི་ཚེ།།འཆི་བ་གཅིག་པུར་མྱོང་བར་འགྱུར།།དེ་ཚེ་གཉེན་མང་ཅི་ལ་ཕན།།མཛངས་མ་ལྷ་ཆོས་མི་བྱེད་ན།།དེ་ནི་གླུང་པོ་མདོ་མེད་ཡིན།།ཕྱུག་པོ་སྦྱིན་པ་མི་གཏོང་ན།།དེ་ནི་གཞན་གྱི་གཏེར་བསྲུང་ཡིན།།མཁས་པ་དམ་ཚིག་མི་བསྲུང་ན།།དེ་ནི་སྡོང་པོ་ཁོག་རུལ་ཡིན།།ཧ་ཅང་གསོག་ལ་མ་ཞེན་ཅིག།ཧ་ཅང་གསོག་ལ་ཞེན་ཆེས་ན།།བསགས་པ་གཞན་གྱིས་འཁྱེར་དུ་མཆི།།སྦྲང་བུས་སྦྲང་རྩི་བསགས་པ་དེ།།དེ་དག་གཞན་གྱིས་སྤྱོད་པར་བྱེད།།གར་སྐྱེ་སུ་ལའང་ཆ་མེད་ཀྱིས།།རང་གི་ལུས་ལ་དཔེ་ལོང་ལས།།གཞན་གྱི་ལུས་ལ་གནོད་མ་བྱེད།།འབད་པ་མེད་པའི་ཏིལ་དག་ལ།།ཏིལ་མར་འབྱུང་བར་ག་ལ་འགྱུར།།ལེགས་པར་སྤྱད་ན་དཔལ་དུ་ཆེ།།ཉེས་པར་སྤྱད་ན་བྱུར་དུ་ཆེ།།སོ་སོ་སྐྱེ་བོ་བློ་ངན་པ།།མུ་སྟེགས་ལ་ནི་ཡིད་ཆེས་ཤིང་།།ལས་ཀྱི་དོན་དུ་མཚན་མ་སྤྱོད།།མཚན་མས་གྲོལ་བར་ག་ལ་འགྱུར།།དཔེར་ན་སྦུར་འགྲོ་འདོད་པ་ལ།།བལ་མདུད་ནང་དུ་འཐུམ་པ་བཞིན།།སུག་དྲུག་བསྐྱོད་པས་ཕྱི་ཕྱིར་དམ།།མོ་བོན་དག་ལ་སྲིད་མ་ལྟོས།།འདྲེ་སྲིན་དག་ལ་ཡས་མ་འབོད།།བདུད་དང་བགེགས་ལ་སྐྱབས་མ་འཆོལ།།སྐྱེ་ཤིའི་མགོན་དུ་སངས་རྒྱས་བཟང་།།སྡུག་བསྔལ་སྐྱབས་སུ་དམ་ཆོས་བཟང་།།འཇིགས་པའི་མགོན་དུ་དགེ་འདུན་ཆེ།།བློ་གཏད་དཀོན་མཆོག་གསུམ་ལ་གྱིས།།ཡང་དག་བདུད་རྩི་སྨན་རྣམས་འཐུང་།།ལོག་པར་ལྟ་བའི་དུག་མ་འཐུང་།།བྱིས་པ་གཞོན་ནུའི་བསམ་པ་ལ།།གཞོན་ནུ་རྟག་པར་འདུག་སྙམ་སྟེ།།བྱིས་པ་གཞོན་ནུ་ཡོངས་མི་རྟག།ཞག་ཟླ་ཟད་ཀྱིན་རྒས་ལ་ཉེ།།གསོད་སར་ཁྲིད་པའི་བཙོན་བཞིན་དུ།།གོམ་རེ་བོར་ཞིང་འཆི་ལ་ཉེ།།དེ་རིང་སང་འཆི་ཆ་མེད་ཀྱི།།ད་ལྟ་ཉིད་དུ་སྨྱུར་ཏེ་མཛོད།།དེང་འཆི་སང་འཆི་བདག་མི་ཚོར།།ཁྲི་འབོད་སྟོང་འབོད་རྣ་མི་ཐོས།།དགེ་བའི་བཤེས་དང་འབྲལ་དུ་ཉེ།།བདུད་ནི་ག་ལའང་གླགས་ལྟ་ཞིང་།།བགེགས་ནི་གང་ལའང་བར་དུ་གཅོད།།ཚེ་གང་བསགས་པའི་ཟས་དང་ནོར།།བུ་དང་ཆུང་མ་ཡུལ་འཁོར་རྣམས།།སློག་རུལ་བཞིན་དུ་བོར་ནས་ཀྱང་།།གཅིག་པུར་མྱུར་དུ་འགྲོ་དགོས་ན།།བློ་གཏད་ཐུབ་པའི་གྲོགས་ཡོད་དམ།།ལོ་བརྒྱ་ཐུབ་པས་ཟས་ཡོད་ཀྱང་།།ཤི་བའི་ནང་པར་ལྟོགས་པར་འགྲོ།།ལོ་བརྒྱ་ཐུབ་པའི་གོས་ཡོད་ཀྱང་།།ཤི་བའི་ནང་པར་གཅེར་བུར་འགྲོ།།བློ་ལྡན་མཁས་མཛངས་གང་ཡང་རུང་།།དགེ་བཅུ་དཀའ་ཡང་མ་བཏང་ཅིག།མི་དགེ་བཅུ་སྤྱོད་སླ་ན་ཡང་།།ངན་སོང་བཟོད་གླགས་མེད་ལགས་པས།།དེ་ལ་སོམས་ལ་ལྷ་ཆོས་མཛོད།།དང་པོར་སྐྱེས་ཀྱང་གཅིག་པུར་སྐྱེས།།ཐ་མར་འཆི་ཡང་གཅིག་པུར་འཆི།།དེ་ཕྱིར་དགེ་བའི་བཤེས་གཉེན་བཙལ།།ལེགས་པ་ཐམས་ཅད་སྟོན་པའི་ཕྱིར།།དགེ་བའི་བཤེས་གཉེན་ཕ་དང་འདྲ།།ཉེས་པ་ཐམས་ཅད་བཟློག་པའི་ཕྱིར།།དགེ་བའི་བཤེས་གཉེན་མ་དང་འདྲ།།མ་རིག་མུན་པ་སེལ་བའི་ཕྱིར།།དགེ་བའི་བཤེས་གཉེན་སྣང་གསལ་འདྲ།།ཉོན་མོངས་འདམ་ནས་འདྲེན་པའི་ཕྱིར།།དགེ་བའི་བཤེས་གཉེན་གྱད་དང་འདྲ།།དེ་ཕྱིར་དགེ་བའི་བཤེས་གཉེན་བཙལ།།དམ་པའི་ཆོས་སྒོར་མ་ཞུགས་ན།།མི་ལུས་ཐོབ་ཀྱང་དོན་མེད་ཡིན།།ཟིན་མེད་ལས་ལ་མ་བརྩོན་པར།།བརྩོན་འགྲུབ་ཇི་ཙམ་བྱས་གྱུར་ཀྱང་།།ལས་གཞུང་མི་ཆོད་སྦྱོང་བ་ལ།།གྲུབ་པའི་སྙིང་བོ་མེད་ཀྱི།།བྱར་མེད་སྟེང་དུ་སྟོད་དང་།།འཛད་མེད་ལོང་གཏམ་སྨྲ་བ།།སྨྲ་བརྗོད་ཇི་ཙམ་བྱས་ཀྱང་།།ཟིན་མེད་འཛད་པ་མེད་ལགས།།དགོས་པའི་དོན་གོ་ཆུང་གི།།བརྗེད་མེད་ཉམས་སུ་ལོང་དང་།།འགྲུབ་མེད་ཡིད་སྨོན་མ་གཏོང་།།ཡིད་ཡུལ་ཙམ་བྱས་བསྲེགས་པ།།བསམ་པའི་རྒྱང་ཚད་ཡིན་ལགས།།ཅི་བསམ་འགྲུབ་པར་དཀའ་ཡི།།གང་བྱུང་ལས་སུ་ཁྱེར་དང་།།འབྲེལ་མེད་བརྩེ་གདུང་མ་ཆེ།།བརྩེ་གདུང་ཇི་ཙམ་བསྐྱེད་ཀྱང་།།རྟག་ཏུ་འགྲོགས་པ་མེད་ལགས།།རྨི་ལམ་རླུང་མ་འདྲ་ཡིས།།འབྲེལ་མེད་བློ་ཐག་ཆོད་ཅིག།

འཕགས་པ་ལྗོན་ཤིང་གི་མདོ་རྫོགས་སོ།།།།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn